MALAKIYA

1 Esapulo limue:

Ondaka ya Yehova yatiamẽla ku Isareli pocakati ca Malakiya* yeyi:

2 “Nda lekisa ocisola kokuene amanu,”+ oco Yehova a popia.

Pole, ene vu popia vati: “Ove wa lekisa ndati ocisola kokuetu?”

“Esau ka kaile hẽ manji a Yakoba?”+ oco Yehova a popia. “Pole, nda sola Yakoba, 3 kuenda nda suvuka Esau;+ nda lingisa olomunda viaye alunda+ kuenda nda eca ocipiñalo caye kolombua viovusenge* vio vekalasoko.”+

4 “Ndaño okuti, Edome o popia hati: ‘Tua lemẽhiwa, pole, tu ka tiuka loku tumbulula ovingululu,’ ca popia Yehova ukualohoka ceci hati: ‘Va ka tunga, pole, ame ndi ka vi teya kuenda va ka tukuiwa hati, “ocikanjo cevĩho” haivo “omanu vana Yehova a pisa otembo ka yi pui.”+ 5 Ene vu ka ci mola lovaso ene muẽle kuenda vu ka popia vati: “Yehova a kemãlisiwe vocikanjo co Isareli.”’”

6 “‘Omõla o sumbila isia+ kuenda upika o sumbila cime caye. Pole, nda ame ndi isia,+ esumbilo ndi sesamẽla li kasi pi?+ Nda ndi cime,* esumbilo* ndi sesamẽla li kasi pi? Yehova ukualohoka o popia kokuene avitunda wa tombi onduko yange.+

“‘Pole, ene vu popia vati: “Tua tomba ndati onduko yove?”’

7 “‘Poku eca okulia kua vĩha kutala wange.’

“‘Kuenda vu popia vati: “Tua ku vĩhisa ndati?”’

“‘Poku popia hati: “Omesa ya Yehova+ ocina cimue ca lavisiwa.” 8 Kuenda eci vu eca ocinyama cimue ci kasi omeke ndocilumba, vu popia siti: “Ka ci lingi cimue.” Kuenje eci vu eca ocinyama cimue cocilema ale ceci ci vela vu popia siti: “Ka ci lingi cimue.”’”+

“Seteki oku vi eca ku nguluvulu yene. Anga hẽ eye o ka ku sanjukila ale o ka ku tambula lohenda?” oco Yehova ukualohoka a popia.

9 “Kaliye, mangi ohenda, pingi ku Suku, oco a lekise ohenda kokuetu. Lovilumba evi vi tunda povaka ene, anga hẽ o ka tambula umue pokati kene lohenda?” oco Yehova ukualohoka a popia.

10 “Kuenda helie pokati kene o lieca olumue oco a yike apito?*+ Momo ene ka vu taimisa utala wange ocali.+ Sia ku sanjukilili, oco Yehova ukualohoka a popia kuenda “si sanjukilavo ocilumba lacimue ci tunda povaka ene.”+

11 “Onduko yange yi ka sivayiwa pokati kolofeka,+ oku upisa oku ku tundila ekumbi toke oku li iñilila.* Kovitumãlo viosi ku ka eciwa ovilumba vioku timĩha kuenda ku ka eciwa ovilumba vonduko yange ndombanjaile ya lipua; momo onduko yange yi ka sivayiwa pokati kolofeka,”+ oco Yehova ukualohoka a popia.

12 “Pole, vu kasi oku yi sepula*+ poku popia hati, ‘Omesa ya Yehova ya vĩhisua kuenda ocilumba calio, okulia kualio ka vi silivila.’+ 13 Ene vu popiavo vati: ‘Tali! Ci kavisa!’ kuenda vu lekisa elaviso kokuayo,” oco Yehova ukualohoka a popia. “Kuenda vu nena ovinyama via nyaniwa, viovilema kuenda evi vi vela. Vu nena ovina viaco ndocilumba! Anga hẽ ndi pondola oku vi tambula peka liene?”+ oco Yehova a popia.

14 “Wa siñaliwa una okuti ukuatutu kuenda o kuete vocunda caye ocinyama culume ka ci kuete etondelo, pole, o linga ocisila cimue kuenda o lumba ku Yehova ocinyama cimue ci kuete atondelo. Momo, ame ndi Soma yimue yinene,”+ oco Yehova ukualohoka a popia “kuenda onduko yange yi ka sumbiwa pokati kolofeka.”+

2 “Cilo, Avitunda, ocihandeleko eci ca loña kokuene.+ 2 Nda wa likali oku yevelela kuenda ka wa ci kapeli vutima oco vu sivayi onduko yange,” oco Yehova ukualohoka a popia, “ndi ka ku tumisi esiñalo+ kuenda ndi ka pongolola esumũlũho liene oco li linge esiñalo.+ Ocili okuti, nda pongolola ale asumũlũho oco a linge asiñalo, momo ene ka vu kasi oku kapako ovina viaco.”

