ASIÕSUĨLO
א [Aleph]*
1 O Yerusalãi yina yeyukile omanu, kaliye ya siala ulika!+
Yina ya kuata omanu valua pokati kolofeka, ya linga ndocimbumba!+
Yina ya kala ombuale pokati kaluvumba,* ya kisikiwa oku linga upange wa tĩla!+
ב [Beth]
2 Oyo yi lila calua vokuenda kuteke+ kuenda asuẽlẽla alua a lokila katama ayo.
Pokati ka vosi vakuacisola cayo lomue wa sialapo, oco a yi lembeleke.+
Akamba vayo vosi va yi pakula;+ ovo va linga ovanyãli vayo.
ג [Gimel]
3 O Yuda yambatiwa kumandekua+ vemẽhi liohali yalua kuenda liupika wa tĩla.+
Oyo yi sukila oku tunga pokati kolofeka;+ oyo ka yi sangi ocitumãlo cimue coku puyukila.
Vosi vakuakuyilambalala va yi sanga vohali yayo.
ד [Daleth]
4 Atapalo a loña ko Siono a kasi lesumuo, momo lomue o kasi loku iya kocipito.+
Olombundi viayo viosi via siala upolokoso;+ ovitunda viayo vi leña leña.
Afeko vayo vosombo,* va kasi lesumuo kuenje oyo yi kasi oku tala ohali yalua.
ה [He]
5 Ovanyãli vayo kaliye va linga cime cayo;* ovanyãli vayo va lipolapo.+
Momo Yehova wa nena esumuo kokuayo omo liakulueya ayo alua.+
Omãla vayo, vambatiwa kumandekua kovaso yunyãli.+
ו [Waw]
6 Eposo liosi liomõla ufeko wa Siono lio tunda.+
Olombuale viayo, vi kasi ndolohõha ka via sangele usenge woku lila,
Kuenda ovio vi enda lekavo kovaso yukuakuvilandula.
ז [Zayin]
7 Koloneke yi kasi lohali kuenda ka yi kuete onjo, o Yerusalãi yi ivaluka
Ovina viosi vi kuete esilivilo via kala viayo koloneke viosimbu.+
Eci omanu vayo va kupukila peka liunyãli kuenda ka ya kuatele oñuatisi,+
Ovanyãli va yi mola kuenje va yola* omo lioku kupuka kuayo.+
ח [Heth]
8 O Yerusalãi ya linga ekandu linene.+
Eli olio esunga lieci oyo ya lingila ocina cimue ca vĩha.
Vosi vana va enda oku lekisa esumbilo kokuayo, kaliye va yi tata ndocina cimue ca suvukiwa, momo va mola epõlõla liayo.+
Oyo yi leña leña+ kuenda yi tiuka konyima losõi.
ט [Teth]
9 Evĩho liayo li kasi vasaya ayo.
Oyo ka ya sokoluile koloneke viayo vio kovaso.+
Oku kupuka kuayo kua komõhisa; oyo ka yi kuete laumue oco a yi lembeleke.
A Yehova, tala ohali yange, momo unyãli wa litunula eye muẽle.+
י [Yod]
10 Unyãli wa kapa eka liaye kovokuasi ayo osi.+
Momo oyo ya mola olofeka oku iñila vocitumãlo cayo ci kola.+
Vana ove wa handeleka okuti, ka va ka iñile vekongelo liove.
כ [Kaph]
11 Omanu vayo vosi va kasi oku leña leña; ovo va kasi oku sandiliya ombolo.+
Ovina viavo via velapo, va vi eca oco va kuate cimue coku lia okuti, vamamako lomuenyo.
Tala, A Yehova kuenda limbuka okuti, ame nda linga ukãi umue ka kuete esilivilo.*
ל [Lamed]
12 Anga hẽ eci hacimueko kokuene vosi vu kasi oku pita vetapalo?
Tali kuenda vanji!
