ELIVULU LIAVALI LIASAPULO

1 Salomone omõla a Daviti, wamamako oku pama kusoma waye kuenda Yehova Suku yaye wa kala laye kuenje wo kemãlisa calua.+

2 Salomone wa kovonga o Isareli yosi okuti, asongui vohulukãi lava vocita, olonganji lasongui vo Isareli yosi kuenda asongui volonjo via va isia. 3 Noke Salomone kuenda ekongelo liosi va enda toke kocitumãlo ci kola ko Giveone,+ momo ombalaka yohongele ya Suku yocili oko ya kala okuti, ombalaka yina Mose ukuenje wa Yehova a tungile vekalasoko. 4 Pole, Daviti wa nenele Ocikasia ca Suku yocili oku upisa ko Kiriyata-Yeari+ toke kocitumãlo cina Daviti a ci pongiyilile; eye wa ci tungilile ombalaka yimue ko Yerusalãi.+ 5 Kuenje utala wosipi+ una Becalele+ omõla a Uri omõla a Huru a tungile, wa kapiwile kovaso yotavernakulu ya Yehova; kuenje Salomone kumue lekongelo, va enda oku likutilila kovaso yaco.* 6 Salomone wa lumbilako ovilumba kovaso a Yehova kuenda eye wa lumba 1.000 kovilumba vioku pia elisi kutala wosipi+ wombalaka yohongele.

7 Kuteke waco, Suku wa molẽha ku Salomone kuenje wo sapuila hati: “Pinga eci o yongola okuti, ame ndu ku cĩha.”+ 8 Kuenje Salomone wa tambulula Suku hati: “Ove wa lekisa ocisola ca piãla haico ka ci pongoloka ku isiange Daviti+ kuenda wa ndi lingisa osoma pomangu yaye.+ 9 Kaliye a Yehova Suku, ecelela okuti, ohuminyo wa linga ku isiange Daviti yi tẽlisiwa,+ momo ove wa ndi lingisa osoma yomanu vove valua ndoneketela yo kilu lieve.+ 10 Nyĩhe olondunge kuenda ukũlĩhĩso+ oco ndi songuile omanu ava,* momo helie o tẽla oku sombisa omanu vove ava haivo valua?”+

11 Kuenje Suku wa sapuila Salomone hati: “Omo okuti eyi oyo onjongole yutima wove kuenda kua ndi pingile ovokuasi, lovipako kuenda ekemãlo ale olofa via vana va ku suvuka kuenda kua pingile oku kala komuenyo otembo yalua,* pole, wa pinga olondunge lukũlĩhĩso oco o tetuluile omanu vange vana ame nda ku lingisa osoma,+ 12 olondunge lukũlĩhĩso vi eciwa kokuove; pole, ame ngecavo kokuove ovokuasi lovipako kuenda ekemãlo okuti, olosoma via ku lianga levi vi keya noke liove vi sule.”+

13 Omo liaco, Salomone wa tiuka kocitumãlo ci kola ko Giveone+ kovaso yombalaka yohongele, oku endela ko Yerusalãi; kuenje eye wa viala o Isareli. 14 Salomone wamamako oku ongolola akãlu kuenda olokavalu;* eye wa kuatele 1.400 kakãlu kuenda 12.000 kolokavalu*+ kuenje wamamako oku vi kapa valupale akãlu+ kuenda ocipepi la soma vo Yerusalãi.+ 15 Soma wa luisa opalata lulu vo Yerusalãi okuti, ya luile calua ndovawe+ kuenda avaya osedru a luile calua ndoviti viakuyu vio ko Sefela.+ 16 Olokavalu via Salomone via enda oku tunda Kegito+ kuenda ocimunga ca vakualomĩlu via soma, ca enda oku landa ocunda colokavalu* vondando yimosi.+ 17 Ekãlu lekãlu lia tunda Kegito lia kuatele ondando yi soka 600 kolopalata kuenda okavalu kamosi ka kuatele ondando yi soka 150 kolopalata; ovo va enda oku vi landisa kolosoma viosi via va Hiti kuenda kolosoma vio ko Suria.

2 Noke Salomone wa eca ocihandeleko coku tunga onjo yimue yeca esivayo konduko ya Yehova+ kuenda onjo* yimue yusoma waye.+ 2 Salomone wa nõla 70.000 kalume oco va kale olonalavayi,* 80.000 kalume vakuakuteta ovawe kolomunda+ kuenda 3.600 kalume oco va kale asongui vavo.+ 3 Handi vali, Salomone wa tuma ondaka ku Hirama+ soma yo Turo yokuti: “Ndi lingile ndeci wa linga ku isiange Daviti, eci wa tuma kokuaye avaya osedru oco a tunge onjo* yimue yoku kalamo.+ 4 Kaliye, ñasi oku tunga onjo yimue yeca esivayo konduko ya Yehova Suku yange oco ndi yi kolise kokuaye, loku timĩha insensu vielemba liwa+ kovaso aye kuenda oku eca otembo yosi olombolo* via tumbikiwa,+ ovilumba vioku pia elisi komẽle kuenda koñolosi,+ Kasambata,+ kolosãi viokaliye+ kuenda kovipito violotembo+ via Yehova Suku yetu. Eci ocikundi cimue ca eciwa ku Isareli otembo yosi. 5 Onjo ndi kasi oku tunga yi ka kala yinene, momo Suku yetu wa velapo okuti, olosuku viosi vikuavo vi sule. 6 Helie o tẽla oku u tungila onjo yimue? Momo ovailu kuenda ilu liovailu ka suimo,+ omo liaco, ame helie okuti ndi sukila oku u tungila onjo yimue nda hacitumãloko lika coku tuimisila owisi wovilumba kovaso aye? 7 Kaliye, ndi tumise ulume umue omesele okuti, wa loñoloha koku linga upange wulu, wopalata, wosipi,+ wutale, wonanga yi vumbula, yi kusuka kuenda wonanga yonoloti, haeye wa kũlĩha oku sokotola oviluvialuvia. Eye o ka talavaya ko Yuda kuenda ko Yerusalãi kumue lolomesele viange via loñoloha, vina Daviti isiange a nõlele.+ 8 Ndi tumisevo avaya osedru, ongaye+ kuenda o alimugi+ o ko Levanone, momo ame nda kũlĩha ciwa okuti, akuenje vove va loñoloha koku teta oviti vio ko Levanone.+ Akuenje vange va ka talavayela kumosi lakuenje vove+ 9 oco va ndi pongiyile avaya alua, momo onjo ndi laika oku tunga yi ka kala yinene calua. 10 Kaliye tala! Ame ndi ka eca okulia kakuenje vove,+ vakuakuteta avaya vana va teta oviti okuti: 20.000 kolokoru viotiliku, 20.000 kolokoru* viosevata, 20.000 kolombatu* viovinyu kuenda 20.000 kolombatu viulela.”

11 Noke Hirama soma yo Turo, wa sonehela Salomone esapulo eli liokuti: “Omo okuti Yehova o sole omanu vaye, eye wa ku lingisa osoma yavo.” 12 Kuenje Hirama wa popia hati: “Yehova Suku ya Isareli a sivayiwe una wa panga ovailu kuenda ilu lieve, momo wa eca ku Soma Daviti omõla umue ukualondunge,+ wa lunguka haeye wa loñoloha,+ una o ka tungila onjo yimue Yehova kuenda onjo yusoma waye. 13 Kaliye ndi kasi oku tuma ulume umue omesele wa loñoloha haeye o kuete elomboloko okuti, Hurama-Abi+ 14 omõla wukãi umue u Dani okuti, isiaye wa kala ulume umue wo ko Turo; eye o kuete uloño woku talavaya lulu, lopalata, losipi, lutale, lovawe, lavaya, lonanga yi vumbula, lonanga yonoloti, lonanga yovalatanya leyi yi kusuka.+ Eye o pondola oku linga upange wosi woku sokotola oviluvialuvia kuenda eye o panga ociluvialuvia cosi ceciwa kokuaye.+ Eye o ka talavaya kumosi lolomesele viove via loñoloha kuenda lolomesele via loñoloha via ñala yange Daviti isiove. 15 Kaliye ñala yange a tume otiliku, losevata, lulela kuenda ovinyu eye a likuminya kakuenje vaye.+ 16 Kuenje etu tu ka teta oviti vio ko Levanone+ etendelo ove o sukila kuenda tu vi tumisa kokuove poku vi kutila pamosi okuti, vi telela vokalunga toke ko Yopa+ kuenje ove o vi ambata toke ko Yerusalãi.”+

17 Salomone wa tenda alume vosi vana va kala ovingendeleyi vofeka yo Isareli+ ndeci isiaye Daviti a lingile+ kuenje wa limbuka okuti, pa kala eci ci soka 153.600. 18 Omo liaco, eye wa nõla 70.000 pokati kavo oco va kale olonalavayi,* 80.000 vakuakuteta ovawe+ kolomunda kuenda 3.600 kasongui oco va kape omanu kupange.+

3 Salomone wa fetika oku tunga onjo ya Yehova+ vo Yerusalãi Komunda Moriya+ kuna Yehova a molẽhele ku isiaye Daviti,+ pocitumãlo Daviti a pongiyile pocimbandi ca Orinane+ u Yevusi. 2 Eye wa fetika oku tunga keteke liavali, liosãi yavali kunyamo wakuãla wuviali waye. 3 Kuenje ociseveto Salomone a seveta oco a tunge onjo ya Suku yocili, ca kuata 60 kovikeya kusõvi kuenda 20 kovikeya vupati+ ndomo ci likuata loseteko yosimbu.* 4 Ocindumba co kovaso ca kuatele 20 kovikeya kusõvi, ndomo ci likuata lupati wonjo* kuenda oku lepa kuayo kua sokele 120;* kuenje eye wa ci laña vokati lulu wa fina.+ 5 Eye wa posuisa onjo yinene lavaya ongaye, noke wa yi laña lulu wa fina+ kuenje wa yi posuisa loviluvialuvia viuti weva+ kuenda lalienge.+ 6 Handi vali, wa posuisa onjo lovawe a tĩla a-o a fina;+ kuenje ulu+ a talavaya lawo wa kala ulu wo ko Parawayi. 7 Eye wa laña lulu onjo, olohangalo, ivelo, ovimano kuenda apito aco;+ kuenje wa sokotuila vakeruvi vovimamo.+

8 Eye wa panga Ohondo yi Kola Koku Kola;*+ usõvi waco wa lisokele lupati wonjo okuti, 20 kovikeya kuenda vupati waco wa kuata 20 kovikeya. Eye wa yi laña leci ci soka 600 kolotalendo* viulu wa fina.+ 9 Ocilemo culu wolopeleko ca kala 50 kolosiekele;* kuenje eye wa laña lulu olohondo viosapalalo.

10 Noke Vohondo yi Kola Koku Kola* wa songelamo va keruvi vavali kuenje wa va laña lulu.+ 11 Usõvi wavava osi a va keruvi+ a kuatele 20 kovikeya; evava limue liu keruvi watete, lia kuatele ovikeya vitãlo kusõvi kuenda lia lamba vocimano conjo kuenda evava likuavo lia kuatele ovikeya vitãlo kusõvi kuenda lia lamba kevava limue liu keruvi ukuavo. 12 Evava limue liu keruvi ukuavo, lia kuatele ovikeya vitãlo kusõvi kuenda lia lamba vocimano cikuavo conjo kuenda evava liayo likuavo lia kuatele ovikeya vitãlo kusõvi kuenda lia lamba kevava limue liu keruvi watete. 13 Avava a va keruvi vaco, a nyanyumuĩwa eci ci soka 20 kovikeya; kuenje ovo va talama kuenda va imba ovaso vokati.*

14 Eye wa tongavo ongumbo+ yonanga yonoloti, leyi yi vumbula, yi kusuka kuenda yonanga yovalatanya kuenje wa tutilamo oviluvialuvia via va keruvi.+

15 Noke wa tunga olongunji vivali+ kovaso yonjo, vi kuete 35 kovikeya vutunga kuenda utue wosungu yongunji longunji, wa kuatele ovikeya vitãlo.+ 16 Eye wa panga alienge ndolomota vio posingo kuenje wa a kapa kosungu yolongunji kuenda wa panga 100 kolo romã kuenje wa vi kapa kalienge. 17 Eye wa tumbika olongunji kovaso yonembele, yimue kondio* kuenda yikuavo kepĩli;* eye wa luka yo konele yondio hati, Yakini* kuenda yo kepĩli Boasi.*

4 Noke eye wa tunga utala wosipi+ u kuete 20 kovikeya vusõvi, 20 kovikeya vupati kuenda 10 kovikeya koku lepa.

2 Eye wa panga ombasia yinene yovava yutale wa yenguluiwa yi tukuiwa hati, Okalunga.*+ Okalunga kaco ka ñualelepo ndolumbala okuti, ka kuatele 10 kovikeya oku upisa konele yimue yomẽla toke konele yikuavo kuenda koku lepa ka kuatele ovikeya 5, kua sukilile ukolo umue woseteko okuti, vusõvi wa kuatele 30 kovikeya oco u ñuale kokuayo.+ 3 Vombuelo yongenge kolonele viosi, kua posuisiwa loviluvialuvia violombenje viatila+ via kuata ekũi kovikeya okuti, via ñuala Kokalunga kosi. Olombenje viaco, via kala vovilala vivali kuenda via yenguluiwa kocikuata cimosi kumue lokalunga. 4 Okalunga kaco, ka kala kilu liolongombe 12,+ olongombe 3 via imba ovaso konano, 3 via imba ovaso kutakelo, 3 via imba ovaso kombuelo kuenda 3 via imba ovaso kutundilo; kuenje Okalunga ka kala kilu liolongombe viaco kuenda olombunda vialio viosi via kala vokati Kokalunga. 5 Oko ka lisokele lupati weka;* kuenda ongenge yaco ya pangiwa ndongenge yokopo yimue, ndonelẽho ya telẽha. Vociseleko covava mua ponduile oku sua* 3.000 kolombatu.*

6 Handi vali, wa pangavo ekũi kolombasiya vioku sukuila kuenje vitãlo wa vi kapa konele yondio yonjo kuenda vitãlo konele yepĩli.+ Polombasiya viaco, va enda oku sukuilapo ovina va enda oku talavaya lavio oco va lumbe ocilumba coku pia elisi.+ Pole, Okalunga ka kala kovitunda oco va li sukuilemo.+

7 Noke eye wa panga ekũi koviyekelo violondiyelo viulu,+ ndomo ca handelekiwa+ kuenje wa vi kapa vonembele okuti, vitãlo konele yondio kuenda vitãlo konele yepĩli.+

8 Eye wa pangavo ekũi kolomesa kuenje wa vi kapa vonembele okuti, vitãlo konele yondio kuenda vitãlo konele yepĩli;+ kuenje wa panga 100 katiyela ulu.

9 Noke eye wa tunga ocitali+ covitunda+ locitali* cinene+ kuenda apito ocitali kuenje wa laña apito aco losipi. 10 Kuenje eye wa kapa Okalunga konele yondio okuti, pokati kombuelo lutundilo.+

11 Hirama wa pangavo ovikuata viatiko, olopa kuenda atiyela.+

Kuenje Hirama wa malusula upange a lingila Soma Salomone vonjo ya Suku yocili okuti:+ 12 olongunji vivali+ kuenda ovitue vi kasi ndetiyela okuti, via kala kilu liolongunji vivali; awanda avali+ oco a sikĩlĩle kovitue vivali vi kasi ndetiyela okuti, via kala kilu liolongunji; 13 400 kolo romã+ vioku kapa kawanda avali, ovilala vivali violo romã vioku kapa kowanda lowanda, oco vi sikĩlĩle kovitue vivali vi kasi ndetiyela okuti, via kala kolongunji;+ 14 otuakãlu* ekũi kuenda olombasiya ekũi via kala votuakãlu;+ 15 Okalunga kuenda 12 kolongombe, via kala vemẽhi liayo;+ 16 kuenda ovikuata viatiko, olopa, olongalufu+ kuenda ovikuata viaco viosi vina Hirama-Abi+ a pangela Soma Salomone oco vi kale vonjo ya Yehova okuti, wa vi panga losipi ya finisiwa. 17 Soma wa vi yenguluila vocivanja co Yordão, posi yotuma pokati ko Sukote+ lo Cereda. 18 Salomone wa panga ovikuata viaco viosi vetendelo lialua; ocilemo cosipi ka ca tendiwile.+

19 Salomone wa panga ovikuata viosi+ vionjo ya Suku yocili okuti: utala wulu;+ olomesa+ va enda oku kapa olombolo via taliwa;+ 20 oviyekelo violondiyelo lolondiyelo viaco viulu wa fina,+ oco vi taimele kovaso yohondo yo vokati, ndeci ci likuata lolonumbi; 21 kuenda olonelẽho, olondiyelo, lovikuata viulu vioku ima ondalu,* ulu wa finapo vali; 22 ovikuata vioku teta omutusila, atiyela, olokopo kuenda oviyukilo viondalu viulu wa fina; kuenda uvelo wonjo, apito aco o vokati Ohondo yi Kola Koku Kola+ kuenje apito onjo yonembele, a pangiwa lulu.+

5 Kuenje Salomone wa malusula upange wosi a sukilile oku lingila onjo ya Yehova.+ Noke Salomone wa nena vokati ovina isiaye Daviti a kolisile+ kuenje eye wa kapa opalata, ulu kuenda ovikuata viosi vohondo yoku seleka ovokuasi vionjo ya Suku yocili.+ 2 Kotembo yaco, Salomone wongolola akulu vo ko Isareli, asongui vosi vovikoti, lasongui volonjo via va isia vo ko Isareli. Ovo veya vo Yerusalãi oco vambate ocikasia covisila via Yehova oku tunda Kolupale lua Daviti+ okuti, o Siono.+ 3 Alume vosi vo ko Isareli va liongoluila kovaso a soma kocipito* ci lingiwa kosãi yepanduvali.+

4 Omo liaco, akulu vosi vo ko Isareli veya kuenje va Lewi va yelula Ocikasia.+ 5 Ovo va nena konano Ocikasia, lombalaka yohongele+ kuenda ovikuata viosi vi kola via kala vombalaka. Ovitunda la va Lewi* va vi nena konano. 6 Soma Salomone kumue lohongele yosi yo Isareli vana va kovongiwile oco va liongolole laye, va kala kovaso Yocikasia. Omo liaco, kua lumbiwa olomeme vialua lolongombe+ okuti, oku vi tenda ka via tẽliwile. 7 Noke ovitunda via nena ocikasia covisila via Yehova pocitumãlo calio, vokati kohondo yovokati konjo okuti, Ohondo yi Kola Koku Kola kuenje va ci kapa vemẽhi liavava a va keruvi.+ 8 Omo liaco, avava a va keruvi a nyanyumuiwile kilu liocitumãlo Cocikasia kuenje va keruvi va sikĩlĩla Ocikasia kumue lolombueti viaco+ oku upisa kilu. 9 Olombueti via kala visõvi calua okuti, ca tavele oku mola olosungu vialio oku upisa Kohondo yi Kola kovaso yohondo yo vokati, pole, ka ca tavele oku vi muila oku upisa posamua. Kuenje ovio, omo vi kasi toke etaili. 10 Vocikasia ka mua kaile cimue, te lika ovawe avali ana Mose a kapelemo ko Horeve+ eci Yehova a linga ocisila cimue+ lomanu va Isareli osimbu ovo va kala oku tunda Kegito.+

11 Noke eci ovitunda via tunda vocitumãlo ci kola (momo ovitunda viosi vina via kalamo via liyelisile ovio muẽle+ ci kaile okuti, via tiamẽla vovimunga viavo ale sio),+ 12 kuenje va Lewi vosi olonjimbi+ vana va tiamẽla ku Asafe,+ ku Hemani,+ ku Yedutunu+ kuenda komãla vavo la vamanjavo, vana va wala olonanga viovalatanya va kuata olosimbalu, ovikuata viovisikilo via pangiwa lovikolo kuenda olohalupa; ovo va talamele konele yutundilo wutala kuenda va kala leci ci soka 120 kovitunda vina via kala oku sika alumbeta.+ 13 Vepuluvi lina vakuakusika alumbeta kuenda olonjimbi va kala oku sivaya loku pandula Yehova locileñi cimuamue, locileñi calumbeta, colosimbalu kuenda covikuata vikuavo viovisikilo via kala oku lamana, osimbu ovo va kala oku sivaya Yehova, “momo eye uwa; ocisola caye ka ci pongoloka ci kala otembo ka yi pui”+ kuenje onjo okuti, onjo ya Yehova, yeyuka lelende.+ 14 Ovitunda ka via tẽlele oku kalamo loku vumba omo lielende, momo ulamba wa Yehova wa yukisa onjo ya Suku yocili.+

6 Salomone wa popia hati: “Yehova wa popia okuti, wa laikele oku kala valende a tekãva.+ 2 Cilo, nda ku tungila onjo ya posoka okuti, ocitumãlo cimue coku kala oco o kalemo otembo ka yi pui.”+

3 Noke soma wa ñualapo kuenje wa fetika oku sumũlũisa ekongelo liosi lio Isareli osimbu ekongelo liosi lio Isareli lia talama.+ 4 Eye wa popia hati: “Yehova Suku ya Isareli a sivayiwe una okuti, lomẽla waye wa likuminyile ku isiange Daviti kuenda lovaka aye wa ci tẽlisa poku popia hati: 5 ‘Tunde keteke ndopa omanu vange kofeka Yegito, sia nõlele olupale laumue pokati kovikoti viosi via Isareli oco omunu umue a tungilemo onjo yimue okuti, onduko yange yamamako oku kalamo+ kuenda sia nõlele ulume umue oco a kale usongui womanu vange va Isareli. 6 Pole, nda nõla o Yerusalãi+ oco onduko yange yi kalemo kuenda nda nõla Daviti oco a viale omanu vange va Isareli.’+ 7 Kuenje onjongole yo vutima ya isiange Daviti, ya kala yoku tunga onjo yimue yeca esivayo konduko ya Yehova, Suku ya Isareli.+ 8 Pole, Yehova wa sapuila isiange Daviti hati: ‘Onjongole yo vutima wove ya kala yoku tunga onjo yimue yeca esivayo konduko yange kuenda wa linga ciwa omo lioku lekisa onjongole yaco vutima wove. 9 Pole, ove ku ka tunga onjo; omõlove una o ka ku citiwila* eye o ka tunga onjo yeca esivayo konduko yange.’+ 10 Yehova wa tẽlisa ohuminyo a lingile, momo ame nda piñala isiange Daviti kuenda nda tumãla kocalo ca Isareli,+ ndomo Yehova a likuminyile.+ Nda tungavo onjo yimue yeca esivayo konduko ya Yehova, Suku ya Isareli, 11 kuenda nda kapamo Ocikasia muna mu sangiwa ocisila+ cina Yehova a lingile lomanu va Isareli.”

12 Noke eye wa talama kovaso yutala wa Yehova, kovaso yekongelo liosi lio Isareli kuenje wolõla ovaka aye.+ 13 (Momo Salomone wa pangele embumbua limue liosipi kuenje wa li kapele vokati kocitali.+ Olio lia kuatele ovikeya* vitãlo kusõvi, ovikeya vitãlo vupati kuenda ovikeya vitatu koku lepa; kuenje wa talama kokualio.) Eye wa kekamẽla kovaso yekongelo liosi lio Isareli kuenda woluĩla ovaka aye kovailu,+ 14 kuenje wa popia hati: “A Yehova Suku ya Isareli, ka kuli Suku wa lisoka love kovailu ale kilu lieve una o kapako ocisila kuenda o lekisa ocisola ka ci pongoloka kakuenje vove vana va kasi oku endela kovaso yove lutima wavo wosi.+ 15 Ove wa tẽlisa ohuminyo wa lingile ku isiange Daviti ukuenje wove.+ Wa lingile ohuminyo lomẽla wove muẽle kuenda keteke lietaili, ove wa yi tẽlisa leka liove muẽle.+ 16 Kaliye, A Yehova Suku ya Isareli, tẽlisa ohuminyo wa lingile ku isiange Daviti ukuenje wove eci ove wa popia hati: ‘Nda omãla vove va kapako olonjila viavo poku endela vocihandeleko cange+ ndeci ove wa endela kovaso yange, otembo yosi ku ka kala ulume umue ukuacikoti cove kovaso yange, oco a tumãle kocalo ca Isareli.’+ 17 Kaliye, A Yehova Suku ya Isareli, ohuminyo yina wa lingile kukuenje wove Daviti yi tẽlisiwe.

