NEHEMIYA

1 Olondaka via Nehemiya*+ omõla a Hakaliya: Kosãi ya Kisileu* kunyamo 20, nda kala kelombe* lio Siusana.*+ 2 Kotembo yaco, Hanani+ umue pokati ka vamanjange, weya kumue lalume vakuavo vo ko Yuda kuenje ame nda va pulisa eci catiamẽla ku va Yudea va supilepo, vana va puluka kumandekua+ kuenda eci catiamẽla ko Yerusalãi. 3 Ovo va tambulula vati: “Vana va supapo voluvumba* okuti va puluka kumandekua, va kasi oku liyaka lovitangi vialua kuenda oku sepuiwa.+ Ovimbaka vio Yerusalãi via nyõliwa+ kuenda olombundi vialio via timĩhiwa londalu.”+

4 Eci nda yeva olondaka viaco, nda tumãla kuenje nda fetika oku lila, nda yeva esumuo vokuenda kuoloneke vialua. Kuenje ndamamako oku likandangiya oku lia+ kuenda nda likutilila ku Suku yo kovailu. 5 Nda popia hati: “A Yehova, a Suku yovailu, Suku unene haeve o komõhisa, una o kapako ocisila caye kuenda o lekisa ocisola ka ci pongoloka ku vana vo sole haivo va kapako ovihandeleko viaye,+ 6 mange ohenda, yevelela lutate kuenda imba ovaso kokuange oco o yevelele ohutililo yukuenje wove, yina ndi kasi oku linga etaili. Ndi likutilila kokuove uteke lutanya+ catiamẽla kakuenje vove va Isareli kuenda ndi litavela akandu ana afendeli vove va Isareli va ku lingila. Tua linga ekandu ci kaile ame kuenda omanu vange.*+ 7 Tua ku lueyela muẽle momo ka tua pokuile+ kovihandeleko, lo koviholo kuenda kovisila wa eca kukuenje wove Mose.+

8 “Linga ohenda, ivaluka ondaka wa sapuilile* ukuenje wove Mose yokuti: ‘Nda wa liwekipo oku pokola kokuange, ndi ko sanduili pokati komanu.+ 9 Pole, nda vu tiuka kokuange kuenda vu kapako ovihandeleko viange loku pokola kokuavio, ndaño okuti omanu vove va sanduiwa kesulilo liovailu, ame ndi ka vongolola+ kuenje ndi va nena kocitumãlo cina nda nõla oco ku kale onduko yange.’+ 10 Ovo akuenje vove kuenda omanu vove, vana wa yovola lunene wove wa piãla kuenda leka liove lia pama.+ 11 A Yehova linga ohenda, yevelela lutate ohutililo yukuenje wove kuenda ohutililo yakuenje vove, vana va sanjukila oku sumbila onduko yove. Linga ohenda, kuatisa ukuenje wove etaili kuenda ulume* u-u, a lekise ohenda kokuange.”+

Kotembo yaco, nda kala ukuakueca okopo ku soma.+

2 Kosãi ya Nisana,* kunyamo 20+ wa Soma Aretasesete,+ ovinyu ya kapiwa kovaso yaye kuenda ndeci nda siata oku ci linga, ndopa ovinyu kuenje nda yeca ku Soma.+ Pole, ame sia la sumuĩla kovaso aye. 2 Omo liaco soma wa ndi pula hati: “Momo lie wa sumuila calua nda ku vela? Citava okuti esumuo liovutima.” Omo liaco, nda kuata usumba walua.

3 Noke nda tambulula soma hati: “Soma amameko lomuenyo! Si sumua ndati nda olupale mua kendiwa vakukululu yange lua linga ovingululu kuenda olombundi vialio via timĩhiwa londalu?”+ 4 Kuenje soma wa ndi pula hati: “Nye o yongola oku pinga?” Vepuluvi liaco, nda likutilila ku Suku yovailu.+ 5 Kuenje nda sapuila soma hati: “Nda ci sanjuisa soma kuenda nda ukuenje wove wa sanga ohenda kovaso ove, ndi tume ko Yuda, volupale muna mua kendiwa vakukululu yange oco ndi yi tumbulule.”+ 6 Osimbu nasoma a tumãla ponele yaye, soma wa ndi pula hati: “Ungende wove u tumãla otembo yiñami kuenda o tiuka eteke lipi?” Kuenje soma wa sanjukila oku ndi tuma+ kuenda ndo sapuila otembo ndi ka kalako.+

7 Kuenje nda sapuila vali soma hati: “Nda ci sanjuisa soma, va nyĩhe ovikanda oco ndi vi ece kolonguluvulu vi sangiwa vimbo li kasi kutakelo wo Ferati*+ okuti, va ngecelela oku pita toke eci ndi pitĩla ko Yuda, 8 kuenda va nyĩhevo ukanda woku eca ku Asafe ukuakulava Usenge wa Soma oco a nyĩhe avaya oku linga olombundi Viombonge+ Yonjo* lovimbaka violupale+ kuenda vionjo ndi ka kala.” Kuenje soma wa nyĩha+ ovikanda viaco momo eka lia Suku yange lia kala lame.+

9 Noke nda pitĩla kolonguluvulu vi sangiwa vimbo li kasi kutakelo wo Ferati* kuenje nda eca kokuavo ovikanda via soma. Soma wa tumavo asongui vasualali kuenda vakuakuendela kolokavalu. 10 Eci Sambalata+ u Horone la Toviya+ u Amoni+ okuti kesongo,* va yeva okuti kueya omunu umue oco a lingile ovina viwa komanu va Isareli, ovo va tema calua.

11 Kuenje nda pitĩla ko Yerusalãi kuenda nda kalako oloneke vitatu. 12 Kuteke, nda votoka ame kumue lalume vamue, pole, sia sapuilileko omunu laumue ocisimĩlo Suku yange a kapa vutima wange catiamẽla kovina nda laikele oku lingila o Yerusalãi kuenda siambatele ocinyama lacimue, te lika cina nda kala oku endela. 13 Eci nda tunda luteke, nda pita Pombundi Yocimbota+ kuenje nda pita kovaso Yono Yonyõha Yinene kuenda nda enda toke Pombundi Yondunda Yetiko.+ Kuenje nda kũlĩhĩsa ovimbaka vio Yerusalãi vina via nyõliwile kuenda olombundi vialio via timĩhiwile londalu.+ 14 Noke nda pita ocipepi Lombundi yo Kono+ lo Pociva ca Soma kuenda ka kua kaile onjila oco ocinyama nda kala oku endela ci pitemo. 15 Pole, ndamamako oku lamana ocimbota*+ vokuenda kuteke loku kũlĩhĩsa ocimbaka, noke nda tiuka, nda iñilila Pombundi Yocimbota kuenje nda tiukila konjo.

16 Va kalei kolombiali+ ka va kũlĩhĩle oku nda endele leci nda kala oku linga, momo handi sia sapuilile lacimue ku va Yudea ndaño kovitunda, kolombuale, ku va kalei kolombiali kuenda kolonalavayi vikuavo. 17 Oku sulako nda va sapuila hati: “Ene vu lete okuti tu kasi vekalo limue lĩvi okuti, o Yerusalãi ya linga ovingululu kuenda olombundi vialio via timĩhiwa londalu. Enjui tu tumbululi ovimbaka vio Yerusalãi oco oyo ka yi kamameko lekalo liaco lĩvi.” 18 Kuenje nda va sapuila ndomo eka lia Suku yange lia kala lame+ kuenda ovina soma a ndi sapuila.+ Noke va popia vati: “Tu fetiki oku tumbulula.” Omo liaco, ovo va li pamisa pokati* oco va linge upange waco uwa.+

19 Eci Sambalata u Horone la Toviya+ u Amoni+ okuti kesongo* kuenda Geseme u Arabia+ va ci yeva, va fetika oku tu pembula+ loku tu sepula vati: “Nye vu kasi oku linga? Vu kasi hẽ oku sinĩla soma?”+ 20 Kuenje nda tambulula hati: “Suku yovailu o ka tu kuatisa+ kuenda etu tuakuenje vaye, tu fetika oku tumbulula; pole, ene ka vu kuete onepa layimue, ndaño omoko, ale onjivaluko vo Yerusalãi.”+

3 Eliasivi+ ocitunda cinene kuenda vamanjaye ovitunda, va fetika oku tumbulula Ombundi Yolomeme.+ Ovo va yi kolisa*+ kuenda va yi kapa apito; va yi kolisa toke Kosapalalo yo Hameya+ kuenda toke Kosapalalo yo Hananele.+ 2 Kuenje alume vo ko Yeriko+ va tumbulula onepa ya kuamamo; kuenda Sakuru omõla a Imiri wa tumbulula onepa ya kuamamo.

3 Omãla va Hasena va tumbulula Ombundi Yolõsi;+ ovo va kapa avaya kokualio,+ noke va kapa apito, olomimbiliko kuenda ovikundiko. 4 Noke Meremoti+ omõla a Urija omõla a Hakosi wa linga upange woku semũlũla onepa ya kuamamo kuenda Mesiulama+ omõla a Berekiya omõla a Mesiesavele wa linga upange woku semũlũla onepa ya kuamamo kuenda Sadoke omõla a Bahana wa linga upange woku semũlũla onepa ya kuamamo. 5 Va Tekoa+ va linga upange woku semũlũla onepa ya kuamamo, pole, alume va kemãla pokati kavo, ka va lekisile umbombe oco va kuame* olonumbi viasongui vavo vupange.

6 Yoyada omõla a Paseha kuenda Mesiulama omõla a Besodeya va semũlũla Ombundi Yolupale Luosimbu;+ va kapa avaya kokualio, noke va kapa apito, olomimbiliko kuenda ovikundiko. 7 Melatiya u Giveone+ kuenda Yadono u Meronote, va linga upange woku semũlũla onepa ya kuamamo, ovo alume vo ko Giveone kuenda vo ko Misipa+ vana va kala vemẽhi liuviali* wonguluvulu yi sangiwa vimbo li kasi kutakelo wo Ferati,*+ 8 Usiyele omõla a Harihaya okuti, umue pokati ka vakuakupanga ovikuata viulu, wa linga upange woku semũlũla onepa ya kuamamo; kuenje Hananiya umue pokati ka vakuakupanga* ulela welemba liwa, wa linga upange woku semũlũla onepa ya kuamamo; noke ovo va kandela lovawe o Yerusalãi toke Kocimbaka ca Sanjavala.+ 9 Refaya omõla a Huru okuti, ombuale yonepa yimue yocivanja co Yerusalãi, wa linga upange woku semũlũla onepa ya kuamamo. 10 Yedaya omõla a Harumafa, wa linga upange woku semũlũla onepa ya kuamamo kovaso yonjo yaye muẽle kuenda Hatusi omõla a Hasiaviniya, wa linga upange woku semũlũla onepa ya kuamamo.

