AMOSI
1 Olondaka viatiamẽla ku Isareli vina Amosi* una wa kala umue pokati ka vakuakufuka olomeme vio Tekoa,+ a tambuile vocinjonde koloneke via Soma Usiya+ wo ko Yuda kuenda koloneke via Yerevoama+ omõla a Yoasi+ soma yo Isareli, eci pa kambele anyamo avali oco ku pite ocilemawe.+ 2 Eye wa popia hati:
“Yehova o ka komẽla ko Siono,
Kuenda eye o ka kalukila ko Yerusalãi.
Ovisenge vioku lisila oviunda viangombo vi ka lila,
Kuenda omunda yo Karimele yi ka kukuta.”+
3 “Ca popia Yehova ceci hati,
‘“Omo liasino atatu o Damasko kuenda omo liasino akuãla, si ka litiukamo,
Momo ovo va tata lungangala o Gileada lovikuata viutale vioku sasa.+
4 Omo liaco, ndi ka tumisa ondalu konjo ya Hasahele,+
Kuenda oyo yi ka lia olosapalalo vi kuete oviteyuilo via Benehadada.+
5 Ndi ka nyõla ovikundiko vio ko Damasko;+
Kuenda ndi ka nyõla olonungi vio ko Bicate-Avene
Kuenda una o kasi oku viala* ko Betedeni;
Kuenje omanu vo ko Suria va ka enda kumandekua ko Kiri,”+ oco Yehova a popia.’
6 Ca popia Yehova ceci hati,
‘“Omo liasino atatu o Gasa+ kuenda omo liasino akuãla, si ka litiukamo,
Momo ovo vambata ocimunga cosi colomandekua+ oco va cece ku Edome.
7 Omo liaco, ndi ka tumisa ondalu kocimbaka co Gasa,+
Kuenda oyo yi ka lia olosapalalo vi kuete oviteyuilo.
8 Ndi ka nyõla olonungi vio Asidode,+
Kuenda una o kasi oku viala* ko Asikelone;+
Eka liange li ka katukila Ekirone,+
Kuenda va Filisiti vana va supapo, va ka kunduiwa,”+ oco ca popia Ñala Tõlo Yehova.’
9 Ca popia Yehova ceci hati,
‘Omo liasino atatu o Turo+ kuenda omo liasino akuãla, si ka litiukamo,
Momo ovo va eca ocimunga cosi colomandekua ku Edome,
Kuenda momo ka va ivalukile ocisila ca vamanji.+
10 Kuenje ndi ka tumisa ondalu kocimbaka co Turo,
Kuenda oyo yi ka lia olosapalalo vi kuete oviteyuilo.’+
11 Ca popia Yehova ceci hati,
‘Omo liasino atatu a Edome+ kuenda omo liasino akuãla, si ka litiukamo,
Momo eye wa lambalala manjaye losipata,+
Kuenda momo eye wa likala oku lekisa ohenda;
Vonyeño yaye wamamako oku va nyõla okuti ka liwekelepo,
Kuenda eye o kasi oku amamako oku va kuatela onyeño.+
12 Omo liaco, ndi ka tumisa ondalu ko Temani,+
Kuenda oyo yi ka lia olosapalalo vi kuete oviteyuilo vio Bosara.’+
13 Ca popia Yehova ceci hati,
‘“Omo liasino atatu a Amoni+ kuenda omo liasino akuãla, si ka litiukamo,
Momo ovo, va yikula ovaimo akãi vamina vo ko Gileada oco va vokiye ocikanjo cavo.+
14 Omo liaco, ndi ka tumisa ondalu kocimbaka co Raba,+
Kuenda oyo yi ka lia olosapalalo vialio vi kuete oviteyuilo,
Locileñi cuyaki keteke liuyaki,
Lehunguhungu limue keteke liofela yalua.
15 Kuenje soma yavo o ka ambatiwa kumandekua kumue lolombuale viaye,”+ oco Yehova a popia.’
2 “Ca popia Yehova ceci hati,
‘“Omo liasino* atatu a Moavi+ kuenda omo liasino akuãla, si ka litiukamo,
Momo eye wa timĩha akepa a soma yo ko Edome oco a lingiwe ohala.
2 Omo liaco, ndi ka tumisa ondalu ko Moavi,
Kuenda oyo yi ka lia olosapalalo vi kuete oviteyuilo vio ko Keriote,+
Moavi o ka fila vokati konjuela,
Loku liyula kuyaki locileñi combinga yimue.+
3 Ndi ka tundisa ombiali* pokati kaye
Kuenda ndi ka ponda olombuale viaye viosi kumue laye,”+ oco Yehova a popia.’
