UKANDA WAVALI WA PETULU

1 Ame ndi Simono Petulu, ndupika haime ndupostolo wa Yesu Kristu, ndi sonehela vana va kuete ekolelo ndeli lietu pocakati cesunga lia Suku yetu kuenda Liupopeli Yesu Kristu:

2 Ohenda ya piãla kuenda ombembua viu vokiyiwi omo liukũlĩhĩso wa suapo+ wa Suku kuenda wa Yesu Ñala yetu, 3 momo unene wa Suku, wa tu ĩha* ovina viosi vi tu kuatisa oku kala komuenyo kuenda oku sumbila Suku, pocakati cukũlĩhĩso wa suapo wa Una wa tu kovonga+ omo liulamba waye kuenda ovituwa viwa. 4 Pocakati covina evi, wa tu ĩha* olohuminyo via velapo haivio vinene+ oco okuti mekonda liavio, vu panga onepa kulamba Suku a kuete,+ loku puluka kevĩho lioluali li tunda kolonjongole vĩvi.*

5 Omo liaco, lingi alikolisilo osi a sukiliwa+ okuti, kekolelo liene vu vokiyako esunga,+ kesunga liene, ukũlĩhĩso,+ 6 kukũlĩhĩso wene, oku likandangiya,+ koku likandangiya kuene, epandi, kepandi liene, oku sumbila Suku,+ 7 koku sumbila kuene Suku, oku sola vamanji, koku sola kuene vamanji, ocisola.+ 8 Momo nda ovina evi vi kala vokuene kuenda vi supoka, ovio vi ko teyuili okuti ka vu hongua kuenda ka vu kala nduti ka wimi epako+ liatiamẽla kukũlĩhĩso wa suapo wa Ñala yetu Yesu Kristu.

9 Wosi wa kambela ovina evi, omeke, o likala oku mola ocinyi*+ kuenda wa ivalako oku liyelisa kakandu aye+ osimbu. 10 Omo liaco, a vamanji, likolisiliko oku kakatela kesumũlũho lioku kovongiwa kuene+ kuenda koku nõliwa kuene, momo nda wamamiko oku linga ovina evi, lalimue eteke vu konyõha.+ 11 Kuenje lonjila eyi, vu kuata epuluvi lioku iñila Vusoma ka u pui+ wa Ñala yetu haeye Upopeli Yesu Kristu.+

12 Omo liaco, ndi yongola oku vu ivaluisi ovina evi olonjanja viosi, ndaño wa vi kũlĩhi ale kuenda via sevetiwa vocili ci kasi vokuene. 13 Pole, ame ndi sima okuti ca sunguluka okuti, ndi vu ivaluisi vali ovina evi+ osimbu ñasi vetimba eli,*+ 14 poku kũlĩha okuti etimba eli* ndopo li njupiwa ndeci Ñala yetu Yesu Kristu a ndekisa.+ 15 Ndi ka likolisilako olonjanja viosi okuti noke yoku tunda kuange, ene muẽle vu tẽla oku ivaluka* ovina evi.

16 Sio, ka tua kuamẽle alusapo esanda a sovuiwa lomunu oco tu vu sapuili unene kuenda etukuluko lia Ñala yetu Yesu Kristu, pole, tua mola ulamba waye.+ 17 Momo eye wa tambula ku Suku Isia, ekemainyo lialua kuenda ulamba eci olondaka evi via tiamisiwila kokuaye lulamba wa piãla okuti: “U Omõlange wa soliwa, ndo sanjukila.”+ 18 Ocili, olondaka evi via tunda kilu tua vi yeva osimbu tua kala laye komunda yi kola.

19 Omo liaco, tu kuete ondaka yovaprofeto ya kolisua vali kokuetu kuenda vu linga ciwa poku yevelela lutate kokuayo ndondiyelo+ yi taimila vowelema (toke eci ku ca kuenje nanda*+ o tuila) vovitima viene. 20 Momo tete wa kũlĩhi okuti, lacimue ocitumasuku Cocisonehua ca tunda kovisimĩlo viomanu. 21 Momo ocitumasuku ka ceyile locipango comanu,+ puãi omanu va popia ondaka ya tunda ku Suku, ndomo va vetiyiwa* lespiritu sandu.+

2 Ndeci pokati komanu pa kala ovaprofeto vesanda, pokati kene pa ka kalavo alongisi vesanda.+ Ovo va ka nena vuyombeki alongiso esanda a ka nyõla ekolelo liene kuenda va ka likala una* wa va yovola+ kuenje va li kokela lonjanga enyõleho liavo muẽle. 2 Handi vali, valua va ka kuama ovituwa viavo viumbondo*+ kuenje mekonda liavo onjila yocili yi ka sepuiwa.+ 3 Kuenje locipululu cavo, va ko yapuisi lolondaka viuhembi. Pole, esombiso liavo okuti lia sokiyiwa ale tunde osimbu,+ ka li ka cilua kuenda enyõleho liavo liya muẽle.+