11 Malikiya omõla a Harimi+ la Hasiuvu omõla a Pahati-Moavi,+ va semũlũla onepa yikuavo* kuenda Osapalalo Yolofolono.+ 12 Sialume omõla a Halohesi okuti, ombuale yonepa yimue yocivanja co Yerusalãi, wa linga upange woku semũlũla onepa ya kuamamo kumue lomãla vaye vakãi.

13 Hanuni kuenda olonungi vio ko Sanoha,+ va semũlũla Ombundi Yocimbota;+ ovo va yi tumbulula noke va yi kapa apito, lolomimbiliko kuenda ovikundiko. Kuenje va semũlũla eci ci soka 1.000 kovikeya* oku upisa kocimbaka toke Kombundi Yetiko.+ 14 Malikiya omõla a Rekava ombuale yocivanja co Bete-Hakereme,+ wa semũlula Ombundi Yetiko; eye wa yi tumbulula noke wa yi kapa apito, lolomimbiliko kuenda ovikundiko.

15 Sialume omõla a Kolohose, ombuale yocivanja co Misipa+ wa semũlula Ombundi yo Kono;+ eye wa yi tumbulula, wa yi yambela noke wa kapa apito, lolomimbiliko kuenda ovikundiko kuenje wa semũlũlavo ocimbaka Cociva+ co Sila* ocipepi Locumbo ca Soma,+ toke Kosikata+ yi loka oku upisa Volupale lua Daviti.+

16 Nehemiya omõla a Asibuke okuti, ombuale yonepa yimue yocivanja co Betesure,+ wa linga upange woku semũlũla onepa ya kuamamo oku upisa kovaso Yocitumãlo kua Kendiwa Daviti,+ oku pita kociva+ ca tumbuluiwa toke Konjo Yalume va Pamele Calua.

17 Va Lewi va linga upange woku semũlũla onepa ya kuamamo: ovo va songuiwa la Rehumu omõla a Bani; kuenje Hasiaviya ombuale yonepa yimue yocivanja co Keila+ wa linga upange woku semũlũla onepa ya kuamamo yocivanja caye. 18 Vamanjavo va linga upange woku semũlũla onepa ya kuamamo: Ovo va songuiwa la Bavai omõla a Henadada okuti, ombuale yonepa yimue yocivanja co Keila.

19 Eseri omõla a Yesiua+ okuti, ombuale yo ko Misipa wa semũlũla onepa yikuavo ya kuamamo kovaso yoku lamanela Konjo Yovota ocipepi Longunji.+

20 Baruke omõla a Sabai+ wa lekisa ombili poku talavaya kuenda wa semũlula onepa yikuavo ya kuamamo, oku upisa Kongunji toke koku iñilila kuonjo ya Eliasivi+ ocitunda cinene.

21 Meremoti+ omõla a Uriya omõla a Hakosi wa semũlũla onepa yikuavo ya kuamamo, oku upisa koku iñilila kuonjo ya Eliasivi toke kesulilo lionjo ya Eliasivi.

22 Ovitunda okuti, alume vo vocivanja co Yordão,*+ va linga upange woku semũlũla onepa ya kuamamo. 23 Benjamini kuenda Hasiuvu va linga upange woku semũlũla kovaso yonjo yavo muẽle. Noke, Asariya omõla a Maaseya omõla a Ananiya wa linga upange woku semũlũla onepa ya kuamamo ocipepi lonjo yaye. 24 Binui omõla a Henadada, wa semũlũla onepa ya kuamamo oku upisa konjo ya Asariya toke Kongunji+ kuenda kevindi liocimbaka.

25 Palala omõla a Ucai wa linga upange woku semũlũla konepa ya kuamamo kovaso Yongunji kuenda kosapalalo yi tunda Konjo* ya Soma,+ yi kasi konano okuti yi sangiwa Kocitali Colondavululi.+ Pedaya omõla a Parosi wa linga upange woku semũlũla onepa ya kuamamo.+

26 Vakuakutata onembele*+ okuti va kala ko Ofele,+ va linga upange woku semũlũla toke kovaso Yombundi+ Yovava kutundilo kuenda kosapalalo ya tungihinyiwako.

27 Va Tekoa+ va linga upange woku semũlũla onepa ya kuamamo, oku upisa kosapalalo yinene ya tungihinyiwako toke kocimbaka co Ofele.

28 Ovitunda via linga upange woku semũlũla kilu Liombundi Yolokavalu,+ omunu lomunu kovaso yonjo yaye muẽle.

29 Sadoke+ omõla a Imere wa linga upange woku semũlũla onepa ya kuamamo kovaso yonjo yaye muẽle.

Semaya omõla a Sekaniya ukuakulava Ombundi yo Kutundilo,+ wa linga upange woku semũlũla onepa ya kuamamo.

30 Hananiya omõla a Selemiya kuenda Hanuni omõla wepandu wa Salafa, va semũlũla onepa ya kuamamo.

Mesiulama+ omõla a Berekiya wa linga upange woku semũlũla onepa ya kuamamo kovaso yonjo* yaye muẽle.

31 Malikiya umue pokati ka vakuakupanga ovikuata viulu, wa linga upange woku semũlũla onepa ya kuamamo toke konjo ya vakuakutata onembele*+ kuenda ya vakualomĩlu yina yi kasi kovaso Yombundi Yoku Kũlĩhĩsa toke kolusoka luohondo yi kasi kevindi liocimbaka.

32 Kuenje vakuakupanga ovikuata viulu kuenda vakualomĩlu, va linga upange woku semũlũla pokati kolusoka luohondo yi kasi kevindi liocimbaka kuenda Kombundi Yolomeme.+

4 Eci Sambalata+ a yeva okuti tu kasi oku tumbulula ocimbaka, eye wa tema kuenda wa sumua calua kuenje wa fetika oku pembula va Yudea. 2 Kovaso a vamanjaye lo kovaso yasualali vo ko Samaria, wa popia hati: “Nye va Yudea ava va hongua va kasi oku linga? Anga hẽ ovo va ka tẽla oku linga upange waco longusu yavo muẽle? Anga hẽ va ka eca ovilumba? Va ka mala hẽ upange waco veteke limosi? Va ka tẽla hẽ oku tumbulula ovawe ana a timĩhiwa londalu pokati kondunda yovimalañanya viovawe?”+

3 Toviya+ u Amoni+ okuti, wa kala ocipepi laye wa popia hati: “Ndaño muẽle ombulu yimue, yi tẽla oku nyõla ocimbaka covawe va kasi oku tunga nda ya londako.”

4 Yevelela A Suku yetu, momo tu kasi oku pembuiwa+ kuenda ecelela okuti, olondaka viavo vioku tu pembula vi tiukila kokuavo*+ kuenje vambatiwe kofeka yumandekua. 5 Ku ka yuvule oku kapako ongole yavo kuenda ku ka ecelele okuti, ekandu liavo li ivaliwa kovaso yove,+ momo va pembula vakuakutunga.

6 Omo liaco, tuamamako oku tunga ocimbaka kuenda ocimbaka cosi ca tumbuluiwa toke pokati koku lepa kualio kuenje omanu vamamako oku tiamisila utima wavo kupange.

7 Eci Sambalata, Toviya,+ va Arabia,+ va Amoni kuenda va Asidode+ va yeva okuti, ovimbaka vio Yerusalãi via kala oku amamako oku semũlũiwa kuenda apangu a kala oku sitikiwa, ovo va kuata onyeño yalua. 8 Vosi yavo va likongela oco va linge uyaki lo Yerusalãi kuenda va linga ombuanja yalua. 9 Pole, tua likutilila ku Suku yetu kuenje tua kapa olondavululi utanya luteke oco vi tu teyuile mekonda liavo.

10 Pole, omanu vo ko Yuda va kala oku popia vati: “Ongusu yolonalavayi* ya tepuluka calua kuenda kuli ondunda yovimalañanya vialua; lalimue eteke tu ka tẽla oku tumbulula ocimbaka.”

11 Kuenje ovanyãli vetu vamisako loku popia vati: “Osimbu ka va ci limbukile ale ka va tu muile, tu ka iñila pokati kavo, tu ka va ponda kuenda tu imũla upange wavo.”

12 Olonjanja viosi eci va Yudea vana va kala ocipepi lavo va enda oku iñila vo Yerusalãi, va enda oku tu sapuila olonjanja vialua* vati: “Ovo va laika oku tu katukila kolonepa viosi.”

13 Omo liaco, ame nda kapa alume kolonepa vina ka via lepele konyima yocimbaka okuti, ca lelukile ovanyãli oku iñila kuenje nda kapa alume vaco epata lepata lolosipata viavo, lolonjelia viavo kuenda lolohonji viavo. 14 Eci nda limbuka okuti va kala lusumba, vepuluvi liaco, nda ka vanguile lolombuale,+ la vakalei kolombiali kuenda lomanu vakuavo hati: “Ko ka va kuateli usumba.+ Ivaluki Yehova una okuti, unene kuenda o komõhisa;+ yakeliko vamanjene, omãla vene valume, omãla vene vakãi, akãi vene kuenda olonjo viene.”

15 Eci ovanyãli vetu va mola okuti, tua limbuka eci ovo va kala oku linga kuenda Suku yocili wa tateka ovisimĩlo viavo, vosi yetu tua tiukila koku talavaya kocimbaka. 16 Oku upisa keteke liaco, onepa yimue yalume vange ya endaenda oku linga upange+ kuenda onepa yikuavo ya enda oku limalẽha lolonjelia, loviyepelo, lolohonji kuenda ovikutu viovivela. Kuenje olombuale+ via kuatisa* vosi vakuanjo ya Yuda, 17 vana va kala oku tunga ocimbaka. Vana va kala oku ambata ovilemo, va kala oku linga upange leka limue osimbu eka likuavo li kuata uta.* 18 Omunu lomunu ukuakutunga wa somẽha osipata yimue vombunda yaye osimbu a tunga kuenje ulume una ukuakusika olumbeta+ wa kala ponẽle yange.

