HOSEA
1 Ondaka ya Yehova yeya kAlombou Hosea* omõla a Beheri koloneke via Usiya,+ via Yotama,+ via Ahasi+ kuenda via Hesekiya+ olosoma vio Yuda+ kuenda koloneke via Yerevoama+ omõla a Yoasi+ osoma yo Isareli. 2 Eci Yehova a fetika oku vangula ondaka yaye pocakati ca Hosea, Yehova wa sapuila Hosea hati: “Kuende, kuela ukãi umue o laika oku linga ocipuepue* kuenda o ka kuata omãla vupuepue,* momo omanu vo vofeka va kasi oku linga upuepue* kuenje va yanduluka Yehova.”+
3 Omo liaco, eye wa enda kuenda wa kuela Gomere omõla ufeko wa Divilayimi noke ukãi waco wemina kuenje wo citila omõla ulume.
4 Noke Yehova wa sapuila Hosea hati: “U luka hati, Yesirele,* momo ndopo ndi ka yambula onjo ya Yehu+ omo liovilinga via Yesirele vioku pesela osonde kuenda ndi imũla uviali wonjo ya Isareli.+ 5 Keteke liaco, ndi ka teya ohonji ya Isareli Vocimbota* ca Yesirele.”
6 Gomere wemina vali kuenje wa cita omõla umue ufeko. Kuenje Suku wa sapuila Hosea hati: “U luka hati, Lo-Ruhama* omo si lekisa vali ohenda+ konjo ya Isareli, momo ndi va tundisa muẽle.+ 7 Pole, ndi ka lekisa ohenda konjo ya Yuda+ kuenda ame ndi Yehova Suku yavo+ ndi va popela; ame si ka va popela lohonji, ale losipata, pamue luyaki, ale lolokavalu, pamue la vakuakuendela kolokavalu.”+
8 Noke yoku nyamula Lo-Ruhama, Gomere wemina vali kuenje wa cita omõla ulume. 9 Omo liaco, Eye wa popia hati: “U luka hati Lo-Ami* momo ene havumanu vangeko kuenda hameko Suku yene.
10 “Etendelo liomanu* va Isareli li ka kala ndeseke lio vokalunga okuti, ka li yongiwa ndaño oku tendiwa.+ Kuenje kocitumãlo kuna kua va sapuiwila hati, ‘Ene havumanu vangeko,’+ ku ka sapuiwa kokuavo okuti, ‘Omãla va Suku o kasi lomuenyo.’+ 11 Kuenje omanu va Yuda lava va Isareli va ka likongela vomunga yimuamue+ kuenda va ka linõlela usongui umue kuenje va ka lamana oku tunda vofeka, momo eteke lia Yesirele li ka kala linene.+
2 “Tukuli vamanjene alume hoti, ‘Omanu vange!’*+
Ku vamanjene akãi hoti, ‘Okãi wa lekisiwa ohenda!’*+
2 Lundili ina yene; u lundili,
Momo eye hukãi wangeko+ kuenda ame si veyayeko.
Eye o sukila oku liwekapo oku linga upuepue,*
Kuenda ka ka linge vali ukahokolo,
3 Ndu lulisa kuenje o kala epõlõla ndeci a kala keteke a citiwa,
Ndu lingisa ndekalasoko,
Kuenje o kala ndofeka ka yi kuete ovava,
Ndu lingisa okuti, o fa lenyona.
4 Si ka lekisa ohenda komãla vaye,
Momo ovo omãla vupuepue.*
5 Momo ina yavo wa linga upuepue.*+
Ukãi una wa va mina wa linga ovina vi kutisa osõi,+ momo wa popele hati:
‘Ndi ka sandiliya vakuacisola cange,+
Vana va nyĩha ombolo yange lovava ange,
Lovowalo ange ohusu kuenda wovalatanya, lulela wange kuenda ovinyu yange.’*
6 Ndi sitika onjila yove longumbo yimue yi kuete olosongo;
Kuenda ndu u katuila ocimano cimue covawe
Oco ukãi waco ka ka sange olonjila viaye.
7 Ukãi waco o ka landula vakuacisola caye, pole, ka ka va sanga;+
O ka va sandiliya, pole, ka ka va sanga.
Noke o ka popia hati, ‘Niukila ku veyange watete,+
Momo kotembo yina, ekalo liange lia kala ciwa okuti, cilo ci sule.’+
8 Ukãi ka limbukile okuti, ame, ame ndo wĩhile olomema,+ ovinyu yokaliye kuenda ulela,
Kuenda ame ndo wĩhilevo opalata yalua
Lulu una ovo va talavaya lawo kefendelo lia Baale.+
9 ‘Omo liaco, ndi ka tiuka kuenda ndi tambula otiliku yange votembo yaco,
Kuenda ovinyu yange yokaliye kuvo wavio,+
Ndu upa ovowalo ange ohusu lovalatanya vina eye a laikele oku sitika epõlõla liaye.
10 Ndi ka lekisa epõlõla liaye ku vakuacisola caye,
Kuenje ka ku ka kala ulume laumue u yovola peka liange.+
11 Ndi ka imũla esanju liaye liosi,
Ovipito viaye,+ oku molẽha kuolosãi viaye viokaliye,
asambata aye kuenda olotembo viaye viosi viovipito.
12 Ndi nyõla oviti viaye viakuyu loviti viaye viayuva, vina eye a popele hati:
“Evi ovio ofeto yange yina vakuacisola cange va nyĩha”;
Ndi vi lingisa usenge,
Kuenje ovinyama viovusenge vi vi nyõla.