18 “Pole, anga hẽ Suku o ka tunga muẽle lomanu kilu lieve?+ Tala! Ovailu, ocili, ilu liovailu ku suimo;+ ca piãla enene onjo eyi nda tunga!+ 19 Kaliye yevelela ohutililo yukuenje wove lepingilo liaye liohenda, A Yehova Suku yange, yevelela koku litetela kuoku pinga ekuatiso kuenda kohutililo ukuenje wove a kasi oku linga kovaso ove. 20 Ovaso ove a lavulule onjo yilo utanya luteke ocitumãlo cina ove wa popia okuti, o laika oku kapamo onduko yove+ oco o yevelele ohutililo yina ukuenje wove a lingila pocitumãlo cilo. 21 Yevelela apingilo ekuatiso wukuenje wove, lapingilo vomanu vove va Isareli eci ovo va likutilila, loku imba ovaso kocitumãlo cilo+ kuenda yevelela oku upisa kocitumãlo cove o kasi, kovailu;+ ocili, yevelela kuenda ecela.+

22 “Nda omunu umue o lingila ekandu ukuavo kuenje o kisikiwa oku lisinga* okuti, cu kisika oku tẽlisa eci a lisinga* kuenje osimbu a kasi vemẽhi liocisila* caco iya kovaso yutala wove vonjo yilo,+ 23 yevelela oku upisa kovailu kuenda linga loku sombisa akuenje vove poku fetuluinya ondingaĩvi kuenda eko liovilinga viaye, liu wile kutue waye muẽle+ kuenda tukula ukuesunga okuti, wa pua eko* poku u sumũlũisa ndeci ci likuata lesunga liaye.+

24 “Kuenje nda omanu vove va Isareli va yuliwa lunyãli umue, omo lioku amamako oku ku lingila ekandu+ kuenje ovo va tiuka kuenda va sivaya onduko yove+ loku likutilila+ kuenje va pinga ohenda kovaso yove vonjo yilo,+ 25 yevelela oku upisa kovailu+ kuenda ecela ekandu liomanu vove va Isareli kuenje va nena vali vofeka yina wa eca kokuavo kuenda ku vakukululu yavo.+

26 “Eci ovailu a yika kuenda ka ku loki ombela+ omo ovo vamamako oku ku lingila ekandu+ kuenje ovo va likutilila ocipepi locitumãlo cilo kuenda va sivaya onduko yove loku tinduka kekandu liavo omo ove wa va kapa kutito,*+ 27 yevelela oku upisa kovailu kuenda ecela ekandu liakuenje vove, liomanu vove va Isareli, momo ove o ka va pindisila vonjila yiwa yina ovo va sesamẽla oku endela;+ kuenje nena ombela+ vofeka yove yina wa eca komanu vove ndocipiñalo.

28 “Nda kuiya onjala vofeka+ ale efengi limue,+ ofela ya tokota, ombutukuma,+ alende olohuma, ale olohuma* vikuavo vi nyõla+ ale nda ovanyãli vavo va va ñuala ocingonja valupale amue o vofeka*+ ale nda kuiya afengi añi añi ale ovovei,+ 29 nda omunu umue ale omanu vove vosi va Isareli va linga ohutililo+ ale epingilo limue liohenda,+ nda lie nda lie (momo, omunu lomunu wa kũlĩha efengi liaye muẽle kuenda ohali yaye muẽle)+ eci ovo va tulika ovaka avo konjo yilo,+ 30 yevelela oku upisa kovailu, pocitumãlo cove o kasi+ kuenda ecela;+ kuenje sumũlũisa omunu lomunu ndeci ci likuata lolonjila viaye viosi, momo wa kũlĩha utima waye (ove lika wa kũlĩha utima womanu),+ 31 oco va ku sumbile poku endela volonjila viove oloneke viosi ovo va kala vofeka yina wa eca ku vakukululu yetu.

32 “Handi vali, catiamẽla kocingendeleyi ka ci pangi onepa komanu vove va Isareli okuti, ca tunda kofeka yimue ocipãla omo lionduko yove yinene*+ kuenda eka liove lia pama lokuokuo kuove kuolõha kuenje eye iya loku likutilila poku imba ovaso konjo yilo,+ 33 yevelelavo oku upisa kovailu, pocitumãlo cove o kasi kuenda linga cosi ocingendeleyi ci pinga kokuove, oco omanu vosi vo kilu lieve va kũlĩhe onduko yove,+ loku ku sumbila ndeci omanu vove va Isareli va siata oku ci linga kuenda oco va kũlĩhe okuti, onduko yove ya siata oku tukuiwa vonjo yilo nda tunga.

34 “Nda omanu vove va enda oku ka liyaka lovanyãli vavo vonjila ove wa va tuma+ kuenje ovo va likutilila+ kokuove ocipepi lolupale lulo ove wa nõla kuenda ocipepi lonjo yina ame nda tunga yeca esivayo konduko yove,+ 35 yevelela oku upisa kovailu ohutililo yavo kuenda epingilo liavo liohenda kuenje va tetuluila.+

36 “Nda ovo va ku lingila ekandu (momo ka kuli omunu okuti ka lingi ekandu),+ kuenje o va kuatela onyeño loku va eca kunyãli umue o vambata kumandekua kofeka yimue, nda ocipãla nda ocipepi,+ 37 kuenje ovo va limbuka elinga liavo vofeka yina vambatiwa kumandekua kuenda va tiuka kokuove loku ku pinga ohenda vofeka yina va linga olomandekua, poku popia vati: ‘Tua linga ekandu kuenda tua linga eci cĩvi; tua linga eci ca vĩha,’+ 38 kuenje ovo va tiuka kokuove lutima wavo wosi,+ lomuenyo wavo wosi vofeka yumandekua+ muna vambatiwa kumandekua kuenje ovo va likutilila loku imba ovaso kofeka yavo yina wa eca ku vakukululu yavo kuenda olupale luna ove wa nõla+ lonjo yina ame nda tunga yeca esivayo konduko yove, 39 yevelela oku upisa kovailu pocitumãlo cove o kasi, ohutililo yavo kuenda epingilo liavo liohenda kuenje va tetuluila+ loku ecela omanu vove vana va ku lingila ekandu.

40 “Kaliye A Suku yange, linga ohenda, ovaso ove a vanje kuenda ovatũi ove a yevelele kohutililo ya eciwa* kocitumãlo cilo.+ 41 Cilo, A Yehova Suku, lamanela kocitumãlo cove cepuyuko+ ove kuenda Ocikasia congusu yove. Ovitunda viove A Yehova Suku, vi wale epopelo kuenda omanu vove va ku kolela va sanjukile uwa wove.+ 42 A Yehova Suku, ku ka likaile* ombuavekua yove.+ Ivaluka ocisola cove ka ci pongoloka kukuenje wove Daviti.”+

7 Eci Salomone a mala oku likutilila,+ kovailu kua loka ondalu+ kuenda ya lia ocilumba coku pia elisi, lovilumba vikuavo kuenje ulamba wa Yehova wa yukisa onjo.+ 2 Ovitunda ka via tẽlele oku iñila vonjo ya Yehova, momo ulamba wa Yehova wa yukisile onjo ya Yehova.+ 3 Omanu vosi va Isareli va kala oku vanja eci ondalu ya loka kuenda ulamba wa Yehova wa kala kilu lionjo kuenje ovo va kekama loku petamisa ovipala viavo posi ya pangiwa lovawe kuenda va pandula Yehova, “momo eye uwa; ocisola caye ka ci pongoloka, ci kala otembo ka yi pui.”

4 Kuenje soma lomanu vosi va eca ovilumba kovaso a Yehova.+ 5 Soma Salomone wa eca ocilumba ci soka 22.000 kolongombe kuenda 120.000 kolomeme. Omo liaco, soma lomanu vosi va tumbika onjo ya Suku yocili.+ 6 Ovitunda via talamele povitumãlo viavo viupange, ndeci ca linga va Lewi vana va kala lovikuata viovisikilo vioku talavaya lavio oco va kuame ovisungo vioku imbila Yehova.+ (Soma Daviti wa pangele ovikuata viaco oco ku eciwe olopandu ku Yehova, “momo ocisola caye ka ci pongoloka ci kala otembo ka yi pui,” eci Daviti a enda oku eca esivayo ku Suku pocakati ceka liavo.*) Ovitunda via kala oku sika olombeta lolukandi+ kovaso yavo, osimbu va Isareli vosi va talama.

7 Noke Salomone wa kolisa onepa yo vokati kocitali yina ya kala kovaso yonjo ya Yehova, momo opo a sukilile oku ecela ovilumba vioku pia elisi+ kuenda ulela wovilumba viombembua, momo ovilumba vioku pia elisi, lovilumba violomema+ kuenda ulela,+ ka via suile kutala wosipi+ Salomone a tungile. 8 Kotembo yaco, Salomone wa linga ocipito vokuenda kuoloneke epanduvali+ kumue lo Isareli yosi okuti, ekongelo limue linene calua, lia tunda oku upisa ko Lebo-hamati* toke Kekango* lio Kegito.+ 9 Pole, keteke liecelãla* va linga ohongele yilikasi,+ momo ovo va tumbika utala vokuenda kueci ci soka oloneke epanduvali kuenda ocipito vokuenda kuoloneke epanduvali. 10 Noke keteke 23 liosãi yepanduvali, eye wa ecelela okuti, omanu va enda kuenje ovo va enda kolonjo viavo lesanju,+ lutima weyuka onjolela omo liohenda Yehova a lekisa ku Daviti, ku Salomone kuenda komanu vaye va Isareli.+

11 Omo liaco, Salomone wa malusula onjo ya Yehova lonjo* ya soma;+ kuenje ovina viosi via kala vutima wa Salomone oco a vi linge viatiamẽla konjo ya Yehova lonjo yaye muẽle, wa vi tẽlisa ciwa.+ 12 Noke Yehova wa molẽha ku Salomone+ vokuenda kuteke kuenje wo sapuila hati: “Nda yeva ohutililo yove kuenda nda li nõlela ocitumãlo cilo ndonjo yimue yocilumba.+ 13 Eci ame ndi yika ovailu kuenda ka ku loki ombela leci ndi handeleka olohuma oco vi lie ovikũla viofeka kuenda nda nda tuma efengi pokati komanu vange, 14 nda omanu vange vana va tukuiwa londuko yange+ va liketisa+ kuenda va likutilila loku sandiliya ocipala cange kuenje va tinduka kolonjila viavo vĩvi,+ oco ame ndi yeva oku upisa kovailu, loku ecela ekandu liavo loku kayisa ofeka yavo.+ 15 Cilo, ovaso ange a ka vanja kuenda ovatũi ange a ka yevelela lutate ohutililo yi lingiwila pocitumãlo cilo.+ 16 Kaliye, nda nõla kuenda nda kolisa onjo yilo oco okuti, onduko yange yi kalamo otembo ka yi pui+ kuenda ovaso ange lutima wange vi ka kalamo otembo yosi.+

17 “Nda ove wa endela kovaso ange ndeci isiove Daviti a enda, poku linga ovina viosi nda ku handeleka kuenje o pokola koviholo viange lasombiso ange,+ 18 ame ndi ka tumbika ocalo cusoma wove,+ ndeci nda lingile ocisila cimue la isiove Daviti+ poku popia hati: ‘Otembo yosi ku ka kala ulume umue ukuacikoti cove oco a viale o Isareli.’+ 19 Pole, nda wa liwekipo oku ndi kuama loku siapo oku pokola koviholo viange kuenda kovihandeleko viange vina nda tumbika kovaso ene kuenje ene wendi loku vumba olosuku vikuavo loku vi kekamẽla,+ 20 ndi ka tukũla Isareli vofeka yange yina nda eca kokuavo+ kuenje onjo yilo nda kolisila okuti yambata onduko yange, ndi yupa kovaso ange kuenda ndi yi lingisa okuti, yi sepuiwa* loku popiwa lãvi pokati komanu vosi.+ 21 Kuenje onjo eyi yi linga ondunda yovingululu. Omunu wosi o pitapo o yi vanja loku komõha+ kuenda o ka pula hati: ‘Momo lie Yehova a lingila ovina evi lofeka eyi kuenda lonjo eyi?’+ 22 Noke va ka tambulula vati: ‘Momo va yanduluka Yehova+ Suku ya vakukululu yavo, una wa vopa vofeka Yegito+ kuenje va kakatela kolosuku vikuavo loku vi kekamẽla kuenda va vi vumba.+ Eli olio esunga lieci eye a va nenela ohali yosi eyi.’”+

8 Kesulilo 20 kanyamo, otembo Salomone a tunga onjo ya Yehova kuenda onjo* yaye muẽle,+ 2 Salomone wa tumbulula alupale ana Hirama+ a ecele kokuaye kuenje Salomone wa kapamo va Isareli.* 3 Handi vali, Salomone wa enda toke ko Hamati-Sova kuenje wa yi tambula. 4 Noke wa pamisa* o Tadimore vekalasoko kuenda alupale osi olosila+ ana eye a tungile ko Hamati.+ 5 Eye wa tungavo o Bete-Horone yo Konano+ lo Bete-Horone yo Kombuelo,+ alupale a pamisiwa lovimbaka, lolombundi kuenda ovikundiko, 6 wa tungavo o Baalata+ lalupale osi olosila via Salomone, alupale osi akãlu,+ alupale a vakuakuendela kolokavalu, lovina viosi Salomone a yonguile oku tunga vo Yerusalãi, ko Levanone kuenda kolofeka viosi viuviali waye.

7 Catiamẽla komanu vosi vana va supilepo ku va Hiti, ku va Amori, ku va Perisi, ku va Hivi kuenda ku va Yevusi+ okuti, vana ka va tiamẽlele ku Isareli,+ 8 okuti, ovitumbulukila viavo vina via supilepo vofeka haivio ka via kunduiwile la va Isareli,+ va handelekiwa la Salomone oco vo lingile upange wa tĩla toke etaili.+ 9 Pole, Salomone ka lingisile laumue pokati ka va Isareli upika wupange waye,+ momo ovo va kala asualali vaye, asongui voloñuatisi viaye, lasongui va vana vakuakuendisa akãlu aye kuenda vakuakuendela kolokavalu.+ 10 Kua kala 250 kasongui va va kalei ka Soma Salomone okuti, vakuakusonguila omanu kupange.+

11 Salomone wopa omõla ukãi wa Fareo+ Volupale lua Daviti kuenje wo nena toke konjo yina eye o tungila,+ momo eye wa popia hati: “Ndaño okuti eye ukãi wange, ka citava okuti eye o kala vonjo ya Daviti Soma yo Isareli, momo ovitumãlo muna Ocikasia ca Yehova ca kala, vi kola.”+

12 Noke Salomone wa eca ovilumba vioku pia elisi+ ku Yehova kutala+ wa Yehova, una eye a tungile kovaso yocindumba.+ 13 Eye wa enda oku kuama upange weteke leteke kuenda wa eca eca ovilumba ndomo ci likuata locihandeleko ca Mose catiamẽla Kasambata,+ kolosãi viokaliye+ kuenda kovipito vi lingiwa olonjanja vitatu vunyamo+ okuti, Ocipito Colombolo ka vi Kuete Etumbisa,+ Ocipito Colosemana+ kuenda Ocipito Colosinge.*+ 14 Handi vali, eye wa nõla ovimunga viovitunda+ oco va kale kovopange avo ndeci ci likuata lonumbi ya isiaye Daviti kuenda va Lewi oco va kaile povitumãlo viavo viupange, oco va sivaye+ loku linga upange kovaso yovitunda ndeci ci likuata lupange weteke leteke kuenda wa nõlavo vakualombundi vovimunga viavo, oco va kale polombundi via litepa,+ momo oco ca kala ocihandeleko ca Daviti ukuenje wa Suku yocili. 15 Kuenje ovo ka va pambukile kocihandeleko ca soma ca eciwa kovitunda kuenda ku va Lewi catiamẽla kondaka yimue ale kolosila. 16 Upange wosi wa Salomone wa sokiyiwile* ciwa oku upisa keteke va kapa ociseveto conjo ya Yehova+ toke eci ya pua. Omo liaco, onjo ya Yehova ya malusuiwa.+

17 Noke Salomone wa enda ko Eciongevere+ kuenda ko Eloti+ kohulo yokalunga vofeka yo Edome.+ 18 Hirama+ wo tumisa olonaviyu kuenda alume vakuoloño wokalunga pocakati cakuenje vaye muẽle. Ovo va enda kumosi lakuenje va Salomone ko Ofiri+ kuenda vopako 450 kolotalendo* viulu+ kuenje va vi ambata ku Soma Salomone.+

9 Nasoma wo ko Sieva+ wa yeva ulandu watiamẽla koluhimo lua Salomone kuenje weya ko Yerusalãi oco a seteke Salomone lapulilo a tatama.* Omanu* valua va kemãla va enda kumue laye lolongamelo viambata ulela wonguendu, lulu walua+ kuenda ovawe a tĩla. Eye wa enda toke ku Salomone kuenje wo sapuila ovina viosi via kala vutima waye.+ 2 Salomone wa tambulula apulilo aye osi. Ka kua kaile lacimue okuti ca tatamẽle calua* ku Salomone oco o ci lomboluile.

3 Eci nasoma yo Sieva a mola olondunge via Salomone,+ onjo yina a tunga,+ 4 okulia kuomesa yaye,+ oku tumãla kuakuenje vaye, upange wa vakuakuseva omesa luwalo wavo, vakuakueca okopo yaye luwalo wavo kuenda ovilumba viaye vioku pia elisi vina a enda oku lumba otembo yosi vonjo ya Yehova,+ nasoma ka kuatele vali eci a vangula.* 5 Omo liaco, eye wa sapuila soma hati: “Ulandu nda yeva vofeka yange muẽle watiamẽla kovina wa linga* kuenda kolondunge viove, wa kala wocili. 6 Pole, sia kolelele kovolandu aco toke eci ndeya loku ci mõla lovaso ange muẽle.+ Kuenje tala! Ndaño onepa yimue yolondunge viove vialua, ka ya sapuiwile kokuange.+ Ove wa velapo calua okuti, ovina omanu va popia viatimẽla kokuove vi sule.+ 7 Omanu vove va sumũlũha kuenda va sumũlũhavo akuenje vove, vana va kasi kovaso yove otembo yosi oku yevelela olondunge viove! 8 Yehova Suku yove a sivayiwe, una wa ku sanjukila poku ku kapa kocalo caye ndosoma vonduko ya Yehova Suku yove. Omo okuti, Suku yove o sole Isareli+ kuenda o yongola okuti, ovo vamamako otembo ka yi pui, eye wa ku nõla oco o linge osoma okuti, o viala lesunga kuenda esunguluko.”

9 Noke nasoma wa eca ku soma 120 kolotalendo* viulu,+ lulela walua wonguendu kuenda ovawe a tĩla. Lalimue eteke kua neniwile vali ulela wonguendu ndowu nasoma wo ko Sieva a eca ku Soma Salomone.+

10 Handi vali, akuenje va Hirama lakuenje va Salomone, vana va nena ulu wo ko Ofiri,+ va nenavo avaya alimugi kuenda ovawe a tĩla.+ 11 Soma wa panga lavaya alimugi ovilamanelo vionjo ya Yehova+ levi vionjo* ya soma+ kuenda olohalupa lovikuata viovisikilo via pangiwa lovikolo oco vi eciwe kolonjimbi.+ Ka kua la muiwa avaya a lisoka la-o kofeka yo Yuda.

12 Soma Salomone wa ecavo ku nasoma yo Sieva ovina viosi nasoma a yonguile levi a pinga okuti, via luile vali* okuti, evi eye a nenele ku Soma vi sule. Noke, nasoma wa enda kuenje wa tiukila kofeka yaye muẽle kumue lakuenje vaye.+

13 Ocilemo culu cina Salomone a endaile oku tambulula unyamo lunyamo, ca tẽlele 666 kolotalendo viulu,+ 14 oku upamo evi via enda oku neniwa la vakualomĩlu, la vakuakulandisa, lolosoma viosi vio ko Arabia kuenda lolonguluvulu viofeka vina via enda oku nena ulu lopalata ku Salomone.+

15 Soma Salomone wa panga 200 koviyepelo vinene viulu ulikasi+ (ociyepelo lociyepelo ca kuatele 600 kolosiekele* viulu ulikasi)+ 16 kuenda 300 koviyepelo vitito* viulu ulikasi (ociyepelo lociyepelo citito ca kuatele olomina* vitatu viulu). Kuenje soma wa vi kapa Vonjo Yusenge wo Levanone.+

17 Soma wa lingavo ocalo cimue cinene combinga yonjamba kuenda wa ci laña lulu wa fina.+ 18 Kua kala epandu kovilamanelo toke kocalo kuenda kua kala ociliatelo culu colomãhi ca kala kocalo kuenda kua kala oviyekelo viovoko kolonẽle vivali viocalo kuenje oviñumañuma vivali violohosi+ via talama konele yoviyekelo viaco. 19 Kua kala 12 koviñumañuma violohosi+ via talama kovilamanelo epandu okuti, kesulilo liovilamanelo epandu kua kala ociñumañuma cimosi cohosi. Ka kua la kaila usoma ukuavo wa lingile ocina cimue ndeci. 20 Olokopo viosi vioku nyuila via Soma Salomone via kala viulu kuenda ovikuata viosi Vionjo Yusenge wo Levanone via kala viulu wa fina. Ka kua kaile lacimue ca pangiwa losipi, momo osipi ka ya kuatele esilivilo koloneke via Salomone.+ 21 Momo olonaviyu via soma via enda oku enda ko Tarsisi+ kumue lakuenje va Hirama.+ Onjanja yimosi vanyamo atatu, olonaviyu vio ko Tarsisi via enda oku nena ulu, opalata, ombinga yonjamba,+ olosima kuenda olonjila violo-pavão.*

22 Soma Salomone wa velelepo olosoma viosi vikuavo vio kilu lieve kovokuasi kuenda kolondunge.+ 23 Kuenje olosoma vio kilu lieve liosi, via yonguile oku lisanga la* Salomone oco vi yevelele olondunge viaye, vina Suku yocili a kapele vutima waye.+ 24 Omunu lomunu wa enda oku nena ombanjaile yimue okuti, ovikuata viosipi, ovikuata viulu, ovowalo,+ ovimalẽho viuyaki, ulela wonguendu, olokavalu lolomula kuenje vamamako oku ci linga unyamo lunyamo. 25 Salomone wa kuatele 4.000 kovimanga violokavalu viaye lakãlu kuenda 12.000 kolokavalu,*+ kuenje wamamako oku vi kapa valupale akãlu ocipepi la soma vo Yerusalãi.+ 26 Eye wa vialele olosoma viosi oku upisa Kolui* toke kofeka ya va Filisiti kuenda toke kongave Yegito.+ 27 Soma wa luisa opalata vo Yerusalãi okuti, ya luile calua ndovawe kuenda avaya osedru a luile calua ndoviti viakuyu vio ko Sefela.+ 28 Ovo va enda oku nena olokavalu vio Kegito+ ku Salomone kuenda vio kolofeka viosi vikuavo.

29 Catiamẽla konepa yikuavo yulandu womuenyo wa Salomone+ tunde kefetikilo toke kesulilo, ka wa sonehiwile hẽ pokati kolondaka via Natana+ uprofeto vocitumasuku ca Ahiya+ u Silo kuenda vovolandu ovinjonde via Ido+ ukuakusapula ovinjonde viatiamẽla ku Yerevoama+ omõla a Nevata? 30 Salomone wa viala ko Yerusalãi okuti, o Isareli yosi ci soka 40 kanyamo. 31 Noke Salomone wa ka puyuka la vakukululu yaye. Omo liaco, ovo vo kenda Volupale lua isiaye Daviti;+ kuenje omõlaye Rehovama wa linga osoma pomangu yaye.+

10 Rehovama wa enda ko Sekeme,+ momo o Isareli yosi ya endele ko Sekeme oco vo lingise osoma.+ 2 Eci Yerevoama+ omõla a Nevata a ci yeva (eye handi wa kala Kegito, momo eye wa tilile omo lia Soma Salomone),+ Yerevoama wa kala oku tunda Kegito. 3 Omo liaco, va tuma oku u vilikiya kuenje Yerevoama kuenda o Isareli yosi veya ku Rehovama kuenda vo sapuila vati: 4 “Isiove wa tĩlisa okanga yetu.+ Pole, nda ove wa leluisa upange wa tĩla una isiove a tu ĩhile, loku leluisa okanga ya lema* eye a tu kapela, etu tu ka ku vumba.”

5 Kuenje eye wa va sapuila hati: “Tiuki kokuange noke yoloneke vitatu.” Omo liaco, omanu va enda.+ 6 Soma Rehovama wa kũlĩhĩsa alume va kuka* vana va vumbile isiaye Salomone osimbu eye a kala komuenyo loku pula hati: “Elungulo lipi vu nyĩha oco ndi tambulule omanu ava?” 7 Ovo vo tambulula vati: “Nda ove wa kala uwa lomanu ava loku va sanjuisa kuenje eca kokuavo etambululo limue lia suapo, ovo otembo yosi va ka kala akuenje vove.”

8 Omo liaco, eye wa likala elungulo lina alume va kuka* va eca kokuaye kuenje wa kũlĩhĩsa amalẽhe vana va kulila kumosi laye, haivo va kala oloñuatisi viaye.+ 9 Eye wa va pula hati: “Elungulo lipi vu nyĩha oco tu tambulule omanu ava va kasi oku ndi sapuila vati: ‘Leluisa okanga ya tĩla isiove a kapa kokuetu’?” 10 Amalẽhe vana va kulila kumosi laye vo sapuila vati: “Eci oco o sapuila komanu va ku sapuila okuti: ‘Isiove wa tĩlisa okanga yetu, pole, ove o sukila oku tu yi leluisila’; o sukila oku va sapuila hati: ‘Omuine wange utito, u ka kala vali unene okuti, ombunda ya isiange yi sule. 11 Isiange wa ku kapeli okanga yimue ya lema, pole, ame ndi vokiyako kokanga yene. Isiange wa vu kangisi lolohava, pole, ame ndi ci linga losikote yi kuete olosongo.’”

