ESITULUILO KU YOANO

1 Olondaka evi ovina Yesu Kristu a situlula* cilo. Yesu wa tambula ovina viaco ku Suku+ oco a lekise kapika va Suku+ ovina via laikele oku pita ndopo. Kuenje Yesu wa tuma ungelo waye ku Yoano+ una okuti, upika wa Suku* oco o sapuile ovina via laikele oku pita, 2 una wa imba uvangi wondaka ya eciwa la Suku kuenda uvangi wa eciwa la Yesu Kristu ocili, ovina viosi eye a mola. 3 Una o tanga lolukandi kuenda vana va yeva olondaka viocitumasuku eci, la vana va pokola kovina via sonehiwamo,+ va sumũlũha, momo otembo ya sokiyiwa yi kasi ocipepi.

4 Yoano o sonehela akongelo epanduvali+ a kasi voluvumba luo Asia ndoco:

Ohenda ya piãla lombembua vina vi tunda ku “Una o kasi, haeye wa kala ale kuenda o kasi oku iya,”+ haivio vi tunda kolongusu epanduvali+ vi kasi kovaso yocalo caye, 5 kuenda vi tunda ku Yesu Kristu, “Ombangi Yocili,”+ haeye “uveli kuava va fa”+ kuenda “Ombiali yolosoma vio kilu lieve,+ yi kale lene.”

Ku una o tu sole,+ haeye wa tu yovola kakandu etu pocakati cosonde yaye,+— 6 kuenje wa tu lingisa olosoma+ lovitunda+ oco tu vumbe Suku yaye haeye Isia—ocili, kokuaye ku kale ulamba kuenda unene otembo ka yi pui. Amene.

7 Tali! Eye iyilila valende+ kuenje ovaso osi a ko mola, kuenda vana vo toma; kuenje ovikoti viosi vio kilu lieve vi ka lisiõsiõla lesumuo mekonda liaye.+ Ocili eci ci ka tẽlisiwa muẽle, Amene.

8 “Ame Alfa haime Ômega,”*+ oco Yehova* Suku a popia, “Una o kasi, haeye wa kala ale kuenda o kasi oku iya okuti, Ukuonene Wosi.”+

9 Ame ndi Yoano manjene, haime ndimunu o kasivo oku pandikisa+ loku tala ohali+ kuenda oku panga onepa kusoma+ kumue lene omo lioku kala vomunga kumue la Yesu,+ nda kala vocifuka ci tukuiwa Patmo omo lioku vangula catiamẽla ku Suku kuenda oku imba uvangi watiamẽla ku Yesu. 10 Omo liunene wespiritu, ndeya oku kala keteke lia Ñala kuenje nda yeva ondaka yinene konyima yange ndeyi yolumbeta, 11 yiti: “Ovina o lete vi soneha vociña cimue kuenje vi tuma kakongelo epanduvali okuti: ko Efeso,+ ko Smurna,+ ko Pergamo,+ ko Tuatera, +ko Sardesi,+ ko Filadefia+ kuenda ko Laodikea.”+

12 Noke nda ñualapo oco ndi tale u wa kala oku vangula lame kuenje eci nda ñualapo, nda mola oviyekelo epanduvali violondiyelo viulu,+ 13 kuenda umue wa setahãla omõla omunu+ wa kala pokati koviyekelo violondiyelo okuti, wa wala uwalo wa lepa toke kolomãhi kuenda wa itika uvia wulu vonete. 14 Handi vali, esinga liutue waye li yela ndovonya omeme, ndocikokoto kuenda ovaso aye a kala ndulienge wondalu,+ 15 olomãhi viaye via kala ndosipi+ ya fina eci yi kanguiwa vofolono kuenda ondaka yaye ya kala ndonjuela yovava alua. 16 Peka liaye liondio pa kala olombungululu epanduvali+ kuenje vomẽla waye mua tunda osipata yimue ya lepa okuti, ya tua olonele vivali+ kuenda ocipala caye ca kala ndekumbi eci li nina calua.+ 17 Eci ndo mola, nda kupukila kolomãhi viaye ndomunu wa fa.

Kuenje wa ñapa eka liaye liondio, loku popia hati: “Ku ka kuate usumba. Ame Tete+ haime nda Sulako,+ 18 haime ñasi lomuenyo,+ nda file,+ pole, cilo ñasi lomuenyo kuenda ndi ka kala komuenyo otembo ka yi pui+ kuenda ñuete olosapi violofa levi Vionjembo.*+ 19 Omo liaco, soneha ovina wa mola, ovina vi kasi oku pita cilo, levi vi laika oku pita noke yovina evi. 20 Elumbu li kola liolombungululu epanduvali wa mola peka liange liondio kuenda oviyekelo epanduvali violondiyelo viulu lieli: Olombungululu epanduvali vi lomboloka ovangelo vakongelo epanduvali kuenda oviyekelo epanduvali violondiyelo, vi lomboloka akongelo epanduvali.+

2 “Sonehela ungelo+ wekongelo lio ko Efeso+ ndoco: Evi ovio ovina via popiwa la una o kuete peka liaye liondio olombungululu epanduvali, haeye endela pokati koviyekelo epanduvali violondiyelo viulu, hati:+ 2 ‘Nda kũlĩha ovilinga viove, upange wove walua, lepandi liove kuenda ove ku ecelela omanu vãvi, puãi wa nyika vana va litukula vati ovapostolo, osimbu okuti hovapostoloko+ kuenje wa limbuka okuti ovo olohembi. 3 Ove o kasivo oku lekisa epandi, haive wa pandikisa omo lionduko yange+ kuenda kua kavele.+ 4 Haimo lumue, ñuete love ondaka yoku ku pisa yokuti, ocisola wa kuatele tete wa ci yanduluka.

5 “‘Omo liaco, ivaluka ndomo wa konyõha, likekembela+ kuenda kuama ovilinga viove viatete. Nda kua ci lingile okuti ku likekembela, njiya kokuove kuenje njupa ociyekelo condiyelo yove+ pocitumãlo cayo.+ 6 Haimo lumue, kuli ocina cimue o kasi oku linga ciwa okuti: wa suvuka ovilinga viocisoko ca va Nikolau+ vina okuti, ame nda vi suvukavo. 7 U o kuete ovatũi a yevelele eci espiritu sandu li popia kakongelo:+ Una o yula+ ndi ko wecelela oku lia kuti womuenyo+ una u kasi vocumbo celau ca Suku.’

8 “Sonehela ungelo wekongelo lio ko Smurna ndoco: Evi ovio ovina eye a popia, ‘Una Watete haeye wa Sulako,’+ okuti wa file kuenje o kasi vali lomuenyo, hati:+ 9 ‘Nda kũlĩha ohali yove, luhukũi wove—pole, ove wuhuasi+—nda kũlĩhavo atonãi a vana va litukula okuti va Yudea, osimbu okuti hava Yudeako, pole, ovo osunangonga ya Satana.+ 10 Ku ka kuatele usumba ovina o laika oku tala ohali.+ Tala! Eliapu li kamamako oku imba vamue pokati kene vokayike oco vu setekiwe calua kuenje vu ka talisiwa ohali oloneke ekũi. Lekisa ekolelo toke koku fa kuenje ndi ka ku ĩha ekolowa liomuenyo.+ 11 U o kuete ovatũi a yevelele+ eci espiritu sandu li popia kakongelo okuti: Una o yula,+ oku fa kuavali lalimue eteke ku ko nyõla.’+

12 “Sonehela ungelo wekongelo lio ko Pergamo ndoco: Evi ovio ovina via popiwa la una o kuete osipata ya lepa haiyo ya tua olonele vivali hati:+ 13 ‘Nda kũlĩha oku wa tunga okuti, oko ku kasi ocalo ca Satana; puãi handi ove amamako oku kakatela konduko yange+ kuenda kua likalele ekolelo o ñuetele,+ ndaño muẽle koloneke via Antipasi, ombangi yange ya koleliwa,+ una wa pondiwa+ ponele yene, kuna kua tunga Satana.

14 “‘Haimo lumue, ñuete love olondaka vimue vioku ku pisa viokuti, o kasi lava va kakatela kelongiso lia Baliame,+ una wa longisa Balaka+ okuti o kapela ewe liocilondokua omãla va Isareli, oco va lie ovina via lumbiwa koviteka loku linga evĩho liukahonga.*+ 15 Lonjila yimuamue, ove o kasivo lava va kakatela kelongiso liocisoko ca va Nikolau.+ 16 Omo liaco, likekembela. Nda kua ci lingile, njiya lonjanga kokuove kuenje ndi yaka lavo losipata ya lepa yomẽla wange.+

17 “‘U o kuete ovatũi a yevelele eci espiritu sandu li popia kakongelo okuti:+ Una o yula,+ ndi ko wĩha omana ya solekiwa+ loku wĩhavo ewe limue li yela kuenda kewe liaco kua sonehiwa onduko yimue yokaliye okuti lomue wa yi kũlĩha, te lika una o yi tambula.’

18 “Sonehela ungelo wekongelo lio ko Tuatera+ ndoco: Evi ovio ovina Omõla a Suku a popia una okuti, ovaso aye a soka ndulienge wondalu,+ haeye una okuti olomãhi viaye via soka losipi ya fina hati:+ 19 ‘Nda kũlĩha ovilinga viove, ocisola cove, ekolelo liove, upange wove, lepandi liove kuenda nda kũlĩha okuti ovilinga viove via sulako via velapo okuti, viatete vi sule.

20 “‘Haimo lumue, ñuete love ondaka yimue yoku ku pisa yokuti, o kasi oku ecelela ukãi una Isevele,+ o litukula okuti uprofeto ukãi, haeye o longisa loku yapuisa apika vange oco va linge evĩho liukahonga*+ kuenda oku lia ovina via lumbiwa koviteka. 21 Ndo wĩha otembo oco a likekembele, puãi eye ka yongola oku likekembela kevĩho liaye liukahonga.* 22 Tala! Ndu kokela oku vela kuenda vana va linga laye ukahokolo ndi va kokela ohali ya piãla, te lika nda va likekembela kovilinga viaye. 23 Ndi ka ponda omãla vaye lefengi li ponda kuenje akongelo osi a ka limbuka okuti ame una o kũlĩhĩsa ovisimĩlo via longa* kuenda ovitima kuenje ndi ka eca kokuene omunu lomunu eci ca sesamẽla ovilinga viene.+

24 “‘Pole, ndu sapuili ene wa supipo ko Tuatera, vosi ka va kuama elongiso eli, la vana ka va kũlĩhĩle eci ci tukuiwa okuti “ovina via longa via Satana,” siti:+ Si kasi oku vu tuiki ocilemo cimue cikuavo. 25 Ndu sapuili vali siti, kakateli kovina vu kuete toke eci njiya.+ 26 Kuenje una o yula haeye o kuama ovilinga viange toke kesulilo, ndi ko wĩha unene woku viala olofeka,+ 27 kuenda eye o ka songuila omanu lepangati liutale+ oco okuti va nyanyũiwa ndasanga otuma, ndeci nda tambula omoko yaco ku Isiange. 28 Kuenje ndi ko wĩha olumbungululu luomẽle.+ 29 U o kuete ovatũi a yevelele eci espiritu sandu li popia kakongelo.’

