NAHUMI
1 Esapulo limue lioku katukila o Ninivei:+ Elivulu liocinjonde ca Nahumi* u Elikosi:
2 Yehova o Suku yimue yi yongola okuti omanu vo fendela lika eye+ kuenda o fetuluinya,
Yehova o fetuluinya kuenda wa lipongiyila oku lekisa onyeño yaye.+
Yehova o fetuluinya ovanyãli vaye,
Kuenda o selekela onyeño ovanyãli vaye.
3 Yehova o livala konyeño+ kuenda o kuete unene walua,+
Pole, Yehova ka ka liwekapo oku nena eyambulo ku vana va kuete eko.+
Eci Eye a enda, ofela yina yi kundula lehunguhungu vi sika,
Kuenda alende o-o oneketela yolomãhi viaye.+
Ovikũla vio ko Basiane lo ko Karimele vi uwuka,+
Kuenda olonelẽho vio ko Levanone vi uwuka.
5 Olomunda vi luluma mekonda liaye,
Kuenda oviwulu vi takata.+
Ongongo yi ka luluma omo liocipala caye,
Kumue loluali la vosi va tungamo.+
6 Helie o tẽla oku talama kovaso yonyeño yaye?+
Helie o tẽla oku tamalãla kowuya wonyeño yaye?+
Onyeño yaye yi ka pesiwa ndondalu,
Kuenda olohanda vi ka nyanyuiwa mekonda liaye.
7 Yehova uwa,+ haeye ongusu keteke liohali.+
Eye ivaluka* vana va sanda eteyuilo kokuaye.+
8 Letande li nyõla, eye o ka kundula pe ocitumãlo caye,*
Kuenda owelema u ka landula ovanyãli vaye.
9 Nye vu tẽla oku linga oco vu katukili Yehova?
Eye o ka vu kunduli muẽle elisi.
Eye ka ka nena enyõleho onjanja yavali.+
10 Ovo va kasi ndolosongo via litanga,
Kuenda va kasi nda vana va kolua lovina vi koluisa;*
Pole, va ka timĩhiwa ndovinene via kukuta.
11 Kokuove ku ka tunda umue o linga esokiyo lĩvi lioku katukila Yehova,
Haeye eca elungulo ka li kuete esilivilo.
12 Ca popia Yehova ceci hati:
“Ndaño okuti ovo va kuatele ongusu yalua kuenda valuile ketendelo,
Ovo va ka kunduiwa kuenda va ka pondiwa.*
Ame nda ku* talisa ohali, pole, si ka ku talisa vali ohali.
13 Kaliye ndi teya okanga yavo kuenda ndi yupa kokuove,+
Kuenda ndi ka tepa alienge ove volonepa vivali.
14 Yehova wa handeleka eci catiamẽla kokuove* hati:
‘Lacimue ocitumbulukila ci ka ambata vali onduko yove.
Ndi ka kundula oviñumañuma via songiwa kuenda oviñumañuma viutale vi kasi vonjo* yolosuku viove.
Ndi ka ku tungila eyambo limue, momo ove ku kuete esilivilo.’
15 Tala! Kolomunda kuli olomãhi via una o nena olondaka viwa,
Una o sandeka ombembua.+
A Yuda linga ovipito viove,+ feta olohuminyo viove,
Momo omunu una ka kuete esilivilo, lalimue eteke a ka pita vali kokuove.
Eye o ka kunduiwa muẽle elisi.”
2 Omunu una o sandola, wa lamana oco a ku* katukile.+
Teyuila ovimbaka.
Amamako oku lavulula etapalo.
Lingi cosi vu tẽla* oco vu pami kuyaki.
2 Momo Yehova o ka tumbulula ulamba wa Yakoba,
Kumue lulamba wa Isareli,
Momo ovanyãli va va kundula;+
Kuenda va nyõla ovianja viavo.
3 Oviyepelo vialume vaye va pama via pindaliwa levala li kusuka,
Asualali vaye va wala uwalo u kusuka.
Olonepa viutale wakãlu aye wuyaki vi nina ndondalu
Keteke a lipongiyila uyaki,
Kuenda olonjelia viuti wongaye vi tuñunyiwa.
4 Akãlu wuyaki a lupukila lonjanga volokololo.
A yayulako oku lamana loku loka volokololo.
A nina ndovimĩhi via taima kuenda a liakula ndoviliakulo.
5 Eye o ka kovonga vakesongo vaye.
Ovo va ka kupuka osimbu vamamako.
Va ka lupuka toke kocimbaka caye;
Va ka tumbika ociteyuilo.
7 Ca handelekiwa hati: Olupale olu lu kasi ndonasoma yimue ya kutisiwa osõi,
Eye ambatiwa kuenda apika vaye vafeko va lila;
Va kala ndolopomba osimbu va liveta veta volonete.*
8 Vokuenda kuoloneke viaye, Ninivei+ wa kala ndocisimo covava,
Pole, cilo ovo va kasi oku tila.
“Talami! Talami!”
Pole, lomue o kasi oku tiuka konyima.+
9 Pundi opalata, pundi ulu!
Ka muli esulilo volohondo vioku soleka olombongo.
Mueyuka ovina viosi vi kuete esilivilo.
10 Olupale lu kasi upolokoso, lua linga elunda kuenda lua nyõliwa!+
Ovitima viavo vi yenguluka omo liusumba, olongolo viavo vi luluma, oviongo viavo vi luluma;
Ovipala viavo viosi vi kasi lesakalalo.
11 Eleva liolohosi+ li kasi pi, muna olohosi viamalẽhe* vi litekuila,
Muna ohosi yi tunda loku songuila omãla vayo,
Okuti lomue o va lingisa usumba?