Anga hẽ kuli evalo limue lia lisoka levalo nda yambuiwa lalio,
Lina Yehova a ndi talisa lalio ohali keteke lionyeño yaye yalua?+
מ [Mem]
13 Oku upisa kocitumãlo ca lepa, eye wa tuma ondalu vakepa ange+ kuenje o yula ekepa lekepa.
Eye wa nyanyumuĩla owanda umue kolomãhi viange; eye wa ndi kisika oku tiukila konyima.
Wa ndi lingisa okuti, ndi kala ndukãi o kasi ulika.
Ndi vela eteke liosi.
נ [Nun]
14 Akulueya ange a kutiwa ndokanga yimue, eka liaye olio lia kutila pamosi akulueya aco.
Akulueya aco, a kapiwa kosingo yange kuenda ongusu yange ya pua.
Yehova wa ngeca peka lia vana si tẽla oku tamalãla lavo.+
ס [Samekh]
15 Yehova wa imba kosamua alume vosi va pama va kala pokati kange.+
Eye wa pañinya ohongele yimue yoku ndi katukila oco va sasõle amalẽhe vange.+
Yehova wa kosa ufeko wosombo wo Yuda vocikoselo cayuva.+
ע [Ayin]
16 Ndi kasi oku lila omo liovina evi;+ vovaso ange mu tunda asuẽlẽla.
Momo omunu wosi wa ponduile oku ndi lembeleka ale oku ndi kavuluisa, o kasi ocipãla lame.
Omãla vange ka va kuete elavoko, momo unyãli wa yula.
פ [Pe]
17 O Siono yolõla ovaka ayo;+ oyo ka yi kuete laumue o yi lembeleka.
Yehova wa eca ocihandeleko cimue coku katukila Yakoba kovanyãli vaye vosi vo ñuala.+
O Yerusalãi ya linga ocina cimue ca vĩha kokuavo.+
צ [Tsade]
18 Yehova ukuesunga,+ momo ame nda sinĩla ocihandeleko* caye.+
Yeveleli amanu vosi kuenda tali evalo liange.
Afeko vange vosombo* kuenda amalẽhe vange valume, vambatiwa kumandekua.+
ק [Qoph]
19 Nda vilikiya vakuacisola cange, pole, ovo va ndi pakula.+
Ovitunda viange kuenda akulu vange va kunduiwa volupale,
Osimbu va kala oku sandiliya okulia oco vamameko lomuenyo.+
ר [Resh]
20 Tala, A Yehova momo ndi kasi oku tala ohali yalua.
Ndi yevite esakalalo lialua vokati kange.*
Utima wange wa sumua vokati kange, momo nda lekisa esino lialua.+
Kosamua osipata yi ponda;+ vokati konjo omanu va kasivo oku fa.
ש [Shin]
21 Omanu va yeva oku leña leña kuange; ka kuli laumue o ndi lembeleka.
Ovanyãli vange vosi va yeva eci catiamẽla kohali yange.
Ovo va sanjuka, momo ove wa ci koka.+
Pole, ove o ka nena eteke wa tukula+ eci ovo va ka kala ndame.+
ת [Taw]
22 Ũvi wavo wosi, u situluiwe kovaso ove kuenda va tata lãvi,+
Ndeci wa ndi tata lãvi omo liakulueya ange osi.
Momo oku leña leña kuange kualua kuenda utima wange u vela.
א [Aleph]*
2 Yehova wa sitika omõla ukãi a Siono velende lionyeño yaye!
Eye wa imba kilu lieve eposo lia Isareli oku upisa kilu.+
Eye ka ivalukile ociliatelo colomãhi viaye+ keteke lionyeño yaye.