3 “Sonehela ungelo wekongelo lio ko Sardesi ndoco: Evi ovio ovina via popiwa la una o kuete aspiritu epanduvali a Suku+ kuenda olombungululu epanduvali hati:+ ‘Nda kũlĩha ovilinga viove, haive o kuete oluhimo* luokuti o kasi lomuenyo, puãi wa fa.+ 2 Lavulula+ kuenda pamisa ovina via supapo via kala oku panda kolofa, momo kua malusuile* upange una Suku yange a yongola okuti o u linga. 3 Omo liaco, amamako oku sokolola* kueci wa tambula, leci wa yeva, loku ci lava kuenda likekembela.+ Ame njiya ndocimunu, te lika nda wa pasuka+ kuenje ove ku ka kũlĩha owola ndiya kokuove.+

4 “‘Haimo lumue, ove o kuete omanu vamue* ko Sardesi okuti, ka va vĩhisile ovowalo avo+ kuenda ovo va ka enda lame luwalo u yela,+ momo va sesamẽla ocikele caco. 5 Una o yula,+ o ka wala uwalo u yela+ kuenda lalimue eteke ndi kopa* onduko yaye velivulu liomuenyo,+ pole, ndi ka limbuka onduko yaye kovaso ya Isiange, lo kovaso yovangelo vaye.+ 6 U o kuete ovatũi a yevelele eci espiritu sandu li popia kakongelo.’

7 “Sonehela ungelo wekongelo lio ko Filadefia ndoco: Evi ovio ovina via popiwa la una o kola,+ haeye ukuacili,+ o kuete osapi ya Daviti,+ una o yikula okuti lomue o yika kuenda o yika okuti lomue o yikula, hati: 8 ‘Nda kũlĩha ovilinga viove—tala! nda kapa kovaso yove epito lia yikuka+ okuti lomue o tẽla oku li yika. Nda kũlĩha okuti ove o kuetepo kamue unene, haive wa kapako ondaka yange kuenda kua likalele onduko yange. 9 Tala! Vakuasunangonga ya Satana haivo va litukula okuti va Yudea, osimbu okuti hava Yudeako,+ pole, va kasi oku kemba, tala! ndi ka va vilikiya oco veye okuti, va kekamẽla kolomãhi viove kuenda ndi va limbukisa okuti ame ndu ku sole. 10 Omo okuti wa kapako ondaka yatiamẽla kepandi liange,*+ lamevo ndi ka ku ivaluka kowola yoseteko,+ yina yi laika oku iya kilu lieve liosi oco yi seteke vana va tunga kilu lieve. 11 Ndiya lonjanga.+ Amamako oku kakatela kueci o kuete oco okuti, lomue upa ekolowa liove.+

12 “‘Una o yula—ndi ko lingisa ongunji vonembele ya Suku yange kuenda lalimue eteke a ka tundamo kuenje ndi ka soneha kokuaye onduko ya Suku yange,+ londuko yolupale ya Suku yange okuti, o Yerusalãi Yokaliye+ yi tunda kilu ku Suku yange kuenda onduko yange yokaliye.+ 13 U o kuete ovatũi a yevelele eci espiritu sandu li popia kakongelo.’

14 “Sonehela ungelo wekongelo lio ko Laodikea+ ndoco: Evi ovio ovina via popiwa la Amene,*+ ombangi+ ya koleliwa haiyo yocili+ kuenda efetikilo lioviluvo viosi via Suku hati:+ 15 ‘Nda kũlĩha ovilinga viove okuti kua talalele ndaño oku tokota. Pole, nda yonguile okuti o talala ale o tokota. 16 Puãi omo wukuakalendewuya okuti, kua talalele+ ndaño oku tokota,+ hu siya vomẽla wange. 17 Momo ove o popia hati: “Nduhuasi+ haime ndi kuete ukuasi kuenda si sukila cimue,” puãi kua kũlĩhĩle okuti ku kuete esanju, wukuahali, wuhukũi, wumeke, haive o kasi epõlõla, 18 hu vetiya oco o lande kokuange ulu wa yenguluiwa londalu okuti o linga ohuasi, oco o lande uwalo u yela okuti o wala oco osõi yepõlõla liove ka yi ka molẽhe+ kuenda o landa ovihemba okuti o kapa vovaso ove+ oco o vanje.+

19 “‘Vosi vana ndi sole, ndi va lungula loku va pindisa.+ Omo liaco, kala ukuambili kuenda likekembela.+ 20 Tali! Ndi tãi puvelo loku totola. Nda umue o yeva ondaka yange kuenje o yulula epito, ndi ka iñila vonjo yaye, ndi lia laye ondalelo kuenda eye o lia lame. 21 Una o yula,+ ndi ko wecelela oku tumãla kumue lame kocalo cange,+ ndeci ame nda yula kuenje nda tumãla+ kumue la Isiange kocalo caye. 22 U o kuete ovatũi a yevelele eci espiritu sandu li popia kakongelo.’”

4 Noke yovina evi, nda mola epito limue lia yikuka kilu kuenda ondaka yatete nda yeva okuti ya kala oku vangula lame, ya kala ndolumbeta, yu ya popia yiti: “Lamanela kulo kuenje ndi ka ku lekisa ovina vi laika oku pita.” 2 Noke liovina viaco, vonjanja yaco ndeya oku kala vunene wespiritu sandu kuenje tala! Ocalo cimue ca tumbikiwa pocitumãlo calio kilu kuenda umue wa tumãla kocalo caco.+ 3 U wa tumãlako wa setahãla ewe lio jaspe+ lewe lio sardio* kuenda ocalo ca ñualiwa lolukongolo lua setahãla o emeralda.+

4 Ocalo ca ñualiwa lovialo 24 kuenje nda mola 24 kakulu+ va tumãla kovialo viaco okuti, va wala uwalo u yela kuenda kovitue viavo kua kala akolowa wulu. 5 Kocalo kua kala oku tunda oviliakulo,+ olondaka kuenda ovilemĩlo;+ kua kalavo olondiyelo epanduvali viondalu via taimĩla kovaso yocalo okuti, vi lomboloka aspiritu epanduvali a Suku.+ 6 Kovaso yocalo, kua kala cimue ci kasi ndociva cinene covava+ ca setahãla ovitulu.

Vokati kocalo kuenda kolonele viocalo kua kala oviluvo vikuãla+ vi kasi lomuenyo, vieyuka ovaso konyima lo kovaso. 7 Ociluvo catete ci kasi lomuenyo ca setahãla ohosi,+ ociluvo cavali ci kasi lomuenyo ca setahãla ongombe,+ ociluvo catatu ci kasi lomuenyo+ ci kuete ocipala comunu, ociluvo cakuãla ci kasi lomuenyo+ ca setahãla ongonga yi kasi oku palãla.+ 8 Oviluvo viaco vikuãla vi kasi lomuenyo, ociluvo lociluvo ca kuata avava epandu; ovio vieyuka ovaso volonele viavava lo vemẽhi.+ Kuenje utanya luteke viamamako oku popia viti: “O kola, o kola, o kola Yehova*+ Suku, Ukuonene Wosi, una wa kala, o kasi kuenda iya.”+

9 Olonjanja viosi eci oviluvo vi kasi lomuenyo vi eca ulamba lesumbilo kuenda olopandu ku Una wa tumãla kocalo okuti, Yuna o kasi lomuenyo otembo ka yi pui,+ 10 akulu 24+ va kekamẽla kovaso ya Una wa tumãla kocalo loku fendela Una o kasi lomuenyo otembo ka yi pui kuenda va imba akolowa avo kovaso yocalo loku popia vati: 11 “A Yehova* Suku yetu, ove o sesamẽla oku tambula ulamba,+ lesumbilo+ kuenda unene,+ momo ove wa lulika ovina viosi,+ ovio vi kasi kuenda via lulikiwa omo liocipango cove.”

5 Kuenje nda muila peka liondio lia Una wa tumãla kocalo+ ociña cimue ca sonehiwa kolonele vivali* okuti, ca yikiwa ciwa lasitikilo epanduvali. 2 Nda mola ungelo umue wa pama wa kaluka lolukandi hati: “Helie o sesamẽla oku yikula ociña loku upa asitikilo aco?” 3 Pole, ka kua kaile omunu umue kilu, ale posi, pamue vemẽhi lio posi wa tẽla oku yikula ociña, ale oku vanjamo. 4 Nda fetika oku lila calua momo lomue wa sangiwa okuti o sesamẽla oku yikula ociña ale oku vanjamo. 5 Pole, umue pokati kakulu wa ndi sapuila hati: “Ku ka lile. Tala! Ohosi yocikoti ca Yuda,+ olumbombo+ lua Daviti,+ ya yula+ oco yi yikule ociña lasitikilo aco epanduvali.”

6 Pokati kocalo, lo pokati koviluvo vikuãla vi kasi lomuenyo kuenda pokati kakulu+ nda muilapo okameme+ ka tãi okuti ka molẽhele ndu okuti ka pondiwile,+ haiko ka kuata olombinga epanduvali, lovaso epanduvali okuti, ovaso aco a lomboloka aspiritu epanduvali a Suku,+ ana a tumiwa kilu lieve liosi. 7 Vonjanja yaco, Kameme weya kuenje wa tambula ociña peka liondio lia Una wa tumãla kocalo.+ 8 Eci eye a tambula ociña, oviluvo vikuãla vi kasi lomuenyo kuenda 24 kakulu+ va kekamẽla kovaso a Kameme kuenje ukulu lukulu wa kuata ohalupa yimue, latiyela wulu eyuka insensu. (Insensu vi lomboloka olohutililo violosandu.)+ 9 Kuenje ovo va imba ocisungo cimue cokaliye+ vati: “Ove o sesamẽla oku tambula ociña loku yikula asitikilo aco, momo wa pondiwile kuenje losonde yove wa landela Suku+ omanu va tunda kovikoti viosi, kalimi osi, komanu vosi, lo kolofeka viosi,+ 10 kuenje wa va lingisa olosoma+ lovitunda oco va vumbe Suku yetu+ kuenda va ka viala ndolosoma+ koluali luosi.”

11 Kuenje nda mola kuenda nda yeva ondaka yovangelo valua va ñuala ocalo, loviluvo vi kasi lomuenyo, lakulu okuti, etendelo liavo olohuluwa violohuluwa,* lolohulukãi violohulukãi,+ 12 kuenje va kala oku popia lolukandi vati: “Kameme una wa pondiwile+ o sesamẽla oku tambula unene, ukuasi, olondunge, ongusu, esumbilo, ulamba kuenda esumũlũho.”+

13 Noke nda yeva oviluvo viosi vio kilu, levi vio posi+ kuenda vio vemẽhi lio posi, vio vokalunga, lovina viosi vi kasimo viti: “Ku una wa tumãla kocalo+ kuenda ku Kameme+ ku kale esumũlũho, esumbilo+, ulamba, lunene otembo ka yi pui.”+ 14 Oviluvo vikuãla vi kasi lomuenyo via kala oku popia viti: “Amene!” kuenda akulu va kekama loku fendela.

