OVISILA

1 Yehova wa vilikiya Mose kuenda wa sapela laye oku upisa vombalaka yohongele+ hati: 2 “Vangula la va Isareli* loku va sapuila hati: ‘Nda umue pokati kene o yongola oku eca ocilumba covinyama viovimbo ku Yehova, ocilumba caco cupiwe vocunda colongombe, colomeme ale colohombo.+

3 “‘Nda ocilumba caye ocilumba cimue coku pia elisi copiwa vocunda colongombe, eye o sukila oku eca ocinyama culume ka ci kuete etondelo.+ Eye o sukila oku ceca ku Yehova lutima wosi+ puvelo wombalaka yohongele. 4 Omunu waco o sukila oku kapa eka liaye kutue wocilumba coku pia elisi kuenje ci taviwila vonduko yaye, oco ci linge ocilumba coku tuvika akandu aye.

5 “‘Noke ongombe yi pondiwila kovaso a Yehova kuenda omãla va Arone okuti ovitunda,+ va nena osonde yaco loku yi nyĩla kolonele viosi viutala+ u kasi puvelo wombalaka yohongele. 6 Ocilumba coku pia elisi ci pondiwa kuenda ci tetiwa vovinimbu.+ 7 Omãla va Arone okuti ovitunda, va kape ondalu kutala+ kuenje va longeke olohũi kondalu. 8 Omãla va Arone okuti ovitunda, va ka tikula ovinimbu viaco viocilumba+ kumue lutue waco kuenda ulela* waco kuenje va vi longeka kilu liolohũi vi kasi vondalu kutala. 9 Ovãla kumue lovolu aco, vi sukuiwa vovava kuenje ocitunda ci yoka ovina viaco oco owisi u tuimĩle kutala ndocilumba coku pia elisi okuti, ocilumba cimue ci yokiwa vondalu ceca elemba liwa ku Yehova.+

10 “‘Nda ocilumba caye coku pia elisi copiwa vocunda colomeme,+ pamue wa nõla pokati kolomeme ale kolohombo, eye o sukila oku eca ocinyama culume ka ci kuete etondelo.+ 11 Ocinyama caco, ci pondiwile konele yutala kutundilo kovaso a Yehova kuenje omãla va Arone okuti ovitunda, va nyĩla osonde yaco kolonele viosi viutala.+ 12 Eye o ci teta vovinimbu kumue lutue waco, lulela* waco kuenje ocitunda vi ci longeka kolohũi vondalu yi kasi kutala. 13 Eye o sukula vovava ovãla, lovolu aco kuenje ocitunda ci yoka ovina viaco viosi, oco owisi waco u tuimĩle kutala. Oco, ocilumba coku pia elisi okuti, ocilumba cimue ci yokiwa vondalu ceca elemba liwa ku Yehova.

14 “‘Pole, nda eye o lumba olonjila ndocilumba coku pia elisi ku Yehova, omunu waco o sukila oku eca olonende ale ivuvu violopomba ndocilumba caye.+ 15 Ocitunda ceca onjila yaco kutala kuenda ci teta lolunjala utue waco kuenje o yi yoka oco owisi waco u tuimĩle kutala, pole, osonde yaco o yi nosila konele yutala. 16 Eye o sukila oku upa esãsa loku sunya ovonya aco kuenda o vimba konele yutala kutundilo kocitumãlo kua siata oku kapiwa etiko.*+ 17 Eye o tola onjila pokati kavava, pole, ka yi tepa volonepa vivali. Noke ocitunda ci yi yokela kolohũi vondalu kuenje owisi waco u tuimĩla kutala. Oco, ocilumba coku pia elisi okuti, ocilumba cimue ci yokiwa vondalu ceca elemba liwa ku Yehova.

2 “‘Nda omunu umue eca ocilumba colomema+ ku Yehova, ocilumba caco ci kale cosema ya fina kuenje eye o sukila oku pesilako ulela kuenda onguendu.+ 2 Eye o ceca komãla va Arone okuti, ovitunda kuenje ocitunda ci tikula epupu limue liosema ya fina, ulela kuenda onguendu yaco yosi kuenje owisi waco eye o u tuimisila kutala ndocilumba+ conjivaluko okuti, ocilumba cimue ci yokiwa vondalu ceca elemba liwa ku Yehova. 3 Cosi ci supa kocilumba colomema, ci linga ca Arone kuenda comãla vaye valume+ ndocina cimue ci kola koku kola+ ca tunda kocilumba condalu ci lingiwila Yehova.

4 “‘Nda ove eca ocilumba colomema okuti ca yokiwa vofolono, ci sukila oku kala cosema ya fina okuti, olombolo ka vi kuete etumbisa via tengiwa lulela havio vi kuete epangu kuenda olombolo via livanda ka vi kuete etumbisa okuti, via wavekiwa lulela.+

5 “‘Nda ocilumba cove ocilumba colomema via yokiwa pociyo,+ oco ci kale cosema ya fina okuti, osema ka yi kuete etumbisa ya tengiwa lulela. 6 Ocilumba caco ci timbuiwe vovinimbu kuenda ove o ci itila ulela.+ Oco, ocilumba colomema.

7 “‘Nda ocilumba cove ocilumba colomema ca pangiwila vombia, oco ci sukila oku kala cosema ya fina ya tengiwa lulela. 8 Ove o nena ocilumba colomema ca lingiwila Yehova kuenje ceciwe kocitunda cina ci ka ci tuala ocipepi lutala. 9 Noke ocitunda ci tikula onepa yimue yocilumba colomema, ndocilumba conjivaluko+ kuenje owisi waco o u tuimisila kutala ndocilumba cimue ci yokiwa vondalu ceca elemba liwa ku Yehova.+ 10 Eci ci supa kocilumba colomema, ci linga ca Arone kuenda comãla vaye valume ndocina cimue ci kola koku kola ca tunda kocilumba condalu+ ci lingiwila Yehova.

11 “‘Lacimue ocilumba colomema o lumbila Yehova ci kuata etumbisa,+ momo ka citava oku tuimisa ocina cimue ci kuete etumbisa, ale owiki ndocilumba cimue ci yokiwa vondalu ci lingiwila Yehova.

12 “‘O vieca ku Yehova ndovilumba viapako atete,+ pole, ka citava okuti vi ambatiwa kutala ndovilumba vi eca elemba liwa.

13 “‘Ovilumba viosi violomema o lumba, vi singiwe lomongua; kuenda ku ka ecelele okuti ovilumba viove violomema vi kambela omongua, una u wivaluisi ocisila ca Suku. Eca ovilumba viove viosi kumue lomongua.+

14 “‘Nda ove eca ku Yehova ocilumba colomema okuti ovaima atete, o sukila oku eca olomema viokaliye* via kangiwa vondalu okuti, olomema viokaliye via suliwa ndocilumba colomema covaima ove atete.+ 15 O kapako ulela kuenda onguendu. Oco, ocilumba colomema. 16 Kuenje ocitunda ci kanga olomema viaco ndocilumba conjivaluko+ okuti, olomema vimue via suliwa, ulela kuenda onguendu yaco yosi, ndocilumba cimue ci yokiwa vondalu ci lingiwila Yehova.

3 “‘Nda ocilumba caye ocilumba combembua+ kuenda nda eye o cupa vocunda, ci kaile culume ale comange, o sukila oku eca ku Yehova ocinyama ka ci kuete etondelo. 2 Eye o kapa eka liaye kutue wocilumba caye, loku ci pondela puvelo wombalaka yohongele; kuenje omãla va Arone okuti ovitunda, va nyĩla osonde yaco kolonele viosi viutala. 3 Eye o nena onepa yimue yocilumba combembua, ndocilumba cimue ci yokiwa vondalu ci lingiwila Yehova+ okuti: ulela+ wa sitika kovãla, lulela wosi wa ñuala kovãla, 4 kuenda olongẽla vivali, lulela waco u kasi ocipepi lociwuta. Eye upavo ondeki yi kasi ocipepi lomuma kumue lolongẽla.+ 5 Omãla va Arone va vi yoka oco owisi waco u tuimĩle kutala kilu liocilumba coku pia elisi ci kasi kolohũi vondalu;+ oco, ocilumba cimue ci yokiwa vondalu ceca elemba liwa ku Yehova.+

6 “‘Nda ocilumba caye copiwa vocunda oco ci linge ocilumba combembua ceciwa ku Yehova, eye o sukila oku eca ocinyama ka ci kuete etondelo, ci kaile culume ale comange.+ 7 Nda eye wa lumba okameme ndocilumba caye, a ci lumbile kovaso a Yehova. 8 Eye o kapa eka liaye kutue wocilumba caye kuenje ci pondiwile kovaso yombalaka yohongele. Kuenje omãla va Arone, va nyĩla osonde yaco kolonele viosi viutala. 9 Eye o nena ulela wocilumba combembua, ndocilumba cimue ci yokiwa vondalu ci lingiwila Yehova.+ Eye upa ucĩla wosi wa lẽla u kasi ocipepi loluongo, lulela wa sitika kovãla, lulela wosi wa ñuala kovãla, 10 kuenda olongẽla vivali, lulela waco u kasi ocipepi lociwuta. Eye upavo ondeki yomuma kumue lolongẽla.+ 11 Ocitunda ci yoka ocilumba caco kutala ndokulia* okuti, ocilumba cimue ci yokiwa vondalu ci lingiwila Yehova.+

12 “‘Nda ocilumba caye cohombo, eye o ci nena kovaso a Yehova. 13 Eye o kapa eka liaye kutue wocilumba kuenje ci pondiwila kovaso yombalaka yohongele kuenda omãla va Arone va sukila oku nyĩla osonde yaco kolonele viosi viutala. 14 Onepa eye a ka eca ndocilumba cimue ci yokiwa vondalu ci lingiwila Yehova, mu kongela ulela wa sitika kovãla, lulela wosi wa ñuala kovãla,+ 15 kuenda olongẽla vivali, lulela waco u kasi ocipepi lociwuta. Eye upavo ondeki yi kasi ocipepi lomuma kumue lolongẽla. 16 Ocitunda ci vi yoka oco owisi waco u tuimĩle kutala ndokulia,* oco, ocilumba cimue ci yokiwa vondalu ceca elemba liwa. Ulela waco wosi wa Yehova.+

17 “‘Oco, ci linga ociholo cotembo ka yi pui kovitumbulukila viene viosi, kuosi vu tungila: Ko ka li ulela ale osonde.’”+

4 Yehova wamamako oku sapuila Mose hati: 2 “Sapuila va Isareli okuti, ‘Nda omunu umue wa linga ekandu limue okuti haliocipangoko,+ poku linga ovina Yehova a handeleka okuti ka citava oku vi linga, ku lingiwe ndoco:

3 “‘Nda ocitunda+ cina ca wavekiwa ca linga ekandu+ kuenje ci kokela omanu oku kuata eko omo liekandu a linga, eye o sukila oku eca ku Yehova ongombe yimue ka yi kuete etondelo ndocilumba cekandu.+ 4 Eye o nena ongombe yaco puvelo wombalaka yohongele+ ya Yehova kuenda o kapa eka liaye kutue wongombe, loku pondela ongombe kovaso a Yehova.+ 5 Noke ocitunda+ ca wavekiwa ci tikula onepa yimue yosonde yongombe loku yi nena vombalaka yohongele; 6 kuenje ocitunda ci kapa omuine waye vosonde+ loku nyĩla onepa yimue yosonde olonjanja epanduvali+ kovaso a Yehova okuti, kovaso yongumbo yocitumãlo ci kola. 7 Ocitunda ci kapavo osonde kolombinga vi kasi kutala winsensu vielemba liwa+ u kasi kovaso a Yehova vombalaka yohongele; noke ci kapa onepa yikuavo yosonde ocipepi lociyekelo cutala wocilumba coku pia elisi+ puvelo wombalaka yohongele.

8 “‘Ocitunda cupa ulela wosi wongombe wocilumba cekandu, oku kongelamo ulela wa sitika kovãla, lulela wa ñuala kovãla, 9 kuenda olongẽla vivali kumue lulela walio u kasi ocipepi lociwuta. Oco cupavo ondeki yi kasi ocipepi lomuma kumue lolongẽla.+ 10 Ocitunda cupa ovina viaco ndeci ci lingiwa longombe yocilumba combembua.+ Kuenje ocitunda ci tuimisila owisi wovina viaco kutala wocilumba coku pia elisi.

11 “‘Pole, ocipa congombe kumue lositu yaco, lutue waco, lovolu aco, lovãla kuenda aniña aco,+ 12 okuti ovina viosi vi supa kongombe, eye o vi ambata kosamua yocilombo okuti, kocitumãlo cimue ca yelisiwa kua siata oku kapiwa etiko* kuenda eye o vi yokela volohũi vondalu.+ Ci timĩhiwa kocitumãlo kua siata oku kapiwa etiko.

13 “‘Nda ohongele yosi ya va Isareli yi kuete eko omo lioku linga ekandu limue okuti haliocipangoko,+ pole, ekongelo ka lia kũlĩhĩle okuti lia linga ocina cimue Yehova a handelekele okuti, ka citava oku ci linga,+ 14 noke ekandu liaco lieya oku kũlĩhĩwa, ekongelo li sukila oku nena ongombe yimue ndocilumba cekandu loku ci nena vombalaka yohongele. 15 Akulu va va Isareli va kapa ovaka avo kutue wongombe yaco kovaso a Yehova kuenje ongombe yi pondiwila kovaso a Yehova.

16 “‘Noke ocitunda ca wavekiwa, ci nena onepa yimue yosonde yongombe vombalaka yohongele. 17 Ocitunda ci kapa omuine waye vosonde loku nyĩla onepa yimue yosonde olonjanja epanduvali kovaso a Yehova okuti, kovaso yongumbo.+ 18 Ocitunda ci kapa onepa yimue yosonde kolombinga viutala winsensu+ u kasi kovaso a Yehova vombalaka yohongele; kuenje ci kapa osonde yosi yi supapo kociyekelo cutala wocilumba coku pia elisi u kasi puvelo wombalaka yohongele.+ 19 Eye upa ulela waco wosi kuenda o u timĩhila kutala.+ 20 Haico a linga longombe yaco ndeci a linga longombe yikuavo yocilumba cekandu. Eci, oco a ka linga kuenda ocitunda ci tuvika ekandu liavo+ kuenje va ecelua. 21 Eye o tikula ongombe, o yambata kosamua yocilombo loku yi yoka ndeci a yokele ongombe yatete.+ Oco, ocilumba cekandu cekongelo.+

22 “‘Nda usongui umue+ o linga ekandu okuti haliocipangoko poku linga ocina cimue pokati kovina viosi Yehova Suku yaye a handeleka okuti ka citava oku ci linga kuenda o kuata eko, 23 ale wa kũlĩha ekandu a linga okuti lia pisiwa lovihandeleko, eye o sukila oku nena ocitupi cohombo ka ci kuete etondelo ndocilumba caye. 24 Eye o kapa eka liaye kutue wocitupi cohombo loku ci pondela kocitumãlo coku ponda ocinyama cocilumba coku pia elisi kovaso a Yehova.+ Oco, ocilumba cekandu. 25 Ocitunda ci tikula onepa yimue yosonde yocilumba cekandu lomuine waye, loku yi kapa kolombinga+ vi kasi kutala wocilumba coku pia elisi kuenje osonde yi supapo, o yi nyĩla kociyekelo cutala wocilumba coku pia elisi.+ 26 Eye o tuimisila ulela walio wosi kutala ndulela wocilumba combembua;+ kuenda ocitunda ci tuvika ekandu liaye kuenje ekandu liaye li ecelua.

27 “‘Nda omunu umue wa linga ekandu okuti haliocipangoko poku linga ocina cimue pokati kovina viosi Yehova a handeleka okuti ka citava oku ci linga,+ 28 ale nda wa kũlĩha ekandu a linga, eye o sukila oku nena ohombo yomange ka yi kuete etondelo ndocilumba caye cekandu a linga. 29 Eye o kapa eka liaye kutue wocilumba cekandu kuenda o pondela ocinyama cocilumba cekandu kocitumãlo va siata oku ponda ocilumba coku pia elisi.+ 30 Ocitunda ci tikula onepa yimue yosonde lomuine waye loku yi kapa kolombinga vi kasi kutala wocilumba coku pia elisi kuenda onepa yikuavo yosonde yaco, o yi pesila ocipepi lociyekelo cutala.+ 31 Eye upa ulela waco wosi+ ndeci ulela upiwa kocilumba combembua+ kuenje ocitunda ci yi yoka kuenda owisi waco u tuimĩla kutala ndelemba liwa ku Yehova; kuenje ocitunda ci tuvika ekandu liaye kuenda ekandu liaye li eceliwa.

32 “‘Pole, nda eye o lumba okameme kamue ndocilumba caye cekandu, eye o sukila oku nena okameme komange ka ka kuete etondelo. 33 Eye o kapa eka liaye kutue wocinyama cocilumba cekandu kuenda o ci ponda ndocilumba cekandu kocitumãlo coku pondela ocinyama cocilumba coku pia elisi.+ 34 Ocitunda ci tikula onepa yimue yosonde yocilumba cekandu lomuine waye loku yi kapa kolombinga viutala wocilumba coku pia elisi+ kuenda osonde yosi yi supapo, o yi pesila kociyekelo cutala. 35 Eye upa ulela waco wosi ndeci vopa ulela kocitupi comeme cocilumba combembua kuenje ocitunda ci tuimisila ulela waco kutala kilu liocilumba condalu+ ci lingiwila Yehova; noke ocitunda ci tuvika ekandu liomunu waco omo liekandu a linga kuenje ekandu liaye li ecelua.+

5 “‘Nda omunu umue wa mola elinga limue lĩvi ale wa ci kũlĩha kuenje o kovongiwa oco a ci imbile uvangi+ powiñi,* pole, eye ka ci lombolola, eye o kuata eko liekandu kuenje o yambuiwa omo lieko liaye.

2 “‘Ale nda omunu umue wa lamba kocina cimue ca vĩha, ci kaile kocivimbi cocinyama covusenge ca vĩha, ale kocinyama covimbo ca vĩha, pamue kokacinyama kamue ka vĩha,+ eye o vĩhisiwa kuenda o kuata eko ndaño ka ci limbukile. 3 Nda umue wa lamba kocina cimue ca vĩha ci tunda komunu,+ ale kocina cimue ca vĩha okuti, ci pondola oku u vĩhisa kuenje o ci limbuka, o kuata eko.

4 “‘Ale nda omunu umue wa yayulako oku lisinga, ndaño okuti ohuminyo yaco yiwa ale yĩvi, pole, ka ci kũlĩhĩle, noke wa limbuka okuti wa yayulako oku lisinga, o kuata eko.*+

5 “‘Nda eye o kuete eko omo liovina a linga, o sukila oku litavela+ ekandu a linga. 6 Handi vali, eye o nena ocilumba ceko ku Yehova omo liekandu a linga+ okuti, omeme yomange yopiwa vocunda, pamue okameme komange ale okahombo komange ka eciwa ndocilumba cekandu. Noke ocitunda ceca ocilumba coku tuvika ekandu liomunu waco.

7 “‘Nda eye ka pondola oku eca omeme, citava oku eca ku Yehova olonende vivali ale ivuvu vivali violopomba+ ndocilumba caye ceko liekandu a linga okuti, yimue yocilumba cekandu, yikuavo yocilumba coku pia elisi.+ 8 Eye o sukila oku vi ambata kocitunda kuenje ocitunda tete, ci ka eca yimue yocilumba cekandu kuenda ci teta utue waco lolunjala konepa yo kovaso yosingo, pole, utue waco ka u tundiko. 9 Ocitunda ci nyĩla onepa yimue yosonde yocilumba cekandu konele yutala, pole, osonde yi supapo yi pesiwe kociyekelo cutala.+ Oco, ocilumba cekandu. 10 Eye o ka eca onende ale ocivuvu cikuavo, ndocilumba coku pia elisi ndomo ci kisikiwa vocihandeleko;+ kuenda ocitunda ci tuvika ekandu liomunu waco kuenje ecelua.+

11 “‘Nda eye ka kuete epondolo lioku eca olonende vivali ale ivuvu vivali violopomba, o sukila oku eca onepa yekũi yo efa*+ yosema ya fina ndocilumba cekandu. Ka sukila oku ci kapa ulela ale onguendu, momo ocilumba cekandu. 12 Eye o nena ocilumba caco kocitunda kuenje ocitunda ci tikula epupu limue ndocilumba conjivaluko kuenda o ci yoka oco owisi waco u tuimĩle kutala kilu liovilumba viondalu vi lingiwila Yehova. Oco, ocilumba cekandu. 13 Ocitunda ci tuvika akandu osi omunu waco a linga kuenje ecelua.+ Onepa yi supapo yocilumba yi linga yocitunda+ ndeci ci lingiwa locilumba colomema.’”+

14 Yehova wamisako oku sapuila Mose hati: 15 “Nda omunu umue wa lueyela ovina vi kola via Yehova+ okuti ka ci lingile ocipango, o sukila oku nena ku Yehova omeme ka yi kuete etondelo yopiwa vocunda ndocilumba ceko;+ ondando yolosiekele* viopalata yi likuate locilemo cosiekele cocitumãlo ci kola.*+ 16 Kuenje ocitunda ceca ondando yekandu omunu a lingila ocitumãlo ci kola kuenje eye o vokiyako onepa yatãlo kondando yaco.+ Eye eca ofeto yaco kocitunda kuenda ocitunda ci tuvika ekandu+ liaye locitupi comeme yocilumba ceko kuenje ecelua.+

17 “Nda omunu umue wa linga ekandu poku linga ovina Yehova a handeleka okuti ka citava oku vi linga, ndaño okuti eye ka ci kũlĩhĩle, lopo o kuata eko kuenje o yambuiwa omo lieko liaye.+ 18 Eye o sukila oku nena kocitunda omeme ka yi kuete etondelo yopiwa vocunda ndomo ci likuata londando ya kisikiwa oco yeciwe ndocilumba ceko.+ Kuenje ocitunda ci tuvika ekandu omunu waco a linga, omo ka li lingile ocipango kuenje ecelua. 19 Oco, ocilumba ceko. Eye o kuata eko omo a lingila ekandu Yehova.”

