Esekiele
44 Eye wa ngambata vali pombundi yo kosamua ya imba ovaso kutundilo+ kuenje oyo ya yikiwile.+ 2 Noke Yehova wa ndi sapuila hati: “Ombundi eyi yi kamamako oku yikiwa. Oyo ka citava okuti yi yikuiwa kuenda lomue o ka iñililamo; momo Yehova Suku ya Isareli omo a iñilila,+ omo liaco, oyo yamamako oku yikiwa. 3 Pole, usongui o ka tumãla pombundi yaco oco a lile ombolo kovaso a Yehova,+ momo eye usongui. Eye o ka iñilila pocindumba combundi kuenda haipo a ka tundila.”+
4 Noke eye wa ndi pitisa pombundi yo kutundilo toke kovaso yonembele. Eci nda vanja, nda mola okuti ulamba wa Yehova wa yukisa onembele ya Yehova.+ Omo liaco, nda petamisa ocipala cange posi.+ 5 Kuenje Yehova wa ndi sapuila hati: “A mõlomunu, kapako* kuenda yevelela lutate ovina viosi ndu ku sapuila viatiamẽla koviholo kuenda kovihandeleko vionembele ya Yehova. Lavulula ciwa oku iñilila kuonembele kuenda atundilo osi ocitumãlo ci kola.+ 6 Sapuila onjo ya sina ya Isareli hati: ‘Ca popia Ñala Tõlo Yehova ceci hati: “Sipo ovilinga viene viumbondo, Anjo ya Isareli. 7 Eci vu nena ovingendeleyi ka via seviwile evamba lio kutima kuenda lio ketimba vocitumãlo cange ci kola, ovo va vĩhisa onembele yange. Ene weci ombolo yange, lulela kuenda osonde osimbu ocisila cange ci kasi oku nyõliwa omo liovilinga viene viosi via vĩha. 8 Ene ka vu tati ovina viange vi kola.+ Pole, vu nõla vakuene oco va lave ovopange ocitumãlo cange ci kola.”’
9 “‘Ca popia Ñala Tõlo Yehova ceci hati: “Lacimue ocingendeleyi ci kasi vo Isareli ka ca seviwile evamba liovutima kuenda lio ketimba, ci iñila vocitumãlo cange ci kola.”’
10 “‘Pole, va Lewi vana va ndi yanduluka+ eci va Isareli va ndi yanduluka oco va kuame oviteka viavo via vĩha* va ka pita lovitangi omo lieko liavo. 11 Kuenje ovo va ka ndi vumbila vocitumãlo cange ci kola oco va lave olombundi vionembele+ kuenda oku vumba vonembele. Ovo va ka ponda ocilumba cosi coku pia elisi kuenda ocilumba comanu kuenje va ka talama kovaso yomanu oco va vumbe omanu vaco. 12 Omo okuti ovo va va vumbila kovaso yoviteka viavo via vĩha kuenda va linga ewe liocilondokua poku kokela onjo ya Isareli oku linga ekandu,+ eli olio esunga lieci nda votuila eka liange oco ndi va katukile poku lisinga,’ oco Ñala Tõlo Yehova a popia, ‘kuenje ovo va ka pita lovitangi omo lieko liavo. 13 Ovo ka va ka amela kokuange oco va vumbe ndovitunda viange ale oku amela kovina viange vi kola ale kovina vi kola koku kola kuenda ovo va ka kuata osõi omo liovina via vĩha va linga. 14 Pole, ame ndi ka eca kokuavo ovikele vioku tata onembele oco va linge ovopange alio kuenda ovina viosi vi lingiwilamo.’+
15 “‘Catiamẽla kovitunda va Lewi okuti, omãla va Sadoke,+ vana va kuata ovikele vioku tata ocitumãlo cange ci kola eci va Isareli va ndi yanduluka,+ va ka amela kokuange oco va ndi vumbe kuenda va ka talama kovaso ange oco va nyĩhe ulela+ kuenda osonde,’+ oco ca popia Ñala Tõlo Yehova. 16 ‘Ovo, ovo va ka iñila vocitumãlo cange ci kola kuenda va ka amela komesa yange oco va ndi vumbe+ kuenda va ka tẽlisa ovikele viavo viatiamẽla kokuange.+