19 Noke nda sapuila olombuale, vakalei kolombiali kuenda omanu vakuavo hati: “Upange unene haiwo walua kuenda tua lisanduila kocimbaka okuti, omunu lomunu o kasi ocipãla lukuavo. 20 Eci vu yeva ocileñi columbeta, likongeli kokuetu kuosi tu kasi. Suku yetu, o ka tu yakelako.”+

21 Omo liaco, tuamamako oku linga upange osimbu onepa yikuavo ya limalẽha lolonjelia, oku upisa koku tunda kuekumbi toke eci olombungululu via molẽha. 22 Kotembo yaco, nda sapuila omanu hati: “Ulume lulume kumue loñuatisi yaye, va pite uteke vokati ko Yerusalãi kuenda ovo va ka tu lava kuteke kuenje va ka talavaya vokuenda kutanya.” 23 Noke ame kumue la vamanjange, oloñuatisi viange+ kuenda vakuakulava vana va enda oku ndi kuama, lalimue eteke tua pongoluile uwalo wetu wo ketimba kuenje omunu lomunu pokati ketu wamamako oku kala luta waye peka liondio.

5 Kuenje alume kuenda akãi vavo va fetika oku lisiõsiõla calua omo lia vamanjavo va Yudea.+ 2 Vamue va kala oku popia vati: “Etu lomãla vetu valume kuenda omãla vetu vakãi tualua. Tu sukila okulia oco tu lie okuti, tuamamako lomuenyo.” 3 Vakuavo va kala oku popia vati: “Tu kasi oku eca ovapia etu, oviumbo vietu viayuva kuenda olonjo vietu ndonjeke, oco tu sange olomema omo liekambo liokulia.” 4 Handi vakuavo, va kala oku popia vati: “Tua levala olombongo poku eca ovapia etu loviumbo vietu viayuva oco tu fete ulambu wa soma.+ 5 Etu la vamanjetu tuakuepata limuamue losonde yimuamue* kuenda omãla vetu va kasi ndomãla vavo; pole, ndaño ndoco lopo tu kasi oku eca omãla vetu valume lava vakãi ndapika kuenje vamue pokati komãla vetu vakãi, va linga ale apika.+ Pole, ka tu tẽla oku imũla ovina viaco momo, ovapia etu loviumbo vietu viayuva via linga viomanu vakuavo.”

6 Eci nda yeva oku lisiõsiõla kuavo kuenda olondaka viaco, nda tema calua. 7 Noke nda sokolola ovina viaco vutima wange kuenje nda sapela lolombuale kuenda vakalei kolombiali poku popia hati: “Vosi yene vu kasi oku kisika vamanjene oku feta osindike.”+

Handi vali, nda linga esokiyo liohongele yimue yinene mekonda liavo. 8 Kuenje nda va sapuila hati: “Tua likolisilako oku landa vamanjetu va Yudea vana va landisiwile kolofeka; pole, anga hẽ cilo vu landisa vamanjene+ okuti noke tu va landa vali?” Vepuluvi liaco, ka va popele ondaka layimue momo ka va kuatele lacimue coku popia. 9 Noke nda popia hati: “Eci vu kasi oku linga ka ca sungulukile. Ka vu sukila hẽ oku endela volonjila via Suku* yetu+ oco olofeka kuenda ovanyãli vetu ka va ka tu pembule? 10 Handi vali, ame la vamanjange kuenda oloñuatisi viange, tu kasi oku va levalisa olombongo kuenda okulia. Tu liwekipo oku levalisa losindike.+ 11 Lingi ohenda tiuwiyi etaili ovapia avo,+ oviumbo viavo viayuva, oviumbo viavo vio oliveira kuenda olonjo viavo kumue losindike yolombongo,* yolomema, yovinyu yokaliye kuenda yulela vu kasi oku kisika kokuavo ndosindike.”

12 Ovo va tambulula vati: “Tu tiuwiya ovina viaco kokuavo kuenda ka tu va kisika lacimue. Tu linga ndomo wa popia.” Omo liaco, nda vilikiya ovitunda kuenje nda vetiya alume vaco oku lisila okuti, va tẽlisa ohuminyo yaco. 13 Noke nda tutumũla esusu liuwalo* wange kuenje nda popia hati: “Ndomo nda ci linga, Suku yocili a tutumũlevo onjo kuenda ovina viosi viomunu una okuti, ka tẽlisa ohuminyo eyi kuenje lonjila yimuamue, omunu waco o sukila oku tutumũiwa okuti, ka kuata cimue.” Omo liaco, ekongelo liosi lia popia liti: “Amene!”* Kuenje ovo va sivaya Yehova kuenda omanu va linga ndeci va likuminya.

14 Handi vali, oku upisa keteke soma a ndi nõla oco ndi kale nguluvulu yavo+ kofeka yo Yuda, oku upisa kunyamo 20+ toke 32 wuviali+ wa Soma Aretasesete+ okuti, ci soka 12 kanyamo, ci kaile ame ale vamanjange ka tua lile okulia nguluvulu a sesamẽla oku lia.+ 15 Pole, olonguluvulu vina via ndi lianga, via enda oku kisika komanu ovina ka va tẽla kuenda oku va kisika oku eca eci ci soka 40 kolosiekele* viopalata oco va lande ombolo lovinyu eteke leteke. Oloñuatisi viavo via enda oku tata lãvi omanu. Pole, ame sia ci lingile+ omo lioku sumbila Suku.+

16 Handi vali, nda panga onepa kupange woku tumbulula ocimbaka eci kuenda ka tua tambuile epia lalimue;+ oloñuatisi viange viosi via liongoluile kocitumãlo caco oco vi linge upange. 17 Kua kala eci ci soka 150 ya va Yudea kuenda vakalei kolombiali, vana va enda oku lia komesa yange, oku kongelamo vana va tunda kolofeka vi lisungue letu. 18 Oloneke viosi va enda oku ndi pongiyila* ongombe yimosi, olomeme epandu via velapo kuenda olonjila kuenje olonjanja viosi eci pa pita oloneke ekũi, tua enda oku kuata ovinyu yalua ya litepa. Pole, ndaño lovina viaco, sia kisikile okulia ku sesamẽla onguluvulu, momo omanu va kuatele ale upange walua woku linga. 19 Njivaluke lohenda* A Suku yange, omo liovina viosi nda lingila omanu ava.+

6 Eci Sambalata, Toviya,+ Geseme u Arabia+ kuenda ovanyãli vetu vakuavo va va sapuila okuti, nda tumbulula ocimbaka+ kuenda apangu osi a sitikiwa (ndaño okuti kotembo yaco handi sia kapele apito polombundi),+ 2 vepuluvi liaco, Sambalata kuenda Geseme va tuma esapulo eli kokuange vati: “Enju oco tu sokiye epuluvi lioku lisanga vovaimbo o Kocimbota Covetapi lio Ono.”+ Ovo, va kala oku sokiya ongombo yoku ndi linga lavĩ. 3 Kuenje nda tuma olomunga kokuavo oco va va sapuile vati: “Ñasi lupange walua, ka citava oku ka lisanga lene. Momo lie upange u tatekiwila oco ndi ka lisange lene?” 4 Ovo va ndi tumisa esapulo limuamue olonjanja vikuãla kuenje nda eca kokuavo etambululo limuamue olonjanja viosi.

5 Noke Sambalata wa tuma oñuatisi yaye kokuange onjanja yatãlo lesapulo limuamue kuenda ukanda umue peka liaye okuti, ka wa yikiwile. 6 Vukanda waco, mua sonehiwile ndoco: “Kua yeviwa pokati kolofeka okuti, ove kuenda va Yudea, vu kasi oku sokiya oku linga usuanji kuenda Geseme+ o kasivo oku popia ondaka yaco.+ Eli olio esunga lieci vu kasilili oku tumbuluila ocimbaka; kuenda ovolandu a lekisa okuti, ove o kala soma yavo. 7 Handi vali, ove wa nõla ovaprofeto oco va popie ovina viatiamẽla kokuove vo Yerusalãi hati: ‘Ko Yuda kuli osoma yimue!’ Kuenje cilo ovina evi vi ka sapuiwa ku soma. Omo liaco, enju oco tu lisapele pokati catiamẽla kondaka yaco.”

8 Pole, nda tuma kokuaye etambululo liokuti: “Eci o kasi oku popia hacoko ca pita; ovina evi o kasi oku viupa vovisimĩlo* viove muẽle.” 9 Vosi yavo va kala oku seteka oku tu lingisa usumba poku popia vati: “Ovaka avo ka a ka kuata ongusu yoku linga upange kuenda owo ka u ka tẽlisiwa.”+ Cilo ndi likutilila, a Suku pamisa ovaka ange.+

10 Noke, nda enda konjo ya Semaya omõla a Delaya omõla a Mehetavele osimbu a kalako lika liaye. Eye wa popia hati: “Tu linge esokiyo lioku lisanga konjo ya Suku yocili vokati konembele kuenda tu yike apito onembele momo ovo va kasi oku iya oco va ku ponde. Ovo va kasi oku iya oco va ku ponde luteke.” 11 Pole, ame nda popia hati: “Anga hẽ ulume wa soka ndame o sukila oku tila? Anga hẽ ulume wa soka ndame iñila vonembele kuenje o kala lomuenyo?+ Si iñilamo!” 12 Noke nda limbuka okuti Suku ko tumile, pole, Toviya kuenda Sambalata+ vo feta oco a popie ocitumasuku eci catiamẽla kokuange. 13 Eye vo feta oco a ndingise usumba loku ndi kokela oku linga ekandu okuti, ovo va kuata evelo lioku nyõla oluhimo luange loku ndi kutisa osõi.

14 A Suku yange, ivaluka Toviya+ la Sambalata kumue lovilinga viavo kuenda ivalukavo Noadiya uprofeto ukãi, kumosi lovaprofeto vakuavo vana va seteka oku ndingisa usumba olonjanja vialua.

