UKANDA PAULU A SONEHELA VA FILIPOI

1 Ame ndi Paulu la Timoteo, haetu tuapika va Kristu Yesu, ndi sonehela olosandu viosi vi kasi vomunga la Kristu Yesu, kumue lolomitavaso kuenda oloñuatisi viekongelo vi kasi ko Filipu:

2 Ohenda ya piãla lombembua yi tunda ku Suku Isietu kuenda ku Ñala Yesu Kristu, yi kale lene.

3 Olonjanja viosi ngeca olopandu ku Suku yange eci ndu wivaluki, 4 olohutililo viosi ndo lingili, apingilo aco osi nda a linga lesanju, 5 mekonda liombanjaile wa eci* omo liolondaka viwa tunde keteke liatete toke cilo. 6 Momo nda kolela okuti u wa fetika upange uwa pokati kene, o u malusula toke keteke lia Kristu Yesu. 7 Ca sunguluka kokuange oku vu sokololi ndoco vosi yene, omo vu kasi vutima wange, ene wa kali kumue lame vokayike, ci kale eci nda teyuila loku imbila uvangi olondaka viwa, momo tua tambuila kumosi ohenda ya piãla.

8 Suku ombangi yange ndomo ndu vu kueteli ongeva locisola ndeci Kristu Yesu a kuete. 9 Eci oco nda amamako oku likutilila okuti, ocisola cene camamako oku livokiya kumue lukũlĩhĩso wa suapo lolondunge; 10 kuenje vu kũlĩha ovina via velapo, okuti vu pua etondelo kuenda ka vu kokela ocilondokua vakuene toke keteke lia Kristu; 11 kuenda okuti vu yuka epako liesunga, lina liyilila mu Yesu Kristu, loku muisa Suku ulamba lesivayo.

12 A vamanji, cilo ndi yongola okuti vu kũlĩha okuti ovina via pita lame via kuatisa oku sandula olondaka viwa, 13 okuti oku yikiwa kuange vokayike omo lia Kristu kua kũlĩhiwa pokati Kakuenje vosi va Soma kuenda omanu vakuavo. 14 Kuenje cilo vamanji vosi vu Ñala va kolela omo lioku yikiwa kuange kuenda vosi va lekisa utõi woku vangula ondaka ya Suku okuti ka va kuata usumba.

15 Ocili okuti vamue va kasi oku kunda Kristu lonya kuenda uyaki, pole, vakuavo va ci linga lonjongole ya sunguluka. 16 Ava va sulako va kasi oku kunda Kristu locisola, momo ovo va kũlĩha okuti nda nõliwila oku teyuila olondaka viwa; 17 pole, ava vatete va ci linga luyaki halonjongoleko ya sunguluka, momo va yongola oku ñokela ohali koku yikiwa kuange vokayike. 18 Locimãho ce? Kolonepa viosi, nda oku likembisa nda ocili, Kristu o kasi oku kundiwa kuenda eci oco ndi sanjukila. Kuenje ndamamako oku ci sanjukila, 19 momo nda kũlĩha okuti eci oco ci ndi nenela eyovo omo liapingilo ene kuenda ekuatiso li tunda kespiritu lia Yesu Kristu. 20 Eci ci likuata lonjongole yange kuenda elavoko liokuti lacimue ci ñutisa osõi, pole, lutõi koku vangula ndeci ca siata olonjanja viosi, cilo Kristu o kemainyiwa omo lietimba liange, ci kale vomuenyo ci kale vokufa.

21 Momo nda ñasi lomuenyo ñasi lawo omo lia Kristu kuenda nda ndi fa onganyu. 22 Nda ñasi komuenyo letimba lilo, eci epako liupange wange; pole, eci ndi nõlapo si ci lekisa handi. 23 Pokati kovina evi vivali eci ndi nõlapo si cĩ, pole, ñuete onjongole yoku yovuiwa kuenda oku kala la Kristu, momo eci oco ca velapo. 24 Puãi nda nõlapo oku kala komuenyo* omo liene. 25 Omo okuti oco nda kolela, nda kũlĩha okuti ñala lene vosi, omo lioku amako kuene kuenda esanju vu kuete omo liekolelo liene, 26 okuti eci njiya vali kokuene, esanju liene li livokiya vu Kristu Yesu mekonda liange.

