HAGAI

1 Kunyamo wavali wuviali wa Soma Dariu, kosãi yepandu, keteke liatete liosãi, Seruvavele+ omõla a Sialitiyele haeye nguluvulu yo Yuda kuenda Yehosua ocitunda cinene omõla a Yehocadaka, va tambula ondaka ya Yehova pocakati cuprofeto Hagai*+ hati:

2 “Ca popia Yehova ukualohoka ceci hati, ‘Omanu ava va popia vati: “Ka ya pitĩlile handi otembo yoku tunga* onjo* ya Yehova.”’”+

3 Kuenje ondaka ya Yehova yeya vali pocakati cuprofeto Hagai+ hati: 4 “Anga hẽ yilo oyo otembo yoku kala volonjo viene via posuisiwa lavaya a fina, osimbu onjo yilo ya linga ovingululu?+ 5 Ca popia Yehova ukualohoka ceci hati: ‘Tiamisili ovitima kolonjila viene.* 6 Ene vu waya ombuto yalua, pole, vu ungula citito.+ Ene vu lia, pole, ka vu kuta. Vu nyua, pole, ka vu kuete ovinyu yi tẽla. Vu wala, pole, ka vu yevi owuya. Omunu o talavaya, o kapa ofeto yaye vonjeke yeyuka apangu.’”

7 “Ca popia Yehova ukualohoka ceci hati: ‘Tiamisili ovitima kolonjila viene.’*

8 “‘Lamani komunda, neni avaya.+ Kuenje tungi onjo+ oco ndi yi sanjukile loku ndi muisua ulamba,’+ oco Yehova a popia.”

9 “‘Ene wa kali oku lavoka calua kuenje wa tambuli citito; kuenda eci wa ci neni vonjo, nda ci sandola lefuimo liange.+ Momo lie?’ oco Yehova ukualohoka a popia. ‘Momo onjo yange yi kasi ovingululu osimbu okuti, omunu lomunu pokati kene a kasi oku tata onjo yaye muẽle.+ 10 Omo liaco, ovailu a kasi kilu liene a liwekapo oku lokisa owume kuenda ilu lieve lia liwekapo oku ima kualio. 11 Ame nda kala oku amamako oku nena ocitenya kilu lieve lo kolomunda kuenje eci ca nena ekambo liolomema, liovinyu, lulela kuenda ovikũla. Ci kaile ene kumue loviunda vu kasi oku tala ohali kuenda upange wene wosi wa linga welivova.’”

12 Seruvavele+ omõla a Sialitiyele+ la Yehosua ocitunda cinene omõla a Yehocadaka+ kuenda omanu vosi vana va tiuka kumandekua, va yevelela ondaka ya Yehova Suku yavo kuenda olondaka viuprofeto Hagai, momo Yehova Suku yavo wo tumile; kuenje omanu va fetika oku kuata usumba omo lia Yehova.

13 Kuenje Hagai omunga ya Yehova wa pitiya esapulo komanu ndeci ci likuata locikele a tambula ku Yehova liokuti: “‘Ame ndi kasi lene’+ oco Yehova a popia.”

14 Omo liaco, Yehova wa vetiya utima+ wa Seruvavele nguluvulu yo Yuda+ omõla a Sialitiyele kuenda utima wa Yehosua+ ocitunda cinene haeye omõla a Yehocadaka kuenda utima womanu vosi vana va tiuka kumandekua; ovo veya kuenje va fetika oku tumbulula onjo ya Suku yavo, Yehova ukualohoka.+ 15 Ovina viaco via pita keteke 24 yosãi yepandu, kunyamo wavali wuviali wa Soma Dariu.+

2 Kosãi yepanduvali, keteke 21 yosãi, ondaka ya Yehova yeya pocakati cuprofeto Hagai+ yiti: 2 “Mange ohenda, pulisa Seruvavele+ nguluvulo yo Yuda+ haeye omõla a Sialitiyele kuenda Yehosua+ ocitunda cinene omõla a Yehocadaka+ kuenda omanu vosi vana va tiuka kumandekua hati: 3 ‘Helie wa supapo pokati kene okuti, wa mola onjo* eyi vulamba walio watete?+ Kaliye vu yi lete ndati? Ene hẽ ka vu simi okuti oyo ka yi kuete esilivilo oku yi sokisa lulamba walio watete?’+

4 “‘Kaliye pama a Seruvavele,’ oco Yehova a popia ‘kuenda pama a Yehosua ocitunda cinene, omõla a Yehocadaka.’

“‘Kuenda pami ene amanu vosi vo vofeka,’+ oco Yehova a popia ‘kuenda lingi upange.’