12 Yerevoama lomanu vosi veya ku Rehovama keteke liatatu ndeci soma a popele hati: “Tiuki kokuange keteke liatatu.”+ 13 Pole, soma wa va tambulula lukãlu. Omo liaco, Soma Rehovama wa likala elungulo lialume va kuka.* 14 Eye wa popia lavo ndomo ci likuata lelungulo liamalẽhe hati: “Ame ndi ka tĩlisa vali calua okanga yene kuenda ndi ka vokiyako kokanga yaco. Isiange wa ku kangisi lolohava, pole, ame ndi ci linga lolosikote vi kuete olosongo.” 15 Omo liaco, soma ka yevelile komanu, momo ovina via kala oku pita, via tunda ku Suku yocili+ oco ku tẽlisiwe ondaka ya Yehova yina a popele ku Yerevoama omõla a Nevata pocakati ca Ahiya+ u Silo.

16 Catiamẽla ko Isareli yosi omo okuti, soma ka tavele oku va yevelela, omanu va tambulula soma vati: “Onepa yipi tu kuete ku Daviti? Ka tu kuete ocipiñalo komõla a Jese. Eceleli okuti, omunu lomunu o vumba olosuku viaye muẽle, A Isareli! Kaliye tata onjo yove muẽle A Daviti!”+ Kuenje o Isareli yosi ya tiukila kolonjo* viavo.+

17 Pole, Rehovama wamamako oku viala va Isareli va tungile valupale o Yuda.+

18 Kuenje Soma Rehovama wa tuma Hadorama+ una wa kuatele ocikele coku songuila vana va handelekiwile oco va linge upange wa tĩla, pole, va Isareli vo sasõla lovawe toke eci a fa. Soma Rehovama wa londa vekãlu liaye oco a tilile vo Yerusalãi.+ 19 Kuenje va Isareli va kasi oku amamako oku ñualelapo onjo ya Daviti toke etaili.

11 Eci Rehovama a pitĩla vo Yerusalãi vepuluvi liaco, wongolola onjo ya Yuda leyi ya Benjamini+ va soka 180.000 kasualali va pindisiwa* oco va liyake lo Isareli okuti, va tiuwiya usoma ku Rehovama.+ 2 Noke Yehova wa sapuila uprofeto* waye Semaya+ hati: 3 “Sapuila Rehovama omõla a Salomone soma yo Yuda, lo Isareli yosi ko Yuda kuenda ko Benjamini hati: 4 ‘Ca popia Yehova ceci hati: “Ko ka lamani oku katukila vamanjene. Omunu lomunu pokati kene a tiukile konjo yaye, momo ovina evi ame nda vi koka.”’”+ Omo liaco, va pokola kondaka ya Yehova kuenda va tiukila kuenje ka va katukilile vali Yerevoama.

5 Rehovama wa kala vo Yerusalãi kuenda wa tunga alupale a kuete oviteyuilo vo Yuda. 6 Kuenje eye wa pamisa o Beteleme,+ o Etami, o Tekoa,+ 7 o Bete-Cure, o Soko,+ o Adulama,+ 8 o Gati,+ o Maresia, o Sife,+ 9 o Adoraimi, o Lakisi,+ o Aseka,+ 10 o Sora, o Ayalone+ kuenda o Hevirone+ okuti, alupale a kuete oviteyuilo ana a kala vo Yuda kuenda vo Benjamini. 11 Handi vali, eye wa pamisa ovitumãlo vi kuete oviteyuilo kuenda wa kapamo vakesongo kuenje wa enda oku kapa okulia lulela kuenda ovinyu kovitumãlo viaco, 12 noke wa kapa valupale aco osi a litepa oviyepelo vinene kuenda olonjelia; eye wa a pamisa calua. Kuenje eye wamamako oku viala o Yuda kuenda o Benjamini.

13 Noke ovitunda la va Lewi vana va kala ko Isareli yosi, va siapo ovikanjo viavo kuenje va likongela ku Rehovama. 14 Va Lewi va siapo ovisenge viavo vioku lisila oviunda lovipinãlo viavo+ kuenje veya ko Yuda lo ko Yerusalãi, momo Yerevoama kumue lomãla vaye va vopa ocikele coku lingila Yehova upange wutunda.+ 15 Noke Yerevoama wa nõla ovitunda viaye muẽle kovitumãlo via lepa+ oco vi vumbe olondele violohombo,+ loviñumañuma violonãle vina eye a tungile.+ 16 Omanu vo kovikoti viosi via Isareli vana va kala lutima woku sanda Yehova Suku ya Isareli, va kuama ovitunda la va Lewi kuenje va enda ko Yerusalãi oco va ece ovilumba ku Yehova Suku ya vakukululu yavo.+ 17 Vanyamo atatu, ovo va pamisa usoma wo Yuda kuenda va kuatisa Rehovama omõla a Salomone, momo va endela vonjila ya Daviti kuenda ya Salomone vokuenda kuanyamo atatu.

18 Noke Rehovama wa kuela Mahalati omõla ukãi wa Yerimote omõla a Daviti. Mahalati wa kalavo omõla ukãi wa Avihayili omõla ukãi wa Eliyava+ omõla a Jese. 19 Vokuenda kuotembo, ukãi waco wo citila omãla okuti: Yewusi, Semariya kuenda Sahama. 20 Noke eye wa kuela Mahaka onekulu yukãi ya Avisalome.+ Vokuenda kuotembo, ukãi waco wo citila Aviya,+ Atayi, Sisa kuenda Selomiti. 21 Rehovama wa solele vali calua Mahaka onekulu yukãi ya Avisalome okuti, akãi vaye vosi vakuavo lakama vaye+ ci sule, momo wa kuatele 18 kakãi kuenda 60 kakama kuenje eye wa linga isia yeci ci soka 28 komãla valume kuenda 60 komãla vakãi. 22 Omo liaco, Rehovama wa nõla Aviya omõla a Mahaka oco a kale utue kuenda usongui pokati ka vamanjaye, momo eye wa yonguile oku u lingisa osoma. 23 Pole, eye wa ci linga lolondunge kuenje wa tumisa* vamue pokati komãla vaye kovaimbo osi o ko Yuda, o ko Benjamini kuenda kalupale osi a kuete oviteyuilo+ yu wa eca kokuavo olohuta vialua kuenda wa va sandela akãi valua.

12 Eci usoma wa Rehovama wa kolisiwa+ leci eye a pama, wa siapo Ocihandeleko ca Yehova+ kuenje o Isareli yosi ya ci lingavo. 2 Kunyamo watãlo wa Soma Rehovama, Soma Sisiake+ wo Kegito wa katukila o Yerusalãi, momo ovo va lekisa ekambo liekolelo ku Yehova. 3 Eye wa kuatele 1.200 kakãlu wuyaki, 60.000 kalume vakuakuendela kolokavalu lasualali valua ka va tendiwa okuti, vana veya laye Kegito okuti, va Libia, va Suki kuenda va Etiopia.+ 4 Eye wa tambula alupale a kuete oviteyuilo o Yuda kuenje oku sulako wa pitĩla vo Yerusalãi.

5 Uprofeto Semaya+ weya ku Rehovama kuenda kolombuale vio Yuda vana va liongoluile ko Yerusalãi omo lia Sisiake kuenje eye wa va sapuila hati: “Ca popia Yehova ceci hati: ‘Ene wa ndi yanduluki, omo liaco, ame ndo yandulukivo+ peka lia Sisiake.’” 6 Noke olombuale vio Isareli kumue la soma va liketisa+ kuenda va popia vati: “Yehova ukuesunga.” 7 Eci Yehova a mola okuti ovo va liketisa, ondaka ya Yehova yeya ku Semaya yiti: “Ovo va liketisa. Ame si ka va nyõla+ kuenda vokatembo kamue, ame ndi ka va yovola. Onyeño yange ka yi wengukila o Yerusalãi pocakati ca Sisiake. 8 Pole, ovo va ka linga akuenje vaye kuenje va ka kũlĩha etepiso li kasi pokati koku ndi vumba kuenda koku vumba olosoma* violofeka vikuavo.”

9 Kuenje Soma Sisiake wo Kegito wa katukila o Yerusalãi. Eye wopa ovokuasi o vonjo ya Yehova+ kuenda ovokuasi o vonjo* ya soma. Eye wopa ovina viosi, oku kongelamo oviyepelo viulu vina Salomone a pangele.+ 10 Omo liaco, Soma Rehovama wa panga oviyepelo viosipi oco a vi piñainye apa pa tunda vikuavo kuenda wa vi kundika kasongui volondavululi* vina via kala oku lava ombundi yonjo ya soma. 11 Olonjanja viosi eci soma eya vonjo ya Yehova, olondavululi via ponduile oku iñila loku ambata oviyepelo viaco, noke va enda oku vi tiuwiya vohondo yolondavululi. 12 Omo okuti soma wa liketisa, onyeño ya Yehova yo tinduka+ kuenje eye ka va kunduile vosi.+ Handi vali, kua kala ovina vimue viwa via sangiwa vo Yuda.+

13 Soma Rehovama wa pamisa omangu yaye vo Yerusalãi kuenda wamamako oku viala; Rehovama wa kuata 41 kanyamo eci a linga osoma kuenda wa viala 17 kanyamo vo Yerusalãi okuti, olupale luna Yehova a nõlele pokati kovikoti viosi vio Isareli okuti, ocitumãlo coku kapa onduko yaye. Onduko ya ina ya soma ya kala Nahama u Amoni.+ 14 Pole, eye wa linga eci cĩvi, momo ka sokoluile vutima waye oku sandiliya Yehova.+

15 Ulandu wa Rehovama oku upisa kefetikilo toke kesulilo, ka wa sonehiwile hẽ pokati kolondaka via Semaya+ uprofeto kuenda via Ido+ ukuavinjonde vovisonehua viulala wepata lepata? Olonjanja viosi pa kala uyaki pokati ka Rehovama la Yerevoama.+ 16 Noke Rehovama wa ka puyuka la vakukululu yaye kuenda wa kendiwa Volupale lua Daviti;+ kuenje omõlaye Aviya+ wa linga osoma pomangu yaye.

13 Kunyamo 18 wa Soma Yerevoama, Aviya wa linga osoma vo Yuda.+ 2 Eye wa viala vo Yerusalãi anyamo atatu. Onduko ya inaye ya kala Mikaya+ omõla ukãi wa Uriyele wo ko Givea.+ Kuenje pa kala uyaki pokati ka Aviya la Yerevoama.+

3 Omo liaco, Aviya wa enda kuyaki leci ci soka 400.000 kolohoka via pama okuti, asualali va pindisiwa.*+ Kuenje Yerevoama wa lipongiyila oku u katukila kumue leci ci soka 800.000 kalume va pindisiwa* okuti, asualali va pama. 4 Aviya wa talama Komunda Semarimi yina yi kasi kovaimbo a kasi kolomunda vio Efarimi kuenje wa popia hati: “A Yerevoama kuenda a Isareli yosi njeveleli. 5 Ka wa kũlĩhĩli hẽ okuti, Yehova Suku yo Isareli wa eca ku Daviti lo komãla vaye+ omoko yoku viala o Isareli otembo ka yi pui,+ pocakati cocisila cimue comongua?*+ 6 Pole, Yerevoama+ omõla a Nevata ukuenje wa Salomone omõla a Daviti, wa katuka kuenje wa sinila ñala yaye.+ 7 Kuenje alume vakuakutungayala lalume ka va silivila vamamako oku likongela kokuaye. Ovo va li lekisa okuti, va velapo Rehovama omõla a Salomone eci Rehovama a kala umalẽhe haeye ukuosumba kuenje eye ka ponduile oku tamalãla lavo.

8 “Kaliye ene vu sima okuti, vu pondola oku tamalãla lusoma wa Yehova u kasi peka liomãla va Daviti, momo vuwiñi walua kuenda vu kuete oviñumañuma violonãle viulu vina Yerevoama a panga ndolosuku kokuene.+ 9 Ene ka wa tundisili hẽ ovitunda via Yehova,+ ovitumbulukila via Arone la va Lewi kuenda ka wa li nõleli hẽ ovitunda viene muẽle ndeci omanu vo kolofeka vikuavo?+ Omunu wosi wa enda oku iya* lokangombe kamue, lovitupi violomeme epanduvali, wa ponduile oku kala ocitunda coviteka okuti, halosukuko. 10 Catiamẽla kokuetu, Yehova eye Suku yetu+ kuenda etu ka tuo yandulukile; ovitunda vietu okuti, ovitumbulukila via Arone, vi kasi oku vumba Yehova kuenda va Lewi va kasi oku vi kuatisa kupange. 11 Ovo va kasi oku tuimisila owisi wovilumba vioku pia elisi ku Yehova komẽle lomẽle kuenda koñolosi loñolosi+ kumue linsensu vielemba liwa+ kuenda olombolo via tumbikiwa*+ vi kasi komesa yulu wa fina kuenda ovo va mĩha oviyekelo violondiyelo viulu+ kumue lolondiyelo viaco koñolosi loñolosi,+ momo tu kasi loku tata ocikele cetu ku Yehova Suku yetu; pole, ene wo yanduluki. 12 Kaliye tali! Suku yocili o kasi letu kuenda o kasi oku tu songuila. Ovitunda viaye vi kasi palo lalumbeta oco vi ece ocileñi cuyaki woku vu katukili. Ene alume va Isareli, ko ka liyaki la Yehova Suku ya vakukululu yene, momo ene ka vu ka litunda ciwa.”+

13 Pole, Yerevoama wa tuma alume oco va lavekele vonutula konyima yavo kuenje olohoka viaye via velapo via kala kovaso yo Yuda kuenda vana va kala oku lavekela vonutula va kala konyima yavo. 14 Eci alume vo Yuda va ñualapo, va mola okuti va kala oku va katukila ci kaile kovaso kuenda konyima. Omo liaco, va fetika oku kalukila Yehova,+ osimbu ovitunda via kala oku sika alumbeta lolukandi. 15 Alume vo ko Yuda va kaluka londaka yocileñi cuyaki kuenda eci alume vo ko Yuda va kaluka londaka yaco yocileñi cuyaki, Suku yocili wa yula Yerevoama lo Isareli yosi kovaso a Aviya lo kovaso yo Yuda. 16 Va Isareli va tila kovaso yo Yuda kuenda Suku wa va eca peka liavo. 17 Aviya kumue lomanu vaye va koka ekundu limue linene kuenda ci soka 500.000 kalume va Isareli okuti, vana va pindisiwa,* va fa. 18 Kuenje vepuluvi liaco, alume vo ko Isareli va kutisiwa osõi, pole, alume vo ko Yuda va yula, momo ovo va kolelele* Yehova Suku ya vakukululu yavo.+ 19 Aviya wamamako oku lambalala Yerevoama kuenda wo tambula alupale a-a: O Betele+ kumue lovaimbo a sungueko, o Yesana kumue lovaimbo a sungueko kuenda o Efirone+ kumue lovaimbo a sungueko. 20 Koloneke via Aviya, Yerevoama ka la pama vali ndeci a pamẽle kosimbu; noke Yehova wo lemẽha kuenje wa fa.+

21 Pole, Aviya wamamako oku pama. Vokuenda kuotembo, eye wa kuela 14 kakãi+ kuenje wa linga isia yeci ci soka 22 komãla valume kuenda 16 komãla vakãi. 22 Catiamẽla konepa yikuavo yulandu wa Aviya, ovilinga viaye lolondaka viaye, via sonehiwa vovisonehua* viuprofeto Ido.+

14 Noke Aviya wa ka puyuka la vakukululu yaye kuenda vo kenda Volupale lua Daviti;+ kuenje omõlaye Asa wa linga osoma pomangu yaye. Koloneke viaye, ofeka ya kuata epuyuko vokuenda kuanyamo ekũi.

2 Asa wa linga eci ciwa leci ca sunguluka kovaso a Yehova Suku yaye. 3 Eye wopa ovotala olosuku viñi+ kuenda ovitumãlo via lepa, wa nyanyõla olongunji vi kola+ kuenda wa lundula olombueti vi kola.*+ 4 Handi vali, eye wa sapuila o Yuda oco va sandiliye Yehova Suku ya vakukululu yavo kuenda oco va kapeko Ocihandeleko lovikundi. 5 Omo liaco, eye wopa ovitumãlo via lepa kuenda ovotala insensu+ valupale osi o Yuda kuenje vemẽhi liuviali waye, usoma wamamako lombembua. 6 Eye wa tunga alupale a kuete oviteyuilo vo Yuda,+ momo ofeka ka ya kuatele vali esakalalo kuenje lomue vali wa linga uyaki laye vokuenda kuanyamo aco, momo Yehova wa eca kokuaye epuyuko.+ 7 Eye wa sapuila Yuda hati: “Tu tungi alupale ava loku a ñualisa lovimbaka, lolosapalalo+ kuenda olombundi* lovikundiko. Momo ofeka handi yi kasi peka lietu, omo etu tua sanda Yehova Suku yetu. Tuo sanda kuenje eye wa tu ĩha epuyuko kolonepa viosi.” Omo liaco, va litunda ciwa kupange woku tunga.+

8 Asa wa kuatele olohoka vi soka 300.000 kalume vo ko Yuda, va limalẽha loviyepelo vinene kuenda olonjelia. Vo ko Benjamini va kala 280.000 kasualali va pama vana vambatele oviyepelo vitito* kuenda va limalẽhele lolohonji.*+

9 Noke Sera u Etiopia, weya oku liyaka lavo kumue lolohoka vi soka 1.000.000 kalume kuenda 300 kakãlu wuyaki.+ Eci a pitĩla ko Maresia,+ 10 Asa wa tunda oku u katukila kuenje ovo va lipongiya ndovimunga viasualali Vocimbota co Sefata vo Maresia. 11 Noke Asa wa vilikiya Yehova Suku yaye+ kuenje wa popia hati: “A Yehova, kokuove ka kuli etepiso nda omanu ove o kuatisa valua ale ka va pamele.+ Tu kuatise A Yehova Suku yetu, momo tua kolela* kokuove+ kuenda vonduko yove tueya oku katukila owiñi owu.+ A Yehova, ove wu Suku yetu. Ku ka ecelele okuti omunu o fa, o tamalãla love.”+

12 Omo liaco, Yehova wa yula va Etiopia kovaso a Asa kuenda kovaso a Yuda kuenje va Etiopia va tila.+ 13 Asa kumue lomanu va kala laye, va va landula toke ko Gerare+ kuenje va Etiopia vamamako oku pondiwa toke eci ka pa supile vali umue lomuenyo, momo ovo va kunduiwa la Yehova kuenda lolohoka viaye. Noke liovina viaco, ovo vambata etendelo lialua liovina via pundiwa. 14 Handi vali, ovo va katukila alupale osi a lisungue lo Gerare, momo va kuatela usumba walua Yehova; kuenje ovo va punda alupale osi, momo valupale aco, mua kala ovina vialua vioku punda. 15 Ovo va katukilavo olombalaka viomanu va kuatele oviunda kuenje va tambula etendelo lialua liolomeme kuenda liolongamelo, noke va tiukila ko Yerusalãi.

15 Espiritu lia Suku lia wila Asariya omõla a Odede. 2 Omo liaco, eye wa tunda oco a lisange la Asa kuenje wo sapuila hati: “Njevelele a Asa kuenda o Yuda yosi lo Benjamini! Yehova o kasi lene osimbu vu amamako laye;+ kuenda nda ene vu u sandiliya, eye o ka ecelela oku sangiwa lene,+ pole, nda wo yanduluki, eye o vu yandulukivo.+ 3 Vokuenda kuotembo yalua,* o Isareli ka ya kalele la Suku yocili, ka ya kuatele ocitunda oco ci va longise kuenda ka ya kuatele ocihandeleko.+ 4 Pole, eci vohali yavo va tiuka ku Yehova Suku ya Isareli loku u sanda, eye wa ecelela okuti o sangiwa lavo.+ 5 Kotembo yaco, lomue wa ponduile oku linga ungende wa kolapo,* momo pokati kolonungi viosi violofeka pa kala ombuanja yalua. 6 Ofeka yimue ya kala oku kunduiwa lofeka yikuavo kuenda olupale lumue lolupale lukuavo, momo Suku wamamako oku vi kapa vombuanja lolohali viñi viñi.+ 7 Pole, ene pami kuenda ko ka konyõhi,*+ momo upange wene u ka kuata onima.”

8 Eci Asa a yeva olondaka evi kuenda ocitumasuku cuprofeto Odede, eye wa kuata utõi kuenje wa tundisa oviteka via vĩha vofeka yosi ya Yuda+ lo Benjamini lalupale ana eye a tambuile o kovaimbo a kasi kolomunda vio Efarimi kuenje wa tumbulula utala wa Yehova una wa kala kovaso yocindumba ca Yehova.+ 9 Eye wongolola o Yuda yosi lo Benjamini kuenda ovingendeleyi via kala pokati kavo vio Efarimi, vio Manase kuenda vio Simeone,+ momo valua pokati kavo va tundile ko Isareli oco va tiamẽle konele yaye eci va limbuka okuti, Yehova Suku yaye wa kala kumue laye. 10 Omo liaco, ovo va liongoluila ko Yerusalãi kosãi yatatu yunyamo 15 wuviali wa Asa. 11 Keteke liaco, ovo va lumbila Yehova 700 kolongombe kuenda 7.000 kolomeme vina via tunda kovina via pundiwa ovo va nenele. 12 Handi vali, ovo va linga ocisila cimue oco va sande Yehova Suku ya vakukululu yavo lutima wavo wosi kuenda lomuenyo* wavo wosi.+ 13 Omunu wosi ka sandiliyile Yehova Suku ya Isareli, wa sukilile oku pondiwa, ci kale utito ale unene, ulume ale ukãi.+ 14 Omo liaco, ovo va lisila ku Yehova londaka yolukandi kuenda oku kaluka kuonjolela lolumbeta kuenda olombinga. 15 Kuenje o Yuda yosi ya sanjuka omo liocisila, momo ovo va linga ocisila caco lutima wavo wosi kuenda vo sanda lonjongole yalua kuenje wa ecelela oku sangiwa lavo+ kuenda Yehova wamamako oku eca kokuavo epuyuko kolonele viosi.+

16 Soma Asa wa tundisavo nyokulu yaye Mahaka+ komangu yunasoma* momo nasoma yaco wa pangele ociteka cimue ca vĩha coku fendela ombueti yi kola.*+ Asa wa kundula ociteka ca vĩha ca Mahaka kuenda wa ci nyanyõla loku ci timĩhila Vocimbota co Kedrone.+ 17 Pole, ovitumãlo via lepa ka via nyõliwile+ ko Isareli.+ Omo liaco, utima wa Asa wa sungulukile* vokuenda kuomuenyo* waye wosi.+ 18 Kuenje eye wa nena vonjo ya Suku yocili, ovina viosi eye kumue la isiaye va kolisile okuti, opalata, ulu kuenda ovikuata viñi viñi.+ 19 Ka kua kaile uyaki toke kunyamo 35 wuviali wa Asa.+

16 Kunyamo 36 wuviali wa Asa, Soma Baasia+ wo ko Isareli weya oku katukila o Yuda kuenje wa fetika oku tunga* o Rama+ oco lomue ka ka tunde ale oku iñila vocikanjo ca Asa Soma yo Yuda.+ 2 Noke Asa wopa opalata, lulu vohondo yoku seleka ovokuasi vionjo ya Yehova+ kuenda vio vonjo* ya soma noke wa vi tuma ku Soma Benehadada wo ko Suria+ una wa tungile ko Damasku poku popia hati: 3 “Pokati kange love kuenda pokati ka isiange la isiove, pali ocisila cimue. Ñasi oku ku tumisa opalata lulu. Enju kuenda nyõla ocisila cove la Soma Baasia wo ko Isareli oco eye a nunde.”