27 Ovimuenyo viene* vi lisoke lolondaka viwa viatiamẽla ku Kristu, ci kale okuti njiya ndu moli, ci kale okuti si kasiko, ndu yevi okuti wa pami lespiritu limuamue, lutima umuamue* osimbu vu talavayela kumosi loku kolela kolondaka viwa, 28 okuti ka vu yokokela ovanyali vene. Kokuavo owu uvangi wenyõleho, pole, kokuene eyovo; momo eci ca tunda ku Suku. 29 Ene wa tambuli esumũlũho omo lia Kristu, haloku kolelako lika kokuaye, pole, loku talisiwavo ohali mekonda liaye. 30 Momo vu kasi vuyaki umuamue wa muili kokuange, haiwo wa yevi okuti owo ñasi oku liyaka lawo.

2 Nda vu kuete ekoliso vu Kristu, pamue elembeleko liocisola, ale oku likapako omunu lukuavo, ohenda kuenda ocikembe, 2 suisipo esanju liange poku kala lutima umuamue, locisola cimuamue, loku kala vomunga* kuenda oku kuata ovisimĩlo vimuamue. 3 Ko ka lingi cimue loku hoya pamue oku lipanda, pole, loku omboka* tendi vakuene okuti va velapo ene vu sule, 4 ko ka sokololi ovina viene lika, puãi sokololivo ovina via vakuene.

5 Kuati ocituwa ndeci Kristu Yesu a kuatelevo, 6 una okuti ndaño wa kala nda Suku, ka sokoluile oku lisokisa la Suku. 7 Pole, wa sia cosi a kuatele, wa kala ndupika kuenda wa linga omunu.* 8 Handi vali, eci a molẽha ndomunu* wa liketisa kuenje wa pokola toke kokufa, okuti oku fa koku valeliwa kuti wekangiso.* 9 Omo liaco, Suku wo kemainyisa komangu yimue ya velapo kuenda wo wĩha onduko ya velapo olonduko viosi, 10 okuti vonduko ya Yesu ku kekamẽla olongolo viosi—viava va kasi kilu, lava va kasi posi, levi viava vio vemehi liongongo— 11 kuenda alimi osi a ­limbuka okuti Yesu Kristu eye Ñala o muisa Suku Isia ulamba.

12 A vamanji wa soliwi, ndeci wa siati oku pokola okuti ka vu ci lingi lika eci ñasi lene, pole, ca piãla enene eci si kasiko, kolisiko oku linga eci ci koka epopelo liene lusumba loku luluma. 13 Momo Suku eye u wĩhi onjongole kuenda ongusu yoku linga ovina viosi eye a sole. 14 Amamiko oku linga ovina viosi okuti halokulisiõsiõlako kuenda olonamãlala, 15 okuti vu lipua, loku pua eko, ndomãla va Suku ka va kuete etondelo kuenje vu tua ndocinyi voluali pokati kocitumbulukila ca tatama haico ca vĩha, 16 omo liaco, likolisiliko oku kuata ondaka yomuenyo. Kuenje ñuata esunga lioku sanjuka keteke lia Kristu, loku limbuka okuti sia lupukile ño oku likavisa, ale oku talavaya olivova. 17 Ndaño ame meselua ndocilumba cokunyua kuenje ekolelo liene liu vetiyi oku linga upange u kola,* nda sanjuka kuenda ndi yolela kumue lene vosi. 18 Lenevo sanjuki kuenda yoleli kumue lame.

19 Ndi lavoka ku Ñala Yesu okuti ndopo o tuma Timoteo kokuene, okuti ndi kolisiwa eci ndi yeva esapulo liatiamẽla kokuene. 20 Momo si kuete omunu ukuavo ndi tuma okuti o kasi lonjongole ndeyi yaye yoku vu tati ciwa. 21 Vakuavo vosi va sakalala lika lolonjongole viavo muẽle okuti, via Yesu Kristu ci sule. 22 Pole, wa kũlĩhi ndomo eye a lieca olumue, okuti ndomõla o kasi la isia, eye wa talavaya lame koku kunda olondaka viwa. 23 Kuenje njongola oku u tuma toke eci ndi kũlĩhĩsa ovina vi ka pita lame. 24 Nda kolela Ñala okuti lamevo ndopo ndiya.