“‘Momo ame ñasi lene,’+ oco Yehova ukualohoka a popia. 5 ‘Ivaluki ovina nda ku likuminyi eci wa tundi Kegito+ kuenda espiritu liange li kasi oku amamako pokati kene.*+ Ko ka kuati usumba.’”+

6 “Momo ca popia Yehova ukualohoka ceci hati: ‘Yimue vali onjanja, ndopo ndi ka tuñunya ovailu, longongo, lokalunga kuenda osi ya kukuta.’+

7 “‘Ndi ka lulumisa olofeka viosi kuenje ovina vi kuete esilivilo* violofeka viosi vi ka iñila;+ kuenda ndi ka yukisa onjo yilo lulamba,’+ oco Yehova ukualohoka a popia.

8 “‘Opalata yange kuenda ulu wange,’ oco Yehova ukualohoka a popia.

9 “‘Ulamba wo kovaso yoloneke wonjo yilo, u ka velapo okuti watete u sule,’+ oco Yehova ukualohoka a popia.

“‘Kuenje pocitumãlo cilo ndi ka tumbikapo ombembua,’+ oco Yehova ukualohoka a popia.”

10 Keteke 24 kosãi yecea, kunyamo wavali wuviali wa Dariu, ondaka ya Yehova yeya kuprofeto Hagai+ yiti: 11 “Ca popia Yehova ukualohoka ceci hati: ‘Lingi ohenda, pulisi ovitunda eci catiamẽla kocihandeleko hati:+ 12 “Nda omunu umue ambata ositu yi kola kesusu liuwalo waye kuenje uwalo waye u lamba kombolo ale kakunde pamue kovinyu ale kulela pamue kokulia kukuavo, anga hẽ ocina caco a lamba ci ka kola?”’”

Ovitunda via tambulula viti: “Sio!”

13 Noke Hagai wa pula hati: “Nda omunu umue wa vĩhisiwa omo lioku lamba kocivimbi cimue kuenje o lamba cimue pokati kovina viaco, anga hẽ ocina caco a lamba ci ka vĩhisiwa?”+

Ovitunda via tambulula vati: “Ci vĩhisiwa.”

14 Omo liaco, Hagai wa popia hati: “‘Omanu ava oco va kasi kuenda oco ci kasi ofeka eyi kovaso yange,’ oco Yehova a popia ‘kuenda oco ci kasi upange wosi wovaka avo; cosi ovo va eca ca vĩha.’

15 “‘Kaliye mangi ohenda, oku upisa cilo tiamisili utima wene* kondaka eyi: Ca kala ndati, osimbu ewe limue ka lia tumbikiwile kilu liewe likuavo vonembele ya Yehova?+ 16 Eci omunu umue eya kondunda yolomema loku lavoka okuti kuli 20 kolonjongo, kua kala lika 10; kuenda eci omunu umue eya pocikoselo cayuva oco opepo 50 kolonjongo viovinyu, kua kala lika 20;+ 17 Nda nyõla ovopange osi ovaka ene. Nda ku tumisi ofela ya tokota kuenda ombutukuma lociwe,+ pole, lomue pokati kene wa tiuka kokuange,’ oco Yehova a popia.

18 “‘Mangi ohenda, tiamisili utima wene* kovina vi ka pita oku upisa etaili keteke 24 kosãi yecea okuti, oku upisa keteke ociseveto conembele ya Yehova ca tumbikiwa;+ tiamisili utima kovina viaco. 19 Vosila* ka muli vali ombuto.+ Uyuva, ukuyu, o romã kuenda uti woliveira handi ka via imile apako. Oku upisa etaili, ndu sumũlũisi.’”+

20 Ondaka ya Yehova yeya ku Hagai onjanja yavali keteke 24 yosãi+ yiti: 21 “Sapuila Seruvavele nguluvulu yo Yuda hati: ‘Ndi ka lulumisa ovailu, longongo.+ 22 Ndi ka nyõla ocalo covosoma loku kundula ongusu yovosoma olofeka;+ ndi ka nyõla akãlu avo wuyaki kuenda ava va endelamo kuenje olokavalu lava va endailako va ka kupuka kuenda ovo va ka li ponda omunu lukuavo losipata.’”+

23 “‘Keteke liaco,’ oco Yehova ukualohoka a popia, ‘Ove a Seruvavele+ ukuenje wange haive vumõla a Sialitiyele,+ ndi ka ku kovonga,’ oco Yehova a popia ‘kuenje ndi ka ku lingisa ndonela yondimbukiso, momo ove una nda nõla,’ oco Yehova ukualohoka a popia.”