YOELI
1 Ondaka ya Yehova yeya ku Yoeli omõla a Petueli yiti:
2 “Ene akulu yeveleli;
Lene alonungi viosi viofeka, yeveleli lutate.
Anga hẽ koloneke viene kua pita ocina cimue ndeci;
Ale ca pita koloneke via vakukululu yene?+
3 Ci lomboluili omãla vene;
Lomãla vene va ci lomboluile komãla vavo;
Kuenje omãla vavo va ci lomboluile kocitumbulukila cikuavo.
4 Eci ca supa koku liwa lengu, epange lia ci lia;+
Eci ca supa koku liwa lepange, oluhuma lua ci lia;
Kuenje eci ca supa koku liwa loluhuma, epolovi lia ci lia.+
5 Ene aloholua,+ pasuki kuenda lili!
Ene vosi vu nyua nyua ovinyu, lisiõsiõli;
Momo ovinyu yi sõsa yopiwa kovimẽla viene.+
6 Momo vakuafeka yimue va iñila vofeka yange, etendelo kuenda unene wavo ka vi tendiwa.+
Ovayo avo, a soka lovayo ohosi+ kuenda olombanjo viavo viohosi.
7 Va nyõla uyuva wange kuenda uti wange wukuyu va u lingisa ocisingi;
Va u teta loku u kupuila posi;
Kuenda kovianja viokaliye ka va sileko cimue.
8 Lisiõsiõli ndufeko wosombo wa wala ocikelẽyi;
Omo a fisa ukuenje waye.
9 Ocilumba colomema+ locilumba coku nyua,+ via imũhila vonjo ya Yehova;
Ovitunda vi vumba vumba Yehova via sumua.
10 Ovapia a nyõliwa kuenda osi ya sumua;+
Momo olomema via nyõleha, ovinyu yokaliye ya takata, ulela wa pua.+
11 Olongunja via nyumãla, vakuakulima ayuva va litetela;
Mekonda liotiliku kuenda osevata;
Momo oku lombola kuovapia kua nyõleha.
12 Ayuva a kukuta;
Uti wukuyu wovuka.
Uti wo romã, luti weva kuenda uti womasã;
Oviti viosi viovusenge via kukuta;+
Momo pokati komanu ka pali esanju.
13 Avitunda, wali ovikelẽyi kuenda lili;
Leñi leñi, ene vu vumba vumba kutala.+
A vakuakuvumba Suku, iñili vonembele kuenda wali ovikelẽyi uteke wosi;
Momo ocilumba colomema+ leci coku nyua,+ via imũha vonjo ya Suku;
14 Sapuli eteke lioku likandangiya okulia, lingi ohongele yilikasi.+
Ongoluili akulu kuenda olonungi viosi viofeka;
Vonjo ya Yehova Suku yene+ kuenda pingi ku Yehova oco a ku kuatisi.
15 Eteke liaco we!
Momo eteke lia Yehova li kasi ocipepi,+
Kuenda liya ndenyõleho li tunda Kukuonene Wosi!
16 Okulia ka kuopiwile hẽ kokuetu;
Kuenda esanju lonjolela yonjo ya Suku yetu?
17 Ombuto ya volela vovipanga.
Olonjo vioku seleka okulia, vi kasi upolokoso.
Olosila via nyõliwa, omo olomema via nyõleha.
18 Oku leña leña kuovinyama kualua!
Olongombe vi ñuala ñuala ulika, omo ka vi kuete owangu!
Kuenda olomeme vi talisiwa ohali.
19 A Yehova kokuove oko minga ekuatiso,+
Momo ondalu ya timĩha owangu wekalasoko;
Kuenda ovolienge a yoka oviti viosi viovusenge.
20 Ndaño ovinyama viovusenge vi vilikiya kokuove;
Momo olondui via kukuta;
Kuenda ondalu ya nyõla owangu wekalasoko.”
2 “Siki olumbeta vo Siono!+
Ku yevala oku liyula kuyaki komunda yange yi kola.
