UKANDA PAULU A SONEHELA VA KOLOSAI

1 Ame Paulu, upostolo wa Kristu Yesu omo liocipango ca Suku kuenda Timoteo manjetu, 2 ndi sonehela olosandu kuenda vamanji vakuekolelo kekongelo lio ko Kolosai va kasi vomunga kumue la Kristu:

Ohenda ya piãla kuenda ombembua ya Suku Isietu yi kale lene.

3 Olonjanja viosi tu pandula Suku Isia ya Ñala yetu Yesu Kristu eci tu vu likutililiko, 4 tunde eci tua yeva ekolelo vu kuetele Kristu Yesu kuenda ocisola cene kolosandu viosi, 5 omo lielavoko lioku tambula eci co selekiwili kilu. Ndopo wa yevi elavoko liaco omo liesapulo liocili liolondaka viwa, 6 lina lieya kokuene. Ndeci olondaka viwa vi kasi oku ima apako, loku kula voluali luosi, cimuamue haico ci kasi oku lingiwa pokati kene, tunde keteke wa yevi ocili kuenda wa kũlĩhi ohenda ya piãla ya Suku. 7 Eci oco wa lilongisi ku Epafra haeye ukuenje wa soliwa letu kuenda ondingupange ya Kristu ya koleliwa oku tu kuatisa. 8 Eye wa tu sapuilavo ocisola vu tu kueteli ci tunda kekuatiso liespiritu lia Suku.

9 Eli olio esunga lieci okuti tunde eci tua ci yeva, ka tua la liwekapo oku vu likutililiko, loku pinga okuti vu yukisua lukũlĩhĩso wa suapo wocipango caye lolondunge viosi kuenda elomboloko li eciwa lespiritu, 10 okuti wendaendi ndeci ca sesamẽla ku Yehova loku u sanjuisa calua kuenda vu imi apako kupange wosi uwa, loku vokiya ukũlĩhĩso wa suapo wa Suku; 11 Kuenje vu kolisiwi lunene wosi lulamba waye wa piãla okuti vu pandikisi lesanju, 12 osimbu vu eca olopandu ku Isia una wo angiliyili ocipiñalo colosandu vina vi kasi vocinyi.

13 Eye wa tu popela kuviali wowelema kuenda wa tu sondoluila kuviali Womõlaye a sole, 14 okuti vokuaye tu kuete eyovo omo liocisembi kuenda ongecelo yakandu etu. 15 Eye esetahãlo lia Suku una ka muiwa lovaso, haeye uveli woviluvo viosi; 16 momo ovina viosi via lulikiwa mekonda liaye, ci kale vio kilu, ci kale vio posi, ovina vi muiwa levi ka vi muiwa, ci kale ovialo, ci kale ovonene, pamue olombiali. Ovina viosi via lulikiwa mekonda liaye kuenda viatiamẽla kokuaye. 17 Pokati kovina viosi, Yesu eye wa lulikiwa tete kuenda ovina viosi vikuavo via lulikiwa mekonda liaye, 18 kuenda eye utue wetimba, okuti ekongelo. Eye efetikilo liovina viosi, haeye uveli wava va fa, omo liaco, eye, eye omunu watete kovina viosi; 19 momo Suku o sole okuti ovina viosi vi tẽlisiwa vokuaye, 20 kuenje mekonda lia Kristu, inalisa kokuaye ovina viosi vikuavo poku linga ombembua omo liosonde a pesela kuti wekangiso,* ci kale ovina vio posi, ci kale vio kilu.

21 Kuenje ene wa litepeli kuenda wa kali ovanyali omo ovitima viene via tiamisiwilile lika kovilinga vĩvi, 22 pole, eye wa linalisa omo lioku fa kua una wa eca etimba liaye ndocilumba, oco a vu lekisi okuti vu kola kuenda wa pui etondelo, haene ka vu kuete eko kovaso a Suku— 23 eci ca lingiwila oco wamamiko vekolelo, loku sevetiwa vociseveto, okuti vu talama ngõ kuenda ka vu yapuka kelavoko liolondaka viwa wa yevi, okuti via kundiwila komanu vosi va kasi vemehi lilu. Ame ndi Paulu nda linga ondingupange yolondaka viaco viwa.

