Ukanda Wavali ku va Tesalonike

1 Ame ndi Paulu, la Siluano* la Timoteo,+ tu tuma ukanda owu kokuene okuti, kekongelo lia va Tesalonike li kasi vomunga kumue la Suku Isietu kuenda Ñala Yesu Kristu:

2 Ohenda ya piãla lombembua vi tunda ku Suku Isia kuenda ku Ñala Yesu Kristu vi kale lene.

3 A vamanji, olonjanja viosi tu vetiyiwa oku pandula Suku omo liene. Eci ca sunguluka, momo ekolelo liene li kasi oku livokiya calua kuenda ocisola vu likueteli pokati ci kasi oku livokiya.+ 4 Omo liaco, etu muẽle tu vu pandiyi+ pokati kakongelo a Suku omo liepandi liene, lekolelo kalambalalo osi kuenda koloseteko* vu kasi oku pita* lavio.+ 5 Owu owo uvangi wokuti, Suku o sombisa lesunga kuenje mekonda liaco, wa tendiwi okuti vu sesamẽla oku tambula Usoma wa Suku, una vu kasi oku talisiwila ohali.+

6 Esombiso eli lia Suku liesunga, momo eye o kasi oku fetuluinya ohali kuava vo kokeli ohali.+ 7 Pole, ene vu tala ohali, vu ka tambula ekavuluko kumue letu kesituluilo lia Ñala Yesu+ tunde kilu lovangelo vaye va pama londalu yulienge,+ 8 osimbu a nena efetuluinyo ku vana ka va kũlĩhĩle Suku kuenda ku vana ka va pokola kolondaka viwa viatiamẽla ku Ñala yetu Yesu.+ 9 Ovo va ka tambula eyambulo lienyõleho+ ka li pui okuti, ka va kala vali kovaso a Ñala kuenda kovaso yulamba waye wa piãla, 10 eci eye a keya oco a muisue ulamba kumue lolosandu viaye kuenda oku u komõha keteke liaco pokati ka vosi va lekisa ekolelo, momo uvangi tua eca wa tambuiwa lekolelo pokati kene.

11 Omo liaco, olonjanja viosi tu vu likutililako oco okuti, Suku yetu o vu tendi okuti vu sesamẽla oku kovongiwa+ kuenda lunene waye o linga cosi ciwa cu sanjuisa kuenda oku tẽlisa ovilinga vi vetiyiwa lekolelo liene. 12 Eci ci lingiwila oco onduko ya Ñala yetu Yesu yi muisue ulamba kokuene kuenda ene vu kala vomunga kumue laye ndomo ci likuata lohenda ya piãla ya Suku yetu kuenda ya Ñala Yesu Kristu.