ב [Beth]
2 Yehova wa nyõla ovitumãlo viosi vioku kala via Yakoba okuti, ka lekisile ohenda.
Vonyeño yaye, eye wa kundula ovitumãlo vi kuete oviteyuilo viomõla ukãi wo Yuda.+
Eye wa kupula posi kuenda wa sepula usoma+ kumue lolombuale viaye.+
ג [Gimel]
3 Voku tokota kuonyeño yaye, eye wa imũla ongusu* yosi ya Isareli.
Eye wa tiula eka liaye liondio eci unyãli a pitĩla,+
Kuenda ku Yakoba eye wamamako oku timĩha ndondalu yi nyõla ovina viosi via yi ñuala.+
ד [Daleth]
4 Eye wa tieña* ohonji yaye ndunyãli umue; eka liaye liondio lia lipongiya oco li katukile ndunyãli umue;+
Eye wamamako oku ponda vosi vana ovaso aye a sanjukila.+
Kuenda wa sukumũla onyeño yaye ndondalu+ vombalaka yomõla ukãi a Siono.+
ה [He]
5 Yehova wa linga ndunyãli umue;+
Eye wa kundula Isareli.
Wa nyõla olosapalalo viaye viosi;
Wa kundula ovitumãlo viaye viosi vi kuete oviteyuilo.
Kuenda wa vokiya oku lila loku lisiõsiõla kuomõla ukãi wo Yuda.
ו [Waw]
6 Eye o tata ombalaka yaye lungangala,+ ndocipundo vepia liovikũla.
Yehova wa lingisa okuti, ocipito kuenda esambata vi ivaliwa vo Siono,
Kuenje vonyeño yaye yalua eye ka kapiko osoma locitunda.+
ז [Zayin]
7 Yehova wa likala utala waye;
Eye wa pembula ocitumãlo caye ci kola.+
Wa eca ovimbaka violosapalalo vialio vi kuete oviteyuilo peka liunyãli.+
Ovo va kalukila lolukandi vonjo ya Yehova,+ ndeci keteke liocipito.
ח [Heth]
8 Yehova wa nõlapo oku nyõla ocimbaka comõla ukãi a Siono.+
Eye wa seteka ovimbaka lukolo woku seteka.+
Ka tatekele eka liaye koku nena enyõleho.*
Eye wa lingisa okuti ocilamanelo kuenda ocimbaka, vi lila.
Viosi yavio via hongua.
ט [Teth]
9 Olombundi vialio via kupukila posi.+
Eye wa kundula kuenda wa teya ovikundiko vialio.
Soma yalio kuenda olombuale vialio va kasi pokati kolofeka.+
Ka kuli ocihandeleko;* ndaño muẽle ovitunda vialio ka vi sangi ocinjonde ci tunda ku Yehova.+
י [Yod]
10 Akulu vomõla ukãi a Siono, va tumãla posi loku ũha.+
Va limba oneketela kovitue viavo kuenda va wala ovikelẽyi.+
Afeko vosombo vo ko Yerusalãi va petamisa ovitue viavo posi.
כ [Kaph]
11 Ovaso ange a kava omo lioku lila.+
Ndi yevite esakalalo lialua vokati kange.*
Utima wange wa teka muẽle,* omo lienyõleho liomõla* ukãi womanu vange,+
Omo liomãla kuenda oloñaña vi ambukila volokololo violupale.+
ל [Lamed]
12 Ovo vamamako oku pula ku va ina yavo vati: “Pi ku kasi okulia kuenda ovinyua?”+
Osimbu ovo vambuka ndomanu vamue va lemẽhiwa volokololo violupale,
Osimbu omuenyo wavo u takatela povaka a va ina yavo.
מ [Mem]
13 Nye ndi sukila oku kuata oco ci kale nduvangi,
Nye ndi pondola oku ku sokisa laco, Amõla ukãi wo Yerusalãi?
Nye ndi pondola oku ku sokisa laco, oco ndu ku lembeleke laco, Ofeko wosombo wa Siono?