Olonungi viosi viofeka vi lulume;
Momo eteke lia Yehova li kasi oku iya!+ Li kasi muẽle ocipepi!
2 Eteke liaco, eteke liowelema,+
Eteke lialende kuenda liowelema walua,+
Eteke liaco, li sokisiwa locinyi ci kasi oku taimila kolomunda.
Ku kala omanu valua haivo va kuete unene;+
Lalimue eteke kua kalele omanu va sokisiwa lavo;
Kuenda ka ku ka kala omanu vakuavo
Vokuenda kuanyamo kovitumbulukila viosi.
3 Kovaso yavo ondalu yi timĩha;
Konyima yavo ulienge u kakula.+
Osi yi kasi kovaso yavo yi sokisiwa locumbo Cedene,+
Pole, konyima yaco yi kasi ndekalasoko;
Lacimue ci puluka.
4 Va setahãla olokavalu;
Kuenda va lupuka ndolokavalu viovita.+
5 Ocileñi caco ci kasi ndonjuela yakãlu wuyaki a londa komunda,+
Oku totãla kuaco ku kasi ndondalu yi timĩha ovinene.
Ci kasi ndomanu va pama va lipongiyila oku enda kuyaki.+
6 Mekonda liavo, omanu vosi va va lulumila.
Ovipala viosi vi ka nyumãla omo liusumba.
7 Va yoloka ndasualali;
Va londa ovimbaka ndasualali;
Omunu lomunu endela vonjila yaye;
Lomue o yapuka vonjila a kasi oku endela.
8 Ka va litusula omunu lukuavo;
Omunu lomunu amamako vonjila yaye;
Nda vamue va kupuka omo liovita,*
Vakuavo ka va talama.
9 Va iñila volupale lolupesi kuenda va endela kovimbaka.
Va iñila volonjo, va iñilila polonjanela ndovimunu.
10 Kovaso yavo osi yi luluma kuenda ovailu a lisenga.
Ekumbi losãi vi tekãva,+
Kuenda olombungululu vi liweka oku eca ocinyi.
11 Yehova o ka vilikiya lolukandi olohoka viaye,+ momo olohoka viaye vialua enene.+
Una o pokola kondaka Yaye wa pama calua;
Momo eteke lia Yehova linene kuenda li linga usumba.+
Helie o pondola oku pandikisa lalio?”+
12 “Pole, ndaño cilo,” oco Yehova a popia, “tiuki kokuange lutima wene wosi,+
Likandagiyi oku lia,+ loku lila kuenda oku litetela.
13 Toli ovitima viene,+ pole, ko ka toli uwalo wene,+
Kuenda tiukili ku Yehova, Suku yene;
Momo eye ukuacikembe haeye ukuahenda, o livala konyeño+ kuenda ukuacisola calua haico ka ci pongoloka,+
Eye o liwekapo oku nena eyambulo.
14 Helie wa kũlĩha nda eye o ka litiukamo loku livela,+
Kuenda oku sia esumũlũho limue;
Loku eca ocilumba cimue colomema leci coku nyua ku Yehova Suku yove?
15 Siki olumbeta vo Siono!
Tukuli* eteke lioku likandangiya oku lia; kuenda lingi ohongele yilikasi.+
16 Ongololi omanu; kolisi ekongelo.+
Ongololi alume va kuka,* lomãla kuenda oloñanã.+
Sandombua a tunde vohondo yaye kuenda ndombua a tundevo vohondo yaye.
17 Pokati kocindumba lutala+
Ovitunda kumue la vana va vumba Yehova, va lile loku popia vati:
‘A Yehova, kuatela ohenda omanu vove;
Ku ka ecelele okuti, ocipiñalo cove ci kala ocikuata coku sepuiwa;
Loku ecelela okuti olofeka vi ci viala.