4 Ca popia Yehova ceci hati;
‘Omo liasino atatu a Yuda+ kuenda omo liasino akuãla, si ka litiukamo;
Momo ovo va likala ocihandeleko* ca Yehova,
Kuenda momo ka va lavele oviholo viaye;+
Pole, va yapuisiwa lovohembi amuamue ana vakukululu yavo va kuama.+
5 Omo liaco, ndi ka tumisa ondalu ko Yuda,
Kuenje oyo yi ka lia olosapalalo vi kuete oviteyuilo vio Yerusalãi.’+
6 Ca popia Yehova ceci hati,
‘Omo liasino atatu a Isareli+ kuenda omo liasino akuãla, si ka litiukamo,
Momo ovo va landisa esunga lopalata,
Kuenda ohukũi lolohaku vivali.+
7 Ovo va siata oku kosela ovitue viambombe voneketela yo kilu lieve,+
Kuenda ovo va yika onjila ya vakuesunga.
Isia kuenda omõlaye ulume va siata oku lipekela lufeko umuamue,+
Va sepula onduko yange yi kola.
8 Ocipepi lovotala osi,+ ovo va tikula ovikutu viavo ndonjeke yeci ca levaliwa;*+
Kuenda ovinyu va nyua konjo* yolosuku viavo, ya tunda ketevo lia kisikiwa komanu.’
9 ‘Pole, ame nda kundula u Amori kovaso avo,+
Una wa lepele calua nduti wosedru kuenda wa pamele calua ndulemba;
Nda nyõla apako aye kilu kuenda olombombo viaye kosi.+
10 Ame ndo vupi kofeka Yegito,+
Kuenda nda vu endisi vekalasoko vokuenda 40 kanyamo,+
Oco vu piñali ofeka yo Amori.
Eci hẽ haciliko, Amanu va Isareli?’ oco Yehova a popia.
12 ‘Pole ene wa ecaeci ovinyu ku va Nasiri oco va nyue,+
Kuenda wa handeleki ovaprofeto hoti: “Ka vu ka imbi owanji.”+
13 Omo liaco, ndi ka vu koseli kovitumãlo viene,
Ndeci okalosa kamue ka ambata ovitungu viotiliku ka kosa ovina viosi vi kasi vemẽhi liaco.
14 Ukuanjanga ka ka kuata ocitumãlo coku tilila,+
U wa pama ka ka kuata ongusu,
Kuenda lalimue esualali li ka puluka lomuenyo.
15 Ukuahonji ka ka puluka,
U o kuete ovolu onjanga ka ka puluka,
Ukuakuendela kolokavalu ka ka puluka lomuenyo.
3 “Yeveleli ondaka Yehova a popia yatiamẽla kokuene, Amanu va Isareli, catiamẽla kepata liosi ndopa kofeka Yegito:
2 ‘Ene lika ame nda kũlĩha pokati kapata osi o kilu lieve.+
Eli olio esunga lieci ndi ka vu kangisili omo liakandu ene osi.+
3 Citava hẽ okuti, omanu vavali va endela kumosi nda ka va liusikile oku lisanga?
4 Anga hẽ ohosi yi pondola oku komẽla vusenge okuti ka mũli ocinyama ci kuatiwa?
Anga hẽ ohosi yumalẽhe* yi komẽla vocitililo calio okuti ka ya kuatele cimue?
5 Citava hẽ okuti onjila yi kupukila vociliva cimue ca kapiwa posi okuti, ka pa kapiwile onjanjo yimue?*
Anga hẽ ociliva ci tehẽla posi nda ka ca kuatele cimue?
6 Nda ombinga yimue yi sikila volupale, omanu hẽ ka va luluma?
Nda volupale mu pita ocilunga cimue, Yehova hayeko hẽ wa ci koka?
7 Ocili okuti, Ñala Tõlo Yehova ka ka linga cimue
Okuti, ka situluila ocipango* caye kafendeli vaye ovaprofeto.+
8 Ohosi ya koma!+ Helie ka ka kuata usumba?
Ñala Tõlo Yehova wa popia! Helie ka ka imba owanji?’+
9 ‘Imbi oluiya volosapalalo vi kuete oviteyuilo vio Asidode
Kuenda kolosapalalo vi kuete oviteyuilo viofeka Yegito.