Momo oku nyõliwa kuove kualua calua ndokalunga.+ Helie o pondola oku ku sakula?+
נ [Nun]
14 Ovinjonde ovaprofeto vove va mola, via kala viuhembi haivio ka via kuatele esilivilo,+
Kuenda ovo ka va setekele oku ku yovola kumandekua poku situlula okulueya kuove,+
Pole, ovo vamamako oku ku sapuila uhembi kuenda ovinjonde vi yapuisa.+
ס [Samekh]
15 Vosi vana va pita vetapalo va pandula loku pembula omo liove.+
Va sika ovilua loku komõha+ kuenda va puka puka ovitue viavo omo liomõla ukãi wo Yerusalãi vati:
“Olu oluo olupale luna ovo va popia okuti, ‘lua lipua keposo, haluo esanju lio kilu lieve liosi’?”+
פ [Pe]
16 Ovanyãli vove vosi va ku yikuila omẽla wavo.
Ovo va sika ovilua kuenda va keleketa ovayo avo loku popia vati: “Etu tua yi kundula.+
Eli olio eteke tua kala oku lavoka!+ Olio lia pitĩla kuenda tu li lete!”+
ע [Ayin]
Eye wa ku kundula okuti, ka lekisile ohenda kokuove.+
Eye wa ecelela okuti, ovanyãli va sanjuka omo liove; eye wa kemãlisa ongusu* yovanyãli vove.
צ [Tsade]
18 Utima womanu u kalukila Yehova, Acimbaka comõla ukãi a Siono.
Asuẽlẽla a loke ndolui utanya luteke.
Ku ka puyuke ove muẽle ndaño oku puyuisa ovaso ove.*
ק [Qoph]
19 Votoka! Kaluka lolukandi vokuenda kuteke, kefetikilo lioku lavulula.
Pesela utima wove ndovava kovaso yocipala ca Yehova.
Votuila ovaka ove kokuaye omo liomuenyo womãla vove,
ר [Resh]
20 Tala A Yehova, vanja ku una ove wa tata lungangala.
Anga hẽ akãi va sesamẽlele oku lia oloñaña viavo vina ovo muẽle va cita, omãla vavo muẽle va kuete uhayele,+
Ale ovitunda kuenda ovaprofeto va sesamẽlele oku pondiwila kocitumãlo ci kola ca Yehova?+
ש [Shin]
21 Akuenje kuenda alume va kuka, va fila posi volokololo.+
Afeko vange vosombo* kuenda amalẽhe vange valume, va kupuiwa losipata.+
Ove wa ponda keteke lionyeño yove; ove wa ponda okuti kua lekisile ohenda.+
ת [Taw]
22 Ove o kovonga ocinjoko kolonele viosi ndu okuti, o vilikiya omanu keteke limue liocipito.+
Keteke lionyeño ya Yehova lomue wa puluka ale oku supapo;+
Vana ame nda cita* haivo nda tata, unyãli wange wa va kundula.+
א [Aleph]*
3 Ame ndimunu una wa mola ohali omo liombueti yonyeño yaye.
2 Eye wa ndi lupuisa kuenda o ngendisa vowelema okuti, vocinyi hamoko.+
3 Ocili, olonjanja vialua eka liaye li ndi katukila eteke liosi.+
ב [Beth]
4 Eye wa lingisa okuti, ositu yange kuenda ekova liange vi nyõleha;
Eye wa teya akepa ange.
5 Eye wa ndi ñuala ocingonja; wa kapa kolonele viange inenu vi lula+ kuenda ovitangi.
6 Eye wa ndi kisika oku tumãla vovitumãlo via tekãva nda vana va fa osimbu.
ג [Gimel]
7 Eye wa ndi ñualisa locimbaka cimue, oco si ka puluke;
Eye wa ndi kuta lalienge osipi a lema.+
8 Eci ndi vilikiya loku kaluka oco ndi pinge ekuatiso, eye o likala* ohutililo yange.+
9 Eye wa yika olonjila viange lovawe a songiwa;
Wa lingisa okuti, olonjila viange vi penga.+
ד [Daleth]
10 Eye o ndi lavekela vonutula ndo ursu, ndohosi ya lisalamisa.+
12 Eye wa tieña* ohonji yaye kuenda wa ndi lingisa ocimãho cusongo waye.
ה [He]
