Yehosua
11 Eci Yavini soma yo Hasore a yeva ovina viaco, eye wa tuma esapulo limue ku Yovave soma yo Madone+ kuenda ku soma yo Simironi, ku soma yo Akisafe,+ 2 lo kolosoma via kala konano yovaimbo a kasi kolomunda, levi via kala kanyãla* o kombuelo yo Kinerote, levi via kala ko Sefela kuenda vina via kala koviwulu vio ko Dori+ kutakelo, 3 ku va Kanana+ kutundilo lo kutakelo, ku va Amori,+ ku va Hiti, ku va Perisi, ku va Yevusi kovaimbo a kasi kolomunda kuenda ku va Hivi+ vepato Liomunda Herimone+ kofeka yo Misipa. 4 Omo liaco, olosoma viaco viosi via tunda lolohoka viavo viosi okuti, owiñi walua wa soka ndeseke li kasi kohulo yokalunga, kumosi lolokavalu vialua kuenda akãlu wuyaki. 5 Olosoma viaco viosi, via tava oku li sanga kuenje vieya kuenda via tungila pamosi ocilombo, ocipepi lovava o Meroma oco va liyake lo Isareli.
6 Noke Yehova wa sapuila Yehosua hati: “Ku ka kuate usumba omo liavo,+ momo hẽla kowola ndeyi ame ndi ka va eca vosi yavo kokuove kuenje ove o va ponda. O sukila oku teta asipa olokavalu viavo+ kuenda o sukilavo oku timĩha akãlu avo londalu.” 7 Yehosua kumue lalume vosi vakuavita, va va katukila ocipikipiki ocipepi lovava o ko Meroma. 8 Yehova wa va eca peka lia Isareli+ kuenje ovo va va yula kuenda va va landula toke ko Sidono Yinene,+ ko Misirefoti-Mayimi+ lo Kocimbota co ko Misipa kutundilo kuenda ovo va va ponda toke eci ka pa supile vali laumue.+ 9 Noke Yehosua wa linga lavo ndeci Yehova o sapuilile; eye wa teta asipa olokavalu viavo kuenda wa timĩha londalu akãlu avo.+
10 Noke Yehosua wa tiukila kuenje wa tambula o Hasore kuenda wa ponda osoma yaco losipata,+ momo kosimbu o Hasore oyo ya velelepo pokati kovosoma aco osi. 11 Ovo va ponda vosi va kalamo losipata kuenda va va kundula.+ Ka mua supile lacimue ci fuima.+ Kuenje eye wa timĩha o Hasore londalu. 12 Yehosua wa tambula alupale osi olosoma viaco kuenda wa yula olosoma viaco viosi losipata.+ Eye wa va kundula+ ndeci Mose ukuenje wa Yehova a handelekele. 13 Pole, Isareli ka timĩhile laumue pokati kalupale a kala kilu liolomunda, te lika o Hasore; olio lika Yehosua a timĩha. 14 Ovina viosi vina via pundiwa vialupale kuenda oviunda viaco, va Isareli va vi punda oco vi kale viavo.+ Pole, va kundula omanu vosi losipata toke eci va ponda vosi pokati kavo.+ Ovo ka va ecelele laumue oku amamako lomuenyo.+ 15 Ndeci Yehova a handelekele Mose ukuenje waye, haico Mose a handeleka Yehosua+ kuenje Yehosua wa ci linga. Eye wa linga ovina viosi Yehova a handelekele Mose.+
16 Yehosua wa yula ofeka yaco yosi okuti, ovaimbo a kasi kolomunda, o Negeve yosi,+ ofeka yosi yo Gosene, o Sefela,+ o Araba+ kuenda ofeka yolomunda ya Isareli lo Sefela* yaco, 17 oku upisa Komunda Halaka, yina yi kasi ocipepi lo Seire kuenda toke ko Baale-Gade+ Vocimbota co Levanone, vepato Liomunda Herimone,+ noke eye wa kuata olosoma viavo viosi kuenda wa vi yula loku vi ponda. 18 Yehosua wa linga uyaki lolosoma viaco vokuenda kuotembo yimue. 19 Ka kua kaile olupale lalumue okuti, lua linga ombembua la va Isareli te lika va Hivi vana va tunga ko Giveone.+ Ovo va yula olofeka viosi vikuavo poku linga uyaki.+ 20 Yehova eye wa ecelela okuti, ovitima viavo vi tamalãla+ oco va linge uyaki lo Isareli okuti, o va kundula kuenje ka lekisa ohenda kokuavo.+ Ovo va sukilile oku nyõliwa ndeci Yehova a handelekele Mose.+
21 Kotembo yaco, Yehosua wa kundula va Anaki+ va kala kovaimbo a kasi kolomunda vio Hevirone, vio Deviri, vio Anava kuenda kovaimbo osi a kasi kolomunda vio Yuda kuenda kovaimbo osi a kasi kolomunda vio Isareli. Yehosua wa va kunduila kumosi lalupale avo.+ 22 Ka kua supile laumue u Anaki kofeka ya va Isareli; pa supa+ lika vana va kala ko Gasa,+ ko Gati+ kuenda ko Asidode.+ 23 Omo liaco, Yehosua wa tambula ofeka yosi ndomo Yehova a likuminyile ku Mose+ kuenje Yehosua wa yeca ndocipiñalo ku Isareli, oco a yi tepe okuti ocikoti locikoti lonepa yalio.+ Kuenje ofeka ya kuata epuyuko kuyaki.+