4 Benehadada wa yevelela Soma Asa kuenda wa tuma asongui volohoka viaye oco va katukile alupale o Isareli kuenje ovo va kundula o Iyoni,+ o Dani,+ o Abelemayi, lovitumãlo viosi violosila vialupale a Nafitali.+ 5 Eci Baasia a ci yeva, vepuluvi liaco, wa liwekapo oku tunga* o Rama kuenje wa siapo upange waye. 6 Noke Soma Asa wongolola o Yuda yosi kuenje ovo vambata ovawe lavaya o ko Rama+ vina Baasia a kala oku tunga lavio+ kuenje wa tunga* lavio o Geva+ kuenda o Misipa.+

7 Kotembo yaco, Hanani+ ukuavinjonde weya ku Asa Soma yo Yuda kuenje wo sapuila hati: “Omo okuti ove wa kolela* soma yo Suria kuenda kua kolelele* Yehova Suku yove, olohoka via soma yo ko Suria via pulukila peka liove.+ 8 Va Etiopia la va Libia ka va kalele hẽ olohoka vinene calua kumue lakãlu alua wuyaki kuenda alume vakuakuendela kolokavalu? Pole, omo okuti ove wa kolelele Yehova, eye wa va eca peka liove.+ 9 Momo ovaso a Yehova a kasi oku lavulula lutate kilu lieve liosi+ oco a lekise ongusu yaye koku kuatisa vana okuti, utima wavo wa sunguluka kokuaye.+ Pole, konepa eyi wa lekisa uveke; oku upisa cilo ku ka kala ovoyaki kokuove.”+

10 Pole, Asa wa tema lukuavinjonde kuenda wo kapa vokayike,* momo wo funguila omo liovina a popia. Oku upisa vepuluvi liaco, Asa wa fetika oku tata lãvi vamue pokati komanu. 11 Ulandu wa Asa oku upisa kefetikilo toke kesulilo, wa sonehiwa velivulu Liolosoma vio Yuda kuenda vio Isareli.+

12 Kunyamo 39 wuviali waye, Asa wa kuata ocitangi cimue kolomãhi viaye toke eci a vela calua; kuenje ndaño ceci a kala oku vela, eye ka sandiliyile ekuatiso ku Yehova, pole, wa sandiliya ekuatiso kolondotolo. 13 Noke Asa wa ka puyuka la vakukululu yaye;+ eye wa fa kunyamo 41 wuviali waye. 14 Omo liaco, ovo vo kenda vocitumãlo cinene coku kendamo cina eye muẽle a fẽlele Volupale lua Daviti+ kuenje eye vo pekelisa vocikalavekua cimue ca yukisiwile lulela wonguendu kuenda ulela umue ulikasi wa pangiwa lolosimbolua viñi viñi via tengiwa.+ Handi vali, ovo va taimisa ondalu yalua yoku lekisa esumbilo kokuaye.*

17 Kuenje omõlaye Yehosafata+ wa linga osoma pomangu yaye kuenda wa pamisa omangu yaye ko Isareli. 2 Eye wa kapa olohoka viongusu valupale osi a kuete oviteyuilo o ko Yuda kuenda wa kapa asualali vofeka yo Yuda lo kalupale a Efarimi ana isiaye Asa a tambuile.+ 3 Yehova wamamako oku kala la Yehosafata, momo eye wa endela volonjila viosimbu via kukululu yaye Daviti+ kuenda ka sandiliyile va Baale. 4 Momo eye wa sanda Suku ya isiaye+ loku kuama* ocihandeleko caye kuenda ka kuamele ovilinga vio Isareli.+ 5 Yehova wamamako oku pamisa usoma peka lia Yehosafata;+ kuenda o Yuda yosi yamamako oku eca kokuaye olombanjaile kuenje eye wa kuatele ovokuasi lulamba walua.+ 6 Eye wa kuata utõi woku kuama olonjila via Yehova kuenda wa lundula ovitumãlo via lepa+ lolombueti vi kola*+ vio ko Yuda.

7 Kunyamo watatu wuviali waye eye wa tuma olombuale viaye okuti, Benehayile, Ovadiya, Sakariya, Netanele kuenda Mikaya, oco vi longise valupale o Yuda. 8 Va Lewi va enda kumue lavo vava: Semaya, Netaniya, Sevadiya, Asahele, Semiramote, Yehonatana, Adoniya, Tovija la Tovadoniya kuenda ovitunda okuti, Elisiama la Yehorama va kalavo kumue lavo.+ 9 Ovo va fetika oku longisila vo Yuda kuenda vambata elivulu Liocihandeleko ca Yehova+ kuenje va pita kalupale osi o Yuda oku longisa pokati komanu.

10 Kuenje olosoma viosi violofeka vi lisungue lo Yuda via kuatela usumba Yehova kuenda ka via liyakele la Yehosafata. 11 Noke va Filisiti va enda oku nena olombanjaile ku Yehosafata kuenda olombongo ndulambu. Va Arabia va enda oku u nenela 7.700 kovitupi violomeme kuenda 7.700 kovitupi violohombo via tunda koviunda viavo.

12 Yehosafata wamamako oku pama calua+ kuenda wamamako oku tunga ovitumãlo vi kuete oviteyuilo+ lalupale olosila+ vio Yuda. 13 Eye wa linga ovopange anene valupale o Yuda kuenda wa kuatele asualali okuti, asualali va pama vo Yerusalãi. 14 Ovimunga viavo via kala ndomo ci likuata lolonjo via va isiavo okuti: Ku Yuda kua kala asongui vohulukãi. Adina eye usongui kuenda eye wa kala leci ci soka 300.000 kasualali va pama.+ 15 Kuenje vemẽhi liomoko yaye yoku songuila mua kala Yehohanana usongui kuenda eye wa kala leci ci soka 280.000. 16 Handi vali, vemẽhi liomoko yaye yoku songuila, mua kala Amasiya omõla a Sikiri una wa liecele olumue kupange wa Yehova kuenda eye wa kala leci ci soka 200.000 kasualali va pama. 17 Ku Benjamini+ kua kala Eliada esualali limue lia pama kuenda eye wa kala leci ci soka 200.000 kalume va limalẽha lohonji kuenda ociyepelo.+ 18 Kuenje vemẽhi liomoko yaye yoku songuila mua kala Yehosavada kuenda eye wa kala leci ci soka 180.000 kalume va limalẽhela oku enda kuyaki. 19 Ava ovo va kala oku talavayela soma, oku vokiya ku vana soma a kapa valupale a kuete oviteyuilo o ko Yuda yosi.+

18 Yehosafata wa kuata ovokuasi alua kuenda ulamba walua,+ pole, eye wa livala ukamba la Ahava poku ecelela okuti, umue ukuepata liaye o likuela la umue ukuepata lia Ahava.+ 2 Omo liaco, noke lianyamo amue wa enda ku Ahava ko Samaria+ kuenda Ahava wo lumbila eye kumue lomanu va kala laye olomeme vialua lolongombe vialua. Kuenje eye wo livondela* oco a ende laye oku katukila o Ramote-Gileada.+ 3 Noke Soma Ahava wo ko Isareli, wa sapuila Soma Yehosafata wo ko Yuda hati: “O yongola hẽ oku enda lame ko Ramote-Gileada?” Eye wo tambulula hati: “Ove lame tuamuamue kuenda omanu vange lomanu vove vamuamue kuenje tu ka ku kuatisa kuyaki.”

4 Pole, Yehosafata wa sapuila soma yo Isareli hati: “Linga ohenda, tete kũlĩhĩsa ondaka ya Yehova.”+ 5 Omo liaco, soma yo Isareli wongolola ovaprofeto va soka 400 kalume kuenda wa va pula hati: “Tu sukila hẽ oku enda oku ka liyaka lo Ramote-Gileada ale sio?” Ovo va tambulula vati: “Kuende, Suku yocili o ka yeca peka lia soma.”

6 Noke Yehosafata wa pula hati: “Anga hẽ kulo ka kuli uprofeto umue wa Yehova?+ Tu kũlĩhĩsivo Suku pocakati caye.”+ 7 Kuenje soma yo Isareli wa sapuila Yehosafata hati: “Handi kuli vali ulume umue+ okuti tu pondola oku kũlĩhĩsa Yehova pocakati caye; pole, ame ndu nyãle, momo eye lalimue eteke a imbile owanji wovina viwa viatiamẽla kokuange, pole, te lika ovina vĩvi olonjanja viosi.+ Ulume waco Mikaya omõla a Imila.” Pole, Yehosafata wa popia hati: “Ka citava okuti soma o vangula ocina cimue ndeci.”

8 Omo liaco, soma yo Isareli wa vilikiya kesongo umue ukuelombe kuenda wa popia hati: “Nena lonjanga Mikaya omõla a Imila.”+ 9 Noke soma yo Isareli la Yehosafata soma yo Yuda va kala oku tumãla omunu lomunu kocalo caye kuenda va wala uwalo wusoma; ovo va kala oku tumãla pocimbandi puvelo wombundi yo Samaria kuenda ovaprofeto vosi va kala oku imba owanji kovaso avo. 10 Noke Sedekiya omõla a Kenaana wa li pangela olombinga viutale kuenje wa popia hati: “Ca popia Yehova ceci hati: ‘Lolombinga evi, ove o ka kundula* va Suria toke eci o va malapo.’” 11 Ovaprofeto vosi vakuavo va kala oku imba owanji lonjila yimuamue vati: “Lamanela ko Ramote-Gileada kuenje o ka kuata onima yiwa;+ Yehova o ka yeca peka lia soma.”

12 Omo liaco, omunga yina ya endele oku ka vilikiya Mikaya ya popia laye hati: “Tala! Olondaka viovaprofeto vimuamue haivio viwa ku soma. Linga ohenda, ondaka yove yi kale ndeyi yavo+ kuenda popia eci ciwa.”+ 13 Pole, Mikaya wa popia hati: “Ndeci Yehova a kasi lomuenyo, cosi Suku yange a popia oco ndi ka popia.”+ 14 Noke eye weya ku soma kuenje soma wo pula hati: “A Mikaya tu sukila hẽ oku enda oku ka liyaka lo Ramote-Gileada ale sio?” Vonjanja yaco, eye wa tambulula hati: “Lamana kuenda o ka kuata onima yiwa; ovo va ka eciwa peka liene.” 15 Kuenje soma wo sapuila hati: “Olonjanja viñami ndi sukila oku ku kapa vemẽhi liocisila oco ku ka ndi sapuile lacimue, pole, te lika ocili vonduko ya Yehova?” 16 Omo liaco, eye wa popia hati: “Ndi lete va Isareli vosi okuti, va lisanduila kolomunda ndolomeme ka vi kuete ungombo.+ Yehova wa popia hati: ‘Ava ka va kuete cime. Omunu lomunu a tiukile konjo yaye lombembua.’”

17 Noke soma yo Isareli wa sapuila Yehosafata hati: “Sia ku ci sapuilile hẽ okuti, ‘Eye ka ka imba owanji wovina viwa viatiamẽla kokuange, te lika vĩvi’?”+

18 Kuenje Mikaya wa popia hati: “Omo liaco, yeveleli ondaka ya Yehova: Ame nda mola Yehova wa tumãla kocalo caye+ kuenda olohoka viosi viovailu+ via talama kondio yaye lo kepĩli liaye.+ 19 Noke Yehova wa popia hati: ‘Helie o ka kembisamo Ahava Soma yo Isareli oco eye a lamane loku ka fila ko Ramote-Gileada?’ Kuenje umue wa kala oku popia ocina cimue, osimbu ukuavo a popia ocina cikuavo. 20 Noke espiritu*+ limue lieya kuenje lia talama kovaso a Yehova kuenda lia popia liti: ‘Ame ndu ko kembisamo.’ Yehova wo pula hati: ‘O ka ci linga ndati?’ 21 Eye wa tambulula hati: ‘Ngenda kuenda ndi ka kala espiritu limue liuhembi vomẽla wovaprofeto vaye vosi.’ Omo liaco, eye wa popia hati: ‘Ove u ko kembisamo, handi vali, o ka kuata onima yiwa. Kuende, ci linga.’ 22 Kaliye Yehova wa kapa espiritu limue liuhembi vomẽla wovaprofeto vove ava,+ pole, Yehova wa ku tukuila eci cĩvi.”

23 Sedekiya+ omõla a Kenaana wa amela ku Mikaya+ kuenda wo veta ocikusi cimue ketama+ kuenje wa popia hati: “Lonjila yipi espiritu lia Yehova lia mita oco li vangule love?”+ 24 Mikaya wa tambulula hati: “Tala! O ka ci mola keteke o ka iñila vohondo yovokati oco o salame.” 25 Noke soma yo Isareli wa popia hati: “Ambati Mikaya kuenda u weci ku Amoni usongui wolupale kuenda ku Yoasi omõla a soma. 26 Va sapuili hoti: ‘Ca popia soma ceci hati: “Kapi ulume u vokayike,+ u tekuli lonepa yitito yombolo kuenda ovava toke eci ndi tiuka lombembua.”’” 27 Pole, Mikaya wa popia hati: “Nda ove wa tiuka lombembua Yehova ka popele lame.”+ Kuenje wamisako hati: “Ci patekeli amanu vosi.”

28 Omo liaco, soma yo Isareli la Yehosafata soma yo Yuda va lamanela ko Ramote-Gileada.+ 29 Soma yo Isareli wa sapuila Yehosafata hati: “Ndi likembisa kuenda ndi iñila vuyaki, pole, ove o sukila oku kapa uwalo wove wusoma.” Omo liaco, soma yo Isareli wa likembisa kuenda wa iñila vuyaki. 30 Soma yo Suria wa handelekele asongui vakãlu aye wuyaki hati: “Ko ka liyaki lomunu laumue ci kaile utito ale unene, te lika la soma yo Isareli.” 31 Eci asongui vakãlu wuyaki va mõla Yehosafata, va livangula pokati vati: “U eye soma yo Isareli.” Omo liaco, va ñualapo oco va liyake laye; Kuenje Yehosafata wa fetika oku kaluka oku pinga ekuatiso+ kuenje Yehova wo kuatisa kuenda vonjanja yaco Suku wa va pambukisa kokuaye. 32 Eci asongui vakãlu wuyaki va mõla okuti eye ka kaile soma yo Isareli, vepuluvi liaco, va liwekapo oku u kuama.

33 Pole, ulume umue wa imba usongo lohonji yaye vonumbi* kuenje wa toma soma yo Isareli pokati ketokekelo liocikutu caye covivela. Omo liaco, soma wa sapuila ukuakuendisa ekãlu liaye liuyaki hati: “Ñualapo, njupe vuyaki,* momo nda lemẽhiwa calua.”+ 34 Uyaki wamamako vokuenda kueteke liaco liosi kuenda soma yo Isareli vo talamisa vekãlu liaye loku vandekela va Suria toke koñolosi; kuenje eye wa fa koku iñila kuekumbi.+

19 Noke Yehosafata Soma yo Yuda, wa tiukila ciwa*+ konjo* yaye ko Yerusalãi. 2 Yehu+ omõla a Hanani+ ukuavinjonde, wa tunda oku ka lisanga la Soma Yehosafata kuenje wo sapuila hati: “Anga hẽ o sukila oku kuatisa ondingaĩvi+ kuenda vana va suvuka Yehova ovo o sukila oku sola?+ Omo lioku ci linga, onyeño ya Yehova ya ku wengukila. 3 Pole, kokuove kua sangiwa ovina viwa,+ momo wa kundula olombueti vi kola* vofeka kuenda wa pongiya utima* wove oco o sande Suku yocili.”+

4 Yehosafata wamamako oku kala vo Yerusalãi kuenda wa tunda vali oco a ka nyule omanu oku upisa ko Beresieva toke kovaimbo a kasi kolomunda vio Efarimi.+ Eye wa vetiya omanu oku tiuka oco va fendele Yehova Suku ya vakukululu yavo.+ 5 Eye wa nõlavo olonganji vofeka, kalupale osi a kuete oviteyuilo o Yuda okuti, olupale lolupale.+ 6 Kuenje eye wa sapuila olonganji hati: “Kapiko ovina vu kasi oku linga, momo ene vu sombisila vonduko ya Yehova kuenda ka vu ci lingila vonduko yomunu kuenje eye o kasi lene eci vu sombisa.+ 7 Kuateli Yehova usumba.+ Kuati utate kovina vu linga, momo, ku Yehova Suku yetu ka kuli ekambo liesunga,+ ndaño ocame+ ale oku tambula ovitukiko.”+

8 Yehosafata wa nõlavo vo Yerusalãi va Lewi vamue lovitunda kuenda asongui vamue volonjo via va isia via va Isareli oco va vumbe ndolonganji via Yehova kuenda oco va tetuluile ovitangi violonungi vio Yerusalãi.+ 9 Kuenje eye wa va handeleka hati: “Eci oco vu sukila oku linga poku kuatela usumba Yehova lekolelo kuenda lutima wosi: 10 Olonjanja viosi eci vamanjene va kasi valupale akuavo va nena ocitangi cimue mua kongela oku pesela osonde+ ale epulilo limue liatiamẽla kocihandeleko cimue, ocikundi, oviholo ale asombiso, vu sukila oku va lungula oco ka va ka kuate eko kovaso a Yehova; nda hacoko, onyeño yaye yu ku wengukili kumue la vamanjene. Eci oco vu sukila oku linga oco ka vu ka kuati eko. 11 Amariya ocitunda ca velapo una o kasi oku vu songuili kondaka yosi ya Yehova,+ o kasi palo. Sevadiya omõla a Isameli, eye usongui wonjo ya Yuda kondaka yosi yatiamẽla ku soma. Kuenje va Lewi va ka vumba nda vakesongo kokuene. Pami kuenda lingi upange wene lombili kuenda Yehova a kale la vana va linga eci ciwa.”*+

20 Noke va Moavi+ la va Amoni+ kumue la vamue pokati ka va Amonimi,* veya oco va liyake la Yehosafata. 2 Omo liaco, Yehosafata vo sapuila vati: “Owiñi walua wa tunda vimbo liokalunga* lo ko Edome,+ weya oku ku katukila kuenda u kasi ale ko Hasasoni-Tamare okuti, o Engedi.”+ 3 Omo liovina viaco, Yehosafata wa kuata usumba kuenje wa nõlapo* oku sanda Yehova.+ Omo liaco, eye wa handeleka o Yuda yosi oku likandangiya oku lia. 4 Omanu vo vo Yuda va liongolola oco va kũlĩhĩse Yehova;+ ovo va tunda kalupale osi o Yuda, oco va kũlĩhĩse Yehova.

5 Noke Yehosafata wa talama vekongelo lio Yuda kuenda lio Yerusalãi vonjo ya Yehova kovaso yocitali cokaliye, 6 kuenje wa popia hati:

“A Yehova Suku ya vakukululu yetu, haveko hẽ Suku kovailu;+ ku kuete hẽ omoko yoku viala ovosoma osi olofeka?+ Peka liove pali unene, lupami kuenda lomue o tẽla oku tamalãla love.+ 7 A Suku yetu, kua tundisile hẽ olonungi viofeka yilo kovaso yomanu vove va Isareli loku yeca ndocipiñalo ka ci pui kocitumbulukila* cekamba liove Avirahama?+ 8 Ovo va kalamo kuenda va tungilamo ocitumãlo cimue ci kola conduko yove,+ poku popia vati: 9 ‘Nda eyambulo liya kokuetu, ci kaile losipata, lekangiso, lefengi ale lonjala, tu sukila oku talama kovaso yonjo yilo kuenda kovaso yove (momo onduko yove yi kasi vonjo yilo)+ kuenda vohali yetu, tu sukila oku kaluka kokuove oku pinga ekuatiso kuenje ove o sukila oku yevelela loku tu popela.’+ 10 Alume va Amoni, va Moavi kuenda vo kovaimbo a kasi kolomunda vio Seire+ okuti, vo kolofeka vina kua ecelele okuti, va Isareli va vi katukila eci ovo va tunda kofeka Yegito, va kasi palo. Va Isareli va pambuka kokuavo kuenda ka va va kunduile.+ 11 Kaliye ovo va kasi oku tu ĩha onima, poku iya oku tu tundisa vofeka yove yina wa tu ĩha ndocipiñalo cimue.+ 12 A Suku yetu, anga hẽ ku ka va yambula?+ Momo ka tu kuete ongusu kovaso yowiñi owu walua una u kasi oku iya oco u tu katukile; kuenda ka tua kũlĩhĩle eci tu sukila oku linga,+ pole, tua imba ovaso kokuove.”+

13 Vepuluvi liaco, omanu vosi vo ko Yuda va kala oku talama kovaso a Yehova kumue lakãi vavo, lomãla vavo oku kongelamo vatito.

14 Kuenje vokati kekongelo, espiritu lia Yehova lia wila Yahasiele omõla a Sakariya, omõla a Benaya, omõla a Yeyele, omõla a Mataniya u Lewi, umue pokati kovitumbulukila via Asafe. 15 Eye wa popia hati: “Ene a Yuda yosi lene alonungi vio Yerusalãi la Soma Yehosafata yeveleli! Eci oco Yehova o sapuili hati: ‘Ko ka kuati usumba ale oku yokoka omo liowiñi owu walua, momo uyaki haweneko, pole, wa Suku.+ 16 Hẽla lokili kokuavo oku va katukila. Ovo va ka lamanela kekungu lia Sisi kuenda u ka va sanga kesulilo liocimbota* kovaso yekalasoko lio Yeruele. 17 Ka vu ka sukila oku yaka vocilunga eci. Kuendiko, talami ño+ kuenda tali epopelo lia Yehova lioku vu kuatisi.*+ A Yuda love a Yerusalãi, ko ka kuati usumba ale oku yokoka.+ Hẽla vu tunda oku va katukila kuenda Yehova o ka kala lene.’”+

18 Vepuluvi liaco, Yehosafata wa petamisa ocipala caye posi kuenda o Yuda yosi lolonungi vio Yerusalãi, va kekamẽla posi kovaso a Yehova oco va fendele Yehova. 19 Kuenje va Lewi vana va kala ovitumbulukila via va Kohata+ kuenda via va Kora, va votoka oco va sivaye Yehova Suku ya Isareli londaka yolukandi.+

20 Ovo va katuka selo komẽle ya kuamamo kuenje va enda vekalasoko lio Tekoa.+ Osimbu va kala loku tunda, Yehosafata wa talama loku popia hati: “A Yuda lene alonungi vio Yerusalãi, njeveleli! Koleli Yehova Suku yene oco vu tẽli oku talama ngo.* Koleli kovaprofeto vaye+ kuenje vu ka litunda ciwa.”

21 Noke yoku kũlĩhĩsa omanu, wa nõla alume oco va imbile+ Yehova ovisungo kuenda oku eca esivayo lovowalo a kola osimbu va kala oku endela kovaso yalume va limalẽhela uyaki poku popia vati: “Eci olopandu ku Yehova, momo ocisola caye ka ci pongoloka ci kala otembo ka yi pui.”+

22 Eci va fetika oku imba lesanju ovisungo viesivayo, Yehova wa kapa vamue oco va lavekele vonutula alume va Amoni, va Moavi kuenda vo kovaimbo a kasi kolomunda vio Seire, vana va kala oku katukila o Yuda kuenje va liponda pokati.+ 23 Noke va Amoni la va Moavi va ñualelapo olonungi vio kovaimbo a kasi kolomunda vio Seire+ oco va vi kundule loku vi nyõla; kuenje eci va mala oku ci linga lolonungi vio Seire, ovo va likuatisa oku liponda pokati omunu lukuavo.+

24 Pole, eci va Yuda veya kutala wondavululi wo vekalasoko+ kuenje va vanja kowiñi, ovo va mola ovivimbi viavo okuti, via kupukila posi;+ ka kua kaile u wa supapo lomuenyo. 25 Omo liaco, Yehosafata kumue lomanu vaye veya oco va ambate ovikuata viavo kuenda ovo va sanga pokati kavo ovina vialua viwa, uwalo kuenda ovikuata via fina vina vopa kokuavo toke eci ka va tẽlele vali oku vi ambata.+ Ovo vambata ovina via pundiwa vokuenda kuoloneke vitatu momo via luile calua. 26 Keteke liakuãla, va liongoluila Vocimbota* co Beraka, momo kocitumãlo caco va sivayelako* Yehova. Eli olio esunga lieci va lukila ocitumãlo caco okuti, Ocimbota co Beraka*+ toke etaili.

27 Noke alume vosi vo Yuda kuenda vo Yerusalãi kumue la Yehosafata una wa kala kovaso yavo, va tiukila ko Yerusalãi lesanju, momo Yehova wa va muisa esanju omo okuti, ovanyãli vavo va yuliwa.+ 28 Omo liaco, va iñila vo Yerusalãi lovikuata viovisikilo via pangiwa lovikolo, olohalupa+ kuenda alumbeta+ kuenje va enda konjo ya Yehova.+ 29 Ovosoma osi olofeka, a kuatela usumba Suku eci va yeva okuti, Yehova wa yaka lovanyãli va Isareli.+ 30 Omo liaco, usoma wa Yehosafata wa kuata ombembua kuenda Suku yaye wamamako oku eca epuyuko kokuaye kolonele viosi.+

31 Kuenje Yehosafata wamamako oku viala vo Yuda. Eye wa kuata 35 kanyamo eci a linga osoma kuenda wa viala 25 kanyamo vo Yerusalãi. Onduko ya inaye ya kala Asuva omõla ukãi wa Silihi.+ 32 Eye wamamako oku endela vonjila ya isiaye Asa.+ Eye ka pambukilemo kuenda wa linga ovina viosi via sunguluka kovaso a Yehova.+ 33 Pole, ovitumãlo via lepa ka via nyõliwile+ kuenda omanu handi ka va pongiyile utima wavo oco va sande Suku ya vakukululu yavo.+

34 Catiamẽla konepa yikuavo yulandu womuenyo wa Yehosafata, oku upisa kefetikilo toke kesulilo, wa sonehiwa pokati kolondaka via Yehu+ omõla a Hanani+ vina via kongeliwa Velivulu Liolosoma vio Isareli. 35 Noke liovina viaco, Yehosafata Soma yo Yuda wa linga ukamba la Soma Ahasiya wo ko Isareli, una wa enda oku linga eci cĩvi.+ 36 Omo liaco, eye wa linga ekamba liaye poku panga olonaviyu oco vi ende ko Tarsisi+ kuenda va pangele olonaviyu viaco ko Eciongevere.+ 37 Pole, Eliyesere omõla a Dodawa wo ko Maresia wa imba owanji watiamẽla ku Yehosafata hati: “Omo okuti ove wa linga ukamba la Ahasiya, Yehova o ka kundula ovopange ove.”+ Omo liaco, olonaviyu via nyõliwa+ kuenda ka via tẽlele oku enda ko Tarsisi.

