Yehosua
4 Eci omanu vosi va mala oku yoka o Yordão, Yehova wa sapuila Yehosua hati: 2 “Nõli 12 kalume pokati komanu, kocikoti locikoti ku tunde ulume umosi,+ 3 kuenda eci kokuavo ocihandeleko eci: ‘Tikuli 12 kovawe vokati ko Yordão, vocitumãlo muna olomãhi viovitunda via talama+ kuenda ambati kumue lene ovawe aco loku a kapa vocitumãlo muna vu ka pita uteke.’”+
4 Kuenje Yehosua wa vilikiya 12 kalume vana eye a nõla pokati ka va Isareli okuti, kocikoti locikoti kua tunda ulume umosi, 5 kuenda Yehosua wa popia lavo hati: “Piti kovaso yocikasia ca Yehova Suku yene, toke vokati ko Yordão kuenda omunu lomunu pokati kene, o sukila oku kapa ewe limosi kocitãhi caye, ndomo ci likuata letendelo liovikoti via va Isareli, 6 oco a kale ndondimbukiso yimue pokati kene. Nda omãla vene veya oku ku puli vati: ‘Momo lie ovawe a-a a kasilili palo?’+ 7 vu sukila oku va sapuila vati: ‘Momo ovava o vo Yordão a kotuiwile kovaso yocikasia+ covisila via Yehova. Eci ocikasia ca yoka o Yordão, ovava o vo Yordão a kotuiwile. Ovawe a-a a ka kala ndonjivaluko yimue komanu va Isareli otembo ka yi pui.’”+
8 Va Isareli va linga ndeci Yehosua a va handelekele. Ovo va tikula 12 kovawe vokati ko Yordão ndeci Yehova a handelekele Yehosua okuti, a likuata letendelo liovikoti via va Isareli. Ovo vambata ovawe aco toke kocitumãlo kuna ovo va laikele oku pita uteke kuenda oko va a kapa.
9 Yehosua wongekavo 12 kovawe vokati ko Yordão pocitumãlo cina olomãhi viovitunda vina viambata ocikasia covisila via talamele+ kuenda ovawe aco a kasiko toke etaili.
10 Ovitunda vina viambata Ocikasia, viamamako oku talama vokati ko Yordão, toke eci ovina viosi Yehova a handelekele Yehosua oco a vi sapuile komanu oku vi linga via tẽlisiwa, ndomo ci likuata lovina viosi Mose a handelekele Yehosua. Vokuenda kuotembo yaco yosi, omanu va yayulako oku yoka. 11 Eci omanu vosi va mala oku yoka, Ocikasia ca Yehova kumue lovitunda, va yoka kovaso yomanu.+ 12 Kuenje va Ruvene, va Gadi kuenda onepa yimue yocikoti ca Manase, va yoka ndovimunga viasualali+ kovaso ya va Isareli vakuavo ndeci Mose a va handelekele.+ 13 Ci soka 40.000 kasualali vana va limalẽhela uyaki, va yoka kovaso a Yehova vanyãla o vekalasoko lio Yeriko.
14 Keteke liaco, Yehova wa kemãlisa Yehosua kovaso ya va Isareli+ vosi kuenda ovo va lekisa esumbilo* lialua kokuaye oloneke viosi viomuenyo waye ndeci ovo va lekisile esumbilo lialua ku Mose.+
15 Kuenje Yehova wa sapuila Yehosua hati: 16 “Handeleka ovitunda vina vi kasi oku ambata ocikasia+ Cuvangi oco vi tunde vo Yordão.” 17 Omo liaco, Yehosua wa handeleka ovitunda hati: “Tundi vo Yordão.” 18 Eci ovitunda via kala oku ambata ocikasia+ covisila via Yehova via tunda vokati ko Yordão kuenda olomãhi viovitunda via liata posi ya kukuta, ovava o Yordão a fetika vali oku lupuka kuenda a samõhaila kolohulo vialio+ ndeci a kala kefetikilo.
19 Omanu va tunda ko Yordão keteke liekũi liosãi yatete kuenda va tungila ocilombo vo Giligali+ kongave yutundilo wo Yeriko.
20 Ovawe 12 vopa vo Yordão, Yehosua wa a ongeka ondunda vo Giligali.+ 21 Noke wa sapuila va Isareli hati: “Kovaso yoloneke eci omãla vene va ka vu puli okuti, ‘Ovawe a-a a lomboloka nye?’+ 22 vu sukila oku lomboluila komãla vene vati: ‘Va Isareli va yoka o Yordão posi ya kukuta+ 23 eci Yehova Suku yene a takatisa ovava o Yordão kovaso avo toke eci ovo va yoka, ndeci Yehova Suku yene a linga eci a takatisa Okalunga Kakusuka kovaso etu toke eci tua yoka.+ 24 Eye wa ci lingila oco okuti, omanu vosi kilu lieve va kũlĩha ndomo eka lia Yehova lia pama+ kuenda oco vu sumbili Yehova Suku yene otembo yosi.’”