6 Nda mola eci Kameme+ a yikula limue pokati kasitikilo epanduvali+ kuenje nda yeva umue pokati koviluvo vikuãla+ vi kasi lomuenyo wa kaluka londaka ya kala ndocilemĩlo hati: “Enju!” 2 Kuenje nda mola okavalu ka yela+ kuenda u wa tumãlako o kuete ohonji; kuenje vo wĩha ekolowa limue,+ yu wa tundila oku yula loku tẽlisa oku yula kuaye.+

3 Eci eye a yikula esitikilo liavali, nda yeva ociluvo cavali ci kasi lomuenyo+ ca popia citi: “Enju!” 4 Kua tunda okavalu kakuavo ka kuete evala liondalu kuenda u wa tumãlako vo wĩha omoko yoku imũla ombembua kilu lieve okuti, ovo va liponda pokati kuenda vo wĩha osipata yimue yinene.+

5 Eci eye a yikula esitikilo liatatu,+ nda yeva ociluvo catatu ci kasi lomuenyo+ ca popia citi: “Enju!” Kuenje nda mola okavalu ka tekãva kuenda u wa tumãlako o kuete ombalãsa peka. 6 Nda yeva ondaka yimue ya tunda pokati koviluvo vikuãla vi kasi lomuenyo ya popia yiti: “Okilu* yimosi yotiliku yi landiwa lodenariu yimosi*+ kuenda olokilu vitatu viosevata, vi landiwavo lodenariu yimosi; kuenje ulela woliveira lovinyu ku ka vi nyõle.”+

7 Eci eye a yikula esitikilo liakuãla, nda yeva ondaka yociluvo cakuãla ci kasi lomuenyo+ ya popia yiti: “Enju!” 8 Noke nda mola okavalu ka yeluluka kuenda u wa tumãlako o kuete onduko yokuti, Kufa. Kuenje Onjembo* ya kala oku u kuama ocipepi. Va va ĩha omoko konepa yakuãla yo kilu lieve okuti, va ponda losipata ya lepa, lonjala,+ lefengi li ponda kuenda lovinyama via tema vio kilu lieve.+

9 Eci eye a yikula esitikilo liatãlo, nda mola vemẽhi liutala+ osonde+ ya vana va pondiwa omo liondaka ya Suku kuenda uvangi ovo va ecele.+ 10 Va kaluka lolukandi vati: “Toke otembo yipi, a Ñala Tõlo o kola haive ukuacili,+ o likandangiya oku sombisa loku fetuluinya osonde yetu ku vana va tunga kilu lieve?”+ 11 Omunu lomunu pokati kavo wa tambula uwalo u yela haiwo wa lepa+ kuenje va va sapuila oco va puyukepo kamue toke eci etendelo liapika vakuavo li suapo kuenda etendelo lia vamanjavo vana va laikele oku pondiwa ndeci ovo va pondiwile.+

12 Ame nda mola eci eye a yikula esitikilo liepandu kuenje kua pita ocilemawe cinene; noke ekumbi lia tekãva ndocikelẽyi ca pangiwa lovonya* kuenda osãi yosi ya kusuka ndosonde,+ 13 kuenje olombungululu vio kilu via lolukila posi ndeci uti wukuyu okuti eci u tuñunyiwa lofela yalua, akuyu ka a pile a loluka. 14 Ilu lia limuña ndociña kuenje lia taka,+ olomunda viosi lovifuka viosi via sondoluiwa povitumãlo vialio.+ 15 Kuenje olosoma vio kilu lieve, la vana va kemãla, la vakesongo kolohoka, olohuasi, la vana va pama, lapika vosi, lomanu vosi va yovuiwa, va salama valeva kuenda pokati kasenje olomunda.+ 16 Ovo vamamako oku sapuila olomunda kuenda asenje vati: “Tu kupukili+ kuenda tu vindikiyi kocipala ca Una wa tumãla kocalo+ kuenda konyeño ya Kameme,+ 17 momo eteke linene lionyeño yavo lia pitĩla+ kuenda helie o tẽla oku puluka?”+

7 Noke yovina evi, nda mola ovangelo vakuãla va talama kavindi akuãla o kilu lieve, va tutuiya olofela vikuãla vio kilu lieve okuti, layimue ofela yi sika kilu lieve ale vokalunga, pamue kuti umue. 2 Kuenje nda mola ungelo ukuavo wa tunda kutundilo wekumbi,* haeye o kuete ondimbukiso ya Suku o kasi lomuenyo; yu wa kalukila lolukandi kovangelo vakuãla vana va kundikiwa oku nyõla ilu lieve kuenda okalunga, 3 hati: “Ko ka nyõli ilu lieve ale okalunga, pamue oviti, toke eci tu kapa olondimbukiso+ kovipolo viapika va Suku yetu.”+

4 Kuenje nda yeva etendelo lia vana va kapiwa olondimbukiso okuti 144.000,+ vopiwa kovikoti viosi viomãla va Isareli:+

9 Noke yovina evi, nda mola owiñi wakahandangala okuti, lomue wa tẽlele oku u tenda, wa tunda kolofeka viosi, kovikoti viosi, komanu vosi kuenda kalimi osi,+ va tãi kovaso yocalo lo kovaso ya Kameme, va wala uwalo u yela+ haiwo wa lepa; povaka avo pa kala ovianja vieva.+ 10 Kuenje va vilikiya lolukandi vati: “Epopelo lietu li tunda ku Suku yetu, una wa tumãla kocalo+ kuenda ku Kameme.”+

11 Ovangelo vosi va ñuala ocalo, akulu+ kuenda oviluvo vikuãla kuenje va kekama kovaso yocalo loku fendela Suku, 12 loku popia vati: “Amene! Esivayo, ulamba, olondunge, olopandu, esumbilo, unene kuenda ongusu, vi kale la Suku yetu otembo ka yi pui.+ Amene.”

13 Umue pokati kakulu wa ndi pulisa hati: “Ava va wala ndeti uwalo u yela haiwo wa lepa,+ velie kuenda va tunda pi?” 14 Kuenje vepuluvi liaco, ndo tambulula hati: “A Ñala yange, ove wa ci kũlĩha.” Yu wa ndi sapuila hati: “Ava vana va tunda kohali ya piãla+ okuti, va sukula ovowalo avo a lepa kuenda va a yelisa vosonde ya Kameme.+ 15 Eli olio esunga lieci va kasilili kovaso yocalo ca Suku kuenda vo lingila upange u kola utanya luteke vonembele yaye; kuenje Una wa tumãla kocalo+ o ka pongiya ombalaka oco a va teyuile.+ 16 Ovo ka va ka yeva vali onjala ndaño enyona, ekumbi ka li ka va kakula vali, pamue owuya walua,+ 17 momo Kameme+ una o kasi vokati kocalo, o ka linga ungombo wavo+ kuenda o ka va songuila kolono viovava omuenyo.+ Kuenje Suku o ka puenya asuẽlẽla osi vovaso avo.”+

8 Eci eye+ a yikula esitikilo liepanduvali,+ kilu kuõha vokuenda kueci ci soka akũi atatu kakukutu. 2 Kuenje nda mola ovangelo epanduvali+ va tãi kovaso a Suku kuenda va va ĩha alumbeta epanduvali.

3 Ungelo ukuavo una wa kuata ocikuata cinsensu culu,* weya yu wa talama kutala+ kuenje vo wĩha onepa yalua yinsensu+ oco a yi lumbe kumue lolohutililo violosandu viosi kutala wulu+ wa kala kovaso yocalo. 4 Owisi winsensu wa kala oku tunda peka liungelo kuenda olohutililo+ violosandu, via lamana kovaso a Suku. 5 Vonjanja yaco, ungelo wa tikula ocikuata cinsensu, wa ci yukisa londalu yutala kuenda wa ci pesila kilu lieve. Kuenje kua kala ovilemĩlo, olondaka, oviliakulo+ kuenda ocilemawe. 6 Kuenje ovangelo epanduvali vana va tambula alumbeta epanduvali+ va liangiliyila oku sika alumbeta avo.

7 Ungelo watete wa sika olumbeta luaye. Kuenje kua kala ociwe, londalu ya litenga losonde kuenda via pesiwila kilu lieve;+ kuenje onepa yatatu yo kilu lieve ya pia kuenda onepa yatatu yoviti ya piavo, lovikũla viosi vi talala via pia.+

8 Ungelo wavali wa sika olumbeta luaye. Kuenje ocina cimue ca setahãla omunda yinene okuti ya taima londalu, ca imbiwa vokalunga.+ Onepa yatatu yokalunga ya pongoloka osonde;+ 9 kuenje onepa yatatu yoviluvo vi kasi lomuenyo vokalunga via fa,+ lonepa yatatu yolonaviyu ya nyõleha.

10 Ungelo watatu wa sika olumbeta luaye. Kuenje kilu kua loka olumbungululu lunene lua kala oku taima ndondiyelo, yu lua kupukila konepa yatatu yolondui kuenda kolono viovava.+ 11 Olumbungululu luaco lu tukuiwa hati, Cilula.* Kuenje onepa yatatu yovava ya linga ndocikũla cilula kuenda omanu valua va fa omo liovava, momo ovava aco a lula.+

12 Ungelo wakuãla wa sika olumbeta luaye. Kuenje onepa yatatu yekumbi,+ lonepa yatatu yosãi kuenda onepa yatatu yolombungululu via vetiwa okuti, onepa yatatu yavio yi tekãva+ kuenda onepa yatatu yutanya ka yi kuata ocinyi kuenda haicovo ci pita luteke.

13 Oco nda mola kuenda nda yeva ongonga yimue ya kala oku palãlela vokati kilu ya popia lolukandi yiti: “Avoyo we,+ avoyo we, avoyo we, ngongo yava va tunga kilu lieve, omo lioku sikiwa kualumbeta a supapo ana ovangelo vatatu va laika oku sika!”+

9 Ungelo watãlo wa sika olumbeta luaye.+ Kuenje nda mola olumbungululu lua loka kilu yu lua kupukila posi kuenda osapi yekungu*+ ya eciwa kolumbungululu luaco. 2 Oluo lua yikula ekungu* kuenje owisi wa tunda vekungu,* wa soka ndowisi u tunda vofolono yinene kuenda ekumbi lofela via tekãva+ omo liowisi wa tunda vekungu.* 3 Kuenje vowisi mua tunda olohuma okuti via kupukila kilu lieve+ kuenda via tambula unene ndowu u kuete anyenya o kilu lieve. 4 Ovio via handelekiwa oco ka vi ka nyõle ovikũla vio kilu lieve, ale owangu u talala, pamue oviti, te lika omanu vana ka va kuete ondimbukiso ya Suku kovipolo viavo.+

5 Olohuma ka via tambuile omoko yoku ponda omanu vaco, pole, via tambula omoko yoku va talisa ohali olosãi vitãlo, ohali yavo, ya kala ndohali yi kokiwa lenyenya limue+ eci olio li katukila omunu umue. 6 Koloneke viaco, omanu va ka sandiliya olofa, pole, ka va ka vi sanga kuenje va ka livela oku fa, puãi oku fa ku ka va tila.

7 Olohuma viaco, via setahãlele olokavalu via limalẽhela uyaki;+ kovitue vialio kua kala cimue ca setahãlele akolowa wulu kuenda ovipala vialio via kala ndovipala viomanu, 8 pole, esinga liovitue vialio lia kala ndeli liakãi. Ovayo alio a kala ndovayo olohosi,+ 9 via kuata ociteyuilo co vonete ca soka lociteyuilo cutale. Onjuela yavava alio, ya kala ndonjuela yakãlu a nãliwa lolokavalu vi lupukila kuyaki.+ 10 Handi vali, ovio via kala lovicĩla vi kuete olosongo ndanyenya kuenda kovicĩla viaco oko ku kasi unene woku lemẽha omanu vokuenda kuolosãi vitãlo.+ 11 Ovio vi kuete osoma yimue okuti, ungelo wekungu.+ Kelimi lio Heveru onduko yaye Abadone,* pole, kelimi lio Helasi eye o kuete onduko ya Apoliyono.*

12 Ocitangi catete ca pita. Tala! Noke yovina evi ku iya vali ovitangi+ vivali.

13 Ungelo wepandu+ wa sika olumbeta luaye.+ Kuenje nda yeva ondaka yimue ya tunda kolombinga viutala wulu+ u kasi kovaso a Suku, 14 ya popia lungelo wepandu wa kuatele olumbeta hati: “Kutulula ovangelo vakuãla va kutiwa kolui lunene Ferati.”+ 15 Kuenje ovangelo vakuãla vana va pongiyiwila owola, eteke, osãi kuenda unyamo, va kutuluiwa oco va ponde onepa yatatu yomanu.