13 Ndi ka sombisa ukãi omo lioloneke eye a lumbila ovilumba koviñumañuma via Baale,+
Eci a enda oku wala ovimbilingu, loku kapa ovina viaye vioku liposuisa loku lupukila ku vakuacisola caye,
Ame puãi wa njivala,’+ oco Yehova a popia.
15 Oku upisa kotembo yaco oku endela kovaso, ndi tiuwiya kokuaye oviumbo viayuva,+
Kuenje Ocimbota* co Akore+ kokuaye ci linga ombundi yelavoko;
Oko eye a ka ndi tambulula ndeci koloneke a kala umalẽhe,
Kuenda ndeci keteke a tunda kofeka Yegito.+
16 Kuenje keteke liaco,’ oco Yehova a popia,
‘Ove o ka ndi tukula hati, Veyange kuenda ku ka ndi tukula vali hati, cime Cange.’*
17 ‘Ndi ka imũla olonduko vioviñumañuma via Baale vomẽla waye,+
Kuenje olonduko viavio ka vi ka ivalukiwa vali.+
18 Keteke liaco, ndi va lingilako ocisila cimue lovinyama via tema viovusenge,+
Lolonjila viovailu kuenda ovinyama vi likoka posi;+
Ndi yovola ofeka kohonji, kosipata kuenda kuyaki,+
19 Ove o ka linga ondombua yange otembo ka yi pui;
Ove o ka linga ondombua yange vesunga kuenda vesunguluko,
Vocisola ka ci pongoloka kuenda vohenda.+
20 O ka linga ondombua yange vesunga,
Ove o ka kũlĩha muẽle Yehova.’+
21 ‘Keteke liaco ndi ka tambulula,’ oco Yehova a popia,
‘Ndi ka tambulula ovailu,
Kuenda ovo va ka tambulula ilu lieve;+
22 Kuenje ilu lieve li ka tambulula olomema, lovinyu yokaliye, lulela;
23 Ndi kũla omanu vange ndombuto,*+
Kuenda ndi ka lekisa ohenda ku vana ka va lekisiwile ohenda;*
Vana okuti hamanu vangeko* ndi va sapuila hati: “Ene vumanu vange,”+
Kuenje ovo va ka popia vati: “Ove wu Suku yetu.”’”+
3 Kuenje Yehova wa ndi sapuila hati: “Kuende vali, sola ukãi wove una o soliwe lalume vakuavo haeye o linga ukahokolo,+ u sola ndeci Yehova a sole omanu vaye va Isareli+ osimbu ovo va kasi oku enda kolosuku vikuavo+ kuenda va sole oku lumbila akende ayuva kokuavo.”
2 Ndo landa leci ci soka 15 kolopalata kuenda o homeri* yimosi lomeyu yosevata. 3 Noke nda sapuila ukãi hati: “Ove o kala lame oloneke vialua. Liwekapo oku linga upuepue* kuenda ku ka lipekele lalume vakuavo kuenje haico ndi lingavo love.”*
4 Momo omanu va Isareli va ka kala otembo yalua* okuti ka va ka kuata osoma,+ ndaño ombuale, ale ovilumba, ndaño ongunji pamue evendalia,+ ale oviteka vio vonjo.*+ 5 Noke omanu va Isareli va ka tiuka loku sanda Yehova Suku yavo,+ la Daviti soma yavo+ kuenje lesumbilo va ka tiuka ku Yehova oco va tambule ohenda yaye konepa ya sulako yoloneke.+
4 Yeveleli ondaka ya Yehova, Ene amanu va Isareli,
Momo Yehova o kuete ondaka yoku katukila olonungi viofeka,+
Omo vofeka ka muli ocili ndaño ocisola ka ci pongoloka ale ukũlĩhĩso wa Suku.+
2 Olohuminyo viesanda, luhembi+ kuenda umondi,+
Loku nyana kuenda ukahokolo+ via lisandula calua,
Kuenje omanu vamamako oku pesela osonde ya vakuavo.+
3 Eli olio esunga lieci ofeka yi ka kala lesumuo,+
Kuenda olonungi viaco viosi vi ka hongua;
Ovinyama via tema viovusenge lolonjila viovailu,
Kuenda olõsi vio vokalunga vi ka nyõleha.
4 “Pole, lomue ka ka lihoye ale oku vetela evelo ukuavo,+
Momo omanu vove va kasi ndava va lihoya locitunda cimue.+
5 Kuenje lutanya ove o ka lilondoka,
Kuenda uprofeto o ka lilondoka kumue love ndu okuti luteke.
Noke ndi ka kundula ina yove.
6 Omanu vange va ka kunduiwa, momo ka kuli ukũlĩhĩso.
Omo ove wa likala ukũlĩhĩso,+
Ndi ka ku likalavo okuti, ku ndi vumbi ndocitunda cange;
Kuenda omo okuti, wa ivalako ocihandeleko* ca Suku yove,+
Ame ndi ka ivalakovo omãla vove.
7 Osimbu ovo va livokiya, va enda oku ndueyela calua.+
Ulamba wavo ndi ka u pongolola esepu.*
8 Eci omanu vange va linga ekandu va litekula ovo muẽle lositu,
Ovo va yongola okuti omanu vamamako oku linga ekandu.
