UKANDA PAULU A SONEHELA VA EFESO

1 Ame ndi Paulu ndupostolo wa Kristu Yesu locipango ca Suku, ndi sonehela olosandu vi kasi ko Efeso, haivo vakuekolelo va kasi vomunga vu Kristu Yesu okuti:

2 Ohenda ya piãla lombembua yi tunda ku Suku Isietu kuenda ku Ñala Yesu Kristu, yi kale lene.

3 Suku Isia ya Ñala yetu Yesu Kristu a sivayiwe, una wa tu sumũlũisa vomunga la Kristu lesumũlũho liespiritu sandu lia Suku li tunda kilu, 4 omo eye wa tu nõla oku kala vomunga laye* osimbu oluali ka lua sevetiwile, okuti tu linga olosandu, loku pua etondelo kovaso aye locisola. 5 Momo eye wa sokiya ale tunde osimbu okuti o tu tambula ndomãla vaye omo lia Yesu Kristu, ndomo cu sanjuisa kuenda ndomo ci likuata locipango caye, 6 okuti o sivayiwa omo liohenda yaye ya piãla, yina a tu ĩha locisola vonduko Yomõlaye wa soliwa. 7 Vokuaye tu kuete eyovo omo liocisembi cosonde yaye kuenda ongecelo yakandu etu omo liohenda yaye ya piãla.

8 Ohenda yaco ya piãla ya tu supokaila lolondunge viosi kuenda elomboloko,* 9 oco a tu situluile elumbu li kola liocipango caye. Ndomo cu sanjuisa okuti ndeci a panga 10 momo wa sokiya ovina votembo ya tukuiwa, oco a kongele vali pamosi ovina viosi vu Kristu, ovina vio kilu kuenda ovina vio posi. Okuti vokuaye, 11 una tu kasi laye vomunga kuenje tua nõliwa oku linga vakapiñala, ndeci ca popiwa ale osimbu locipango ca una o tẽlisa ovina viosi ndomo ci likuata locipango caye, 12 okuti etu tua lavoka tete Kristu kuenda Suku wa ci popele ale osimbu oco tu wĩhe ulamba loku u sivaya. 13 Pole, ene wa lavokivo vokuaye noke yoku yeva ondaka yocili, olondaka viwa viatiamẽla keyovo liene. Noke yoku tava, wa tambulivo ondimbukiso lohuminyo yespiritu sandu mekonda liaye, 14 ohuminyo ya lingiwa osimbu* yi lekisa okuti tu tambula ocipiñalo, locimãho coku yovola omanu va Suku locisembi, oco ulamba waye u sivayiwe.

15 Eli olio esunga lieci okuti tunde eci nda yeva ekolelo liene vu Ñala Yesu, locisola wa lekisi kolosandu viosi, 16 sia la liwekapo oku vu panduli. Kuenje ndamamako oku vu tukuli volohutililo viange, 17 okuti Suku ya Ñala yetu Yesu Kristu, Isia yulamba, o wĩhi utima wolondunge kuenda esituluilo liukũlĩhĩso waye wa suapo. 18 Eye wa yikula ovitima viene oco vu vanje okuti vu kũlĩha elavoko o kovongiwili kuenje vu kũlĩha asumũlũho a velapo eye a ka eca kolosandu ndocipiñalo, 19 okuti vu kũlĩha unene wa piãla eye a siata oku lekisa kokuetu tuakuekolelo. Unene waco u molehẽla kolohõlo viaye, 20 kueci a lingila Kristu poku u pindula kuava va fa, loku u tumalisa kondio yaye kilu, 21 kuenda wo kapa kilu liuviali wosi, lomoko yosi, lunene wosi, lusoma wosi, londuko yosi, ci kale eyi yi tukuiwa voluali lulo,* ci kale eyi yi tukuiwa voluali lu laika oku iya. 22 Suku wa pokuisa ovina viosi vemehi liolomahi viaye kuenje wo lingisa utue wovina viosi viekongelo, 23 okuti olio etimba liaye, halio lie yuka ovituwa viaye kuenje o yukisa to ovina viosi.