21 Noke Yehosafata wa ka puyuka la vakukululu yaye kuenda wa kendiwa la vakukululu yaye Volupale lua Daviti; kuenje omõlaye Yehorama wa linga osoma pomangu yaye.+ 2 Vamanjaye okuti, omãla va Yehosafata va kala Asariya, Yehiyele, Sakariya, Asariya, Mingeli kuenda Sefatiya; vosi ava va kala omãla va Yehosafata Soma yo Isareli. 3 Isiavo wa ecele kokuavo olombanjaile vialua viopalata kuenda viulu lovina via velapo kumue lalupale a kuete oviteyuilo ko Yuda;+ pole, eye wa eca usoma ku Yehorama+ momo eye wa kala uveli.

4 Eci Yehorama a tambula omoko yusoma wa isiaye, eye wa pamisa omangu yaye poku ponda losipata vamanjaye vosi+ kumue lolombuale vimue vio Isareli. 5 Yehorama wa kuatele 32 kanyamo eci a linga osoma kuenda wa viala anyamo ecelãla vo Yerusalãi.+ 6 Eye wa endaila vonjila yolosoma vio Isareli+ ndeci vakuanjo ya Ahava va lingaile, momo eye wa kuelele omõla ukãi wa Ahava;+ kuenda eye wamamako oku linga eci cĩvi kovaso a Yehova. 7 Pole, Yehova ka yonguile oku nenela ekundu onjo ya Daviti omo liocisila a lingile la Daviti,+ momo wa likuminyile oku eca ondiyelo yimue kokuaye kuenda komãla vaye otembo yosi.+

8 Koloneke viaye, o Edome ya ñualelapo o Yuda+ kuenje ya tumbika osoma yalio muẽle.+ 9 Omo liaco, Yehorama lasongui vaye va endako kumue lakãlu aye osi kuenje eye wa katuka luteke kuenda wa yula va Edome vana vo ñualele ocingonja, eye kumue lasongui vakãlu. 10 Pole, o Edome yamamako oku ñualelapo o Yuda toke etaili. Kotembo yaco, o Livina+ ya yi ñualelapovo, momo eye wa yandulukile Yehova Suku ya vakukululu yaye.+ 11 Eye wa pangelevo ovitumãlo via lepa+ volomunda vio Yuda oco a kokele olonungi vio Yerusalãi oku linga upuepue konepa yespiritu kuenje wa yapuisa o Yuda.

12 Noke esapulo limue lia sonehiwa okuti, lia tunda ku Eliya uprofeto,+ lia pitĩla kokuaye liti: “Ca popia Yehova Suku ya Daviti kukululu yove ceci hati: ‘Ove kua endelele volonjila via isiove Yehosafata+ ale volonjila via Soma Asa+ wo ko Yuda. 13 Pole, ove wa siata oku endela vonjila yolosoma vio Isareli+ kuenda wa siata oku kokela o Yuda kumue lolonungi vio Yerusalãi oku linga upuepue konepa yespiritu+ ndupuepue wonjo ya Ahava+ kuenda vali, ove wa ponda vamanjove muẽle+ vakuanjo ya isiove vana va velelepo okuti, ove o sule. 14 Omo liaco, Yehova o kasi oku nena efengi limue linene komanu vove, komãla vove, kakãi vove kuenda kovina viosi o kuete. 15 Ove o ka tala ohali lovovei alua oku kongelamo uvei umue wo vovãla okuti, eteke leteke u ka livokiya toke eci ovãla ove a tundila posamua omo liuvei waco.’”

16 Noke Yehova wa vetiya+ va Filisiti*+ la va Arabia+ vana va kala ocipepi la va Etiopia, oco va katukile Yehorama. 17 Ovo va katukila o Yuda, va iñila lundululu vofeka kuenda va tambula ovina viosi va sanga vonjo* ya soma+ kumue lomãla vaye kuenda akãi vaye; kuenje pa supa lika Yehoahasi*+ okuti, eye omõlaye umalẽhe. 18 Noke liovina viosi evi, Yehova wo veta luveyi umue ka u kuete esaku vovãla aye.+ 19 Noke liotembo yimue, eci pa pita anyamo avali, ovãla aye a tunda, omo liuveyi waye kuenda eye wa fa osimbu a kala oku tala ohali yalua omo liuveyi waye; kuenje omanu vaye ka va taimisile ondalu yimue yoku lekisa esumbilo kokuaye ndeci va lingila vakukululu yaye.+ 20 Eye wa kuatele 32 kanyamo eci a linga osoma kuenda wa viala eci ci soka anyamo ecelãla vo Yerusalãi. Lomue wa lila eci eye a fa. Omo liaco, vo kenda Volupale lua Daviti,+ pole, ka kendiwile vayambo olosoma.+

22 Noke olonungi vio Yerusalãi via lingisa Ahasiya omõla umalẽhe wa Yehorama osoma pomangu yaye, momo ocimunga covingumba cina ceyile la va Arabia kocilombo, ca ponda omãla vosi akulu.+ Omo liaco, Ahasiya omõla a Yehorama wa fetika oku viala o Yuda.+ 2 Ahasiya wa kuatele 22 kanyamo eci a linga osoma kuenda wa viala unyamo umosi vo Yerusalãi. Onduko ya inaye ya kala Ataliya,+ onekulu* ya Omiri.+

3 Eye wa endelavo volonjila vionjo ya Ahava,+ momo inaye wa linga ondunguli yaye koku linga eci cĩvi. 4 Eye wamamako oku linga eci cĩvi kovaso a Yehova, ndeci onjo ya Ahava ya linga, momo ovo va linga olondunguli viaye noke yolofa via isiaye oco cu nenele ekundu. 5 Eye wa kuama elungulo liavo kuenje wa enda la Yehorama omõla wa Soma Ahava wo ko Isareli, oco va liyake la Soma Hasahele+ wo ko Suria ko Ramote-Gileada+ kuna vakualohonji va lemẽhela Yehorama. 6 Eye wa tiukila ko Yesirele+ oco a kayise apute aye ana vo lemẽhele ko Rama eci a liyaka la Soma Hasahele wo ko Suria.+

Ahasiya* omõla a Yehorama+ soma yo Yuda wa lokila ko Yesirele oco a nyule Yehorama+ omõla a Ahava, momo eye wa lemẽhiwile.*+ 7 Pole, Suku wa nena eyambulo ku Ahasiya eci eye a enda oku ka nyula Yehorama; kuenje eci a pitĩla, wa tunda la Yehorama oco va lisange la Yehu+ onekulu* ya Nimisi una Yehova a nõlele oco a kundule* onjo ya Ahava.+ 8 Eci Yehu a fetika oku lingila esombiso onjo ya Ahava, eye wa sanga olombuale vio Yuda kuenda omãla va vamanji va Ahasiya oloñuatisi via Ahasiya kuenje wa va ponda.+ 9 Noke eye wa tuma omanu oco va sandiliye Ahasiya; ovo vo kuatela ko Samaria kocitumãlo a salamele kuenje vo nena ku Yehu. Ovo vo ponda kuenda vo kenda+ momo va popia vati: “Eye onekulu ya Yehosafata una wa sanda Yehova lutima waye wosi.”+ Ka kua kaile vali layumue ukuanjo ya Ahasiya wa kuata unene woku viala usoma.

10 Eci Ataliya+ ina ya Ahasiya a mola okuti omõlaye wa fa, wa votoka kuenda wa kundula ocikoti cosi cusoma* wonjo ya Yuda.+ 11 Pole, Yehoasiaveata omõla ukãi wa soma wa tikula Yoasi+ omõla a Ahasiya kuenda wo upa pokati komãla va soma vana va laikele oku pondiwa kuenje wo kapa vohondo yimue yo vokati kumue lukãi ukuakutata omõla. Yehoasiaveata omõla ukãi wa Soma Yehorama+ (eye wa kala ukãi wa Yehoyada+ ocitunda haeye manji ukãi a Ahasiya) wa linga cosi citava oco o vundise kovaso a Ataliya kuenje ko pondele.+ 12 Eye wa kala kumue lavo anyamo epandu okuti, vo salamisa vonjo ya Suku yocili, osimbu Ataliya a kala oku viala ofeka.

23 Kunyamo wepanduvali, Yehoyada wa lekisa utõi kuenda wa linga ocisila cimue lasongui vocita+ okuti, Asariya omõla a Yerohama, Isameli omõla a Yehohanana, Asariya omõla a Ovede, Maaseya omõla a Adaya kuenda Elisiafata omõla a Sikiri. 2 Noke ovo va enda ko Yuda kuenje vongolola va Lewi+ vo kalupale osi o Yuda kuenda asongui volonjo via va isia a Isareli. Eci va pitĩla vo Yerusalãi, 3 ekongelo liosi lia linga ocisila cimue+ la soma vonjo ya Suku yocili kuenje Yehoyada wa va sapuila hati:

“Tali! Omõla a soma o ka viala ndeci Yehova a likuminyile catiamẽla komãla va Daviti.+ 4 Eci vu linga ceci: Vu sukila oku tepa ovitunda la va Lewi vana va ka kala kupange+ Kesambata vovimunga vitatu. Ocimunga cimue ci ka kala vakualombundi;+ 5 ocimunga cikuavo ci ka kala vonjo* ya soma+ kuenda ocimunga cikuavo ci ka kala Pombundi Yociseveto kuenda omanu vosi va ka kala vovitali vionjo ya Yehova.+ 6 Ko ka eceleli laumue oku iñila vonjo ya Yehova te lika ovitunda la va Lewi vana va kasi oku linga upange.+ Ovo citava okuti va iñila, momo ocimunga cimue ci kola kuenda omanu vosi va ka tẽlisa ocikele cavo ku Yehova. 7 Va Lewi va sukila oku ñuala soma kolonele viosi, omunu lomunu lovimalẽho viaye viuyaki peka. Omunu wosi iñila vonjo o pondiwa. Kali kumue la soma kuosi eye a enda.”*

8 Va Lewi kuenda o Yuda yosi, va linga ndeci Yehoyada ocitunda a handelekele. Omo liaco, omunu lomunu wambata alume vaye vana va kala kupange Kesambata kumue la vana ka va kaile kupange Kesambata,+ momo Yehoyada ocitunda, ka ecelele okuti va liwekapo+ kupange wavo. 9 Noke Yehoyada ocitunda wa eca kasongui vocita+ olonjelia loviyepelo vitito,* loviyepelo vinene vina via tiamẽlele ku Soma Daviti+ okuti, via kala vonjo ya Suku yocili.+ 10 Noke eye wa talamisa omanu vosi, omunu lomunu locimalẽho* caye cuyaki peka, oku upisa konele yondio yonjo toke konele yepĩli yonjo okuti, va kala ocipepi lutala kuenda ocipepi lonjo kuenje vosi va ñuala soma. 11 Noke ovo va nena posamua omõla a soma,+ vo kapa ekolowa kuenda Uvangi*+ kuenje vo lingisa osoma kuenda Yehoyada lomãla vaye vo waveka. Noke va popia vati: “Soma a kale hũ lomuenyo!”+

12 Eci Ataliya a yeva onjuela yomanu va kala oku lupuka, loku sivaya soma, vepuluvi liaco, eye weya komanu va kala vonjo ya Yehova.+ 13 Noke, eye wa mola okuti, soma o tãi ocipepi longunji* puvelo. Olombuale+ la vakuakusika alumbeta va kala la soma kuenda omanu vosi vo vofeka va kala lesanju+ loku sika alumbeta kuenda olonjimbi vina via kala lovikuata viovisikilo via kala oku songuila ocipito. Omo liaco, Ataliya wa tola uwalo waye kuenje wa kaluka lolukandi hati: “Eci usuanji! Eci usuanji!” 14 Pole, Yehoyada ocitunda wa handeleka asongui vocita, vana va nõliwila oku songuila olohoka kuenje wa va sapuila hati: “Upi ukãi u pokati kovilala kuenda nda umue wo kuama, pondi omunu waco losipata!” Momo ocitunda ca popele hati: “Ko ka pondeli ukãi waco vonjo ya Yehova.” 15 Omo liaco, va kuata ukãi waco kuenje eci a neniwa puvelo Wombundi Yolokavalu yonjo* ya soma, vepuluvi liaco vo pondela pocitumãlo caco.

16 Noke Yehoyada wa lisila eye muẽle ocisila cimue kumue lomanu vosi kuenda soma okuti, va kamamako oku kala omanu va Yehova.+ 17 Noke omanu vosi va enda konjo* ya Baale kuenje va yi nyõla+ kuenda va nyanyõla ovotala aye, loviñumañuma viaye+ kuenda va ponda Matana ocitunda ca Baale+ kovaso yovotala. 18 Noke Yehoyada wa eca ocikele coku tata onjo ya Yehova povaka ovitunda la va Lewi, vana Daviti a sokiyile vovimunga oco va tate onjo ya Yehova loku eca ovilumba vioku pia elisi via Yehova+ ndeci ca sonehiwa Vocihandeleko ca Mose+ okuti, va ci linga lesanju kuenda lovisungo ndomo ca handelekiwile* la Daviti. 19 Eye wa kapavo vakualombundi+ polombundi vionjo ya Yehova oco okuti, omunu wosi wa vĩhisiwa ka citava okuti, iñilamo. 20 Noke wongolola asongui vocita,+ olombuale, olombiali viomanu kuenda omanu vosi vo vofeka kuenje va tunda konjo ya Yehova kumue la soma. Kuenje ovo va pita pombundi yo konano oku endela konjo* ya soma kuenda va tumãlisa soma kocalo+ cusoma.+ 21 Omo liaco, omanu vosi vofeka va sanjukile kuenda olupale lua kuata ombembua, momo ovo va ponda Ataliya losipata.

24 Yoasi wa kuata anyamo epanduvali eci a linga osoma+ kuenda wa viala 40 kanyamo vo Yerusalãi. Onduko ya inaye ya kala Siviya wo ko Beresieva.+ 2 Yoasi wamamako oku linga eci ca sunguluka kovaso a Yehova vokuenda kuoloneke viosi via Yehoyada ocitunda.+ 3 Yehoyada wo nõlela akãi vavali kuenda eye wa linga isia yomãla valume lomãla vakãi.

4 Noke Yoasi wa kuata onjongole yo vutima yoku semũlũla onjo ya Yehova.+ 5 Eye wongoluila pamosi ovitunda la va Lewi kuenda wa va sapuila hati: “Kuendi valupale o Yuda kuenda ongololi olombongo vio Isareli yosi oco ku semũlũiwe onjo ya Suku yene+ unyamo lunyamo; kuenje catiamẽla kondaka eyi, ene vu sukila oku ci linga lonjanga.” Pole, va Lewi ka va ci lingile lonjanga.+ 6 Omo liaco, soma wa kovonga Yehoyada usongui kuenda wo sapuila hati:+ “Momo lie kua kisikilile va Lewi oco va nene oku upisa ko Yuda lo ko Yerusalãi elisimu li kola lia handelekiwile la Mose+ ukuenje wa Yehova, elisimu li kola liekongelo lio Isareli oco li linge liombalaka Yuvangi?+ 7 Momo, omãla va Ataliya+ ukãi una ondingaĩvi, va iñila lundululu vonjo ya Suku yocili+ kuenje va talavaya lovina viosi vi kola vionjo ya Yehova kefendelo lia va Baale.” 8 Kuenje, locihandeleko ca soma, va panga ocikasia+ coku kapa olombongo kuenda va ci kapa posamua, pombundi yonjo ya Yehova.+ 9 Noke liovina viaco, kua lingiwa esapulo limue ko Yuda lo ko Yerusalãi yosi oco va nene ku Yehova elisimu li kola+ lina Mose ukuenje wa Suku yocili a tumbikilile o Isareli vekalasoko. 10 Olombuale viosi kumue lomanu vosi va kuata esanju+ kuenda vamamako oku nena olombanjaile loku vi kapa vocikasia toke eci oco ceyuka.*

11 Olonjanja viosi eci va Lewi va nena ocikasia coku kapa olombongo oco ceciwe ku soma, leci va mola okuti mua kala olombongo vialua, usonehi wa soma loñuatisi yocitunda cinene, va enda oku iya loku upa olombongo vocikasia caco+ noke va enda oku ci kapa vali pocitumãlo ca kala. Eci oco ovo va enda oku linga eteke leteke kuenda va enda oku ongolola olombongo vialua. 12 Noke soma la Yehoyada va ecaeca olombongo viaco ku vana va kala oku songuila upange wonjo ya Yehova kuenda ovo va enda oku pañinya vakuakuteta ovawe kuenda olomesele oco va semũlũle onjo ya Yehova.+ Handi vali, va pañinyavo olonalavayi viupange wutale kuenda wosipi oco va semũlũle onjo ya Yehova. 13 Vana va kala oku songuila upange, va fetika upange kuenje upange woku semũlũla wamamako osimbu ovo va kala oku songuila kuenda ovo va semũlũla onjo ya Suku yocili ndeci ya kala kosimbu loku yi pamisa. 14 Eci ovo va mala, va nena ku soma kuenda ku Yehoyada olombongo vina via supapo kuenje ovo va talavaya lavio oco va pange ovikuata vionjo ya Yehova, ovikuata vioku vumba levi vioku eca ovilumba, olokopo kuenda ovikuata viulu levi viopalata.+ Ovo va enda oku eca ovilumba vioku pia elisi+ vonjo ya Yehova olonjanja viosi vokuenda kuoloneke viosi via Yehoyada.

15 Eci Yehoyada a kuka loku sanjukila anyamo, wa fa; Eye wa kuata 130 kanyamo eci a fa. 16 Omo liaco, vo kenda Volupale lua Daviti kumue lolosoma,+ momo eye wa linga eci ciwa vo Isareli+ catiamẽla ku Suku yocili kuenda konjo Yaye.

17 Noke yolofa via Yehoyada, olombuale vio Yuda vieya kuenda via kekamẽla soma kuenje soma wa vi yevelela. 18 Ovo va siapo onjo ya Yehova Suku ya vakukululu yavo kuenda va fetika oku vumba olombueti vi kola* loviteka. Omo liaco, onyeño ya Suku ya wengukila* o Yuda lo Yerusalãi omo liekandu liavo. 19 Eye wamamako oku tuma ovaprofeto pokati kavo oco va va nene vali ku Yehova kuenda ovo vamamako oku va lungula, pole, ovo va likala oku yevelela.+

20 Espiritu lia Suku, lia wila* Sakariya omõla a Yehoyada+ ocitunda kuenje eye wa talama pocitumãlo ca lepa okuti, apa omanu va kala ci sule kuenje wa va sapuila hati: “Ca popia Suku yocili ceci hati: ‘Momo lie ene vu kasilili oku sinĩla ovihandeleko via Yehova? Ene ka vu ka litunda ciwa! Omo okuti wa yanduluki Yehova, eye o ko yandulukivo.’”+ 21 Pole, ovo vo lingila usuanji+ kuenje vo sõsõla lovawe vocitali conjo ya Yehova+ ndomo soma a ci handeleka. 22 Omo liaco, soma Yoasi ka ivalukile ocisola ka ci pongoloka cina isiaye* Yehoyada a lekisile kokuaye kuenda wa ponda omõlaye una okuti, osimbu a kala loku fa wa popia hati: “Yehova a ku kangise omo liovina wa linga.”+

23 Kefetikilo liunyamo, olohoka vio ko Suria via katukila Yoasi kuenda via lundula o Yuda lo Yerusalãi.+ Noke via ponda olombuale viosi+ viomanu kuenje via tuma ovina viosi va punda ku soma yo Damasko. 24 Ndaño okuti olohoka vio ko Suria via kala letendelo litito lialume, pole, Yehova wa eca peka liavo olohoka vimue via kuatele etendelo lialua lialume,+ momo ovo va yanduluka Yehova Suku ya vakukululu yavo; omo liaco, ovo* va linga esombiso ku Yoasi. 25 Eci va tunda kokuaye (omo ovo vo sia okuti, wa lemẽhiwa* calua), akuenje vaye muẽle vo lingila usuanji momo eye wa pesela osonde yomãla* va Yehoyada+ ocitunda. Ovo vo pondela pula waye muẽle.+ Omo liaco, eye wa fa kuenje ovo vo kenda Volupale lua Daviti,+ pole, ka kendiwile vayambo olosoma.+

26 Ava vo lingila usuanji+ vava: Savada omõla a Simeata ukãi u Amoni kuenda Yehosavada omõla a Simiriti ukãi u Moavi. 27 Ovina viosi viatiamẽla komãla vaye lasapulo alua atiamẽla kokuaye+ kuenda oku semũlũiwa* kuonjo ya Suku yocili,+ via kongeliwa vovisonehua* Vielivulu Liolosoma. Kuenje omõlaye Amasiya wa linga osoma pomangu yaye.

25 Amasiya wa kuata 25 kanyamo eci a linga osoma kuenda wa viala 29 kanyamo vo Yerusalãi. Onduko ya inaye ya kala Yehoadana wo ko Yerusalãi.+ 2 Eye wamamako oku linga eci ca sunguluka kovaso a Yehova, pole, ka ci lingile lutima wosi. 3 Eci usoma wa pama vemẽhi liuviali waye, eye wa ponda akuenje vaye vana va pondele isiaye, soma.+ 4 Pole, eye ka pondele omãla vavo, momo eye wa linga ndeci ci likuata leci ca sonehiwa Vocihandeleko, velivulu lia Mose muna Yehova a handeleka hati: “Olonjali ka vi ka fe omo liomãla vavo kuenda omãla ka va ka fe omo liolonjali viavo; pole, omunu lomunu o sesamẽla oku fa omo liekandu liaye muẽle.”+

5 Kuenje Amasiya wongoluila pamosi o Yuda kuenda wa va talamisa ndomo ci likuata lolonjo via va isia kuenda ndomo ci likuata lasongui vohulukãi kuenda lasongui vocita. Wa linga ovina viaco lo Yuda yosi kuenda o Benjamini.+ Eye wa va sonehisa oku upisa ku vana va kuatele 20 kanyamo lava va pitahãlamo+ kuenje wa limbuka okuti, mua kala 300.000 kasualali va pindisiwa* oco va vumbe kolohoka okuti, va tẽla oku talavaya lonjelia kuenda lociyepelo cinene. 6 Handi vali, leci ci soka 100 kolotalendo* viopalata, eye wa pañinya ko Isareli 100.000 kasualali va pama. 7 Pole, ulume umue wa Suku yocili weya kokuaye loku popia hati: “A soma, ku ka ecelele okuti olohoka vio Isareli vi enda kumue love, momo Yehova ka kasi kumue lo Isareli,+ ka kasi lomunu laumue wa va Efarimi. 8 Pole, kuende ño ove, ci linga kuenda kuata utõi kuyaki. Nda kua ci lingile Suku yocili o ku kokela ocilondokua kovaso yunyãli umue, momo Suku, o kuete unene woku kuatisa+ kuenda woku koka ocilondokua.” 9 Omo liaco, Amasiya wa sapuila ulume wa Suku yocili hati: “Pole, nye ci popiwa catiamẽla 100 colotalendo vina ame nda eca kasualali va Isareli?” Ulume wa Suku yocili wo tambulula hati: “Yehova o tẽla oku eca kokuove ovina vialua okuti, eci ci sule.”+ 10 Omo liaco, Amasiya wa tiukilisa asualali veyile kokuaye vana va tundile ko Efarimi, poku va tuma kovitumãlo viavo. Pole, ovo va temẽle calua lo Yuda kuenje va tiukila kovitumãlo viavo lonyeño yalua.

11 Kuenje Amasiya wa lekisa utõi kuenje wa songuila asualali vaye muẽle toke Kocimbota Comongua+ kuenda wa ponda 10.000 kalume vo ko Seire.+ 12 Noke alume vo Yuda va kuata 10.000 kalume lomuenyo. Ovo va va nena toke kilu liesenje kuenda va va leñuila posi oku upisa kilu liesenje kuenje vosi yavo va nyanyõha. 13 Pole, alume va pangele onepa kasualali vana Amasiya a tiukilisa oco ka vo ko kuame kuyaki,+ va katukila alupale o Yuda oku upisa ko Samaria+ toke ko Betehorone;+ ovo va ponda 3.000 pokati kavo kuenda va tambula ovina vialua.