12 Ohosi ya nyanyõla ovinyama vi tẽla oco a ece komãla vaye,
Kuenda wa lekelako ekõle olohosi viomange.
Eye wamamako oku yukisa eleva liaye lovinyama a kuata,
Kuenda elungi liaye lovinyama a nyanyõla.
13 “Tala! Ame ndu ku katukila,” oco Yehova ukualohoka a popia,+
“Ndi ka timĩha elisi akãlu aye uyaki,+
Kuenda osipata yi ka lia olohosi viove viamalẽhe.*
Ndi ka imũla ocituwa cove coku punda kilu lieve,
Kuenda ondaka yolomunga viove ka yi ka yeviwa vali.”+
3 Ngongo yolupale lu pesela osonde!
Oluo lueyuka lelimbi kuenda oku nyana.
Oluo ka lu liwekapo oku punda!
2 Nda yeva onjuela yosikote kuenda yalola,
Nda mola olokavalu vi lupuka kuenda nda yeva onjuela yakãlu.
3 Ukuakuendela kolokavalu, osipata yi nina kuenda unga u nina,
Omanu valua va pondiwa kuenda ondunda yovivimbi,
Omanu va fa ka va tendiwa.
Omanu vamamako oku lilondoka kovivimbi viaco.
4 Eci ca li pita omo liovilinga viaye vialua viupuepue;
Eye wa posoka haeye wa fina okuti, o sole umbanda,
Haeye una o yapuisa olofeka lupuepue waye kuenda o yapuisavo apata lumbanda waye.
5 “Tala! Ame ndu ku* katukila,” oco Yehova ukualohoka a popia,+
“Ndi ka votola esaya liove toke kocipala cove;
Ndi ka lingisa okuti olofeka vi mola epõlõla liove,
Kuenda olosoma vi ka mola esepu liove.
6 Ame ndi ka imba eliño kokuove,
Ndi ka lingisa okuti ku kuata esilivilo;
Ndi ka ku lingisa ocitalukilo.+
7 Omunu wosi o ku mola o ka ku tila+ kuenda o popia hati:
‘O Ninivei ya nyõleha!
Helie o ka linalisa laye?’
Pi ndi sanga ava va ka ku lembeleka?
8 Anga hẽ ove wa velapo okuti No-amomi*+ o sule una wa kala ocipepi lolono vio Nilu?+
Ovava o ñualele;
Okalunga oko ka kala ukuasi waye kuenda okalunga ka kala ocimbaka caye.
9 O Etiopia ya kala ono yunene waye ka u pui, kumue Legito.
Puti+ la va Libia va kala oloñuatisi viaye.*+
10 Eye wa sukilile oku enda kumandekua;+
Kuenje wambatiwa kumandekua.
Omãla vaye va nyãnyuiwavo pavindi osi olokololo.*
Ovo va imbila ocela alume vaye va kemãla,
Kuenda alume vaye vosi va kemãla va kutiwa lalienge.
11 Ove o ka lingavo oholua;+
O ka salama.
Ove o ka sandiliya eteyuilo omo liunyãli.
12 Oviteyuilo viove viosi vi kasi ndoviti viakuyu vi kuete apako atete a pia;
Nda a sengiwa, akuyu aco a lolukila vomela wava va lia.
13 Tala! Asualali vove va kasi ndakãi pokati kove.
Olombundi viofeka yove vi ka yikuiwila ovanyãli vove.
Ondalu yi ka lia ovikundiko violombundi viove.
14 Upa ovava kuenda lipongiyila oku ñualiwa ocingonja!+
Pamisa oviteyuilo viove.
Iñila vonata kuenda kosa otuma;
Kuata ofoloma yoku linga atisolu.
15 Pole, lopo ondalu yi ka ku nyõla.
Osipata yi ka ku kundula.+
Oyo yi ka ku lia ndeci olohuma vitito vi linga.+
Olonungi viove vilue ndolohuma vitito!
Ocili, vilue ndolohuma!
16 Ove wa luisa omanu vove vakualomĩlu okuti, olombungululu vio kovailu vi sule.
Olohuma vitito vi pongolola ocipa cavo kuenje vi palãla.
17 Olondavululi viove vi kasi ndolohuma,
Kuenda vakesongo vove va kasi ndendo liolohuma.
Ovio vi salama vapangu ovimano viovawe keteke liombambi,
Pole, eci ekumbi li tunda ovio vi palãla;
Kuenda lomue wa kũlĩha oku vi kasi.
18 A soma ya Asuria, angombo vove va suñila;
Olombuale viove viamamako kolonjo viavo.
Omanu vove va sandokaila kolomunda,
Kuenda ka kuli omunu o vongoluila pamosi.+
19 Ka kuli ekavuluko kefengi liove.
Epute liove ka li kuete esaku.
Vosi vana va yeva esapulo liatiamẽla kokuove va ka pandula;+
Momo helie ka talele ohali omo liungangala wove walua?”+
Ci lomboloka “Ukuakulembeleka.”
Ale “o lava.” Lit., “wa kũlĩha.”
Okuti, o Ninivei.
Ale “oserveja yotiliku.”
Ale pamue, “ceci eye a ka pita pokati kavo.”
Okuti, Yuda.
Okuti, Asuria.
Ale “vonembele.”
Okuti, o Ninivei.
Lit., “Litika vombunda.”
Ale “li ka kunduiwa.”
Lit., “vovitima.”
Ale “ayove olohosi.”
Ale “ayove olohosi.”
Okuti, o Ninivei.
Okuti, o Tebe.
Lit., “viove.”
Lit., “kutue wolokololo viosi.”