25 Pole, cilo nda sima oku vu tumisi Epafrodito, manjange, ukuetu kupange, okuti layevo esualali lia Kristu, haeye onumiwa yene kuenda o ñuatisa kueci ndi sukila, 26 omo eye o yongola oku vu moli vosi yene, pole, wa sumua, momo ene wa yevi okuti o kasi oku vela. 27 Eye wa vela calua okuti wa puluka oku fa; pole, Suku wo kuatela ohenda, Suku ko kuatelele lika eye ohenda, puãi lamevo, okuti si yevi esumuo lialua. 28 Ndu tuma lonjanga yalua okuti eci u moli, vu kuata vali esanju kuenje esakalalo liange li tepuluka. 29 U tambuli ciwa vu Ñala lesanju lialua ndeci ca siata kuenda amamiko oku sumbila alume va soka ndava, 30 momo, omo liupange wa Kristu* eye wa puluka oku fa,* oco a nyĩhe ekuatiso lina ene nda wa nyĩhi.

3 Oku sulako a vamanji, amamiko oku sanjukila vu Ñala. Kokuange hacitangiko oku vu soneheli ovina vimuamue, momo ovina viaco viu kuatisi.

2 Lunguki lomanu va vĩha, la vana havakuaciliko; kuenda vana vakuakuvetiya evamba. 3 Momo etu, etu tu kuete evamba liocili, okuti osimbu tu linga upange u kola lespiritu lia Suku, oku lipanda kuetu vu Kristu Yesu kuenda ka tu tiamisila ekolelo lietu ketimba, 4 ndaño okuti pokati ka vosi nda ame ndi kuete vali esunga lioku kolela ketimba.

Nda omunu ukuavo o sima okuti o kuete esunga lioku kolela ketimba, ame nda velapo: 5 nda seviwa evamba eci nda tẽlisa oloneke ecelãla, ndukuafeka ya Isareli kepata lia Benjamini, ndu Heveru kuenda olonjali viange va Heveru; catiamẽla kocihandeleko ndu Fariseo; 6 catiamẽla kombili, nda lambalala ekongelo; catiamẽla kesunga omo liocihandeleko, nda litendele okuti nda pua eko. 7 Ovina nda tendele ndonganyu, nda vi tenda ndepese* omo lia Kristu. 8 Nda siapo ovina viosi omo liesilivilo liukũlĩhĩso wa Kristu Yesu Ñala yange. Mekonda liaye nda siapo ovina viosi kuenda ndi vi tenda ndovipelekese,* okuti nganyala Kristu, 9 ndi kala vomunga kumue laye, hamomoko liesunga liange muẽle omo lioku kuama Ocihandeleko, te omo liesunga li tunda koku kolela Kristu, momo esunga li tunda ku Suku lia sevetiwa kekolelo. 10 Ocimãho cange oku u kũlĩha eye, lunene wa una wo pindula, loku talisiwa ohali kumue laye kuenda oku tava oku fa ndeci eye a fa, 11 okuti nda citava ndi kuata epinduko liatete kuava va fa.

12 Ka ci kasi ndu okuti nda tambula ale onima, pamue nda kanguka ale, pole, ndi likolisilako okuti nda citava ndi tambula cina Kristu Yesu a ndi nõlela.* 13 A vamanji, si litendi ndu okuti ndi ci kuete ale; pole, cimue nda kolela ceci: Njivala ovina vio konyima kuenje njolokela ovina vio kovaso, 14 loku likolisilako oco ndi tambule onima ku Suku yekovongo liokilu vonduko ya Kristu Yesu. 15 Vana va kasi letu okuti va loñoloha, va kuate ocituwa caco, pole, nda vu kasi loku sokolola ovina viñi, Suku o ko situluili ocituwa caco. 16 Kuenje osimbu tu kula, tu amamiko locituwa caco.