15 Kuenje ocimbaka ca malusuiwa keteke 25 kosãi ya Yelulu* vokuenda kueci ci soka 52 koloneke.

16 Eci ovanyãli vetu vosi va ci yeva kuenda olofeka viosi via lisunguile letu via ci mola, va kuata osõi*+ yalua kuenje va limbuka okuti, upange waco wa tẽlisiwa omo liekuatiso lia Suku yetu. 17 Koloneke viaco, olombuale+ vio ko Yuda via kala oku tuma ovikanda vialua ku Toviya kuenda Toviya wa enda oku vi tambulula. 18 Omanu valua ko Yuda va lisilile oku pokola kokuaye momo wa kuelele omõla ufeko wa Sekaniya omõla a Ara+ kuenda Yehohanana omõlaye ulume, wa kuelele omõla ukãi a Mesiulama,+ omõla a Berekiya. 19 Handi vali, olonjanja viosi va enda oku ndi sapuila ovina viwa viatiamẽla kokuaye kuenda va enda oku u sapuilavo ovina nda popia. Kuenje Toviya wa enda oku tuma ovikanda oco a ndingise usumba.+

7 Eci ocimbaka ca malusuiwa oku tumbuluiwa,+ nda kapa apito;+ noke vakualombundi,+ olonjimbi+ kuenda va Lewi+ va tambula ovikele. 2 Kuenje nda eca ocikele coku tata o Yerusalãi ku manjange Hanani+ kuenda ku Hananiya kesongo Kombonge,+ momo Hananiya wa kala ulume umue wa koleliwa kuenda eye wa sumbilile Suku yocili+ okuti, omanu valua vakuavo ci sule. 3 Omo liaco, nda va sapuila siti: “Olombundi vio Yerusalãi ka citava okuti, vi yikuiwa osimbu utanya ka wa tuile kuenje osimbu vakuambundi va talama oku lava, ovo va sukila oku yika apito loku a kapa ovikundiko. Eci kolonungi vio Yerusalãi ocikele coku kala olondavululi, omunu lomunu locitumãlo caye coku lava kuenda omunu lomunu kovaso yonjo yaye muẽle.” 4 Olupale lua tandele haluo lunene, pole, mua kala etendelo litito liomanu+ kuenda olonjo ka via tumbuluiwile handi.

5 Pole, Suku yange wa eca kokuange ocisimĩlo* coku liongolola lolombuale, vakalei kolombiali kuenda omanu oco va sonehiwe vulala umue okuti, epata lepata.+ Noke nda sanga elivulu mua sonehiwa ulala wepata lepata wa vana va tiuka tete kuenje nda sanga okuti, mua sonehiwa ndoco:

6 Ava ovo va kala omanu vo voluvumba* vana va tunda kumandekua okuti, vana Soma Nevukandesa+ wo ko Bavulono ambatele kumandekua+ okuti, noke va tiukila ko Yerusalãi lo ko Yuda, omunu lomunu volupale luaye muẽle.+ 7 Ovo veya la Seruvavele,+ la Yesiua,+ la Nehemiya, la Asariya, la Raamiya, la Nahamani, la Mordekai, la Bilisiana, la Mesiperete, la Bigivai, la Nehuma kuenda Baana.

Vetendelo lialume va Isareli mua kongelele:+ 8 omãla va Parosi, 2.172; 9 omãla va Sefatiya, 372; 10 omãla va Ara,+ 652; 11 omãla va Pahati-Moavi,+ pokati komãla va Yesiua kuenda va Yoava,+ 2.818; 12 omãla va Elami,+ 1.254; 13 omãla va Satu, 845; 14 omãla va Sakai, 760; 15 omãla va Binui, 648; 16 omãla va Bevai, 628; 17 omãla va Asigadi, 2.322; 18 omãla va Adonikama, 667; 19 omãla va Bigivai, 2.067; 20 omãla va Adini, 655; 21 omãla va Atere okuti, va kala ovitumbulukila via Hesekiya, 98; 22 omãla va Hasiumi, 328; 23 omãla va Besai, 324; 24 omãla va Harifi, 112; 25 omãla va Giveone,+ 95; 26 alume vo ko Beteleme kuenda vo ko Netofa, 188; 27 alume vo ko Anatote,+ 128; 28 alume vo ko Betasimawete, 42; 29 alume vo ko Kiriyata-Yeari,+ vo ko Kefira kuenda vo ko Berote,+ 743; 30 alume vo ko Rama kuenda vo ko Geva,+ 621; 31 alume vo ko Mikimasa,+ 122; 32 alume vo ko Betele+ kuenda vo ko Hai,+ 123; 33 alume vo ko Nevo yikuavo, 52; 34 omãla va Elami ukuavo, 1.254; 35 omãla va Harimi, 320; 36 omãla va Yeriko, 345; 37 omãla va Lode, va Hadida kuenda va Ono,+ 721; 38 omãla va Senaa, 3.930.

39 Ovitunda:+ omãla va Yedaya vakuepata lia Yesiua, 973; 40 omãla va Imere, 1.052; 41 omãla va Pasihuri,+ 1.247; 42 omãla va Harimi,+ 1.017.

43 Va Lewi:+ omãla va Yesiua, ukuepata lia Kadimiyele,+ umue pokati komãla va Hodewa, 74. 44 Olonjimbi:+ omãla va Asafe,+ 148. 45 Vakualombundi:+ omãla va Sialume, omãla va Atere, omãla va Talimoni, omãla va Akuve,+ omãla va Hatita, omãla va Siovai, 138.

46 Vakuakutata onembele:*+ omãla va Siha, omãla va Hasiufa, omãla va Tabaote, 47 omãla va Kerosi, omãla va Sia, omãla va Padone, 48 omãla va Levana, omãla va Hagava, omãla va Sialimai, 49 omãla va Hanana, omãla va Gidele, omãla va Gahara, 50 omãla va Raya, omãla va Recini, omãla va Nekoda, 51 omãla va Gasama, omãla va Usa, omãla va Paseha, 52 omãla va Besai, omãla va Meunimi, omãla va Nefusiesimi, 53 omãla va Bakibuku, omãla va Hakufa, omãla va Harihuri, 54 omãla va Baciliti, omãla va Mehida, omãla va Harisia, 55 omãla va Barikosi, omãla va Sisera, omãla va Tema, 56 omãla va Neciya kuenda omãla va Hatifa.

57 Omãla vapika va Salomone:+ omãla va Sotai, omãla va Soferete, omãla va Perida, 58 omãla va Yaala, omãla va Darikone, omãla va Gidele, 59 omãla va Sefatiya, omãla va Hatile, omãla va Pokerete-Hasebayimi, omãla va Amoni. 60 Vosi vakuakutata onembele*+ kuenda omãla vapika va Salomone va kala 392.

61 Kuenje ava ovo va lamana oku upisa ko Telemela, ko Teleharisia, ko Keruvi, ko Adone kuenda ko Imere, pole, ka va tẽlele oku kũlĩhĩsa olonjo via va isiavo kuenda usitue wavo, nda va kala va Isareli ale sio:+ 62 omãla va Delaya, omãla va Toviya, omãla va Nekoda, 642. 63 Kuenje pokati kovitunda: omãla va Hobaya, omãla va Hakosi,+ omãla va Barisilai, una wa kuela ukãi umue pokati komãla vakãi va Barisilai+ u Gileada haeye wa tukuiwa londuko yepata liaco. 64 Ovo va sandiliya olonduko viavo, pokati kolonduko viapata osi, pole, ka va tẽlele oku vi sanga kuenje vopiwa ovikele vioku kala ovitunda.*+ 65 Nguluvulu*+ wa va sapuila okuti, ka citava oku lia kovina vi kola+ koku kola toke eci ku kala ocitunda cimue okuti, ci konomuisa o Urimi lo Tumimi.+

66 Etendelo liomanu vosi va kala vekongelo lia soka 42.360,+ 67 vetendelo liaco, ka mua kongelele apika+ valume lava vakãi va soka 7.337; kua kalavo 245 kolonjimbi vialume kuenda olonjimbi viakãi.+ 68 Olokavalu viavo via soka 736, olomula viavo via soka 245, 69 olongamelo viavo via soka 435, ovimbulu viavo via soka 6.720.

70 Vamue pokati kasongui volonjo via va isia va eca olombanjaile vioku kuatisa kupange.+ Nguluvulu* wa eca kohondo yoku seleka ukuasi eci ci soka 1.000 kolodracma* viulu, 50 katiyela kuenda 530 kovowalo ovitunda.+ 71 Vamue pokati kasongui volonjo via va isia va eca kohondo yoku seleka ukuasi woku kuatisa kupange eci ci soka 20.000 kolodracma viulu kuenda 2.200 kolomina* viopalata. 72 Kuenda omanu vakuavo va eca eci ci soka 20.000 kolodracma viulu, 2.000 kolomina viopalata kuenda 67 kovowalo ovitunda.

73 Kuenje ovitunda, va Lewi, vakualombundi, olonjimbi,+ vamue pokati komanu, vakuakutata onembele* kuenda va Isareli vosi vakuavo, va tunga valupale avo.+ Eci osãi yepanduvali ya pitĩla,+ va Isareli* va kala ale valupale avo.+

8 Omanu vosi va liongoluila vokololo lutima umuamue kovaso Yombundi Yovava+ kuenje va sapuila Esera+ ukuavisonehua oco a nene elivulu Liocihandeleko ca Mose,+ cina Yehova a handelekele va Isareli.+ 2 Omo liaco, keteke liatete liosãi yepanduvali, Esera ocitunda wa nena elivulu Liocihandeleko kovaso yekongelo+ okuti, pa kongelele alume, lakãi kuenda vosi vana va ponduile oku yevelela loku kuata elomboloko.+ 3 Noke eye wa tanga elivulu liaco+ lolukandi vokololo kovaso Yombundi Yovava, oku upisa komẽle toke ekumbi pongunji kuenda wa li tangela kalume, kakãi lo komanu vosi va ponduile oku kuata elomboloko; kuenje omanu va yevelela lutate+ ovina via kala oku tangiwa velivulu Liocihandeleko. 4 Noke Esera ukuavisonehua wa talamele kembumbua limue liavaya lia pangiwila epuluvi liaco; konele yaye yondio kua talamele Matitiya, Sema, Anaya, Uriya, Hilikiya kuenda Maaseya; konele yaye yepĩli kua kala Pedaya, Misaeli, Malikiya,+ Hasiumi, Hasiabadana, Sakariya kuenda Mesiulama.