Popi hati: “Liongoluili kolomunda vio Samaria;+
Tali ombuanja yi kasi pokati kayo
Kuenda ovina vĩvi vi lingiwilamo.+
10 Momo ovo ka va kũlĩhĩle oku linga eci ciwa,” oco Yehova a popia,
“Ovo va vokiya ungangala kuenda ekundu kolosapalalo viavo vi kuete oviteyuilo.”’
11 Omo liaco, Ñala Tõlo Yehova wa popia hati,
‘Unyãli umue o ka ñuala ocingonja ofeka eyi,+
Eye o ka tukũla ongusu peka liove,
Kuenje olosapalalo vialio via pama vi ka pundiwa.’+
12 Ca popia Yehova ceci hati,
‘Ndeci ungombo a tukũla ovolu avali vomẽla wohosi ale onepa yimue yetũi,
Haico va Isareli va ka tukũiwa,
Vana va kasi ko Samaria okuti va tumãla kolohama via kemãla kuenda kolomangu via fina.’*+
13 ‘Yeveleli kuenda lunguli* onjo ya Yakoba,’ oco Ñala Tõlo Yehova a popia, Suku ukualohoka.
14 ‘Momo keteke ame ndi ka kovonga va Isareli oco ndi va sombise omo liasino avo osi,+
Ndi ka sombisavo ovotala o Betele;+
Olombinga viutala vi ka tetiwa kuenda vi ka kupukila posi.+
15 Ndi ka kundula onjo yokuenye kumue lonjo yondombo.’
‘Olonjo viombinga yonjamba vi ka nyõleha,+
4 “Yeveleli olondaka evi, ene alongombe violomange vio Basiane,
Vina vi kasi komunda yo Samaria,+
Ene akãi, wakuakupunda ambombe+ haine wakuakunyõla olohukũi,
Vu sapuila alume* vene hati, ‘Tu neneli cimue coku nyua!’
2 Ñala Tõlo Yehova wa linga ocisila omo lioku kola kuaye hati,
‘“Tali! Ku iya oloneke eci eye a ko votoli losongo ya penga yukuakulandisa ositu
Kuenda ava va supapo pokati kene, lolonjolo.
3 Ene vu ka tundila vapangu ovimbaka, omunu lomunu vepangu li kasi kovaso yaye;
Kuenda vu ka tumisiwa ko Harmoni,” oco Yehova a popia.’
5 Yoki ocilumba cimue colopandu lombolo yi kuete etumbisa;+
Imbi oluiya lolukandi, ovilumba viene vi eciwa lutima wosi!
Momo oco ene vu sanjukila oku linga, Amanu va Isareli,’ oco Ñala Tõlo Yehova a popia.
6 ‘Catiamẽla kokuange, nda koka onjala valupale ene osi
Kuenda nda lingisa okuti, volonjo viene viosi+ ka mu kala okulia;
Pole, ene ka wa tiukili kokuange,’+ oco Yehova a popia.
7 ‘Ame nda tatekavo ombela olosãi vitatu osimbu ka wonguili;+
Nda lokisa ombela kolupale lumue pole, kolupale lukuavo sio.
Vepia mumue mua loka ombela,
Pole, vepia likuavo okuti, ka mua lokele ombela, mua kukuta.
8 Omanu vakualupale avali ale atatu, va ñuala ñuala volupale lumosi oku sandiliya ovava oku nyua,+
Kuenda ka va sangi ovava a tẽla oku imũla enyona liavo;
Pole, ene ka wa tiukili kokuange,’+ oco Yehova a popia.
9 ‘Nda ku kokeli owuya wa piãla kuenda ombutukuma.+
Ene wa luisi oviumbo viene violonelẽho kuenda viayuva,
Pole, olohuma via lia oviti viene viakuyu kuenda oviti violiveira;+
Haimo lumue ka wa tiukili kokuange,’+ oco Yehova a popia.
10 ‘Nda tuma pokati kene efengi limue ndeli lio ko Egito.+
Nda ponda alume vene amalẽhe losipata+ kuenda nda tambula olokavalu viene.+
Elemba lĩvi liovilombo viene nda li lingisa okuti, li londa toke kanyulu ene;+
Pole, ka wa tiukili kokuange,’ oco Yehova a popia.
11 ‘Nda koka ekundu pokati kene
Ndekundu Suku a kokela o Sodoma lo Gomora.+
Kuenda ene wa kali ndocinimbu cevaya copiwa vondalu;
Pole, ka wa tiukili kokuange,’+ oco Yehova a popia.