14 Pole, eci Amasiya a tiuka koku ponda va Edome, eye wa nena olosuku vialume vo ko Seire kuenda wa vi tumbika ndolosuku+ viaye kuenje wa fetika oku kekamẽla kovaso avo loku linga ovilumba vioku tuimisila owisi kokuavio. 15 Omo liaco, Yehova wa tema calua la Amasiya kuenje wa tuma uprofeto umue una wo sapuila hati: “Momo lie o kasilili oku kuama olosuku viomanu okuti, ka via tẽlele oku popela omanu vavo peka liove?”+ 16 Osimbu a kala oku vangula laye, soma wo sapuila hati: “Anga hẽ tua ku nõla oco o kale ondunguli ya soma?+ Liwekapo+ oku vangula! Nye o yonguila oku fa?” Noke uprofeto wa liwekapo oku vangula, pole, osimbu ka ci lingile, wa popia hati: “Nda kũlĩha okuti, Suku wa nõlapo oku ku kundula, momo ove wa linga ocina eci kuenda kua yevelele kelungulo liange.”+

17 Noke yoku kũlĩhĩsa olondunguli viaye, Soma Amasiya wo ko Yuda wa tumisa esapulo limue ku Yoasi omõla a Yehoahasi omõla a Yehu soma yo Isareli liti: “Enju, tu liyake pokati.”*+ 18 Soma Yoasi wo ko Isareli wa tuma esapulo eli ku soma Amasiya wo ko Yuda liti: “Ocikũla colosongo vo Levanone ca tuma esapulo limue kuti wosedru vo Levanone liti: ‘Eca omõlove ukãi oco a linge ukãi womõlange.’ Pole, ocinyama cimue covusenge co ko Levanone ca pita ocipepi laco kuenje ca kosa ocikũla colosongo. 19 Ove wa popia hati: ‘Tala! Ame nda kundula* o Edome.’+ Omo liaco, utima wove wa lekisa epela kuenda u yongola oku sivayiwa. Pole, cilo kala konjo* yove. Momo lie o li kokelela efengi loku kupuka poku nenela enyõleho o Yuda kumue love?”

20 Pole, Amasiya ka yevelele,+ momo ovina viaco via kala ocipango ca Suku yocili. Eye wa yonguile oku va eca peka liovanyãli vavo,+ omo lioku kuama olosuku vio Edome.+ 21 Omo liaco, Soma Yoasi wo ko Isareli wa enda kuenje eye kumue la Soma Amasiya wo ko Yuda va liyaka pokati ko Bete-Siemese+ yina ya tiamẽla ko Yuda. 22 Yuda wa yuliwa la Isareli kuenje omunu lomunu wa tilila konjo* yaye. 23 Soma Yoasi wo ko Isareli wa kuata Soma Amasiya wo ko Yuda omõla a Yoasi omõla a Yehoahasi* ko Bete-Siemese. Noke wo nena ko Yerusalãi kuenje wa linga epangu limue lia kuatele 400 kovikeya* vocimbaka co Yerusalãi, oku upisa Kombundi ya Efarimi+ toke Kevindi Liombundi.+ 24 Eye wopa ulu wosi lopalata kuenda ovikuata viosi via sangiwa vonjo ya Suku yocili la* Ovede-Edome kuenda vohondo yoku seleka ovokuasi vionjo* ya soma+ oku kongelamo olomandekua. Noke eye wa tiukila ko Samaria.

25 Amasiya+ omõla a Yoasi soma yo Yuda wa kala komuenyo ci soka 15 kanyamo noke liolofa via Yoasi+ omõla a Yehoahasi soma yo Isareli.+ 26 Catiamẽla konepa yikuavo yulandu womuenyo wa Amasiya oku upisa kefetikilo toke kesulilo, tala! ka wa sonehiwile hẽ Velivulu Liolosoma vio Yuda kuenda vio Isareli? 27 Tunde kotembo eci Amasiya a liwekapo oku kuama Yehova, ovo vo lingila usuanji+ vo Yerusalãi kuenda wa tilila ko Lakisi, pole, va tuma alume oku u landula toke ko Lakisi kuenje oko vo pondela. 28 Omo liaco, ovo vo wambatela kolokavalu poku u nena kuenje vo kenda kumue la vakukululu yaye volupale luo Yuda.

26 Omanu vosi vo ko Yuda va tikula Usiya+ una wa kuatele 16 kanyamo kuenje vo lingisa osoma pomangu ya isiaye Amasiya.+ 2 Eye wa tumbulula o Eloti+ kuenda wa yi tiula ko Yuda. Kotembo yaco, soma* wa kala ale oku puyuka la vakukululu yaye.+ 3 Usiya+ wa kuata 16 kanyamo eci a linga osoma kuenda wa viala 52 kanyamo vo Yerusalãi. Onduko ya inaye ya kala Yekoliya wo ko Yerusalãi.+ 4 Eye wamamako oku linga eci ca sunguluka kovaso a Yehova ndeci isiaye Amasiya a lingaile.+ 5 Kuenje eye wamamako oku sanda Suku koloneke via Sakariya, una wo longisa oku sumbila Suku yocili. Osimbu a kala oku sanda Yehova, Suku yocili wo sumũlũisa.+

6 Eye wa tunda kuenda wa liyaka la va Filisiti+ kuenje wa linga epangu limue vocimbaka co vo Gati,+ vocimbaka co vo Yavine+ kuenda kocimbaka co ko Asidode.+ Noke wa tunga alupale vocikanjo co Asidode kuenda pokati ka va Filisiti. 7 Suku yocili wamamako oku u kuatisa oku yula va Filisiti, la va Arabia,+ vana va kala ko Guru-Baale kuenda oku yula va Meunimi. 8 Va Amoni+ va fetika oku eca ulambu ku Usiya. Oluhimo luaye lua li sanduila toke Kegito, momo eye wa linga ukuonene calua. 9 Handi vali, Usiya wa tunga olosapalalo+ ko Yerusalãi ocipepi Lombundi Yevindi+ lo Kombundi Yocimbota+ kuenda Kongunji kuenje wa vi pamisa. 10 Noke eye wa tunga olosapalalo+ vekalasoko kuenda wa fẽla* ovisimo vialua (momo wa kuatele oviunda vialua); wa linga ovina vimuamue ko Sefela kuenda ketapi. Eye wa kuatele olongunja kuenda vakuakutata ayuva kolomunda lo ko Karimele, momo eye wa solele oku lima.

11 Handi vali, Usiya wa kuatele olohoka vimue via limalẽhela uyaki. Ovo va enda oku enda kovoyaki okuti, va lipongiya vovimunga. Ovo va tendiwile kuenda va sonehiwile+ la Yeyele usonehi+ kumue la Maaseya kesongo kuenje va kala oku songuiwa la Hananiya, umue pokati kolombuale via soma. 12 Etendelo liosi liasongui volonjo via va isia vana va kala oku songuila asualali vaco va pama, va kala 2.600. 13 Olohoka vina via kala oku songuiwa lavo via kala 307.500 kalume va lipongiyila oku enda kuyaki okuti, olohoka vimue via pama oco vi kuatise soma kunyãli.+ 14 Usiya wa malẽha olohoka viosi loviyepelo, lolonjelia,+ lovikoko, lovikutu viovivela,+ lolohonji kuenda lovawe apipili.+ 15 Handi vali, ko Yerusalãi eye wa panga olomakina viuyaki via sovuiwa lolomesele via loñolõha; ovo va vi kapa volosapalalo+ kuenda vavindi ovimbaka kuenje va ponduile oku asa olosongo kuenda ovawe anene. Omo liaco, oluhimo luaye lua li sanduila kolonepa viosi, momo eye wa kuatisiwa calua kuenje wa pama.

16 Pole, noke yoku pama, utima waye wa lekisa epela kuenje eye muẽle wa linenela ekundu kuenda eye wa lekisa ekambo liekolelo ku Yehova Suku yaye poku iñila vonembele ya Yehova, oco a timĩhile insensu kutala winsensu.+ 17 Vepuluvi liaco, Asariya ocitunda kuenda 80 kovitunda vikuavo via Yehova vakuotõi, vo landula. 18 Ovo va tamalãla la Soma Usiya kuenda vo sapuila vati: “Ka ca sungulukile kokuove a Usiya oku timĩhila Yehova insensu!+ Ovitunda ovio lika vi sesamẽla oku timĩha insensu, momo ovo ovitumbulukila via Arone+ vana va kolisiwa. Tunda vocitumãlo ci kola, momo ove wa lekisa ekambo liekolelo kuenda ku ka tambula ulamba u tunda ku Yehova Suku omo lieci wa linga.”

19 Pole, Usiya una wa kala lociyukilo peka liaye oco a timĩhe insensu, wa fungula;+ kuenje osimbu eye a kala oku funguila ovitunda, wa kuatiwa lovilundu+ pupolo waye kovaso yovitunda vonjo ya Yehova konẽle yutala winsensu. 20 Eci Asariya ocitunda ca velapo kumue lovitunda viosi via vanja kokuaye va mola okuti, eye wa kuatiwa lovilundu pupolo waye! Omo liaco, vo tundisa posamua kuenda eye muẽle wa yayulako oku tunda momo Yehova wo veta.

21 Soma Usiya wamamako oku kala lovilundu toke keteke liolofa viaye kuenda wamamako oku kala vonjo yimue yi likasilili omo lioku kala ukuavilundu,+ momo eye ka vo wecelele vali oku enda konjo ya Yehova. Omõlaye Yotama wa kala oku songuila onjo* ya soma loku sombisa omanu vofeka.+

22 Onepa yikuavo yulandu womuenyo wa Usiya oku upisa kefetikilo toke kesulilo, wa sonehiwa luprofeto Isaya+ omõla a Amose. 23 Noke Usiya wa ka puyuka la vakukululu yaye kuenda vo kenda kumue la vakukululu yaye, pole, vo kenda vepia limue lioku kendela liatiamẽla kolosoma, momo ovo va popia vati: “Eye ukuavilundu.” Kuenje omõlaye Yotama+ wa linga osoma pomangu yaye.

27 Yotama+ wa kuata 25 kanyamo eci a linga osoma kuenda wa viala 16 kanyamo vo Yerusalãi. Onduko ya inaye ya kala Yerusia omõla ukãi wa Sadoke.+ 2 Eye wamamako oku linga eci ca sunguluka kovaso a Yehova ndeci isiaye Usiya a lingile.+ Pole, eye ka lipilikilile oku iñila vonembele ya Yehova+ ndeci isiaye a lingile. Haimo lumue, omanu handi va kala oku linga eci cĩvi. 3 Eye wa tunga ombundi yo konano yonjo ya Yehova+ kuenda wa linga upange walua woku tunga vocimbaka co Ofele.+ 4 Eye wa tungavo alupale+ kovaimbo a kasi kolomunda vio Yuda+ kuenda wa tunga ovitumãlo vi kuete oviteyuilo+ lolosapalalo+ vocitumãlo ca pulika loviti. 5 Eye wa linga uyaki la soma ya va Amoni+ kuenda vali, wa va yula. Omo liaco, kunyamo waco, va Amoni va eca kokuaye 100 kolotalendo* viopalata, 10.000 kolokoru* viotiliku kuenda 10.000 kolokoru viosevata. Va Amoni va fetavo ovina viaco kokuaye kunyamo wavali kuenda watatu.+ 6 Omo liaco, Yotama wamamako oku pama momo eye wa tumbika* olonjila viaye kovaso a Yehova Suku yaye.

7 Catiamẽla konepa yikuavo yulandu womuenyo wa Yotama, ovoyaki aye osi lolonjila viaye, via sonehiwa Velivulu Liolosoma vio Isareli kuenda vio Yuda.+ 8 Eye wa kuata 25 kanyamo eci a linga osoma kuenda wa viala 16 kanyamo vo Yerusalãi.+ 9 Noke Yotama wa ka puyuka la vakukululu yaye kuenda vo kenda Volupale lua Daviti.+ Kuenje omõlaye Ahasi wa linga osoma pomangu yaye.+

28 Ahasi+ wa kuata 20 kanyamo eci a linga osoma kuenda wa viala 16 kanyamo vo Yerusalãi. Eye ka lingile eci ca sunguluka kovaso a Yehova ndeci Daviti kukululu yaye a lingile.+ 2 Pole, eye wa endaila volonjila violosoma vio Isareli+ kuenda wa panga oviñumañuma viutale+ via va Baale. 3 Handi vali, eye wa lumba ocilumba cowisi Vocimbota Comõla a Hinome* kuenda wa yoka omãla vaye vondalu+ poku kuama ovilinga viumbondo violofeka+ vina Yehova a tundisile kovaso a va Isareli. 4 Handi vali, wamamako oku eca ovilumba loku tuimisila owisi wovilumba kovitumãlo via lepa,+ koviwulu kuenda vemẽhi liuti wosi wa pulika.+

5 Omo liaco, Yehova Suku yaye wo weca peka lia soma yo Suria+ kuenje ovo vo yula kuenda vambata entendelo lialua liolomandekua kuenje va vi nena ko Damasko.+ Eye wa eciwavo peka lia soma yo Isareli, una wo kangisa lekundu limue linene. 6 Veteke limosi, Peka+ omõla a Remaliya, wa ponda ko Yuda 120.000 kalume okuti, vosi yavo alume vakuotõi, momo ovo va yandulukile Yehova Suku ya vakukululu yavo.+ 7 Kuenje Sikiri esualali limue u Efarimi, wa ponda Maaseya omõla a soma la Asirikama una wa kala kalei kelombe* kuenda Elikana una wa kala omunu wavali noke lia soma. 8 Handi vali, va Isareli vambata pokati ka vamanjavo ci soka 200.000 kumandekua okuti, akãi, lomãla valume kuenda omãla vakãi; va tambulavo etendelo lialua liovina via pundiwa kuenda vambata ovina viaco ko Samaria.+

9 Pole, uprofeto umue wa Yehova o tukuiwa hati, Odede oko a kala. Eye wa tunda oku ñualehẽla lolohoka vina via kala oku iya ko Samaria kuenda wa va sapuila hati: “Tali! Omo okuti, Yehova Suku ya vakukululu yene wa temele lo Yuda, wa va eca peka liene+ kuenje ene wa va pondi lonyeño yimue ya pitĩla toke kovailu. 10 Kuenje cilo ene vu yongola oku lingisa omanu vo ko Yuda kuenda vo ko Yerusalãi apika vene valume kuenda vakãi.+ Anga hẽ ene ka vu kuetevo eko kovaso a Yehova Suku yene? 11 Kaliye njeveleli kuenda tiuwiyi olomandekua vina wopi pokati ka vamanjene, momo onyeño yalua ya Yehova ya ku wengukili.”

12 Omo liovina viaco, vamue pokati kasongui va va Efarimi okuti, Asariya omõla a Yehohanana, Berekiya omõla a Mesilemote, Yehisikiya omõla a Sialume kuenda Amasa omõla a Hadilali, va tamãlala la vana va kala oku tunda kuyaki, 13 kuenje va va sapuila vati: “Ka u ka neni olomandekua kulo, momo ci ka tu nenela oku kuata eko kovaso a Yehova. Ovina vu yongola oku linga, vi ka vokiya kakandu etu kuenda keko lietu, momo eko lietu linene ale kuenda onyeño yalua ya wengukila Isareli.” 14 Omo liaco, asualali va limalẽha va eca olomandekua lovina via pundiwa+ kolombuale kuenda kekongelo liosi. 15 Kuenje alume va nõliwa kolonduko va katuka, va kuata olomandekua kuenda va eca ovowalo a tunda kovina via pundiwa ku vosi va kala epõlõla pokati kavo. Omo liaco, va eca kokuavo uwalo lolohaku, lokulia lovinyua kuenda ulela woku lisieketa katimba avo. Handi vali, vana va hongua va vambatela kovimbulu kuenje va tualiwa ku vamanjavo vo Yeriko, kolupale luoviti vieva. Noke liovina viaco, va tiukila ko Samaria.

16 Kotembo yaco, Soma Ahasi wa pinga ekuatiso kolosoma vio ko Asuria.+ 17 Noke va Edome va iñila vali lundululu loku katukila o Yuda kuenje vambata olomandekua. 18 Va Filisiti+ va katukilavo alupale o Sefela+ kuenda o Negeve ko Yuda kuenda va tambula o Bete-Siemese,+ o Ayalone,+ o Gederoti, o Soko kumue lovaimbo a sungueko, o Timinate+ kumue lovaimbo a sungueko, o Gimiso kumue lovaimbo a sungueko; kuenje omo va tungila. 19 Yehova wa kutisa osõi o Yuda omo lia Ahasi Soma yo Isareli, momo eye wa ecelela okuti, o Yuda yi kala vombuanja kuenje ca kokaile oku lekisa ekambo lialua liekolelo ku Yehova.

20 Soma Tigilati-Pinesere+ wo ko Asuria ko kuatisile, pole, wo katukila kuenda wo kokela ohali.+ 21 Momo Ahasi wa pundile onjo ya Yehova, lonjo* ya soma+ kuenda olonjo violombuale kuenje wa pangela soma yo ko Asuria ombanjaile yimue; pole, ka co kuatisile. 22 Vokuenda kuotembo yaye yohali, Soma Ahasi wa lekisa vali calua ekambo liekolelo ku Yehova. 23 Eye wa fetika oku eca ovilumba kolosuku vio ko Damasko,+ vina vio yulile+ kuenje wa popia hati: “Omo okuti olosuku violosoma vio Suria vi kasi oku va kuatisa, ndi ka eca ovilumba kokuavio oco vi ndi kuatisevo.”+ Pole, ovio vio kokela ocilondokua kumue lo Isareli yosi. 24 Handi vali, Ahasi wongolola ovikuata vionjo ya Suku yocili; noke eye wa teta teta vovinimbu ovikuata vionjo ya Suku yocili,+ wa yika apito onjo ya Yehova+ kuenda wa litungila ovotala kavindi osi o Yerusalãi. 25 Kalupale osi o Yuda wa tungilako ovitumãlo via lepa vioku eca ovilumba vioku tuimisila owisi kolosuku vikuavo+ kuenje wa wengula onyeño ya Yehova Suku ya vakukululu yaye.

26 Catiamẽla konepa yikuavo yulandu womuenyo waye, lovina viosi a linga oku upisa kefetikilo toke kesulilo, wa sonehiwa Velivulu Liolosoma vio Yuda kuenda vio Isareli.+ 27 Noke Ahasi wa ka puyuka la vakukululu yaye kuenda vo kenda volupale luo Yerusalãi, momo ovo ka vo wambatele kovitumãlo vioku kendela olosoma via Isareli.+ Kuenje omõlaye Hesekiya wa linga osoma pomangu yaye.

29 Hesekiya+ wa linga osoma eci a kuata 25 kanyamo kuenda wa viala 29 kanyamo vo Yerusalãi. Onduko ya inaye ya kala Aviya omõla ukãi wa Sakariya.+ 2 Eye wamamako oku linga eci ca sunguluka kovaso a Yehova+ ndeci kukululu yaye Daviti a lingile.+ 3 Kunyamo watete wuviali waye kosãi yatete, eye wa yikula apito onjo ya Yehova kuenda wa a semũlũla.+ 4 Noke eye wa pañinya ovitunda la va Lewi kuenda wa vongoluila vokololo kutundilo. 5 Eye wa va sapuila hati: “Njeveleli ene a va Lewi. Cilo, liyelisi ene muẽle+ kuenda yelisi onjo ya Yehova, Suku ya vakukululu yene kuenda upi eci ca vĩha pocitumãlo ci kola.+ 6 Momo va isietu va lekisa ekambo liekolelo kuenda va linga eci cĩvi kovaso a Yehova Suku yetu.+ Ovo vo yanduluka kuenda va liwekapo oku tiamisila ovipala viavo kotavernakulu ya Yehova kuenda vo wimba onyima.+ 7 Ovo va yikavo apito ocindumba+ kuenda va ima olondiyelo.+ Ovo va liwekapo oku timĩha insensu+ kuenda oku lumba ovilumba vioku pia elisi+ ku Suku ya Isareli kocitumãlo ci kola. 8 Omo liaco, onyeño ya Yehova ya wengukila o Yuda kuenda o Yerusalãi+ kuenje eye wa va nenela ohali oco okuti, omanu vana va va mola loku yeva catiamẽla kovina viaco, va kuata usumba, ci va komõhisa kuenda va ka va yola epembe ndomo vu ci lete lovaso ene muẽle.+ 9 Kuenje vakukululu yetu va kupuka losipata+ kuenda omãla vetu valume, lomãla vetu vakãi kumue lakãi vetu, vambatiwa kumandekua omo liovina viaco.+ 10 Cilo, onjongole yange yo vutima, oku linga ocisila cimue la Yehova Suku ya Isareli+ oco onyeño yaye yalua yi tu tinduke. 11 Amãla vange, yilo hatemboko yoku lekisa eselula,* momo Yehova wo nõli okuti, vu kala kovaso aye oco u vumbi ndolondingupange viaye+ kuenda oku lumba ovilumba viaye viowisi.”+

12 Kuenje va Lewi vana va katuka oco va linge upange vava: Ku va Kohata,+ Mahata omõla a Amasai la Yoeli omõla a Asariya; ku va Merari,+ Kisi omõla a Avidi la Asariya omõla a Yehalelele; ku va Gerisiono,+ Yowa omõla a Sima la Edene omõla a Yowa; 13 pomãla va Elicafana, Simiri la Yewele; pomãla va Asafe,+ Sakariya la Mataniya; 14 pomãla va Hemani,+ Yehiyele la Simei; pomãla va Yedutunu,+ Semaya la Usiyele. 15 Noke ovo vongoluila pamosi vamanjavo kuenda va liyelisa ovo muẽle kuenje veya ndomo ca handelekiwile la soma pocakati colondaka via Yehova, oco va yelise onjo ya Yehova.+ 16 Noke ovitunda via iñila vonjo ya Yehova oco va yi yelise kuenda via tundisa posamua ovina viosi via vĩha vina via sanga vonembele ya Yehova kuenda via vi kapa vocitali+ conjo ya Yehova. Omo liaco, va Lewi va kuata ovina viaco kuenje va vi ambata kosamua Vocimbota co Kedrone.+ 17 Kuenje ovo va fetika oku kolisa onembele keteke liatete yosãi yatete kuenda keteke liecelãla yosãi, va pitĩla pocindumba ca Yehova.+ Ovo va kolisa onjo ya Yehova vokuenda kuoloneke ecelãla kuenda va malusula keteke 16 yosãi yatete.

18 Noke va enda ku Soma Hesekiya kuenje va popia vati: “Tua yelisa onjo yosi ya Yehova, lutala woku pia elisi+ kumue lovikuata viaco viosi+ kuenda omesa yolombolo via tumbikiwa*+ kumue lovikuata viaco viosi. 19 Kuenje ovikuata viosi vina Soma Ahasi a tundisa vokuenda kuviali waye eci eye a lekisa ekambo liekolelo,+ tua vi angiliya kuenda tua vi kolisa+ kuenje vi kasi kovaso yutala wa Yehova.”

20 Noke Soma Hesekiya wa pasuka selo kuenda wongoluila pamosi olombuale violupale kuenje ovio via lamanela konjo ya Yehova. 21 Ovio via nena olongombe epanduvali, olomeme epanduvali, epanduvali kovitupi viotulomeme, epanduvali kovitupi violohombo ndocilumba cekandu cusoma, cocitumãlo ci kola kuenda co Yuda.+ Omo liaco, eye wa sapuila ovitunda ovitumbulukila via Arone, oco va vi lumbile kutala wa Yehova. 22 Noke ovo va ponda olongombe+ kuenje ovitunda via kuata osonde yaco loku yi nyila kutala;+ kuenje ovo va ponda olomeme kuenda va nyĩla osonde yaco kutala, noke va ponda ovitupi viotulomeme kuenje va nyila osonde yaco kutala. 23 Noke ovo va nena ovitupi violohombo viocilumba cekandu kovaso a soma lo kovaso yekongelo kuenda va kapa ovaka kilu liavio. 24 Ovitunda via vi ponda kuenje losonde yaco, via lumba ocilumba cekandu kutala, oco vi linge ocilumba coku tuvika akandu o Isareli yosi, momo soma wa popele hati, ocilumba coku pia elisi locilumba cekandu ci lingiwile o Isareli yosi.

25 Vokuenda kuotembo yaco, eye wa kapa va Lewi vonjo ya Yehova. Ovo va kala lolosimbalu, lovikuata viovisikilo via pangiwa lovikolo kuenda olohalupa+ ndomo ca handelekiwile la Daviti+ kuenda Gadi+ ukuakusapuila soma ovinjonde la Natana+ uprofeto, momo ocihandeleko caco ca tunda ku Yehova pocakati covaprofeto vaye. 26 Omo liaco, va Lewi va talama vilu lovikuata viovisikilo via Daviti kuenda ovitunda via kala lalumbeta.+

27 Noke Hesekiya wa handeleka okuti, ku eciwa ocilumba coku pia elisi kutala.+ Eci ocilumba coku pia elisi ca fetika oku eciwa, ocisungo ca Yehova ca fetikavo kumue lalumbeta, poku kuama ovikuata viovisikilo via Daviti Soma yo Isareli. 28 Noke ekongelo liosi lia petama osimbu ocisungo ca kala oku imbiwa kuenda alumbeta a kala oku sikiwa kuenje ovina viaco viosi viamamako toke eci ocilumba coku pia elisi ca pua. 29 Eci va malusula oku eca ovilumba, soma kumue la vosi va kala laye, va petamẽla posi kuenda va kekama. 30 Soma Hesekiya kumue lolombuale, va sapuila va Lewi oco va sivaye Yehova lolondaka via Daviti+ kuenda via Asafe+ ukuakusapula ovinjonde. Omo liaco, ovo va eca esivayo lesanju lialua kuenje va petamẽla posi kuenda va kekama.