13 Eye wa toma olongẽla viange lovisongo* viocilalo caye.
14 Ame nda linga ocipapalelo comanu vosi, ovo va ndi fuanguila lovisungo viavo eteke liosi.
15 Eye wa ndi yukisa lovina vi lula kuenda wa ñutisa locikũla cilula.*+
ו [Waw]
16 Eye o teya ovayo ange lolombue;
O ndi leñuila vatiko.+
17 Ove o njupa ombembua; nda ivalako eci ciwa.
18 Omo liaco, ndi popia siti: “Eposo liange lia pua, oku kongelamo elavoko liange ku Yehova.”
ז [Zayin]
19 Ivaluka ohali yange kuenda si kuete onjo, ivaluka+ ocikũla cilula* kuenda inenu vi lula.+
20 Ocili okuti, ove o ka ivaluka kuenda o keya kokuange oco o ndi kuatise.+
21 Ndi ci ivaluka vutima wange; eli olio esunga lieci ndi ka lekisila ocituwa coku kevelela.+
ח [Heth]
22 Ka tua nyõliwile omo liocisola ka ci pongoloka ca Yehova,+
Momo ovilinga viaye viohenda, lalimue eteke vi pua.+
23 Eye o lekisa ohenda omẽle yosi;+ esunga liove lialua cimue.+
24 “Yehova eye onepa yange,”+ oco nda popia, “eli olio esunga lieci ndi ka lekisila ocituwa coku kevelela kokuaye.”+
ט [Teth]
25 Yehova uwa ku una o kevelela kokuaye,+ komunu una amamako oku u sandiliya.+
26 Ciwa oku kevelela lepandi*+ epopelo lia Yehova.+
27 Ciwa okuti omunu ambata okanga osimbu a kasi umalẽhe.+
י [Yod]
28 Eci Suku a kapa ocilemo cimue kokuaye, eye a tumãle lika liaye loku ũha.+
29 A kape omẽla waye voneketela;+ pamue handi ku kala elavoko.+
30 A ece etama liaye ku una u veta; a sepuiwe calua.
כ [Kaph]
31 Momo Yehova ka ka tu likala otembo ka yi pui.+
32 Ndaño okuti eye wa koka esumuo, eye o ka lekisavo ohenda ndomo ci likuata locisola caye calua haico ka ci pongoloka.+
33 Momo ka ci kasi vutima waye oku talisa ohali ale oku sumuisa omãla vomanu.+
ל [Lamed]
34 Oku kosela vemẽhi liolomãhi olomandekua viosi vio kilu lieve,+
35 Oku likala esunga komunu kovaso a Fũ,+
36 Oku linga eci cĩvi komunu kocitangi caye,
Yehova ka ecelela ovina viaco.
מ [Mem]
37 Helie o tẽla oku vangula cimue loku ci tẽlisa okuti Yehova ka ci handelekele?
38 Vomẽla wa Fũ,
Ka mu tundi ovina vĩvi lovina viwa vonjanja yimuamue.
39 Momo lie omunu umue o kasi lomuenyo, a liyeyela omo liovina viyilila kekandu liaye?+
נ [Nun]
40 Tu sokololi lutate catiamẽla konjila yomuenyo wetu+ kuenda tu tiukili ku Yehova.+
41 Tu pingi ku Suku yo kovailu lutima wa sunguluka kuenda tu tuliki ovaka etu poku popia hati:+
42 “Etu tua lueya kuenda tua sina+ kuenje ove kua tu tetelele.+
ס [Samekh]