24 Nda sanjukila ohali yange omo liene kuenda sia talele ohali yalua ndocimatamata cetimba lia Kristu okuti, ekongelo. 25 Nda vumba ekongelo liaco omo liocikundi ca nyĩhiwa la Suku mekonda liene, okuti oku kunda ondaka ya Suku, 26 elumbu li kola lia sitikiwile tunde koluali lua pita* kuenda kovitumbulukila via pita. Pole, cilo lia situluiwa kolosandu, 27 Suku wa situluila olofeka elumbu li kola lina lieyuka ulamba kuenda ukuasi wespiritu, elumbu liaco Kristu o kasi vomunga kumue lene, okuti elavoko liulamba waye. 28 Yesu eye una tu sapula, loku lungula vosi kuenda oku va longisa lolondunge viosi kuenje tu lekisa okuti omanu vosi va suapo vomunga kumue la Kristu. 29 Omo liaco, ndi likolisilako lekuatiso liunene eye a nyĩha.

2 Momo ndi yongola okuti vu kũlĩha ndomo ñasi oku likolisilako mekonda liene, la vana va kasi ko Laodikea kuenda ku vosi ka va ndi muile.* 2 Eci ca lingiwila oco ovitima viavo vi kolisiwe kuenje va kala vomunga yimuamue yocisola kuenda va kuata ukuasi wosi u tunda kelomboloko liavo okuti lia koleliwa, oco va kuate ukũlĩhiso wa suapo welumbu li kola lia Suku, okuti elumbu liaco Kristu. 3 Vokuaye mua solekiwa ukuasi wosi wolondunge kuenda ukũlĩhĩso. 4 Ñasi oku ci popela okuti lomue o vu yapuisi lolondaka viuhembi. 5 Ocili okuti ndaño si kasiko ketimba, pole, ñasi lene vovisimĩlo viange, nda sanjuka omo lioku mola ndomo vu kasi oku enda ciwa kuenda ekolelo vu kuetele Kristu lia pama.

6 Kuenje ndeci wa tavi Kristu Yesu Ñala, amamiko oku endela vomunga kumue laye, 7 okuti ndeci wa lilongisi, ekolelo liene vu Kristu li pame loku kolapo ndolombombo viuti okuti via pama posi. Kuenje ekolelo liene li supoke eci weci olopandu ku Suku.

8 Lunguki okuti lomue o vu yapuisi* lolondunge violuali kuenda ovisila viomanu, levi viatiamẽla koviholo violuali okuti ka via tundile ku Kristu; 9 momo oku yuka kuosi kuovituwa via Suku via tunga vokuaye. 10 Kuenje ene ka vu pumbi cimue mekonda liaye, una okuti eye utue wuviali kuenda unene wosi. 11 Omo liukamba wene laye wa seviwivo evamba okuti hevambako lia lingiwa lovoko poku liyovola ketimba liositu, pole, evamba lia tiamẽla ku Kristu. 12 Momo wa kendiwi laye eci wa papatisiwi kuenda omo liukamba vu kuete laye wa pinduiwivo omo liekolelo liene kovopange anene a Suku, una wo pindula kuava va fa.

13 Ndaño wa fili kakandu kuenda kuyamba wene ketimba, Suku wo muisi omuenyo kumue la Kristu. Eye locisola wa ecela akandu etu osi, 14 kuenda wa imula* Ocihandeleko ca tu sonehelua cina ca tu tateka. Eye wa ci linga poku valeliwa kuti wekangiso.* 15 Eye wa imula ovoviali kuenda ovonene kuenje wa va lekisa kowiñi loku yula, loku va ambata ndolomandekua poku valeliwa kuti wekangiso.