2 Kuenje Suku wo muisi omuenyo ndaño ene wa fili kolohole viene kuenda kakandu ene, 2 osimbu wa endaendi ndoluali lulo, leci wa endaendi ndombiali yi kuete unene woku songola ofela okuti ya siata komãla vesino. 3 Letuvo kosimbu tua kuamaile olonjongole vietimba lietu, loku linga olonjongole kuenda ovisimĩlo vietimba kuenje tua sesamẽlele onyeño ndomãla vakuavo. 4 Puãi Suku ukuahenda ya piãla omo liocisola caye calua, wa tu sola, 5 wa tu muisa omuenyo kumue la Kristu ndaño ceci tua file kolohole—pole, omo liohenda ya piãla, ene wa yovuiwi. 6 Kuenje eye wa tu pindula kuenda wa tu tumalisa kumue la Kristu Yesu kilu, 7 Suku wa ci lingila okuti voluali lu laika oku iya,* eye o lekisa ohenda yaye yalua poku tu lingila ovina viwa* etu tu kasi vomunga la Kristu Yesu.

8 Omo liohenda yaco ya piãla, wa yovuiwi mekonda liekolelo, hamekondako liovilinga viene; pole, locali ca Suku. 9 Hamekondako liovilinga, okuti lomue o kuata esunga lioku lipanda. 10 Etu tupange wovaka a Suku; tua lulikiwila vu Kristu Yesu oco tu lingi ovilinga viwa, vina Suku a tu sokiyila oku endela tunde osimbu.

11 Kuenje ivaluki okuti, kosimbu wa kali omanu vakualofeka, haene wa endi oku tukuiwa okuti “ka wa seviwili evamba” lietimba la vana va tukuiwa okuti “vakuevamba,” okuti evamba liavo lia lingiwa lovaka omanu. 12 Kotembo yaco ka wa kaili la Kristu, wa kaili ocipãla lofeka ya Isareli, haene wa kali ovingendeleyi kovisila viohuminyo; ka wa kuateli elavoko kuenda ka wa kuateli Suku voluali. 13 Puãi cilo omo vu kasi vomunga la Kristu Yesu, ene wa kaili ocipãla, kaliye weyi ocipepi mekonda liosonde ya Kristu. 14 Momo eye ombembua yetu, una wa linga okuti eci ca kala ovimunga vivali ci linga cimosi kuenda wa teya ocimano ca kala pokati ketu. 15 Omo lietimba liaye wa imula ukuse, lovikundi Viocihandeleko okuti mua kongela oviholo, okuti cina ca kala ovimunga vivali ci linga ocimunga cimosi kumue leye vomunu wokaliye loku linga ombembua, 16 okuti o kuatisa ovimunga viaco vivali oku kala ndetimba limosi oco vi linalise la Suku omo liuti wekangiso,* momo eye wa imula ukuse mekonda liaye muẽle. 17 Kuenje eye weya oku kunda olondaka viwa viombembua kokuene wa kali ocipãla kuenda ombembua ku vana va kasi ocipepi, 18 momo vokuaye tuvimunga vivali, tu amela ku Isia lespiritu limuamue.

19 Omo liaco, ene ka vu lingi vali akombe pamue ovingendeleyi, pole, wakuafeka yimuamue lolosandu kuenda wakuanjo ya Suku, 20 kuenje wa tungiwi kociseveto covapostolo lovaprofeto, osimbu okuti Kristu Yesu eye ewe lievindi liociseveto. 21 Onjo yaco yosi olonepa vialio via tokekisua vokuaye, yi kasi oku tungiwa oco yi linge onembele yi kola ya Yehova. 22 Ene kumue leye vu kasivo oku tungiwa vocitumãlo caco okuti Suku o kalamo vespiritu.