5 Esera wa yikuila elivulu kovaso yomanu vosi, momo eye wa kala pocitumãlo cimue ca lepa okuti, apa omanu vosi va kala ci sule. Eci eye a yikula elivulu liaco, omanu vosi va votoka. 6 Noke Esera wa sivaya Yehova Suku yocili, Suku unene kuenje omanu vosi va tambulula vati: “Amene!* Amene!”+ noke va tulika ovaka avo. Kuenje va petama loku kekamẽla Yehova lovipala viavo posi. 7 Yesiua, Bani, Sereviya,+ Yamini, Akuve, Siabetai, Hodiya, Maaseya, Kelita, Asariya, Yosavada,+ Hanana kuenda Pelaya okuti va Lewi, va kala oku lomboluila Ocihandeleko komanu+ osimbu omanu vamamako oku talama. 8 Kuenje ovo vamamako oku tanga lolukandi elivulu okuti, Ocihandeleko ca Suku yocili, loku ci lombolola lutate kuenda oku eca elomboloko liaco; kuenje va kuatisa omanu oku kuata elomboloko liovina via kala oku tangiwa.+

9 Nehemiya una wa kala nguluvulu* la Esera+ ocitunda haeye ukuavisonehua kuenda va Lewi okuti, va kala oku longisa omanu, va sapuila omanu vosi vati: “Eteke lietaili li kola ku Yehova Suku yene.+ Ko ka lisiõsiõli ale oku lila.” Momo omanu vosi va kala oku lila eci va yeva olondaka Viocihandeleko. 10 Nehemiya wa va sapuila hati: “Kuendi, li ovina via velapo* kuenda nyui evi vi sõsa loku tumisavo okulia+ ku vana ka va kuete cimue ca pongiyiwa; momo eteke lietaili li kola ku Ñala yetu kuenda ko ka sumui momo esanju li tunda ku Yehova, olio ongusu yene.” 11 Kuenje va Lewi va kala oku lembeleka omanu poku va sapuila vati: “Ko ka lili! momo eteke lietaili li kola kuenda ko ka sumui.” 12 Omo liaco, omanu vosi va enda oco va ka lie kuenda oku nyua loku tumisa okulia ku vakuavo kuenje va kuata esanju lialua,+ momo va kuata elomboloko liolondaka va va sapuila.+

13 Noke keteke liavali, asongui volonjo via va isia vomanu vosi, kumue lovitunda kuenda va Lewi, va liongoluila ponele ya Esera ukuavisonehua oco va kuate elomboloko liwa liolondaka Viocihandeleko. 14 Noke va sanga Vocihandeleko Yehova a handelekele Mose apa pa sonehiwa okuti, va Isareli va sukila oku kala volosinge* vokuenda kuocipito cosãi yepanduvali,+ 15 kuenje ovo va sukila oku sapula+ loku imba oluiya valupale avo osi kuenda vo Yerusalãi hati: “Kuendi kovaimbo a kasi kolomunda kuenda neni ovianja vioviti vio oliveira, viulela, viusombo, vieva kuenda ovianja vioviti vikuavo oco vu tungi olosinge ndeci ca sonehiwa.”

16 Omo liaco, omanu va tunda kuenje va nena ovianja oco va tunge olosinge viavo muẽle, omunu lomunu kolusoka luaye kuenda kocitali caye muẽle, vocitali conjo ya Suku yocili,+ vokololo Yombundi Yovava+ kuenda vokololo Yombundi yo Efarimi.+ 17 Kuenje omanu vosi vekongelo okuti, vana va tundile kumandekua va tunga olosinge kuenje va kala volosinge viaco. Va Isareli ka va la linga ocipito colosinge lonjila yaco, tunde koloneke via Yehosua+ omõla a Nune toke keteke liaco, omo liaco kua kala esanju lialua.+ 18 Kuenje eteke leteke, kua enda oku tangiwa elivulu Liocihandeleko ca Suku yocili,+ oku upisa keteke liatete toke keteke lia sulako. Ovo va linga ocipito caco vokuenda kuoloneke epanduvali kuenda kua lingiwa ohongele yilikasi keteke liecelãla ndomo ca kisikiwile.+

9 Keteke 24 yosãi yaco, va Isareli va liongolola; ovo va kala oku likandangiya oku lia, va wala ovikelẽyi kuenda va lisieketa oneketela.+ 2 Vana okuti vakuambuto ya va Isareli, va litepa lovingendeleyi+ viosi kuenje va talama kuenda va litavela akandu avo lakulueya a va isiavo.+ 3 Noke va talama pocitumãlo cavo kuenje va tanga lolukandi elivulu Liocihandeleko+ ca Yehova Suku yavo vokuenda kueci ci soka olowola vitatu;* kuenda ovo va pita olowola vikuavo vitatu oku likekembela akandu loku kekamẽla Yehova Suku yavo.

4 Yesiua, la Bani, la Kadimiyele, la Siebaniya,+ la Buni, la Sereviya, la Bani kuenda Keneni, va talama kembumbua+ lia va Lewi kuenda va vilikiya Yehova Suku yavo lolukandi. 5 Kuenje va Lewi okuti Yesiua, Kadimiyele, Bani, Hasiaviniya, Sereviya, Hodiya, Siebaniya kuenda Petahiya va popia vati: “Votoki kuenda sivayi Yehova Suku yene otembo ka yi pui.*+ A Suku ecelela okuti, ovo va sivaya onduko yove yulamba, yina ya velapo asumũlũho osi kuenda esivayo.

6 “Ove lika vu Yehova;+ wa lulika ovailu okuti, ilu liovailu kuenda olohoka vialio viosi, ongongo lovina viosi vi kasimo kuenda okalunga lovina viosi vi kasimo. Ove o vi tata viosi oco vi amameko lomuenyo kuenda olohoka viovailu vi kasi oku kekamẽla kovaso ove. 7 Ove Yehova Suku yocili, una wa nõla Avirama+ kuenje wo upa ko Uri+ ya va Kaldea kuenda wo tukula hati, Avirahama.+ 8 Ove wa limbuka okuti, utima waye wa ku kolela+ kuenje wa lisila laye ocisila cimue oco u wĩhe ofeka ya va Kanana, ya va Hiti, ya va Amori, ya va Perisi, ya va Yevusi kuenda ya va Girigasi okuti, o yeca kocitumbulukila*+ caye; kuenje wa tẽlisa olohuminyo viove momo wukuesunga.

9 “Ove wa mola ohali ya vakukululu yetu Kegito+ kuenda wa yeva oku lisiõsiõla kuavo ocipepi Lokalunga Kakusuka. 10 Noke wa linga olondimbukiso lovikomo ku Fareo kuenda kakuenje vaye vosi lo komanu vosi vo kofeka yaye,+ momo wa kũlĩhĩle okuti, ovo va lekisile esino+ komanu vove. Ove wa linga onduko yimue kokuove yina yi kasi oku amamako toke etaili.+ 11 Ove wa tepa okalunga kovaso avo oco va yoke okalunga posi ya kukuta+ kuenda wa imba ovanyãli vavo valondo ndewe lia imbiwa vovava a kuete akimba alua.+ 12 Ove wa va songuila longunji yelende vokuenda kutanya kuenda vokuenda kuteke longunji yondalu oco yi va mĩhile vonjila va sukilile oku endela.+ 13 Kuenje ove wa lokila Komunda Sinai,+ wa sapela lavo oku upisa kilu+ kuenda wa eca kokuavo asombiso esunga, ovihandeleko viocili,* ovisila viwa kuenda oviholo.+ 14 Ove wa va situluila Esambata+ liove li kola kuenda wa eca kokuavo oviholo, ovisila kuenda ocihandeleko cimue pocakati cukuenje wove Mose. 15 Ove wa eca kokuavo ombolo ya tunda kilu eci va kala lonjala+ kuenda wa tundisa ovava vesenje eci va kala lenyona+ kuenje wa va sapuila oco va iñile loku tunga vofeka yina wa lisilile* oku va ĩha.

16 “Pole, vakukululu yetu va lekisa esino+ kuenda va linga ovimbinde*+ kuenje ka va yevelile kovihandeleko viove. 17 Ovo va likala oku yevelela+ kuenda ka va ivalukile ovilinga viove vi komõhisa vina wa lingila pokati kavo, pole, ovo va linga ovimbinde* kuenje va nõla usongui umue oco va tiukile kupika Kegito.+ Pole, ove wu Suku yimue ukuakuecela, ukuacali,* ukuahenda, o livala konyeño kuenda ukuacisola ka ci pongoloka*+ kuenje kua va yandulukile.+ 18 Ndaño ceci va litungila ociñumañuma conãle ca pangiwa lutale loku popia vati: ‘Eyi oyo o Suku yene, yina ya ku songuili oku tunda kofeka Yegito’+ kuenda ovo va lekisa ekambo lialua liesumbilo, 19 ndaño lovina viaco, omo liohenda yove yalua kua va yandulukile vekalasoko.+ Ongunji yelende ka ya tundile kokuavo vokuenda kutanya oco yi va songuile vonjila kuenda ongunji yondalu ka ya tundile kokuavo vokuenda kuteke oco yi mĩhile vonjila va sukilile oku endela.+ 20 Kuenje wa va ĩha espiritu liove liwa oco va kuate olondunge+ kuenda kua likalele oku eca omana yove kokuavo+ kuenda wa va ĩha ovava eci va kala lenyona.+ 21 Vokuenda kueci ci soka 40 kanyamo, ove wa eca kokuavo okulia vekalasoko.+ Ka va kambelele lacimue. Ovowalo avo ka a puile+ kuenda olomãhi viavo ka via lendele.

22 “Ove wa eca kokuavo ovosoma kuenda omanu, poku va tepela ofeka lofeka+ oco va piñale ofeka yo Sihoni+ okuti, ofeka ya soma yo Hesibone+ kuenda ofeka ya Oge+ soma yo Basiane. 23 Ove wa luisa omãla vavo ndolombungululu viovailu.+ Kuenje wa va tuala vofeka yina wa likuminyile vakukululu yavo okuti va laikele oku iñilamo loku yi piñala.+ 24 Omo liaco, omãla vavo va iñilamo kuenda va tambula ofeka+ kuenje ove wa yambuila kovaso avo va Kanana+ vana va tungile vofeka yaco, noke wa va eca peka liavo ci kaile olosoma viavo kuenda omanu vo vofeka yaco oco va linge lavo ndeci ovo va panga. 25 Kuenje ovo va tambula alupale a pama,+ losi ya lẽla+ kuenda va tambula olonjo vieyuka ovina vialua viwa, lovisimo via fẽliwa, oviumbo viayuva, vio oliveira+ kuenda oviti vialua viapako. Ovo va lia vekuta kuenda va lẽla kuenje va sanjukila uwa wove walua.