6 Yehova wamamako oku sapuila Mose hati: 2 “Nda omunu umue o linga ekandu kuenda o lueyela Yehova+ poku kemba u a lisungue laye, catiamẽla kocina cimue vo kundika,+ ale ocina cimue vo wĩha kuenje eye o nyana ale o kemba u a lisungue laye, 3 pamue alula ocina ca nyelela yu o ci soleka loku lisinga luhembi catiamẽla kekandu a linga,+ a linge ndoco: 4 Nda eye wa linga ekandu kuenje o kuete eko, a tiuwiye eci a nyana, leci a punda, leci a kemba, leci vo kundika, ale ceci ca nyelisiwa kuenje wa ci alula, 5 ale ocina cimue eye a lisinga luhembi kuenda o sukila oku feta ondando ya lisoka layo+ kuenje o vokiyako onepa yatãlo kondando yaco. Eye o ka ceca ku muẽle yaco eteke a limbukiwa okuti o kuete eko. 6 Kuenje eye o ceca kocitunda ndocilumba ceko ku Yehova okuti, omeme ka yi kuete etondelo yopiwa vocunda ndomo ci likuata londando ya kisikiwa, momo ocilumba ceko.+ 7 Ocitunda ci tuvika ekandu liomunu waco kovaso a Yehova kuenje ovina viosi eye a linga okuti o kuete eko, viu ecelua.”+

8 Yehova wamisako oku sapuila Mose hati: 9 “Handeleka Arone kumue lomãla vaye hoti: ‘Eci oco ocihandeleko cocilumba coku pia elisi:+ Ocilumba coku pia elisi ci kamamako oku kala kilu liolohũi kutala uteke wosi toke komẽle kuenda ondalu yamamako oku taimila kutala. 10 Ocitunda ci ka wala uwalo waye wutunda wovalatanya+ kuenda ci ka wala oloputula* viovalatanya+ vioku sitika etimba liaye. Noke eye upa etiko*+ liocilumba coku pia elisi ca timĩhiwa vondalu kutala kuenda o li kapa konele yutala. 11 Kuenje eye o lula uwalo waye,+ o wala uwalo ukuavo kuenda upa etiko, o li kapa pocitumãlo cimue ca yela kosamua yocilombo.+ 12 Ondalu yamamako oku taimĩla kutala. Oyo ka yi ka imiwe. Ocitunda ci siakãlelako olohũi+ omẽle lomẽle kuenda ci kapako ocilumba coku pia elisi kuenje ci tuimisila kutala ulela wocilumba combembua.+ 13 Ondalu yi kamamako oku taimĩla kutala. Oyo ka yi ka imiwe.

14 “‘Ocihandeleko cocilumba colomema ceci:+ Ene vumãla va Arone, vu sukila oku ci lumbila Yehova kovaso yutala. 15 Umue pokati kavo upa epupu limue liosema ya fina kocilumba colomema lulela waco, longuendu yayo yosi yi kasi kocilumba colomema kuenje eye o yi timĩhila kutala ndocilumba conjivaluko ceca elemba liwa ku Yehova.+ 16 Arone lomãla vaye, va ka lia eci ci supapo.+ Oco, ci liwa ndombolo ka yi kuete etumbisa kocitumãlo cimue ci kola. Ovo va ka ci lila vocitali combalaka yohongele.+ 17 Ocilumba colomema ka ci ka yokiwe letumbisa.+ Ame nda ceca ndonepa yavo kovilumba viange viondalu.+ Momo oco, ocina cimue ci kola koku kola+ ndocilumba cekandu kuenda ndocilumba ceko. 18 Alume vosi pokati komãla va Arone va sukila oku lia ocilumba caco.+ Oco, ci linga onepa yavo otembo ka yi pui kovitumbulukila viavo okuti, ci tunda kovilumba viondalu+ via lingiwila Yehova. Cosi ci lambako* ci kola.’”

19 Yehova wa sapuila vali Mose hati: 20 “Ocilumba Arone kumue lomãla vaye va ka eca ku Yehova keteke eye a wavekiwa ceci:+ onepa yekũi yo efa*+ yosema ya fina ndocilumba colomema+ ceciwa olonjanja viosi okuti, onepa yimue yeciwa komẽle kuenda onepa yikuavo yeciwa koñolosi. 21 Ocilumba caco ci lingiwa lulela pociyo.+ Poku ci nena o ci tenga ciwa lulela, o ci yoka kuenda o ci teta vovinimbu ndocilumba colomema ceca elemba liwa ku Yehova. 22 Ocitunda cina ci ko piñainya pokati komãla vaye,+ oco ci ka ci linga. Oco ociholo cotembo ka yi pui: Ocilumba cosi ci timĩhiwe kovaso a Yehova. 23 Ocilumba cosi colomema cocitunda, ceciwe cosi. Ka ci ka liwe.”

24 Yehova wa sapuila vali Mose hati: 25 “Sapuila Arone kumue lomãla vaye hati: ‘Ocihandeleko cocilumba cekandu ceci:+ Kocitumãlo ku pondiwila ocinyama cocilumba coku pia elisi,+ oko ku pondiwilavo ocinyama cocilumba cekandu kovaso a Yehova. Oco, ocina cimue ci kola koku kola. 26 Ocitunda cina ceca ocilumba caco cekandu, ci sukila oku liako.+ Oco, ci liwa kocitumãlo cimue ci kola, kocitali combalaka yohongele.+

27 “‘Cosi ci lamba kositu yocilumba caco, ci kola kuenda nda omunu umue o nyĩla osonde kuwalo waye, o sukila oku sukuila kocitumãlo ci kola uwalo waco wa nyĩliwa losonde. 28 Nda ositu yocilumba caco ya telekiwa vombia yotuma, ombia yaco, yi tetuiwe. Pole, nda ca telekiwa vombia yosipi, ombia yaco yi kungiwe loku sukuiwa lovava.

29 “‘Alume vosi pokati kovitunda, va ka lia ocilumba caco.+ Oco, ocina cimue ci kola koku kola.+ 30 Pole, lacimue ocilumba cekandu ci liwa nda onepa yimue yosonde yaco ya tualiwa vombalaka yohongele oco yi tuvike ekandu vocitumãlo ci kola.+ Ci timĩhiwe vondalu.

7 “‘Ocihandeleko cocilumba ceko ceci:+ Oco, ocina cimue ci kola koku kola. 2 Ovo va ka pondela ocinyama cocilumba ceko pocitumãlo va siata oku pondela ocinyama cocilumba coku pia elisi kuenda osonde yaco+ yi nyĩliwe kolonele viosi viutala.+ 3 Eye o ka eca ulela waco wosi,+ oku kongelamo ucĩla wa lẽla, lulela wa ñuala kovãla, 4 kuenda olongẽla vivali, lulela waco u kasi ocipepi lociwuta. Upavo ondeki yomuma kumue lolongẽla.+ 5 Ocitunda ci ka yoka ovina viaco kuenje owisi waco u tuimĩla kutala ndocilumba cimue ci yokiwa vondalu ci lingiwila Yehova.+ Oco, ocilumba ceko. 6 Alume vosi pokati kovitunda va ka ci lia+ kuenda ci liwile kocitumãlo ci kola. Eci ocina cimue ci kola koku kola.+ 7 Ocihandeleko catiamẽla kocilumba cekandu, ci tiamisiwilavo kocilumba ceko; oco, ci tiamẽla kocitunda ci tuvika laco akandu.+

8 “‘Eci ocitunda ci lumbila ocilumba coku pia elisi omunu umue, ocipa+ cocinyama cocilumba coku pia elisi omunu waco a eca kocitunda, ci linga cocitunda.

9 “‘Ocilumba cosi colomema okuti ci yokiwa vofolono ale ci kangiwa vombia, pamue pociyo,+ ci tiamẽla kocitunda cina ca ceca. Oco, ci linga caye.+ 10 Pole, ocilumba cosi colomema ci tengiwa lulela+ ale ca kukuta,+ ci tiamẽla komãla valume vosi va Arone; omunu lomunu o ka tambula onepa yimuamue.

11 “‘Ocihandeleko cocilumba combembua+ omunu umue a pondola oku eca ku Yehova ceci: 12 Nda eye o ceca oco a lekise olopandu,+ o ceca kumue locilumba colopandu okuti, olombolo ka vi kuete etumbisa via tengiwa lulela haivio, vi kuete epangu kuenda olombolo via livanda ka vi kuete etumbisa via lingiwa losema ya fina okuti, ya tengiwa kuenda ya wavekiwa lulela. 13 Eye eca ocilumba caco kumue lolombolo vi kuete etumbisa haivio vi kuete epangu kuenda ocilumba colupandu viovilumba viaye viombembua. 14 Ecavo onepa lonepa yocilumba caco ndonepa yi kola ku Yehova; oco, ci tiamẽla kocitunda cina ci ka nyĩla osonde yovilumba viombembua.+ 15 Ositu yocilumba colopandu okuti ya eciwa ndovilumba viaye viombembua, yi liwe keteke eye a yi lumba. Ka citava okuti eye o seleka onepa yimue yositu toke komẽle.+

16 “‘Nda ocilumba a eca, ohuminyo yimue+ ale ocilumba cimue ceciwa lutima wosi,+ ci liwe keteke a eca ocilumba caye kuenda eci ci supapo, ci liwe keteke li kuamamo. 17 Pole, onepa yositu yi supa kocilumba keteke liatatu, yi timihĩwe londalu.+ 18 Nda ositu yocilumba caye combembua ci liwa keteke liatatu, omunu wa ceca ka taviwa la Suku. Ocilumba caco ka ci kuata esilivilo; momo ocina cimue ca vĩha kuenje omunu o lia kositu yaco, o yambuiwa omo lieko liaye.+ 19 Ositu yosi yi lamba kocina cimue ca vĩha, ka yi ka liwe. Yi timĩhiwe londalu. Omunu wosi wa yelisiwa, citava oku lia ositu ya yela.

20 “‘Pole, omunu una okuti wa vĩha kuenje o lia ositu yocilumba combembua okuti ca Yehova, omunu waco a tepiwe* pokati komanu vaye.+ 21 Nda umue o lamba kocina cimue ca vĩha, ale kocina cimue ca vĩha ci tunda komunu,+ ale kocinyama ca vĩha,+ pamue kocina cimue ca vĩha haico cumbondo+ kuenje o lia onepa yimue yositu yocilumba combembua ca eciwa ku Yehova, omunu waco a tepiwe* pokati komanu vaye.’”

22 Yehova wamisako oku sapuila Mose hati: 23 “Sapuila va Isareli hoti: ‘Ka citava oku lia ulela+ wongombe, ale womeme, pamue wohombo. 24 Ulela wocinyama ca lifila kuenda ulela wocinyama ca pondiwa locinyama cikuavo, ka citava oku lia ulela waco,+ pole, citava oku linga lawo ocina cikuavo. 25 Wosi o lia ulela wocinyama eye a eca ndocilumba cimue ci yokiwa vondalu ci lingiwila Yehova, omunu waco a tepiwe* pokati komanu vaye.

26 “‘Ka citava oku lia osonde+ kovitumãlo viene viosi vu tungila, ci kaile osonde yolonjila ale yovinyama. 27 Omunu wosi o lia osonde, a tepiwe*+ pokati komanu vaye.’”

28 Yehova wa sapuila vali Mose hati: 29 “Sapuila va Isareli hati: ‘Wosi eca ocilumba caye combembua ku Yehova, a nene onepa yimue yocilumba ya tunda kocilumba caye combembua ku Yehova.+ 30 Eye a nene povaka aye ulela+ lonete ndocilumba cimue ci yokiwa vondalu ci lingiwila Yehova kuenje eye o ci senga senga konyima lo kovaso ndocilumba coku senga senga+ kovaso a Yehova. 31 Ocitunda ci tuimisila ulela waco kutala,+ pole, onete yaco yi linga ya Arone kumue lomãla vaye valume.+

32 “‘Weci kocitunda ocikalo condio ndonepa yi kola yovilumba viene viombembua.+ 33 Omõla a Arone una eca osonde yocilumba combembua lulela, o tambula ocikalo condio ndonepa yaye.+ 34 Momo ame ndupa onete yocilumba coku senga senga kuenda okulu kuonepa yi kola kocilumba combembua ca va Isareli kuenje ndi ceca ku Arone ocitunda kuenda komãla vaye valume ndociholo cotembo ka yi pui ku va Isareli.+

35 “‘Eyi oyo ya kala onepa yopiwa kovilumba viondalu vi lingiwila Yehova oco vi kale viovitunda okuti, via Arone lomãla vaye valume, keteke eye a eca ovilumba viaco oco va linge ovitunda ku Yehova.+ 36 Yehova wa handeleka okuti ku eciwa kokuavo onepa eyi yi tunda ku va Isareli keteke eye a va waveka.+ Oco, ci linga ociholo cotembo ka yi pui kovitumbulukila viavo.’”

37 Eci oco ocihandeleko catiamẽla kocilumba coku pia elisi,+ kocilumba colomema,+ kocilumba cekandu,+ kocilumba ceko,+ kocilumba coku waveka+ kuenda kocilumba combembua,+ 38 ndeci Yehova a handelekele Mose Komunda Sinai,+ keteke a handeleka va Isareli oku eca ovilumba viavo ku Yehova vekalasoko lio Sinai.+

8 Yehova wamisako oku sapuila Mose hati: 2 “Nena Arone kumue lomãla vaye valume,+ luwalo wavo,+ lulela woku waveka,+ longombe yocilumba cekandu, lolomeme vivali, lekualu liolombolo ka vi kuete etumbisa,+ 3 kuenje ongoluila pamosi va Isareli vosi puvelo wombalaka yohongele.”

4 Noke Mose wa linga ndomo Yehova o handelekele kuenje va Isareli vosi vongolokela pamosi puvelo wombalaka yohongele. 5 Mose wa sapuila va Isareli hati: “Eci oco Yehova a tu handeleka oku linga.” 6 Mose wa nena Arone kumue lomãla vaye valume kuenje wa va sukula lovava.+ 7 Kuenje wo walisa uwalo wa lepa,+ wo itika uvia,+ wo walisa esanya ka li kuete ovoko+ kuenda wo kapa evendalia+ loku kuta ciwa uvia wa tutiwa*+ wevendalia. 8 Noke wo kapa onjeke yo ponete+ kuenda vonjeke yaco wa kapamo o Urimi lo Tumimi.+ 9 Kuenje wo kapa ekofue+ kutue waye kuenda kovaso yekofue liaco, wa kapako ulame u nina wulu okuti ekolowa li kola,+ ndomo Yehova a handelekele Mose.

10 Mose wa tikula ulela woku waveka, wa waveka otavernakulu kuenda ovina viosi via kalamo+ kuenje wa vi kolisa. 11 Noke wa nyĩla kutala onepa yimue yulela olonjanja epanduvali loku waveka utala kuenda ovikuata viaco viosi, lombasiya, lociyekelo calio kuenje wa vi kolisa. 12 Oku sulako, eye wa pesila ulela woku waveka kutue wa Arone kuenda wo waveka oco a kole.+

13 Noke Mose wa nena omãla va Arone valume, wa va walisa ovikutu via lepa, loku va itika ovovia kuenda wa va walisa* ovifuto+ ndomo Yehova a handelekele Mose.

14 Wa nena ongombe yocilumba cekandu kuenje Arone kumue lomãla vaye, va kapa ovaka avo kutue wongombe yocilumba cekandu.+ 15 Mose wa yi ponda kuenje wa kapa omuine waye vosonde+ yongombe kuenje wa yi kapa kolombinga viutala kolonele viosi kuenje wa yelisa utala kekandu, pole, osonde yikuavo wa yi pesila kociyekelo cutala, oco a u kolise okuti ku lumbiwila ocilumba coku tuvika akandu. 16 Noke wa tikula ulela wosi u kasi kovãla, londeki yi kasi ocipepi lomuma, lolongẽla vivali, lulela u kasiko kuenje Mose wa vi yoka oco owisi waco u tuimĩle kutala.+ 17 Onepa yikuavo yongombe kumue locipa caco, lositu yaco, laniña aco, wa vi timĩha londalu kosamua yocilombo,+ ndomo Yehova a handelekele Mose.

18 Eye wa nena omeme yocilumba coku pia elisi kuenje Arone kumue lomãla vaye, va kapa ovaka avo kutue womeme yaco.+ 19 Noke Mose wa yi ponda kuenje wa nyĩla osonde yaco kolonele viosi viutala. 20 Mose wa teta omeme yaco vovinimbu kuenje utue, lovinimbu kuenda ulela* waco wa vi yoka. 21 Eye wa sukula lovava ovãla kumue lovikalo viaco, noke Mose wa tuimisila owisi wocitupi comeme yaco yosi kutala. Oco, ocilumba coku pia elisi ceca elemba liwa. Oco, ocilumba cimue ci yokiwa vondalu ci lingiwila Yehova, ndomo Yehova a handelekele Mose.

22 Noke wa nena omeme yavali okuti, omeme yoku wavekiwa+ kuenje Arone kumue lomãla vaye va kapa ovaka avo kutue womeme yaco.+ 23 Mose wa yi ponda kuenda wa nyañula onepa yimue yosonde, wa yi kapa kosungu yetũi liondio lia Arone kuenda kolumumba lueka liaye liondio, lo kolumumba luomãhi yaye yondio. 24 Noke Mose wa nena omãla va Arone kuenje wa kapa onepa yimue yosonde yaco kosungu yetũi liavo liondio, kolumumba lueka liavo liondio, lo kolumumba luomãhi yavo yondio; pole, Mose wa nyĩla osonde yikuavo kolonele viosi viutala.+

25 Kuenje wa nyañula ulela, lucĩla wa lẽla, lulela wosi wa ñuala kovãla, ondeki yomuma, olongẽla vivali kumue lulela waco kuenda ocikalo condio.+ 26 Vekualu liolombolo ka vi kuete etumbisa vi kasi kovaso a Yehova, wopamo ombolo yimue yi kuete epangu okuti, ka yi kuete etumbisa,+ yikuavo ombolo yi kuete epangu ya pangiwa lulela+ kuenda ombolo ya livanda. Noke ovinimbu viaco wa vi kapa vulela kumue locikalo condio. 27 Noke wa vi kapa viosi povaka a Arone kuenda povaka vomãla vaye kuenje wa vi senga senga konyima lo kovaso ndocilumba coku senga senga kovaso a Yehova. 28 Kuenje Mose wa viupa povaka avo, wa tuimisila owisi wavio kutala kilu liocilumba coku pia elisi. Ovio, ovilumba vioku waveka vi eca elemba liwa. Oco, ocilumba cimue ci yokiwa vondalu ci lingiwila Yehova.

29 Mose wa nyañula onete yomeme kuenje wa yi senga senga konyima lo kovaso ndocilumba coku senga senga kovaso a Yehova.+ Omeme yoku waveka ya linga onepa ya Mose ndomo Yehova a handelekele Mose.+

30 Kuenje Mose wa tikula onepa yimue yulela woku waveka,+ lonepa yimue yosonde ya kala kutala, wa vi nyĩla Arone, luwalo waye kuenda komãla vaye valume, luwalo womãla vaye. Noke wa kolisa Arone, luwalo waye kuenda omãla vaye+ luwalo wavo.+

31 Noke Mose wa sapuila Arone lomãla vaye hati: “Telekeli+ ositu yaco puvelo wombalaka yohongele kuenje opo vu yi lila kumue lombolo yi kasi vekualu lioku nõliwa, ndeci nda handelekiwile okuti: ‘Arone o yi lia kumue lomãla vaye valume.’+ 32 Ositu kumue lombolo vi supapo vi timĩhiwe londalu.+ 33 Vokuenda kuoloneke epanduvali, ka citava oku tunda puvelo wombalaka yohongele, toke eci ku tẽlisiwa oloneke vioku nõliwa, momo ku pita oloneke epanduvali oco vu nõliwi ndovitunda.*+ 34 Eci tua linga etaili oco Yehova a tu handeleka oku linga okuti, tu vu tuvikiliko akandu ene.+ 35 Vu kala puvelo wombalaka yohongele utanya luteke vokuenda kuoloneke epanduvali+ loku tẽlisa ocikele cene ku Yehova+ okuti ka vu fi; momo eci oco nda handelekiwile.”