3 Omo liaco, ame ndi Paulu nda linga omandekua ya Kristu Yesu mekonda liene, vumanu vakualofeka— 2 nda ene wa yevi ocikundi ca nyĩhiwa omo liohenda ya piãla ya Suku, mekonda liene, 3 okuti elumbu li kola lia ndi situluiwila, ndeci ndo soneheleli ale. 4 Kuenje eci vu ci tanga, vu ka limbuka okuti ñuete ukũlĩhĩso welumbu li kola lia Kristu. 5 Elumbu eli li kola ka lia kũlĩhĩwile lovitumbulukila vikuavo viomãla vomanu, ndeci lia situluiwa lespiritu kovapostolo vaye va kola kuenda ovaprofeto, 6 okuti omanu vakualofeka va kala vomunga la Kristu Yesu omo liolondaka viwa, loku kala vakapiñala, haivo ovimatamata vietimba limuamue kuenje va kuatavo ohuminyo yimuamue ndeyi yetu. 7 Nda linga ondingupange yelumbu li kola omo liocali cohenda ya piãla ya Suku ya nyĩhiwa longusu yunene waye.

8 Ndaño ame ndi sule pokati kolosandu viosi, pole, ohenda ya piãla ya nyĩhiwa okuti ndi kundila vakualofeka olondaka viwa viatiamẽla kukuasi ka u tendiwa wa Kristu, 9 oco vosi va limbuke ndomo elumbu li kola lia sokiyiwa, lina lia sitikiwile la Suku tunde osimbu, una wa lulika ovina viosi. 10 Eci ca lingiwila okuti mekonda liekongelo ku situluiwa kolombiali kuenda kovoviali o kilu olondunge via piãla via Suku volonepa viñi viñi. 11 Eci oco ocipango caye tunde osimbu vu Kristu, Yesu Ñala yetu, 12 una okuti mekonda liaye tu kuete utõi woku popia kuenda oku amela kokuaye omo liekolelo tu u kuetele. 13 Kuenje ndu pingi okuti ko ka konyohi omo liohali ñasi oku vu taleli, momo ohali yaco yi lomboloka ulamba kokuene.

14 Omo liaco, ñekamela Isia, 15 una apata osi o kilu la-a o posi a kasilili omo lionduko yaye. 16 Ndi likutilila okuti eye u wĩhi ulamba waye wa piãla oco vu kolisiwi vutima lunene wespiritu liaye, 17 kuenje Kristu o kala vovitima viene omo liekolelo kumue locisola. Talami ngõ loku pamisiwa vociseveto, 18 okuti kumue lolosandu viosi vu kũlĩha ciwa upati, lusõvi loku lepa kuenda oku longa, 19 kuenje vu kũlĩha ocisola ca Kristu cina ci pitahãla ukũlĩhĩso, okuti vu yukisua loku yuka kuosi kua Suku.

20 Cilo, Suku una okuti lunene waye o kasi oku talavaya vokuetu, haeye o tẽla oku linga ovina viosi tu pinga ale tu sima, 21 kokuaye ku kale ulamba wo vekongelo lowu wa Kristu Yesu toke kovitumbulukila viosi oloneke vi enda ño-o hũ ka vi pui. Amene.

4 Kuenje ame ndimandekua vu Ñala, ndu pingi oco wendaendi lesunguluko ndeli wa kovongiwi lalio, 2 lumbombe* walua, loku omboka, lepandi, loku pandikisa omunu lukuavo locisola, 3 loku kuata ombembua omunu lukuavo, loku likolisila oku likuata omunga, yina wa tambuli omo liespiritu sandu. 4 Kuli etimba limosi kuenda espiritu limosi, ndeci wa kovongiwi lelavoko limosi; 5 Ñala umosi, ekolelo limosi, epapatiso limosi; 6 Suku umosi haeye Isia ya vosi, una wa velapo vosi, omo lia vosi kuenda ku vosi.