3 “Tali! Ndi ka nyõla* ombuto yene ya kũliwa omo liovilinga viene+ kuenda ndi ka sanduila aniña ovinyama kovipala viene, aniña ana ovinyama vi ipayiwa povipito viene; kuenje vu kambatiwa toke kocitumãlo caco.* 4 Noke vu ka limbuka okuti, nda eca ocihandeleko eci kokuene oco okuti, ocisila cange la Lewi camameko,”+ oco Yehova ukualohoka a popia.

5 “Ocisila cange laye ca kala comuenyo kuenda combembua, cina nda eca kokuaye oco a lekise esumbilo.* Eye wa lekisa esumbilo kokuange, wa kuatela usumba onduko yange. 6 Ocihandeleko* cocili ca kala vomẽla waye+ kuenda ka mua sangiwile ekambo liesunga vomẽla waye. Eye wa endaenda lame lombembua, lesunguluko+ kuenda wa lingisa valua oku siapo eci cĩvi. 7 Vomẽla wocitunda olonjanja viosi mu sukila oku tunda olondunge kuenda omanu va sukila oku sandiliya ocihandeleko* ci tunda vomẽla waye,+ momo eye, omunga ya Yehova ukualohoka.

8 “Pole, ene muẽle wa pambuki vonjila. Wa kokisi valua ocilondokua catiamẽla kocihandeleko.*+ Ocisila ca Lewi wa ci lueyi,”+ oco Yehova ukualohoka a popia. 9 “Omo liaco, ndi lingisa okuti ene vu sepuiwa loku kutisiwa osõi kovaso yomanu vosi, momo, ka wa endeleli volonjila viange, pole, wa lekisi ocame poku kapako ocihandeleko.”+

10 “Ka tu kuete hẽ vosi yetu isia umosi?+ Suku wa tu lulika ha umosiko hẽ? Oco hẽ, momo lie tu kalela ovisuanji omunu lukuavo+ poku sepula ocisila ca vakukululu yetu? 11 Yuda wa lekisa usuanji kuenda ocina cimue ca vĩha ca lingiwa ko Isareli lo ko Yerusalãi; momo Yuda wa sepula oku kola* kua Yehova,+ kuna Eye a sole kuenda wa kuela omõla ufeko wosuku yikuavo.+ 12 Yehova o ka kundula volombalaka via Yakoba omunu wosi o linga ocina caco, ci kaile helie ci kaile helie,* ndaño okuti, eye eca ocilumba cimue ku Yehova ukualohoka.”+

13 “Ene vu linga ocina cikuavo* ci koka oku yukisa utala wa Yehova lasuẽlẽla kuenda oku lila loku lisiõsiõla okuti, eye ka kapiko vali ovilumba viene kuenda ka vanji lohenda ovina viosi vi tunda povaka ene.+ 14 Kuenje ene vu pula hati, ‘Momo lie?’ Momo Yehova ombangi pokati kove lukãi wove wombutulua, una ove wa pakula ndaño okuti eye ekamba kuenda ukãi wove vocakati cocisila.+ 15 Pole, kua kala umue ka ci lingile, momo eye wa kuatele espiritu sandu lia Suku.* Nye eye a kala oku sanda? Ocitumbulukila* ca Suku. Omo liaco, lavi ovisimĩlo* viene kuenda ko ka sepuli akãi vene vombutulua. 16 Momo nda suvuka* oku linyãla,”+ oco Yehova Suku ya Isareli a popia, “kuenda una o sitika uwalo waye lungangala,”* oco Yehova ukualohoka a popia. “Kuenje lavi ovisimĩlo* viene kuenda ko ka lekisi usuanji.+

17 “Ene vu kavisa Yehova lolondaka viene.+ Pole, vu popia hati: ‘Tuo kavisa ndati?’ Poku popia hati, ‘Omunu wosi o linga eci cĩvi, uwa kovaso a Yehova kuenda eye u sanjukila,’+ ale poku popia hati: ‘Suku yesunga pi a kasi?’”

3 “Tali! Ñasi oku tuma omunga yange kuenda oyo yi ka pongiya onjila yange.+ Kuenje vocipikipiki Ñala yocili, una vu kasi oku sandiliya o keya vonembele yaye;+ kuenda omunga yocisila, una vu kasi oku lavoka lesanju o keya. Tali! Eye o keya muẽle,” oco Yehova ukualohoka a popia.

2 “Pole, helie o ka pandikisa keteke eye a keya kuenda helie o ka talama eci eye a ka molẽha? Eye o ka kala ndondalu yi kanguisa kuenda ndonjapãu+ yoku sukula uwalo. 3 Eye o ka tumãla ndukuakukanguisa kuenda ukuakuyelisa o palata+ kuenje o ka yelisa omãla va Lewi; noke o ka va kanguisa ndulu kuenda ndopalata kuenje ovo va ka eca ku Yehova ocilumba coku lumba lesunga. 4 Kuenje ocilumba co Yuda leci co Yerusalãi vi ka sanjuisa* Yehova, ndeci ca kala kosimbu.+

5 “Ame ndi keya kokuene oco vu sombisiwi kuenda ndi ka kala ombangi yoku pisa ovimbanda,+ vakuakahokolo, vakuakulisinga luhembi,+ vakuakunyana olonalavayi via fetiwa,+ ocimbumba, omõla ka kuete isia*+ kuenda vana va likala oku kuatisa* ovingendeleyi.+ Ava ka va ndi sumbile,” oco Yehova ukualohoka a popia.