36 Arone lomãla vaye va linga ovina viosi Yehova a handelekele pocakati ca Mose.

9 Keteke liecelãla,+ Mose wa vilikiya Arone kumue lomãla vaye valume kuenda akulu va Isareli. 2 Eye wa sapuila Arone hati: “Tikula onãle yimue oco o yece ndocilumba cekandu+ kuenda ocitupi comeme ndocilumba coku pia elisi okuti ka vi kuete etondelo kuenje o vi ecela kovaso a Yehova. 3 Pole, sapuila va Isareli hoti: ‘Tikuli ocitupi cohombo oco ceciwe ndocilumba cekandu, lonãle yimue kuenda ocitupi comeme okuti, viosi vi kuete unyamo umosi haivio ka vi kuete etondelo oco vi eciwe ndocilumba coku pia elisi, 4 kuenda ongombe locitupi comeme vi eciwe ndovilumba viombembua,+ oco vi lumbiwe ku Yehova kuenda ocilumba colomema+ ca tengiwa lulela, momo etaili Yehova o limolẽhisa kokuene.’”+

5 Ovo, va nena vombalaka yohongele ovina Mose a handelekele. Kuenje va Isareli vosi veya ocipepi kuenda va talama kovaso a Yehova. 6 Mose wa popia hati: “Eci oco Yehova o handeleki oku linga oco ulamba wa Yehova u molẽhele kokuene.”+ 7 Noke Mose wa sapuila Arone hati: “Amela kutala, eca ocilumba cove cekandu+ locilumba cove coku pia elisi kuenda tuvika akandu ove muẽle+ lakandu o vonjo yove; kuenje eca ocilumba omanu va nena,+ loku tuvika akandu avo+ ndomo Yehova a handeleka.”

8 Vepuluvi liaco, haico Arone amela kutala kuenda wa ponda onãle yocilumba caye muẽle cekandu.+ 9 Kuenje omãla valume va Arone va nena osonde+ kokuaye kuenda eye wa kapa omuine waye vosonde kuenje wa yi nyĩla kolombinga viutala kuenda osonde ya supapo wa yi pesila pociyekelo cutala.+ 10 Ulela, olongẽla kuenda ondeki yi kasi kilu liomuma yocilumba cekandu, eye wa vi tuimisila kutala, ndomo Yehova a handelekele Mose.+ 11 Kuenje ositu yaco kumue locipa, wa vi yoka londalu kosamua yocilombo.+

12 Noke wa ponda ocinyama cocilumba coku pia elisi kuenda omãla valume va Arone va nena kokuaye osonde kuenje eye wa yi nyĩla kolonele viosi viutala.+ 13 Ovo va eca kokuaye ovinimbu viocinyama cocilumba coku pia elisi kumue lutue waco kuenje wa tuimisila owisi waco kutala. 14 Handi vali, wa sukula ovãla lovikalo kuenda wa yoka ocilumba coku pia elisi oco a tuimisile owisi waco kutala.

15 Eye wa eca ocilumba comanu kuenda wa tikula ohombo yocilumba cekandu liomanu kuenje wa yi ponda, wa linga layo ocilumba cekandu ndeci a linga locinyama catete. 16 Wa eca ocilumba coku pia elisi kuenda wa ci linga ndomo ca kisikiwa vocihandeleko.+

17 Noke wa eca ocilumba colomema,+ wa tikula epupu liosema kuenje wa tuimisila owisi waco kutala, oku kongelamo ocilumba comẽle coku pia elisi.+

18 Noke wa ponda ongombe lomeme yocilumba combembua okuti, ca kala comanu. Omãla valume va Arone va nena kokuaye osonde kuenje wa yi nyĩla kolonele viosi viutala.+ 19 Onepa yulela wongombe,+ lucĩla wa lẽla womeme, lulela wovãla, olongẽla kuenda ondeki yi kasi kilu liomuma,+ 20 va kapa olonepa viosi viulela volonete viovinyama, noke eye wa tuimisila owisi wolonepa viaco viulela kutala.+ 21 Pole, olonete kumue locikalo condio, Arone wa vi senga senga konyima lo kovaso ndocilumba coku senga senga kovaso a Yehova ndomo Mose a handelekele.+

22 Noke Arone wa votuila ovaka aye komanu kuenda wa va sumũlũisa+ kuenje wa tunda koku eca ocilumba cekandu locilumba coku pia elisi, lovilumba viombembua. 23 Mose la Arone va iñila vombalaka yohongele, noke va tunda kuenje va sumũlũisa omanu.+

Noke ulamba wa Yehova wa molẽhela komanu vosi,+ 24 kuenje ondalu ya tunda ku Yehova,+ ya fetika oku timĩha ocilumba coku pia elisi lolonepa viulela via kala kutala. Eci omanu vosi va ci mola, va fetika oku kaluka kuenda va petamisa ovipala viavo posi.+

10 Noke Nadava la Avihu+ omãla va Arone, omunu lomunu wa tikula ociyukilo caye condalu, yu va kapamo ondalu kuenda kilu liondalu va kapako insensu.+ Kuenje va fetika oku eca kovaso a Yehova ocilumba* ka ci taviwa,+ cina eye ka va handelekele oku ci linga. 2 Kuenje ku Yehova kua tunda ondalu, yu ya va lia+ kuenda va fila kovaso a Yehova.+ 3 Noke Mose wa sapuila Arone hati: “Eci oco Yehova a popia hati: ‘Kuava va kasi ocipepi lame,+ ha li lekisa okuti, ndi kola kuenda ndi muisiwa ulamba kovaso omanu vosi.’” Kuenje Arone ka popele cimue.

4 Mose wa vilikiya Misaeli la Elicafana omãla va Usiyele+ isia ya Arone yumalẽhe, yu wa va sapuila hati: “Enjui kulo, upi vamanjene kovaso yocitumãlo ci kola, vambati posamua yocilombo.” 5 Ovo veya kuenje vambata alume vaco posamua yocilombo okuti, handi va kala lovikutu viavo via lepa, ndomo Mose a va sapuila.

6 Mose wa sapuila Arone lomãla vaye vakuavo, Eleasa la Itamare hati: “Ko ka eceleli okuti esinga liovitue viene li salũlũha ale oku tola uwalo wene+ omo liesumuo, oco ka vu ka fi kuenda oco Suku ka ka yambule ohongele yosi. Vamanjene vo vonjo yosi ya Isareli, va ka lila vana Yehova a ponda londalu. 7 Ka citava okuti vu tundila puvelo wombalaka yohongele, sanga vu fa, momo wa wavekiwi lulela woku waveka wa Yehova.”+ Kuenje ovo va linga ndomo Mose a va handeleka.

8 Kuenje Yehova wa sapuila Arone hati: 9 “Ku ka nyue ovinyu ale ovina vikuavo vi koluisa, ove kumue lomãla vove eci vu iñila vombalaka yohongele,+ sanga vu fa. Eci, ociholo cotembo ka yi pui kovitumbulukila viene. 10 Eci oco ci tepisa pokati kovina vi kola lovina via vĩha kuenda pokati kovina via liña lovina via yela,+ 11 loku longisa va Isareli ovihandeleko viosi Yehova a va sapuila pocakati ca Mose.”+

12 Noke Mose wa sapuila Arone la Eleasa kuenda Itamare omãla valume va Arone va supapo hati: “Tikuli eci ca supapo kocilumba colomema ca tunda kovilumba via Yehova via lingiwa londalu kuenje vu ci lia ndolombolo ka vi kuete etumbisa ocipepi lutala,+ momo ocina cimue ci kola koku kola.+ 13 Vu sukila oku ci lila vocitumãlo cimue ci kola,+ momo eci oco onepa yene kuenda onepa yomãla vene valume cina ca tunda kovilumba via Yehova via lingiwa londalu, momo eci oco nda handelekiwa. 14 Vu liavo onete yocilumba coku senga senga, locikalo conepa yi kola+ vocitumãlo cimue ca yela, ene kumue lomãla vene valume lomãla vene vakãi,+ momo ovina evi via eciwa oco vi linge onepa yene kuenda yomãla vene yina ya tunda kovilumba viombembua via va Isareli. 15 Ovo va nena ocikalo conepa yi kola, lonete yocilumba coku senga senga kuenda ocilumba culela ci lingiwa londalu, oco ocilumba coku senga senga ci sengiwe kovaso lo konyima kovaso a Yehova; kuenje ci linga onepa yove otembo ka yi pui kuenda yomãla vove+ ndomo Yehova a handelekele.”

16 Mose wa sandiliya lutate ocitupi cohombo cocilumba cekandu+ kuenje wa sanga okuti ca timĩhiwa. Noke wa temẽla Eleasa la Itamare omãla va Arone va supapo kuenje wa pula hati: 17 “Momo lie ocilumba cekandu ka wa ci lili vocitumãlo ci kola,+ nda ocina cimue ci kola koku kola kuenda eye wa ceca kokuene oco vu tambululi akulueya a va Isareli loku tuvika akandu avo kovaso a Yehova? 18 Tali! Osonde yocilumba caco, ka ya neniwile vocitumãlo ci kola.+ Ene wa sukilili oku lila ocilumba caco vocitumãlo ci kola ndomo nda handelekiwa.” 19 Arone wa tambulula Mose hati: “Tala! Etaili ovo va eca ocilumba cavo cekandu locilumba cavo coku pia elisi kovaso a Yehova,+ pole, lopo ovina evi via lipita lame. Nda etaili nda lile ocilumba cekandu, nda nda sanjuisa hẽ Yehova?” 20 Eci Mose a ci yeva, wa ci sanjukila.

11 Yehova wa sapuila Mose la Arone hati: 2 “Sapuili va Isareli hoti: ‘Ovinyama vi kasi kilu lieve okuti citava oku vi lia vievi:+ 3 Ovinyama viosi vi kuete akonjo a toka kuenda akonjo a litepa, haivio vi lukola, citava oku vi lia.

4 “‘Pole, ka citava okuti vu lia ovinyama vi lukula ale vi kuete akonjo a toka ndeci: ongamelo okuti yi lukula, pole, ka yi kuete akonjo a toka. Oyo, ya vĩha kokuene.+ 5 Ka citavavo oku lia ohuita,+ momo yi lukula, pole, ka yi kuete akonjo a toka. Oyo, ya vĩha kokuene. 6 Ka citavavo oku lia ondimba momo yi lukula, pole, ka yi kuete akonjo a toka. Oyo, ya vĩha kokuene. 7 Ka citavavo oku lia ongulu,+ momo yi kuete akonjo a toka kuenda akonjo a litepa, pole, ka yi lukula. Oyo, ya vĩha kokuene. 8 Ka citava okuti vu lia ositu yovinyama viaco ale oku lamba kovivimbi viaco. Ovio, via vĩha kokuene.+

9 “‘Ovinyama viosi vio vovava okuti ovio citava oku vi lia vievi: Cosi ci kasi vovava okuti ci kuete ovilele lakaka, ci kale vokalunga ale volondui, citava oku vi lia.+ 10 Pole, cosi ci kasi vokalunga kuenda volondui okuti ka ci kuete ovilele lakaka, pokati kovinyama* viosi vitito, loviluvo vikuavo vi kasi vovava, via vĩha kokuene. 11 Ovio, ovina via vĩha kokuene kuenda ka citava oku lia ositu yovinyama viaco+ kuenda ko ka li vĩhisi lovivimbi viaco. 12 Ovinyama viosi vi kasi vovava okuti ka vi kuete ovilele lakaka, via vĩha kokuene.

13 “‘Ovinyama vi palãla okuti via vĩha kokuene, okuti ka citava oku vi lia, omo via vĩha vievi: ongonga+ yulombo, ohokohoko kuenda omungu,+ 14 ociselele kuenda apata aiñi aiñi okaliama ka tekãva, 15 lapata aiñi aiñi ovikuamanga, 16 lombo, locimbamba, lelimbondo kuenda apata aiñi aiñi olongonga, 17 ocimbamba citito, lombundambunda, locihungulu, 18 lokacukucuku, ohombe yenyãla, ohumbihumbi, 19 onyañe, lapata aiñi aiñi viapanda, omuipui kuenda olundilili. 20 Apata osi oviluvo vitito vi palãla okuti vi enda lovolu akuãla, via vĩha kokuene.

21 “‘Kapata osi ovipuka vi palãla okuti vi enda lovolu akuãla, citava lika oku lia vina vi kuete ovolu avali a lepa a ecelela oku tẽha tẽha posi. 22 Evi vi tava okuti vu vi lia vievi: apata aiñi aiñi olohuma, lapata akuavo apange,+ lovienye kuenda akundumba. 23 Ovinyama viosi vitito vi kuete avava haivio vi kuete akoto akuãla, via vĩha kokuene. 24 Nda wa li ovina viaco, vu vĩhisiwa. Wosi o lamba kovivimbi viaco o vĩhisiwa toke koñolosi.+ 25 Omunu wosi ambata ovivimbi viaco o sukila oku sukula uwalo waye;+ kuenje o vĩhisiwa toke koñolosi.

26 “‘Ovinyama viosi vi kuete akonjo a toka, pole, ka vi kuete akonjo a litepa kuenda ka vi lukula, via vĩha kokuene. Wosi o vi lamba o vĩhisiwa.+ 27 Pokati kovinyama viovolu akuãla ovinyama viosi vi endela kakasa, via vĩha kokuene. Wosi o lamba kovivimbi viaco, o vĩhisiwa toke koñolosi. 28 Omunu wosi ambata ovivimbi viaco, o sukila oku sukula uwalo waye+ kuenje o vĩhisiwa toke koñolosi.+ Ovio via vĩha kokuene.

29 “‘Ovinyama vio kilu lieve okuti via vĩha kokuene vievi: onete, omuku+ kuenda apata aiñi aiñi akangala, 30 lekokolo, lekangala linene, locikukuvanda, letatu kuenda eleñalo. 31 Ovinyama viosi evi via vĩha kokuene.+ Wosi o lamba kovivimbi viaco o vĩhisiwa toke koñolosi.+

32 “‘Kovina viosi ku kupukila ovinyama viaco eci vi fa, ovina viaco vi vĩha, ci kaile ocikuata cavaya, uwalo, ocipa, ale onjeke yocikelẽyi. Ovikuata viosi vi lingiwa lavio upange, te via sukuiwa lovava kuenje vi vĩha toke koñolosi; noke vi yela. 33 Nda via kupukila vocikuata cotuma, ove o tetula ocikuata caco kuenda cosi ca kalamo ci vĩha.+ 34 Okulia kuosi ku lamba vovava a kala vocikuata caco, ku vĩhisiwa kuenda cosi coku nyua ca kala vocikuata caco ci vĩhisiwa. 35 Kovina viosi ku kupukila ovivimbi viaco, ci vĩhisua. Ci kaile ofolono, ale iko li nyanyuiwe. Ovio via vĩha kuenda vi kamamako oku vĩha kokuene. 36 Nda ovivimbi viaco via kupukila pono ale ponjombo, camamako oku vĩha, pole, wosi o lamba kovivimbi viaco o vĩhisiwa. 37 Nda ovivimbi viaco via kupukila kombuto yi laika oku kũliwa, ombuto yaco yi yela. 38 Pole, nda ombuto yimue ya kapiwa vovava kuenje onepa yimue yocivimbi yi kupukilamo, ombuto yaco yi vĩha kokuene.

39 “‘Nda ocinyama cimue okuti citava oku ci lia ca lifila, wosi o lamba kocivimbi caco, o vĩhisiwa toke koñolosi.+ 40 Omunu wosi o lia ositu yocinyama caco, o sukila oku sukula uwalo waye kuenje o vĩhisiwa toke koñolosi.+ Omunu wosi ambata ocivimbi caco, o sukila oku sukula uwalo waye kuenje o vĩhisiwa toke koñolosi. 41 Oviluvo viosi vitito vio kilu lieve, ocina cimue ca vĩha.+ Ka citava oku vi lia. 42 Ka citava okuti vu lia ovinyama vi likoka limo, levi vi enda lovolu akuãla, ale ovinyama viosi vi kuete ovolu alua, momo ovina vimue via vĩha.+ 43 Ko ka li vĩhisi loviluvo viaco vitito kuenda ko ka li vĩhisi omo lioviluvo viaco.+ 44 Momo, ame ndi Yehova Suku yene+ kuenda vu sukila oku liyelisa oco vu koli,+ momo ame ndi kola.+ Omo liaco, ko ka li vĩhisi ene muẽle omo lioviluvo vitito vi endela kilu lieve. 45 Momo, ame ndi Yehova, una wo vupi vofeka Yegito oco ndi li lekise kokuene okuti ame ndi Suku yene+ kuenda vu sukila oku kola,+ momo ame ndi kola.+

46 “‘Eci oco ocihandeleko catiamẽla kovinyama vi palãla, koviluvo viosi vi kasi lomuenyo vio vovava kuenda kovinyama viosi vi likoka posi, 47 oco pa kale oku litepa pokati kuevi via vĩha levi via yela kuenda pokati kovinyama vi tava oku vi lia, levi ka vi tava oku vi lia.’”+

12 Yehova wa sapuila Mose hati: 2 “Sapuila va Isareli okuti, ‘Nda ukãi umue wa mina kuenje o cita omõla umue ulume, ukãi waco o vĩha oloneke epanduvali, ndeci a vĩhisiwa eci a kala koloneke viaye viocituwa.+ 3 Keteke liecelãla, omõlaco o seviwa evamba.+ 4 Ukãi waco o kamamako oku liyelisa kosonde vokuenda kuoloneke 33 vi kuamamo. Ka citava okuti o lamba kocina cimue ci kola, ndaño oku iñila vocitumãlo ci kola toke eci a tẽlisa oloneke viaye vioku liyelisa.

5 “‘Pole, nda eye wa cita omõla ukãi, o vĩhisiwa vokuenda kuoloneke 14, ndeci a vĩhisiwa eci a kala koloneke viaye viocituwa. Ukãi waco, amamako oku liyelisa kosonde vokuenda kuoloneke 66 vi kuamamo. 6 Eci a tẽlisa oloneke viaye vioku liyelisa omo liomõla ulume ale ukãi, eye o sukila oku nena ocitupi comeme cunyamo umosi oco ceciwe ndocilumba coku pia elisi,+ lonende kuenda ocivuvu copomba ndocilumba cekandu ceciwa kocitunda puvelo wombalaka yohongele. 7 Ocitunda ceca ocilumba caco kovaso a Yehova kuenda ci tuvika ekandu liukãi waco kuenje ukãi o yelisiwa kosonde yaye. Eci oco ocihandeleko catiamẽla kukãi wa cita omõla ulume ale ukãi. 8 Pole, nda ukãi waco ka pondola oku eca omeme, o sukila oku eca olonende vivali ale ivuvu vivali violopomba,+ yimue yocilumba coku pia elisi yikuavo yocilumba cekandu kuenje ocitunda ceca ocilumba coku tuvika ekandu liukãi waco, noke ukãi o yelisiwa.’”

13 Yehova wamisako oku vangula la Mose kuenda Arone hati: 2 “Nda omunu umue kekova* liaye ku fetika oku lenda, ale oku kuata epute, pamue atota kuenje ci pondola oku kala uvei wovilundu*+ kekova liaye, eye o sukila oku tualiwa ku Arone ocitunda, ale ku umue pokati komãla vaye ovitunda.+ 3 Ocitunda ci kũlĩhĩsa uvei waco u kasi kekova liaye. Nda okuti oluveyi lu kasi apa pali uvei waco u yela kuenda ovisimbimbi viaco vi molẽha okuti via longa okuti ositu yi sule, ci lekisa okuti uvei wovilundu. Ocitunda ci kũlĩhĩsa omunu waco kuenje ci popia okuti wa vĩha. 4 Pole, nda atota a yela kuenda a molẽha okuti ka a longele okuti ositu yi sule kuenda oluveyi ka lua yelele, ocitunda ci tuma omunu waco oku likalila oloneke epanduvali.+ 5 Ocitunda ci kũlĩhĩsa omunu waco keteke liepanduvali kuenje nda wa limbuka okuti ovisimbimbi viaco ka via kayele kuenda ka via lisanduile vetimba, ocitunda ceca vali oloneke epanduvali oco omunu waco a likalile.

6 “Ocitunda ci kũlĩhĩsa vali omunu waco keteke liepanduvali kuenda nda ovisimbimbi viaco vi kasi oku kaya kuenje ka via lisanduilile vetimba, ocitunda ci tenda okuti omunu waco wa yela;+ ca kala ño epute. Omunu waco o sukula uwalo waye kuenje o yela. 7 Pole, nda epute* liaco lia lisanduila vetimba noke yoku li molẽhisa kovaso yocitunda oco a yelisiwe, eye enda vali* kocitunda. 8 Ocitunda ci kũlĩhĩsa epute liaco kuenda nda lia lisanduila vetimba, ocitunda ci tenda omunu waco okuti, wa vĩha. Uvei wovilundu.+

9 “Nda omunu wa kuatiwa luvei wovilundu, o sukila oku ambatiwa kocitunda, 10 kuenje ocitunda ci kũlĩhĩsa omunu waco.+ Nda ponepa yimue yetimba liaye pa lenda kuenda pa tunda oluveyi lu yela kuenje ci kala epute,+ 11 ci lekisa okuti ovilundu a kuete vetimba liaye viombongele kuenje ocitunda cu tenda okuti, wa vĩhisiwa. Ocitunda ka ci sukila oku tuma omunu waco oku likalila,+ momo wa vĩhisiwa. 12 Pole, nda ovilundu vi lisanduila vetimba liaye kuenda omunu o kuata uvei waco oku upisa kutue toke kolomãhi okuti ocitunda ci pondola oku ci mola, 13 kuenje ocitunda co kũlĩhĩsa loku limbuka okuti ovilundu via lisanduila vetimba liaye liosi, eye o tenda okuti, omunu waco wa yela.* Etimba liaye liosi li yela kuenda eye ka vĩhisiwile. 14 Pole, nda epute li molẽha ketimba liaye, o vĩhisiwa. 15 Eci ocitunda ci limbuka epute liaco, ci tenda omunu waco okuti, wa vĩhisiwa.+ Epute liaco lia vĩha. Owo uvei wovilundu.+ 16 Pole, nda epute li fetika vali oku yela, eye o sukila oku enda kocitunda. 17 Ocitunda ci kũlĩhĩsa omunu waco+ kuenda nda epute li fetika oku yela, ocitunda ci tenda omunu waco okuti, wa yela. Eye wa yela muẽle.