12 Eci oco ndi ka linga love, A Isareli.
Omo lieci ndi laika oku linga love,
Lipongiyila oku ka li sanga la Suku yove, A Isareli.
13 Omo liaco, tali! Eye, eye Una wa lulika olomunda+ haeye wa lulika ofela;+
Eye o sapuila komunu ovisimĩlo Viaye,
Eye o pongolola ocinyi vowelema,+
Kuenda eye o liatela kovitumãlo via lepa vio kilu lieve;+
Yehova Suku ukualohoka oyo onduko yaye.”
5 “Yeveleli ondaka eyi ndi kasi oku sapula ndelisiõsuĩlo* kokuene, Anjo ya Isareli:
2 ‘Isareli, ufeko wosombo, wa kupuka;
Eye ka tẽla vali oku votoka.
Eye wa yandulukiwa vofeka yaye muẽle;
Ka kuli laumue u votola.’
3 “Ca popia Ñala Tõlo Yehova ceci hati:
‘Olupale lu tuma ohulukãi yasualali kuyaki, lu tiuka locita casualali;
Kuenda luna lu enda locita casualali lu tiuka lekũi, konjo ya Isareli.’+
4 “Yehova wa sapuila onjo ya Isareli hati:
‘Ndi sandiliyi kuenje wamamiko oku kala lomuenyo.+
Ko ka endi ko Giligali+ ale oku enda ko Beresieva,+
Momo o Giligali yi kambatiwa muẽle kumandekua,+
Kuenda o Betele yi ka kunduiwa.*
6 Sandi Yehova kuenje wamamiko oku kala lomuenyo,+
Oco okuti, eye ka lundula onjo ya Yosefe ndondalu,
Loku timĩha o Betele okuti lomue o yima.
8 Una wa panga ocengele colombungululu* vio Kima kuenda ocengele colombungululu,* vio Kesili,+
Una o pongolola ulembo okuti u linga omẽle,
Una o lingisa okuti utanya u linga owelema nduteke,+
Una o kovonga ovava o vokalunga
Oco a a sukumuile kilu lieve+
—Yehova oyo onduko yaye.
9 Eye o ka koka enyõleho oco li nyõle u wa pama,
Eye o nena enyõleho kovitumãlo via koka.
10 Ovo va nyãle olonganji vi sombisila pombundi yolupale,
Kuenda va nyãle vana va vangula ocili.+
11 Omo okuti ene vu kisika ohukũi oku eca kokuene apako* o vepia
Kuenda vu tambuli olomema viavo ndulambu,+
Ene ka vu kamamako oku kala volonjo viovawe a songiwa, vina ene wa tungi+
Ndaño oku nyua kovinyu yi tunda kayuva ene wa kũli.+
12 Momo nda kũlĩha evokiyo liovilinga viene viesino
Kuenda ndomo akandu ene a livokiya
—Ene vu saluisa vakuesunga,
Vu tava ovitukiko;
Kuenda ka vu sombisa lesunga ohukũi pombundi yolupale.+
13 Omo liaco, vana va loñoloha va kamamako oku ũha kotembo yaco,
Momo oyo yi ka kala otembo yimue yohali.+
Kuenje Yehova Suku ukualohoka o kala lene,
Ndeci ene vu popia hati, eye o kasi lene.+
15 Suvuki eci cĩvi kuenda soli eci ciwa,+
Eceleli okuti olonganji vi lekisa esunga pombundi yolupale.+
Pamue Yehova Suku ukualohoka
O kuatela ohenda ocisupe ca Yosefe.’+
16 “Omo liaco, Yehova Suku ukualohoka, Yehova wa popia hati:
‘Povitanda viosi pa ka kala oku lisiõsiõla,
Kuenda volokololo viosi ovo va ka popia vati: “Avoyo we, avoyo we!”
Ovo va ka vilikiya olongunja oco vi lile
Kuenda vana va fetiwa oco va lile.’
17 ‘Voviumbo viosi viayuva mu ka kala oku lisiõsiõla;+
Momo ndi ka pita pokati kene,’ oco Yehova a popia.
18 ‘Ngongo yava va lavoka eteke lia Yehova!+
Eteke lia Yehova li ka lomboloka nye kokuene?+
Olio li ka kala owelema okuti ocinyi sio.+
19 Eteke liaco, li ka kala ndulume o tila ohosi kuenje o ñualẽhela lo ursu,
Kuenda eci a iñila vonjo yaye loku kunamela eka vocimano, onyõha yimue yu lumana.