6 “Momo ame ndi Yehova; Si pongoloka.*+ Kuenda ene vumãla va Yakoba; ka wa pitĩlili handi kesulilo. 7 Tunde koloneke via vakukululu yene, ka wa kapeliko oviholo viange kuenda wa liwekipo oku vi kapako.+ Tiuki kokuange kuenje ame ndi ka tiuka kokuene,”+ oco Yehova ukualohoka a popia.

Pole, ene vu popia hoti: “Tu tiuka ndati kokuove?”

8 “Anga hẽ omunu waño o pondola oku nyana Suku? Pole, ene vu kasi oku ndi nyana.”

Kuenda ene vu popia hoti: “Tua ku nyana ndati?”

“Konepa yekũi kuenda kolombanjaile. 9 Ene wa siñaliwi* muẽle, momo vu kasi oku ndi nyana, ofeka yosi yi kasi oku ci linga. 10 Neni onepa yekũi vosila,+ oco vonjo yange mu kuate okulia;+ kuenda mangi ohenda, ndi seteki konepa eyi,” oco Yehova ukualohoka a popia, “oco vu moli nda siu yikuili apito o kovailu+ oco ndi sukumuĩle* kokuene asumũlũho, toke eci ka ku kambi vali cimue.”+

11 “Kuenje si ka tuma vali efengi lioluhuma kokuene kuenda ka lu ka nyõla apako ofeka yene ndaño ayuva ovapia ene, ka a ka kala ndu okuti ka ami,”+ oco Yehova ukualohoka a popia.

12 “Olofeka viosi vi ka popia okuti, ene wa sanjuki, momo vu ka linga ofeka yimue yesanju,”+ oco Yehova ukualohoka a popia.

13 “Olondaka wa popi kokuange vĩvi calua,” oco Yehova a popia.

Kuenda ene vu popia hoti: “Olondaka vipi vĩvi tua popia kokuove?”+

14 “Ene vu popia hoti: ‘Ka ci kuete esilivilo oku vumba Suku.+ Onima yipi yi tunda koku lekisa ku Yehova ukualohoka okuti, tua sumua omo liakandu etu? 15 Kaliye omanu vana vakuakulekisa epela tu va tenda okuti va sumũlũha. Handi vali, vana va linga eci cĩvi, va litunda ciwa.+ Ovo va seteka Suku kuenda va litunda ciwa koku ci linga.’”

16 Kotembo yaco, vana va sumbilile Yehova va kala oku sapela omunu lukuavo, omunu lomunu lekamba liaye kuenda Yehova wa kala oku yevelela. Kuenda kovaso aye kua sonehiwa elivulu limue mu sangiwa olonduko+ via vana va sumbila Yehova kuenda vana va enda oku sokolola* konduko yaye.+

17 “Ovo va ka kala vange,”+ oco Yehova ukualohoka a popia, “keteke liaco, ndi ka va lingisa omanu vange valikasi.*+ Ndi ka lekisa ohenda kokuavo, ndeci isia umue a lekisa ohenda komõla o pokola kokuaye.+ 18 Kuenje ene vu ka mola vali etepiso li kasi pokati komunu ukuesunga kuenda omunu ondingaĩvi,+ pokati ku o fendela Suku kuenda u kofendela.”

4 “Tali! kuiya eteke li taima ndofolono yondalu,+ eci vosi vana va litunula la vana va linga evĩho va ka kala ndowangu. Ovo va ka nyõliwa muẽle keteke li keya kuenda ka ku ka supa olumbombo ale ocanja,” oco Yehova ukualohoka a popia. 2 Pole, kokuene vu sumbila* onduko yange, utanya u nena esunga, u ka nina kuenda olosongo* vialio vi ka ku kayisi. Kuenje ene vu ka tẽha tẽha ndolongombe via lẽla.”

3 “Keteke ndi ka ecelela okuti ovina evi vi keya, ene vu ka kosa olondingaĩvi, momo ovio vi ka kala ndoneketela vemẽhi yolomãi viene,” oco Yehova ukualohoka a popia.

4 “Ivaluki Ocihandeleko cukuenje wange Mose, oviholo kuenda olonumbi vina nda handelekele ko Horeve, vina o Isareli yosi ya sukilile oku pokola.+

5 “Tali! Ñasi oku tuma kokuene Eliya uprofeto,+ osimbu eteke linene lia Yehova halio li koka usumba ka lieyile.+ 6 Eye o ka ecelela okuti, ovitima via va isia vi linga ndevi viomãla*+ kuenda ovitima viomãla vi linga ndevi via va isia, oco si ka nyõle ongongo poku yi kundula.”

(Esulilo liovisonehua vi kola via sonehiwa kelimi lio Heveru-Aramaiku, vi kuamiwa Lovisonehua Vio Helasi)