43 Lonyeño, ove kua yevelile kohutililo yetu;+
Ove wa tu landula kuenda wa tu ponda okuti kua lekisile ocikembe.+
44 Ove wa tateka oku pitĩla kokuove lelende limue oco okuti, ohutililo yetu ka yi pitĩla.+
45 Ove o tu lingisa eliño kuenda eyala pokati komanu.”
פ [Pe]
46 Ovanyãli vetu vosi va tu yikuila ovimẽla viavo.+
47 Usumba kuenda olonjanjo via linga onepa yetu,+ upolokoso kuenda enyõleho.+
48 Olondui viovava, vi loka vovaso ange omo lienyõleho liomõla ukãi womanu vange.+
ע [Ayin]
49 Ovaso ange a loka loka asuẽlẽla okuti ka a liwekapo, ka a puyuka,+
50 Toke eci Yehova a mola loku limbuka oku upisa kilu ndomo omanu vaye va kasi oku tala ohali.+
51 Ovaso ange a ndi nenela esumuo omo liomãla vosi vakãi vo volupale luange.+
צ [Tsade]
52 Ovanyãli vange va ndi yeva ndonjila yimue, ndaño okuti ovo ka va kuete esunga lioku ndi suvuka.
53 Ovo va nyõla omuenyo wange vocitunu; ovo vamamako oku njimba ovawe.
54 Ovava a londa kilu liutue wange kuenje nda popia siti: “Nda sulila!”
ק [Qoph]
55 Nda vilikiya onduko yove A Yehova, oku upisa valondo ocitunu.+
56 Yeva ondaka yange; ku ka sitike ovatũi ove koku liyula kuange kuekuatiso, kuekavuluko.
57 Ove wamela ocipepi keteke nda ku vilikiya. Ove wa popia hati: “Ku ka kuate usumba.”
ר [Resh]
58 A Yehova, ove wa ndi teyuila kombonge, wa yovola omuenyo wange.+
59 A Yehova, ove wa mola ovina vĩvi va ndi lingila; linga ohenda lekisa esunga kokuange.+
60 Ove wa mola efetuluinyo liavo liosi, asokiyo avo osi ãvi va ndi lingila.
ש [Sin] ale [Shin]
61 A Yehova, wa yeva oku sepula kuavo, asokiyo avo osi ãvi va ndi lingila,+
62 Olondaka viomẽla wa vana va ndi lambalala kuenda oku ndi ñuñunila eteke liosi.
63 Vanja kokuavo; ci kaile okuti va tumãla, ale va votoka, ovo va ndi sepula vovisungo viavo!
ת [Taw]
64 A Yehova, o ka va fetuluinya ndomo ci likuata lovilinga viavo.
65 Ove o ka tĩlisa utima wavo ndesiñalo liove kokuavo.
66 Ove o ka va landula vonyeño yove a Yehova kuenje o ka va kundula vemẽhi liovailu.
א [Aleph]*
4 Ulu una u nina, ulu wa fina, wa pembela!+
Ovawe a kola+ a sandokaila kavindi osi olokololo!*+
ב [Beth]
2 Catiamẽla komãla va soliwe vo Siono, vana va velelepo calua ndulu wa kanguiwa,
Va tendiwa ndasanga a tungiwa lotuma,
Upange wovaka wukuakutalavaya lotuma!
ג [Gimel]
3 Ndaño muẽle olombua viovusenge* vi nyamisa omãla vavo,
Pole, omõla ukãi womanu vange wa linga ongangala,+ ndolombo vio vekalasoko.+
ד [Daleth]
4 Elimi lioñaña yi nyama, lia lamẽlela vuliakusu omo lienyõna.
Omãla va pinga ombolo,+ pole, lomue o va ĩha.+
ה [He]
5 Vana va enda oku lia ovilia viavo via velapo, va kupuka lonjala* volokololo.+
Vana va kula loku wala ovowalo ohusu,+ va pekela vondunda yatiko.
ו [Waw]
6 Eyambulo* liomõla ukãi womanu vange linene calua okuti, eyambulo omo liekandu lio Sodoma li sule,+
Yina ya nyõliwa vocipikipiki okuti, ka ya kuatele eka lalimue li yi kuatisa.+
ז [Zayin]
7 Va Nasiri+ vayo va yelele vali calua okuti, ocikokoto ci sule, va yelele calua okuti asenjele a sule.
Ovo va kuatele avala alua okuti, olo koral vi sule; va kala ndosafira ya kanguiwa.
ח [Heth]
8 Emolẽho liavo lia tekãvele calua okuti, akala* a sule;
Ovo ka va limbukiwile volokololo.
Ekova liavo lia kuata anyõle kilu liakepa avo;+ olio lia kukuta ndolohũi.