18 “Nda omunu o kuete ombumbu vetimba noke ya kaya, 19 pole, nda ponepa pa kala ombumbu pa fetika oku molẽha oku lenda ku yela, ale pa molẽha isimbimbi vi kusuka, eye o sukila oku li lekisa kocitunda. 20 Ocitunda ci kũlĩhĩsa uvei waco+ kuenda nda ombumbu yaco yi molẽha okuti ya longa okuti ositu yi sule kuenje oluveyi lu kasi pombumbu lu yela, ocitunda cu tenda okuti, wa vĩhisiwa. Oco, uvei wovilundu wa tundila pombumbu. 21 Pole, nda ocitunda ci kũlĩhĩsa ombumbu yaco kuenda ci limbuka okuti oluveyi ka lua yelele kuenje ombumbu yaco yi molẽha okuti ka ya longele okuti ositu yi sule kuenda yi fetika oku kaya, ocitunda ci tuma omunu waco oku likalila oloneke epanduvali.+ 22 Pole, nda ombumbu yaco ya li sanduila vetimba, ocitunda ci tenda omunu waco okuti, wa vĩhisiwa. Oco, uvei. 23 Pole, nda ocisimbimbi ci kala ponepa yimue yetimba kuenda ka ca lisanduile kuenje ca lenda ño omo liombumbu, ocitunda ci tenda omunu waco okuti, wa yela.+

24 “Nda omunu umue o kuete emome lia kokiwa londalu kuenje ositu yaco yi lenda ale yi kala isimbimbi vi kusuka ale vi yela, 25 ocitunda ci kũlĩhĩsa uvei waco. Pole, nda oluveyi wocisimbimbi lu yela kuenje epute liaco li molẽha okuti ka lia longele okuti ositu yi sule, ci lekisa okuti ovilundu via tunda pemome kuenje ocitunda ci tenda omunu waco okuti, wa vĩhisiwa. Uvei wovilundu. 26 Pole, nda ocitunda ci kũlĩhĩsa uvei waco kuenda ci limbuka okuti ponepa yaco ka pali oluveyi lu yela kuenje epute liaco li molẽha okuti ka lia longele okuti ositu yi sule kuenda lia fetika oku kaya, ocitunda ci tuma omunu waco oku likalila oloneke epanduvali.+ 27 Ocitunda ci kũlĩhĩsa omunu waco keteke liepanduvali kuenje nda uvei waco wa li sanduila vetimba, ocitunda ci tenda omunu waco okuti, wa vĩhisiwa. Uvei wovilundu. 28 Pole, nda ocisimbimbi ci kala ponepa yimue yetimba okuti ka ca li sanduile kuenje ca lenda ño omo liombumbu, ocitunda ci tenda omunu waco okuti, wa yela, momo emome lia kokiwa londalu.

29 “Nda ulume umue ale ukãi o kuete uvei wovisimbimbi kutue ale kociyele, 30 ocitunda ci kũlĩhĩsa uvei waco wovisimbimbi.+ Nda uvei waco u molẽha okuti wa longa okuti ositu yi sule kuenda esinga liaye li molẽha okuti lievala liungolo halio litito, ocitunda ci popia okuti omunu waco wa vĩha; oco, uvei wovisimbimbi vutue ale kolonjele. Oco, uvei wovilundu vutue ale kociyele. 31 Pole, nda ocitunda ci limbuka okuti uvei wovisimbimbi u molẽha okuti ka wa longele okuti ositu yi sule kuenda ponepa pali uvei wovisimbimbi ka pali esinga litekãva, ocitunda ci tuma omunu waco oku likalila oloneke epanduvali.+ 32 Ocitunda ci kũlĩhĩsa uvei waco wovisimbimbi keteke liepanduvali kuenda nda uvei wovisimbimbi ka wa li sanduile kuenda ka pali esinga lievala liungolo kuenje apa pali uvei wovisimbimbi pa molẽha okuti, ka pa longele okuti ositu yi sule, 33 omunu waco o sukila oku lipemũla eye muẽle, pole, ka ka pemũle apa pali uvei wovisimbimbi. Kuenje ocitunda ci tuma omunu waco oku likalila oloneke epanduvali.

34 “Ocitunda ci kũlĩhĩsa vali ovisimbimbi viaco keteke liepanduvali, nda ovisimbimbi viaco vi kasi vutue ale kolonjele ale ka via lisanduile vetimba kuenda vi molẽha okuti ka via longele okuti ositu yi sule, ocitunda ci tenda omunu waco okuti, wa yela kuenje omunu waco, o sukula uwalo waye kuenda o yela. 35 Pole, nda uvei wovisimbimbi u molẽha okuti wa lisanduila vetimba noke yoku li molẽhisa kocitunda, 36 ocitunda ci kũlĩhĩsa omunu waco kuenje nda uvei wovisimbimbi wa lisanduila vetimba, ocitunda ka ci sukila oku sanda esinga lievala liungolo; omunu waco wa vĩha. 37 Pole, nda poku kũlĩhĩsa wa limbuka okuti uvei wovisimbimbi ka wa lisanduile kuenda vutue mua kulila esinga li tekãva, ci lekisa okuti uvei wovisimbimbi wa kaya. Eye wa yela kuenda ocitunda ci tenda omunu waco okuti, wa yela.+

38 “Nda ulume umue ale ukãi o kuete atota vetimba* kuenda atota aco a yela, 39 ocitunda ci kũlĩhĩsa omunu waco.+ Nda atota aco a pembela ci lekisa okuti, oku sanyanya kuaño kuetimba. Omunu waco wa yela.

40 “Nda omunu umue esinga liaye vutue li lolukamo kuenda o kuata etoto, eye wa yela. 41 Nda esinga liaye lia loluka konele yimue yutue yo kovaso kuenje o kuata etoto, eye wa yela. 42 Pole, nda o kuete epute li kusuka hailio li yela vetoto ale kovaso yutue waye, ci lekisa okuti o kuete ovilundu vetoto ale kovaso yutue waye. 43 Ocitunda ci kũlĩhĩsa omunu waco, nda oku lenda kuepute vetoto li kasi vutue, ale kovaso yutue waye li kusuka kuenda li sokisiwa lovilundu vetimba liaye, 44 eye ukuavilundu. Eye wa vĩhisiwa kuenda ocitunda ci tenda omunu waco okuti, wa vĩhisiwa omo liuvei a kuete vutue waye. 45 Omunu o kuete uvei wovilundu, o sukila oku tola uwalo waye, ka ka pemule esinga liutue waye kuenda a sitike olonjele viaye loku kaloka hati: ‘Nda vĩhisiwa, nda vĩhisiwa!’ 46 Eye o vĩhisiwa otembo yosi a kala luvei waco. Omo okuti wa vĩhisiwa, o sukila oku likalila. Eye o kala kosamua yocilombo.+

47 “Nda okuti uvei wovilundu wa vĩhisa uwalo, ci kaile uwalo wovonya ale wovalatanya, 48 ci kaile vupati ale voku sanjavala kuonanga, ocipa ale ocina cimue ca lingiwa locipa, 49 kuenda uwalo wa vĩhisiwa luvei waco okuti u kuete etota lievala liungolo, li kusuka, ocipa, upati, oku sanjavala ale ocina cimue ca lingiwa locipa, ovina viaco viosi via vĩhisiwa lovilundu kuenda vi lekisiwe kocitunda. 50 Ocitunda ci kũlĩhĩsa uvei waco kuenje ovina viaco vi likalila oloneke epanduvali.+ 51 Eci a kũlĩhĩsa uvei waco keteke liepanduvali kuenje o limbuka okuti wa lisanduila kuwalo, kupati, koku sanjavala, kocipa (ci kale kovipa viosi), uvei waco wovilundu uvĩ kuenda wa vĩha.+ 52 Eye o sukila oku timĩha uwalo waco ale upati, oku sanjavala, ale alinya, pamue ovikuata viosi via pangiwa locipa okuti via vĩhisua luvei waco momo uvei waco wovilundu ũvi. Ovio, vi timĩhiwe vondalu.

53 “Pole, nda ocitunda ca kũlĩhĩsa kuenje ca limbuka okuti uvei waco ka wa lisanduile kuwalo, kupati, koku sanjavala, ale kovikuata viosi via pangiwa locipa, 54 ocitunda ci handeleka okuti ovikuata via vĩhisiwa vi sukuiwa kuenje ovikuata viaco vi likalila oloneke vikuavo epanduvali. 55 Ocitunda ci kũlĩhĩsa ocikuata ca vĩhisiwa noke yoku ci sukula. Nda etota liaco ka lia pongolokele, ndaño okuti uvei waco ka wa li sanduile, ocikuata caco ci vĩha. Ove o sukila oku ci timĩha vondalu momo oco ca nyõleha, ci kaile kilu ale vokati.

56 “Pole, nda ocitunda ca kũlĩhĩsa ocikuata caco kuenje ca limbuka okuti etota liaco li kasi oku tepuluka noke yoku ci sukula, eye o tola uwalo, ale ocipa vupati ale voku sanjavala. 57 Nda okuti etota liaco lia molẽha konepa yikuavo yuwalo, ale kupati, pamue koku sanjavala, ale kocikuata cosi ca pangiwa locipa, okuti lia li sandula, ove o sukila oku timĩha vondalu+ cosi ca kuatiwa luvei. 58 Pole, nda uvei waco wa tunda kuwalo, vupati ale koku sanjavala pamue kocikuata cosi ca pangiwa locipa wa sukuile, o sukila oku ci sukula onjanja yavali kuenje ci yela.

59 “Eci oco ocihandeleko catiamẽla kuvei wovilundu u kasi kuwalo wohusu, ale wovalatanya, ale vupati, pamue koku sanjavala, ale kocikuata cosi ca pangiwa locipa, oco ci tendiwe okuti ca yela ale ca vĩhisiwa.”

14 Yehova wamisako oku vangula la Mose hati: 2 “Eci ocihandeleko comunu o kuete uvei wovilundu keteke a yelisiwa, eci a tualiwa kocitunda.+ 3 Ocitunda cenda posamua yocilombo kuenda o kũlĩhĩsa omunu waco. Nda ukuavilundu wa sakuiwa, 4 ocitunda ci handeleka omunu waco oku nena olonjila vivali via yela, levaya liosedru, lonanga yi kusuka kuenda o hisopu, oco a yelisiwe.+ 5 Ocitunda ci handeleka okuti, onjila yimue yi pondiwa vocikuata cotuma muli ovava opiwa pono. 6 Pole, o tikula onjila yi kasi lomuenyo kumue levaya liosedru, onanga yi kusuka kuenda o hisopu kuenje o vi yuvika vosonde yonjila ya pondiwila vovava opiwa pono. 7 Noke eye o nyĩla osonde yaco olonjanja epanduvali komunu o kasi oku liyelisa kuvei wovilundu kuenje o tukula omunu waco okuti, wa yela kuenda ecelela okuti onjila yi kasi lomuenyo yi palãlela vusenge.+

8 “Omunu wa yelisiwa o sukila oku sukula uwalo waye loku pemula esinga liosi vutue waye, loku yua lovava kuenje o yelisiwa. Noke citava okuti eye iñila vocilombo, pole, o kala posamua yombalaka yaye oloneke epanduvali. 9 Keteke liepanduvali eye o pemula esinga liosi liutue waye, lolonjele kuenda ocikenge ciso. Noke yoku pemula esinga liaye liosi, eye o sukula uwalo waye loku yua lovava kuenje o yelisiwa.

10 “Keteke liecelãla, eye o tikula ovitupi vivali viomeme ka vi kuete etondelo, lokameme+ kamue komange ka ka kuete etondelo, haiko ka kuete unyamo umosi, lolonjongo vitatu vionepa yekũi yo efa* yosema ya fina ya tengiwa lulela, ndocilumba colomema+ kuenda o loge* yimosi yulela;+ 11 kuenje ocitunda ci tenda omunu waco okuti wa yela, eye muẽle o ka lekisa omunu waco kumue lovilumba viaco kovaso a Yehova puvelo wombalaka yohongele. 12 Ocitunda ci tikula ocitupi cimue comeme kuenda o ceca ndocilumba ceko+ kumue lo loge yimosi yulela kuenje o ci senga senga konyima lo kovaso ndocilumba coku senga senga kovaso a Yehova.+ 13 Kuenje eye o pondela ocitupi comeme kocitumãlo kua siata oku pondiwila ocinyama cocilumba cekandu locinyama cocilumba coku pia elisi+ okuti, kocitumãlo ci kola, momo ndeci ocilumba cekandu ci tiamẽla kocitunda, ocilumba ceko lacovo ci tiamẽla kocitunda.+ Oco, ocina cimue ci kola koku kola.+

14 “Noke ocitunda ci nyañula onepa yimue yosonde yocilumba ceko kuenje ocitunda ci kapa osonde yaco kosungu yetũi liondio liomunu wa yelisiwa kuenda kolumumba lueka liaye liondio, lo kolumumba luomãhi yaye yondio. 15 Kuenje ocitunda ci tikula onepa yimue yo loge yulela+ kuenda o yitila peka liaye liepĩli. 16 Ocitunda ci kapa omuine waye wondio vulela u kasi peka liaye liepĩli kuenda o nyĩla onepa yimue yulela lomuine waye olonjanja epanduvali kovaso a Yehova. 17 Ocitunda ci kapa peka liaye onepa yimue yulela wa supapo kuenje o yi kapa kosungu yetũi liondio yomunu wa yelisiwa kuenda kolumumba lueka liaye liondio lo kolumumba luomãhi yaye yondio kilu liosonde yocilumba ceko. 18 Ulela u supapo peka liocitunda, eye o u pesila kutue womunu wa yelisiwa kuenje ocitunda ci tuvika akandu omunu waco kovaso a Yehova.+

19 “Ocitunda ceca ocilumba cekandu+ kuenda ci tuvika ekandu liomunu wa yelisiwa kevĩho liaye, noke ocitunda ci ponda ocinyama cocilumba coku pia elisi. 20 Noke ocitunda ceca ocilumba coku pia elisi, locilumba colomema+ kutala kuenda ocitunda ci tuvika ekandu liomunu waco+ kuenje o yelisiwa.+

21 “Nda omunu waco ohukũi kuenda ka kuete ovina vialua vioku lumba, eye eca ocitupi cimosi comeme ndocilumba ceko okuti, ci linga ocilumba coku senga senga oco akandu aye muẽle a tuvikiwe, ecavo onepa yimue yekũi yo efa* yosema ya fina ya tengiwa lulela ndocilumba colomema lo loge yulela, 22 kuenda olonende vivali ale ivuvu vivali violopomba, ndomo ci likuata lovina a kuete. Yimue yi kala yocilumba cekandu, yikuavo yocilumba coku pia elisi.+ 23 Keteke liecelãla,+ eye o vi nena kocitunda puvelo wombalaka yohongele kovaso a Yehova,+ oco a yelisiwe.

24 “Ocitunda ci tikula ocitupi comeme cocilumba ceko,+ lo loge yulela kuenje ocitunda ci vi senga senga konyima lo kovaso ndocilumba coku senga senga kovaso a Yehova.+ 25 Noke ocitunda ci ponda ocitupi comeme cocilumba ceko kuenda ci tikula onepa yimue yosonde yocilumba ceko, ci yi kapa kosungu yetũi liondio yomunu wa yelisiwa kuenda kolumumba lueka liaye liondio, lo kolumumba luomãhi yaye yondio.+ 26 Ocitunda ci kapa onepa yimue yulela peka liaye liepĩli,+ 27 kuenda onepa yimue yulela u kasi peka liaye liepĩli o u nyĩla lomuine waye wondio olonjanja epanduvali kovaso a Yehova. 28 Kuenje ocitunda ci kapa onepa yimue yulela u kasi peka liaye kosungu yetũi liondio yomunu wa yelisiwa kuenda kolumumba lueka liaye liondio lo kolumumba luomãhi yaye yondio okuti, polonepa vimuamue pa kapiwa osonde yocilumba ceko. 29 Ocitunda ci kapa peka liaye ulela wa supapo kuenda ci yi kapa kutue womunu wa yelisiwa, oco a tuvike ekandu liomunu waco kovaso a Yehova.

30 “Eye eca olonende ale ivuvu violopomba, ndomo ci likuata lovina a kuete,+ 31 yimue o yeca ndocilumba cekandu, yikuavo ndocilumba coku pia elisi+ kumue locilumba colomema; kuenje ocitunda ci tuvika ekandu liomunu wa yelisiwa kovaso a Yehova.+

32 “Eci oco ocihandeleko catiamẽla komunu o kuete uvei wovilundu okuti, ka kuete ovina vialua oco a liyelise.”

33 Kuenje Yehova wa sapuila Mose la Arone hati: 34 “Eci vu iñili vofeka yo Kanana,+ yina ame ndo wĩhi ndocipiñalo+ kuenje ndi vĩhisa onjo yimue vofeka yene luvei wovilundu,+ 35 muẽleanjo o sukila oku enda loku sapuilako ocitunda hati: ‘Onjo yange ya vĩhisiwa luvei umue.’ 36 Ocitunda ci tuma oku longolola ovikuata viosi vionjo osimbu eye keyile oku kũlĩhĩsa uvei waco, oco ka ka tende okuti ovina viosi vi kasi vonjo via vĩhisiwa; noke ocitunda ci iñila oco ci kũlĩhĩse onjo yaco. 37 Eye o kũlĩhĩsa onepa yonjo yi kuetiwe luvei kuenje nda wa limbuka okuti ovimano vionjo vi kuete atota evala liungolo ale li kusuka kuenje a molẽha ndu okuti a longa hao a lisanduila vovimano, 38 ocitunda cenda toke puvelo wonjo kuenje onjo yaco yi siala upolokoso vokuenda kuoloneke epanduvali.+

39 “Noke ocitunda ci tiuka keteke liepanduvali loku kũlĩhĩsa onjo. Nda uvei waco wa lisanduila vovimano vionjo, 40 ocitunda ci tuma okuti ovawe a kuetiwe luvei opiwapo loku a inasi kosamua yolupale kocitumãlo cimue ca vĩha. 41 Kuenje ocitunda ci tuma okuti onjo yaco yi kuangiwa kuenda ohala locikokoto vina viupiwamo, vi inasiwe kosamua yolupale kocitumãlo cimue ca vĩha. 42 Va piñainya ovawe akuavo pana popiwa ovawe a inisiwa kuenda eye o sukila oku laña ohala locikokoto cikuavo vonjo yaco.

43 “Pole, nda uvei waco wa tiuka noke yoku upako ovawe konjo loku kuangula ovimano kuenda noke yoku yi laña ocikokoto cikuavo, 44 ocitunda cendako kuenda ci kũlĩhĩsa onjo yaco. Nda uvei wa lisanduila vonjo, onjo yaco ya kuatiwa luvei wovilundu uvĩ.+ Onjo yaco ya vĩhisiwa. 45 Ocitunda ci teya onjo yaco oku kongelamo ovawe aco, avaya aco, lohala yosi kuenda ocikokoto conjo kuenje ovina viaco vi inasiwa kosamua yolupale kocitumãlo ca vĩha.+ 46 Pole, nda umue wa iñila vonjo yaco osimbu yi kasi koloneke viupolokoso,+ o vĩhisiwa toke koñolosi;+ 47 wosi wa pekela vonjo yaco a sukule uwalo waye kuenda wosi o lila vonjo yaco a sukulevo uwalo waye.

48 “Pole, nda ocitunda ceya kuenje ca limbuka okuti uvei waco ka wa lisanduile vonjo noke yoku lañiwa ocikokoto, ocitunda ci tukula onjo yaco okuti ya yela, momo uvei waco wa tundamo. 49 Oco onjo yaco yi yelisiwe kevĩho,* ocitunda ci tikula olonjila vivali, levaya liosedru, lonanga yi kusuka kuenda o hisopu.+ 50 Eye o pondela onjila yimue vocikuata cotuma muli ovava opiwa pono. 51 Noke eye o tikula evaya liosedro, o hisopu, lonanga yi kusuka kuenda onjila yi kasi lomuenyo kuenje o vi nyava vosonde yonjila ya pondiwa kuenda vovava opiwa pono kuenje o nyĩla osonde yaco konjo olonjanja epanduvali.+ 52 Kuenje ocitunda ci yelisa onjo yaco kevĩho* losonde yonjila, lovava opiwa pono, lonjila yi kasi lomuenyo, levaya liosedru, lo hisopu kuenda onanga yi kusuka. 53 Eye ecelela okuti onjila yi kasi lomuenyo yi palãlela vusenge kuenda o tuvika ekandu lionjo kuenje oyo yi yelisiwa.

