Yeremiya
9 Utue wange nda wa kalele ocisimo cimue covava,
Kuenda ovaso ange a kaile ono yasuẽlẽla nda hĩse!+
Ame nda nda lila utanya luteke
Omo liovivimbi viomanu vange.
2 Vekalasoko nda mua kaile ocitumãlo cimue mu kala vakuakulinga ovongende!
Kuenje nda nda sia omanu vange loku enda ocipãla lavo,
Momo vosi yavo vakuakahokolo,+
Ocimunga cimue comanu vakuelimbi.
3 Elimi liavo li kasi ndohonji;
Kuli uhembi, ka va kũlĩhĩle oku kala vakuacili vofeka.+
“Kevĩho va vokiyako evĩho,
Kuenda ka va yevelela lutate kokuange,”+ oco Yehova a popia.
4 “Omunu lomunu a lunguke lomunu a lisungue laye,
Kuenda ko ka koleli ndaño muẽle ku manjene.
5 Omunu lomunu o limbika u a lisungue laye,
Kuenda lomue o vangula ocili.
Ovo va longisa elimi liavo oku vangula uhembi.+
Va likavisa ovo muẽle omo lioku linga eci cĩvi.
6 Ove wa tunga pokati kuhembi.
Omo okuti ovo olohembi, va likala oku ndi kũlĩha,” oco Yehova a popia.
7 Omo liaco, ca popia Yehova ukualohoka ceci hati:
“Ndi ka va kangula loku va seteka,+
Nye vali ndi pondola oku linga lomõla ukãi vomanu vange?
8 Elimi liavo osongo yimue yi ponda, olio li vangula uhembi.
Lomẽla wavo, va vangula eci catiamẽla kombembua komanu va lisungue lavo,
Pole, vokati va sokiya oku lavekela vonutula.”
9 “Anga hẽ si sukila oku va yambula omo liovina evi?” oco Yehova a popia.
“Si sukila hẽ oku fetuluinya ame muẽle ofeka yimue ndeyi?+
10 Ndi ka lila kuenda ndi ka lisiõsiõla omo liolomunda
Kuenda oku imba ocisungo celisiõsuĩlo* omo liovisenge viekalasoko,
Momo ovio via timĩhiwa oco okuti, lomue o pitamo,
Kuenda ka mu yevalela ocileñi coviunda.
Olonjila vio kilu kuenda ovinyama via tila; ovio via enda.+
11 Ndi ka lingisa okuti, o Yerusalãi yi kala ondunda yovawe,+ ocitililo colombua viovusenge,*+
Kuenda ndi ka lingisa alupale o Yuda alunda okuti, ka mu kala olonungi.+
12 Helie wa piãlapo vali kolondunge okuti, o pondola oku kuata elomboloko lieci?
Kulie omẽla wa Yehova wa vanguila oco eye a ci sandeke?
Momo lie ofeka eyi ya nyõliwila?
Momo lie oyo ya kukutila ndekalasoko,
Oco okuti lomue o pondola oku pitamo?”
13 Yehova wa kumbulula hati: “Momo ovo va likala ocihandeleko* cange cina nda kapa kovaso avo kuenda momo okuti, ovo ka va ci kuamẽle ndaño oku pokola kondaka yange. 14 Handi lopo, ovo va siva poku kuama utima wavo muẽle+ kuenda va kuama oviñumañuma via Baale ndomo olonjali viavo via va longisile oku linga.+ 15 Omo liaco, ca popia Yehova ukualohoka Suku ya Isareli ceci hati: ‘Ndi lingisa okuti, omanu ava va lia ocikũla cilula* kuenda ndi va lingisa okuti, va nyua ovava a kuete owule.+ 16 Ndi ka va sanduila pokati kolofeka vina okuti, ovo kuenda olonjali viavo ka va vi kũlĩhĩle+ kuenje ndi ka tuma osipata kokuavo toke eci ndi ka va nyõla.’+
17 Ca popia Yehova ukualohoka ceci hati:
‘Kuati elomboloko.
Kovongi akãi vana va imba ovisungo vielisiõsuĩlo,*+
Kovongi akãi vana va loñoloha oco veye,
18 Oco veye lonjanga kuenda oku tu imbilako elisiõsuĩlo* limue,
Oco okuti, vovaso etu mu tunda asuẽlẽla
Kuenda vovisokopia vietu mu tunda ovava.+
19 Ko Siono ku yevalela ocileñi celisiõsuĩlo limue liokuti:+
“Tua nyõliwa elisi!
Osõi yetu yalua cimue!
Momo tua sia ofeka kuenda ovanyãli va nyõla olonjo vietu.”+
20 Ene akãi yevi ondaka ya Yehova.
Ovatũi ene a tave ondaka yomẽla waye.
21 Momo olofa vieya polonjanela vietu;
Ovio via iñila volosapalalo vietu vi kuete oviteyuilo
Oco vi nyõle omãla volokololo
Kuenda amalẽhe volokololo.’+
22 Popia ndoco, ‘Ca popia Yehova ceci hati:
“Ovivimbi viomanu vi ka kala ndotulumu vovapia,
Ndovitungu viokaliye violomema via tetiwa, vina ukuakungula a sia konyima,
Okuti lomue o pondola oku viongolola.”’”+
23 Ca popia Yehova ceci hati:
“Ukualondunge ka ka lipande omo liolondunge viaye;+
Ukuonene ka ka lipande omo liunene waye;
Kuenda ohuasi ka yi ka lipande omo liovokuasi aye.”+
24 “Pole, una o lipanda, a lipandele eci:
Oku kuata elomboloko kuenda ukũlĩhĩso watiamẽla kokuange,+
Okuti ame ndi Yehova, Una o lekisa ocisola ka ci pongoloka, esunga kuenda esunguluko kilu lieve,+
Momo ovina evi ovio ndi sanjukila,”+ oco Yehova a popia.
25 “Tali! Kuiya oloneke,” oco Yehova a popia “kuenda ndi tetuluila vosi vana va seviwa evamba la vana ka va seviwile evamba,+ 26 va Egito,+ va Yuda+ va Edome+ la va Amoni+ la Moavi+ kuenda vosi vana va tunga vekalasoko+ okuti, va teta esinga pombandu yutue wavo; momo olofeka viosi ka via seviwile evamba kuenda onjo yosi ya Isareli ka ya seviwile evamba kutima.”+