26 “Pole, ovo va lekisa esino kuenje va ku lingila usuanji+ kuenda va ñualelapo Ocihandeleko* cove. Va ponda ovaprofeto vove vana va enda oku va lungula, oco va va nene vali kokuove kuenda va lekisa ekambo lialua liesumbilo.+ 27 Eli olio esunga lieci wa va ecela peka liovanyãli vavo,+ vana va enda oku va kokela ohali.+ Pole, ovo va enda oku vilikiya kokuove kotembo yohali kuenda ove wa enda oku va yeva oku upisa kovailu; kuenje omo liohenda yove yalua wa eca kokuavo apopeli oco va va yovole peka liovanyãli vavo.+

28 “Pole, noke yoku sanga ekavuluko, ovo va enda oku linga vali eci cĩvi kovaso ove+ kuenje wa enda oku va yanduluka povaka yovanyãli vavo vana va enda oku va viala.*+ Noke va enda oku tiuka kokuove loku pinga ekuatiso+ kuenje ove wa enda oku va yeva oku upisa kovailu kuenda oku va popela olonjanja vialua omo liohenda yove yalua.+ 29 Ndaño okuti ove wa va lungula oco va tiukile Kocihandeleko cove, ovo va lekisa esino kuenda va likala oku yevelela ovihandeleko viove;+ ovo va lueyela ovisila viove vina okuti, nda omunu umue o vi kapako amamako lomuenyo.+ Pole, ovo va ku imba onyima kuenje va linga ovimbinde* kuenda va likala oku ku yevelela. 30 Ove wa lekisa epandi kokuavo+ vokuenda kuanyamo alua kuenda wamamako oku va lungula lekuatiso liovaprofeto vove pocakati cespiritu liove, pole, ovo va likala oku ku yevelela. Oku sulako, wa va eca peka liomanu vo kolofeka via va ñualele.+ 31 Kuenje omo liohenda yove yalua, kua va kunduile+ ale oku va yanduluka, momo ove wu Suku yimue ukuacali kuenda ukuahenda.+

32 “Kaliye A Suku yetu, Suku unene, wa pama kuenda o komõhisa, una wa tẽlisa ocisila caye kuenda wa lekisa ocisola ka ci pongoloka,+ ko ka ivaleko ohali tua liyaka layo, kumue lolosoma vietu, olombuale vietu,+ ovitunda vietu,+ ovaprofeto vetu,+ vakukululu yetu kuenda omanu vove vosi oku upisa koloneke violosoma vio Asuria+ toke etaili. 33 Ove wa lekisa esunga kovina viosi via pita letu, momo wa lekisa esunguluko; pole, etu tua linga vakuevĩho.+ 34 Olosoma vietu, olombuale vietu, ovitunda vietu kuenda vakukululu vetu, ka va pokuile Kocihandeleko cove ndaño oku tiamisilila utima koviholo viove ale kovisila* vina wa va ĩha. 35 Ndaño ceci va kala vusoma wavo loku sanjukila uwa walua una wa lekisa kokuavo, eci va kala vofeka yinene haiyo yi kuete osi ya lẽla yina wa eca kokuavo, ovo ka va ku vumbile+ kuenda ka va liwekelepo oku linga ovina viavo vĩvi. 36 Omo liaco, etaili tua linga apika,+ tua linga apika vofeka wa eca ku vakukululu yetu oco va lie apako alio kuenda ovina viwa viofeka yaco. 37 Ovaima alua o vofeka yaco, a kasi oku eciwa kolosoma vina ove wa tu kapela oku tu viala omo liakandu etu.+ Ovio vi kasi oku viala atimba etu kuenda ovinyama vietu ndomo via seya kuenje etu tu kasi oku liyaka lohali yalua.

38 “Omo liaco, mekonda liovina viosi evi, tu kasi oku linga ocisila cimue+ loku ci soneha kuenje ci kapiwa ondimbukiso yolombuale vietu, ya va Lewi vetu kuenda yovitunda vietu.”+

10 Ava va kapa ondimbukiso kocisila+ va kala:

9 Va Lewi va kapa ondimbukiso kocisila va kala: Yesiua omõla a Asaniya, Binui umue pokati komãla va Henadada, Kadimiyele,+ 10 kuenda vamanjavo Siebaniya, Hodiya, Kelita, Pelaya, Hanana, 11 Mika, Rehove, Hasiaviya, 12 Sakuru, Sereviya,+ Siebaniya, 13 Hodiya, Bani kuenda Beninu.

14 Asongui vomanu okuti, va kapa ondimbukiso kocisila va kala: Parosi, Pahati-Moavi,+ Elami, Satu, Bani, 15 Buni, Asigadi, Bevai, 16 Adoniya, Bigivai, Adini, 17 Atere, Hesekiya, Asure, 18 Hodiya, Hasiumi, Besai, 19 Harifi, Anatote, Nabai, 20 Magipiase, Mesiulama, Hesiri, 21 Mesiesavele, Sadoke, Yaduwa, 22 Pelatiya, Hanana, Anaya, 23 Hosea, Hananiya, Hasiuvu, 24 Halohesi, Piliha, Siobeke, 25 Rehumu, Hasiabaniya, Maaseya, 26 Ahiya, Hanana, Anani, 27 Maluke, Harimi kuenda Baana.

28 Pomanu vakuavo pa kongelele ovitunda, va Lewi, vakualombundi, olonjimbi, vakuakutata onembele* kuenda omanu vosi vana va litepa lomanu vo kolofeka via va ñualele, oco va kuame ocihandeleko ca Suku yocili,+ kumue lakãi vavo, omãla vavo valume, lomãla vavo vakãi okuti, vosi vana va kuatele ukũlĩhĩso kuenda elomboloko.* 29 Ovo va kongela vamanjavo kuenda alume vavo va kemãla kuenje va lisila loku lisinga okuti, va endela Vocihandeleko ca Suku yocili, cina ca eciwile pocakati ca Mose ukuenje wa Suku yocili kuenda oku pokola lutate kolonumbi viosi, kasombiso kuenda kovisila via Yehova Ñala yetu. 30 Ka tu ka eca omãla vetu vakãi oco va likuele lomanu vo kofeka ya tu ñuala kuenda ka tu ka tambula omãla vavo vakãi oco va likuele lomãla vetu valume.+

31 Nda omanu vo kofeka yaco va nena ovikuata viavo kuenda olomema viosi via litepa oco va vi landise keteke Liesambata, ka tu ka landa lacimue kokuavo keteke Liesambata+ ale keteke limue li kola.+ Ka tu kongulavo kunyamo wepanduvali+ kuenda ka tu ka tana ofuka layimue.+

32 Handi vali, omunu lomunu pokati ketu wa lisila oku eca onepa yatatu yosiekele* unyamo lunyamo kupange wonjo* ya Suku yetu,+ 33 kombolo* ya tumbikiwa,+ kocilumba colomema+ ceciwa olonjanja viosi, kocilumba coku pia elisi Kasambata+ ci lingiwa olonjanja viosi, koku molẽha kuosãi yokaliye,+ kovipito via sokiyiwa,+ kovina vi kola, kovilumba vioku tuvika akandu+ a va Isareli kuenda kovopange osi o vonjo ya Suku yetu.

34 Handi vali, tua imba ocela catiamẽla konepa yolohũi vina ovitunda, va Lewi kuenda omanu va sukilile oku tuala vonjo ya Suku yetu votembo ya sokiyiwa okuti, unyamo lunyamo ndomo ci likuata lolonjo via va isia, oco vi yokiwe kutala wa Yehova Suku yetu, ndomo ca sonehiwa Vocihandeleko.+ 35 Tu ka tualavo ovaima atete o vofeka yetu kuenda ovaima atete vioviti viosi viapako unyamo lunyamo konjo ya Yehova,+ 36 oku kongelamo olonuñulu viomãla vetu valume kuenda olonuñulu viovinyama vietu,+ ndomo ca sonehiwa Vocihandeleko kuenda olonuñulu vioviunda violongombe vietu levi violomeme. Tu ka vi tuala konjo ya Suku yetu, kovitunda vi vumba vonjo ya Suku yetu.+ 37 Handi vali, apako etu atete osema yolomema, olombanjaile vietu,+ apako vioviti viosi via litepa,+ ovinyu yokaliye kuenda ulela,+ tu sukila oku vi tuala kovitunda volosila vionjo ya Suku yetu+ kumue lonepa yekũi ya tunda vofeka yetu ku va Lewi, momo va Lewi+ ovo va siata oku ongolola onepa yekũi valupale etu osi tua siata oku lima.

38 Ocitunda, omõla a Arone o sukila oku kala la va Lewi eci va Lewi vongolola onepa yekũi; kuenje kolonepa viaco viekũi, va Lewi va sukila oku tepako onepa yekũi oco va yi tuale konjo ya Suku yetu,+ volohondo* violosila. 39 Momo volosila, omo va Isareli kuenda omãla va va Lewi va sukila oku tuala olombanjaile+ violomema, ovinyu yokaliye, ulela+ kuenda omo mu sangiwa ovikuata viocitumãlo ci kola, oku kongelamo ovitunda vina vi linga upange, vakualombundi kuenda olonjimbi. Ka tu ka lekisa ocekelela lonjo ya Suku yetu.+

11 Olombuale viomanu via kala vo Yerusalãi;+ pole, omanu vakuavo va imba ocela+ okuti pokati kapata ekũi pa tunda epata limosi, oco va tunge vo Yerusalãi, olupale lu kola, osimbu apata akuavo ecea a kala kalupale akuavo. 2 Handi vali, omanu va sumũlũisa alume vosi vana va liecele olumue oco va kaile ko Yerusalãi.

3 Ava ovo asongui voluvumba* okuti, va tunga vo Yerusalãi. (Omanu vakuavo va Isareli, ovitunda, va Lewi, vakuakutata onembele*+ kuenda omãla vapika va Salomone,+ va tunga valupale akuavo o Yuda, omunu lomunu kocipiñalo caye muẽle volupale luaye.+

4 Handi vali, vo Yerusalãi mua kala ocikoti ca Yuda kuenda ca Benjamini.) Ocikoti ca Yuda ca kala Ataya, omõla a Usiya, omõla a Sakariya, omõla a Amariya, omõla a Sefatiya, omõla a Mahalalele umue pokati komãla va Peresi,+ 5 kuenda Maaseya omõla a Baruke, omõla a Kolohose, omõla a Hasaya, omõla a Adaya, omõla a Yoyarivi, omõla a Sakariya, omõla a Sela. 6 Omãla vosi va Peresi vana va tunga vo Yerusalãi, va sokele 468 kalume va pama.