20 Eteke lia Yehova ka li ka kala hẽ owelema okuti ocinyi sio?
Ka ku ka kala hẽ alende a tekãva okuti ocinyi sio?
22 Ndaño vu ndi lumbila ovilumba vioku pia elisi kuenda ovilumba,
Si ka vi sanjukila,+
Kuenda si ka vanja lohenda kovilumba viene viombembua viovinyama via neta.+
23 Liwekipo oku ndingila onjuela lovisungo viene,
Kuenda si yongola oku yeva ovileñi viovikuata viene viovisikilo via pangiwa lovikolo.+
24 Esunga li tumõhe ndovava,+
Kuenda esunguluko ndolui lumue ka lu takata.
25 Anjo ya Isareli, ene hẽ wa ndi neneli ovilumba vioku eca ndombanjaile
Vekalasoko vokuenda kueci ci soka 40 kanyamo?+
26 Kaliye vu sukila oku ambata Sakuti soma yene kuenda Kayuma,*
Oviñumañuma violumbungululu ya suku yene vina wa li pangeli,
27 Kuenje ndu tumisi kumandekua ocipãla lo Damasko,’+ oco ca popia Suku ukualohoka una okuti, onduko yaye Yehova.”+
6 “Ngongo ya vana va likolela* vo Siono,
Vana va sima okuti va kolapo komunda yo Samaria,+
Asongui vofeka ya velapo,
Ku vana onjo ya Isareli ya kolelele!
2 Kuendi ko Kaline kuenda tali.
Oku upisa oko kuendi ko Hamati Yinene,+
Kuenda lokili ko Gati olupale lua va Filisiti.
Anga hẽ o-o a velapo ovosoma* ava,
Ale ovikanjo viavo via tanda okuti viene vi sule?
4 Ovo va pekela kolohama viombinga yonjamba+ kuenda va tumãla kolomangu via fina,+
Va lia ovitupi violomeme viopiwa vocunda kuenda olongombe via neta;*+
5 Ovo va luvikiya ovisungo viocileñi cohalupa,*+
Kuenda nda Daviti, ovo va luvikiya ovikuata vioku sika;+
6 Va nyuila ovinyu volokopo vinene+
Kuenda va li sieketa ulela wa velapo.
Pole, ovo ka va sakalalele* lekundu lia Yosefe.+
7 Omo liaco, pokati ka vosi ovo tete va ka enda kumandekua,+
Kuenda otembo yoku tumãla kolomangu via fina yi ka sulila.
8 ‘Ñala Tõlo Yehova wa lisila eye muẽle,’+ oco Yehova Suku ukualohoka a popia,
‘“Nda suvuka ocipululu ca Yakoba,+
Ndi nyãle olosapalalo viaye vi kuete oviteyuilo,+
Ndi ka eca olupale kuenda cosi ci kasimo.+
9 “‘“Nda vonjo yimue mua supa ekũi kalume, ovo va ka pondiwavo. 10 Umue ukuepata* o keya kuenje o va tundisila posamua loku va timĩha umosi umosi. Eye o ka tundisa vonjo akepa avo; kuenje o ka pulisa wosi o kasi volohondo vionjo hati: ‘Muli vali umue o kasi love?’ Noke eye o ka tambulula hati: ‘Ka muli laumue!’ Kuenje eye o ka popia hati: ‘Ũhako! Momo hatemboko yoku tukula onduko ya Yehova.’”
11 Momo Yehova wa eca ocihandeleko,+
Kuenda eye o ka nyõla pe onjo yinene,
Kuenje onjo yitito yi linga alunda.+
12 Anga hẽ olokavalu vi yolokela vesenje limue,
Ale umue o limilamo lolongombe?
Momo ene wa pongololi esunga ndocikũla ci kuete owule,
13 Ene vu sanjukila eci ka ci kuete esilivilo,
Kuenda vu popia hoti: “Ka tua pamele* hẽ omo liongusu yetu muẽle?”+
14 Omo liaco, Anjo ya Isareli, ndi nena ofeka yimue kokuene,’+ oco Yehova Suku ukualohoka a popia,
‘Kuenje ovo va ko kangisi oku upisa ko Lebo-Hamati*+ toke Vekango* lio Araba.’”
