Isaya
3 Tali! Ñala yocili, Yehova ukualohoka,
O kasi oku tundisa ko Yerusalãi kuenda ko Yuda ekuatiso liosi kuenda okulia,
Ekuatiso liosi liombolo kuenda liovava,+
2 Omunu wa pama kuenda ukuavita,
Onganji kuenda uprofeto,+ ukuakutãha kuenda ukulu,
3 Usongui 50,+ la una wa kemãla kuenda ondunguli,
Una wa loñoloha koku tãha kuenda una wa loñoloha koku linga ovina.+
4 Ndi ka lingisa okuti, akuenje va kala olombuale viavo,
Kuenda una wa hongua* o ka va viala.
5 Omanu va ka lambalala omunu lukuavo,
Omunu lomunu lu a lisungue laye.+
Umalẽhe o ka ñualelapo ukulu,
Kuenda una ka kapiwileko o ka velapo una wa sumbiwa.+
6 Omunu lomunu o ka kuata manjaye vonjo ya isiaye loku popia hati:
“Ove o kuete ocikutu cimue, linga ombiali yetu.
Kala locikele coku lava ongunji eyi yovingululu.”
7 Pole keteke liaco, eye o ka liyula hati:
“Si ka kayisa* apute ove;
Si kuete okulia ale uwalo vonjo yange.
Ko ka ndingisi ombiali yomanu.”
8 Momo o Yerusalãi ya lilondoka,
Kuenda o Yuda ya kupuka,
Momo kolondaka kuenda kovilinga, va ñualelapo Yehova;
Ovo va lekisa esino eci a lisituluila kovaso yulamba waye.*+
9 Emolẽho liovipala viavo, li eca uvangi watiamẽla kokuavo,
Kuenje ovo va sandeka ekandu liavo ndo Sodoma;+
Ovo ka va seteka oku limbika ekandu liaco.
Ngongo yavo, momo va likokela ovo muẽle ovitangi!
10 Sapuila vakuesunga okuti, ovina viosi vi ka enda ciwa kokuavo;
Ovo va ka sumũlũisiwa omo liovina viosi va siata oku linga.*+
11 Ngongo yolondingaĩvi!
Ovitangi vi keya kokuavo,
Momo eci ovio vi linga lovaka avio, ci ka lingiwavo kokuavo!
12 Omanu vange, va kasi oku talisiwa ohali lasongui vavo,
Kuenda ovo va kasi oku vialiwa lakãi.
Amanu vange, asongui vene, va kasi oku vu tungayasi,
Kuenda ovo va kasi oku vu nyẽlisi volonjila viene.+
13 Yehova o votoka ndonganji;
Eye o talama oco a sombise omanu.
14 Yehova o ka sombisa akulu kuenda olombuale viomanu vaye.
“Ene wa timĩhi ocumbo cayuva,
Kuenda ovina wa nyani kohukũi vi kasi volonjo viene.+
15 Vu sanjukila hẽ oku keleketa omanu vange
Loku nyanyõla ocipala colohukũi voneketela?”+ oco Ñala Tõlo Yehova ukualohoka a popia.
16 Yehova wa popia hati: “Omo okuti omãla vo ko Siono vakuepela,
Va siata oku enda okuti, va petula* ovitue viavo,
Va linga ocitiokoso lovaso avo, poku enda levando,
Loku linga ocileñi conjuela lovina vioku liposuisa kovolu avo,
17 Yehova o ka lingisavo okuti, utue womãla vakãi vo Siono u yuka olombande viapute,
Kuenda Yehova o ka lingisa okuti, ovipolo viavo vi molẽha.+
18 Keteke liaco, Yehova o kopa eposo liovina viavo vioku liposuisa,
Ovifuto kuenda ovikuata vioku liposuisa vi kasi ndosãi yokaliye,+
19 Ovingelengele, ovinunga kuenda oloveu,
20 Ovifuto, alienge okovolu, ovovia oku liposuisa,
Oviwala vioku kapa elemba liwa kuenda ovombanda,
21 Olonela vio komuine kuenda ovimbilingu vio kenyulu,
22 Uwalo wovipito, ovikutu, ovowalo kuenda ovipete,
23 Alumuĩlo opeka,+ lovowalo ovalatanya,
Akofue kuenda oloveu.
24 Ku ka kala elemba lĩvi okuti, ulela+ wonguendu hawoko;
Ku ka kala ukolo okuti, uvia hawoko;
Ku ka kala atoto okuti esinga lia posuisiwa halioko;+
Ku ka kala uwalo wovikelẽyi okuti, uwalo wa kemãla hawoko;+
Kuenda ku ka kala amome* oku pia, okuti eposo halioko.
25 Alume vove va ka kupuka losipata,
Kuenda alume vove va pama, va ka kupukila kuyaki.+