Momo lie omanu va popela vati, “Suku yavo o kasi pi”?+
18 Yehova o ka sanjukila ofeka yaye
Kuenda o kuatela ohenda omanu vaye.+
19 Yehova o ka tambulula omanu vaye hati:
‘Ndu wĩhi olomema, lovinyu kuenda ulela;
Kuenje vu sanjuka laco;+
Si ka tava vali okuti, vu pembuiwa pokati kolofeka.+
20 Ava va tunda konano ndi ka va tumisa ocipãla lene;
Ndi ka va lupuisila kofeka yekango kuenda vekalasoko;
Va imba ovaso* vokalunga ko kutundilo,*
Loku imba onyima kokalunga ko kutakelo.*
Elemba liaye lĩvi li ka yevala;
Elemba liaye lĩvi li ka amamako oku yevala;+
Momo Eye o ka linga ovina vinene.’
21 Afeka, ku ka kuate usumba.
Sanjuka kuenda yolela, momo Yehova o ka linga ovina vinene.
22 Avinyama viovusenge, ko ka kuati usumba;
Momo vekalasoko mu ka yova owangu,+
Kuenda oviti vi ka ima apako avio;+
Uti wukuyu luyuva vi ka eca apako alua.+
23 Amãla va Siono, sanjuki kuenda yoleli Yehova Suku yene;+
Momo eye wo wĩhi ombela ya sulako* vonjo ya suapo;
Kuenda o ka ku tumisi ombela yalua;
Ombela yomandavela* leyi ya sulako,* ndeci ca kala kosimbu.+
24 Ovimbandi vi yuka olomema vialua;
Oviyongelo vi yuka ovinyu yalua kuenda ulela.+
25 Ndi ka ku feta anyamo osi
Omo lieci ca liwa lengu, eci ca liwa lepange, leci ca liwa loluhuma kuenda eci ca liwa lepolovi,*
Okuti, olohoka viange via pama nda tuma kokuove.+
26 Kuenje vu ka lia toke vu kuta,+
Kuenda vu ka sivaya onduko ya Yehova Suku yene,+
Una wo lingili ovikomo;
Omanu vange ka va ka kutisiwa vali osõi.+
27 Kuenje vu ka limbuka okuti, ame ñasi pokati ka va Isareli,+
Kuenda ame ndi Yehova Suku yene,+ ka kuli ukuavo!
Omanu vange lalimue eteke va ka kutisiwa vali osõi.
28 Noke ndi ka sukumuila espiritu liange+ komanu vosi;
Kuenje omãla vene valume lomãla vene vakãi va ka imba owanji;
alume vene va kuka va ka lota olonjoi;
Kuenda alume vene amalẽhe va ka mõla ovinjonde.+
29 Ndaño muẽle apika vange alume kuenda apika vange akãi
Ndi ka va sukumuila espiritu liange koloneke viaco.
31 Ekumbi li ka pongoluiwa owelema kuenda osãi yi ka pongoluiwa osonde,+
Osimbu eteke linene hailio li komõhisa lia Yehova ka lieyile.+
32 Kuenje wosi o vilikiya vonduko ya Yehova, o ka popeliwa;+
Momo Vomunda Siono lo ko Yerusalãi ku ka kala vamue va ka puluka,+ ndeci Yehova a popia;
Vana va ka popeliwa okuti, va kovongiwa la Yehova.”
3 “Momo tala! koloneke viaco, lo kotembo yaco;
Eci ndi tiula olomandekua vio Yuda kuenda vio Yerusalãi,+
2 Ndi ka kongelavo pamosi olofeka viosi;
Kuenje omo ndi ka va sombisila,+
Mekonda liomanu vange, haivo ocipiñalo cange Isareli;
Momo va va sanduila pokati kolofeka;
Kuenda va litepela pokati ofeka yange.+
3 Va imbila omanu vange ocela;+
Va landisa kakuenje oco va fete ocipuepue;
Kuenda va landisa kafeko oco va nyue ovinyu.
4 Nye vu yongola kokuange;
A Turo la Sidono kuenda ovaimbo osi o ko Filisiti?
Vu kasi hẽ oku ndi fetuluinyila cimue?