17 A vamanji, lingi olosetukuli viange kuenda lavululi vana va kasi oku endela vonjila yi likuata longangu tuo sili. 18 Momo kuli valua—nda enda oku tukula, pole, cilo ndi va tukula lasuẽlela—vana okuti va kasi oku enda ndovanyali wuti wekangiso* wa Kristu. 19 Esulilo liomanu vaco enyõleho, suku yavo imo liavo kuenda ulamba wavo osõi yavo kuenje va tiamisila ovitima viavo kovina vio kilu lieve. 20 Puãi onjo yetu yi kasi kilu kuenda oko tu lavoka upopeli umue, okuti Ñala Yesu Kristu, 21 una okuti lunene waye o pongolola etimba lietu oco li lisoke* lulamba wetimba liaye kuenje o pokuisa ovina viosi kokuaye.

4 A vamanji vu soliwi lame, ndu kueteli ongeva, ene vusanju liange haene vu kolowa liange, talami ngõ vu Ñala, a vakuacisola cange.

2 Ndi vetiya Euodia la Suntuke oco va kuate utima umuamue vu Ñala. 3 Ndu ku pingavo ove u ndingupange yocili okuti o kuatisa akãi ava va kasi oku likolisilako* kumue lame koku kunda olondaka viwa kumue la Klemente kuenda olondingupange vikuavo, okuti olonduko viavo vi kasi velivulu liomuenyo.

4 Sanjukili vu Ñala olonjanja viosi. Mopia vali siti, Sanjuki! 5 Esunguluko liene li limbukiwe lomanu vosi. Ñala o kasi ocipepi. 6 Ko ka sakalali locina cimue, pole, kovina viosi lolohutililo kuenda alombelo kumue lolopandu, apingilo ene a kũlĩhĩwe la Suku; 7 kuenje ombembua ya Suku yina ya piãla olondunge viosi, yi lava ovitima viene kuenda ovisimĩlo viene vu Kristu Yesu.

8 Oku sulako a vamanji, ovina viosi okuti viocili, viosi via velapo, viosi via sunguluka, viosi via pua eko,* viosi vi sivayiwa, viosi vi popiwa ciwa, viosi viwa, viosi vi pandiyiwa, amamiko oku kapako* ovina viaco. 9 Ovina wa lilongisi, levi wa tavi kuenda ovina wa moli kokuange, vi lingi; kuenje ombembua ya Suku yi kala lene.

10 Nda sanjuka calua vu Ñala okuti cilo wa fetiki vali oku ñuatela ocisola. Ndaño wa endi oku ndi sokolola, ka wa kuateli epuluvi lioku ci lekisa. 11 Si kasi oku ci popela omo nda suka, momo kapuluvi osi nda lilongisa oku sanjukila leci ñuete. 12 Nda kũlĩha oku kuata citito, loku kuata calua. Kovina viosi kuenda kapuluvi osi nda lilongisa oku kuta loku kala onjala, oku kuata calua loku suka. 13 Kovina viosi ñuete ongusu mekonda lia una o nyĩha unene.

14 Wa lingi muẽle omo lioku ñuatisa kohali yange. 15 Ene a va Filipoi wa kũlĩhi okuti kefetikilo eci wa yevi olondaka viwa, eci nda tunda ko Makedonia, lalimue ekongelo lia ñuatisa, ale oku tava ekuatiso liange, te lika ene; 16 momo osimbu nda kala ko Tesalonike, ene wa numisi olonjanja vivali ovina vimue vioku ñuatisa. 17 Ka ci lekisa okuti ñasi oku sanda ombanjaile, puãi njongola oku mola epako liu neneli onganyu. 18 Pole, ñuete cosi nda sukilile okuti ci supoka. Ndekuta lovina nda tambula ku Epafrodito vina wa numisi, okuti ocilumba ca sunguluka kuenda celemba liwa, haico ci sanjuisa Suku. 19 Suku una o kuete ulamba walua o ko wĩhi cosi vu sukila vonduko ya Kristu Yesu. 20 Ku Suku yetu haeye Isia ku kale ulamba oloneke vi enda ño-o hũ ka vi pui. Amene.

21 Lamipo olosandu viosi vi kasi vomunga la Kristu Yesu. Vamanji va kasi lame vo tumisi ovilamo. 22 Olosandu viosi, ca piãla enene vana va kasi konjo ya Kaisare, vo tumisi ovilamo.

23 Ohenda ya piãla ya Ñala Yesu Kristu yi kale locituwa wa lekisi.