7 Cilo ohenda ya piãla ya eciwa komunu lomunu pokati ketu ndonjongo yongavelo Kristu a eca ocali. 8 Oco ca popiwila citi: “Eci eye a londa kilu wambata olomandekua; kuenje wa eca olongavelo komanu.” 9 Ondaka yokuti “eye wa londa,” siti yi lomboloka okuti eye wa lokila posi, okuti kilu lieve? 10 Una wa loka, eye una wa londa kilu liovailu osi, okuti o yukisa ovina viosi.

11 Kuenje eye wa eca vamue okuti ovapostolo, vamue ovaprofeto, vakuavo akundi,* vamue angombo kuenda alongisi, 12 wa ci lingila oku pengulula* olosandu kupange woku vumba vakuavo, loku tunga etimba lia Kristu, 13 toke eci vosi yetu tu kala vomunga yekolelo, oku kuata ukũlĩhĩso wa suapo Womõla a Suku, loku kala ukulu wendamba,* toke eci tu pitĩla voseteko yutunga woku yuka kua Kristu. 14 Oco ka tu ka lingi vali omãla va pungoka lakimba okuti va imbiwa oko loko lofela yosi yoku longisa loku lunguka kuomanu, latutu oku vangula ovisimĩlo viuhembi. 15 Puãi oku vangula ocili locisola, tu lingi akulu vendamba kovina viosi vu Kristu, okuti eye utue. 16 Vokuaye etimba liosi li likuatisa pokati kuenje li litokeka lasokoluilo osi okuti lieca eci ci sukiliwa. Eci ocimatamata locimatamata ci talavaya ciwa, ci kuatisa etimba oku kula osimbu vi pamisiwa locisola.

17 Eci ndu sapuili, loku imba uvangi vu Ñala ceci okuti, ka vu ka endaendi vali ndeci vakualofeka va endaenda luveke* wovitima viavo. 18 Ovitima viavo vi kasi vowelema kuenje omuenyo wavo wa litepa lomuenyo u tunda ku Suku, oco va kasilili vonumbi, momo ovitima viavo via siva.* 19 Ovo ka va limbuka ovituwa viwa kuenje va lieca kumbondo* oco va linge ovina viosi vĩvi lalivelo.

20 Puãi eci haicoko wa lilongisi ku Kristu, 21 nda okuti wo yevi kuenda wa longisiwi laye, ndeci ocili ci kasi vu Yesu. 22 Ene wa longisiwi oku lula omunu wosimbu, una wa tiamẽla kovituwa viene viosimbu, okuti viu yapuisi loloñeyi vialuo vĩvi. 23 Amamiko oku kuata ovituwa viokaliye,* 24 kuenda wali omunu wokaliye una wa lulikiwa locipango ca Suku, lesunga liocili kuenda oku kola.

25 Kaliye omo okuti wasipo uhembi, omunu lomunu pokati kene a vangule ocili lukuavo, momo tuvimatamata vietimba limuamue. 26 Temi, pole, ko ka lingi ekandu; kuenda ekumbi ka li ka iñile loku tema kuene; 27 ko ka eci evelo* Keliapu. 28 U o nyana ka ka nyane vali; puãi a talavaye loku linga upange uwa lovaka aye muẽle, okuti o kuata cimue coku eca komunu wa suka. 29 Vomela wene ka mu ka tunde ondaka yĩvi, pole, mu tunde ondaka yiwa yi kolisa, haiyo ya soka lotembo yaco, okuti yi kuatisa ava va yi yeva. 30 Handi vali, ko ka sumuisi* espiritu sandu lia Suku, lina Suku o kapelui ondimbukiso toke keteke lieyovo omo liocisembi.

31 Imbipo ocikumbiti cosi, onyeño, ekaka, onjuela, olondaka vioku pembula kuenda ovina viosi ka via sungulukile. 32 Puãi likuateli ocisola pokati, lingi vakuahenda, loku liecela pokati ndeci Suku o weceli lutima wosi vu Kristu.