9 Cimuamue haico ci ka pita lomanu kuenda ocitunda;
Ndi ka va sombisa omo liovilinga viavo
Ndi ka va yambula ndomo ci likuata lovilinga viavo.+
10 Ovo va ka lia pole, ka vekuta.+
12 Omanu vange va sanda oviteka viavo viavaya,
Loku linga eci ombueti* yavo yi va sapuila;
Momo onjongole yoku linga ukahonga, yi va kokela oku yapuka,
Kuenda omo liupuepue* wavo, va likala oku pokola ku Suku yavo.
13 Ovo vasl lumbila ovilumba kolosungu violomunda,+
Va tuimisila owisi wovilumba koviwulu,
Vemi lioviti vio karvaliu loviti+ viulemba kuenda oviti viosi vinene,
Momo ulembo wavio uwa.
Eli olio esunga lieci omãla vene vafeko va lingila upuepue,*
Kuenda akãi vomãla vene valume va lingila ukahokolo.
14 Si ka sombisa omãla vene vafeko omo liupuepue* wavo,
Lakãi vomãla vene valume omo liukahokolo wavo.
Momo alume va tunda lovipuepue,
Kuenda va lumbila ovilumba kumue lovipuepue vio vonembele;
Omanu vaco okuti ka va kuete elomboloko+ va ka nyõliwa.
Ko ka endi ko Giligali+ ale ko Beta-Vene,+
Kuenda ko ka lisingi hati: ‘Ndeci Yehova a kasi lomuenyo!’+
16 Momo Isareli wa sina ndeci ongombe yomange ya sina.+
Anga hẽ cilo Yehova o ka va songuila ndocitupi comeme vusenge umue?*
17 Efarimi wa kakatela koviteka.+
A kale lika liaye!
Olombiali* viaye vi sole calua esepu.+
19 Ofela yu* kuata vavava,
Kuenda va ka kuata osõi omo liovilumba viavo.”
Yeveleli ciwa, Anjo ya Isareli,
Yeveleli, Ene amanu velombe lia soma,
Momo esombiso liya kokuene;
Omo ene vunjanjo ko Misipa
Kuenda vuwanda umue wa nyanyumuĩwa ko Tavore.+
3 Nda kũlĩha Efarimi
Kuenda Isareli ka salamele okuti siu moli.
4 Ovilinga viavo ka vi va ecelela oku tiuka ku Suku yavo,
Momo va tiamisila ovisimĩlo viavo kupuepue;*+
Kuenda ka va limbukile okuti ame ndi Yehova, ndi Suku yavo.
5 Epela lia Isareli li eca uvangi ũvi watiamẽla kokuaye,*+
Ci kaile Isareli ale Efarimi va lilondoka vekandu liavo,
Kuenda Yuda wa lilondoka kumue lavo.+
6 Va enda kumue loviunda viavo violomeme levi violongombe oco va sande Yehova,
Pole, ka vo sangele.
Eye wa va yanduluka.+
7 Ovo va pakula Yehova,+
Momo va cita omãla ovingendeleyi.
Cilo vosi yavo va ka nyõliwa vokuenda kuosãi yimosi kumue lovipiñalo viavo.*
8 Sikili ombinga+ ko Givea kuenda olumbeta ko Rama!+
Kaluki londaka yuyaki ko Beta-Vene!+ A Benjamini songuila asualali!
9 A Efarimi, o ka kala ocikuata cimue cocinjoko keteke lieyambulo.+
Ame nda sapuila apata a Isareli ovina viosi vi ka pita.
10 Olombuale via Yuda vi kasi ndava va sondolola ongave.+
Ndi ka va sukumũila onyeño yange ndovava.
11 Efarimi o kangisiwa, o nyanyuiwa lesunga.
Momo wa kala lonjongole yoku kuama konyima yunyãli waye.+
12 Omo liaco, ame nda kala ndombunji ku Efarimi
Kuenda nda kala ndoku vola konjo ya Yuda.
13 Eci Efarimi a limbuka uveyi waye kuenda Yuda wa limbuka epute liaye,
Efarimi wa enda ko Asuria+ kuenje wa tuma olomunga kosoma yimue yinene.
Pole, eye ka tẽlele oku vu sakuli,
Kuenda ka tẽlele oku sakula apute ene.
14 Momo ku Efarimi ndi ka kala ndohosi yumalẽhe,*
Kuenda konjo ya Yuda ndi kala ndohosi ya pama.
15 Ngenda kuenda ndi tiukila kocitumãlo cange toke eci ovo va talisiwa ohali omo lieko liavo,
Eci va tala ohali, ovo va ka ndi sanda.”+
Ndaño wa tu lemẽha, pole, o ka sakula apute etu.
2 Noke lioloneke vivali o ka tu ĩha omuenyo.
Keteke liatatu o ka tu pindula,
Kuenda tu ka kala lomuenyo kovaso aye.
3 Tu ka kũlĩha Yehova kuenda tu ka sanda oku u kũlĩha lutima wosi.
Oku iya kuaye kua koleliwa ndeci oku tunda kuekumbi;
Eye o keya kokuetu ndombela yi loka,
Ndombela yomandavela* yi tapela ongongo.”
4 “A Efarimi, nye ndi sukila oku linga love?
A Yuda, nye ndi sukila oku linga love?
Momo ocisola cene ka ci pongoloka ci kasi ndalende omẽle,
Ndowume u takata lonjanga.