17 “‘Eci ovo va ka iñila volombundi viocitali co vokati, va sukila oku wala uwalo wovalatanya.+ Omãla va Sadoke ka citava okuti va wala cimue ci vumbula eci ovo va vumba polombundi viocitali co vokati ale vokati kalio. 18 Ovo va sukila oku wala akofue ovalatanya kovitue viavo kuenda oloputula vialinya onoloti vioku sikĩlĩla olombunda viavo.+ Ovo ka citava okuti va wala cimue ci va kokela oku salamĩha. 19 Osimbu ka va tundile kocitali co kosamua okuti, ocitali co kosamua kuna omanu va kasi, va sukila oku lula ovowalo avo oku vumba+ kuenda oku u kapa volohondo vi kola vioku lilamo.+ Kuenje va ka wala ovowalo akuavo oco ka va ka pitiye oku kola* komanu omo liovowalo avo. 20 Ka citava okuti va pemũla esinga liovitue viavo+ ale oku kulisa calua esinga. Ovo va sukila oku tepulula esinga liovitue viavo. 21 Ovitunda ka citava okuti vi nyua ovinyu eci vi iñila vocitali co vokati.+ 22 Ovio ka citava oku kuela ocimbumba ale ukãi umue wa nyãliwa;+ pole, citava lika oku kuela lufeko wosombo ukuacitumbulukila ca va Isareli ale ukãi ocimbumba wocitunda.’+
23 “‘Ovio vi sukila oku longisa omanu vange catiamẽla ketepiso li kasi pokati keci ci kola leci caño; kuenda oku va longisa etepiso li kasi pokati keci ca liña leci ca yela.+ 24 Va sukila oku songola ndolonganji poku tetulula ocitangi cimue;+ ovo va sukila oku sombisa ndomo ci likuata lolonumbi viange.+ Va sukila oku kapako ovihandeleko viange kuenda oviholo viange viatiamẽla kovipito viange viosi+ kuenda oku kolisa asambata ange. 25 Ovo ka citava oku amela komunu umue wa fa sanga va ka vĩhisiwa. Pole, ovo va pondola oku li vĩhisa omo lia isiavo, ina, omõla ulume, omõla ukãi, manji ulume ale omo lia manjavo ukãi ka kuelele.+ 26 Noke yoku yelisiwa kuocitunda cimue, ovio vi sukila oku tendela omunu waco oloneke epanduvali. 27 Keteke eye a ka iñila vocitumãlo ci kola vocitali co vokati oco a vumbe vocitumãlo ci kola, eye o sukila oku eca ocilumba caye cekandu,’+ oco Ñala Tõlo Yehova a popia.
28 “‘Kuenje eci ci ka kala ocipiñalo cavo:+ Ame ndicipiñalo cavo. Ene ka citava oku eca kokuavo ocipiñalo cimue ko Isareli, momo ame ndicipiñalo cavo. 29 Ovo, ovo va ka lia ocilumba colomema,+ ocilumba cekandu kuenda ocilumba ceko+ kuenje ovina vikuavo vina via pongiyiwa locimãho ci kola vo Isareli, vi ka linga viavo.+ 30 Apako osi a velapo pokati kapako atete kuenda ovilumba viosi vi tunda kokuene vi ka tiamẽla kovitunda.+ Kuenje vu sukila oku eca apako atete osema yolomema kovitunda.+ Eci ci ka nena esumũlũho limue ku vosi vakuanjo yene.+ 31 Ovitunda ka vi ka lie onjila layimue ale ocinyama cimue ca li fila pamue ca nyanyũiwa.’+