31 Noke Hesekiya wa popia hati: “Omo okuti cilo wa tepiwi* oco vu linge upange wa Yehova, enjui, neni ovilumba kuenda ovilumba violopandu konjo ya Yehova.” Omo liaco, ekongelo lia fetika oku nena ovilumba kuenda ovilumba violopandu kuenje omunu wosi wa kala lutima woku eca, wa nena ovilumba vioku pia elisi.+ 32 Etendelo liovilumba vioku pia elisi vina ekongelo lia nena li soka 70 kolongombe, 100 kolomeme, 200 kovitupi viotulomeme okuti, viosi evi via eciwa ndocilumba coku pia elisi ku Yehova+ 33 kuenda ovilumba vi kola via kala 600 kolongombe kuenda 3.000 kolomeme. 34 Pole, ka kua kaile ovitunda vialua oco vi yuve ovinyama viovilumba viosi vioku pia elisi, omo liaco, vamanjavo va Lewi va va kuatisa+ toke eci upange waco wa malusuiwa kuenda toke eci ovitunda via liyelisa ovio muẽle,+ momo va Lewi va kapele calua utima* koku liyelisa okuti, ovitunda ci sule. 35 Handi vali, kua kala ovilumba vialua vioku pia elisi+ lulela wovilumba viombembua+ kuenda ovilumba vioku nyua vi eciwa kumue lovilumba vioku pia elisi.+ Omo liaco, upange wonjo ya Yehova wa tumbuluiwa.* 36 Kuenje Hesekiya kumue lomanu vosi, va sanjukila ovina Suku yocili a lingila omanu,+ momo ovina viaco viosi via pita lonjanga yalua.

30 Hesekiya wa tuma esapulo ko Isareli yosi+ lo ko Yuda kuenda wa sonehelavo ovikanda Efarimi la Manase,+ oco veye konjo ya Yehova ko Yerusalãi oku lingila Yehova Suku ya Isareli Ocipito co Paskoa.+ 2 Pole, soma, olombuale viaye kuenda ekongelo liosi vo Yerusalãi, va nõlapo oku linga ocipito co Paskoa kosãi yavali,+ 3 momo ovo ka va tẽlele oku linga ocipito caco votembo va siata ale oku ci linga,+ momo ka kua kaile ovitunda vi tẽla okuti, via liyelisile+ kuenda omanu ka va liongoluile handi ko Yerusalãi. 4 Eliangiliyo liaco, lia sungulukile kovaso a soma kuenda kovaso yekongelo liosi. 5 Omo liaco, ovo va nõlapo oku linga esapulo limue ko Isareli yosi oku upisa ko Beresieva toke ko Dani+ liokuti, omanu va sukila oku iya oco va lingile Yehova Suku ya Isareli o Paskoa ko Yerusalãi, momo ndocimunga ovo ka va lingile ocipito caco ndomo ca sonehiwa.+

6 Noke olomunga* via enda ko Isareli yosi lo ko Yuda kumue lovikanda via soma kuenda violombuale viaye ndomo soma a ci handelekele poku popia hati: “Amanu va Isareli, tiuki ku Yehova Suku ya Avirahama, ya Isake kuenda ya Isareli, oco eye a tiuke kovisupe vina via puluka peka liolosoma vio Asuria.+ 7 Ko ka kali nda vakukululu yene kuenda vamanjene vana va lekisa ekambo liekolelo ku Yehova Suku ya vakukululu yavo kuenje eye wa va kundula ndomo vu ci lete.+ 8 Kaliye ko ka tĩlisi ovitima ndeci vakukululu yene va linga.+ Liketisi ku Yehova kuenda enjui kocitumãlo caye ci kola,+ cina eye a kolisa otembo ka yi pui kuenda vumbi Yehova Suku yene oco okuti, onyeño yaye yalua yu tinduki.+ 9 Momo nda wa tiuki ku Yehova, vamanjene lomãla vene, va ka sanga ohenda ku vana va vambata kumandekua+ kuenje va ka eceliwa oku tiuka kofeka yilo,+ momo Yehova Suku yene, ukuacikembe+ haeye ukuahenda kuenda nda ene wa tiuki kokuaye, eye ka ka ku imbi onyima.”+

10 Omo liaco, olomunga* via enda kolupale lolupale kofeka yo Efarimi kuenda yo Manase,+ toke muẽle ko Sevulono, pole, omanu va kala oku va yola epembe loku va fuanguila.+ 11 Pole, omanu vamue vo ko Asiyere, va Manase kuenda va Sevulono va liketisa kuenje veya ko Yerusalãi.+ 12 Eka lia Suku yocili lia kalavo ko Yuda oco a va kape vomunga* okuti, va tẽlisa ovina soma lolombuale va handelekele ndeci ci likuata londaka ya Yehova.

13 Owiñi umue womanu wa liongoluila pamosi ko Yerusalãi oco va linge Ocipito Colombolo ka vi kuete Etumbisa+ kosãi yavali;+ owo wa kala ekongelo limue linene calua. 14 Ovo va katuka kuenda vopa ovotala a kala vo Yerusalãi+ kuenda vopa ovotala osi insensu+ kuenje va amba Vocimbota co Kedrone. 15 Kuenje ovo va ponda ocilumba co Paskoa keteke 14 yosãi yavali. Ovitunda la va Lewi va kuata osõi kuenje ovo va liyelisa ovo muẽle kuenda va nena ovilumba vioku pia elisi vonjo ya Yehova. 16 Ovo va talama povitumãlo viavo va enda oku kala, ndomo ci likuata Locihandeleko ca Mose ulume wa Suku yocili; kuenje ovitunda via nyĩla osonde+ va tambuile peka lia va Lewi. 17 Kua kala omanu valua vekongelo okuti, ka va liyelisile kuenda va Lewi va kuatele ocikele coku pondelako ovilumba vio Paskoa omanu vosi vana ka va liyelisile,+ oco va yelisiwe ku Yehova. 18 Etendelo lialua liomanu, ca piãla enene vo ko Efarimi, vo ko Manase,+ vo ko Isakare kuenda vo ko Sevulono, ndaño ka va liyelisile va lia o Paskoa, pole, ndomo ca sonehiwa hamoko. Pole, Hesekiya wa va likutililako poku popia hati: “Yehova una okuti uwa,+ a ecele 19 omunu wosi una wa pongiya utima waye oco a sande Suku yocili+ Yehova, Suku ya vakukululu yaye, ndaño okuti eye ka yelisiwile ndomo ci likuata lolonumbi vioku kola.”+ 20 Kuenje Yehova wa yevelela Hesekiya kuenda wa ecela* omanu.

21 Omo liaco, va Isareli vana va kala vo Yerusalãi, va linga ocipito Colombolo ka vi Kuete Etumbisa+ vokuenda kuoloneke epanduvali lesanju lialua+ kuenda va Lewi kumue lovitunda, va enda oku sivaya Yehova eteke leteke, poku sika lolukandi ovikuata viavo viovisikilo ku Yehova.+ 22 Handi vali, Hesekiya wa vangula lonjila yimue yoku vetiya* va Lewi vosi vana va vumba Yehova lolondunge. Kuenje ovo va lia vokuenda kuoloneke epanduvali viocipito+ poku lumba ovilumba viombembua+ kuenda va eca olopandu ku Yehova Suku ya vakukululu yavo.

23 Kuenje ekongelo liosi lia nõlapo vali oku linga ocipito vokuenda kuoloneke epanduvali. Omo liaco, va linga vali ocipito caco vokuenda kuoloneke epanduvali lesanju.+ 24 Soma Hesekiya wo ko Yuda wa eca kekongelo 1.000 kolongombe, 7.000 kolomeme kuenda olombuale via eca kekongelo 1.000 kolongombe kuenda 10.000 kolomeme;+ kuenje etendelo lialua liovitunda via kala oku liyelisa.+ 25 Noke ekongelo liosi lio Yuda, lovitunda la va Lewi lekongelo liosi lina lia tunda ko Isareli+ kuenda ovingendeleyi+ vina via tunda kofeka yo Isareli la vana va kala vo Yuda vamamako oku sanjuka. 26 Kuenje kua kala esanju lialua vo Yerusalãi, momo tunde koloneke via Salomone omõla a Daviti soma yo Isareli ka kua la pita ovina via lisoka ndevi vo Yerusalãi.+ 27 Oku sulako, ovitunda vina via kala va Lewi via katuka kuenda via sumũlũisa omanu;+ kuenje Suku wa yevelela ondaka yavo kuenda ohutililo yavo ya pitĩla toke pocitumãlo caye ci kola kovailu.

31 Eci va mala oku linga ovina viosi evi, va Isareli vosi vana va kalapo va enda kalupale o Yuda kuenda va nyanyõla olongunji vi kola,+ va lundula olombueti vi kola*+ kuenda va nyanyõla ovitumãlo via lepa+ lovotala+ vo Yuda yosi lo ko Benjamini kuendavo ko Efarimi lo ko Manase+ toke eci va vi kundula viosi. Noke liovina viaco, va Isareli vosi va tiukila kalupale avo okuti, omunu lomunu kocitumãlo caye muẽle.

2 Noke Hesekiya wa nõla ovitunda vovimunga viavo+ kuenda va Lewi vovimunga viavo+ okuti, omunu lomunu pokati kovitunda la va Lewi o kala kupange waye muẽle+ oco va lumbe ovilumba vioku pia elisi lovilumba viombembua okuti, va vumba kuenda va eca olopandu lesivayo polombundi viovitali* via Yehova.+ 3 Onepa yimue yovipako via soma, via eciwa oco ku lumbiwe ovilumba vioku pia elisi,+ oku kongelamo ovilumba viomẽle kuenda vioñolosi+ lovilumba vioku pia elisi Viasambata,+ violosãi viokaliye+ kuenda viovipito+ ndeci ci likuata lovina via sonehiwa Vocihandeleko ca Yehova.

4 Handi vali, eye wa handeleka omanu va kala ko Yerusalãi oco va ece olonepa via tiamẽla kovitunda kuenda ku va Lewi+ okuti, va kapako lutima wosi* ocihandeleko ca Yehova. 5 Eci onumbi yaco ya eciwa, va Isareli va eca etendelo lialua liapako atete olomema, ovinyu yokaliye, ulela,+ owiki kuenda ovaima osi o vepia;+ ovo va nena etendelo lialua lionepa yekũi yovina viosi.+ 6 Omanu vo Isareli kuenda vo Yuda, vana va kala valupale o Yuda va nenavo onepa yekũi yolongombe, leyi yolomeme kuenda onepa yekũi yovina vi kola+ vina via kolisiwila Yehova Suku yavo. Ovo va vi nena kuenje va viongeka olondunda vialua. 7 Kosãi yatatu,+ ovo va fetika oku ongeka olondunda violombanjaile viavo; kuenje kosãi yepanduvali+ va malusula. 8 Eci Hesekiya kumue lolombuale va pitĩla kuenda va mola olondunda, va sivaya Yehova kuenje va sumũlũisa omanu vaye va Isareli.

9 Hesekiya wa pula ovitunda kuenda va Lewi catiamẽla kolondunda viaco, 10 kuenje Asariya ocitunda ca velapo conjo ya Sadoke wo sapuila hati: “Tunde kotembo va fetika oku nena olombanjaile vonjo ya Yehova,+ omanu va siata oku lia toke eci vekuta, pole, lopo pa supa ovina vialua momo Yehova wa siata oku sumũlũisa omanu vaye kuenda etendelo eli linene olio lia supapo.”+

11 Omo liaco, Hesekiya wa va sapuila oco va pongiye olosila*+ vonjo ya Yehova kuenje ovo va vi pongiya. 12 Ovo vamamako oku nena lekolelo olombanjaile, olonepa viekũi+ kuenda ovina vi kola; Konaniya u Lewi wa kapiwa kocikele coku songuila ovina viaco viosi kuenda manjaye Simei wa kala omunu wavali noke liaye. 13 Yehiyele, Asasiya, Nahati, Asahele, Yerimote, Yosavada, Eliyele, Isimakuya, Mahata la Benaya, va kala olonumiwa vina via kala oku kuatisa Konaniya la manjaye Simei ndomo ca handelekiwa la Soma Hesekiya kuenje Asariya eye wa kala usongui wonjo ya Suku yocili. 14 Kuenje Kore omõla a Imina u Lewi ukuambundi yo konele yutundilo,+ wa kala locikele covilumba vi eciwa lutima wosi+ via Suku yocili kuenda eye wa enda oku tepaisa ombanjaile yeciwa ku Yehova+ kuenda ovina vi kola koku kola.+ 15 Eye wa kala oku songuila Edene, Miniamini, Yesiua, Semaya, Amariya kuenda Sekaniya valupale ovitunda+ vupange wavo wa koleliwa, oco va ece ku vamanjavo olonepa vimuamue via va sesamẽla vovimunga+ oku upisa kunene toke kutito. 16 Evi via kala ovina via vokiyiwako kovina via tepaiwa kalume oku upisa kanyamo atatu lava va pitahãlamo okuti, va sonehiwa vulala wepata lepata vana veyaya eteke leteke oku vumbila vonjo ya Yehova kuenda oku tẽlisa ovikele viovimunga viavo.

17 Ulala wepata lepata wovitunda wa kala ndomo ci likuata lolonjo via va isiavo+ ndeci ca kala wa va Lewi vana va kuatele 20 kanyamo lava va pitahãlamo+ ndeci ci likuata lovikele viovimunga viavo.+ 18 Vulala wepata lepata wa va Lewi, mua kongelele akãi vavo vosi, omãla valume lomãla vakãi, toke muẽle omãla vatito lekongelo liavo liosi, momo ovo vamamako oku liyelisa kovina vi kola omo liocikele cavo coku linga upange wa koleliwa, 19 mua kongelelevo ovitumbulukila via Arone, ovitunda vina via kala vovapia ovisenge vioku lisila oviunda ana a ñualele alupale avo.+ Kalupale osi, alume va nõliwile kolonduko oco va ece okulia kalume vosi pokati kovitunda kuenda komunu wosi wa kongeliwa vulala wepata lepata wa va Lewi.

20 Hesekiya wa linga ovina viaco vo Yuda yosi kuenje wamamako oku linga eci ciwa leci ca sunguluka kuenda wa kala ukuekolelo kovaso a Yehova Suku yaye. 21 Kuenje upange wosi eye a linga oco a sande Suku yaye, ci kaile ovina viatiamẽla kupange wonjo ya Suku yocili,+ ale Wocihandeleko locikundi, eye wa u linga lutima wosi kuenda wa litunda ciwa.

32 Noke liovina viaco kuenda noke liovilinga evi viekolelo via Hesekiya,+ Soma Senakeriva wo ko Asuria weya kuenda wa iñila lundululu vo Yuda. Eye wa ñuala ocingonja alupale a kuete oviteyuilo locimãho coku iñilamo kuenda oku a tambula.+

2 Eci Hesekiya a mõla okuti, Senakeriva weya kuenda o yongola oku linga uyaki lo Yerusalãi, 3 noke lioku sapela lolombuale viaye kuenda lasualali vaye, eye wa nõlapo oku kotola ovava olono vio kosamua yolupale+ kuenje ovo va eca kokuaye ekuatiso. 4 Omanu valua vongoluiwa kuenje va yika olono viaco viosi kumue lolui luna lua kala oku pita vofeka, poku popia vati: “Momo lie olosoma vio Asuria vi sukilila oku iya loku sanga ovava alua?”

5 Handi vali, lonjongole yalua eye wa tumbulula ocimbaka cosi ca lunduiwile kuenje kilu liaco, wa tungako olosapalalo kuenda kosamua yaco wa tungako ocimbaka cikuavo. Eye wa semũlũlavo Ondunda*+ yolupale lua Daviti kuenda wa panga etendelo lialua liovimalẽho* loviyepelo. 6 Eye noke wa nõlela omanu asongui volohoka kuenda wa vongoluila vokololo yombundi yolupale kuenda wa va kolisa* poku popia hati: 7 “Kuati utõi kuenda pami. Ko ka kuati usumba ale oku yokoka, omo lia soma yo Asuria+ kuenda owiñi wosi u kasi laye, momo valua ovo va kasi letu okuti, ava va kasi laye va sule.+ 8 Konele yaye kuli okuokuo kumue kuositu,* pole, konele yetu kuli Yehova Suku yetu oco a tu kuatise loku yaka vovilunga vietu.”+ Kuenje omanu va pamisiwa lolondaka via Soma Hesekiya wo ko Yuda.+

9 Noke liovina evi, osimbu Soma Senakeriva wo ko Asuria a kala ko Lakisi+ lolohoka viaye viosi via pama,* eye wa tuma akuenje vaye ko Yerusalãi ku Soma Hesekiya wo ko Yuda kuenda ku va Yudea vosi ko Yerusalãi+ poku popia hati:

10 “Eci oco Soma Senakeriva wo ko Asuria a popia: ‘Kovina vipi vu kasi oku kolela okuti vu amamako oku kala vo Yerusalãi osimbu oyo ya ñualiwa?+ 11 Hesekiya ka kasi hẽ oku vu kembi lo ku vueci kolofa pocakati conjala lenyona poku popia hati: “Yehova Suku yetu o ka tu yovola peka lia soma yo Asuria”?+ 12 Hesekiya hayeko hẽ wa lundula ovitumãlo via lepa+ via Suku* yene lovotala Aye+ kuenje wa popia lo Yuda kuenda o Yerusalãi hati: “Vu sukila oku kekamẽla kovaso yutala umosi kuenda kutala waco vu sukila oku tuimisilako owisi wovilumba”?+ 13 Ka wa kũlĩhĩli hẽ eci ame la vakukululu yange tua linga lomanu vosi volofeka vikuavo?+ Anga hẽ olosuku violofeka viovaimbo akuavo, via tẽla hẽ oku yovola ovaimbo avo peka liange?+ 14 Helie pokati kolosuku viosi violofeka evi vakukululu yange va kundula, wa tẽla oku yovola omanu vaye peka liange okuti, Suku yene o ka tẽla oku vu yovoli peka liange?+ 15 Kaliye ko ka eceleli okuti Hesekiya o vu yapuisi ale oku vu kembi lonjila ndeyi!+ Ko ka koleli kokuaye, momo ka kuli osuku layimue yofeka ale osoma wa tẽla oku yovola omanu vaye peka liange kuenda peka lia vakukululu yange. Ca piãla enene Suku yene, ka ka tẽla oku vu yovoli peka liange!’”+

16 Akuenje vaye vamamako oku fuanguila Yehova Suku yocili kuenda ukuenje waye Hesekiya. 17 Eye wa sonehavo ovikanda+ vioku sanumũla Yehova Suku ya Isareli+ loku popia olondaka vĩvi viatiamẽla kokuaye hati: “Ndeci olosuku violofeka viovaimbo akuavo ka via tẽlele oku yovola omanu vavo peka liange,+ cimuamue haico okuti, Suku ya Hesekiya ka ka yovolavo omanu vaye peka liange.” 18 Ovo vamamako oku vilikiya lolukandi kelimi lia va Yudea komanu vo ko Yerusalãi vana va kala kocimbaka, oco va va lingise usumba loku va yokokisa locimãho coku tambula olupale.+ 19 Ovo va popia ovina vĩvi viatiamẽla ku Suku yo Yerusalãi ndeci va enda oku popia catiamẽla kolosuku viomanu vo kilu lieve vina okuti, upange wovaka omanu. 20 Pole, Soma Hesekiya luprofeto Isaya+ omõla a Amose, vamamako oku likutilila catiamẽla kondaka yaco kuenda oku kalukila kovailu oku pinga ekuatiso.+

21 Noke Yehova wa tuma ungelo umue kuenje wa kundula olohoka viosi via pama,+ asongui, la vakesongo vocilombo ca soma yo Asuria kuenje soma wa tiukila kimbo liaye muẽle lesumuo. Noke eye wa iñila vonjo* ya suku yaye kuenda vonjo yaco, omo vamue pokati komãla vaye vo pondela losipata.+ 22 Omo liaco, Yehova wa popela Hesekiya kumue lolonungi vio Yerusalãi peka lia Soma Senakeriva wo ko Asuria lo povaka vomanu vosi vakuavo kuenje wa eca kokuavo epuyuko kolonele viosi. 23 Omanu valua va enda oku nena olombanjaile ku Yehova ko Yerusalãi kuenda ovina via velapo ku Hesekiya Soma yo Yuda+ kuenje noke liovina viaco, eye weya oku sumbiwa calua lolofeka viosi.

24 Koloneke viaco, Hesekiya wa kala oku vela kuenda wa pandele koku fa kuenje wa likutilila ku Yehova+ una wo tambulula loku eca kokuaye ondimbukiso* yimue.+ 25 Pole, Hesekiya ka lekisile olopandu kuwa wa lingiwila kokuaye, momo utima waye wa lekisa epela kuenje onyeño ya Suku yo wengukila eye kumue lo Yuda kuenda o Yerusalãi. 26 Pole, Hesekiya wa liketisa kuenda wa liwekapo oku lekisa epela lia kala vutima waye+ eye kumue lolonungi vio Yerusalãi kuenje onyeño ya Yehova ka ya va wengukilile koloneke via Hesekiya.+

27 Noke Hesekiya weya oku kuata ovokuasi alua kuenda ulamba;+ kuenje wa litungila olosila+ vioku kapa opalata, ulu, ovawe a tĩla, ulela wonguendu, oviyepelo kuenda ovikuata viosi via fina. 28 Eye wa tungavo olosila vioku kapa ovaima olomema kuenda ovinyu yokaliye, lulela, oku kongelamo ovimanga vioviunda viosi via litepa kuenda ovimanga violomeme. 29 Eye wa litungilavo alupale kuenda wa kuatele ovinyama vialua vioku fuka, olomeme kuenda oviunda, momo Suku wa eca ovokuasi alua kokuaye. 30 Hesekiya, eye wa kotola ono yo konano yovava+ o ko Gihone+ kuenje wa a suñamisa kombuelo toke kutakelo Wolupale lua Daviti+ kuenje Hesekiya wa litunda ciwa kupange waye wosi a linga. 31 Pole, eci olomunga violombuale vio ko Bavulono via tumiwa oku ko pula catiamẽla kondimbukiso*+ yina ya pita vofeka,+ Suku yocili wo sia likaliaye okuti, u seteka+ oco a limbuke ovina viosi via kala vutima waye.+

32 Catiamẽla konepa yikuavo yulandu womuenyo wa Hesekiya kuenda ovilinga viaye viocisola ka ci pongoloka,+ via sonehiwa vovinjonde viuprofeto Isaya+ omõla a Amose, Velivulu Liolosoma vio Yuda kuenda vio Isareli.+ 33 Noke Hesekiya, wa ka puyuka la vakukululu yaye kuenje vo kenda vonjila yi lamanela kovitumãlo vioku kenda viomãla va Daviti;+ kuenda poku fa kuaye, o Yuda yosi lolonungi vio Yerusalãi vo sumbila. Kuenje omõlaye Manase wa linga osoma pomangu yaye.

33 Manase+ wa kuata 12 kanyamo eci a linga osoma kuenda wa viala 55 kanyamo vo Yerusalãi.+

2 Eye wa linga eci cĩvi kovaso a Yehova, poku kuama ovilinga viumbondo violofeka vina Yehova a tundisile kovaso yomanu va Isareli.+ 3 Eye wa tumbulula ovitumãlo via lepa vina isiaye Hesekiya a lunduile+ kuenda wa tungila Baale ovotala loku panga olombueti vi kola* kuenje eye wa kekamẽla olohoka viosi vio kovailu kuenda wa vi vumba.+ 4 Eye wa tungavo ovotala vonjo ya Yehova+ yina Yehova a popele hati: “O Yerusalãi yi ka tukuiwa londuko yange otembo ka yi pui.”+ 5 Handi vali, eye wa tungila olohoka viosi vio kovailu ovotala vovitali vivali vionjo ya Yehova.+ 6 Eye wa yoka omãla vaye vondalu ndocilumba*+ Vocimbota Comõla a Hinome;+ wa kala ukuombanda,+ wa tãha, wa sanda vakuakuvangula lolondele kuenda vakuakutãha.+ Eye wa linga ovina vialua vĩvi kovaso a Yehova oco a wengule onyeño yaye.

7 Ociñumañuma ca songiwa cina eye a pangele, wa ci kapa vonjo ya Suku yocili+ yina Suku a sapuilile Daviti kuenda omõlaye Salomone hati: “Vonjo yilo lo vo Yerusalãi okuti, ocitumãlo cina nda nõla pokati kovikoti viosi via Isareli, yi ka tukuiwa londuko yange otembo ka yi pui.+ 8 Ame lalimue eteke ndi ka tundisa vali omãla va Isareli vofeka yina nda likuminyile oku eca ku vakukululu yavo, nda ovo va kapako lutate ovina viosi nda va handeleka, Ocihandeleko cosi, ovisila loviholo vina via eciwile pocakati ca Mose.” 9 Manase wamamako oku yapuisa o Yuda lolonungi vio Yerusalãi, poku va vetiya oku linga ovina vialua ka via sungulukile okuti, evi via lingiwa lolofeka vina Yehova a kunduila kovaso ya va Isareli vi sule.+

10 Yehova wamamako oku lungula Manase kumue lomanu vaye, pole, ka vo yevelele.+ 11 Omo liaco, Yehova wa nena kokuavo asongui volohoka va soma yo Asuria kuenda va kuata Manase lolonjolo* noke vo kuta lalienge avali osipi kuenje vo wambata ko Bavulono. 12 Vokuenda kuohali yaye, wa livondela ku Yehova Suku yaye oco o lekise ohenda kuenda wamamako oku liketisa calua kovaso a Suku ya vakukululu yaye. 13 Eye wamamako oku likutilila ku Suku kuenje Suku wa vetiyiwa lesakalalo liaye kuenda wa yeva epingilo liaye liohenda kuenje wo tiuwiya kuviali waye ko Yerusalãi.+ Noke Manase wa limbuka okuti, Yehova eye Suku yocili.+

14 Noke liovina viaco, eye wa tungila Olupale lua Daviti+ ocimbaka cimue co kosamua kutakelo wo Gihone+ vocimbota* toke Kombundi Yolõsi+ kuenda camamako oku ñuala o Ofele+ kuenda ocimbaka caco ca lepele calua. Handi vali, alupale osi a kuete oviteyuilo vo Yuda, eye wa a nõlela asongui volohoka. 15 Eye wa tundisa olosuku viñi kuenda ociñumañuma cociteka vonjo ya Yehova,+ lovotala osi a tungile komunda yonjo ya Yehova+ kuenda vo Yerusalãi kuenje wa vi inasila kosamua yolupale. 16 Eye wa pongiyavo utala wa Yehova,+ wa fetika oku lumbilako ovilumba viombembua+ kuenda ovilumba violopandu+ kuenje wa sapuila o Yuda oco yi vumbe Yehova Suku ya Isareli. 17 Ndaño okuti omanu va kala oku lumbila lika ovilumba Yehova Suku yavo, pole, ovo handi va kala oku ci lingila vovitumãlo via lepa.