16 Etendelo liolohoka via endela kolokavalu lia kala liolohuluwa vivali liolohuluwa;* nda yeva etendelo liavo. 17 Olokavalu lava va tumãlako nda mola vocinjonde, va kasi ndomo: Ovo va kuata oviteyuilo vio vonete vi kusuka ndondalu levi vievala li tekãvelua ndo yasintu kuenda viondunga yesala ndowisi u ponda kuenje ovitue violokavalu via kala ndovitue violohosi,+ kovimẽla vialio kua tunda ulienge wondalu, lowisi kuenda owisi u ponda. 18 Onepa yatatu yomanu ya pondiwa lafengi aco atatu okuti, ulienge wondalu, lowisi kuenda owisi u ponda via tunda kovimẽla vialio. 19 Momo unene wolokavalu, u kasi kovimẽla kuenda kovicĩla vialio, momo ovicĩla vialio vi kasi ndolonyõha kuenda vi kuete ovitue kuenje lovicĩla viaco vi lemẽha lavio omanu.

20 Pole, omanu vakuavo vana ka va pondiwile lafengi aco, ka va likekembelele kovilinga viovaka avo; ka va liwekelepo oku fendela olondele, oviteka viulu, viopalata, viosipi, levi viovawe kuenda vioviti vina okuti, ka vi vanji, ndaño oku yeva, pamue oku enda.+ 21 Kuenje ka va likekembelele koku ponda kuavo, ale kumbanda wavo, pamue kevĩho liavo liukahonga,* ndaño koku nyana kuavo.

10 Nda mola ungelo ukuavo wa pama wa tunda kilu okuti, wa wala* elende kuenje kutue waye kua kala olukongolo kuenda ocipala caye ca kala ndekumbi,+ ovolu* aye a kala ndolongunji viondalu, 2 peka liaye wa kuata okaciña ka yikuiwa. Wa liata lomãhi yaye yondio vokalunga kuenda lomãhi yepĩli wa liatela kongongo, 3 noke eye wa kaluka lolukandi ndohosi eci yi koma.+ Kuenje eci a kaluka, olondaka viovilemĩlo epanduvali+ via popia.

4 Eci ovilemĩlo epanduvali via popia, nda yonguile oku soneha, pole, nda yeva ondaka ya tunda kilu+ yiti: “Seleka ovina via popiwa lovilemĩlo epanduvali kuenda ku ka vi sonehe.” 5 Ungelo nda mola okuti wa talama kilu liokalunga lo kongongo, wa tulika eka liaye liondio kilu, 6 kuenje wa lisila ku Una o kasi lomuenyo otembo ka yi pui,+ haeye wa lulika ilu lovina vi kasimo, longongo lovina vi kasimo, lokalunga lovina vi kasimo,+ hati: “Otembo yoku talamẽla ya pita. 7 Puãi koloneke eci ungelo wepanduvali+ a ka sika olumbeta luaye,+ elumbu li kola+ Suku a sapula ndolondaka viwa kapika vaye muẽle okuti ovaprofeto,+ li ka tẽlisiwa muẽle.”

8 Kuenje nda yeva ondaka ya tunda kilu+ ya popia vali lame yiti: “Kuende, ka tambule ociña ca yikuiwa ci kasi peka liungelo wa talama kilu liokalunga lo kongongo.”+ 9 Yu nda enda kungelo kuenje ndo sapuila oco a nyĩhe okaciña. Eye wa ndi sapuila hati: “Ka tambula kuenje ka lia,+ oko ka ka lulisa vimo liove, puãi vomẽla wove ka ka sõsa ndowiki.” 10 Nda tambula okaciña peka liungelo kuenje nda ka lia,+ puãi vomẽla wange ka sõsa ndowiki,+ pole, eci nda ka lia, vimo liange mua lula. 11 Kuenje nda yeva ondaka ya ndi sapuila yiti: “O sukila oku imba vali owanji watiamẽla komanu, lo kolofeka, lo kalimi kuenda kolosoma vialua.”

11 Kuenje kua nyĩhiwa olundeya lu kasi ndombueti*+ osimbu eye a kala oku popia hati: “Votoka, upa oseteko yocitumãlo ci kola conembele ya Suku kuenda utala, kumue lomanu va kasi oku fendelamo. 2 Pole, catiamẽla kocitali ci kasi kosamua yocitumãlo ci kola conembele, ci kale ño, ku ka cupe oseteko, momo ca eciwa ku vakualofeka kuenda va ka liatela olupale lu kola+ lolomãhi viavo vokuenda kuolosãi 42.+ 3 Olombangi viange vivali ndi ka vi lingisa okuti, vimba owanji vokuenda kueci ci soka 1.260 koloneke loku wala ovikelẽyi.” 4 Ovio vi lomboloka oviti vivali violiveira,+ loviyekelo vivali violondiyelo+ kuenda vi tãi kovaso a Ñala yo kilu lieve.+

5 Nda umue o yongola oku vi linga eci cĩvi, kovimẽla viavio ku tunda ondalu kuenje yi lia ovanyãli vavo. Nda umue o yongola oku vi linga eci cĩvi, o sukila oku pondiwa lonjila eyi. 6 Ovio vi kuete omoko yoku yika ilu+ okuti, ombela ka yi loki+ vokuenda kuoloneke ovio vimba owanji, vi kuetevo omoko yoku pongolola ovava oco a linge osonde+ kuenda olonjanja viosi eci vi panga, vi veta ilu lieve lafengi osi.

7 Eci ovio vi mala oku imba uvangi, ocinyama ca tema cina ci tunda vekungu ci ka linga uyaki lavo kuenje ci va yula loku va ponda.+ 8 Ovivimbi viavo vi ka kala vokololo ya velapo yolupale lunene okuti, konepa yespiritu lu tukuiwa Sodoma kuenda Egito, muna Ñala yavo a pondiwilavo kuti. 9 Vokuenda kuoloneke vitatu lomeyu,+ omanu, lovikoti, lalimi kuenda olofeka, va ka vanja kovivimbi viaco kuenje ka va ka ecelela okuti ovivimbi viaco vi langekiwa veyambo limue. 10 Ava va tunga kilu lieve va yolela loku sanjukila oku fa kuavo kuenda va ka li tumisa olombanjaile omunu lukuavo, momo ovaprofeto vaco vavali va enda oku talisa ohali vana va tunga kilu lieve.

11 Noke yoloneke vitatu lomeyu, Suku wa va pindula kavali kavo*+ kuenje va talama kuenda vana va va mola va kala lusumba walua. 12 Kuenje va yeva ondaka ya tunda kilu ya popia lavo lolukandi yiti: “Lamaneli kulo.” Yu va londa kilu valende kuenda ovanyãli vavo va va mola.* 13 Kelivala liaco, kua pita ocilemawe cinene kuenje onepa yekũi yolupale ya kupuka; kuenda ci soka 7.000 komanu va pondiwa locilemawe, puãi vakuavo va kala lusumba kuenje va eca esivayo ku Suku yo kilu.

14 Ocitangi cavali+ ca pita. Tala! Ocitangi catatu ci kasi oku iya lonjanga.

15 Ungelo wepanduvali wa sika olumbeta luaye.+ Kuenje kilu kua yevala olondaka violukandi via popia viti: “Usoma woluali wa linga Usoma wa Ñala yetu+ kuenda wa Kristu yaye+ kuenje eye o ka viala ndosoma otembo ka yi pui.”+

16 Kuenje 24 kakulu+ vana va tumãlele kovaso a Suku kovialo viavo, va petamisa ovipala viavo loku fendela Suku, 17 vati: “Tu ku pandula a Yehova* Suku, Ukuonene Wosi, una o kasi,+ haive wa kala ale, omo wa kuata unene wove walua povaka ove kuenje wa fetika oku viala ndosoma.+ 18 Pole, olofeka via tema kuenda onyeño yove muẽle yeya kuenje ya pitĩlapo otembo yoku sombisa vana va fa, loku eca onima+ kapika vove ovaprofeto,+ lolosandu, la vana va sumbila onduko yove, ava vatito lava vanene kuenda oku kundula vana va vĩhisa* ilu lieve.”+

19 Noke ocitumãlo ci kola conembele ya Suku kilu ca yikuiwa kuenje ocikasia cocisila caye ca muiwa kocitumãlo caye ci kola conembele.+ Kua kala oviliakulo, lolondaka, lovilemĩlo, locilemawe kuenda ociwe calua.

12 Kuenje kua muiwa ondimbukiso yimue yinene kilu: Ukãi umue+ wa walele ekumbi kuenda osãi ya kala vemẽhi liolomãhi viaye kuenje kutue waye kua kala ekolowa li kuete 12 kolombungululu, 2 eye wa kala omisi. Kuenje wa kala oku lila omo lievalo kuenda olongembia viaye vioku cita.

3 Kua molẽha ondimbukiso yikuavo kilu. Tala! Ocinyõha cinene+ cevala liondalu ci kuete ovitue epanduvali, lolombinga ekũi kuenda kovitue viayo kua kala epanduvali kakolowa;* 4 kuenda ucĩla wayo wa komba onepa yatatu yolombungululu+ vio kilu kuenje wa vimba kilu lieve.+ Ocinyõha caco camamako oku talama kovaso yukãi+ wa pandele oku cita oco okuti, eci ukãi a cita, ci lia omõlaye.