16 Lomue ka ko pisi omo lieci vu lia leci vu nyua, ale kocipito cimue pamue kosãi yokaliye, ale kesambata. 17 Ovina evi ulembo ño wovina vi laika oku iya, pole, ulembo waco Kristu. 18 Lomue ka ko pumbisi onima okuti umue o sanjukila eliketiso liesanda loku fendela ovangelo, pamue oku “lipanda”* lovina a mola. Eye o kasi oku lipandiya esanda loku sokolola ndomanu vakuakandu, 19 una okuti ka kakatelele kutue, ku una okuti etimba liosi li tokekisua pamosi lasokoluilo lasipa kuenje li kula loku kula ku tunda ku Suku.

20 Nda vu fa kumue la Kristu kovina viaño violuali, momo lie vu kasilili lomuenyo ndu okuti handi vu panga onepa koluali poku pokola kovihandeleko vialio viokuti: 21 “Ku ka linge cimue, ale oku mãha, ndaño oku lamba,” 22 kovina viosi vi nyõleha poku talavaya lavio ndeci ci likuata lolonumbi kuenda alongiso omanu? 23 Ndaño ovina viaco vi molẽha okuti violondunge koku kisika efendelo kuenda eliketiso liesanda loku pokuisa etimba, pole, ovio ka vi kuete esilivilo kuyaki omunu a kuete watiamẽla koloñeyi vietimba.

3 Nda wa pinduiwi kumue la Kristu, sandiliyi ovina vio kilu, kuna Kristu a tumãla kondio ya Suku. 2 Tiamisili ovitima viene kovina vio kilu, kovina vio posi hakoko. 3 Omo okuti wa fi, omuenyo wene u kasi peka lia Kristu ndomo ci likuata locipango ca Suku. 4 Eci Kristu una o nena omuenyo a situluiwa, lenevo vu situluiwa kumue laye vulamba.

5 Omo liaco, ipayi ovimatamata vietimba liene okuti vio kilu lieve, ndeci evĩho liukahonga,* eliño, oloñeyi viukahonga, oloñeyi vĩvi kuenda ocipululu, okuti efendelo lioviteka. 6 Omo liovina evi, onyeño ya Suku iya kuava va vi linga. 7 Kosimbu ene muẽle wa kalivo lovituwa viaco* komuenyo wene.* 8 Pole, cilo vu sukila oku vimbapo viosi ndeci: onyeño, ekaka, evĩho, olondaka vioku pembula kuenda vomela wene ka mu ka tunde ombangulo yi kutisa osõi. 9 Ko ka likembi omunu lukuavo. Luli omunu wosimbu lovilinga vialio, 10 puãi wali omunu wokaliye, okuti omo liukũlĩhĩso wa suapo omunu waco o kasi oku pongoluiwa lesetahãlo lia Una wo lulika, 11 ka kuli u Helasi ale u Yudea, u wa seviwa evamba lu ka seviwile, ukuafeka yikuavo, u Skutia,* upika, ale omunu wa yovoka; puãi Kristu eye ovina viosi kuenda o kasi la vosi.

12 Omo okuti wa nõliwi la Suku kuenje vu kola, haene wa soliwi, wali ohenda locikembe, lumbombe, loku omboka* kuenda epandi. 13 Amamiko oku likapako omunu lukuavo, oku liecela pokati lutima wosi, nda umue o kuetele ondaka ukuavo. Ndeci Yehova o weceli lutima wosi, cimuamue haico vu linga. 14 Pole, kovina evi viosi, ca velapo wali ocisola, momo ci tokeka omanu vomunga yimuamue.

15 Handi vali, ombembua ya Kristu yi viale vovitima viene,* momo wa kovongiwili ombembua yaco vetimba limosi. Kuenje eci olopandu. 16 Ondaka ya Kristu yi kale vokuene lolondunge viosi. Lilongisi loku likolisa pokati* lolosamo, loku sivaya Suku, loku imba ovisungo violopandu kuenda oku imbila Yehova ovisungo vovitima viene. 17 Ci kale eci vu linga lolondaka ale lovilinga, ovina viosi vi lingili vonduko ya Ñala Yesu, loku pandula Suku Isia mekonda liaye.

