UKANDA WATETE PAULU A SONEHELA VA TESALONIKE

1 Ame ndi Paulu, la Siluano* kumue la Timoteo, tu sonehela ekongelo lia va Tesalonike li kasi vomunga kumue la Suku Isia kuenda Ñala Yesu Kristu:

Ohenda ya piãla kuenda ombembua yi kale lene.

2 Olonjanja viosi tu pandula Suku eci tu vu tukuli vosi yene volohutililo vietu, 3 omo tu amamako oku ivaluka upange wene wekolelo kuenda alikolisilo ene ocisola, lepandi, omo lielavoko vu kuetele Ñala yetu Yesu Kristu kovaso a Suku yetu Isia. 4 Momo a vamanji wa soliwi la Suku, tua kũlĩha okuti eye wo nõli, 5 omo olondaka viwa tu kasi oku kunda ka vieyile kokuene lolondaka lika, te omo liunene, lespiritu sandu kuenda ekolelo lia pama, ndeci wa kũlĩhi eci tua linga pokati kene oku vu kuatisa. 6 Wa lingi olosetukuli vietu kuenda via Ñala, omo wa tavi ondaka lohali yalua lesanju liespiritu sandu, 7 kuenje wa lingi ongangu yiwa ku vosi va linga oloñame via Yesu ko Makedonia kuenda ko Akaya.

8 Eci ka ci lekisa okuti ondaka ya Yehova ya yevala lika kokuene vo Makedonia kuenda ko Akaya, pole, ekolelo liene ku Suku lia lisanduila kovitumãlo viosi, okuti ka tu sukila oku popia cimue. 9 Momo ovo muẽle va sapula ndomo etu tete tua vangula lene kuenda ndomo wa pongolokeli ku Suku poku siapo oviteka viene oco vu linge apika va Suku yocili haeye o kasi lomuenyo, 10 loku lavoka Omõlaye o tunda kilu, una eye a pindula kuava va fa okuti Yesu, wa tu popela konyeño yi laika oku iya.

2 A vamanji, ene wa kũlĩhi okuti oku iya kuetu kokuene kua kuata onima. 2 Momo noke yoku talisiwa tete ohali loku tatiwa lãvi ko Filipoi ndeci wa ci kũlĩhi, tua kuata utõi omo lia Suku yetu oco tu vu sapuili olondaka viwa via Suku pokati kalambalalo* alua. 3 Momo elungulo tuo wĩhi ka lia tundile kovisimĩlo viesanda, ale via vĩha, pamue vielimbi, 4 pole, omo okuti tua taviwa la Suku oco tu kundikiwe olondaka viwa, tu vangula, puãi ka tu ci lingila oku sanjuisa omanu, te Suku una o kũlĩhĩsa ovitima vietu.

5 Omo liaco, ene wa kũlĩhi okuti ka tua la tukula olondaka viusosẽle ale viombambe loku lekisa ocipululu; Suku ombangi yaco! 6 Ka tua kale oku sandiliya ulamba womanu, ci kale kokuene, ale ku vakuavo, ndaño omo tuvapostolo va Kristu nda tuo kokeli ocilemo. 7 Pole, eci tua kala pokati kene tuo tati lohenda, ndeci ina a tata* locikembe omãla vaye. 8 Omo tuo kuateli ohenda, ka tua nõlele* lika oku wĩhi olondaka viwa via Suku, pole, tuo wĩhivo ovimuenyo vietu, momo vu soliwi letu.

9 A vamanji, ene wivaluki upange kuenda alikolisilo etu. Tua talavaya utanya luteke oco ka tu ka linge ocilemo kokuene, eci tuo kundili olondaka viwa via Suku. 10 Ene kumue la Suku vu cimbila uvangi ndomo tua kala vakuacili, vakuesunga, haetu tua puile eko kokuene wa tavi. 11 Ene wa kũlĩhi ciwa ndomo tua enda oku u lunguli loku vu kolisi kuenda oku wimbili uvangi omunu lomunu pokati kene ndeci isia a linga lomãla vaye, 12 okuti vu endaenda lonjila yi sanjuisa Suku, una wo kovongi Vusoma kuenda vulamba waye.

13 Eli olio esunga lieci ka tu liwekelapo oku pandula Suku, momo eci wa tambuli ondaka ya Suku, yina wa yevi kokuetu, ka wa yi taveli ndondaka yomanu, pole, wa yi tambuli ndomo ci kasi ocili okuti ondaka ya Suku, yina yi talavaya vokuene wa tavi. 14 Momo ene a vamanji, wa lingi olosetukuli viakongelo a Suku vo Yudea ana a kasi vomunga la Kristu Yesu, omo wa talisiwi ohali peka lia vakuafeka yene ndeyi ovo va kasi oku talisiwa peka lia va Yudea, 15 vana okuti va ponda Ñala Yesu kumue lovaprofeto kuenda va tu lambalala. Ovo ka va kasi oku sanjuisa Suku, pole, va patãla eci ci kuatisa omanu vosi, 16 osimbu va tu tateka oku vangula lomanu vakualofeka oco va popeliwe. Kuenje ovo otembo yosi va linga akandu alua. Pole, onyeño yaye* ndopo iya kokuavo.