ט [Teth]
9 Vana va fa losipata va velapo vana va fa lonjala,+
Vana va kala oku fa levando okuti, vana va tomiwa losipata omo liekambo liokulia vepia, va sule.
י [Yod]
10 Lovaka avo muẽle, akãi vakuahenda va teleka omãla vavo muẽle.+
Ovo va linga okulia kuavo kuoku lisiõsiõla vokuenda kuenyõleho liomõla ukãi womanu vange.+
כ [Kaph]
11 Yehova wa situlula oku tema kuaye,
Eye wa sukumũla onyeño yaye yalua.+
Kuenje eye o taimisa ondalu yimue vo Siono yina yi nyõla oviseveto vialio.+
ל [Lamed]
12 Olosoma vio kilu lieve kuenda olonungi viosi viofeka yima ciwa, ka va tavele
Okuti ukuakunyõla kuenda unyãli, va ka iñilila polombundi vio Yerusalãi.+
מ [Mem]
13 Ovina viaco, via lingiwa omo liakandu ovaprofeto ayo kuenda akulueya ovitunda viayo,+
Vana va pesela osonde ya vakuesunga pokati kayo.+
נ [Nun]
14 Ovo va tungayala ndolomeke+ volokololo.
Va vĩhisiwa losonde,+
Omo liaco, lomue o tẽla oku lamba kovowalo avo.
ס [Samekh]
15 “Kuendi! Wa vĩhisiwi!” ovo va va kalukila. “Kuendi! Kuendi! Ko ka tu lambi!”
Momo ovo ka va kuete onjo kuenda va kasi oku tungayala.
Omanu va kasi oku popia pokati kolofeka vati: “Ovo ka citava okuti va kala letu kulo.*+
פ [Pe]
16 Ocipala ca Yehova ca va sandola;+
Eye ka ka vanja vali lohenda kokuavo.
Alume ka va ka lekisa esumbilo kovitunda,+ ndaño oku lekisa ohenda kakulu.”+
ע [Ayin]
17 Toke cilo, ovaso etu a kava loku sandiliya ekuatiso liesanda.+
Tua sandiliya kuenda tua sandiliya ekuatiso kofeka yimue okuti, ka yi tẽla oku tu popela.+
צ [Tsade]
18 Ovo va kũlĩhĩsa enanga liosi+ tu eca oco ka tu ka endele volokololo vietu.
Esulilo lietu li kasi ocipepi; oloneke vietu via sulila, momo esulilo lietu lia pitĩla.
ק [Qoph]
19 Vakuakutulandula va enda oku lupuka calua okuti, olongonga vio kilu vi sule.+
Ovo va enda oku tu landula kolomunda; va tu lavekela vonutula vekalasoko.
ר [Resh]
20 Efuimo lianyũlu etu okuti, ombuavekua ya Yehova+ ya kuatiwa vocitunu cavo cinene,+
Una tua enda oku popia hati: “Tu ka tunga vulembo waye pokati kolofeka.”
ש [Sin]
21 Yolela kuenda sanjuka, Amõla ukãi wo Edome,+ una wa tunga vofeka yo Usi.
Pole, okopo yi ka eciwavo kokuove+ kuenje ove o ka kolua loku situlula epõlõla liove.+
ת [Taw]
22 Amõla ukãi wo Siono, eyambulo lioku lueya kuove, lia sulila.
Eye ka ka ku ambata vali kumandekua.+
Pole, eye o ka ku yambula omo lioku lueya kuove, Amõla ukãi wo Edome.