5 Eli olio esunga lieci ndi ka ku kunduila* pocakati covaprofeto;+
Ndi ka ku ponda lolondaka viomẽla wange.+
Asombiso ove a ka nina ndocinyi.+
6 Momo ame ndi sanjukila ocisola ka ci pongoloka,* ocilumba hacoko,
Kuenda ndi sanjukila ukũlĩhĩso wa Suku okuti, ovilumba viosi vioku pia elisi vi sule.+
7 Pole, ovo ndomanu vakuakandu, va sinĩla ocisila.+
Va ndi pakuila vofeka yavo.
9 Ocisoko covitunda ci kasi ndovimunga violombandi vi lavekela vonutula omunu umue.
Ovo va siata oku ponda vetapalo lio Sekeme,+
Momo elinga liavo li kutisa osõi.
10 Ame nda mola ocina cimue ca vĩha vonjo ya Isareli.
11 Handi vali, A Yuda kua ku sokiyiwila oku ungula,
Eci ndi nena vali omanu vange olomandekua.”+
Momo va linga eci cĩvi;+
Ovimunu vi iñila volonjo kuenda ovimunga via vakuakupunda vi pundila posamua.+
2 Pole, ovo ka va sokolola vutima wavo okuti, ame ndi ka ivaluka evĩho liavo liosi.+
Kaliye ovilinga viavo viosi via va ñuala;
Ovio vi kasi kovaso yange.
3 Ovo va sanjuisa soma levĩho liavo,
Kuenda va sanjuisa olombuale lovohembi avo.
4 Vosi yavo vakuakulinga ukahokolo,
Ovo va taima ndofolono ya siakãliwa lukuakuyoka olombolo,
Eye o liwekapo oku siakãla ondalu noke yoku kosa osema ya tamiwa toke eci yi tumba.
5 Keteke liocipito ca soma yetu, olombuale via vela,
Ovo va tema omo liovinyu.+
Eye woluĩla eka liaye ku vakuakupembula.
6 Va lingisa okuti ovitima viavo vi sanya ndu okuti va vi nena ocipepi lofolono.*
Ukuakuyoka olombolo o pekela vokuenda kuteke wosi;
Komẽle ofolono yi taima ndondalu yi liakoka.
7 Vosi yavo va tokota ndofolono,
Kuenda va nyõla olombiali* viavo.
8 Efarimi o litenga lomanu vo kolofeka vikuavo.+
Efarimi o sokisiwa lombolo yi kasi ndombunje okuti, ya yokiwa lika onele yimosi.
9 Ovingendeleyi via nyõla ongusu yaye,+ pole, eye ka ci limbuka.
Kuenda esinga liaye lia pongoloka li yela, pole, eye ka ci limbuka.
10 Epela lia Isareli li eca uvangi ũvi watiamẽla kokuaye,+
Pole, ovo ka va tiukile ku Yehova Suku yavo,+
Kuenda ka vo sandiliyile ndaño lovina viosi evi.
11 Efarimi o kasi ndopomba yimue eveke, ka kuete elomboloko.*+
Ovo va pinga ekuatiso Kegito;+ kuenda va sanda ekuatiso ko Asuria.+
12 Kuosi va enda, ndi nyanyumuĩla owanda wange kokuavo.
Ndi va kupuila posi ndolonjila viovailu.
Ndi va yambula ndomo ci likuata lelungulo lia eciwa kohongele yavo.+
13 Ngongo yavo, momo ovo va ndi tila!
Va kunduiwe, momo ovo va ndi sinĩla!
Nda kala lonjongole yoku va yovola, pole, ovo va popia ovohembi atiamẽla kokuange.+
14 Eci va ndi vilikiya oco ndi va kuatise, ka va ci lingile lutima wosi,+
Ndaño ovo vamamako oku lisiõsuĩla povola avo.
Va li tãla tãla ovo muẽle oco va pinge olomema kuenda ovinyu yokaliye;
Ovo va ndi ñualelapo.
15 Ndaño nda va pindisa loku pamisa ovoko avo,
Ovo vamamako oku sokiya eci cĩvi kuenje va ndi ñualelapo.
16 Ovo va pongoloka, pole, ka va pongolokele kocina cimue ciwa;*
Ka va koleliwile, ndeci ohonji ya yonga ka yi koleliwa.+
Olombuale viavo vi ka kupuka losipata omo lielimi liavo lĩvi.
Omo liaco, ovo va ka kala ocikuata cimue cesepu vofeka Yegito.”+
8 “Sika ombinga!+
Omunu umue iya ndongonga oku katukila onjo ya Yehova,+
Momo ovo va lueyela ocisila cange+ kuenda va sinĩla ocihandeleko cange.+
2 Ovo va kalukila lolukandi kokuange vati: ‘A Suku yetu, etu tu va Isareli, tua ku kũlĩha!’+
3 Isareli wa likala eci ca sunguluka.+
A landuiwe lunyãli umue.
4 Ovo va nõla olosoma, pole, halondaka yangeko.
Va nõla olombuale, pole, sia ci kũlĩhĩle.
5 A Samaria, nda likala+ ociñumañuma cove conãle.
Hu kuetele onyeño yalua a Samaria.+
Toke otembo yi pi o ka liyelisa vali?
6 Momo eci ca tunda ku Isareli.
Omesele yimue ya ci tunga kuenda oco Hasukuko;
Ociñumañuma conãle co Samaria ci ka nyanyuĩwa.
Lalimue ẽsa li ka ima epunga lia yela;+
Cina ci tunda ka ci imi osema.