17 A vamanji, eci tu litepa* lene, ndaño vokatembo kamue (ketimba, pole, kovitima vietu hakoko) momo onjongole yetu yeyi okuti tu likolisilako oku vu moli ketimba.* 18 Eli olio esunga lieci tu yonguila oku iya kokuene, ocili, ame ndi Paulu nda ci seteka onjanja yatete leyi yavali; pole, Satana wa tateka onjila yetu. 19 Elavoko lietu nye, pamue esanju, pamue ekolowa lioku lipandiya? Siti ene? Kovaso a Ñala yetu Yesu ketukuluko liaye? 20 Ene vulamba wetu haene vusanju lietu.

3 Eci tua limbuka okuti ka tu tẽla oku iya kokuene, tua nõlapo oku kala ño ko Atenai; 2 kuenje tua tuma Timoteo manjetu haeye ondingupange ya Suku* yolondaka viwa via Kristu, oco a vu kolise* loku pamisa ekolelo liene, 3 okuti lomue o luluma* omo liohali yaco. Momo ene muẽle wa kũlĩhi okuti ka tu tẽla oku yuvula ohali yaco.* 4 Momo eci tua kala lene, tua enda oku vu sapuili okuti tu laika oku tala ohali kuenda eci oco ca pita ndomo wa ci kũlĩhi. 5 Kuenje eci nda limbuka okuti si tẽla oku iya kokuene, nda tuma Timoteo oco a kũlĩhĩse ekolelo liene, sanga vu yapuisiwa Luyonji kuenda upange wetu u linga ño wolivova.

6 Kaliye Timoteo wa tunda kokuene oku iya kokuetu, yu wa tu nenela esapulo liwa liatiamẽla kekolelo liene kuenda ocisola cene, okuti vu kasi oku amamako oku tu ivaluka, haene vu tu kuetele ongeva ndeci etu. 7 A vamanji, eli olio esunga lieci okuti kovitangi* vietu viosi, lohali, tu lembelekiwa mekonda liene kuenda ekolelo vu lekisa. 8 Omo okuti wa talami ngõ vu Ñala, letuvo tua kolapo.* 9 Olopandu vipi tu eca ku Suku catiamẽla kokuene omo liesanju lialua tu kuete kovaso a Suku yetu mekonda liene? 10 Utanya luteke tu likutilila lutima wosi oco tu vu moli,* okuti tu vokiya kueci ca kamba oco ekolelo liene li pame.

11 Kaliye Suku yetu haeye Isia kuenda Ñala yetu Yesu va yulule onjila oco tu iye kokuene. 12 Ñala a ecelele okuti ocisola vu likuetele pokati ci livokiya, ndeci ocisola tu vu kueteli, 13 okuti toke kesulilo eye o pamisa ovitima viene via pua eko koku kola kovaso a Suku yetu haeye Isia, ketukuluko lia Ñala yetu Yesu lolosandu viaye viosi.

4 Oco a vamanji, ndeci wa tambuli onumbi kokuetu ndomo vu pondola oku enda okuti vu sanjuisa Suku ndeci vu kasi ale oku enda tu vu pingi kuenda tu vu livondeli vu Ñala Yesu okuti wamamiko oku ci linga. 2 Momo wa kũlĩhi olonumbi* tuo wĩhi vonduko ya Ñala Yesu.

3 Omo liaco, ocipango ca Suku ceci okuti vu kola kuenda vu yuvula evĩho liukahonga.* 4 Omunu lomunu a kũlĩhe ndomo a tata etimba liaye* loku kola kuenda esumbilo, 5 halokulivelako oloñeyi viukahonga ndeci ca siata pokati ka vakualofeka, vana okuti ka va kũlĩhĩle Suku. 6 Catiamẽla kondaka eyi, ko ka lingi cimue cĩvi manjene, momo Yehova o ka nyõla ovina evi viosi, ndeci tua ci popele ale tete, loku u lunguli calua. 7 Momo Suku ka tu kovongelele evĩho, te oku kola. 8 Omo liaco, wosi ka sumbila elongiso eli, ka patãla omanu, te Suku una wo wĩhi espiritu sandu liaye.

9 Catiamẽla koku sola vamanji ka ci sukila okuti tu vu soneheli, momo ene muẽle wa longisiwi la Suku oku lisola pokati. 10 Ocili okuti vu kasi oku ci linga ku vamanji vosi ko Makedonia. Pole, a vamanji tu vu vetiyi tuti, kolisiko oku ci lingainga. 11 Kuati ocimãho coku kala lombembua, loku tata ovina viene muẽle kuenda oku linga upange lovaka ene, ndeci tuo handeleki, 12 okuti wendaendi lesunguluko kovaso omanu vana ka va tiamẽlele kekongelo Liakristão kuenje ka vu kambela cimue.