7 Eci oco Ñala Tõlo Yehova a ndi lekisa hati: Tala! Eye wa nena endo liolohuma eci ovikũla viondombo* via fetika oku kula. Eci ca kala kotembo ovikũla via limiwa okuti, owangu wa soma wa tetiwile ale. 2 Eci olohuma via mala oku lia ovikũla viofeka, nda popia siti: “A Ñala Tõlo Yehova, linga ohenda, ecela!+ Yakoba o pondola oku popeliwa* ndati? Eye wa hongua!”+
3 Kuenje Yehova wa liwekapo* oku ci linga.+ “Eci ka ci ka lingiwa,” oco Yehova a popia.
4 Eci oco Ñala Tõlo Yehova a ndi lekisa hati: Tala! Ñala Tõlo Yehova wa tuma eyambulo limue liondalu. Ondalu ya lia alondo ovava kuenda ya lia onepa yimue yongongo. 5 Kuenje nda popia siti: “A Ñala Tõlo Yehova, linga ohenda ku ka ci linge,+ Yakoba o pondola oku popeliwa* ndati? Eye wa hongua!”+
6 Kuenje Yehova wa liwekapo* oku ci linga.+ “Eci ka ci ka lingiwavo,” Oco Ñala Tõlo Yehova a popia.
7 Eci oco eye a ndi lekisa hati: Tala! Yehova wa talama kocimbaka ca tungiwa lopulumu kuenda opulumu ya kala peka liaye. 8 Noke Yehova wa ndi pula hati: “A Amosi nye o lete?” Nda tambulula hati: “Opulumu yimue.” Kuenje Yehova wa popia hati: “Ndi kapa opulumu yimue pokati komanu vange va Isareli. Si ka va ecela vali.+ 9 Ovitumãlo via lepa via Isake+ vi ka linga alunda kuenda ovitumãlo vi kola via Isareli vi ka nyõliwa;+ kuenda ndi ka katukila onjo ya Yerevoama losipata.”+
10 Amasiya ocitunda co Betele+ wa tuma esapulo ku Yerevoama Soma+ yo Isareli liokuti: “Amosi o kasi oku ku lingila usuanji pokati konjo ya Isareli.+ Omanu vo vofeka ka va ka kapeko olondaka via Amosi.+ 11 Ca popia Amosi ceci hati: ‘Yerevoama o ka pondiwa losipata kuenda Isareli o kopiwa vofeka yaye loku ambatiwa kumandekua.’”+
12 Noke Amasiya wa sapuila Amosi hati: “Okuakusapula ovinjonde, kuende vofeka yo Yuda, omo o ka sandela eteku* kuenda omo o ka imbila owanji.+ 13 Pole, ove ku ka imbile vali owanji vo Betele,+ momo oyo ocitumãlo ci kola ca soma+ kuenda onjo yusoma.”
14 Amosi wa tambulula Amasiya hati: “Ame sia la kaila uprofeto ndaño omõla wuprofeto; ame nda kala ungombo+ kuenda nda enda oku tata oviti viakuyu. 15 Pole, Yehova wa njupa koku tata ocunda kuenda Yehova wa ndi sapuila hati: ‘Kuende ka imbile owanji omanu vange va Isareli.’+ 16 Kaliye yevelela ondaka ya Yehova yokuti: ‘Ove o kasi oku popia hati, “Ku ka imbe owanji ku va Isareli+ kuenda ku ka kundile+ onjo ya Isake.” 17 Omo liaco, ca popia Yehova ceci hati: “Ukãi wove o ka linga ocipuepue volupale kuenda omãla vove valume lomãla vove vakãi, va ka pondiwa losipata. Ovisenge viove vi ka tepiwa loseteko kuenda ove o ka fila vofeka yamãle; kuenje Isareli o kopiwa vofeka yaye loku ambatiwa kumandekua.”’”+
8 Ñala Tõlo Yehova wa ndi lekisa eci: Nda mola ekualu limue liapako ondombo. 2 Noke eye wa pula hati: “A Amosi nye o lete?” Nda tambulula siti: “Ekualu limue liapako ondombo.” Kuenje Yehova wa ndi sapuila hati: “Esulilo liomanu vange va Isareli li kasi ocipepi. Si ka va ecela vali.+ 3 ‘Ovisungo vio vonembele vi ka pongoloka alisiõsuĩlo keteke liaco,’+ oco ca popia Ñala Tõlo Yehova. ‘Kovitumãlo viosi ku ka kala ovivimbi vialua.+ Ũhiko!’