54 “Eci oco ocihandeleko catiamẽla komunu o kuete uvei wovilundu okuti, epute vutue ale kolonjele,+ 55 ovilundu kuwalo+ ale konjo,+ 56 koku lenda, kepute kuenda katota,+ 57 oco ku limbukiwe ocina cimue ca vĩhisiwa, locina cimue ca yela.+ Eci oco ocihandeleko catiamẽla kovilundu.”+

15 Yehova wamisako oku sapuila Mose la Arone hati: 2 “Sapuili va Isareli okuti: ‘Nda ulume umue o kuete uvei wocikata kocimatamata caye cuyali,* ocina caco cu vĩhisa.+ 3 Eye o vĩhisiwa omo liuvei wocikata, ci kale okuti ocikata caco camamako oku pita kocimatamata caye cuyali ale sio, eye o vĩhisiwa.

4 “‘Kula wosi ku pekela u o kasi luvei wocikata, ku vĩhisiwa kuenda kocikuata cosi eye a tumãla ku vĩhisiwavo. 5 Omunu wosi o lamba kula waye, o sukila oku sukula uwalo waye, loku yua vovava kuenje o vĩhisiwa toke koñolosi.+ 6 Wosi o tumãla kocikuata cimue okuti omunu o kasi luvei wocikata oko a tumãlele, o sukila oku sukula uwalo waye, loku yua vovava kuenje o vĩhisiwa toke koñolosi. 7 Wosi o lamba ketimba liomunu o kasi luvei wocikata, o sukila oku sukula uwalo waye, loku yua vovava kuenje o vĩhisiwa toke koñolosi. 8 Nda omunu o kasi luvei wocikata wa siyila omunu umue wa yela, omunu waco o sukila oku sukula uwalo waye, loku yua vovava kuenje o vĩhisiwa toke koñolosi. 9 Omunu o kuete uvei wocikata nda o tumãla komangu yoku endela kocinyama cimue, oco ci vĩha. 10 Wosi o lamba kocikuata caco eye a tumãlele o vĩhisiwa toke koñolosi kuenda wosi ambata ocikuata caco, o sukila oku sukula uwalo waye, loku yua vovava kuenje o vĩhisiwa toke koñolosi. 11 Nda omunu o kuete uvei wocikata+ ka sukuile ovaka aye lovava kuenje o lamba omunu umue, omunu waco o sukila oku sukula uwalo waye, loku yua vovava kuenda o vĩhisiwa toke koñolosi. 12 Ocikuata cosi cotuma omunu o kasi luvei wocikata a lambako, ci tetuiwe kuenda ocikuata cosi cavaya ci sukuiwe lovava.+

13 “‘Eci ocikata ci liwekapo oku pita kuenda omunu waco o yelisiwa, eye o sukila oku tenda oloneke epanduvali oco a yelisiwe ciwa kuenda o sukila oku sukula uwalo waye, loku yua lovava opiwa pono kuenje o yelisiwa.+ 14 Keteke liecelãla, eye o sukila oku eca olonende vivali ale ivuvu vivali violopomba+ kuenje enda kovaso a Yehova puvelo wombalaka yohongele kuenda o vi eca kocitunda. 15 Kuenje ocitunda ci vi eca, yimue ndocilumba cekandu, yikuavo ndocilumba coku pia elisi kuenje ocitunda ci tuvika ekandu liomunu waco kovaso a Yehova omo liuvei wocikata.

16 “‘Nda ulume umue wa tunda ombuto, eye o sukila oku sukula etimba liaye liosi vovava kuenje o vĩhisiwa toke koñolosi.+ 17 Eye o sukila oku sukula uwalo waye lovava kuenda ocikuata cosi cocipa kuli ombuto yaco kuenje oco, ci vĩha toke koñolosi.

18 “‘Nda ulume umue wa lipekela lukãi umue kuenje wa tunda ombuto, ovo va sukila oku yua lovava kuenda va vĩha toke koñolosi.+

19 “‘Nda ukãi umue o kasi oku pita osonde kocimatamata caye cuyali,* eye amamako oku vĩha vokuenda kuoloneke epanduvali omo a kasi kocituwa caye.+ Omunu wosi wa lamba kokuaye o vĩhisiwa toke koñolosi.+ 20 Ocina cosi eye a pekela osimbu a kasi kocituwa caye, ci vĩhisiwa kuenda kovina viosi a tumãla vi vĩhisiwavo.+ 21 Omunu wosi o lamba kula waye, o sukila oku sukula uwalo waye, loku yua lovava kuenje o vĩhisiwa toke koñolosi. 22 Omunu wosi o lamba kocikuata eye a tumãlele, o sukila oku sukula uwalo waye loku yua lovava kuenje o vĩhisiwa toke koñolosi. 23 Nda ukãi waco wa tumãla kula ale kocikuata cikuavo, omunu wosi o lambako o vĩhisiwa toke koñolosi.+ 24 Nda ulume umue o lipekela laye kuenda nda eye o lamba kosonde yukãi waco,+ ulume o vĩhisiwa oloneke epanduvali kuenje ula wosi ulume waco a pekaila u vĩha.

25 “‘Nda ukãi umue o tunda osonde vokuenda kuoloneke vialua+ okuti havioko oloneke viocituwa caye,+ ale osonde yamamako oku pita otembo yalua okuti koloneke viaye viocituwa ci sule, eye o vĩhisiwa vokuenda kuoloneke viaco a pita osonde yalua ndeci koloneke viaye viocituwa. 26 Pula wosi eye a pekela vokuenda kuoloneke eye a pita osonde yalua, ula waco u kala ndula a pekaila koloneke viaye viocituwa+ kuenda kocikuata cosi eye a tumãla ci vĩha ndeci eye a vĩha koloneke viaye viocituwa. 27 Omunu wosi o lamba kovikuata viaco, o vĩhisiwa kuenda o sukila oku sukula uwalo waye, loku yua lovava kuenje o vĩhisiwa toke koñolosi.+

28 “‘Pole, nda osonde ya liwekapo oku pita, ukãi o tenda vali oloneke epanduvali kuenje o liyelisa.+ 29 Keteke liecelãla, eye o tikula olonende vivali ale ivuvu vivali violopomba+ kuenje o vi nena kocitunda puvelo wombalaka yohongele.+ 30 Ocitunda ci vi eca, yimue ndocilumba cekandu, yikuavo ndocilumba coku pia elisi kuenje ci tuvika ekandu liomunu waco kovaso a Yehova omo lievĩho liaye lioku pita osonde.+

31 “‘Ove o sukila oku tepa va Isareli kevĩho liavo, oco ka va ka fe kevĩho liavo eci va vĩhisa otavernakulu yange yi kasi pokati kavo.+

32 “‘Eci oco ocihandeleko catiamẽla kulume o kasi luvei wocikata, lulume wa vĩha omo lioku pita ombuto,+ 33 kuenda kukãi o kasi kocituwa caye,+ kulume ale kukãi o kasi oku pita osonde yalua+ kuenda kulume o lipekela lukãi wa vĩhisiwa.’”

16 Yehova wa vangula la Mose noke yoku fa kuomãla vavali va Arone okuti va fa omo lioku amela ku Yehova.+ 2 Yehova wa sapuila Mose hati: “Sapuila huvove Arone okuti, ka ka iñile vocitumãlo ci kola+ konyima yongumbo+ velivala ka lia sokiyiwile, loku talama kovaso yonuviko Yocikasia oco ka ka fe,+ momo ame ndi limolẽhisa konuviko+ yaco velende.+

3 “Ovina Arone a sukila oku nena eci a iñila vocitumãlo ci kola vievi: okangombe kocilumba cekandu+ kuenda ocitupi comeme cocilumba coku pia elisi.+ 4 Eye a wale uwalo wa lepa wovalatanya haiwo u kola,+ loloputula*+ viovalatanya oco a sitike etimba liaye kuenda a itike uvia wovalatanya,+ loku kapa ekofue liovalatanya kutue waye.+ Ovowalo aco a kola.+ Eye o lisukula eye muẽle vovava+ kuenda o wala ovowalo aco.

5 “Pokati kohongele ya va Isareli+ eye o sukila oku upako ovitupi vivali violohombo viocilumba cekandu kuenda ocitupi cimosi comeme cocilumba coku pia elisi.

6 “Arone o sukila oku eca ongombe yocilumba cekandu okuti, caye muẽle+ kuenda o tuvika ekandu liaye muẽle kuenda lionjo yaye.

7 “Eye o ka tikula ovitupi vivali violohombo loku vi nena kovaso a Yehova, puvelo wombalaka yohongele. 8 Arone o ka imba ocela covitupi vivali violohombo okuti, cimue ca Yehova cikuavo ca Asasele.* 9 Arone o nena ocitupi cohombo ca nõliwila ocela+ ca Yehova kuenje o ceca ndocilumba cekandu. 10 Pole, ocitupi cohombo ca nõliwila ocela ca Asasele, ci ambatiwa lomuenyo kovaso a Yehova oco ci tuvikiwe laco ekandu kuenje va ecelela okuti ocitupi cohombo ca Asasele cenda vekalasoko.+

11 “Arone eca ongombe yocilumba cekandu okuti, caye muẽle kuenda o tuvika ekandu liaye muẽle leli lionjo yaye; noke o ponda ongombe yocilumba cekandu okuti, caye muẽle.+

12 “Eye o tikula elonga liaye liovinene+ lieyuka akala opiwa kutala+ u kasi kovaso a Yehova kuenda upa apupu avali insensu vielemba liwa+ kuenje o vi nena vokati kongumbo.+ 13 Eye o kapa insensu vondalu yi kasi kovaso a Yehova+ kuenda owisi winsensu u tuvika onuviko+ Yocikasia Cuvangi,+ oco ka ka fe.

14 “Eye o tikula onepa yimue yosonde yongombe+ kuenje o yi nyĩla lomuine waye kovaso yonuviko yi kasi konele yutundilo kuenda onepa yikuavo yosonde o yi nyĩlavo lomuine waye olonjanja epanduvali kovaso yonuviko.+

15 “Eye o ponda ocitupi cohombo ndocilumba cekandu okuti, comanu+ kuenda o nena osonde yaco vokati kongumbo+ kuenje o linga losonde yaco+ eci a lingile losonde yongombe; o yi nyĩla konuviko kuenda kovaso yaco.

16 “Eye o sukila oku tuvika ekandu liocitumãlo ci kola omo liovilinga vĩvi via va Isareli kuenda akulueya avo lakandu avo+ kuenje eci oco o sukila oku linga lombalaka yohongele yi kasi pokati kavo omo liovilinga viavo vĩvi.

17 “Ka citava okuti omunu umue iñila vombalaka yohongele osimbu eye a enda oku ka tuvika ekandu vocitumãlo ci kola toke eci eye a tundamo. Eye o sukila oku tuvika ekandu liaye muẽle kuenda lionjo yaye+ kumue leli lia va Isareli vosi.+

18 “Noke eye o tunda loku enda kutala+ u kasi kovaso a Yehova kuenda o tuvika ekandu liaco kuenje o tikula onepa yimue yosonde yongombe, lonepa yimue yosonde yohombo kuenje o yi kapa kolombinga vi kasi kolonele viosi viutala. 19 Eye o nyĩlako onepa yimue yosonde lomuine waye olonjanja epanduvali kuenda o u yelisa loku u kolisa kovilinga vĩvi via va Isareli.

20 “Eci eye a mala oku tuvika ekandu+ liocitumãlo ci kola, liombalaka yohongele kuenda liutala,+ eye ecavo ocitupi cimue cohombo ci kasi lomuenyo.+ 21 Arone o kapa ovaka aye kutue wocitupi cohombo ci kasi lomuenyo kuenda oko a litavela olohole viosi via va Isareli, lakulueya avo osi, lakandu avo osi loku a kapa kutue wocitupi cohombo+ kuenje ceciwa kulume wa nõliwa* oco a ci tuale vekalasoko. 22 Ocitupi cohombo cambata oco muẽle olohole viavo viosi+ vofeka yimue yekalasoko.+ Kuenje eye o tuma ocitupi caco vekalasoko.+

23 “Noke Arone iñila vombalaka yohongele kuenda o lula uwalo waye wovalatanya una a walele poku iñila vocitumãlo ci kola kuenje omo a u sia. 24 Eye o lisukuila* vovava+ vocitumãlo cimue ci kola kuenda o wala uwalo waye;+ noke o tunda kuenda eca ocilumba caye coku pia elisi+ kuenda ocilumba coku pia elisi comanu+ kuenje o tuvika ekandu liaye muẽle kuenda liomanu.+ 25 Eye o timĩha ulela wocilumba cekandu oco owisi waco u tuimĩle kutala.

26 “Omunu wa ka tuala ocitupi cohombo ca Asasele,+ o sukila oku sukula uwalo waye, loku yua eye muẽle vovava, oco a iñila noke vocilombo.

27 “Kuenje ongombe yocilumba cekandu kumue locitupi cohombo cocilumba cekandu vina okuti osonde yavio via kapiwa vocitumãlo ci kola oco yi tuvike ekandu, yi tualiwa kosamua yocilombo kuenda ocipa cavio, lositu yavio, laniña avio vi timĩhiwa vondalu.+ 28 Omunu o vi timĩha o sukila oku sukula uwalo waye, loku yua eye muẽle vovava, oco a iñila noke vocilombo.

29 “Oco ci linga ociholo cotembo ka yi pui kokuene: Kosãi yepanduvali, keteke liekũi kosãi, vu sukila oku lekisa okuti wa sumui* omo liakandu ene kuenda ko ka lingi upange laumue,+ ci kaile onyitiwe ale ocingendeleyi ca tunga pokati kene. 30 Keteke liaco, ku tuvikiwa ekandu+ liene oco vu yelisiwi. Vu yelisiwa kakandu ene osi kovaso a Yehova.+ 31 Eteke liaco, li linga esambata lioku puyuka kokuene kuenda vu sukila oku lekisa okuti wa sumui+ omo liakandu ene. Oco, ociholo cotembo ka yi pui.

32 “Ocitunda ca wavekiwa+ haico ca nõliwa* oco ci vumbe ndocitunda+ pomangu ya isiaye,+ ci tuvika ekandu kuenda ci wala uwalo wovalatanya+ okuti, uwalo u kola.+ 33 Oco ci tuvika ekandu liocitumãlo ci kola,+ liombalaka yohongele+ kuenda liutala;+ oco ci tuvika akandu ovitunda kuenda omanu vosi va Isareli.+ 34 Oco, ci linga ociholo cotembo ka yi pui kokuene+ oco ku tuvikiwe akandu osi a va Isareli onjanja yimosi vunyamo.”+

Kuenje eye wa linga ndomo Yehova a handelekele Mose.

17 Yehova wamamako oku sapuila Mose hati: 2 “Sapuila Arone kumue lomãla vaye kuenda va Isareli vosi hati: ‘Eci oco Yehova a handeleka hati:

3 “‘“Nda omunu umue wo konjo ya Isareli o ponda ongombe yimue, ale ocitupi comeme, pamue ohombo vocilombo, ale o ci pondela kosamua yocilombo, 4 nda eye ka ci nenele puvelo wombalaka yohongele oco a cece ndocilumba ku Yehova kovaso yotavernakulu ya Yehova, omunu waco o kuata eko liosonde. Eye wa pesela osonde kuenda omunu waco a tepiwe* pokati komanu vaye. 5 Eci oco ci lingiwa oco va Isareli va nene ovilumba okuti, va vi lumbila Yehova vusenge puvelo wombalaka yohongele, poku vi eca kocitunda. Ovo va vi lumba ndovilumba viombembua ku Yehova.+ 6 Ocitunda ci nyĩla osonde yaco kutala wa Yehova puvelo wombalaka yohongele kuenda ci tuimisa ulela waco ndelemba liwa ku Yehova.+ 7 Ovo ka va ka lumbe vali ovilumba viavo kolondele*+ vi kasi ndolohombo, vina ovo va linga lavio upuepue.+ Oco, ci linga ndociholo cotembo ka yi pui kovitumbulukila viene.”’

8 “Va sapuila hati: ‘Omunu wosi wo konjo ya Isareli ale ocingendeleyi ci kasi pokati kene okuti, wa eca ocilumba coku pia elisi ale ocilumba cikuavo, 9 pole, ka nena ocilumba caco puvelo wombalaka yohongele oco a cece ku Yehova, omunu waco a tepiwe* pokati komanu vaye.+

10 “‘Nda omunu umue wo konjo ya Isareli, ale ocingendeleyi ci kasi pokati kene o lia osonde,+ ndi likala omunu waco o lia osonde kuenje ndu u tepa* pokati komanu vaye. 11 Momo omuenyo wocinyama cosi u kasi vosonde+ kuenda ame nda yeca kutala+ oco vu tuviki akandu ene muẽle, momo osonde oyo yi tuvika akandu+ omo liomuenyo u kasimo. 12 Eli olio esunga lieci nda sapuilila va Isareli hati: “Pokati kene lomue ka ka lie osonde, ndaño ocingendeleyi ci kasi pokati kene,+ ka ci ka lie osonde.”+

13 “‘Nda umue pokati ka va Isareli ale ocingendeleyi ci kasi pokati kene okuti poku yeva o kuata ocinyama cimue covusenge, ale onjila yi tava oku yi lia, eye o sukila oku pesela osonde yaco posi+ loku yi lembika leve. 14 Momo omuenyo woviluvo viosi u kasi vosonde, omo liomuenyo u kasimo. Kuenje nda sapuila va Isareli hati: “Pokati kene lomue ka ka lie osonde yoviluvo viosi, momo omuenyo woviluvo viosi u kasi vosonde. Wosi o lia osonde, o pondiwa.”+ 15 Nda omunu umue onyitiwe, ale ocingendeleyi o lia ocinyama cimue ca sangiwa okuti ca fa, ale ca pondiwa locinyama covusenge,+ eye o sukila oku sukula uwalo waye, loku yua vovava kuenda o vĩhisiwa toke koñolosi+ kuenje o yelisiwa. 16 Pole, nda eye ka u sukuile ale ka yuile,* eye o yambuiwa omo lieko liaye.’”+

18 Yehova wamisako oku sapuila Mose hati: 2 “Sapuila va Isareli okuti, ‘Ame ndi Yehova Suku yene.+ 3 Ko ka lingi ovina ndevi omanu vo vofeka Yegito va lingainga, kuna wa kali kuenda ko ka lingivo ovina omanu vo vofeka yo Kanana va lingainga omu ñasi oku vu tuali.+ Ko ka endeli voviholo viavo. 4 Kapiko ovisila viange kuenda kapiko oviholo viange loku endelamo.+ Ame ndi Yehova Suku yene. 5 Kapiko oviholo viange, lovisila viange; wosi o ci linga, o ka muila omuenyo kokuavio.+ Ame ndi Yehova.

6 “‘Ka citava okuti ulume umue pokati kene amela ku ngandiaye oco a lipekele laye.*+ Ame ndi Yehova. 7 Ku ka lipekele la isiove kuenda ku ka lipekele la ina yove. Eye ina yove kuenda ku ka lipekele laye.

8 “‘Ku ka lipekele lukãi wa isiove.+ Eci ci situlula osõi* ya isiove.

9 “‘Ku ka lipekele la manjove ukãi, ndaño lomõla ufeko wa isiove, ale omõla ufeko wa ina yove, ci kale nda wa citiwila vimbo liaye, ci kale nda wa citiwila kumue kuiñi.+

10 “‘Ku ka lipekele lonekulu yove okuti, omõla ufeko womõlove ulume, ale omõla ufeko womõlove ukãi, momo eci ci ku kutisa ove muẽle osõi.

11 “‘Ku ka lipekele lomõla ufeko wukãi wa isiove okuti, ocitumbulukila ca isiove, momo eye manjove ukãi.

12 “‘Ku ka lipekele la manji ukãi wa isiove. Eye ukuepata lia isiove.+

13 “‘Ku ka lipekele la manji ukãi wa ina yove, momo eye ukuepata lia ina yove.

14 “‘Ku ka kutise osõi manji ulume wa isiove* poku lipekela lukãi waye. Eye pahãi yove.+

15 “‘Ku ka lipekele lukãi womõlove.+ Momo eye ukãi womõlove ulume kuenda ka citava okuti ove o lipekela laye.

16 “‘Ku ka lipekele lukãi wa manjove,+ momo ci situlula osõi ya manjove.*

17 “‘Ku ka lipekele lukãi umue kumue lomõlaye ufeko.+ Ku ka lipekele lonekulu yaye yufeko okuti, omõla womõlaye ulume ale womõlaye ukãi. Ovo vakuepata liaye; elinga liaco liumbondo.*

18 “‘Ku ka kuele manji ukãi wukãi wove oco a linge sepakãi yukãi wove+ kuenje ove o lipekela laye osimbu ukãi wove a kasi lomuenyo.

19 “‘Ku ka amele kukãi umue osimbu a kasi koloneke viaye viocituwa oco o lipekele laye.+

20 “‘Ku ka lipekele lukãi wukuene,* sanga o li vĩhisa ove muẽle.+

21 “‘Ku ka ecelele okuti umue pokati kocitumbulukila cove o lumbiwa* ku Moleke.+ Ku ka sepule onduko ya Suku yove lonjila yaco.+ Ame ndi Yehova.