5 Kuenje ukãi wa cita omõla umue ulume,+ una wa laikele oku songuila olofeka viosi lombueti yutale.+ Noke omõlaye vocipikipiki wambatiwa* ku Suku kuenda kocalo caye. 6 Ukãi wa tilila vekalasoko, muna eye a kuete ocitumãlo cimue ca pongiyiwa la Suku, oco a tekuiwe vokuenda kueci ci soka 1.260 koloneke.+

7 Kuenje kilu kueya uyaki: Mingeli*+ lovangelo vaye va liyaka locinyõha kuenda ocinyõha lovangelo vaye va yakavo, 8 pole, va yuliwa* kuenje kilu ka kua kaile vali ocitumãlo cavo. 9 Omo liaco, ocinyõha cinene+ ca imbiwa posi okuti, onyõha yosiahũlu+ yi tukuiwa Eliapu+ haeye Satana,+ una o kasi oku yapuisa ilu lieve liosi;+ eye wa imbiwa kilu lieve+ kuenda ovangelo vaye va imbiwa kumue laye posi. 10 Nda yeva ondaka yimue yolukandi kilu yiti:

“Cilo kua situluiwa epopelo,+ lunene kuenda Usoma wa Suku yetu,+ lomoko ya Kristu yaye, momo ukuakulundila vamanjetu wa imbiwa posi, una o va lundaila utanya luteke kovaso a Suku yetu!+ 11 Kuenje ovo vo yula+ omo liosonde ya Kameme+ kuenda omo liondaka yuvangi wavo,+ ovo ka va solele ovimuenyo viavo+ kuenje ka va kuatele usumba woku fa. 12 Omo liaco, yoleli ene availu lene wa tungimo! Ove a ilu lieve, lokalunga, ngongo yene,+ momo Eliapu lia lokila kokuene lonyeño yalua, omo lia kũlĩha okuti, li kuete otembo yitito.”+

13 Eci ocinyõha ca limbuka okuti ca imbiwa kilu lieve,+ ca lambalala ukãi,+ una wa cita omõla ulume. 14 Pole, avava avali ongonga yinene+ a eciwa kukãi oco a palãlele vekalasoko kocitumãlo caye, kuna eye a laikele oku tekuiwila vokuenda kuotembo yimue, olotembo kuenda omeyu yotembo*+ ocipãla locipala conyõha.+

15 Onyõha lomẽla wayo ya pamba ovava ndolui konyima yukãi oco yu kokele oku vomba volui. 16 Pole, osi yeya oco yi kuatise ukãi, yu osi yasama omẽla wayo kuenje ya ina olui luna ocinyõha ca pamba. 17 Omo liaco, ocinyõha ca tema lukãi kuenje ca enda oco ci linge uyaki locitumbulukila* caye+ ca supapo, vana va siata oku pokola kovihandeleko via Suku, haivo va kuete upange woku imba uvangi watiamẽla ku Yesu.+

13 Kuenje oco* ca talama veseke liokalunga.

Noke nda mola ocinyama ca tema+ ca kala oku tunda vokalunga,+ ci kuete olombinga ekũi, lovitue epanduvali kuenda kolombinga viaco kua kala ekũi kakolowa,* pole, kovitue viaco kua sonehiwa olonduko vioku popia Suku atonãi. 2 Ocinyama ca tema nda mola, ca kala ndongue, pole, olomãhi viaco via kala ndolomãhi vio ursu, omẽla waco wa kala ndomẽla wohosi. Ocinyõha+ ca eca unene kocinyama ca tema kuenda ca ecavo ocalo cayo kuenda omoko yinene.+

3 Nda mola okuti umue pokati kovitue viaco wa molẽhele ndu okuti, wa lemẽhiwa calua,+ pole, epute liaco li ponda, lia sakuiwa kuenje ilu lieve liosi lia kuama ocinyama ca tema loku komõha. 4 Kuenje omanu va fendela ocinyõha, momo ca eca omoko kocinyama ca tema kuenda va fendela ocinyama ca tema lolondaka viokuti: “Helie wa lisoka locinyama ca tema kuenda helie o tẽla oku yaka laco?” 5 Ocinyama ca tema ca tambula omoko yoku vangula lepela kuenda atonãi kuenje oco ca tambula omoko vokuenda kueci ci soka 42 kolosãi.+ 6 Oco, ca yikula omẽla poku popia Suku atonãi+ oco ci popie onduko yaye etonãi, locitumãlo caye kumue la vana va tunga kilu.+ 7 Ocinyama ca tema ca tambula evelo lioku linga uyaki lolosandu loku vi yula,+ ca tambulavo omoko yoku viala ovikoti viosi, lomanu, lalimi kuenda olofeka. 8 Kuenje vosi va tunga kilu lieve va ka ci fendela. Tunde koku sevetiwa kuoluali, layimue pokati kolonduko viavo via sonehiwa vociña comuenyo+ ca Kameme, una wa pondiwa.+

9 Nda umue o kuete ovatũi, a yevelele.+ 10 Nda umue wa tukuiwila umandekua, eye o ka enda kumandekua. Una o ponda ukuavo losipata,* o sukila oku pondiwa losipata.+ Omo liaco, olosandu+ vi sukila oku pandikisa+ loku kuata ekolelo.+

11 Noke nda mola ocinyama cikuavo ca tema ca kala oku tunda kilu lieve, ca kala lolombinga vivali via setahãla olombinga viokameme, pole, ca fetika oku vangula ndocinyõha.+ 12 Oco ci kuete omoko yosi yocinyama catete ca tema+ kovaso aco. Ci kokisa ilu lieve, lomanu vosi va tungamo oku fendela ocinyama catete ca tema, cina ca kaile lepute li ponda okuti lia sakuiwa.+ 13 Kuenje ci lingainga olondimbukiso vinene, loku lingisa okuti ondalu yi tunda kilu oco yi lokele posi kovaso yomanu.

14 Ocinyama ca tema ci yapuisa vana va tunga kilu lieve, omo liomoko ca tambula yoku lingila olondimbukiso kovaso yocinyama catete ca tema, osimbu oco ci sapuila vana va tunga kilu lieve oco va linge ociñumañuma+ cocinyama catete ca tema, cina ca lemẽhiwa losipata, pole, haimo ca kala lomuenyo.+ 15 Kuenje ocinyama cavali ca tema ca tambula omoko yoku eca omuenyo* kociñumañuma cocinyama catete ca tema. Omo liaco, ociñumañuma cocinyama ca tema ca ponduile oku vangula loku eca ocihandeleko oco ku pondiwe vosi vana va likala oku ci fendela.

16 Oco, ci kisika omanu vosi okuti, vava vanene lava vatito, olohuasi lolohukũi, ava va yovoka, lapika okuti va kapiwa ondimbukiso peka liondio ale kovipolo viavo,+ 17 okuti lomue o pondola oku landa, ale oku landisa te una o kuete ondimbukiso okuti, onduko+ yocinyama ca tema ale etendelo lionduko yaco.+ 18 Momo olondunge evi vi sukiliwa okuti: Una o kuete olondunge a kũlĩhĩse etendelo liocinyama ca tema, momo etendelo liaco, liomunu kuenje etendelo liaco lieli, 666.+

14 Noke nda mola Kameme+ o tãi Komunda Siono+ kumue 144.000+ vana okuti, kovipolo viavo kua sonehiwa onduko yaye londuko ya Isiaye.+ 2 Nda yeva ocileñi ca tunda kilu ca kala ndocileñi covava alua kuenda ndocileñi cocilemĩlo cinene; kuenje ocileñi nda yeva ca kala ndolonjimbi vi kasi oku sika olohalupa viavo poku imba. 3 Ovo va kasi loku imba ocisungo cimue ci molẽha ndu okuti ocisungo cokaliye+ kovaso yocalo lo kovaso yoviluvo vikuãla vi kasi lomuenyo,+ lo kovaso yakulu+ kuenda lomue wa tẽla oku lilongisa ocisungo caco, te lika 144.000,+ vana Suku a landa kilu lieve. 4 Ovo, ovo vana ka va li vĩhisile lakãi; momo va kasi ndakuenje lafeko vosombo.+ Ovo vana va kasi oku kuama Kameme kuosi a enda.+ Va landiwa+ pokati komanu ndapako atete+ ku Suku kuenda ku Kameme, 5 kovimẽla viavo ka kua sangiwile elimbi; kuenda va pua eko.+

6 Kuenje nda mola ungelo ukuavo wa kala oku palãlela vokati kilu, wambata olondaka viwa viotembo ka yi pui kuava va tunga kilu lieve okuti, kolofeka viosi, kovikoti viosi, kalimi osi kuenda komanu vosi.+ 7 Eye wa kala oku kaluka lolukandi hati: “Sumbili Suku, u wĩhi ulamba, momo owola yaye yoku sombisa ya pitĩla+ kuenje fendeli Una wa lulika ilu, osi, okalunga+ kuenda olono viovava.”

8 Ungelo ukuavo wavali wa kuamamo, wa popia hati: “O Bavulono Yinene ya kupuka!+ Oyo ya kupuka,+ yina ya siata oku kokisa olofeka viosi oku nyua ovinyu yoloñeyi* vievĩho liukahonga waye!”*+

9 Ungelo ukuavo watatu wa va kuama, wa popia lolukandi hati: “Nda umue o fendela ocinyama ca tema+ lociñumañuma caco kuenje o kapiwa ondimbukiso pupolo, pamue peka liaye,+ 10 eye o ka nyuavo kovinyu ka ya tengiwile yonyeño ya Suku okuti, ya pesiwa vokopo yonyeño Yaye+ kuenje o ka talisiwa ohali londalu kuenda lowisi+ u ponda kovaso yovangelo va kola lo kovaso ya Kameme. 11 Owisi woku talisiwa kuavo ohali ku londa otembo ka yi pui kuenda ovo+ ka va ka kuata epuyuko utanya luteke okuti, vana va fendela ocinyama ca tema lociñumañuma caco haivo va kapiwa ondimbukiso londuko yaco.+ 12 Olosandu vi sukila oku pandikisa+ okuti, vana va siata oku lava ovihandeleko via Suku, haivo va kakatela kekolelo+ lia Yesu.”

13 Kuenje nda yeva ondaka ya tunda kilu yiti, “Soneha: Va sumũlũha vana va fila vomunga kumue la Ñala+ oku upisa cilo toke kovaso. Ocili, espiritu sandu li popia liti, va puyuke kovopange avo, momo ovina va linga vi va kuama.”*

14 Noke nda mola elende limue li yela kuenje kelende liaco, kua tumãla umue wa setahãla omõla omunu+ okuti, wa wala ekolowa liulu kutue waye kuenda peka liaye wa kuata omĩla ya tua.

15 Ungelo ukuavo wa tunda kocitumãlo ci kola conembele kuenje wa vilikiya lolukandi una wa tumãla kelende hati: “Imba omĩla yove kilu lieve kuenda ungula, momo owola yoku ungula ya pitĩla, olomema vio kilu lieve via yela ciwa.”+ 16 Una wa tumãla kelende wa imba omĩla yaye kilu lieve kuenje ilu lieve lionguiwa.

17 Handi vali, ungelo ukuavo wa tunda kocitumãlo ci kola conembele yi kasi kilu kuenje wa kuatelevo omĩla yimue ya tua.

18 Handi vali, ungelo ukuavo wa tundavo kutala kuenda wa kala lomoko yoku viala ondalu. Kuenje wa vilikiya lolukandi una wa kala lomĩla ya tua hati: “Imba omĩla yove ya tua kuenje ongolola ovisiakata viayuva o kilu lieve, momo ayuva aco a pia.”+ 19 Ungelo wa imba omĩla yaye kilu lieve kuenje wongolola ayuva o kilu lieve, yu wa a kapa vocikoselo cinene conyeño ya Suku.+ 20 Ocikoselo caco ca kosiwila kosamua yolupale kuenda vocikoselo mua tunda osonde yi pitĩla toke vololelia violokavalu, vocinãla ci soka 1.600 kovila violomapalo.*

15 Kuenje nda mola ondimbukiso yikuavo kilu okuti, yinene haiyo yi komõhisa, ovangelo epanduvali+ lafengi epanduvali. Afengi aco o-o a sulako, momo mekonda liao, onyeño ya Suku yi tẽlisiwa.+

2 Nda mola cimue ca setahãla okalunga kovitulu+ ka tengiwa londalu, kuenje vana va yula+ ocinyama ca tema lociñumañuma caco,+ letendelo lionduko yaco,+ va talama ocipepi lokalunga kovitulu kuenda va kuata olohalupa via Suku. 3 Ovo va kala oku imba ocisungo ca Mose+ upika wa Suku, locisungo ca Kameme+ vati:

“A Yehova,* Suku Ukuonene Wosi,+ ovilinga viove vinene haivio vi komõhisa.+ Olonjila viove viesunga haivio viocili,+ a Soma yonahũlũlua.+ 4 A Yehova,* helie o likala oku ku sumbila loku sivaya onduko yove? Momo ove lika ukuacili!+ Olofeka viosi vi keya oku ku fendela,+ omo okuti oku tetulula kuove kuesunga kua situluiwa.”