4 Yeveleli eci, ene vu vakuakukangisa ohukũi
Haene vu kundula ambombe vofeka,+
5 Ene vu popia hoti: ‘Ocipito cosãi yokaliye+ ci pua otembo yipi, oco tu landise olomema vietu,
Kuenda Esambata+ oco tu landise olomema vietu?
Oco tu tepulule onjongo yo efa*
Kuenda oku vokiya ocilemo cosiekele,*
Loku pongolola olombalãsa vietu oco tu nyane;+
6 Omo liaco, tu pondola oku landa osuke lopalata
Kuenda ohukũi lolohaku vivali,+
Loku landisa ovinene viotiliku.’
7 Yehova esivayo lia Yakoba, wa lisinga vonduko yaye muẽle hati,+
‘Lalimue eteke ndi ka ivalako ovilinga viene viosi.+
8 Omo liaco, ongongo yi ka luluma,
Kuenda olonungi viosi vi ka lila.+
Ongongo yosi ka yi ka kala hẽ ndovava a tumõha o Nilu,
Loku samõha kuenda oku vomba ndo Nilu yo Kegito?+
9 ‘Keteke liaco’ oco ca popia Ñala Tõlo Yehova,
‘Ndi ka lingisa okuti ekumbi li iñila ekumbi pongunji,
Kuenda ndi ka tekãvisa ongongo vokuenda kutanya.+
10 Ndi ka lingisa okuti, ovipito viavo vi pongoloka oku lila+
Kuenda ovisungo viavo viosi vi pongoloka alisiõsuĩlo.*
Ndi sitika olombunda viosi lovikelẽyi kuenda ndi lingisa okuti, ovitue viosi vi pemũiwa asenya;
Ndi lingisa okuti, ene vu lisiõsiõla ndu okuti wa fisi omõla wongunga,
Kuenje esulilo liaco li kala ndeteke liohali yalua.’
11 ‘Tali! Ku keya oloneke,’ oco ca popia Ñala Tõlo Yehova,
‘Eci ndi ka tuma onjala vofeka eyi,
Honjalako yokulia ale enyona liovava,
Pole, lioku yeva olondaka via Yehova.+
12 Ovo va ka tungayala vokalunga lokalunga
Kuenda oku upisa konano toke kutundilo.
Ovo va ka sandiliya kolonepa viosi ondaka ya Yehova, pole, ka va ka yi sanga.
13 Keteke liaco, afeko vosombo va fina va ka ambuka,
Kumue lalume amalẽhe, omo lienyõna;
14 Vana va lisinga omo lieko lia Samaria+ haivo va popia vati,
“Ndeci suku yove a kasi lomuenyo, A Dani!”+
Kuenda “Ndomo olonjila vio Beresieva+ vi kasi lomuenyo!”
Ovo va ka kupuka kuenda ka va ka votoka vali.’”+
9 Nda mola Yehova+ kilu liutala kuenje eye wa popia hati: “Nyõla osungu yongunji kuenje oviyekelo viaco vi ka luluma. Vi teta kutue kuenda vina via supapo ndi ka vi ponda losipata. Lomue o ka tila kuenda lomue o ka seteka oku puluka okuti o ka litunda ciwa.+
2 Nda ovo va fẽla toke Vonjembo,*
Eka liange omo li ka vopa;
Kuenda nda ovo va londa kovailu,
Oku upisa oko ndi ka va lokisako.
3 Nda ovo va li salama kilu lio Karimele,
Oko ndi ka va sandiliya kuenda oko ndi ka va sanga.+
Nda ovo va li salama kovaso yange kosi yokalunga,
Ndi ka handeleka onyõha oco yi va lumane.
4 Nda ovo vambatiwa kumandekua lovanyãli vavo,
Oku upisa oko ndi ka handeleka osipata kuenje oyo yi ka va ponda;+
Ovaso ange a ka va vandekela oku va linga eci civĩ okuti, eci ciwa hacoko.+
5 Momo Ñala Tõlo, Yehova ukualohoka, eye Una o kuata ongongo,
Oco okuti ongongo yi yenguluka+ kuenda olonungi vialio viosi vi ka lila,+
Kuenje oyo yi ka votoka yosi ndo Nilu,
Kuenda yi vomba ndo Nilu yo Kegito.+
6 ‘Una o tunga osikata yaye kovailu
Haeye wa tumbika ociseveto caye kilu lieve;
Una o kovonga ovava okalunga,
Oco a-a sukumũile kilu lieve+
—Yehova eye onduko yaye.’+
7 ‘Ene hẽ ka vu kasi ndomãla va va Kusi kokuange, Amanu va Isareli?’ oco Yehova a popia.