22 “‘Ku ka lipekele lulume ndomo o lipekela lukãi.+ Elinga liaco liumbondo.

23 “‘Ka citava okuti ulume o lipekela locinyama oco a li vĩhise laco; ka citava okuti ukãi o talama kovaso yocinyama cimue oco a lipekele laco.+ Elinga liaco ka lia sungulukile.

24 “‘Ko ka li vĩhisi lovina evi, momo olofeka ñasi oku tundisa kovaso ene, via li vĩhisa lovina viaco.+ 25 Omo liaco, ofeka ya vĩhisua, ndi yi nenela eyambulo omo lioku lueya kuayo kuenje olonungi vi tundisiwa vofeka yavo.+ 26 Pole, ene muẽle kapiko oviholo viange lovisila viange+ kuenda ko ka lingi lacimue cumbondo, ci kale onyitiwe yofeka, ale ocingendeleyi ca tunga pokati kene.+ 27 Momo omanu va livanga oku tunga vofeka, va linga ovina viaco viosi viumbondo osimbu ka wa iñililimo+ kuenje cilo ofeka ya vĩhisua. 28 Kuenje nda ene ka vu vĩhisa ofeka, ka vu ka tundisiwi vofeka ndeci olofeka vio livangeli vi ka tundisiwa. 29 Nda kua lingiwa cimue pokati kovina evi viumbondo, wosi o vi linga a tepiwe* pokati komanu vaye. 30 Amamiko oku kapako olonumbi viaco poku yuvula oku linga ovina viosi viumbondo via enda oku lingiwa osimbu ka wa iñilili vofeka yaco,+ oco ka vu ka li vĩhisi lavio. Ame ndi Yehova Suku yene.’”

19 Yehova wa sapuila vali Mose hati: 2 “Sapuila ohongele yosi ya va Isareli hati: ‘Ene vu sukila oku kola, momo ame ndi Yehova Suku yene, ndi kola.+

3 “‘Omunu lomunu a sumbile ina yaye la isiaye+ kuenda amamiko oku lava asambata ange.+ Ame ndi Yehova Suku yene. 4 Ko ka fendeli olosuku ka vi kuete esilivilo,+ ale oku litungila olosuku viutale wa yenguluiwa.+ Ame ndi Yehova Suku yene.

5 “‘Eci vu eca ocilumba combembua ku Yehova,+ vu sukila oku ci lumba lonjila yimue okuti ene muẽle vu taviwa.+ 6 Oco ci liwe keteke ci lumbiwa kuenda keteke li kuamamo, pole, eci ci supapo toke keteke liatatu, ci timĩhiwe vondalu.+ 7 Nda onepa yimue ya supapo ya liwa keteke liatatu, yi linga ocina cimue ca vĩha okuti ka ci taviwa. 8 Nda omunu umue o liako, o pisiwa omo liekandu liaye, momo wa sepula ocina cimue ci kola ca Yehova kuenje o tepiwa* pokati komanu vaye.

9 “‘Eci wunguli ovaima o vepia liene, ko ka unguli kolonepa viosi viepia kuenda ko ka pupululi eci ca supapo poku ungula.+ 10 Handi vali, ku ka pupulule eci ca supa vocumbo cove cayuva, ale oku nõla ayuva ana a sandokaila vocumbo cayuva. Ayuva aco, o a sila olohukũi*+ kuenda ovingendeleyi. Ame ndi Yehova Suku yene.

11 “‘Ko ka nyani,+ ko ka kembi+ kuenda ko ka kali vakuesanda omunu lukuene. 12 Ko ka lisingili esanda vonduko yange,+ sanga vu sepula onduko ya Suku. Ame ndi Yehova. 13 Ku ka kembe ukuene+ kuenda ku ka nyane.+ Ku ka kale lofeto yonalavayi uteke wosi toke komẽle.+

14 “‘Ku ka siñale omunu ocisitatũi, ale oku kapa ocilondokua kovaso yomeke+ kuenda sumbila Suku yove.+ Ame ndi Yehova.

15 “‘Lekisi esunga poku tetulula. Ku ka lekise ocame kohukũi okuti o velisapo ohuasi.+ Lekisa esunga poku tetuluila ukuene.

16 “‘Ku ka ende pokati ka vakuene oku sandeka olombonde.+ Ku ka linge cimue ci pondola oku kapa kohele omuenyo* wukuene.*+ Ame ndi Yehova.

17 “‘Ku ka suvuke manjove vutima.+ O sukila oku lungula ukuene kovina evi viosi,+ oco ku ka kupukile vekandu liaye.

18 “‘Ku ka fetuluinye,+ ale oku kuatela ocikumbiti omanu vove kuenda sola ukuene ndeci o lisole ove muẽle.+ Ame ndi Yehova.

19 “‘Vu sukila oku pokola koviholo viange: Ku ka tokekise ovinyama vivali viapata a litepa. Ku ka kũle pamuamue olombuto vivali via litepa vepia liove+ kuenda ku ka wale uwalo walinya a litepa.+

20 “‘Nda ulume umue o lala lukãi umue kuenje o lipekela laye okuti ukãi waco upika umue wa lombiwa ale lulume ukuavo, pole, ukãĩ waco ka yovuiwile, va sesamẽla oku kangisiwa. Ka va ka pondiwe, momo ufeko wa lombiwa ale. 21 Ulume waco o sukila oku nena ocilumba caye ceko ku Yehova puvelo wombalaka yohongele okuti, omeme yocilumba ceko.+ 22 Ocitunda ci tuvika ekandu liulume waco lomeme yocilumba ceko kovaso a Yehova omo liekandu a linga kuenje ekandu liaye li ecelua.

23 “‘Eci wiñili vofeka loku kũla oviti viapako, vu tenda apako aco okuti, a vĩha kuenda ka citava oku a lia.* Vokuenda kuanyamo atatu ka citava okuti, vu lia apako aco.* 24 Pole, kunyamo wakuãla, apako aco osi a kola kuenje o a lumbila ku Yehova lesanju.+ 25 Kunyamo watãlo vu lia apako aco, loku vokiya apako kovina wunguli. Ame ndi Yehova Suku yene.

26 “‘Ko ka li lacimue ca tengiwa losonde.+

“‘Ko ka sandi vakuombanda, ale oku tahã.+

27 “‘Ko ka pemũli* esinga li kasi kolonele viutue wene, ndaño oku tepulula olonjele lonjila yimue okuti vi salũluha.+

28 “‘Ko ka li tãli vetimba omo liomunu umue wa fa+ kuenda ko ka litakuli vetimba. Ame ndi Yehova.

29 “‘Ku ka lavise omõlove ukãi poku u lingisa ocipuepue,+ oco ofeka ka yi ka lingevo upuepue kuenje mu yuka lumbondo.+

30 “‘Amamiko oku lava asambata ange+ kuenda lekisi esumbilo kocitumãlo cange ci kola. Ame ndi Yehova.

31 “‘Ko ka sandiliyi omanu vakuakuvangula lolondele,+ ale vakuakutãha,+ oco ka vu ka vĩhisiwi lavo. Ame ndi Yehova Suku yene.

32 “‘Votokela omunu o kuete owele,+ loku lekisa esumbilo kukulu wendamba+ kuenda sumbila Suku yove.+ Ame ndi Yehova.

33 “‘Nda ocingendeleyi ca tunga vofeka yene, ko ka ci tati lãvi.+ 34 Nda ocingendeleyi ca tunga lene, ci tendi ndonyitiwe pokati kene;+ lekisi ocisola kokuaye ndeci vu lisole ene muẽle, momo wa kalivo ovingendeleyi vofeka Yegito.+ Ame ndi Yehova Suku yene.

35 “‘Ko ka pengisi esunga poku seteka usõvi, poku pesalisa, ale poku yonga ovina viovava.+ 36 Vu sukila oku talavaya lombalansa yocili, lovilemo viocili, lolonjongo* viocili viovina via kukuta kuenda olonjongo* viocili viovina viovava.+ Ame ndi Yehova Suku yene, una wo upi vofeka Yegito. 37 Amamiko oku kapako oviholo viange viosi, lolonumbi viange viosi kuenda oku vi kuama.+ Ame ndi Yehova.’”

20 Yehova wa sapuila Mose hati: 2 “Sapuila va Isareli hoti: ‘Nda omunu umue u Isareli, ale ocingendeleyi ca tunga pokati ka va Isareli eca ocitumbulukila caye ku Moleke, o sukila oku pondiwa muẽle.+ Omanu vo vofeka vo sosõle lovawe toke eci a fa. 3 Ndi likala omunu waco kuenje ndu u tepa* pokati komanu vaye, momo wa eca ocitumbulukila caye ku Moleke kuenda wa vĩhisa ocitumãlo cange ci kola+ loku sepula onduko yange yi kola. 4 Nda omanu vo vofeka va ecelela kocipango okuti omunu waco eca ocitumbulukila caye ku Moleke kuenje ka vo pondele,+ 5 ame muẽle ndi likala omunu waco kuenda epata liaye.+ Kuenje ndu u tepa* pokati komanu vaye kumue lomanu vosi va likongela kokuaye poku lingila Moleke upuepue.

6 “‘Omunu wosi o sanda vakuakuvangula lolondele+ kuenda vakuakutãha,+ loku linga lavo upuepue konepa yespiritu, ndi likala omunu waco kuenje ndu u tepa* pokati komanu vaye.+

7 “‘Vu sukila oku li kolisa ene muẽle loku kola,+ momo ame ndi Yehova Suku yene. 8 Kapiko oviholo viange loku vi tẽlisa.+ Ame ndi Yehova, una o kasi oku vu kolisi.+

9 “‘Nda omunu umue o siñala* isiaye ale inaye, o sesamẽla oku pondiwa muẽle.+ Nda eye wa siñala isiaye ale inaye, osonde yaye yu wila eye muẽle.

10 “‘Catiamẽla kulume umue o linga ukahokolo lukãi wamãle ceci: Ulume o linga ukahokolo lukãi wamãle o sukila oku pondiwa muẽle, ci kaile ulume wa linga ukahokolo ale ukãi wa linga ukahokolo.+ 11 Ulume wosi o lipekela lukãi wa isiaye, o kutisa osõi* isiaye.+ Kavali kavo va pondiwe muẽle. Osonde yavo yi va wila ovo muẽle. 12 Nda ulume umue o lipekela lukãi womõlaye ulume, vosi yavo va pondiwe muẽle. Ovo va linga eci ka ca sungulukile. Osonde yavo yi va wila ovo muẽle.+

13 “‘Nda ulume o lipekela lulume ukuavo ndeci umue a lipekela lukãi, kavali kavo va linga ocina cimue cumbondo.+ Va pondiwe muẽle. Osonde yavo yi va wila ovo muẽle.

14 “‘Nda ulume o lipekela lukãi umue kumue la ina yukãi waco, elinga liaco liumbondo.*+ Omanu va timĩhe vondalu ulume waco kuenda akãi vaco okuti,+ elinga liaco liumbondo ka li amamako pokati kene.

15 “‘Nda ulume umue o lipekela locinyama, eye o pondiwa muẽle kuenda ocinyama caco ci pondiwavo.+ 16 Nda ukãi umue o lipekela locinyama cimue,+ vu sukila oku ponda ukãi waco kumue locinyama caco. Ci kaile omunu kuenda ocinyama caco va pondiwe muẽle. Osonde yavo yi va wila ovo muẽle.

17 “‘Nda ulume umue o lipekela la manjaye ufeko, omõla ukãi wa isiaye ale omõla ukãi wa inaye kuenje ulume o mola epõlõla liufeko kuenda ufeko o mola epõlõla liulume, ocina cimue ca vĩha.+ Wa kutisa osõi manjaye ufeko. Eye o yambuiwa omo lieko liaye.

18 “‘Nda ulume umue o lipekela lukãi o kasi koloneke viaye viocituwa, ci kaile ulume kuenda ukãi va sikũlũla oku pita kuosonde yukãi.+ Kavali kavo va tepiwe* pokati komanu vavo.

19 “‘Ka citava oku lipekela la manji ukãi wa ina yove, ale manji ukãi wa isia yove, momo o sikũlũla osõi yukuepata liove.+ Va yambuiwa omo lieko liavo. 20 Ulume wosi o lipekela lukãi wa manji a isiaye, o situlula osõi* ya manji a isiaye.+ Va yambuiwa omo lieko liavo. Kuenje va fa ño okuti ka va kuata omãla. 21 Nda ulume umue o kuela ukãi wa manjaye, ocina caco ca vĩha.+ O situlula osõi* ya manjaye. Va fa ño okuti ka va kuata omãla.

22 “‘Amamiko oku kapako oviholo viange, lovisila viange+ loku vi tẽlisa+ oco okuti, ka vu tundisiwa vofeka ndu tuali.+ 23 Ko ka endeli voviholo violofeka ndi tundisa kovaso ene;+ momo va linga ovina viaco viosi kuenje ame nda vi nyehũla.+ 24 Eli olio esunga lieci ndo sapuilili hati: “Vu piñala ofeka yavo kuenje ame ndi yeca kokuene ndocipiñalo cene okuti, ofeka yimue yi tumõha asenjele lowiki.+ Ame ndi Yehova Suku yene, una wo tepi pokati komanu.”+ 25 Vu sukila oku tepisa pokati kocinyama ca yela leci ka ca yelele, lo pokati konjila ka ya yelele leyi ya yela;+ ko ka li vĩhisi lovinyama viaco, ale lolonjila viaco, pamue ovinyama viosi vi likoka posi, vina nda tepa pokati kene okuti via vĩha.+ 26 Ene vu kola kokuange, momo ame ndi Yehova ndi kola+ kuenda ndo tepi pokati kolofeka oco vu lingi omanu vange.+

27 “‘Ulume wosi ale ukãi okuti o vangula lolondele, pamue ukuakutãha o pondiwa muẽle.+ Omanu va va sosõle lovawe toke eci va fa. Osonde yavo yi va wila ovo muẽle.’”

21 Yehova wamamako oku vangula la Mose hati: “Sapuila omãla va Arone ovitunda okuti: ‘Ka citava okuti omunu umue o li vĩhisa omo liomunu wa fa pokati komanu vaye.+ 2 Pole, eye o ci linga lika nda omunu waco ukuepata liaye ndeci, inaye, isiaye, omõlaye ulume, omõlaye ukãi kuenda manjaye ulume, 3 eye o li vĩhisila omo lia manjaye nda eye ufeko wosombo okuti o kasi ocipepi laye kuenda ka kuelele handi. 4 Ka citava okuti eye o li vĩhisa loku li sepuisa eye muẽle omo liukãi wa tiamẽla kulume umue pokati komanu vaye. 5 Ka citava okuti va li pemula esenya vovitue viavo,+ ale oku teta kolonele violonjele viavo, ndaño oku li tãla tãla katimba avo.+ 6 Va sukila oku kola ku Suku,+ ka va ka sepule onduko ya Suku yavo,+ momo va kasi oku eca ovilumba via Yehova via lingiwa londalu okuti, okulia kua Suku yavo kuenda ovo va sukila oku kola.+ 7 Ka va ka likuele locipuepue,+ ndaño lukãi umue wa vĩhisiwa, ale ukãi wa nyãliwa lulume waye,+ momo ocitunda ci kola ku Suku yaye. 8 Ove o sukila oku u kolisa,+ momo ocitunda caco oco ci lumba okulia ku Suku yene. Eye o sukila oku kola kokuene, momo ame ndi Yehova una o kasi oku vu kolisi, ndi kola.+

9 “‘Nda omõla ufeko wocitunda o li sepuisa omo lioku linga upuepue, o sepuisa isiaye. Omõlaco a timĩhiwe vondalu.+

10 “‘Ocitunda cinene ca nõliwa pokati ka vamanjaye okuti ca wavekiwa* ulela+ kuenje ca ĩhiwa uwalo wutunda,+ ka citava okuti esinga liutue waye li salũlũha, ale oku tola uwalo waye.+ 11 Ka citava okuti eye amela komunu wa fa;+ ka ka li vĩhise omo lia isiaye, ale inaye. 12 Ka citava okuti o tunda vocitumãlo ci kola kuenda ka ka sepule ocitumãlo ci kola ca Suku yaye,+ momo ekolowa li kola, ulela woku wavekiwa wa Suku yaye,+ vi kasi kokuaye. Ame ndi Yehova.

13 “‘Ocitunda ci kuele lika ukãi una okuti ufeko wosombo.+ 14 Ka ka kuele ukãi ocimbumba, ale ukãi wa nyãliwa, pamue ukãi wa vĩhisiwa, ale ocipuepue; pole, a kuele ufeko wosombo wopiwa pokati komanu vaye. 15 Ka ka sepuise ocitumbulukila* pokati komanu vaye,+ momo ame ndi Yehova, una u kolisa.’”

16 Yehova wamisako oku vangula la Mose hati: 17 “Sapuila Arone hati: ‘Ka citava okuti ulume umue pokati kovitumbulukila* viove okuti, wa lemãla, amela kocitumãlo ci kola oco a lumbe okulia kua Suku yaye. 18 Nda kuli ulume umue wa lemãla, ka citava okuti amela kocitumãlo ci kola: ndeci ulume omeke, ocilema, ale wa lemãla kenyulu, pamue o kuete ocimatamata cimue ca lepa calua, 19 pamue ulume umue wa teka okulu, ale okuokuo, 20 pamue o kuete oñoño ale ohanama,* pamue ulume umue o kuete iso lia lemãla, uvei woku lisuya, ale uvei kekova, pamue apuãla a nyõleha.+ 21 Ka citava okuti umue pokati kocitumbulukila* ca Arone okuti, ocitunda ca lemãla, ci amela kutala oco a ece ovilumba via Yehova via lingiwa londalu. Omo okuti eye wa lemãla, ka citava oku amela kutala oco a lumbe okulia ku Suku yaye. 22 Eye o pondola oku lia lika okulia kua Suku yaye kua tunda kovina vi kola+ koku kola kuenda kovina vi kola.+ 23 Ka citava okuti amela kongumbo+ pamue kutala,+ momo eye wa lemãla; kuenda ka citava oku sepula ocitumãlo cange ci kola,+ omo ame ndi Yehova, una o kasi oku va kolisa.’”+

24 Kuenje Mose wa sapuila olondaka viaco ku Arone kuenda komãla vaye la va Isareli vosi.

22 Yehova wamisako oku vangula la Mose hati: 2 “Sapuila Arone kumue lomãla vaye oco va kuate utate* poku talavaya lovina vi kola via va Isareli okuti, ka va sepula onduko yange yi kola+ catiamẽla kovina ovo va kasi oku ndi lumbila.+ Ame ndi Yehova. 3 Va sapuila hoti: ‘Kovitumbulukila viene, lomue pokati kene okuti, osimbu a vĩha amela ocipepi lovina vi kola va Isareli va kasi oku lumbila Yehova; omunu waco o ka tepiwa* kovaso ange.+ Ame ndi Yehova. 4 Ka citava okuti omunu umue pokati kocitumbulukila ca Arone okuti ukuavilundu,+ ale o kuete uvei wocikata+ o lia kovina vi kola toke eci a yelisiwa,+ ndaño omunu wa lamba komunu wa li vĩhisa omo liomunu wa fa,+ pamue ulume o kasi oku pita ombuto,+ 5 ndaño omunu wa lamba kocinyama ci likoka posi okuti ca vĩha,+ ale oku lamba komunu umue wa li vĩhisa omo liocina cimue okuti, cu vĩhisa.+ 6 Omunu wosi o lamba kovina viaco o li vĩhisa toke koñolosi kuenda ka citava okuti eye o lia ovina vi kola, pole, o sukila oku lisukula vovava.+ 7 Eci ekumbi li iñila, o liyelisa, noke o lia ovina vimue vi kola, momo okuo okulia kuaye.+ 8 Ka citava okuti eye o lia ocinyama cimue ca lifila, ale ceci ca pondiwa locinyama cikuavo okuti, cu vĩhisa.+ Ame ndi Yehova.

9 “‘Ovo vamameko oku kapako olonumbi viange, oco ka va ka wile vekandu omo liovina viaco kuenda oco ka va ka fe omo lioku sinĩla olonumbi viaco. Ame ndi Yehova, una o kasi oku va kolisa.

10 “‘Omunu wosi okuti ka nõliwile* ka citava okuti o lia kovina vi kola.+ Ci kaile ocingendeleyi ca sikĩla konjo yocitunda ale onalavayi, ka citava oku lia ovina vi kola. 11 Pole, nda ocitunda ca landa omunu umue lolombongo viaye, omunu waco o pondola oku liako. Omunu wa citiwila vonjo yaye citavavo oku lia okulia kuaye.+ 12 Nda omõla ufeko wocitunda wa kueliwa lomunu umue okuti hacitundako,* omõlaco ufeko ka citava okuti o lia kovina vi kola via eciwa. 13 Pole, nda omõla ufeko wocitunda o linga ocimbumba ale o nyãliwa kuenda ka kuete ocitumbulukila citava okuti o tiukila konjo ya isiaye ndeci a kala umalẽhe, citava okuti eye o lia okulia kumue kua isiaye;+ pole, omunu ka nõliwile* ka citava oku liako.

