Sofoniya
1 Ondaka ya Yehova yeya ku Sofoniya,* omõla a Kusi, omõla Gedaliya, omõla a Amariya, omõla a Hesekiya, koloneke via Yosiya+ omõla a Amoni+ soma yo Yuda yiti:
2 “Ndi ka nyõla olumue ovina viosi vi kasi kilu lieve,” oco Yehova a popia.+
3 “Ndi ka kundula omunu kuenda ocinyama.
Ndi ka kundula olonjila viovailu kuenda olõsi vio vokalunga,+
Kuenda ovilondokua viekandu+ kumue lolondingaĩvi;
Kuenda ndi ka kundula omanu kilu lieve,” oco Yehova a popia.
4 “Ndi ka nyanyumuĩla okuokuo kuange ko Yuda
Kuenda kolonungi viosi vio Yerusalãi,
Kuenda ndi ka nyõla kocitumãlo cilo cosi ca supa ku Baale,+
Onduko yovitunda, yolosuku, yovingendeleyi kumue lovitunda,+
5 Kuenda vana va petamẽla kilu liolusoka kovaso yolohoka viovailu,+
La vana va petamẽla loku lisila ocili ku Yehova+
Haivo va lisila ocili ku Malikama;+
Okuti, ka va sandiliya Yehova ndaño oku u kũlĩhĩsa.”+
7 Ũhila kovaso ya Ñala Tõlo Yehova, momo eteke lia Yehova li kasi ocipepi.+
Yehova wa pongiya ocilumba cimue; eye wa kolisa vana a laleka.
8 “Keteke liocilumba ca Yehova ndi ka kangisa olombuale,
Omãla va soma+ kuenda vosi vana va wala ovowalo ovingendeleyi.
9 Keteke liaco, ndi ka kangisa wosi una o londa kembumbua,*
Vana va yukisa onjo ya cime cavo lungangala kuenda uhembi.
10 Keteke liaco,” oco Yehova a popia,
“Ku ka kala ocileñi conjuela yi tunda Pombundi Yolõsi,+
Oku lisiõsiõla ku tunda kolupale luokaliye,+
Kuenda onjuela yimue yi tunda kolomunda.
11 Lisiõsiõli alonungi vio Makatesi,*
Momo, vakualomĩlu* va nyõliwa;*
Vosi vana va pesalisa opalata va nyõliwa.
12 Kotembo yaco, ndi ka sandiliya o Yerusalãi lolondiyelo,
Kuenda ndi ka kangisa vana va lipolapo* va popia vutima wavo vati:
‘Yehova ka ka linga eci ciwa kuenda eye ka ka linga eci cĩvi.’+
13 Ukuasi wavo u ka pundiwa kuenda olonjo viavo vi ka siala upolokoso.+
Ovo va ka tunga olonjo, pole, ka va ka kalamo;
Kuenda va ka kũla oviumbo viayuva pole, ka va ka nyua kovinyu yaco.+
14 Eteke linene lia Yehova li kasi ocipepi!+
Li kasi muẽle ocipepi kuenda liya lonjanga yalua!*+
Ocileñi ceteke lia Yehova ci koka usumba.+
Keteke liaco ndaño muẽle esualali li liyula.+