Nda ci ima, ovingendeleyi vi ka ci lia.+
8 Isareli o ka nyõliwa.+
Cilo ovo va ka kala pokati kolofeka,+
Ndocikuata cimue ka ci kuete esilivilo.
9 Momo ovo va enda ko Asuria+ ndocimbulu co vusenge ci kasi ulika.
Efarimi wa feta ovipuepue viakãi oco va linge vakuacisola caye.+
10 Ndaño ovo va feta akãi vaco vana va tunda pokati kolofeka,
Cilo ndi vongolola pamosi;
Ovo va ka fetika oku tala ohali+ omo liocilemo ca kapiwa la soma kuenda olombuale.
11 Momo Efarimi wa vokiya ovotala kuenje poku ci linga co kokela oku linga ekandu.+
Ovo va enda oku lingila ekandu kovotala aco.+
12 Ndo sonehela ovina vialua viocihandeleko* cange,
Pole, ovio via tendiwa ndocina cimue ka ca kũlĩhĩwile.+
13 Ovo va ndi lumbila ovilumba kuenda va lia ositu yaco,
Pole, Yehova ka va sanjukila.+
Cilo eye o ka ivaluka okulueya kuavo kuenje o va yambula omo liakandu avo.+
14 Isareli wa ivalako Ululiki waye+ kuenda wa tunga olonembele,+
Yuda wa vokiya alupale a kuete oviteyuilo.+
Pole, ame ndi ka tuma ondalu valupale aye,
Kuenje yi ka nyõla olosapalalo violupale lolupale.”+
9 “A Isareli, ku ka sanjuke,+
Ku ka yolele ndomanu.
Momo wa yanduluka Suku yove omo liupuepue.*+
Wa sola ofeto yupuepue povimbandi viosi violomema.+
2 Pole, ocimbandi locikoselo covinyu ka vi ka va tekula,
Kuenje ovo va ka kambela ovinyu yokaliye.+
3 Ovo ka va ka amamako oku kala vofeka ya Yehova;+
Pole, Efarimi o ka tiukila Kegito,
Kuenda va ka lia eci ca vĩha ko Asuria.+
Ovo va kasi ndombolo yesumuo;
Vosi vana va yi lia va livĩhisa ovo muẽle.
Momo ombolo yavo yi linga yavo muẽle;
Oyo ka yi ka iñila vonjo ya Yehova.
5 Nye vu ka linga keteke lioku liongolola,*
Pamue keteke liocipito ca Yehova?
6 Tali! Ovo va ka tila omo liekundu.+
O Egito yi ka va kongela pamosi+ kuenda o Mefisi yi ka va kenda.+
Onjunde yi ka sitika ovina viavo viopalata vi kuete esilivilo,
Kuenda ovikũla violosongo vi ka kulila volombalaka viavo.
Uprofeto wavo o ka kala eveke kuenda ulume o litukula okuti, o vangula ovina vi tunda ku Suku, o ka linga eyui;
Omo okuti oku lueya kuene kualua, one vu suvukiwa calua.”
8 Ondavululi+ ya Efarimi ya kala la Suku yange.+
Pole, cilo olonjila viosi viovaprofeto vaye+ vi kasi ndolonjanjo viukuakupetuila olonjila;
Vonjo ya Suku yaye muli esuvu.
9 Ovo va limba calua kovina vi nena enyõleho, ndeci koloneke via Givea.+
Eye o ka ivaluka akulueya avo kuenda o ka va yambula omo liakandu avo.+
10 “Nda sanga Isareli, ndayuva vekalasoko.+
Nda mola vakukululu yove ndakuyu atete wuti wukuyu.
Kuenda ovo va vĩha ndocikuata cocisola cavo.
11 Ulamba wa Efarimi u palãla kupãla ndonjila;
Ovo ka va mina ale oku cita.+
12 Ndaño va cita omãla,
Ame ndi vopa omãla vaco toke eci ka pa supi laumue;+
Ngongo yavo eci ndi va yanduluka!+
13 Efarimi una wa kũliwa vusenge umue uwa, wa kala nda Turo kokuange;+
Kaliye Efarimi o sukila oku eca omãla vaye koku pondiwa.”
14 A Yehova, eca kokuavo eci o sukila oku va ĩha;
Ecelela okuti va pulumũla omãla vavo kuenda asenjele vavele avo a kukute.
15 “Evĩho liavo liosi lia kala ko Giligali,+ momo oko nda va suvukila.
Ndi ka va tundisa konjo yange, omo liovilinga viavo vĩvi.+
Si ka va sola vali;+
Olombuale viavo viosi via sina.
16 Efarimi o ka kunduiwa.+
Olumbombo luavo lu ka kukuta kuenda ka va ka ima vali epako.
Ndaño ovo va cita, ndi ka ponda ocitumbulukila cavo ca soliwa.”
17 Suku yange o ka va likala,
Momo ovo ka va yevelile kokuaye,+
Kuenda va ka linga vakuakutila pokati kolofeka.+
10 “Isareli, uti wuyuva umue wa nyõleha* okuti u kasi oku ima epako liayo.+
Osimbu epako liaye li livokiya, eye o vokiya vali ovotala aye;+
Osimbu ovapia aye a ima ciwa, olongunji viaye vi kola vi fina vali calua.+
Kuli umue o ka nyõla ovotala avo loku kundula olongunji viavo.
3 Cilo va ka popia vati: ‘Ka tu kuete osoma,+ momo Yehova ka tuo kuatelele usumba.
Nye osoma yimue yi pondola oku tu lingila?’