5 Lingi olosetukuli via Suku ndomãla va soliwe, 2 kuenda endaili vocisola ndeci Kristu a tu sola poku eca omuenyo waye kokuetu ndocilumba celemba liwa ku Suku.

3 Evĩho liukahonga* lovina viosi via liña, ale oku livela ka vi ka tukuiwe pokati kene, puãi lingi ndeci ca siata pokati komanu va kola; 4 ndaño akutisasõi, olombangulo viuveke kuenda olombangulo vĩvi—vina okuti ka via sungulukile—te oku eca olopandu ku Suku. 5 Momo wa kũlĩhi okuti lomue ukuevĩho liukahonga,* ale omunu wa liña, pamue ukuacipululu, ci lomboloka oku fendela oviteka, o kuete ocipiñalo cimue Vusoma wa Kristu kuenda wa Suku.

6 Lomue ka ko kembi lolondaka viesanda, momo omo liovina viaco kuiya onyeño ya Suku komãla vesino. 7 Omo liaco, ko ka kuati ukamba lavo; 8 momo kosimbu ene wa kali vowelema, puãi cilo vu kasi vocinyi kumue la Ñala. Endaili vocinyi ndomãla vocinyi, 9 momo epako liocinyi li limbukiwila kovina viosi viwa, viesunga kuenda viocili. 10 Amamiko oku limbuka ovina vi sanjuisa Ñala; 11 kuenda ko ka litumbiki kovilinga ka vimi apako okuti via tiama kowelema; pole, vi situluli ndomo ovio via tuwa. 12 Momo ovina va linga vuyombeki vi kutisa osõi ndaño muẽle oku vi tukula. 13 Ovina viosi vi muiwa vi situluiwa *locinyi, momo ovina viosi vi situluiwa ovio ocinyi. 14 Momo ca sonehiwa citi: “Pasuka Okuakupekela, pinduka kokufa kuenje Kristu o ku ĩha ocinyi.”

15 Lavululi oco ka vu ka endaendi ndava ka va kuete olondunge, puãi te ndomanu va kuete olondunge, 16 loku talavaya ciwa lotembo* yene, momo oloneke via vĩha. 17 Omo liaco, ko ka lingi aveke, puãi limbuki cipi ocipango ca Yehova. 18 Handi vali, ko ka kolui lovinyu, okuti yi tuala koku ambata omuenyo ũvi,* pole, yukisiwi lespiritu. 19 Livanguli pokati lolosamo, sivayi Suku kuenda imbi ovisungo viefendelo, imbili Yehova ovisungo lovisikilo vovitima viene, 20 olonjanja viosi eci olopandu ku Suku yetu haeye Isia omo liovina viosi, vonduko ya Ñala yetu Yesu Kristu.

21 Li pokoli pokati omo wa sumbili Kristu. 22 Akãi va pokole kalume vavo ndeci vu Ñala, 23 momo ulume eye utue wukãi waye ndeci Kristu okuti eye utue wekongelo, wa linga onjovoli yetimba eli. 24 Ndeci ekongelo li pokola ku Kristu, akãi va sukilavo oku pokola kalume vavo kovina viosi. 25 Ene alume, amamiko oku sola akãi vene ndeci Kristu a sola ekongelo kuenda wa ecela omuenyo waye ekongelo, 26 okuti o li kolisa, poku li yelisa loku li sukula lovava omo liondaka, 27 oco a ece kokuaye muẽle ekongelo lulamba, okuti ka li kuata etime, ale emome pamue cimue pokati kovina viaco, puãi li kola kuenda li pua eko.

28 Cimuamue haico, alume va sukila oku sola akãi vavo ndeci va sole etimba liavo muẽle. Ulume o sole ukãi waye o li sole eye muẽle, 29 momo lomue omunu o suvuka etimba liaye muẽle, pole, o li tekula loku li tata ndeci Kristu a linga lekongelo, 30 omo tuvimatamata vietimba liaye. 31 “Momo ulume o sia isiaye la inaye kuenje o likakatela* kukãi waye kuenda kavali kavo va linga etimba limuamue.” 32 Elumbu eli li kola linene. Cilo ñasi oku vangula catiamẽla ku Kristu kuenda ekongelo. 33 Omunu lomunu pokati kene a sole ukãi waye ndeci a li sole eye muẽle; handi vali, ukãi o sukila oku lekisa esumbilo liocili kulume waye.