18 Ene akãi, pokoli kalume vene, ndeci vu Ñala. 19 Ene alume, amamiko oku sola akãi vene, ko ka va kuateli onyeño. 20 Ene amãla, pokoli kolonjali viene kovina viosi, momo eci ci sanjuisa Ñala. 21 Ene a vaisia, ko ka wenguli onyeño* yomãla vene, oco ka va ka sumue. 22 Ene apika, pokoli ku va cime cene kovina viosi, ko ka ci lingi lika eci vo lavululi ndu vu sanjuisa omanu,* pole, ci lingi locili covutima kuenda oku sumbila Yehova. 23 Upange wosi vu linga, u lingi lutima wosi, ndu okuti vu u lingila Yehova, omanu havoko, 24 momo wa kũlĩhi okuti vu tambula ocipiñalo ku Yehova ndonima. Lingi apika va Cime cene, okuti Kristu. 25 Momo wosi o linga cĩvi, o kangisiwa omo lieci cĩvi a linga kuenje Suku ka kuete ocame.

4 Ene a vacime tati apika vene lesunguluko kuenda esunga omo wa kũlĩhi okuti vu kuetevo Cime kilu.

2 Pandikisi lolohutililo, amamiko oku lavulula loku eca olopandu. 3 Tu likutililikovo okuti Suku o tu yuluila onjila oco tu kunde ondaka yaye okuti tu sapula elumbu li kola lia Kristu, lina nda kapiwila kalienge, 4 okuti ndi yi lombolola ciwa ndomo ca ndi sesamẽla.

5 Endaendi ndava va kuete olondunge pokati ka vana ka va tiamẽlele kekongelo, loku talavaya ciwa lotembo.* 6 Olondaka viene vi kale lumbombe, loku singiwa lomongua, okuti vu kũlĩha ndomo vu tambulula omunu umue.

7 Tukiko, manjange o soliwe, ondingupange ya koleliwa haeye ukuenje vu Ñala, o vu sapuili ovitangi viange viosi. 8 Ñasi oku u tuma kokuene okuti vu kũlĩha ndomo tu kasi kuenda eye o lembeleka ovitima viene. 9 Ndo tuma kumue la Onesimo manjange wa koleliwa haeye o soliwe, una wa tunda pokati kene; kuenje ovo va ko lomboluili ovina viosi via pita kulo.

10 Aristarko omandekua kumue lame wo tumisi ovilamo kuenda Marko epalume lia Barnaba, (okuti eye una ene wa tambuli onumbi yokuti, nda weya kokuene u yoleli,) 11 kumue la Yesu o tukuiwa Justo, una wa tiamẽla ku vana va seviwa evamba. Ava ovo lika olondingupange kumue lame omo Liusoma wa Suku kuenda ovo va ndi kolisa calua.* 12 Epafra ukuenje wa Kristu Yesu, una wa tunda pokati kene wo tumisi ovilamo. Eye olonjanja viosi o likolisila oku u likutililiko, okuti vu talama ngõ kuenda ekolelo liene li pama poku linga ocipango cosi ca Suku. 13 Momo ndu wimbila uvangi okuti wa likolisilako calua koku u kuatisi kuenda koku kuatisa vana va kasi ko Laodikea loko Hierapoli.

14 Luka ndotolo o soliwe wo tumisi ovilamo kumue la Dema. 15 Tumisi ovilamo viange ku vamanji vo ko Laodikea, ku Numfa kuenda kekongelo li kasi konjo yaye. 16 Eci vu tangi ukanda ulo pokati kene, lingi esokiyo liokuti u tangiwavo kekongelo lio ko Laodikea kuenje vu tangavo una nda tumile ko Laodikea. 17 Sapuilivo Arkipo okuti: “Lavulula upange wa tambula ku Ñala, oco o u tẽlise.”

18 Ame ndi Paulu ndi tuma ovilamo nda soneha leka liange muẽle. Ivaluki alienge ange. Ohenda ya piãla yi kale lene.