4 Suku wa yambula ovangelo va linga ekandu+ kuenje wa va imba vo Tartaru,*+ noke wa va kapa vovitunu viowelema walua oco va talamẽle esombiso.+ 5 Kuenje eye wa yambula oluali lumue luosimbu,+ pole, wa popela Noha, ukuakukunda esunga+ una wa popeliwa kumue lomanu epanduvali,+ eci eye a nena etande voluali lumue luomanu vakuakutomba Suku.+ 6 Poku lingisa etiko olupale luo Sodoma lo Gomora, wa a pisa,+ loku lekisa olumapu luovina vi laika oku iya komanu va tomba Suku.+ 7 Kuenje eye wa yovola ukuesunga Lote,+ una wa sakalaisiwile lumbondo* womanu va tomba ovihandeleko, 8 ocili, ulume waco ukuesunga, osimbu a tungile pokati komanu vaco vakuavilinga vĩvi, wa mola ndomo ovo va kala kuenda wa yeva ovina ovo va popia kuenje eye wa sumuile calua eteke leteke. 9 Omo liaco, Yehova* wa kũlĩha ndomo a yovola koseteko omanu vo sumbila,+ pole, vana okuti havakuesungako o va selekela enyõleho* keteke liesombiso,+ 10 ca piãla enene vana va sandiliya oku vĩhisa etimba lia vakuavo,+ haivo va sepula vana va kuete unene woku viala.+

Ovo vakuasiata, vakuesino, haivo ka va kuete usumba woku popia lãvi vana va sumbiwa la Suku, 11 osimbu okuti ovangelo ndaño va piãla kongusu kuenda kunene, pole, ka va lundila alongisi vesanda lolondaka vĩvi omo lioku sumbila* Yehova.*+ 12 Pole, omanu vaco okuti va kasi ndovinyama ka vi kuete olondunge, haivio via citiwila oku kuatiwa loku nyõliwa, va popia lãvi ovina ka va kũlĩhĩle.+ Kuenje omo liovina vĩvi va linga, va ka nyõliwa la Suku, 13 kuenda va ka tala ohali loku tambula onima yovina vĩvi va linga.

Kokuavo, oku ambata omuenyo wayele ndaño muẽle vokuenda kutanya, esanju.+ Ovo atota kuenda atime, haivo va sanjukila* alongiso avo esanda osimbu va lingila kumue lene ovipito.+ 14 Ovaso avo eyuka ukahokolo,+ haivo ka va tẽla oku siapo oku linga ekandu kuenda va yonja vana va hongua. Ovitima viavo via pindisiwa locipululu. Kuenje va ka yambuiwa la Suku. 15 Ovo va siapo onjila ya suñama kuenda va yapuka. Va kuama onjila ya Baliame+ omõla a Beore, una wa solele onima yi tunda kelinga lĩvi,+ 16 pole, wa lemẽliwa omo lioku lueya eci ca sunguluka.+ Ocinyama coku ambatela ovilemo okuti ka ci popi, poku vangula londaka yomunu ca tateka elinga lĩvi liuprofeto.+

17 Ovo va sokisiwa lolono ka vi kuete ovava kuenda lalende ambatiwa lehunguhungu linene liofela kuenda kua va sokiyiwila owelema walua.+ 18 Va popia olondaka vi molẽha ndu okuti vi komõhisa, pole, ka vi kuete esilivilo. Loloñeyi vĩvi vietimba+ kuenda ovilinga viumbondo,* va yonja vana va puluka komanu va lingainga eci cĩvi.+ 19 Osimbu ovo va likuminya elianjo kokuavo, ovo muẽle va linga apika veci cĩvi;+ momo nda omunu umue o yuliwa lomunu ukuavo, eye o linga upika womunu waco.*+ 20 Ocili okuti, nda noke yoku puluka kevĩho lioluali+ omo liukũlĩhĩso wa suapo wa Ñala, haeye Upopeli Yesu Kristu, va litumbika vali kovina vimuamue kuenje va yuliwa, ekalo liavo lia sulako li vĩha calua okuti, eli va kuatele tete li sule.+ 21 Hĩse nda ka va kũlĩhĩle onjila yesunga okuti, oku yi kũlĩha kuenje va tinduka kocihandeleko ci kola va tambula, hacoko.+ 22 Kokuavo kua tẽlisiwa olusapo luocili luokuti: “Ombua ya tiukila vali kolosanjo viayo muẽle kuenda ongulu ya sukuiwa ya tiukila vali volonata.”+