‘Sia nenele hẽ va Isareli poku vopa Kegito,+
8 ‘Tali! Ovaso a Ñala Tõlo Yehova, a kasi kuviali wekandu,
Kuenda o ka u kundula kilu lieve.+
Pole, si ka nyõla onjo yosi ya Yakoba,’+ oco Yehova a popia.
9 ‘Oco tali! Ngeca ocihandeleko,
Kuenda ndi ka sakumula onjo ya Isareli pokati kolofeka viosi,+
Ndeci ci sakumuiwa usalo,
Kuenda lalumue olumbue lu kupukila posi.
10 Omanu vange vosi vakuakandu, va ka pondiwa losipata,
Vana va popia vati: “Eyambulo ka li keya ocipepi letu ale oku tu sanga.”’
11 ‘Keteke liaco, ndi ka votola ombalaka ya Daviti+ yina ya kupuka,
Ndi ka semũlũla apangu,*
Kuenda ndi ka tumbulula ovingululu vialio;
Ndi ka yi tumbulula ndeci ya kala kosimbu,+
12 Oco okuti ovo va piñala cosi ca supa vo Edome,+
Kuenda kolofeka viosi vina onduko yange ya tukuiwamo,’ oco Yehova a popia, una o kasi oku linga ovina viaco.
13 ‘Tali! Kuiya oloneke,’ oco Yehova a popia,
‘Okuti ukuakulima losaluwa o ka lisanga lukuakungula,
Kuenda ukuakukosa ayuva, o ka lisanga lukuakuwaya ombuto,+
Kuenje volomunda mu ka tunda ovinyu yi sõsa,+
14 Ndi kopa kupika omanu vange va Isareli,+
Kuenda ovo va ka tumbulula alupale a sialele alunda kuenda va ka kalamo;+
Va ka kũla oviti viayuva kuenda oku nyua ovinyu yavo,+
Kuenda va ka kũla oviti loku lia apako aco.’+
15 ‘Ndi ka va kũla vofeka yavo,
Kuenda ovo lalimue eteke va ka tukũiwa
Vofeka nda eca kokuavo,’+ oco Yehova Suku yove a popia.”
Ci lomboloka “Oku kala Ocilemo” ale “Oku Ambata Ocilemo.”
Lit., “una o kuete epangati.”
Lit., “una o kuete epangati.”
Ale “ungangala.”
Lit., “onganji.”
Ale “onumbi.”
Ale “nduvangi.”
Ale “onembele.”
Ale “vana va pama vutima.”
Ale “eyove liohosi.”
Ale pamue, “ka pali onulo?”
Ale “ovisimĩlo viutima waye.”
Ale “olomangu vio Damasko.”
Ale “uvangi woku pisa.”
Ale pamue, “Kuenda vialua.”
Ale “va cime.”
Ale “esino.”
Ale “ndocisungo cesumuo.”
Ale pamue, “yi ka kala ocina cimue ci nyõliwa.”
Tala Elomboluilo.
Pamue olombungululu vio Pleiades vocengele colombungululu vio Touro.
Pamue ocengele colombungululu vio Orion.
Ale “elisimu.”
Olosuku viaco vi tiamisiwila kocengele Saturno okuti, ca enda oku fendeliwa ndosuku yimue.
Ale “oku lipolapo.”
Citava okuti, ci tiamisiwila kovosoma o ko Yuda kuenda o Isareli.
Lit., “omangu.”
Ale “olonãle.”
Ale “ovikuata viovisikilo via pangiwa lovikolo.”
Lit., “ka va velele omo.”
Lit., “Manji ya isiaye.”
Tala Elomboluilo.
Lit., “wambata olombinga vietu muẽle.”
Ale “poku iñilila ko Hamati.”
Tala Elomboluilo.
Okuti, vokuenda kuosãi ya Susu kuenda ya Kayovo.
Lit., “oku votoka?”
Ale “oku litiukamo.”
Lit., “oku votoka?”
Ale “oku litiukamo.”
Lit., “oku lia ombolo.”
Tala Alombo. B14.
Tala Alombo. B14.
Ale “ovisungo viesumuo.”
Okuti, ocitumãlo mu kendiwa omanu va fa.
Ale “apangu alio.”
Lit., “vi ka sengeteta.”