18 Catiamẽla konepa yikuavo yulandu womuenyo wa Manase, ohutililo yaye a lingila Suku kuenda olondaka via vakuavinjonde vana va sapela laye vonduko ya Yehova Suku ya Isareli, via sonehiwa vulandu wolosoma vio Isareli. 19 Handi vali, ohutililo yaye+ lonjila ndomo epingilo liaye lia tambuluiwa, akandu aye osi kuenda ovilinga viaye viekambo liekolelo,+ ovitumãlo vina eye a tungila ovitumãlo via lepa lolombueti vi kola*+ kuenda oviñumañuma vioviteka osimbu handi ka liketisile, via sonehiwa volondaka vialume vaye vakuakusapula ovinjonde. 20 Noke Manase wa fa kuenda wa kendiwa ndeci va kenda vakukululu yaye kuenda vo kenda vonjo yaye; kuenje omõlaye Amoni wa linga osoma pomangu yaye.+

21 Amoni+ wa kuata 22 kanyamo eci a linga osoma kuenda wa viala anyamo avali ko Yerusalãi.+ 22 Eye wamamako oku linga eci cĩvi kovaso a Yehova, ndeci isiaye Manase a lingaile;+ kuenje Amoni wa lumbila ovilumba oviñumañuma vioviteka viosi vina isiaye Manase a pangele+ kuenda wamamako oku vi vumba. 23 Eye ka liketisile kovaso a Yehova+ ndeci isiaye Manase a liketisile;+ pole, Amoni wamamako oku vokiya keko liaye. 24 Omo liaco, akuenje vaye vo lingila usuanji+ kuenje vo pondela vonjo yaye muẽle. 25 Pole, omanu vo vofeka va ponda vosi vana va lingila usuanji Soma Amoni+ kuenje omõlaye Yosiya+ vo lingisa osoma pomangu yaye.

34 Yosiya+ wa kuetele anyamo ecelãla eci a linga osoma kuenda wa viala 31 kanyamo vo Yerusalãi.+ 2 Eye wa linga eci ca sunguluka kovaso a Yehova kuenda wa endela volonjila via kukululu yaye Daviti kuenje ka pambukile ndaño kondio ale kepĩli.

3 Kunyamo 8 wuviali waye osimbu handi eye a kala umalẽhe, wa fetika oku sanda Suku ya kukululu yaye Daviti;+ kuenje kunyamo 12, eye wa fetika oku yelisa o Yuda lo Yerusalãi+ kovitumãlo via lepa,+ olombueti vi kola,* oviñumañuma via songiwa+ kuenda oviñumañuma viutale. 4 Handi vali, ovotala a va Baale a lunduiwa kovaso aye kuenda eye wa lundula ovotala insensu ana a kala kilu liovotala aco. Eye wa nyanyõlavo olombueti vi kola,* oviñumañuma via songiwa kuenda oviñumañuma viutale kuenje wa vi nyanyõla toke eci via linga oneketela kuenda wa sanduila oneketela yaco kilu liayambo a vana va enda oku eca ovilumba kokuavio.+ 5 Eye wa timĩha akepa ovitunda kilu liovotala avo.+ Poku ci linga, wa yelisa o Yuda lo Yerusalãi.

6 Valupale o Manase, o Efarimi,+ o Simeone oku endela ko Nafitali, vovingululu vi lisungue lavio, 7 eye wa lundula ovotala kuenda wa nyanyõla olombueti vi kola,* loviñumañuma via songiwa,+ poku vi nyanyõla toke eci via linga oneketela; kuenje wa lundula ovotala osi insensu vofeka yosi yo Isareli.+ Noke liovina viaco, wa tiukila ko Yerusalãi.

8 Kunyamo 18 wuviali waye, noke yoku yelisa ofeka lonembele,* eye wa tuma Siafane+ omõla a Asaliya, la Maaseya usongui wolupale kuenda Yowa omõla a Yowahasa ulomboluili oco va semũlũle onjo ya Yehova Suku yaye.+ 9 Ovo va enda ku Hilikiya ocitunda cinene kuenda va eca kokuaye olombongo vina via neniwile vonjo ya Suku, vina va Lewi vana va kala oku vumba nda vakualombundi va konguile ko Manase, ko Efarimi kuenda komanu vosi vakuavo vo ko Isareli+ oku kongelamo vo ko Yuda, vo ko Benjamini kuenda kolonungi vio Yerusalãi. 10 Noke olombongo via eciwa ku vana va nõliwila oku songuila upange vonjo ya Yehova. Omo liaco, olonalavayi vionjo ya Yehova via talavaya lolombongo viaco, oco vi tumbulule loku semũlũla onjo. 11 Olombongo via eciwa kolomesele kuenda ku vakuakutunga, oco va lande ovawe a songiwa lavaya atokekelo kuenda oco va tunge lolohangalo olonjo vina olosoma vio Yuda via ecelele okuti vi lunduiwa.+

12 Kuenje alume va tẽlisa ciwa upange.+ Va Lewi okuti, Yahate la Ovadiya u Merari+ la Sakariya la Mesiulama u Kohata,+ va nõliwa oco va kale asongui vavo. Va Lewi vana va loñolõhele koku imba ovisungo,+ 13 va kuatele ocikele coku songuila olonalavayi* kuenda va kala asongui va vosi vana va kala oku linga ovopange añi añi; kuenje vamue pokati ka va Lewi va kala asonehi, vakesongo kuenda vakualombundi.+

14 Osimbu va kala oku upa olombongo vina via neniwa vonjo ya Yehova,+ Hilikiya ocitunda wa sanga elivulu Liocihandeleko+ ca Yehova cina ca eciwile ku* Mose.+ 15 Omo liaco, Hilikiya wa sapuila Siafane usonehi hati: “Nda sanga elivulu Liocihandeleko vonjo ya Yehova.” Kuenje Hilikiya wa eca elivulu liaco ku Siafane. 16 Noke Siafane wa nena elivulu ku soma kuenda wo sapuila hati: “Akuenje vove va kasi oku linga ovina viosi via kundikiwa kokuavo. 17 Ovo vongolola* olombongo via sangiwa vonjo ya Yehova kuenje va vi eca kasongui kuenda ku vana va kala oku linga upange.” 18 Siafane usonehi wa sapuilavo soma hati: “Kuli elivulu limue Hilikiya ocitunda a nyĩha.”+ Kuenje Siafane wa fetika oku li tangela kovaso ya soma.+

19 Eci soma a yeva olondaka Viocihandeleko, wa tola uwalo waye.+ 20 Noke soma wa eca ocihandeleko eci ku Hilikiya, ku Ahikama+ omõla a Siafane, ku Avidone omõla a Mika, ku Siafane usonehi kuenda ku Asaya ukuenje wa soma cokuti: 21 “Kuendi, ka ñulĩhĩsiliko Yehova ame kumue lomanu vana va supapo vo Isareli kuenda vo Yuda catiamẽla kolondaka vielivulu lina lia sangiwa; momo onyeño ya Yehova yina yi laika oku tu wengukila, yalua enene omo vakukululu yetu ka va tẽlisile ondaka ya Yehova poku kapako ovina viosi via sonehiwa velivulu eli.”+

22 Kuenje Hilikiya kumue la vana va tumiwa la soma va enda ku Hulida uprofeto wukãi.+ Eye wa kala ukãi wa Sialume omõla a Tikiva, omõla a Harihasa usongui wociseleko covowalo kuenda ukãi waco, wa tungile Volupale Luokaliye luo Yerusalãi; kuenje oko va sapela lukãi waco.+ 23 Ukãi waco wa va sapuila hati: “Ca popia Yehova Suku yo Isareli ceci hati: ‘Sapuili ulume wa ku tumi kokuange hoti: 24 “Ca popia Yehova ceci hati: ‘Ndi nenela ohali ocitumãlo cilo kumue lolonungi vialio+ okuti, asiñalo osi a sonehiwa velivulu+ lina ovo va tanga kovaso a soma yo Yuda. 25 Omo okuti ovo va njanduluka+ kuenda va tuimisila owisi wovilumba kolosuku vikuavo oco va wengule onyeño yange+ lovopange osi ovaka avo, onyeño yange yi ka wengukila ocitumãlo cilo kuenda oyo ka yi ka imũha.’”+ 26 Pole, ku soma yo Yuda una wa ku tumi oku kũlĩhĩsa Yehova, eci oco vu sukila oku u sapuila hati: “Ca popia Yehova Suku yo Isareli ceci hati: ‘Catiamẽla kolondaka wa yeva,+ 27 omo okuti utima wove wa tava* kuenda wa liketisa kovaso a Suku poku yeva olondaka viaye viatiamẽla kocitumãlo cilo kuenda kolonungi vialio kuenje wa liketisa kovaso ange loku tola uwalo wove kuenda wa lilila kovaso ange, lamevo nda ku yeva,+ eci oco Yehova a popia. 28 Eli olio esunga lieci ndi ka ku kongelela ku vakukululu yove* kuenda o ka puyuka veyambo liove lombembua kuenje ovaso ove ka a ka mola ohali yosi ndi ka nenela ocitumãlo cilo lolonungi vialio.’”’”+

Noke ovo va nena etambululo ku soma. 29 Omo liaco, soma wa tuma esapulo limue kuenda wongolola akulu vosi vo ko Yuda lava vo ko Yerusalãi.+ 30 Noke liaco, soma wa lamanela konjo ya Yehova kumue lalume vosi vo ko Yuda, olonungi vio vo Yerusalãi, ovitunda, va Lewi, omanu vosi ci kaile unene ci kaile utito. Eye wa va tangela olondaka viosi vielivulu liocisila lina lia sangiwa vonjo ya Yehova.+ 31 Soma wa talama pocitumãlo caye kuenda wa linga ocisila* cimue+ kovaso a Yehova cokuti, eye o ka kuama Yehova loku kapako ovihandeleko viaye, lolonumbi viaye kuenda oviholo viaye lutima waye wosi, lomuenyo waye wosi+ poku tẽlisa olondaka viocisila vina via sonehiwa velivulu eli.+ 32 Handi vali, eye wa vetiya vosi vana va kala vo Yerusalãi lo ko Benjamini oco va tave kondaka yaco. Kuenje olonungi vio Yerusalãi via linga ndeci ci likuata locisila ca Suku, Suku ya vakukululu yavo.+ 33 Noke Yosiya wa tundisa ovina viosi viumbondo* kolofeka viosi vi tiamẽla ku va Isareli+ kuenda wa vetiya omanu vosi va Isareli oku vumba Yehova Suku yavo. Vokuenda kuomuenyo waye wosi* ovo ka va pambukile koku kuama Yehova Suku ya vakukululu yavo.

35 Yosiya wa lingila Yehova o Paskoa+ yimue vo Yerusalãi kuenda ocilumba co Paskoa+ ca pondiwa keteke 14 liosãi yatete.+ 2 Eye wa kapa ovitunda kovopange avo kuenda wa vi vetiya oku tẽlisa upange wavo vonjo ya Yehova.+ 3 Noke eye wa sapuila va Lewi vana va kala alongisi va Isareli vosi+ haivo va kolelele ku Yehova hati: “Kapi Ocikasia ci kola vonjo yina Salomone omõla a Daviti soma yo Isareli a tunga;+ ko ka cambati vali kapepe ene.+ Kaliye talavayeli Yehova Suku yene kuenda omanu vaye va Isareli. 4 Kuenje lipongiyi ene muẽle ndomo ci likuata lolonjo via va isiene kuenda ovimunga viene, poku kuama ovina via sonehiwa la Soma Daviti+ wo ko Isareli kuenda la Salomone omõlaye.+ 5 Talami kocitumãlo ci kola, poku kala vovimunga ndeci ci likuata lolonjo via va isia vomanu* okuti, vamanjene; oco okuti pokati kovimunga viaco pa kala ocimunga cimue conjo ya va isia ya va Lewi. 6 Pondi ocilumba co Paskoa+ loku liyelisa ene muẽle kuenda lingi eliangiliyo lia vamanjene oco ku tẽlisiwe ondaka ya Yehova ya eciwile pocakati ca Mose.”

7 Yosiya wa eca komanu vosi va kalapo ci soka 30.000 koviunda okuti, ovitupi viotulomeme kuenda ovitupi viotulohombo oku kongelamo 3.000 kolongombe oco omanu va vi lumbe ko Paskoa. Ovina viaco viosi viopiwa kovokuasi a soma.+ 8 Olombuale viaye via ecavo ocilumba cimue ndocilumba ceciwa lutima wosi komanu, kovitunda kuenda ku va Lewi. Hilikiya,+ Sakariya kuenda Yehiyele okuti, asongui vonjo ya Suku yocili, va eca kovitunda ci soka 2.600 kovilumba vio Paskoa kuenda 300 kolongombe. 9 Konaniya kumue la vamanjaye Semaya la Netanele kuenda Hasiaviya, Yeyele la Yosavada okuti asongui va va Lewi, va eca ku va Lewi 5.000 kovilumba vio Paskoa kuenda 500 kolongombe.

10 Upange wa pongiyiwa kuenda ovitunda via talama povitumãlo viavo viupange kumue la va Lewi ndeci ci likuata lovimunga viavo,+ ndeci ca handelekiwile la soma. 11 Ovo va ponda ovilumba vio Paskoa+ kuenda ovitunda via nyĩla kutala osonde va tambula kokuavo+ osimbu va Lewi va kala oku upa ovipa viovinyama.+ 12 Noke ovo va pongiya ovilumba vioku pia elisi oco va vi tepaise komanu vana va kala vovimunga ndeci ci likuata lolonjo via va isiavo okuti, vi eciwa ku Yehova ndomo ca sonehiwa velivulu lia Mose; kuenje va linga ocina cimuamue lolongombe. 13 Ovo va teleka* ocilumba co Paskoa kilu liondalu ndomo ci likuata loviholo viavo;+ kuenje va telekavo ovilumba vi kola volombia viaño, volombia vinene kuenda volombia via tanda komẽla. Noke liovina viaco, va vi nena lonjanga komanu vosi vakuavo. 14 Va Lewi va lipongiyila ocilumba co Paskoa kuenda va pongiyilavo ovitunda momo ovitunda okuti ovitumbulukila via Arone, via kala oku lumba ovilumba vioku pia elisi kuenda viulela toke koñolosi. Omo liaco, va Lewi va lipongiyila ocilumba co Paskoa kuenda va pongiyilavo ovitunda okuti, ovitumbulukila via Arone.

15 Olonjimbi okuti omãla va Asafe,+ va kala povitumãlo viavo ndeci ci likuata locihandeleko ca Daviti,+ ca Asafe,+ ca Hemani kuenda ca Yedutunu+ ukuakusapuila soma ovinjonde via tunda ku Suku; kuenje vakualombundi va kala volombundi via litepa.+ Ka va kuatele esunga lioku siapo upange wavo momo, vamanjavo va Lewi va kala oku va pongiyilako ocilumba co Paskoa. 16 Omo liaco, upange wosi wa Yehova wa pongiyiwa keteke liaco oco ku lingiwe ocipito co Paskoa+ kuenda oku eca ovilumba vioku pia elisi kutala wa Yehova ndeci ci likuata locihandeleko ca Soma Yosiya.+

17 Va Isareli vana va kalako, va linga o Paskoa kotembo yaco kuenda ocipito Colombolo ka vi Kuete Etumbisa vokuenda kuoloneke epanduvali.+ 18 Tunde koloneke viuprofeto Samuele, ka kua la lingiwa o Paskoa ya lisoka ndeyi vo Isareli; kuenda layimue pokati kolosoma vikuavo vio Isareli ya linga o Paskoa ndeyi Yosiya+ a linga kumue lovitunda, va Lewi, va Yuda vosi kuenda va Isareli vana va kalapo lolonungi vio Yerusalãi. 19 O Paskoa yaco ya lingiwa kunyamo 18 wuviali wa Yosiya.

20 Noke liovina viosi evi, eci Yosiya a pongiya onembele,* Soma Neko+ wo ko Egito weya oku linga uyaki ko Karekemisi ocipepi lo Ferati. Noke Yosiya wa tunda oku u katukila.+ 21 Omo liaco, eye wa tuma olomunga kokuaye hati: “Ovina evi vi kuete hẽ cimue love, A soma yo Yuda? Ame si kasi oku iya oku ku katukila etaili, pole, uyaki wange lofeka yikuavo kuenda Suku wa popia hati, ndi sukila oku ci linga lonjanga. Oco cu ku kuatise ove muẽle, yuvula oku tamalãla la Suku una o kasi lame, nda kua ci lingile eye o ku nenela ekundu.” 22 Yosiya ka liwekelepo oku tamalãla laye, pole, wa pongolola uwalo waye okuti ka limbukiwa+ oco a liyake laye kuenda ka tavele oku yevelela olondaka via Neko vina via tunda vomẽla wa Suku. Omo liaco, eye weya oku linga uyaki Vetapi lio ko Megido.+

23 Kuenje vakualohonji va asa Soma Yosiya kuenda soma wa sapuila akuenje vaye hati: “Nundisi pocitumãlo cilo momo nda lemẽhiwa calua.” 24 Omo liaco, akuenje vaye vo upa vekãlu liuyaki yu vo kapa vekãlu liaye liavali liuyaki kuenda vo tuala ko Yerusalãi. Kuenje wa fa kuenda wa kendiwa veyambo lia vakukululu yaye+ kuenje o Yuda yosi lo Yerusalãi ya lila Yosiya. 25 Yeremiya+ wa imbila Yosiya ocisungo kuenda olonjimbi viosi vialume levi viakãi,+ viamamako oku imba eci catiamẽla ku Yosiya voku lisiõsiõla* kuavo toke etaili; ovisungo vioku lisiõsiõla via linga ociholo cimue ko Isareli kuenje ovio via sonehiwa velivulu liasiõsũilo.

26 Catiamẽla konepa yikuavo yulandu womuenyo wa Yosiya lovilinga viaye viocisola ka ci pongoloka, poku kapako ovina via sonehiwa Vocihandeleko ca Yehova, 27 lovina eye a linga oku upisa kefetikilo toke kesulilo, via sonehiwa Velivulu Liolosoma vio Isareli kuenda vio Yuda.+

36 Noke omanu vo vofeka va kuata Yehoahasi omõla a Yosiya+ kuenje vo lingisa osoma vo Yerusalãi pomangu ya isiaye.+ 2 Yehoahasi wa kuata 23 kanyamo eci a linga osoma kuenda wa viala vo Yerusalãi olosãi vitatu. 3 Pole, soma yo Kegito wo tundisa komangu yaye yusoma ko Yerusalãi kuenda wa kisika ofeka oku feta 100 kolotalendo* viopalata kuenda otalendo yimosi yulu.+ 4 Handi vali, soma Yegito wa lingisa Eliakimi manji a Yehoahasi osoma yo Yuda lo Yerusalãi kuenda wa pongolola onduko yaye okuti, Yehoyakimi; pole, manjaye Yehoahasi wa kuatiwa la Neko+ kuenje wa tualiwa Kegito.+

5 Yehoyakimi+ wa kuata 25 kanyamo eci a linga osoma kuenda wa viala 11 kanyamo vo Yerusalãi. Eye wamamako oku linga eci cĩvi kovaso a Yehova Suku yaye.+ 6 Soma Nevukandesa+ wo ko Bavulono weya oku u katukila oco o kute lalienge avali osipi loku u tuala ko Bavulono.+ 7 Nevukandesa wambata vimue pokati kovikuata vionjo ya Yehova ko Bavulono kuenje wa vi kapa velombe liaye ko Bavulono.+ 8 Catiamẽla konepa yikuavo yulandu womuenyo wa Yehoyakimi, ovina viumbondo a linga lovina viosi vĩvi viatiamẽla kokuaye, via sonehiwa Velivulu Liolosoma vio Isareli kuenda vio Yuda; kuenje omõlaye Yehoyakini wa linga osoma pomangu yaye.+

9 Yehoyakini+ wa kuata 18 kanyamo eci a linga osoma kuenda wa viala vo Yerusalãi olosãi vitatu loloneke ekũi; kuenje eye wamamako oku linga eci cĩvi kovaso a Yehova.+ 10 Kefetikilo liunyamo,* Soma Nevukandesa wa tuma oku u nena ko Bavulono+ kumue lovikuata vi kuete esilivilo vionjo ya Yehova.+ Kuenje eye wa lingisa osoma Sedekiya manji a isiaye ko Yuda lo ko Yerusalãi.+

11 Sedekiya+ wa kuata 21 kanyamo eci a linga osoma kuenda wa viala 11 kanyamo vo Yerusalãi.+ 12 Eye wamamako oku linga eci cĩvi kovaso a Yehova Suku yaye. Eye ka liketisile kovaso yuprofeto Yeremiya+ una wa vangula ndomo ca handelekiwa la Yehova. 13 Eye wa sinĩlavo Soma Nevukandesa+ una wo kisikile oku lisinga ku Suku kuenje wamamako oku kala ocimbinde* kuenda wa tĩlisa utima waye loku likala oku tiuka ku Yehova Suku ya Isareli. 14 Asongui vosi vovitunda kumue lomanu vakuavo, va kala oku lekisa ekambo lialua liekolelo poku linga ovina viosi viumbondo via enda oku lingiwa lolofeka kuenda va vĩhisa onjo ya Yehova+ yina eye a kolisile ko Yerusalãi.

15 Yehova Suku ya vakukululu yavo, wamamako oku va lungula pocakati colomunga viaye; wa va lungola olonjanja vialua momo eye wa kuatela ocikembe omanu vaye kuenda ocitumãlo caye coku kala. 16 Pole, ovo vamamako oku yola epembe olomunga via Suku yocili+ kuenda va sepula olondaka viaye+ loku fuanguila ovaprofeto vaye+ toke eci onyeño ya Yehova ya wengukila omanu vaye+ kuenda toke eci ka kua kaile vali elavoko lioku sakuiwa.

17 Omo liaco, eye wa va katuila soma ya va Kaldea+ una wa ponda amalẽhe vavo losipata+ vocitumãlo ci kola;+ eye ka lekisile ocikembe ci kaile kukuenje ale kufeko wosombo, kukulu ale ku o vela.+ Suku wa eca ovina viosi peka liaye.+ 18 Ovikuata viosi vionjo ya Suku yocili ci kaile vinene ale vitito, oku kongelamo ovokuasi vionjo ya Yehova lovokuasi a soma, levi violombuale viaye, ovina viosi wa vi nena ko Bavulono.+ 19 Eye wa timĩha onjo ya Suku yocili,+ wa lundula ocimbaka co Yerusalãi,+ wa timĩha londalu olosapalalo viosi vi kuete oviteyuilo kuenda wa nyõla ovina viosi vi kuete esilivilo.+ 20 Eye wambata kumandekua ko Bavulono vana va puluka kosipata+ kuenje va linga apika vaye+ kuenda vomãla vaye toke eci usoma* wo Persia wa fetika oku viala,+ 21 oco ku tẽlisiwe ondaka ya Yehova yina ya popiwa la Yeremiya,+ toke eci ofeka ya feta asambata aco.+ Oloneke viosi oyo ya kala elunda, yamamako oku lava esambata toke eci kua tẽlisiwa 70 kanyamo.+

22 Kunyamo watete wa Soma Kuro+ wo ko Persia, oco ku tẽlisiwe ondaka ya Yehova ya vanguiwa pocakati ca Yeremiya,+ Yehova wa vetiya espiritu lia Soma Kuro wo Persia oco a imbe oluiya lumue kuviali waye wosi luna eye a sonehavo+ poku popia hati: 23 “Ca popia Soma Kuro wo ko Persia ceci hati: ‘Yehova Suku yovailu, wa eca kokuange ovosoma osi o kilu lieve+ kuenda wa nyĩha ocikele coku u tungila onjo yimue vo Yerusalãi yina yi kasi vo Yuda.+ Helie pokati kene wa tiamẽla komanu vaye? Yehova Suku yaye a kale laye kuenda eye a lamaneleko.’”+