13 A vamanji ka tu yongola okuti vu kala vonumbi kueci catiamẽla kuava va pekela kolofa, okuti vu sumua ndeci ci lingainga omanu ka va kuete elavoko. 14 Momo nda tua kolela okuti Yesu wa fa kuenda wa pinduiwa, vana va pekelavo kolofa mekonda lia Yesu, Suku o ka va nena komuenyo oco va kale kumue laye. 15 Eci oco tuo sapuili omo liondaka ya Yehova okuti, etu tu kasi lomuenyo okuti tu popeliwa ketukuluko lia Ñala, ka tu livangela oku pinduiwa kovaso ya vana va pekela tete kolofa; 16 momo Ñala o loka kilu loku vilikiya lolukandi londaka yungelo unene, lolumbeta lua Suku kuenje vana va fila vu Kristu ovo va ka pinduiwa tete. 17 Noke etu tu kasi lomuenyo, haetu tu ka popeliwa, tu ambatiwa kumue lavo valende oku lisanga la Ñala vilu; kuenje tu kala la Ñala otembo yosi. 18 Omo liaco, amamiko oku likolisa pokati lolondaka evi.

5 A vamanji, catiamẽla kolotembo lovovo, ka ci sukila oku vu soneheli cimue. 2 Momo ene muẽle wa kũlĩhi ciwa okuti eteke lia Yehova liya ndocimunu kuteke. 3 Eci omanu va popia vati, “Tu kuete ombembua kuenda tua kolapo!” enyõleho liya kokuavo vocipikipiki ndolongembia viukãi omisi; kuenje lomue pokati kavo o puluka. 4 Pole, ene a vamanji, ka vu kasi vowelema, okuti eteke liaco liu sangi ndocimunu, 5 momo ene vosi vumãla vocinyi haene vumãla vutanya. Omo liaco, ka tua tiamẽlele kuteke ndaño kowelema.

6 Kuenje ka tu ka pekeli ndeci ci linga omanu vakuavo, pole, tu amamiko oku lavulula loku kuata uloño woku sokolola. 7 Momo vana va pekela va ci linga luteke kuenda vana va kolua va ci lingavo luteke. 8 Puãi omo tua tiamẽla kutanya, tu kuati uloño woku sokolola, poku wala ociteyuilo covonete cekolelo, locisola kuenda elavoko lieyovo ndocikoko, 9 momo Suku ka tu nõlelele onyeño, te oku kuata eyovo omo lia Ñala yetu Yesu Kristu. 10 Eye wa tu fila, ci kale okuti tua pasuka, ale tua pekela* tu kala kumue laye lomuenyo. 11 Omo liaco, amamiko oku likolisa pokati* loku lipamisa, ndeci vu kasi ale oku ci linga.

12 Kaliye a vamanji, tu vu pingi okuti sumbili vana va talavaya calua pokati kene haivo vo songuili vu Ñala kuenda vo lunguli; 13 lekisi ocisola calua kokuavo loku va kapako omo liupange wavo. Kali lombembua pokati kene. 14 Handi vali, a vamanji tu vu vetiyi oco vu lunguli* vana va sina, loku lembeleka vana va sumua,* oku kuatisa vana va hongua kuenda oku pandikisa la vosi. 15 Lomue pokati kene ka ka fetuluinye umue cĩvi leci cĩvi, puãi likolisili oku linga eci ciwa komunu lomunu kuenda komanu vosi.

16 Olonjanja viosi sanjuki. 17 Likutilili olonjanja viosi. 18 Eci olopandu omo liovina viosi. Momo eci oco ocipango ca Suku kokuene mekonda lia Kristu Yesu. 19 Ko ka tateki upange* wespiritu lia Suku vokuene. 20 Ko ka pembuli ovitumasuku. 21 Kũlĩhĩsi ovina viosi; kakateli kueci ciwa. 22 Yuvuli evĩho liosi.

23 Suku yombembua a vu kolisi ca piãla. A vamanji, espiritu lomuenyo kuenda etimba liene li kole kolonepa viosi, li teyuiwe, loku pua eko ketukuluko lia Ñala yetu Yesu Kristu. 24 Una wo kovongi wa kolelua kuenje o ci tẽlisa.

25 A vamanji, amamiko oku tu likutililako.

26 Lamisipo vamanji vosi lesipulo liocisola.

27 Ndu pingi vonduko ya Ñala okuti ukanda ulo u tangiwe ku vamanji vosi.

28 Ohenda ya piãla ya Ñala yetu Yesu Kristu yi kale lene.