6 Ene amãla, pokoli kolonjali viene vu Ñala, momo eci ca sunguluka kovaso a Suku. 2 “Sumbila so la nyõho,” eci oco ocihandeleko catete ci kuete ohuminyo: 3 “Oco okuti o kuata omuenyo uwa* kuenda o kala otembo yalua kilu lieve.” 4 Ene a vaisia, ko ka wenguli onyeño yomãla vene, pole, va pindisi lovilongua* via Yehova.

5 Ene apika, pokoli ku vacime cene va palo posi lusumba kuenda esumbilo liocili vovitima viene, ndeci ku Kristu, 6 ko ka ci lingi lika eci vu muiwa oco vu sanjuisi omanu,* pole, ndapika va Kristu, lingi ocipango ca Suku lutima wosi.* 7 Vumbi lutima wosi, ndu vu vumba Yehova, omanu havoko, 8 momo wa kũlĩhi okuti cosi ciwa omunu a linga, o ka tambula onima ku Yehova, ci kale upika, ci kale omunu wa yovoka. 9 Lenevo a vacime, kapiko ovina evi poku tata apika vene, okuti ko ka va kokisi usumba, momo wa kũlĩhi okuti Cime cavo haeye cime cene o kasi kilu kuenda kokuaye ka kuli ocame.

10 Oku sulako, kuati ongusu yi tunda ku Ñala kuenda unene wongusu yaye. 11 Wali ovimalẽho viosi via eciwa la Suku okuti vu tẽla oku tamalãla latutu Eliapu; 12 momo tu kuete uyaki umue okuti halomanuko,* te lovoviali, lovonene, lolombiali violuali lulo luowelema kuenda olohoka violondele. 13 Omo liaco, wali ovimalẽho viosi via eciwa la Suku, okuti keteke lievĩho vu tẽla oku tamalãla kuenda noke yoku tamalãla lovina viosi, vu yula.

14 Talami ngõ, itiki volombunda viene ocili nduvia kuenda wali esunga ndociteyuilo covonete, 15 kuenda wali kolomãhi viene eliangiliyo lioku sapula olondaka viwa viombembua. 16 Kuenje olonjanja viosi wali ociyepelo cekolelo, okuti vu tẽla oku ima isongo viosi viondalu viondingaĩvi.* 17 Tambuli ocikoko cepopelo kuenda osipata yespiritu okuti ondaka ya Suku, 18 oco okuti lolohutililo kuenda apingilo, vu likutilila olonjanja viosi vespiritu. Amamiko locituwa caco loku lingilako olosandu viosi apingilo. 19 Ndi lingilikovo ohutililo, okuti olondaka vi eciwa kokuange eci ndi yulula omela wange, ndi tẽla oku vangula lutõi oco ndi sapule elumbu li kola liolondaka viwa, 20 vina okuti ame numiwa yaco, pole, ñasi kalienge, okuti ñuata utõi osimbu ndi vi vangula.

21 Omo liaco, oco vu kũlĩhe ovitangi viange kuenda ndomo ñasi, Tukiko manji wa soliwa haeye ondingupange yekolelo vu Ñala, o ku lomboluili ovina viosi. 22 Ñasi oku u tuma kokuene locimãho eci okuti vu kũlĩha ndomo tu kasi kuenda eye o lembeleka ovitima viene.

23 Vamanji va kuate ombembua, locisola, lekolelo li tunda ku Suku Isia kuenda ku Ñala Yesu Kristu. 24 Ohenda ya piãla yi kale la vosi vana va sole Ñala yetu Yesu Kristu locisola cocili.