14 “‘Nda omunu umue o lia ocina ci kola okuti halocipangoko, o sukila oku vokiya onepa yatãlo kondando yaco loku eca kocitunda ocina ci kola.+ 15 Ka citava okuti ovo va sepula ovina vi kola, vina va Isareli va eca ku Yehova,+ 16 sanga va li nenela ovo muẽle eyambulo omo lieko liavo lioku lia kovina vi kola; momo ame ndi Yehova, una o kasi oku va kolisa.”’

17 Yehova wamisako oku vangula la Mose hati: 18 “Sapuila Arone kumue lomãla vaye kuenda va Isareli vosi hoti: ‘Nda omunu umue u Isareli, pamue ocingendeleyi okuti wa tunga pokati ka va Isareli eca ocilumba cimue coku pia elisi+ ku Yehova, oco a tẽlise ohuminyo yimue, ale ocilumba ceciwa lutima wosi,+ 19 omunu waco o sukila oku lumba ocinyama copiwa vocunda,+ kovitupi viomeme ale viohombo vina ka vi kuete etondelo oco ocilumba caye ci taviwe. 20 Ka citava oku lumba ocinyama cimue ca lemãla,+ momo ocilumba caco ka ci taviwa kokuene.

21 “‘Nda omunu umue eca ocilumba combembua+ ku Yehova oco a tẽlise ohuminyo yimue, ale ocilumba ceciwa lutima wosi, o sukila oku lumba ocinyama ka ci kuete etondelo copiwa vocunda, oco ocilumba caye ci taviwe. Ka citava oku eca ocinyama ca lemãla. 22 Ka citava oku lumba ocinyama cimue ci kasi omeke, ca teka, ca lemẽhiwa, ci kuete epute, pamue epute limue lia lenda, ale uvei kekova; ka citava okuti o vi eca ku Yehova ale oku vi lumbila Yehova kutala. 23 Citava oku eca ongombe, ale omeme yi kuete ocimatamata cimue ca lepa calua ndocilumba ceciwa lutima wosi, pole, oku ceca ndocilumba cohuminyo, ka ci taviwa. 24 Ka citava oku eca ku Yehova ocinyama ci kuete apuãla a nyõleha, pamue a sasõha, pamue a tetiwa, ale ocinyama cimue okuti ocimatamata caco cuyali ca tetiwako; ka citava oku lumba ovinyama viaco vofeka yene. 25 Ka citava okuti weca ovinyama viopiwa peka liocingendeleyi oco vu vi lumbi ndokulia kua Suku yene, momo via vĩhisiwa kuenda via lemãla. Ovio ka vi taviwa kokuene.’”

26 Yehova wa sapuila vali Mose hati: 27 “Eci ongombe, ale ocitupi comeme pamue cohombo vi citiwa, vi amamako oku kala la inaco oloneke epanduvali,+ pole, oku upisa keteke liecelãla oco ci tava noke oku vi eca ndocilumba okuti, ocilumba cimue ci yokiwa vondalu ci lingiwila Yehova. 28 Ko ka pondi ongombe ale omeme kumosi lokamõla kaco keteke limuamue.+

29 “Eci vu lumbi ocilumba colopandu ku Yehova,+ vu sukila oku ceca lonjila yimue okuti vu taviwa. 30 Ocilumba caco ci liwe keteke liaco. Ka citava okuti vu supisapo cimue toke komẽle.+ Ame ndi Yehova.

31 “Amamiko oku kapako olonumbi viange loku vi tẽlisa.+ Ame ndi Yehova. 32 Ko ka sepuli onduko yange yi kola,+ ame puãi ndu kolisi pokati ka va Isareli.+ Ame ndi Yehova, una o kasi oku vu kolisi,+ 33 haeye wo vupi vofeka Yegito loku lekisa okuti, ame Suku yene.+ Ame ndi Yehova.”

23 Yehova wamisako oku vangula la Mose, hati: 2 “Sapuila va Isareli hoti: ‘Ovipito+ via Yehova vu sukila oku sambiliya, vi tukuiwa+ okuti, oloneke vi kola vioku liongolola. Vu sukila oku sambiliya ovipito viaco:

3 “‘Vu talavaya oloneke epandu, pole, keteke liepanduvali, esambata lioku puyuka,+ eteke liaco, eteke li kola lioku liongolola. Ko ka lingi upange keteke liaco. Li linga esambata lia Yehova kovitumãlo viosi vu tunga.+

4 “‘Ovipito via Yehova okuti, oloneke vi kola vioku liongolola vu sukila oku sambiliya votembo ya tukuiwa vievi: 5 Kosãi yatete, keteke 14 yosãi yaco,+ koñolosi,* o Paskoa+ ya Yehova.

6 “‘Keteke 15 yosãi yaco, Ocipito Colombolo ka vi kuete etumbisa via Yehova.+ Voloneke epanduvali vu lia olombolo ka vi kuete etumbisa.+ 7 Keteke liatete, vu sambiliya eteke li kola lioku liongolola.+ Ko ka lingi upange keteke liaco. 8 Pole, vokuenda kuoloneke epanduvali, weca ocilumba cimue ci yokiwa vondalu ci lingiwila Yehova. Eteke liepanduvali, li linga eteke li kola lioku liongolola. Ko ka lingi upange keteke liaco.’”

9 Yehova wamisako oku vangula la Mose hati: 10 “Sapuila va Isareli hati: ‘Eci wiñili vofeka ñasi oku eca kokuene loku ungula ovaima ene, vu nena kocitunda ovaima atete+ oku ungula kuene.+ 11 Kuenje ocitunda ci senga senga ocilumba konyima lo kovaso, kovaso a Yehova oco vu taviwe. Ocitunda ci senga senga ocilumba caco keteke li kuama Kesambata. 12 Keteke lioku senga senga ocilumba, vu sukila oku lumba okameme kunyamo umosi ka ka kuete etondelo ndocilumba coku pia elisi ku Yehova. 13 Ocilumba caco colomema, ci linge colonjongo vivali vionepa yekũi yo efa,* yosema ya fina ya tengiwa lulela ndocilumba cimue ci yokiwa vondalu ci lingiwila Yehova, ceca elemba liwa. Ocilumba coku nyua ci kale covinyu okuti, onepa yakuãla yo hine.* 14 Ko ka li ombolo, ale olomema via kangiwa, pamue olomema viokaliye keteke liaco, toke eci vu nena ocilumba ca Suku yene. Oco, ociholo cotembo ka yi pui kovitumbulukila viene viosi kovitumãlo vu tunga.

15 “‘Vu tenda olosemana epanduvali oku upisa keteke li kuama Kesambata, toke keteke vu nena ocilumba coku senga senga.+ Vu sukila oku tenda olosemana via suapo. 16 Vu ka tenda 50 koloneke+ toke keteke li kuama Kesambata liepanduvali kuenje vu nena ocilumba colomema viokaliye loku ci lumbila Yehova.+ 17 Poku tunda kovitumãlo viene, neni olombolo vivali ndocilumba coku senga senga. Ovio vi lingiwe lolonjongo vivali vionepa yekũi yo efa* yosema ya fina. Vi yokiwe letumbisa,+ ndapako atete a eciwa ku Yehova.+ 18 Vu sukila oku lumba olombolo kumue lovitupi viotulomeme epanduvali ka vi kuete etondelo okuti, viosi vi kuete unyamo umosi, ongombe yimosi kuenda ovitupi vivali violomeme.+ Ovio, vi linga ocilumba coku pia elisi ku Yehova kumue lovilumba violomema kuenda ovilumba vioku nyua okuti, ocilumba cimue ci yokiwa vondalu ceca elemba liwa ku Yehova. 19 Vu lumba ohombo yimosi ndocilumba cekandu+ kuenda ovitupi vivali viotulomeme vi kuete unyamo umosi ndocilumba combembua.+ 20 Ocitunda ci senga senga ovilumba viaco konyima lo kovaso kumue lolombolo viapako atete ndocilumba coku senga senga kovaso a Yehova kuenda ovitupi vivali viotulomeme. Ovio vi linga ocina cimue ci kola ku Yehova okuti, vi tiamẽla kocitunda.+ 21 Keteke liaco, vu sapula+ eteke li kola lioku liongolola. Ko ka lingi upange keteke liaco. Oco, ociholo cotembo ka yi pui kovitumãlo viosi vu tunga kovitumbulukila viene viosi.

22 “‘Eci wungula ovaima o vepia liove, ku kongule kolonepa viosi viepia kuenda ku ka pupulule eci ca supapo poku ungula.+ Ovaima aco o a sila olohukũi*+ kuenda ovingendeleyi.+ Ame ndi Yehova Suku yene.’”

23 Yehova wamisako oku vangula la Mose hati: 24 “Sapuila va Isareli hati: ‘Kosãi yepanduvali, keteke liatete kosãi, vu sukila oku puyuka okuti eteke lionjivaluko yi tukuiwa loku sikiwa kuolumbeta+ okuti ohongele yi kola. 25 Ko ka lingi upange laumue keteke liaco kuenda vu lumba ocilumba cimue ci yokiwa vondalu ci lingiwila Yehova.’”

26 Yehova wa sapuila vali Mose hati: 27 “Eteke liekũi liosãi yaco yepanduvali, li linga Eteke Lioku Tuvika Akandu.+ Vu sambiliya eteke li kola lioku liongolola kuenda likandangiyi oku lia*+ kuenje vu lumba ocilumba cimue ci yokiwa vondalu ci lingiwila Yehova. 28 Ko ka lingi upange laumue keteke liaco, momo eteke liaco, eteke lioku tuvika akandu+ ene kovaso a Yehova Suku yene. 29 Omunu wosi ka liketisile* keteke liaco, o tepiwa* pokati komanu vaye.+ 30 Ndi nyõla pokati komanu vaye omunu wosi o linga upange keteke liaco. 31 Ko ka lingi upange laumue. Oco, ociholo cotembo ka yi pui kovitumbulukila viene viosi kovitumãlo viosi vu tunga. 32 Olio li linga esambata lioku puyuka kokuene kuenda likandangiyi oku lia+ keteke liecea yosãi yaco koñolosi. Vu sambiliya esambata liene oku upisa koñolosi toke koñolosi yikuavo.”

33 Yehova wamisako oku vangula la Mose hati: 34 “Sapuila va Isareli hati: ‘Keteke 15 yosãi yaco yepanduvali, eteke Liocipito Colosinge* ku Yehova, vokuenda kuoloneke epanduvali.+ 35 Eteke liatete li kala eteke li kola lioku liongolola kuenda ko ka lingi upange laumue. 36 Vokuenda kuoloneke epanduvali vu lumba ovilumba vimue vi yokiwa vondalu vi lingiwila Yehova. Keteke liecelãla vu sambiliya eteke li kola lioku liongolola+ kuenda vu lumba ovilumba vimue vi yokiwa vondalu vi lingiwila Yehova. Olio, eteke liohongele yilikasi. Ko ka lingi upange laumue.

37 “‘Ovipito vu sukila oku sambiliyila+ Yehova ndoloneke vi kola vioku liongolola,+ poku lumba ovilumba vimue vi yokiwa vondalu vi lingiwila Yehova vievi: ovilumba vioku pia elisi,+ lovilumba violomema+ kuenda ovilumba vioku nyua,+ ndomo ci likuata lesokiyo lieteke leteke. 38 Evi ovio ovilumba vi vokiyiwako kovina vu lumbila Yehova kasambata+ kuenda kolombanjaile viene,+ lovilumba viohuminyo,+ lovilumba vi eciwa lutima wosi+ vina okuti, ovio vu sukila oku eca ku Yehova. 39 Keteke 15 yosãi yepanduvali, eci vu ungula ovaima ovapia ene, vu sukila oku sambiliya ocipito ca Yehova vokuenda kuoloneke epanduvali.+ Eteke liatete li kala eteke liepuyuko kuenda eteke liecelãla li kala eteke liepuyuko.+ 40 Keteke liatete, vu tikula apako oviti via posoka, ovianja viuti weva,+ ovianja vioviti via pulika, lavunje wovimbota* kuenje vu sanjukila+ kovaso a Yehova Suku yene, vokuenda kuoloneke epanduvali.+ 41 Vu sukila oku sambiliya ocipito caco ku Yehova vokuenda kuoloneke epanduvali vunyamo.+ Oco, ociholo cotembo ka yi pui kovitumbulukila viene viosi vu sukila oku sambiliya kosãi yepanduvali. 42 Vu sukila oku kala volosinge vokuenda kuoloneke epanduvali.+ Olonyitiwe viosi vio Isareli vi kale volosinge, 43 oco ovitumbulukila viene vi kũlĩhe+ okuti, ame nda lingisa okuti va Isareli va tunga volosinge eci nda vopa vofeka Yegito.+ Ame ndi Yehova Suku yene.’”

44 Kuenje Mose wa sapuila va Isareli catiamẽla kovipito via Yehova.

24 Yehova wamisako oku sapuila Mose hati: 2 “Handeleka va Isareli oco va ku nenele ulela wa fina woliveira wa sopuiwa, woku kapa volondiyelo okuti, vi amamako oku taima otembo yosi.+ 3 Vokati Kohondo yi Kola* ocipepi locikasia Cuvangi vombalaka yohongele, Arone a kapemo olondiyelo vi taima otembo yosi oku upisa koñolosi toke komẽle kovaso a Yehova. Oco, ociholo cotembo ka yi pui kovitumbulukila viene viosi. 4 Eye o sukila oku sokiya okuti olondiyelo viamamako oku kala kociyekelo colondiyelo+ culu wa fina kovaso a Yehova otembo yosi.

5 “O ka tikula osema ya fina kuenje o yoka layo 12 kolombolo vi kuete epangu. Ombolo lombolo, yi lingiwe lolonjongo vivali vionepa yekũi yo efa.* 6 O vi longeka vovilala vivali okuti, ulala lulala u kuata epandu kolombolo+ vi kapiwa komesa yulu wa fina kovaso a Yehova.+ 7 Kulala lulala o kapako onguendu yelemba liwa kuenje yi kala ndombolo yocilumba conjivaluko+ okuti, ocilumba cimue ci yokiwa vondalu ci lingiwila Yehova. 8 Keteke leteke Liesambata, eye o longeka olonjanja viosi olombolo viaco kovaso a Yehova.+ Eci ocisila cotembo ka yi pui ku va Isareli. 9 Ovio vi linga via Arone kuenda viomãla vaye+ kuenje va vi lila vocitumãlo cimue ci kola,+ momo oco, ocina cimue ci kola kokuaye ca tunda kovilumba via Yehova via lingiwa londalu ndociholo cotembo ka yi pui.”

10 Pokati ka va Isareli pa kala omõla umue ulume okuti inaye u Isareli kuenda isiaye u Egito+ kuenje omõlaco wa liyaka lulume umue u Isareli vocilombo. 11 Omõlaco okuti inaye u Isareli, wa fetika oku sepula Onduko* loku yi siñala.+ Kuenje vo wambata ku Mose.+ Inaye wa tukuiwile okuti, Selomiti omõla ukãi wa Daviri ukuepata lia Dani. 12 Ovo va kapa omõlaco vokayike, toke eci Yehova a va situluila eci va sukilile oku linga.+

13 Yehova wa sapuila Mose hati: 14 “Ambati kosamua yocilombo omunu waco wa siñala onduko kuenda vosi vana vo yeva va kape ovaka avo kutue waye kuenda ohongele yosi yu sosõle lovawe.+ 15 Sapuila va Isareli hati: ‘Nda omunu umue o siñala Suku yaye, ekandu liaco liuwile eye muẽle. 16 Omunu wa sepula onduko ya Yehova a pondiwe muẽle.+ Ohongele yosi yu sosõle muẽle lovawe. Ocingendeleyi ci pondiwavo ndeci ci pondiwa onyitiwe yofeka omo lioku sepula Onduko.

17 “‘Nda omunu umue wa ponda ukuavo, eye o pondiwa muẽle.+ 18 Nda omunu umue wa lemẽha kuenda wa ponda ocinyama cimue, o sukila oku ci feta okuti, omuenyo lomuenyo. 19 Nda omunu umue wa lemẽha ukuavo, cimuamue haico ci lingiwa kokuaye.+ 20 Oku teka loku teka, iso liso, eyo leyo, ndeci a lemẽha ukuavo, haico ci lingiwa laye.+ 21 Nda omunu umue wa lemẽha kuenda wa ponda ocinyama cimue, o sukila oku ci feta,+ pole, nda umue wa lemẽha kuenda wa ponda omunu ukuavo, eye a pondiwevo.+

22 “‘Ku lingiwa ekanga limuamue kokuene, ci kale ocingendeleyi ale onyitiwe yofeka,+ momo ame ndi Yehova Suku yene.’”

23 Mose wa sapuila olondaka viaco ku va Isareli kuenje ovo va ambata kosamua omunu wa sepula onduko kuenje vo sosõla lovawe.+ Omo liaco, va Isareli va linga ndomo Yehova a handelekele Mose.

25 Yehova wa vangula vali la Mose ko Munda Sinai hati: 2 “Sapuila va Isareli hati: ‘Eci vu iñili vofeka ngeca kokuene,+ ofeka yi sambiliye esambata lia Yehova.+ 3 Vokuenda kuanyamo epandu vu lima ovapia ene kuenda vanyamo epandu vu sonja ocumbo cene cayuva kuenje vu ungula ovaima aco.+ 4 Pole, kunyamo wepanduvali, esambata lioku puyuisa osi okuti, esambata lia Yehova. Ka citava oku lima ovapia ene ale oku sonja ocumbo cene cayuva. 5 Ko ka unguli ovina via litundila, vina vi kulila vepia noke yoku ungula, ndaño oku ungula ayuva oviti viene vina okuti ka via sonjiwile. Osi yi kuate unyamo wepuyuko. 6 Pole, vu sukila oku lia okulia kuna kua ima vokuenda kuasambata; ene kumue lapika vene valume lapika vene vakãi, olonalavayi viene, ocingendeleyi ca tunga lene, citava oku lia, 7 lovinyama viovimbo, lovinyama viovusenge vi kasi vofeka yene. Ovina viosi via ima vofeka citava oku vi lia.

8 “‘Vu sukila oku tenda anyamo epanduvali asambata, olonjanja epanduvali vanyamo epanduvali kuenda etendelo lianyamo epanduvali asambata a tẽle 49 kanyamo. 9 Noke vu yevalisa ocileñi combinga kosãi yepanduvali, kosãi yekũi; Keteke Lioku Tuvika Akandu,+ vu yevalisa ocileñi combinga vofeka yosi. 10 Vu kolisa unyamo 50 loku sambiliya eyovo liofeka kolonungi viosi.+ Unyamo waco, u linga Unyamo Weyovo kokuene kuenda omunu lomunu pokati kene o tiukila kocipiñalo caye kuenda kepata liaye.+ 11 Unyamo 50 u linga Unyamo Weyovo kokuene. Ka citava okuti vu lima ale oku ungula ovina via litundila, vina vi kulila vepia noke yoku ungula, pamue oku ungula ayuva vocumbo cayuva ka ca sonjiwile.+ 12 Momo unyamo waco, Unyamo Weyovo. Owo u kola kokuene. Vu sukila oku lia lika ovina via litundila ovio muẽle vofeka.+

13 “‘Vunyamo waco Weyovo, omunu lomunu a tiukile kocipiñalo caye.+ 14 Nda vu landisa ocina cimue kukuene ale vu ci landi kokuaye, ko ka li nyani omunu lukuavo.+ 15 Poku landa ocina cimue kukuene, o sukila oku tenda anyamo a kambako toke Kunyamo Weyovo kuenda ovina eye a landisa kokuove o vi tenda ndomo ci likuata lanyamo a kambako koku ungula.+ 16 Nda kua kamba anyamo alua, eye o sukila oku vokiyako kondando yaco kuenda nda kua kamba anyamo atito, eye o sukila oku tepulula kondando yaco, omo eye o kasi oku landisa kokuove ndomo ci likuata lanyamo a kambako koku ungula. 17 Lomue pokati kene ka ka nyane omunu ukuavo+ kuenda vu sukila oku sumbila Suku,+ momo ame ndi Yehova Suku yene.+ 18 Nda wamamiko oku kapako oviholo viange, lovisila viange loku vi tẽlisa, vu kolapo vofeka wa tungi.+ 19 Osi yi ka ima apako alua+ kuenje ene vu ka lia loku sanjuka kuenda vu kolapo vofeka wa tungi.+

20 “‘Pole, nda ene vu pula hoti: “Oco hẽ nye tu lia vunyamo wepanduvali nda ka tu pondola oku lima ale oku ungula olomema vietu?”+ 21 Ame ndu sumũlũisi kunyamo wepandu kuenje osi yima okulia ku tẽla anyamo atatu.+ 22 Kuenje eci vu lima kunyamo wecelãla, vu amamako oku lia ovaima wonguli kunyamo wepandu. Vu amamako oku lia ovaima aco toke eci otembo yoku ungula wunyamo wecea yi pitĩla.

23 “‘Ka citava oku landisa usenge umue otembo ka yi pui,+ momo ovisenge viaco viange.+ Momo kovaso ange ene vuvingendeleyi haene wa tungi ño vofeka.+ 24 Osi yosi yi linga ocipiñalo cene, vu kuete omoko yoku yovola osi yaco.