Eye o ka situlula akandu ove.+
5 A Yehova, ivaluka eci ca pita letu.
Tala kuenda limbuka esepu lietu.+
2 Ocipiñalo cetu ca eciwa komanu vañi, olonjo vietu via eciwa kovingendeleyi.+
3 Tua linga olosiwe okuti ka tu kuete isia; va ina vetu va kasi ndovimbumba.+
4 Tu sukila oku feta oco tu nyue ovava etu muẽle+ kuenda oku landa olohũi vietu muẽle.
5 Ovo va kasi oku tu landula, va kasi ocipepi okuti ndopo va tu kuata;
Etu tua kava, pole, ka tu kuete epuyuko.+
6 Tua kolela Kegito+ kuenda ko Asuria+ oco tu kuate ombolo yi tẽla yoku lia.
7 Vakukululu yetu vana va linga ekandu, ka va kasiko vali, pole, etu tu sukila oku feta akulueya avo.
8 Apika kaliye va tu viala; ka kuli laumue o tu popela peka liavo.
9 Tua kapa kohele omuenyo wetu oco tu kuate ombolo,+ omo liosipata yo vekalasoko.
10 Ekova lietu lia tokota calua ndofolono, omo lionjala yalua.+
11 Ovo va putula* akãi vetu ko Siono kuenda afeko vetu vosombo valupale o Yuda.+
12 Olombuale via patekiwa lovaka avo+ kuenda akulu ka va lekisiwile esumbilo.+
13 Amalẽhe vambata ombambo kuenda akuenje va yengenga poku ambata olohũi via lema.
14 Akulu va tunda pombundi yolupale;+ amalẽhe alume ka va siki vali ocisungo cavo.+
15 Vutima wetu ka muli vali esanju; oku piluka kuetu kua pongoloka esumuo.+
16 Ekolowa lia kupuka kutue wetu. Ngongo yetu we, momo tua linga ekandu!
17 Omo liovina viaco, utima wetu u vela,+
Kuenda omo liovina evi, ovaso etu a vuvala,+
18 Omo Liomunda Siono, yina ya siala upolokoso;+ olombulu kaliye omo vi endela.
19 Catiamẽla kokuove, A Yehova, ove o tumãla kocalo otembo ka yi pui.
Ocalo cove ci kasi tunde kocitumbulukila toke kocitumbulukila.+
20 Momo lie o tu ivalela otembo ka yi pui loku tu yanduluka vokuenda kuotembo yalua?+
21 Tu tiule vali kokuove, A Yehova kuenje etu tu ka tiuka lonjanga kokuove.+
Tumbulula oloneke vietu ndeci ca kala kosimbu.+
22 Pole, ove wa tu likala olumue.
Ove amamako oku tu kuatela onyeño yalua.+
Ovipama 1-4 ovisungo vielisiõsuĩlo via sonehiwa vo ambesendaliu kelimi lio Heveru.
Ale “kovivanja violombala.”
Ale “akãi amalẽhe.”
Lit., “utue.”
Ale “oku sanjukila.”
Yi tiamisiwila ko Yerusalãi ndu okuti oyo omunu.
Lit., “omẽla.”
Ale “amalẽhe akãi.”
Lit., “ovãla.”
Eyi oletala yatete yo ambesendaliu kelimi lio Heveru.
Lit., “ombinga yosi.”
Lit., “oku liata.”
Ale “oku nyõla.”
Lit., “yoku ina.”
Ale “onumbi.”
Lit., “ovãla.”
Lit., “omuma yange ya sukumuiwa posi.”
Upopi umue wocindekaise okuti pamue u situlula ohenda ale ocikembe.
Lit., “ombinga.”
Lit., “omõla ukãi wiso liove.”
Lit., “kutue wolokololo viosi.”
Ale “amalẽhe akãi.”
Ale “nda cita luhayele.”
Eyi oletala yatete yo ambesendaliu kelimi lio Heveru.
Ale “o tateka; o tepa.”
Ale pamue, “eye o ndi lingisa ndosi yimue ka ya limiwile.”
Lit., “wa liata.”
Lit., “omãla.”
Tala Elomboluilo.
Tala Elomboluilo.
Ale “loku ũha.”
Eyi oletala yatete yo ambesendaliu kelimi lio Heveru.
Lit., “kutue wolokololo viosi!”
Ocinyama cimue covusenge ca setahãla ombulu.
Lit., “va siala upolokoso.”
Lit., “oku lueya.”
Lit., “owelema.”
Ale “va tunga kulo ndovingendeleyi.”
Ale “va kutisa osõi.”