3 A vamanji wa soliwi, owu ukanda wavali ndi kasi oku vu soneheli okuti, ndeci ndo soneheli watete, ñasi oku vetiya uloño wene woku sokolola ciwa poku vu ivaluisi ovina vimue+ 2 okuti, vu ivaluka olondaka via popiwa ale* lovaprofeto va kola kuenda locihandeleko ca Ñala haeye Upopeli pocakati covapostolo vene. 3 Tete kũlĩhi okuti, koloneke via sulako, vakuakupembula va keya loku pembula kuavo, poku kuama oloñeyi viavo muẽle vĩvi,+ 4 loku popia vati: “Ohuminyo yoku tukuluka kuaye yi kasi pi?+ Momo tunde keteke vakukululu yetu va pekela kolofa, ovina viosi vi kasi oku amamako ndeci via kala ale tunde kefetikilo lioku lulikiwa kuoluali.”+

5 Momo ovo locipango ka va kapiko uvangi owu wokuti, tunde kosimbu kua kala ale ovailu longongo yimue ya kala kosamua yovava kuenda vokati kovava pocakati condaka ya Suku;+ 6 kuenje omo liovina viaco, oluali luo kotembo yaco lua nyõliwa eci lueyukile lovava.+ 7 Pole, pocakati condaka ya Suku, ovailu a kasiko ndeti kuenda ongongo, via pongiyiwila ondalu kuenje viamamako toke keteke liesombiso loku nyõliwa kuomanu va tomba Suku.+

8 Pole, a vamanji wa soliwi, ko ka ivaliko uvangi owu wokuti eteke limosi ku Yehova* lia soka lohulukãi yanyamo kuenda ohulukãi yanyamo ya soka ndeteke limosi.+ 9 Yehova* ka livala lohuminyo yaye+ ndeci omanu vamue va sima, pole, eye o pandikisa lene, momo ka yongola okuti umue o nyõliwa, puãi, o yongola okuti vosi va likekembela.+ 10 Eteke lia Yehova*+ li keya ndocimunu okuti,+ ovailu a ka pita+ lokuõla kualua* kuenje ovina vi kasi kovailu levi vi kasi vongongo vi ka yenguluiwa omo lioku tokota kualua kuenda ongongo lovopange a kasimo a ka situluiwa.+

11 Omo okuti ovina viosi evi vi ka yenguluiwa ndomo, kũlĩhĩsi ovituwa vu sukila oku lekisa kuenda eci vu sukila oku linga. Vu sukila oku kola loku lekisa ovilinga vioku sumbila Suku, 12 osimbu vu lavoka loku ivaluka olonjanja viosi* oku tukuluka kueteke lia Yehova*+ okuti, ovailu a ka nyõliwa+ londalu kuenda ovina vi kasi kovailu levi vi kasi vongongo vi ka yenguluiwa lowuya walua! 13 Pole, kuli ovailu okaliye longongo yokaliye tu kasi oku lavoka omo liohuminyo yaye+ kuenje vokuavio mu ka kala esunga.+

14 Kuenje a vamanji wa soliwi, omo vu kasi oku lavoka ovina evi, likolisiliko okuti, eci vu sangiwa laye ka vu kala latime, pamue amome, te lombembua.+ 15 Handi vali, tendi epandi lia Ñala yetu ndeyovo, ndeci manjetu wa soliwa Paulu a vu soneheli ndomo ci likuata lolondunge a tambula,+ 16 poku vangula ovina evi ndeci eye a linga vovikanda viaye viosi. Pole, ovina vimue vovikanda viaco, via tĩla oku kuata elomboloko liavio kuenda ovina viaco, vana va kasi vonumbi* haivo va hongua va kasi oku vi pengisa, ndeci va lingavo Lovisonehua vikuavo kuenje eci ci ka koka enyõleho liavo muẽle.

17 Omo liaco, ene a vamanji wa soliwi, omo vu kuete ale ukũlĩhĩso waco osimbu, lunguki okuti ka vu yapuisiwa lavo pocakati coku lueya kuomanu va tomba ovihandeleko kuenje vu li pumbisa oku pama kuene.*+ 18 Pole, amamiko oku kula kohenda ya piãla kuenda kukũlĩhĩso wa Ñala yetu haeye Upopeli Yesu Kristu. Kokuaye ku kale ulamba cilo kuenda oloneke ka vi pui. Amene.