Ukundi
11 Imba* ombolo yove kilu liovava,+ momo noke yoloneke vialua ove o ka yi sanga vali.+ 2 Eca onepa yimue yovina o kuete komanu epanduvali ale ecelãla,+ momo ove kua kũlĩhĩle ocilunga* ci ka pita kilu lieve.
3 Nda alende eyuka lovava, o-o a ka lokisa ombela kilu lieve; kuenje nda uti umue wa kupukila kombuelo ale konano, ocitumãlo cina kua kupukila uti waco, oko u ka kala.
4 Una o lavulula ofela ka ka waya ombuto kuenda una o vanja kalende ka kongula.+
5 Ndeci ove kua kũlĩhĩle ndomo ongusu yomuenyo* yi talavaya vakepa omõla o kasi vokati* kukãi omisi,+ cimuamue haico okuti, kua kũlĩhĩle upange wa Suku yocili una o linga ovina viosi.+
6 Waya ombuto yove komẽle kuenda ku ka ecelele okuti eka liove li puyuka toke koñolosi;+ momo ove kua kũlĩhĩle eyi yi ka kula ciwa, nda yeyi ale yoyo ale nda viosi vi ka kula ciwa.
7 Ocinyi ci sanjuisa kuenda ciwa okuti ovaso a mola ocinyi cekumbi. 8 Omo liaco, nda omunu umue o kala komuenyo anyamo alua, eye a sanjukile anyamo aco osi.+ Pole, eye o sukila oku ivaluka okuti, oloneke viohali pamue vi lua; cosi ci keya, esanda.+
9 Sanjuka omalẽhe, osimbu o kasi umalẽhe kuenda utima wove u sanjukile oloneke viutila wove. Kuama olonjila viutima wove kuenda kuende kuosi ovaso ove a ku songuila; pole, kũlĩha okuti Suku yocili o ka ku nenela esombiso omo liovina viosi evi.+ 10 Omo liaco, upa vutima wove ovina viosi vi koka ovitangi kuenda yuvula ovina vĩvi ketimba* liove, momo utila kuenda ongusu yo vutila esanda.+