Nda oco vu kasi loku ndinga;
Limbuki okuti, efetuluinyo liaco, ndu li fetuluinyi lonjanga.+
5 Momo wambati opalata lulu,+
Kuenje ovokuasi ange wa a kapi volonembele viene;
6 Wa landisi va Yuda la va Yerusalãi ku va Helasi,+
Loku va sanduila ocipãla lofeka yavo;
7 Cilo ndi vopa kocitumãlo wa va landisili,+
Kuenje elinga liaco liene ndu li fetuluinyi lonjanga.
8 Ndi landisa omãla vene valume lomãla vene vakãi, loku va eca ku va Yuda,+
Kuenje ovo va ka va landisa ku va Sieva, ofeka yi kasi ocipãla;
Momo oco Yehova a popia.
9 Sapuli ovina viaco pokati kolofeka:+
‘Lipongiyili* uyaki! Votoli alume va pama!
Asualali vosi veye, va wile vonjila!+
10 Teli atemo ene oco a linge olosipata kuenda olomĩla viene oco vi linge olonjelia.
U wa hongua a popie hati: “Nda pama.”
11 Ene avakualofeka viosi, yayuliko, enjui kuenda ongolokeli pamosi!”’+
A Yehova, nena alume vove va pama.*
12 Olofeka viye, vi votoke loku lamanela Kocimbota* ca Yehosafata;
Momo oko ndi ka tumãla loku sombisa olofeka viosi via ñualako.+
13 Imbi omĩla, momo ovapia a yelela oku ungula.
Iñili kuenda kosi ocikoselo covinyu, momo ceyuka.+
Ovikuata viosi vi supoka, momo evĩho liavo lialua.
14 Awiñi walua vu kasi vocimbota* coku tetuluila;
Momo eteke lia Yehova li kasi ocipepi vocimbota* coku tetuluila.+
15 Ekumbi losãi vi ka tekãva;
Kuenda olombungululu ka vi ka eca vali ocinyi.
16 Yehova o ka vilikiya ko Siono;
Haeye o ka yevalisila ondaka yaye vo Yerusalãi.
Kuenje Ilu longongo, vi ka lisenga;
Pole, Yehova o ka linga ocitililo comanu vaye,+
Kuenda ombonge yomanu vaye va Isareli.
17 Kuenje vu ka limbuka okuti, ame Yehova, Suku yene, haime nda tunga ko Siono, komunda yange yi kola.+
18 Eteke liaco, volomunda mu ka loka ovinyu yi sõsa,+
Koviwulu ku ka pita asenjele;
Kuenda olondui viosi vio ko Yuda vi ka yuka ovava.
19 Pole, o Egito yi ka linga elunda,+
Kuenda o Edome yi ka linga ekalasoko,+
Mekonda liungangala wa lingiwila komanu vo ko Yuda,+
Vimbo lina va pesila osonde yomanu ka va kuete eko.+
20 Pole, o Yuda yi ka kala otembo yosi;
Haico o Yerusalãi tunde kocitumbulukila cimue toke kocitumbulukila cikuavo.+
21 Ndi ka tenda osonde yavo okuti, ka yi kuete eko, yina nda tendele okuti yi kuete eko;+
Kuenje Yehova o ka tunga vo Siono.”+
Ale “ovisongo.”
Lit., “Kolisi.”
Ale “akulu.”
Lit., “ocipala.”
Okuti, Okalunga ka ka Kuete Akimba.
Okuti, Okalunga ko Mediterraneo.
Ale “ombela yatete.”
Ale “ombela yatete.”
Ale “ombela yohalula.”
Ale “epoloyi.”
Ale “olondimbukiso.”
Ale “Etapi Lia Vomba.”
Ci lomboloka “Yehova Onganji.”
Lit., “Oku kolisa.”
Ale “olohoka viove.”
Ale “Etapi Lia Vomba.”
Ale “etapi lia vomba.”
Ale “etapi lia vomba.”
Ale “vana va tunda kolofeka vikuavo.”
Ale “Ekango.”