4 Ovo va vangula olondaka ka vi kuete esilivilo, va linga olohuminyo viesanda+ kuenda va linga ovisila;
Omo liaco, eyambulo li laika oku iya, li kasi ndocikũla ci kuete owule ci kulila vepia lia sendiwa.+
5 Olonungi vio Samaria vi ka kuata usumba omo liociteka conãle co ko Beta-Vene.+
Omanu va ka ci lilila,
Kumue lovitunda viosuku yesanda vina via enda oku ci sanjukila lulamba waco,
Momo oco ci tunda pokati kavo, cenda kumandekua.
6 Oco ci tualiwa ko Asuria ndombanjaile yeciwa kosoma yimue yinene.+
Efarimi o ka kutisiwa osõi
Kuenda Isareli o ka kutisiwa osõi omo lielungulo a kuama.+
7 Samaria kuenda soma yaye va ka nyõliwa muẽle,+
Ndocanja cimue ca teyiwa kilu liovava.
8 Ovitumãlo via lepa vio ko Beta-Vene+ vina vi kokela Isareli oku linga ekandu,+ vi ka nyõliwa.+
Olosongo locambanda vi ka kulila vovotala avo.+
Omanu va ka sapuila olomunda vati: ‘Tu sitiki!’
Va ka sapuila oviwulu vati: ‘Tu kupukili!’+
9 A Isareli, ove wa siata oku linga ekandu tunde koloneke via Givea.+
Ovo ka va pongolokele.
Uyaki ka wa pitĩlile* komãla havakuesungako ko Givea.
10 Eci ndi yongola, ndi ka va yambula.
Kuenje omanu va ka likongela koku va katukila,
Va ka kutiwa vakulueya avo avali.*
11 Efarimi wa kala onema ya pindisiwa okuti ya solaile oku sasa.
Omo liaco, sia kapele okanga kosingo yaye.
Kaliye ndi ecelela okuti, umue o songuila Efarimi oco a sende osi.+
Yuda o ka senda; Yakoba o ka tapika.
12 Wayi esunga kuenda unguli ocisola ka ci pongoloka.
Sendi osi yi tava oku kũla+
Osimbu kuli otembo yoku sanda Yehova,+
Toke eci eye eya kuenje oku pindisi vesunga.+
13 Pole, ene wa wayi evĩho,
Wonguli ekambo liesunga,+
Kuenje wa li epako liuhembi;
Momo wa koleli konjila yene muẽle,
Kowiñi wasualali vene.
14 Onjuela yimue yi ka katukila omanu vove
Kuenda alupale ove ana a kuete oviteyuilo a ka kunduiwa,+
Ndeci Salamane a kundula onjo ya Betevele,
Keteke liuyaki, eci olonjali akãi via nyanyuiwa kumue lomãla vavo.
15 A Betele, eci oco ci ka lingiwa kokuove omo lievĩho liove lialua.+
Eci kuca, soma yo Isareli o ka kunduiwa muẽle.”+
3 Pole, ame nda longisa Efarimi oku enda,+ loku vambayata peka;+
Kuenda ka va limbukile okuti, ame nda va sakula.
4 Nda va kokela kokuange lohenda kuenda locisola;*+
Ame kokuavo nda kala ndomunu o leluisa okanga kolosingo viavo,*
Kuenda nda nena lohenda okulia komunu lomunu pokati kavo.
5 Ovo ka va ka tiukila kofeka Yegito, pole, o Asuria yi ka kala osoma yavo,+
Momo va likala oku tiuka kokuange.+
6 Osipata yimue yi ka ñuala ñuala oku katukila alupale aye,+
Kuenje yi ka kundula ovikundiko viaye loku va ina omo liesokiyo liavo lĩvi.+
7 Omanu vange va tiamisila utima koku lekisa ekambo liekolelo kokuange.+
Ndaño va kovongiwa kilu* lomue o lamana.
8 Ndi tẽla ndati oku ku siapo A Efarimi?+
Ndi tẽla ndati oku ku eca A Isareli?
Ndi tẽla ndati oku ku tata nda Adima?
Ndi tẽla ndati oku ku lingisa nda Sevomi?+
9 Si ka lekisa onyeño yange yalua.
Si ka kundula yimue vali onjanja Efarimi,+
Momo ame ndi Suku kuenda simunuko,
Ndi Kola pokati kene;
Kuenda si keya kokuene lonyeño yalua.
10 Ovo va ka kuama Yehova kuenda eye o ka koma ndohosi;+
Eci eye a ka koma, omãla vaye va keya loku luluma oku tundilila kutakelo.+
11 Eci va tunda Kegito va ka luluma ndonjila
Va ka luluma ndopomba eci va tunda kofeka yo Asuria;+
Kuenje ndi ka va kapa volonjo viavo,” oco Yehova a popia.+
12 “Efarimi wa ndi ñuala lovohembi,
Kuenda onjo ya Isareli ya ndi ñuala lelimbi.+
Pole, Yuda handi o kasi oku enda la Suku,
Kuenda eye ukuekolelo ku Una o Kola Koku Kola.”+
12 “Efarimi o kasi oku litekula lofela.
Eye o landula ofela yo kutundilo eteke liosi.
Eye o vokiya ovohembi kuenda ungangala.