7 Ava va kala vakuacikoti ca Benjamini vava: Salu+ omõla a Mesiulama, omõla a Yoede, omõla a Pedaya, omõla a Kolaya, omõla a Maaseya, omõla a Yesiaya, 8 kuenda kua kalavo Gabai la Salai, 928; 9 kuenda Yoeli omõla a Sikiri wa kala mitavaso yavo kuenje Yuda omõla a Hasenua wa kala omunu wavali kocikele coku songuila olupale.

10 Ovitunda vievi: Yedaya omõla a Yoyarivi, Yakini,+ 11 Seraya omõla a Hilikiya omõla a Mesiulama omõla a Sadoke omõla a Merayote omõla a Ahituva,+ usongui umue wonjo* ya Suku yocili, 12 kuenda vamanjavo vana va enda oku linga upange wonjo, 822; la Adaya omõla a Yerohama omõla a Paliliya omõla a Amisi omõla a Sakariya omõla a Pasihuri+ omõla a Malikiya 13 kuenda vamanjaye okuti asongui volonjo via va isia, 242; kuenda Amasisai omõla a Asariele omõla a Ahasai omõla a Mesilemote omõla a Imere 14 kuenda vamanjavo va pamele haivo va kala vakuotõi, 128; kuenda mitavaso yavo wa kala Savidiyele wa tiamẽlele kepata limue lia kemãla.

15 Va Lewi vava: Semaya+ omõla a Hasiuvu omõla a Asirikama omõla a Hasiaviya omõla a Buni, 16 kuenda Siabetai+ la Yosavada,+ usongui wa va Lewi vana va kuatele ocikele coku linga ovopange o kosamua yonjo ya Suku yocili; 17 kuenda Mataniya+ omõla a Mika omõla a Savidi omõla a Asafe+ usongui wolonjimbi, una wa enda oku songuila asivayo vokuenda kuohutililo,+ la Bakibukiya omunu wavali pokati ka vamanjaye kuenda Aavida omõla a Siamuwa omõla a Galala omõla a Yedutunu.+ 18 Va Lewi vosi volupale lu kola va kala 284.

19 Kuenje vakualombundi va kala Akuve, Talimoni+ kuenda vamanjavo, 172 kalume.

20 Omanu vakuavo va Isareli, ovitunda kuenda va Lewi va kala valupale osi akuavo o Yuda, omunu lomunu kocipiñalo caye. 21 Vakuakutata onembele*+ va kala ko Ofele+ kuenje Siha la Gisipa ovo va kala oku songuila vakuakutata onembele.*

22 Mitavaso ya va Lewi vo Yerusalãi wa kala Usi, omõla a Bani omõla a Hasiaviya omõla a Mataniya+ omõla a Mika umue pokati komãla va Asafe, olonjimbi; eye wa kala oku songuila upange wonjo ya Suku yocili. 23 Kua kala ocihandeleko cimue ca soma coku va kuatisa+ kuenda kua kalavo eliangiliyo limue lioku kuatisa olonjimbi kovina va sukilile eteke leteke. 24 Kuenje Petahiya omõla a Mesiesavele umue pokati komãla va Sera omõla a Yuda, wa kala ondunguli* ya soma kovina viosi viatiamẽla komanu.

25 Catiamẽla kovaimbo avo lovapia avo, vamue pokati kocikoti ca Yuda va tunga ko Kiriyata-Ariva+ kuenda kovaimbo a sungueko, ko Divone kuenda kovaimbo a sungueko, ko Yekavicele+ kuenda kovaimbo aco, 26 ko Yesiua, ko Molada,+ ko Bete-Pelete,+ 27 ko Hasare-Siuale,+ ko Beresieva kuenda kovaimbo a sungueko, 28 ko Cikilage,+ ko Mekona kuenda kovaimbo a sungueko, 29 ko Enerimone,+ ko Sora+ kuenda ko Yarimuti, 30 ko Sanoha,+ ko Adulama kuenda kovaimbo aco, ko Lakisi+ kuenda kovapia aco, lo ko Aseka+ kuenda kovaimbo a sungueko. Ovo va kala* oku upisa ko Bere-Sieva toke Vocimbota co Hinome.+

31 Ocikoti ca Benjamini ca kala ko Geva,+ ko Mikimasi, ko Haiya, ko Betele+ kuenda kovaimbo a sungueko, 32 ko Anatote,+ ko Nove,+ ko Ananiya, 33 ko Hasore, ko Rama+ ko Gitami, 34 ko Hadida, ko Sevomi, ko Nevalata, 35 ko Lode kuenda ko Ono,+ kocimbota colomesele. 36 Vimue pokati kovimunga via va Lewi okuti, via kala vo Yuda, via tumiwa kocikanjo co Benjamini.

12 Ovitunda kuenda va Lewi vana va tiuka kumosi la Seruvavele+ omõla a Sialitiyele+ kuenda Yesiua+ vava: Seraya, Yeremiya, Esera, 2 Amariya, Maluke, Hatusi, 3 Sekaniya, Rehumu, Meremoti, 4 Ido, Ginetoi, Aviya, 5 Miyamine, Maadiya, Biliga, 6 Semaya, Yoyarivi, Yedaya, 7 Salu, Amoki, Hilikiya kuenda Yedaya. Ava ovo va kala asongui vovitunda kuenda va vamanjavo koloneke via Yesiua.

8 Va Lewi va kala Yesiua, Binui, Kadimiyele,+ Sereviya, Yuda kuenda Mataniya+ una wa enda oku songola ovisungo violopandu kumue la vamanjaye. 9 Kuenje vamanjavo okuti, Bakibukiya kuenda Uni, va enda oku talama kovaso yavo oku linga upange* wundavululi. 10 Yesiua wa linga isia ya Yoyakimi, Yoyakimi wa linga isia ya Eliasivi kuenda Eliasivi+ wa linga isia ya Yoyada.+ 11 Kuenje Yoyada wa linga isia ya Yonatão kuenda Yonatão wa linga isia ya Yaduwa.

12 Koloneke via Yoyakimi, ava va kala ovitunda, asongui volonjo via va isia vava: ku Seraya,+ Meraya; ku Yeremiya, Hananiya; 13 ku Esera,+ Mesiulama; ku Amariya, Yehohanana; 14 ku Maluki, Yonatão; ku Siebaniya, Yosefe; 15 ku Harimi,+ Adana; ku Merayote, Helikai; 16 ku Ido, Sakariya; ku Ginetoni, Mesiulama; 17 ku Aviya,+ Sikiri; ku Miniamini, . . . ;* ku Moadiya, Pilitai; 18 ku Biliga,+ Siamuwa; ku Semaya, Yehonatana; 19 ku Yoyarivi, Matenai; ku Yedaya,+ Usi; 20 ku Salai, Kalai; ku Amoki, Evere; 21 ku Hilikiya, Hasiaviya; ku Yedaya, Netanele.

22 Asongui volonjo via va isia via va Lewi kuenda viovitunda, va sonehiwa koloneke via Eliasivi, via Yoyada, via Yohanana kuenda via Yaduwa,+ okuti toke kuviali wa Dariu u Persia.

23 Va Lewi vana va kala asongui volonjo via va isia, va sonehiwa velivulu liulandu wolotembo toke koloneke via Yohanana, omõla a Eliasivi. 24 Asongui va va Lewi va kala Hasiaviya, Sereviya kuenda Yesiua+ omõla a Kadimiyele+ kuenje vamanjavo olondavululi, va enda oku talama kovaso yavo vovimunga oco va ece esivayo lolopandu ndeci ca handelekele Daviti+ ukuenje wa Suku yocili. 25 Mataniya,+ Bakibukiya, Ovadiya, Mesiulama, Talimoni kuenda Akuve+ va kala olondavululi ndavakualombundi+ oku lava olosila vioku seleka via kala ocipepi lolombundi. 26 Ovo va vumba koloneke via Yoyakimi omõla a Yesiua+ omõla a Yocadaka lo koloneke via Nehemiya nguluvulu kuenda via Esera+ ocitunda haeye ukuavisonehua.

27 Poku tumbika ovimbaka vio Yerusalãi, ovo va sandiliya va Lewi kovitumãlo viosi kuna va kala kuenje va va nena vo Yerusalãi oco va linge ocipito coku tumbika lesanju, lovisungo violopandu,+ lolosimbalu, lovikuata viovisikilo viovikolo kuenda olohalupa. 28 Kuenje omãla volonjimbi* va liongolola oku tunda vocivanja* kolonepa viosi via ñualele o Yerusalãi, kovaimbo a va Netofa,+ 29 ko Giligali,+ lo kovapia o ko Geva+ kuenda o ko Asimawete,+ momo olonjimbi via tungile ovaimbo avo muẽle kolonele viosi vio Yerusalãi. 30 Kuenje ovitunda la va Lewi va liyelisa kuenda va yelisavo omanu,+ olombundi+ locimbaka.+

31 Noke ame nda nena olombuale vio ko Yuda kilu liocimbaka. Handi vali, nda sokiya ovimunga vivali vinene viava va imba ovisungo violopandu kuenda ovimunga viomanu oco vi va kuame kuenje ocimunga cimue ca enda konele yondio kocimbaka oku endela Kombundi Yetiko.+ 32 Hosiaya kumue lonepa yimue yolombuale vio ko Yuda va kuama konyima yavo, 33 kumue la Asariya, Esera, Mesiulama, 34 Yuda, Benjamini, Semaya kuenda Yeremiya. 35 Omãla vamue vovitunda va kala kumue lavo lalumbeta vava:+ Sakariya omõla a Yonatão omõla a Semaya omõla a Mataniya omõla a Mikaya omõla a Sakuru omõla a Asafe,+ 36 kuenda vamanjaye Semaya, Asariele, Milalai, Gilalai, Maai, Netanele, Yuda kuenda Hanani, va kala lovikuata viovisikilo via Daviti+ ukuenje wa Suku yocili; kuenje Esera+ ukuavisonehua wa pita kovaso yavo. 37 Kombundi yo Kono+ ovo vamisako poku lamanela kocimbaka oku pita kilu Liocilamanelo+ Yolupale lua Daviti+ kuenda kilu Lionjo ya Daviti kuenje va enda toke Kombundi Yovava+ konele yutundilo.

38 Ocimunga cikuavo cava va imba ovisungo violopandu, ca endele konele* yikuavo kuenje ame nda kuama ocimunga caco kumue lonepa yimue yomanu kilu liocimbaka oku pita Kosapalalo Yolofolono+ toke Kocimbaka ca Sanjavala+ 39 kuenda va pita kilu Liombundi yo Efarimi,+ Kombundi Yolupale Luosimbu,+ Kombundi Yolõsi,+ Kosapalalo ya Hananele,+ Kosapalalo ya Hameya kuenda Kombundi Yolomeme;+ kuenje ovo va talama Pombundi Yoku Lavulula.