5 Noke yovina evi, nda mola okuti ocitumãlo ci kola combalaka yuvangi+ ca yikuiwa kilu,+ 6 kuenje ovangelo epanduvali lafengi epanduvali+ va tunda vocitumãlo ci kola conembele, va wala uwalo u yela haiwo u nina wovalatanya kuenda va litika volonulo viavo luvia wulu. 7 Umue pokati koviluvo vikuãla vi kasi lomuenyo, wa eca kovangelo epanduvali atiyela epanduvali wulu eyuka onyeño ya Suku,+ una o kasi lomuenyo otembo ka yi pui. 8 Kuenje ocitumãlo ci kola ceyuka lowisi omo liulamba wa Suku+ kuenda omo liunene waye, lomue wa tẽla oku iñila vocitumãlo ci kola, toke eci afengi epanduvali+ ovangelo epanduvali a pita.

16 Kuenje nda yeva ondaka yimue yolukandi ya tunda kocitumãlo ci kola+ ya sapuila ovangelo epanduvali yiti: “Kuendi, ka peseli atiyela epanduvali onyeño ya Suku kilu lieve.”+

2 Watete wa enda kuenje wa pesila etiyela liaye kilu lieve.+ Noke kueya apute ãvi hao a vĩha+ komanu va kuatele ondimbukiso yocinyama ca tema,+ haivo va kala oku fendela ociñumañuma caco.+

3 Wavali wa pesila etiyela liaye vokalunga.+ Kuenje okalunga ka pongoloka osonde+ ndeyi yomunu wa fa kuenda oviluvo viosi vi kasi lomuenyo via fa, ocili, ovina vi kasi vokalunga.+

4 Watatu wa pesila etiyela liaye volondui lo volono viovava.+ Kuenje ovio via pongoloka osonde.+ 5 Nda yeva ungelo wovava wa popia hati: “Ove Una o kasi, haive wa kala ale,+ wa Kolelua+ kuenda ukuesunga, momo wa sokiya asombiso a-a,+ 6 momo ovo va pesela osonde yolosandu, leyi yovaprofeto+ kuenda wa va ĩha osonde oco va nyue;+ eci oco ci va sesamẽla.”+ 7 Nda yeva utala wa popia hati: “Ocili, a Yehova* Suku, Ukuonene Wosi,+ asombiso ove ocili kuenda esunga.”+

8 Wakuãla wa pesila etiyela liaye vekumbi+ kuenje ekumbi lia tambula omoko yoku kakula omanu londalu. 9 Kuenje omanu va kakuiwa lowuya walua, pole, ovo va popia etonãi onduko ya Suku, una o kuete omoko yafengi aco kuenda ka va likekembelele loku eca ulamba kokuaye.

10 Watãlo wa pesila etiyela liaye kocalo cocinyama ca tema. Kuenje kusoma waco kueya owelema+ kuenda omanu va fetika oku li lumana kalimi omo liolongembia viavo, 11 pole, ovo va popia etonãi Suku yo kilu omo liolongembia viavo kuenda apute avo kuenje ka va likekembelele kovilinga viavo.

12 Ungelo wepandu wa pesila etiyela liaye volui lunene Ferati+ kuenje ovava aluo a takata+ oco ku pongiyiwe onjila yolosoma+ vio kutundilo wekumbi.*

13 Kuenje nda mola asapulo atatu a vĩha* a setahãla ovinonga okuti a tunda vomẽla wocinyõha,+ lo vomẽla wocinyama ca tema kuenda vomẽla wuprofeto wesanda. 14 Asapulo aco a tunda kolondele kuenje olosoma vio kilu lieve liosi vi yeva asapulo aco. Asapulo aco a lingainga olondimbukiso+ oco olosoma vi ongoluiwile uyaki+ okuti, u ka pita keteke linene lia Suku Ukuonene Wosi.+

15 “Tala! Njiya ndocimunu.+ Wa sumũlũha una o lavulula+ kuenda o lava uwalo waye okuti, ka endi epõlõla kuenje omanu va vanja kosõi yaye.”+

16 Kuenje asapulo a vĩha ongoluila olosoma pamosi pocitumãlo okuti kelimi lio Heveru ci tukuiwa Harmagedo.*+

17 Wepanduvali wa pesila etiyela liaye vofela. Kuenje kua yevala ondaka yimue yolukandi ya tunda kocitumãlo ci kola+ tunde kocalo yiti: “Ca tẽlisiwa!” 18 Kua kala oviliakulo, lolondaka, lovilemĩlo kuenda ocilemawe cinene okuti ca litepa levi via pita ale tunde eci omanu va lulikiwa palo posi,+ ocilemawe caco ci komõhisa haico ca kala cinene. 19 Olupale lunene+ lua tepiwa volonepa vitatu kuenda alupale olofeka a kupuka; kuenje Suku wa ivaluka o Bavulono Yinene,+ oco yi tambule okopo yovinyu yonyeño yaye.+ 20 Handi vali, ovifuka viosi via imũha kuenda olomunda ka via molẽhele vali.+ 21 Noke kilu kua tunda ovawe anene ociwe a kupukila komanu+ kuenje ewe lewe oku lema kualio kua soka lotalendo yimosi* kuenda omanu va popia Suku atonãi omo liefengi liociwe,+ momo efengi liaco lia kala linene calua.

17 Umue pokati kovangelo epanduvali okuti va kala latiyela epanduvali+ weya kuenda wa ndi sapuila hati: “Enju, oco hu lekise esombiso liocipuepue cinene ca tumãla kovava alua,+ 2 cina olosoma vio kilu lieve via linga laco evĩho liukahonga*+ kuenda olonungi vio kilu lieve via kolua lovinyu yevĩho liukahonga* waye.”+

3 Noke eye wa ngambata vunene wespiritu vekalasoko. Kuenje nda mola ukãi umue wa tumãla kocinyama ca tema ci kusuka nge okuti, ceyuka olonduko vioku popia Suku atonãi kuenda ca kuata ovitue epanduvali, lolombinga ekũi. 4 Ukãi wa walele uwalo wohusu+ lowu u kusuka kuenda wa liposuisa lulu, lovawe a tĩla, lomota yondongo+ kuenje peka liaye wa kuata okopo yulu yeyuka ovina vi linga onyanya lovina via liña vievĩho liukahonga* waye. 5 Pupolo waye pa sonehiwa onduko yimue yelumbu yokuti: “Bavulono Yinene, ina yovipuepue,+ lovina vi lingisa onyanya vio kilu lieve.”+ 6 Kuenje nda mola okuti ukãi wa kolua losonde yolosandu kuenda osonde yolombangi via Yesu.+

Ocili, eci ndo mola nda komõha calua. 7 Omo liaco, ungelo wa ndi sapuila hati: “Momo lie wa komõhela? Hu sapuila elumbu liukãi+ kuenda liocinyama ca tema kuna ukãi a tumãla okuti, ci kuete ovitue epanduvali lolombinga ekũi:+ 8 Ocinyama ca tema wa mola ca kaile, pole, ka ci kasiko vali kuenda handi ci laika oku tunda vekungu+ kuenje cenda kenyõleho. Noke olonungi vio kilu lieve vina okuti, tunde koku sevetiwa kuoluali olonduko viavo ka via sonehiwile vociña comuenyo,+ vi ka komõha eci vi mola ndomo ocinyama ca tema ca kaile, pole, ka ci kasiko vali kuenda handi haiko ci ka kala.

9 “Omunu o sukila oku kuata olondunge oco a kuate elomboloko liaco: Ovitue epanduvali+ vi lomboloka olomunda epanduvali, kuna ukãi a tumãla kilu liavio. 10 Kuli olosoma epanduvali: Vitãlo via kupuka, yimosi yi kasi, yikuavo handi ka yeyile; pole, eci yiya, yi kala ño okatembo kamue. 11 Ocinyama ca tema okuti ca kaile, pole, ka ci kasiko vali,+ ci lombolokavo osoma yecelãla, pole, yi tunda pokati kolosoma epanduvali kuenda yi loña kenyõleho.

12 “Olombinga ekũi wa mola vi lomboloka olosoma ekũi okuti, ka via tambuile handi usoma, pole, vi tambula omoko yoku viala ndolosoma vokuenda kuowola yimosi kumue locinyama ca tema. 13 Ovio vi kuete ocisimĩlo cimuamue kuenje vi eca unene kuenda omoko yavo kocinyama ca tema. 14 Ovio vi ka linga uyaki la Kameme,+ puãi omo okuti eye Ñala yoloñala haeye Soma yolosoma,+ Kameme o ka vi yula.+ Pole, vana va kasi laye okuti, va kovongiwa kuenda va nõliwa, haivo vakuekolelo, va ka yulavo.”+

15 Eye wa ndi sapuila hati: “Ovava wa mola, kuna ocipuepue ca tumãla, a lomboloka omanu lowiñi, lolofeka kuenda alimi.+ 16 Olombinga ekũi+ wa mola kuenda ocinyama ca tema,+ vi ka suvuka ocipuepue+ loku ci kokela ekundu kuenda oku ci sia epõlõla kuenje ovio vi ka lia ositu yaco loku ci yoka elisi vondalu.+ 17 Momo Suku wa kapa vovitima viavo oku tẽlisa ocisimĩlo caye,+ ocili, oku tẽlisa ocisimĩlo cavo cimuamue poku eca usoma wavo kocinyama ca tema,+ toke eci olondaka via Suku vi ka tẽlisiwa. 18 Kuenje ukãi+ una wa mola, o lomboloka olupale lunene lu kuete usoma umue u viala olosoma vio kilu lieve.”

18 Noke yovina evi, nda mola ungelo ukuavo wa kala oku tunda kilu lunene walua kuenda ulamba waye wa tuila ilu lieve. 2 Kuenje wa kaluka lolukandi hati: “O Bavulono Yinene ya kupuka!+ Oyo ya kupuka, ya linga ocitumãlo colondele, locitumãlo caspiritu osi ãvi,* kuenda alungi olonjila viosi via vĩha haivio via suvukiwa!+ 3 Momo omo liovinyu yoloñeyi* vievĩho liukahonga wayo,* olofeka viosi via yapuisiwa kuenje via kupuka,+ lolosoma vio kilu lieve via linga layo evĩho liukahonga+ kuenda vakualomĩlu* vo kilu lieve va linga olohuasi omo liunene welau walio.”