Ovo va linga ocisila cimue lo Asuria+ kuenda vambata ulela Kegito.+
2 Yehova o kuete ondaka lo Yuda;+
Eye o ka yambula Yakoba ndomo ci likuata lolonjila viaye,
Eye o ko fetuluinya ndomo ci likuata lovilinga viaye.+
4 Eye wamamako oku liyaka lungelo kuenje wa yula.
Wa lila loku livondela ohenda yaye.”+
Suku wo sanga ko Betele kuenda oko Eye a sapela letu,+
5 Yehova Suku ukualohoka,+
Omanu va sukila oku ivaluka okuti, onduko yaye Yehova.+
6 “Omo liaco, tiuka ku Suku yove,+
Amamako oku lekisa ocisola ka ci pongoloka kuenda esunga,+
Kuenda olonjanja viosi, imba ovaso ku Suku yove.
7 Pole, peka liukualomĩlu pali olombalãsa vielimbi;
Eye o sole oku kemba.+
Kuenda kovopange ange osi ovo ka va ka sangamo ocina cimue cĩvi ale cekandu.’
9 Pole, ame ndi Yehova Suku yove tunde vofeka Yegito.+
Ndi lingisa okuti, o kala vali volombalaka,
Ndokoloneke eci kuli ocipito votembo ya sokiyiwa.
10 Nda sapela lovaprofeto,+
Nda vokiya ovinjonde viavo,
Kuenda nda vangula alusapo pocakati covaprofeto.
11 Vo Gileada muli elimbi*+ kuenda uhembi.
Ovo va lumba olongombe vo Giligali,+
Kuenda ovotala avo a kasi ndolondunda viovawe vepia lia sendiwa.+
12 Yakoba wa tilila vocikanjo* co Arama;*+
Isareli+ oko a vumbila ukãi umue,+
Kuenje omo liukãi umue eye wa lava olomeme.+
13 Pocakati cuprofeto umue, Yehova wopa Isareli Kegito,+
Kuenda pocakati cuprofeto umue Eye wo lava.+
14 Efarimi wa tomba calua Suku;+
Eko liaye liosonde liamamako laye;
Ñala yaye o ko fetuluinya omo lielaviso liaye.”+
13 “Eci Efarimi a enda oku vangula, omanu va endaile oku luluma;
Eye wa kala omunu umue wa velapo ko Isareli.+
Pole, wa kuata eko omo lioku fendela Baale+ kuenje wa fa.
2 Kaliye va kasi oku vokiyako kekandu liavo
Kuenda va linga oviñumañuma viutale lopalata yavo;+
Va panga oviteka luloño okuti, upange wosi wolomesele.
Ovo va popia vati: ‘Alume va eca ovilumba, va sipule oviñumañuma vionãle.’+
3 Omo liaco, ovo va ka kala ndalende o komẽle,
Ndowume u takata lonjanga.
Ndovinene vi tunda pocimbandi okuti vi ambatiwa lehunguhungu
Kuenda ndowisi u tundila kepangu li kasi kolusoka.
4 Pole, ame ndi Yehova Suku yove tunde vofeka Yegito;+
Ove layimue o Suku wa kũlĩhĩle te lika ame,
Ka kuli upopeli ukuavo, te lika ame.+
5 Ame nda ku kũlĩhĩla vekalasoko,+ vofeka yekango.
6 Ovo va sanjukile lovisenge viavo,+
Va sanjukile kuenda va linga vakuepela.
Kuenje va njivala.+
7 Kokuavo ndi ka kala ndohosi yumalẽhe,+
Ndongue yi lavekela konele yonjila.
8 Ndi keya kokuavo ndo ursu ya nyelisa omãla vaye,
Ndi ka tola onete* yavo.
Oko ndi ka va takĩlila ndohosi;
Ocinyama cimue covusenge ci ka va nyanyõla.
9 A Isareli eci ci ka ku nyõla
Momo ove wa ñatukila, wa katukila oñuatisi yove.
10 Osoma yove yi kasi pi, oco yu ku popele kalupale ove osi,+
Kuenda olombiali* viove vi kasi pi, vina ove wa ndi sapuila hati
‘Nyĩhe osoma kuenda olombuale’?+
12 Oku lueya kua Efarimi kua sitikiwa;
Ekandu liaye lia selekiwa.
13 Olongembia vioku cita vi keya kokuaye.
Pole, eye omõla umue ka kuete olondunge;
Eci yi pitĩlapo otembo yoku citiwa eye ka li lekisa.
A Kufa, una o koka evalo lialua, unene wove u kasi pi?+
A Njembo, unene wove woku nyõla u kasi pi?+
Ame si ka lekisa ohenda.
15 Ndaño okuti eye o tẽleha pokati kolondeya,
Ofela yimue yo kutundilo yi keya okuti, ofela ya Yehova,
Oyo yi tunda kekalasoko oco yi kukutise ocisimo caye kuenda ono yaye.
Oyo yi ka punda ohondo yoku seleka ukuasi wovina viaye viosi vi kuete esilivilo.+
16 Samaria o ka kuata eko,+ momo wa sinĩla Suku yaye.+
14 “A Isareli, tiuka ku Yehova Suku yove,+
Momo ove wa lilondoka omo lioku lueya kuove.
2 Tiuki ku Yehova lolondaka evi
U sapuili hati: ‘Ecela oku lueya kuetu+ kuenda tava kueci ciwa
Kuenje tu ka eca esivayo lietu kokuove,+ ndeci omunu umue a lumba olonãle.*
3 O Asuria ka yi ka tu popela,+
Ka tu ka endela kolokavalu,+
Kuenda ka tu ka popia vali kovopange ovaka etu hati: “A Suku yetu!”