40 Oku sulako, ovimunga vivali viava va imba ovisungo violopandu via talama kovaso yonjo ya Suku yocili; kuenje ame nda ci lingavo kumue lonepa yimue ya vakalei kolombiali, 41 kuenda ovitunda Eliakimi, Maaseya, Miniamini, Mikaya, Elioenai, Sakariya kuenda Hananiya va kala lalumbeta, 42 la Maaseya, Semaya, Eleasa, Usi, Yehohanana, Malikiya, Elami kuenda Eseri. Kuenje olonjimbi via imba lolukandi kuenda via kala oku songuiwa la Yisirahiya.

43 Keteke liaco, va eca ovilumba vialua kuenda va sanjuka,+ momo Suku yocili wa va muisa esanju lialua. Akãi kuenda omãla va kuatavo esanju,+ omo liaco, esanju lio Yerusalãi lia yevalela kupãla.+

44 Keteke liaco, kua nõliwa alume oco va kale asongui volosila+ vioku kapa olombanjaile,+ apako atete+ kuenda olonepa viekũi.+ Volosila viaco, omo ovo va sukilile oku ongoluila ovina via tunda vovapia o volupale okuti, ovio olonepa via kisikiwile Vocihandeleko+ oco vi eciwe Kovitunda kuenda ku va Lewi,+ momo kua kala esanju ko Yuda omo Liovitunda kuenda va Lewi vana va kala oku vumba. 45 Kuenje ovo va fetika oku linga upange wa Suku yavo kuenda oku tẽlisa ekisika lioku liyelisa ndeci ca linga olonjimbi kuenda vakualombundi ndomo ca handelekiwile la Daviti kuenda omõlaye Salomone. 46 Kosimbu, koloneke via Daviti kuenda via Asafe, kua kala asongui* volonjimbi lasongui vovisungo viesivayo kuenda vioku eca olopandu ku Suku.+ 47 Koloneke via Seruvavele+ lo koloneke via Nehemiya, va Isareli vosi va enda oku eca olombanjaile kolonjimbi+ kuenda ku vakualombundi,+ ndeci ci likuata lesukila liavo lieteke leteke. Ovo va endavo oku tepa olombanjaile vi eciwa ku va Lewi+ kuenda va Lewi va enda oku tepa olombanjaile vi eciwa kocitumbulukila ca Arone.

13 Keteke liaco, elivulu lia Mose lia tangiwila kovaso yomanu+ kuenda mua sonehiwile okuti, va Amoni la va Moavi+ ka citava okuti va panga onepa kekongelo lia Suku yocili,+ 2 momo ovo ka va ecele ombolo kuenda ovava komãla va Isareli, pole, va pañinyile Baliame oco a va siñale.+ Kuenje, Suku yetu wa pongolola esiñalo liaco okuti, li linga esumũlũho.+ 3 Eci va yeva Ocihandeleko, ovo va fetika oku tepa pokati ka va Isareli vosi vana va kala ovitumbulukila viovingendeleyi.*+

4 Osimbu ovina viaco ka via pitile, ocitunda cina ca kuatele ocikele coku tata olosila vionjo* ya Suku yetu,+ Eliasivi+ ukuepata lia Toviya.+ 5 Eye wa sokiyilile Toviya osila* yimue yinene, muna ovo va enda oku kapa ocilumba colomema, onguendu, lovikuata kuenda onepa yekũi yolomema, yovinyu yokaliye kuenda yulela+ okuti, via handelekiwile oco vi eciwe ku va Lewi,+ kolonjimbi kuenda ku vakualombundi kumue lolombanjaile vi eciwa kovitunda.+

6 Kuenje vokuenda kuotembo yaco yosi, ame sia kaile vo Yerusalãi, momo nda endele ku soma kunyamo 32+ wa Soma Aretasesete+ wo ko Bavulono; kuenje noke yotembo yimue, ame nda pinga ku soma oco a ngecelele oku tunda. 7 Noke nda pitĩla vo Yerusalãi kuenda nda limbuka ũvi Eliasivi+ a lingile. Eye wa kuatisa Toviya+ poku u sokiyila osila* yimue vocitali conjo ya Suku yocili. 8 Ovina viaco via ndi sumuisa calua kuenje nda imba ovikuata viosi via Toviya posamua yosila.* 9 Noke nda va handeleka oco va yelise olosila;* kuenje ame nda tiuwiyamo vali ovikuata vionjo ya Suku yocili+ kumue lovilumba violomema kuenda onguendu.+

10 Handi vali, nda limbuka okuti onepa ya va Lewi+ ka ya kaile oku eciwa kokuavo,+ omo liaco, va Lewi kuenda olonjimbi vana va enda oku linga upange va tiukila omunu lomunu kepia liaye muẽle.+ 11 Omo liaco, nda vetela evelo vakalei kolombiali+ kuenje nda popia siti: “Momo lie onjo ya Suku yocili yi kasilili oku tatiwa locekelela?”+ Noke ndongolola va Lewi kuenje nda va kapa vali kovopange avo. 12 Kuenje va Yuda vosi va nena onepa yekũi+ yolomema, yovinyu yokaliye kuenda yulela, volosila.+ 13 Noke nda kapa Selemiya ocitunda, Sadoke ukuavisonehua kuenda Pedaya umue pokati ka va Lewi, kocikele coku tata olosila kuenje Hanana omõla a Sakuru omõla a Mataniya wa kala oñuatisi yavo, momo alume ava va tendiwile okuti va koleliwa. Ovo va kuatele ocikele coku avela vamanjavo olonepa viavo.

14 Njivaluke A Suku yange,+ omo liovina nda linga kuenda ku ka ivaleko ovilinga viange vioku lekisa ocisola ka ci pongoloka, vina ame nda lingila onjo ya Suku yange kuenda upange waco.*+

15 Koloneke viaco, nda mola omanu ko Yuda okuti, va kala oku kosa ayuva oku linga ovinyu* Kesambata+ kuenda va nena olomema vialua loku vi longeka kovimbulu, loku nena ovinyu, ayuva, akuyu kuenda ovikuata viosi via litepa vo Yerusalãi keteke Liesambata.+ Omo liaco, ame nda va lungula oco ka va ka landise keteke* liaco. 16 Kuenje va Turo vana va kala volupale, va enda oku nena olõsi kuenda ovina vikuavo violomĩlu, loku vi landisa komãla va Yuda vo Yerusalãi keteke Liesambata.+ 17 Noke nda vetela evelo olombuale vio ko Yuda loku vi sapuila hati: “Evĩho eli vu kasi oku linga lia nye? Ene vu kasi oku sepula ocihandeleko Cesambata! 18 Evi hẽ havioko ovina vakukululu yene va linga kuenje Suku yetu wa nena ovitangi evi viosi kokuetu kuenda kolupale lulo? Cilo vu kasi oku sepuisa Esambata? Kaliye ene vu kasi oku sanumũla vali Suku oco a kuatele onyeño yalua o Isareli?”+

19 Omo liaco, nda handeleka oco olombundi vio Yerusalãi vi yikiwe osimbu handi ka kua tekãvele, osimbu Esambata ka lia fetikile. Handi vali, nda popiavo siti, ka citava okuti ovo va yikula olombundi osimbu Esambata ka lia pitile kuenda nda kapa vamue pokati koloñuatisi viange polombundi oco ka va ka nene ovikuata lavimue keteke Liesambata. 20 Omo liaco, vakualomĩlu kuenda vakuakulandisa ovina viosi, va pita uteke posamua yo Yerusalãi onjanja yimosi ale olonjanja vivali. 21 Noke nda va lungula loku va sapuila hati: “Momo lie vu kasilili oku pita uteke kovaso yocimbaka? Nda wa ci lingi vali ndu ku tundisi kulo longusu.” Oku upisa keteke liaco, ovo ka veyile vali Kesambata.

22 Kuenje nda sapuila va Lewi okuti, va sukila oku liyelisa otembo yosi kuenda oku iya loku lava olombundi oco eteke Liesambata li tendiwe okuti, li kola.+ Ivaluka uwa wange A Suku yange kuenda lekisa ohenda kokuange omo liocisola cove calua haico ka ci pongoloka.+

23 Koloneke viaco, ame nda molavo va Yudea vana va likuelele* lakãi+ va Asidode,+ va Amoni kuenda va Moavi.+ 24 Onepa yimue yomãla vavo ya enda oku vangula o Asidode kuenda onepa yikuavo ya enda oku vangula alimi omanu va litepa, pole, lomue pokati kavo wa tẽlele oku vangula elimi lia va Yudea. 25 Omo liaco, nda va vetela evelo, nda va siñala loku tipula vamue pokati kalume vaco+ kuenje nda tukũla asinga avo kuenda nda va lingisa okuti, va lisinga kovaso a Suku hati: “Ka citava oku eca omãla vene vakãi oco va likuele lomãla vavo valume kuenda ko ka tavi laumue pokati komãla vavo vakãi oco va likuele lomãla vene valume ale lene muẽle.+ 26 Soma Salomone ka lingile hẽ ekandu omo lielinga liaco? Pokati kolofeka vialua ka kua la kaila osoma ya lisoka laye;+ kuenda eye wa soliwile la Suku yaye+ kuenje Suku wo lingisa osoma yo Isareli yosi. Pole, akãi vo kolofeka viñi vo kokela oku linga ekandu.+ 27 Momo lie wa lingili evĩho liosi eli linene loku lekisa ekambo liekolelo ku Suku yetu poku likuela lakãi vo kolofeka viñi?”+

28 Umue pokati komãla va Yoyada+ omõla a Eliasivi+ ocitunda cinene, wa kuelele lomõla ufeko wa Sambalata+ u Horone. Kuenje ndo tundisa oco a kale ocipãla lame.

29 Va ivaluka A Suku yange, momo ovo va sepula upange wutunda+ kuenda ocisila cutunda la va Lewi.+

30 Kuenje ame nda va yelisa kevĩho liosi liolofeka vikuavo kuenda nda eca upange kovitunda kuenda ku va Lewi okuti, omunu lomunu lupange waye muẽle,+ 31 kuenda nda lingavo esokiyo lioku eca olohũi+ kotembo ya sokiyiwa kuenda ovaima atete.

Njivaluke lohenda,* A Suku yange.+