25 “‘Nda manjove wa linga ohukũi kuenda wa landisa onepa yimue yocipiñalo caye, ukuepata liaye okuti ukuakuyovola iya kuenda o yovola eci manjaye a landisile.+ 26 Nda ka kuli omunu o yovola onepa yaco kuenje eye wa linga ohuasi kuenda o kuete epondolo lioku ci yovola, 27 o sukila oku tenda ondando yanyamo tunde eci eye a landisa onepa yaco kuenje o tiula komunu wa yi landele. Noke eye o tambula vali ocipiñalo caye.+

28 “‘Pole, nda eye ka kuete epondolo lioku ci yovola, eci eye a landisile camamako oku kala lomunu wa ci landa toke Kunyamo Weyovo;+ kuenje Kunyamo Weyovo ci tiuwiyiwa vali kokuaye kuenda eye o tambula vali ocipiñalo caye.+

29 “‘Nda omunu umue wa landisa onjo yimue yi kasi volupale lumue luovimbaka, omoko yaye yoku yi yovola yamamako toke kesulilo liunyamo tunde eci ya landisiwa; omoko yaye yoku yovola+ yamamako vokuenda kunyamo wosi. 30 Pole, nda onjo yaco ka ya yovuiwile kesulilo liunyamo wosi, onjo yi kasi volupale luovimbaka yi linga ocipiñalo cotembo ka yi pui comunu wa yi landa kovitumbulukila viaye viosi. Ka citava oku yi tiuwiya Kunyamo Weyovo. 31 Pole, olonjo vina okuti vi kasi valupale ka a kuete ovimbaka, vi tendiwe ndonepa yovisenge viofeka. Omoko yoku yovola onjo yaco yamamako kuenda yeciwa Kunyamo Weyovo.

32 “‘Catiamẽla kolonjo via va Lewi vi kasi valupale avo,+ va Lewi va ka kuata omoko yoku yovola olonjo viaco otembo yosi. 33 Nda va Lewi ka va yovuile ocipiñalo cimue ca landisiwa, onjo ya landisiwa volupale yi linga yavo, oyo yeciwa Kunyamo Weyovo,+ momo olonjo vio volupale via va Lewi, ocipiñalo cavo pokati ka va Isareli.+ 34 Pole, ovisenge vi kasi konele+ yalupale ka citava okuti vi landisiwa, momo ocipiñalo cavo otembo ka yi pui.

35 “‘Nda manjove o lisungue love wa linga ohukũi kuenda ka kuete eci a litekula laco,+ ove u kuatisa ndeci ci lingiwa locingendeleyi ale onungi yofeka+ kuenda eye amameko oku kala lomuenyo pokati kene. 36 Ku ka pinge osindike ale ombandeke* kokuaye.+ Sumbila Suku yove+ kuenda manjove amameko oku kala lomuenyo pokati kene. 37 Ka citava oku u levalisa olombongo losindike+ ale oku eca okulia kokuaye oco o vandekeko ombandeke. 38 Ame ndi Yehova Suku yene, una wo vupi vofeka Yegito+ loku eca kokuene ofeka yo Kanana, loku lekisa okuti ame Suku yene.+

39 “‘Nda manjove o lisungue love wa linga ohukũi kuenje o lilandisa eye muẽle kokuove,+ ku ko kisike oku talavaya ndupika.+ 40 Eye a tatiwe ndonalavayi,+ ndeci ci tatiwa onungi yofeka. A ku talavayele toke Kunyamo Weyovo. 41 Noke eye kumue lomãla vaye va ku siepo kuenje a tiukile kepata liaye. Eye o tiukila kocipiñalo ca vakukululu yaye.+ 42 Momo ovo apika vange vana ndopa vofeka Yegito.+ Ka citava okuti va li landisa ovo muẽle ndeci upika umue a landisiwa. 43 Ku ko tate lãvi+ kuenda sumbila Suku yove.+ 44 Apika vene valume lapika vene vakãi va tunde kolofeka vi lisungue lene, oko vu landa apika valume ale vakãi. 45 Pokati komãla vovingendeleyi va tunga lene+ kuenda pokati kapata va citiwila vofeka yene, opo vu landa apika kuenje ovo va linga ocipiñalo cene. 46 Vu sukila oku va eca komãla vene ndocipiñalo cavo otembo ka yi pui noke yolofa viene. Ovo va linga olonalavayi viene, pole, ka citava oku tata lãvi vamanjove va Isareli.+

47 “‘Pole, nda ocingendeleyi ale onungi yimue yofeka pokati kene ca linga ohuasi kuenje manjove o linga ohukũi kuenda o li landisa eye muẽle kocingendeleyi pamue konungi yi kasi love, ale ku umue ukuepata liocingendeleyi, 48 eye amamako oku kuata omoko yoku yovuiwa noke yoku li landisa eye muẽle. Umue pokati ka vamanjaye u yovola,+ 49 pamue manji ulume a isiaye, ale omõla a manji ulume a isiaye, eye u yovola, ale umue ukuepata liaye, eye u yovola.

“‘Nda eye wa linga ohuasi, citava oku li yovola eye muẽle.+ 50 Eye o sukila oku tenda otembo kumue lomunu wo landa oku upisa kunyamo a li landisa eye muẽle toke Kunyamo Weyovo+ kuenda ondando yolombongo a li landisa layo te yi likuata letendelo lianyamo.+ Oloneke viaye viupange vi sokisiwa londando yofeto yonalavayi.+ 51 Nda okuti, kua kamba anyamo alua, eye o sukila oku feta ondando yi likuata lanyamo a kambako. 52 Pole, nda kua kamba ño anyamo atito toke Kunyamo Weyovo, o sukila oku tenda ondando yaye muẽle loku feta ondando yi likuata lanyamo a kambako. 53 Eye o sukila oku amamako oku u talavayela unyamo lunyamo ndonalavayi; kuenje ove ku ka ecelele okuti omunu wo landa u tata lãvi.+ 54 Pole, nda eye ka tẽla oku liyovola eye muẽle votembo yaco, o yovuiwa Kunyamo Weyovo,+ kumue lomãla vaye.

55 “‘Momo va Isareli apika vange. Ovo apika vange vana ame ndopa vofeka Yegito.+ Ame ndi Yehova Suku yene.

26 “‘Ko ka litungili olosuku ka vi kuete esilivilo,+ loku lisongela ociñumañuma,+ ale oku litungila ongunji yi kola pamue ewe li kola+ lia talamisua vofeka yene oco vu vi fendele;+ momo ame ndi Yehova Suku yene. 2 Amamiko oku lava asambata ange, loku sumbila ocitumãlo cange ci kola. Ame ndi Yehova.

3 “‘Nda wamamiko oku endela voviholo viange, oku kapako ovihandeleko viange loku vi tẽlisa,+ 4 ndu wĩhi ombela yalua votembo yaco+ kuenje osi yi ka ima ovaima ayo+ kuenda oviti vio vusenge vi ka eca apako alio. 5 Otembo yene yoku sasa, yenda toke kotembo yoku ungula ayuva kuenda otembo yoku ungula ayuva yenda toke kotembo yoku kũla; kuenje ene vu lia okulia toke eci vu kuta kuenda vu kolapo vofeka wa tungi.+ 6 Ngeca ombembua vofeka+ kuenje vu ka tungamo okuti, lomue u lingisi usumba;+ ndi ka lupuisa vofeka ovinyama viovusenge kuenje vofeka yene ka mu piti osipata yuyaki. 7 Ocili okuti vu ka lupuisa ovanyãli vene kuenje va ka kupukila kovaso ene losipata. 8 Vatãlo pokati kene va ka lupuisa 100 komanu kuenda 100 pokati kene va ka lupuisa 10.000 komanu kuenje ovanyãli vene va ka kupukila kovaso ene losipata.+

9 “‘Ndi ka lekisa ohenda kokuene kuenje vu licita, vu livokiya+ kuenda ndi ka tẽlisa ocisila cange kokuene.+ 10 Osimbu vu lia okulia wonguli unyamo wa pita, vu sukila oku tunga osila yoku kapamo okulia kuokaliye. 11 Kuenje numbika otavernakulu yange pokati kene+ kuenda ame siu nyehũli. 12 Ngendela pokati kene kuenje ndinga Suku yene+ kuenda ene vu linga omanu vange.+ 13 Ame ndi Yehova Suku yene, una wo vupi vofeka Yegito okuti, ka vu lingi vali apika va va Egito kuenje nda teya okanga yupika wene kuenda nda ku endisi ndomanu va lianja.

14 “‘Pole, nda ka vu yevi kokuange loku kapako ovihandeleko evi viosi,+ 15 kuenda nda vu likala oviholo viange+ loku nyehũla ovisila viange okuti, ka vu tẽlisa ovihandeleko viange viosi, loku sinĩla ocisila cange,+ 16 ndu lingi ndoco: Ndi ka vu yambuli lohali, lotumbe, lombambi yalua, loku lingisa okuti ovaso ene a vuvala kuenda omuenyo wene ka u kuata esilivilo. Vu ka lima ombuto yene okuti, ka vu kuata onima, momo ovanyãli vene va ka lia okulia kuaco.+ 17 Ame ndi ka vu likali kuenda vu yuliwa lovanyãli vene;+ kuenje vu ka kangisiwa la vana vo suvuki+ kuenda vu tili ndaño okuti lomue o kasi oku vu landuli.+

18 “‘Nda ka wa yeveleli kokuange ndaño lovina evi, ndu kangisi olonjanja epanduvali omo liakandu ene. 19 Ndi imũla epela liene, loku lingisa okuti ovailu ene a linga ndutale+ kuenda osi yene yi linga ndosipi. 20 Ongusu yene ka yi ka kuata esilivilo, momo osi yene ka yi ka ima ovaima ayo+ kuenda oviti viofeka ka vi ka ima apako.

21 “‘Pole, nda wamamiko oku ndi yanduluka loku likala oku yevelela ondaka yange, ndi ka vu yambuli vali olonjanja epanduvali, omo liakandu ene. 22 Ndi tumisa pokati kene ovinyama viovusenge+ kuenje vi lia omãla vene+ kumue lovinyama viene viovimbo kuenda etendelo liene li tepuluka, lomue o ka endela vatapalo ene.+

23 “‘Nda ka vu pokola kolonumbi viange+ ndaño lovina evi kuenda wamamiko oku ndi yanduluka, 24 ndi ka vu yandulukivo kuenje ndi ka vu yambuli olonjanja epanduvali omo liakandu ene. 25 Ndi nena kokuene osipata yefetuluinyo omo lioku sinĩla ocisila.+ Eci vu liongoluili valupale ene, ndi ka tuma uvei pokati kene+ kuenda vu tumiwa vofeka yunyãli wene.+ 26 Eci njupa aliangiliyo ene* ombolo*+ akãi ekũi va ka panga ombolo vofolono yimosi kuenda va ka pesalisa okulia osimbu ka va ku ecele;+ kuenje vu lia, pole, ka vu kuta.+

27 “‘Nda ka vu yevelela kondaka yange ndaño lovina evi, loku amamako oku ndi yanduluka, 28 ndi vu yanduluki ca piãla+ kuenda ame muẽle ndi vu kangisi olonjanja epanduvali omo liakandu ene. 29 Vu ka lia ositu yomãla vene valume kuenda vu ka lia ositu yomãla vene vakãi.+ 30 Ndi nyõla ovitumãlo viene vi kola+ loku teya olongunji viene vinsensu kuenda ovivimbi viene ndi ka vi longeka kovivimbi vioviteka+ viene via vĩha* kuenje ndi ka vu yanduluki lesumuo.+ 31 Ndi ka eca osipata kalupale ene+ kuenda ovitumãlo viene vi kola ndi ka vi lingisa alunda kuenje si ka sanjukila elemba liwa liovilumba viene. 32 Ame muẽle ndi lingisa ofeka alunda+ kuenda ovanyãli vene vana va tunga lene va ka komõha poku yi mola.+ 33 Kuenje ndi ka vu sanduili volofeka+ kuenda ndi ka vu kuami losipata;+ ofeka yene yi ka siala elunda,+ lalupale ene a ka siala upolokoso.

34 “‘Kotembo yaco, ofeka yi ka feta asambata ayo, oloneke viosi ya siala elunda, osimbu vu kasi vofeka yovanyãli vene. Kotembo yaco ofeka yi kala kepuyuko* ndoku feta asambata ayo.+ 35 Osimbu yi kasi elunda, yi kala kepuyuko, momo ka ya puyukile vokuenda kuasambata ayo eci wa tungilimo.

36 “‘Ku vana va supapo,+ ndi ka yukisa ovitima viavo lesumuo volofeka viovanyãli vavo; kuenje onjuela yamẽla a kokiwa lofela yi ka va kokisa oku tila kuenda va ka tila ndomunu o tila osipata kuenje va ka kupuka ndaño okuti lomue o kasi oku va landula.+ 37 Ovo va ka lilondoka omunu lukuavo nda vana va tila osipata, ndaño okuti lomue o kasi oku va landula. Ka vu ka tẽla oku tamãlala lovanyãli vene.+ 38 Vu ka nyõleha pokati kolofeka+ kuenda ofeka yovanyãli vene yu pondi. 39 Vana va ka supapo pokati kene va ka nyõleha pokati kovanyãli vene+ omo liakulueya ene. Va ka nyõliwa omo liakulueya olonjali viavo.+ 40 Ovo va ka litavela akulueya avo+ kuenda akulueya olonjali viavo lekambo liavo liekolelo, loku tava okuti ovo va lueya poku ndi yanduluka.+ 41 Kuenje nda va yandulukavo+ poku va nena vofeka yovanyãli vavo.+

“‘Pamue ovitima viavo ka via seviwile evamba,* vi ka lekisa umbombe+ kuenje ovo va ka feta omo liakulueya avo. 42 Ndi ka ivaluka ocisila nda linga la Yakoba,+ locisila nda linga la Isake,+ loku ivaluka ocisila nda linga la Avirahama+ kuenje ndi ka ivaluka ofeka. 43 Osimbu ofeka ya siala upolokoso mekonda liavo, oyo ya feta asambata ayo+ kuenje ya siala upolokoso okuti, ka va kailemo kuenda ovo va feta omo liakulueya avo, momo va likala olonumbi viange loku sinĩla oviholo viange.+ 44 Pole, ndaño lovina viosi evi, osimbu ovo va kasi vofeka yovanyãli vavo, lalimue eteke ndi va yanduluka,+ ndaño oku va nyehũla locimãho coku va nyõla, omo eci nda ca nyõla ocisila cange+ nda linga lavo, momo ame ndi Yehova Suku yavo. 45 Mekonda liavo, ndi ivaluka ocisila nda linga la vakukululu yavo+ vana ndopa vofeka Yegito okuti olofeka via ci mola,+ loku li lekisa okuti ame ndi Suku yavo. Ame ndi Yehova.’”

46 Evi ovio ovisila, lolonumbi kuenda ovihandeleko Yehova a tumbika pokati kaye la va Isareli Komunda Sinai pocakati ca Mose.+

27 Yehova wamisako oku vangula la Mose hati: 2 “Sapuila va Isareli hoti: ‘Nda omunu umue o linga ohuminyo yimue yilikasi+ yoku eca ombanjaile yi lisoka londando yomunu umue ku Yehova, 3 ondando yulume o kuete oku upisa 20 toke 60 kanyamo, yi kala 50 kolosiekele* viopalata ndomo ci likuata lolosiekele viocitumãlo ci kola.* 4 Pole, nda ukãi, ondando yaye yi kala 30 kolosiekele. 5 Nda o kuete oku upisa anyamo 5 toke 20, ondando yaco yulume yi kala 20 kolosiekele kuenda nda ukãi, 10 kolosiekele. 6 Nda omunu waco o kuete lika oku upisa osãi yimosi toke anyamo atãlo, ondando yaco yulume yi kala olosiekele vitãlo viopalata kuenda nda ukãi, olosiekele vitatu viopalata.

7 “‘Nda omunu o kuete 60 kanyamo ale ci pitahãla anyamo aco, ondando yaco yulume yi kala 15 kolosiekele, nda ukãi, 10 kolosiekele. 8 Pole, nda omunu waco ohukũi calua okuti ka tẽla oku feta ondando ya sokiyiwa,+ o ka talama kovaso yocitunda kuenje ocitunda ci ka eca ondando yikuavo kokuaye. Ocitunda ci ka eca ondando yaco ndomo ci likuata leci omunu wa linga ohuminyo a tẽla oku eca.+

9 “‘Nda vohuminyo yaco mua kongela ocinyama okuti citava oku ci lumbila Yehova, cosi ceciwa ku Yehova, ci linga ocina cimue ci kola. 10 Eye ka citava okuti o ci pongolola, ale o piñainya eci ciwa leci cĩvi, ale ceci cĩvi leci ciwa. Pole, nda eye wa piñainya ocinyama cimue locinyama cikuavo, ocinyama catete leci ca piñainyiwa viosi vi kola. 11 Nda ocinyama caco ca vĩha+ okuti ka citava oku ci lumba ku Yehova, eye ambata ocinyama caco kovaso yocitunda. 12 Ocitunda ceca ondando yaco, ci kaile nda ocinyama caco ciwa ale cĩvi. Ondando ya eciwa locitunda ka yi pongoloka. 13 Pole, nda omunu waco o yongola oku ci yovola, o sukila oku vokiyako onepa yatãlo kondando ya sokiyiwa.+

14 “‘Nda omunu umue o yongola oku kolisa onjo yaye ndocina cimue ci kola ku Yehova, ocitunda ci yi sokiyila ondando yaco, ci kaile okuti yiwa ale yĩvi. Ondando yosi ocitunda ci sokiya, oyo yi taviwa.+ 15 Pole, nda omunu wa kolisa onjo yaye o yongola oku yi yovola, o sukila oku vokiyako onepa yatãlo kondando yolombongo via sokiyiwa kuenje onjo yi linga yaye.

16 “‘Nda omunu umue o yongola oku kolisa onepa yepia ku Yehova, ondando yaco te ya lisoka lonjongo yombuto yi sukiliwa oco epia liaco li limiwe: o homeri* yimosi yombuto yosevata yi soka 50 kolosiekele viopalata. 17 Nda eye wa kolisa epia liaye oku upisa Kunyamo Weyovo,+ ondando yaco ka yi pongoloka. 18 Nda eye wa kolisa epia liaye noke Yunyamo Weyovo, ocitunda cu sokiyilako ondando ndomo yi likuata lanyamo a kambako, toke Kunyamo Weyovo u kuamamo kuenje kondando ya sokiyiwa ku tepuluiwa.+ 19 Pole, nda omunu una wa kolisa epia o yongola oku li landa vali, eye o sukila oku vokiyako onepa yatãlo kondando yolombongo via sokiyiwa kuenje li amamako oku kala liaye. 20 Nda eye ka landele vali epia liaco kuenje li landisiwa komunu ukuavo, eye ka li yovola vali. 21 Eci epia li yovuiwa Kunyamo Weyovo, olio li linga ocina cimue ci kola ku Yehova ndepia lia eciwa kokuaye. Olio, li ka kala liovitunda.+

22 “‘Nda omunu umue o kolisa ku Yehova epia a landa okuti, ocipiñalo caco hacayeko,+ 23 ocitunda cu sokiyilako ondando yeciwa toke Kunyamo Weyovo kuenje eye eca olombongo via sokiyiwa keteke liaco.+ Olio, li linga ocina cimue ci kola ku Yehova. 24 Kunyamo Weyovo, epia li eciwa vali komunu wa li landele okuti, muẽle yaco.+

25 “‘Ondando yosi, yi sokiyiwe ndomo yi likuata losiekele yocitumãlo ci kola. Osiekele yimosi yi soke 20 kologera.*

26 “‘Lomue ka ka kolise onuñulu pokati kovinyama, momo onuñulu yi citiwa oco yeciwe ku Yehova.+ Ci kale ongombe, ale omeme vi linga via Yehova.+ 27 Nda onuñulu yaco yovinyama via vĩha kuenda nda eye wa yi yovola ndomo ci likuata londando ya sokiyiwa, kondando yaco o sukila oku vokiyako onepa yatãlo.+ Pole, nda ocinyama ka ca yovuiwile, ci landisiwa ndomo ci likuata londando ya sokiyiwa.

28 “‘Pole, ka citava okuti omunu o landa, ale o tambula vali ocina cimue a eca ku Yehova lutima wosi,* ci kaile omanu, ale ovinyama pamue epia eye a kuatele. Ocina cosi ceciwa ci kola koku kola ku Yehova.+ 29 Ka citava oku yovola omunu umue okuti wa sokiyiwila oku pondiwa.+ Eye a pondiwe muẽle.+

30 “‘Onepa yosi yekũi+ yofeka, ci kale yovaima o vepia, ale yapako oviti, vi linga via Yehova. Oco ocina cimue ci kola ku Yehova. 31 Nda omunu umue o yongola oku yovola cimue conepa yaye yekũi, o sukila oku vokiyako onepa yatãlo. 32 Onepa yosi yekũi yolongombe, ale yolomeme okuti ovina viosi vi pita vemẽhi liohunya, onepa yavio yekũi yi linga ocina cimue ci kola ku Yehova. 33 Ka citava okuti eye o pungula nda yiwa, ale yĩvi, ndaño oku yi piñainya. Pole, nda o yi piñainya, ci kale eyi yatete, ale yeyi ya piñainyiwa, vi linga ocina cimue ci kola.+ Ka ci yovuiwa.’”

34 Evi ovio ovihandeleko Yehova a eca ku Mose Komunda Sinai+ oco a vi sapuile va Isareli.