Momo ove o kasi oku lekisa ohenda komõla ka kuete isia.’*+
4 Ame ndi va sakula kuenda ka va ka kala vali lekambo liekokelo.+
5 Ame ndi ka kala ndowume ku Isareli;
Eye o ka telẽha ndonelẽho ya fina
Kuenda o ka sandula alumbombo aye ndoviti vio Levanone.
6 Ovianja viaye vi ka lisandula
Eposo liaye li ka kala ndeli liuti woliveira
Kuenda elemba liaye liwa ndeli liuti wo Levanone.
7 Ovo va ka kala vali vulembo waye.
Va ka kũla olomema kuenda va ka tẽleha nduti wuyuva.+
Oluhimo* luaye lu ka kala ndowu wovinyu yo ko Levanone.
8 Efarimi o ka pula hati: ‘Nye vali ndi sukila oku linga loviteka?’+
Ame ndi ka tambulula loku u lava.+
Ndi ka kala nduti wongaye wa pulika.
Epako liene li ka sangiwa kokuange.”
9 Helie ukualondunge? A kuate elomboloko liovina evi.
Helie wa lunguka? A vi kũlĩhe.
Momo olonjila via Yehova viesunga,+
Kuenda vakuesunga va ka endelamo;
Pole, vakuakandu va ka kupukilamo.
Onduko ya tepuluiwa konduko Hosiaya, yi lomboloka “Wa Popeliwa la Yehova; Yehova wa Popela.”
Ale “evĩho liukahonga; uvasi.”
Ale “evĩho liukahonga; uvasi.”
Ale “evĩho liukahonga; uvasi.”
Ci lomboloka “Suku o ka Kũla Ombuto.”
Ale “Ketapi Lia Vomba.”
Ci lomboloka “Ka Lekisiwile Ohenda.”
Ci Lomboloka “Hamanu Vangeko.”
Lit., “omãla.”
Tala Hos 1:9 eto.
Tala Hos 1:6 eto.
Ale “evĩho liukahonga; uvasi.”
Ale “evĩho liukahonga; uvasi.”
Ale “evĩho liukahonga; uvasi.”
Lit., “ovinyua viange.”
Ale “Etapi Lia Vomba.”
Ale “Baale yange.”
Ale “oku va ecelela oku kala lomuenyo.”
Ci lomboloka “Suku o ka Kũla Ombuto.”
Lit., “ndi kũla ukãi ndombuto kilu lieve.”
Tala Hos 1:6 eto.
Tala Hos 1:9 eto.
O homeri yimosi yi soka 220 kalitulu. Tala Alombo. B14.
Ale “evĩho liukahonga; uvasi.”
Ale “ame si lipekela love.”
Lit., “oloneke vialua.”
Ale “olosuku vio vonjo; va terafi.”
Ale “onumbi.”
Ale pamue, “Ulamba wange muẽle va u pongolola esepu.”
Ale “oku limba vupuepue.”
Ale “Evĩho liukahonga; Uvasi.”
Lit., “Vi upa utima.”
Ale “ombueti yukuakutãha.”
Ale “evĩho liukahonga; uvasi.”
Ale “Evĩho liukahonga.”
Ale “Evĩho liukahonga.”
Ale “evĩho liukahonga; uvasi.”
Lit., “usenge unene?”
Ale “oserveja yotiliku.”
Ale “oku limba vupuepue.”
Lit., “oviteyuilo.”
Ale “yu tundisa.”
Ale “vakuesino.”
Ale “ndi va pindisa.”
Ale “oku limba vupuepue.”
Ale “kevĩho liukahonga; kuvasi.”
Lit., “kocipala caye.”
Ale “ovapia avo.”
Ale “eyove liohosi.”
Lit., “ocipala cange.”
Ale “ombela yatete.”
Lit., “oku teta.”
Ale “ohenda.”
Ale pamue, “Ovitima viavo vi kasi ndofolono eci ovo va amela ocipepi loku lihoya kuavo.”
Lit., “olonganji.”
Lit., “ka kuete utima.”
Okuti, hakonjilako ya sunguluka yoku fendela.
Ale “onumbi.”
Ale pamue, “Ovo va ka tiukila.”
Ale “evĩho liukahonga; uvasi.”
Ale “ocipito cene ca tukuiwa.”
Ale “osuku yi kutisa osõi.”
Ale pamue, “wa pulika.”
Ale “Utima wavo wa linga wombambe.”
Ale “ka wa kunduile pe.”
Okuti, va ka pandikisa leyambulo liavo ndokanga yimue.
Okuti, ovaprofeto kuenda omanu vakuavo vana va tumiwa oco va longise Isareli.
Lit., “Ndamamako oku va kokela kokuange lovikolo viomanu, lovikolo viocisola.”
Lit., “nda vana va votola okanga kolombanjo viavo.”
Okuti, “konjila yimue ya velapo yoku fendela.”
Lit., “ya tokota.”
Ale “umbanda.”
Lit., “epia.”
Ale “o Suria.”
Lit., “ceci ci sitika utima.”
Lit., “olonganji.”
Okuti, ocitumãlo mu kendiwa omanu va fa.
Lit., “tu ka lumba olonãle viovimẽla vietu.”
Ale “kosiwe.”
Ale “lonjongole yange.”
Lit., “onjivaluko.”