4 Kuenje nda yeva ondaka yikuavo ya tunda kilu yiti: “Amanu vange,+ tundimo, nda ka vu yongola oku litenga vakandu aye kuenda nda ka vu yongola oku tambula amue pokati kafengi ayo.+ 5 Momo akandu ayo a li lundaika toke kilu+ kuenda Suku wa ivaluka ovilinga viayo vĩvi.*+ 6 U fetuluinyi ndeci a linga la vakuavo,+ ocili, u fetuluinyi luvali ovina a lingainga;+ vokopo+ eye a pongiya, u yi pongiyili luvali.+ 7 Omo okuti eye o lipandiya kuenda o kuete ovokuasi ana okuti ka kuete osõi yoku a kuata, eye o sukila oku tala ohali loku lisiõsiõla. Momo eye o popia lutima waye hati: ‘Nda tumãla ndonasoma, si cimbumbako kuenda lalimue eteke ndi lisiõsiõla.’+ 8 Eli olio esunga lieci afengi aye eyilila veteke limosi, oku fa, loku lisiõsiõla kuenda onjala kuenje eye o yokiwa elisi londalu,+ momo Yehova* Suku, una u sombisa wa pama.+

9 “Olosoma vio kilu lieve vina via linga laye evĩho liukahonga* haivio via lia laye elau, vi ko lila loku litetela omo liesumuo eci vi mola owisi woku pia kualio. 10 Ovio vi ka talama ocipãla omo liusumba wohali yaye loku popia viti: ‘Avoyo we, avoyo we, olupale lunene we,+ a Bavulono olupale lua pama, momo esombiso liove lia pitĩla vowola yimosi!’

11 “Handi vali, vakualomĩlu vo kilu lieve, vo lilavo loku lisiõsiõla, momo ka kuli vali umue o landa ovina viosi ovo va nena oco va vi landise, 12 ovina viulu, viopalata, ovawe a tĩla, olomota viondongo, olonanga viovalatanya, uwalo wohusu, woseda, uwalo u kusuka; lovina viosi via pangiwa levaya li kuete elemba liwa; lovikuata viosi via pangiwa lombinga yonjamba, levi via pangiwa lavaya a tĩla, losipi, lutale kuenda lewe li sielena; 13 lokanela, losimbolua, insensu, ulela welemba liwa, onguendu, lovinyu, lulela woliveira, losema ya fina, lotiliku, lolongombe, lolomeme, olokavalu, akãlu, apika kuenda ovimuenyo viomanu. 14 Ocili, ovina viwa wa livela, havioveko vali kuenda ovilia viosi vi pepa lovina via posoka, via takata kuenje lalimue eteke vi ka sangiwa vali.

15 “Vakualomĩlu vana va landisa ovina viaco, haivo va linga olohuasi mekonda liaye, va ka talama ocipãla omo liusumba weyambulo liaye kuenda va ka lila loku lisiõsiõla, 16 vati: ‘Avoyo we, avoyo we, olupale lunene we, lua walele onanga yovalatanya, yohusu, leyi yi kusuka kuenda wa li mianguluile lovina viulu vioku li posuisa, lovawe a tĩla kuenda olomota viondongo,+ 17 momo ovokuasi aco alua, a nyõleha vowola yimosi!’

“Kuenje kesongo wosi wonaviyu, la wosi endelamo, lakuenje vonaviyu kuenda vosi vakuanganyu yo vokalunga, va talama ocipãla 18 kuenda va kaluka lolukandi osimbu va luluvala kowisi u tunda koku pia kualuo, vati: ‘Olupale lupi lua li soka lolupale lunene?’ 19 Ovo va imba oneketela kovitue viavo loku kaluka, loku lila, loku lisiõsiõla, vati: ‘Avoyo we, avoyo we, olupale lunene we, muna omanu vosi va kuatele olonaviyu vokalunga va linga olohuasi omo liukuasi waluo, momo ekundu lialuo lieya vowola yimosi!’+

20 “Ove a ilu,+ lene alosandu,+ lene avapostolo, lene avaprofeto, sanjuki, momo mekonda liene Suku wo sombisa!”+

21 Kuenje ungelo umue wa pama wa tikula ewe lia soka lewe linene liombambo kuenje wa limba vokalunga, yu wa popia hati: “Haico o Bavulono Yinene yi ka imbiwa posi longusu yalua kuenje lalimue eteke yi ka sangiwa vali.+ 22 Ocileñi ca vakuakusika olohalupa viavo, lolonjimbi, la vakuakusika olombendo kuenda olumbeta, lalimue eteke ci ka yeviwa vali vo Bavulono. Ka mu ka sangiwa vali omesele layimue yi linga upange wumesele kuenda lacimue ocileñi cewe liombambo ci ka yeviwa vokuayo. 23 Layimue ondiyelo yi ka mĩhiwa vali vokuayo, ndaño ondaka ya sandombua ale ya ndombua ka yi ka yeviwa vali vokuayo; momo vakualomĩlu vayo va kala omanu va kemãla kilu lieve kuenda vakualofeka viosi va yapuisiwa omo liumbanda wayo.+ 24 Ocili, vokuayo mua sangiwa osonde yovaprofeto, yolosandu+ kuenda yomanu vosi va pondiwa kilu lieve.”+

19 Noke yovina evi, nda yeva cimue ca soka londaka yolukandi yowiñi walua kilu. Owo wa popia hati: “Sivayi Yehova!*+ Epopelo, lulamba kuenda unene, via tiamẽla ku Suku yetu, 2 momo asombiso aye ocili kuenda esunga.+ Momo eye wa sombisa ocipuepue cinene cina ca yapuisa ilu lieve levĩho liukahonga* waye kuenda wa fetuluinya osonde yapika vaye yina eye a pesela lovaka aye.+ 3 Vepuluvi liaco, owo wa popia onjanja yavali hati: “Sivayi Yehova!*+ Kuenje owisi wo Bavulono u londa otembo ka yi pui.”+

4 Kuenje 24 kakulu+ kumue loviluvo vikuãla vi kasi lomuenyo,+ va kekama loku fendela Suku, una wa tumãla kocalo loku popia vati: “Amene! Sivayi Yehova!”*+

5 Kocalo kua tundavo ondaka yimue yiti: “Sivayi Suku yetu, ene vosi wapika vaye+ wo sumbili, ava vatito lava vanene.”+

6 Kuenje nda yeva ocileñi ca kala ndondaka yowiñi walua kuenda ndocileñi covava alua, ndocileñi covilemĩlo vialua. Ovo va popia vati: “Sivayi Yehova,*+ momo Yehova* Suku yetu, Ukuonene Wosi,+ wa fetika oku viala ndosoma!+ 7 Tu yoleli kuenda tu sanjuki calua, loku u wĩha ulamba, momo uvala wa Kameme wa pitĩla kuenda ukãi waye wa li pongiya ale. 8 Ocili, ukãi vo wecelela oku wala uwalo u nina, u yela, onanga yovalatanya—momo onanga yovalatanya yi lomboloka ovilinga viesunga violosandu.”+

9 Kuenje eye wa ndi sapuila hati, “Soneha: Va sumũlũha vana va lalekiwa kondalelo yuvala wa Kameme.”+ Wa ndi sapuilavo hati: “Olondaka evi via Suku, viocili.” 10 Noke, nda kekamẽla kolomãhi viaye oku u fendela. Pole, eye wa ndi sapuila hati: “Kuata utate! Ku ka ci linge!+ Ame ndupika ndeci ove kuenda ndeci vamanjove vana va kuete ocikele coku eca uvangi watiamẽla ku Yesu.+ Fendela Suku!+ Momo ovitumasuku vi kuete ocimãho coku sapula ocili catiamẽla ku Yesu.”+

11 Nda mola ilu lia yuluka kuenje kua kala okavalu ka yela!+ Una wa tumãlako o tukuiwa Kolelua+ kuenda Ukuacili+ kuenje o sombisa loku linga uyaki lesunga.+ 12 Ovaso aye ulienge wondalu+ kuenda kutue waye kuli akolowa alua.* O kuete onduko ya sonehiwa okuti lomue wa yi kũlĩha, te lika eye, 13 wa wala uwalo u kuete atota* osonde kuenda eye o tukuiwa londuko yokuti, Ondaka+ ya Suku. 14 Handi vali, olohoka vio kilu via kala oku u kuama lolokavalu vi yela, haivio via wala uwalo u yela, wa yelisiwa haiwo wovalatanya. 15 Vomẽla waye mua tunda osipata ya tua haiyo ya lepa+ okuti, o nyõla layo olofeka kuenda o ka vi songuila lombueti yutale.+ Handi vali, eye o kosa ocikoselo conyeño yalua ya Suku Ukuonene Wosi.+ 16 Kuwalo waye, ocili, kocikalo caye, kuli onduko yimue ya sonehiwa okuti, Soma yolosoma kuenda Ñala yoloñala.+

17 Nda molavo ungelo umue wa talama vekumbi, wa kaluka lolukandi kuenda wa sapuila olonjila viosi vi palãla vokati kilu hati: “Enjui kulo, liongoluili pamosi kondalelo yinene ya Suku,+ 18 oco vu li ositu yolosoma, lositu ya vakesongo kolohoka, lositu yalume va pama,+ lositu yolokavalu leyi yava va endelako,+ lositu ya vosi okuti, yomanu va yovoka, yapika, yava vatito lava vanene.”

19 Kuenje nda mola ocinyama ca tema kuenda olosoma vio kilu lieve kumue lolohoka viavo okuti, via liongoluila oku linga uyaki la una wa tumãla kokavalu kuenda olohoka viaye.+ 20 Ocinyama ca tema, ca kuatiwa kumue luprofeto wesanda,+ una wa lingaile olondimbukiso kovaso yaco, vina a enda oku yapuisa lavio vana va tambula ondimbukiso yocinyama ca tema+ kuenda vana va fendela ociñumañuma caco.+ Osimbu handi va kala lomuenyo, kavali kavo va imbiwa lomuenyo vociva ci taima londalu yi ponda.+ 21 Pole, vakuavo va pondiwa losipata ya lepa ya tunda vomẽla wa una wa tumãla kokavalu.+ Olonjila viosi viekuta lositu yavo.+

20 Kuenje nda mola ungelo umue wa tunda kilu losapi yekungu+ kuenda elienge linene peka. 2 Eye wa kuata ocinyõha, + onyõha yosiahũlu,+ okuti, oyo Eliapu+ haiyo Satana+ kuenje wa ci kuta okuti ci kala kelienge eci ci soka 1.000 yanyamo. 3 Kuenje wa cimba vekungu+ loku yikamo kuenda wa kapamo esitikilo okuti, ka ci yapuisa vali olofeka toke eci 1.000 yanyamo yi sulila. Noke oco ci kutuluiwa vokuenda kuokatembo kamue.+

4 Nda mola ovialo kuenda vana va tumãlako, va tambula omoko yoku sombisa. Ocili, nda mola osonde ya vana va pondiwa* omo lioku imba uvangi watiamẽla ku Yesu, loku lombolola ovina viatiamẽla ku Suku, la vana ka va fendelele ocinyama ca tema pamue ociñumañuma caco, haivo ka va tambuile ondimbukiso pupolo ale povaka avo.+ Kuenje va kuata vali omuenyo kuenda va viala ndolosoma kumue la Kristu+ ci soka 1.000 yanyamo. 5 (Vakuavo va fa,+ ka va tambuile omuenyo toke eci 1.000 yanyamo ya sulila.) Eli olio epinduko liatete.+ 6 Vana va panga onepa kepinduko liatete va sumũlũha haivo va kola;+ momo oku fa kuavali+ ka ku kuete omoko kokuavo,+ pole, va ka linga ovitunda+ via Suku kuenda via Kristu kuenje va ka viala ndolosoma kumue laye vokuenda kueci ci soka 1.000 yanyamo.+

7 Eci 1.000 yanyamo yi sulila, Satana o kopiwa vokayike, 8 kuenje eye o ka tunda oco a yapuise olofeka vi kasi kavindi akuãla o kilu lieve, Goge la Magoge okuti o vongoluila uyaki. Etendelo liaco lia soka leseke lio vokalunga. 9 Ovo va lisanduila kilu lieve liosi kuenda va ñuala ocilombo colosandu lolupale lu soliwe. Pole, kilu kua tunda ondalu kuenje ya va lia.+ 10 Eliapu lina lia enda oku va yapuisa lia imbiwa vociva condalu yi ponda, muna mu kasi ale ocinyama ca tema+ luprofeto wesanda;+ kuenda va ka yambuiwa* utanya luteke otembo ka yi pui.

11 Kuenje nda mola ocalo cinene ci yela kuenda Una wa tumãlako.+ Osi kuenda ilu via tila kovaso aye,+ lapa vi kala ka pa molẽhele. 12 Nda mola ava va fa, ava vanene lava vatito va tãi kovaso yocalo kuenje kua yikuiwa oviña. Pole, ociña cikuavo ca yikuiwa; okuti ociña comuenyo.+ Ava va fa va sombisiwa lovina via sonehiwa voviña ndomo ci likuata lovilinga viavo.+ 13 Kuenje okalunga ka eca ava va fa va kalamo, kufa Lonjembo* va eca ava va fa va kalamo kuenda omunu lomunu wa sombisiwa ndomo ci likuata lovilinga viaye.+ 14 Ku fa kuenda Onjembo* va imbiwa vociva condalu.+ Ociva condalu+ ci lomboloka oku fa kuavali.+ 15 Handi vali, wosi okuti onduko yaye ka ya sonehiwile velivulu liomuenyo,+ wa imbiwa vociva condalu.+

21 Nda mola ilu liokaliye longongo yokaliye;+ ilu liatete longongo yatete via pita+ kuenda okalunga+ ka keko vali. 2 Nda molavo olupale lu kola okuti, o Yerusalãi Yokaliye ya kala oku tunda kilu ku Suku,+ ya lipongiya ndondombua ya liposuisila sandombua.+ 3 Noke nda yeva ondaka yolukandi ya tunda kocalo yiti: “Tala! Ombalaka ya Suku yi kasi lomanu kuenje eye o ka tunga lavo kuenda ovo va ka linga omanu vaye. Kuenje Suku o ka kala lavo.+ 4 Eye o ka puenya asuẽlẽla osi vovaso avo,+ oku fa ka ku ka kalako vali,+ ndaño oku lila loku liyula levalo ka vi ka kalako vali.+ Ovina viatete via pita.”

5 Una wa tumãla kocalo+ wa popia hati: “Tala! Ovina viosi ndi vi lingisa viokaliye.”+ Wa popiavo hati: “Soneha, momo olondaka evi via koleliwa kuenda viocili.” 6 Kuenje wa ndi sapuila hati: “Olondaka viaco via tẽlisiwa! “Ame Alfa kuenda Ômega,* ndifetikilo, haime ndisulilo.+ Wosi o kuete enyona, ndu ko wĩha ocali* ovava omuenyo a tunda pono.+ 7 Wosi o yula, o ka piñala ovina evi kuenje ndi ka linga Suku yaye kuenda eye o ka linga omõlange. 8 Puãi vakuosumba la vana ka va kuete ekolelo,+ la vana va vĩha keliño liavo, lolomondi,+ la vakuevĩho liukahonga,*+ vakuombanda, vakuakufendela oviteka, lolohembi viosi,+ onima yavo yi ka kala oku iñila vociva condalu yi ponda.+ Eci ci lomboloka oku fa kuavali.”+

9 Umue pokati kovangelo epanduvali una wa kuatele atiyela eyukile lafengi epanduvali a sulako+ weya, yu wa ndi sapuila hati: “Enju, hu lekisa ndombua okuti, ukãi wa Kameme.”+ 10 Eye wa ngambata lunene wespiritu komunda yisõvi haiyo yinene kuenje wa ndekisa olupale lu kola okuti, o Yerusalãi ya kala oku tunda kilu ku Suku,+ 11 kuenda ya kuatele ulamba wa Suku.+ Oku nina kuayo kua kala ndewe lia tĩla, ndewe lio jaspe li nina ndovitulu yi yela.+ 12 Olupale luaco, lua kuata ocimbaka cinene haico cisõvi kuenda ca kuata 12 kolombundi kumue leci ci soka 12 kovangelo va kala polombundi kuenje kolombundi kua sonehiwile olonduko viovikoti 12 viomãla va Isareli. 13 Kutundilo kua kala olombundi vitatu, konano olombundi vitatu, kombuelo olombundi vitatu kuenda kutakelo olombundi vitatu.+ 14 Ocimbaka colupale ca kuatelevo 12 koviseveto viovawe kuenda kua sonehiwa 12 kolonduko viovapostolo 12+ va Kameme.

15 U wa kala oku vangula lame, wa kuatele olundeya lulu luoku seteka oco ope oloseteko kolupale, kolombundi vialio lo kocimbaka calio.+ 16 Olupale luaco, lua kuata oloseteko vimuamue kavindi akuãla kuenda usõvi walio loku lepa kualio kunene. Kuenje wopa oseteko kolupale lolundeya okuti, ci soka 12.000 kovila violomapalo;* usõvi walio lupati kuenda oku lepa kualio kua lisokele. 17 Eye wopavo oseteko yocimbaka calio okuti ca soka 144 kovikeya,* ndeci ci seteka omunu haico ungelo a seteka. 18 Ocimbaka ca tungiwa lo jaspe+ kuenda olupale lua tungiwa lulu wa fina lua soka lovitulu yi yela. 19 Oviseveto viocimbaka colupale via posuisiwa lovawe osi a tĩla: ociseveto catete co jaspe, cavali co safira, catatu cewe li ñañala, cakuãla co emeralda, 20 catãlo co sardonika, cepandu co sardiu, cepanduvali cewe lievala liulu, cecelãla cewe lieyavailo, cecea co topasiu, cekũi cewe lieñala, cekũi lamosi cewe li vumbula, cekũi lavali cewe liohusu. 21 Kolombundi vi soka 12 kua kalavo olomota viondongo via soka 12; ombundi lombundi ya pangiwa lomota yimosi yondongo. Okololo yolupale ya kala yulu wa fina u yela calua ndovitulu.

22 Sia muililemo onembele, momo Yehova* Suku Ukuonene Wosi+ kumue la Kameme, ovo onembele yaluo. 23 Kuenje olupale ka lu sukila ekumbi pamue osãi oco vi ninilemo, momo ulamba wa Suku wa tuilamo+ kuenda Kameme eye wa kala ondiyelo yaluo.+ 24 Olofeka vi ka enda omo liocinyi cayo+ kuenda olosoma vio kilu lieve vi ka nena ulamba wavo kokuayo. 25 Olombundi vialuo lalimue eteke vi ka yikiwa kutanya, momo ka ku ka kala vali uteke.+ 26 Ulamba lesivayo violofeka vi ka neniwa kokualio.+ 27 Pole, cosi ca vĩha kuenda wosi o linga eci cumbondo, lelimbi, ka ka iñilamo;+ vana okuti olonduko viavo via sonehiwa vociña comuenyo ca Kameme, ovo lika va ka iñilamo.+

22 Eye wa ndekisa olui lumue luovava omuenyo,+ lua yela ndovitulu, lua tunda kocalo ca Suku kuenda ca Kameme+ 2 kuenje lua pita vokati kokololo ya velapo yolupale. Kolonele vivali violui kuli oviti viomuenyo vima apako olonjanja 12 vunyamo lunyamo, ci lomboloka okuti vima apako alio onjanja yimosi olosãi viosi. Amẽla oviti viaco, o ku sakula olofeka.+

3 Kuenje ka ku ka kala vali esiñalo lalimue. Pole, ocalo ca Suku leci ca Kameme,+ ci ka kala volupale kuenda apika vaye va ko lingila upange u kola; 4 ovo va ka mola ocipala caye+ kuenda onduko yaye yi ka kala povipolo viavo.+ 5 Handi vali, ka ku ka kala vali uteke+ kuenda ovo ka va ka sukila vali ocinyi condiyelo pamue ocinyi cekumbi, momo Yehova* Suku o ka va ĩha ocinyi+ kuenje ovo va ka viala ndolosoma otembo ka yi pui.+

6 Eye wa ndi sapuila hati: “Olondaka evi via koleliwa kuenda viocili;+ ocili, Yehova,* Suku una wa vangula pocakati covaprofeto,+ wa tuma ungelo waye oco a lekise kapika vaye ovina vi sukila oku pita ndopo. 7 Tala! Njiya lonjanga.+ Wa sumũlũha una o pokola kolondaka viocitumasuku cociña eci.”+

8 Ame ndi Yoano, ame una nda kala oku yeva ovina evi loku vi mola. Eci nda vi yeva loku vi mola, nda kekamẽla kolomãhi viungelo wa ndi lekisa ovina viaco oco ndu u fendele. 9 Pole, eye wa ndi sapuila hati: “Kuata utate! Ku ka ci linge! Ame ndupika ndeci ove kuenda ndeci vamanjove ovaprofeto, la vana va pokola kolondaka viociña eci. Fendela Suku.”+

10 Eye wa ndi sapuilavo hati: “Ku ka seleke olondaka viocitumasuku cociña eci, momo otembo ya sokiyiwa yi kasi ocipepi. 11 Ondingaĩvi yamameko oku linga cĩvi, ukuavituwa via liña amameko oku linga ovina via liña; puãi ukuesunga amameko lesunga liaye, u o kola amameko loku kola kuaye.

12 “‘Tala! Njiya lonjanga kuenda onima ngeca yi kasi lame okuti, ndi fetuluinya omunu lomunu ndomo ci likuata lovilinga viaye.+ 13 Ame Alfa kuenda Ômega,*+ ame tete ame nda sulako, efetikilo kuenda esulilo. 14 Va sumũlũha vana va yelisa uwalo wavo wa lepa+ oco va kuate omoko yoku lia kapako oviti viomuenyo,+ loku iñila volupale poku pita polombundi vialuo.+ 15 Olombua* vi kasi kosamua, kumue la vakuombanda, la vakuevĩho liukahonga,* lolomondi, la vakuakufendela oviteka, la vosi va sole oku kemba haivo vakuesanda.’+

16 “‘Ame ndi Yesu, nda tuma ungelo wange oku wimbili uvangi watiamẽla kovina oco vi kuatise akongelo. Ame ndilumbombo, haime ndicitumbulukila ca Daviti+ kuenda ndilumbungululu lu nina luomẽle.”’+

17 Kuenje espiritu sandu la ndombua+ va kasi oku popia vati: “Enju!” una o yeva a popie hati: “Enju!” u o kuete enyona eye;+ wosi o yongola, a tambule ocali ovava omuenyo.+

18 “Ndi sapuila ku vosi va yeva olondaka viocitumasuku cociña eci okuti: Nda umue o vokiya kovina evi,+ Suku o ko vokiyila afengi a sonehiwa vociña eci;+ 19 nda umue o tepulula cimue kolondaka viociña cocitumasuku eci, Suku ka ko wecelela oku tambula ovina viwa via sonehiwa vociña eci. Ci lomboloka okuti, Suku ka ko wecelela oku lia kepako lioviti viomuenyo+ kuenda ka ko wecelela oku iñila volupale lu kola.+

20 “Una imba uvangi wovina evi o popia hati: ‘Ocili, njiya lonjanga.’”+

“Amene! Enju, a Ñala Yesu.”

21 Ohenda ya piãla ya Ñala Yesu, yi kale lolosandu.