UKANDA WAVALI PAULU A SONEHELA VA TESALONIKE

1 Ame ndi Paulu, la Siluano* kumue la Timoteo, tu sonehela ekongelo lia va Tesalonike li kasi vomunga kumue la Suku Isietu kuenda Ñala Yesu Kristu:

2 Ohenda ya piãla lombembua yi tunda ku Suku Isia kuenda ku Ñala Yesu Kristu yi kale lene.

3 A vamanji, olonjanja viosi tu vetiyiwa oku pandula Suku omo liene. Eci ca sunguluka, momo ekolelo liene kuenda ocisola vu likueteli pokati vi kasi oku livokiya calua. 4 Omo liaco, tu vu pandiyi pokati kakongelo a Suku omo liepandi liene, lekolelo kalambalalo osi kuenda oloseteko* vu kasi oku pita* lavio. 5 Owu uvangi wokuti oku tetulula kua Suku kuesunga, momo vu tendiwa okuti vu sesamẽla oku tambula Usoma wa Suku, una vu kasi oku talisiwila ohali.

6 Oku tetulula kua Suku kuesunga, momo eye o fetuluinya ohali kuava vo kokeli ohali. 7 Pole, ene vu tala ohali, Suku o ko wĩhi ekavuluko kumue letu eci Ñala Yesu a situluiwa tunde kilu lovangelo vaye va pama, 8 londalu yulienge, osimbu a nena efetuluinyo ku vana ka va kũlĩhĩle Suku, la vana ka va pokola kolondaka viwa via Ñala yetu Yesu. 9 Ovo va ka tambula eyambulo lienyõleho ka li pui, okuti ka va kala vali kovaso a Ñala kuenda kovaso yulamba waye wa piãla, 10 eci eye a muisua ulamba kumue lolosandu viaye kuenje keteke liaco vosi vana va lekisa ekolelo kokuaye va ko komõha, momo wa koleli kuvangi tuo wĩhi.

11 Omo liaco, olonjanja viosi tu vu likutililako ku Suku, okuti Suku yetu o vu tendi okuti vu sesamẽla oku kovongiwa kuenda o tẽlisa cosi ciwa cu sanjuisa leci wa lingi omo liekolelo liene. 12 Eci ci lingiwila oco onduko ya Ñala yetu Yesu yi muisue ulamba kokuene, lene vu muila ulamba kokuaye, ndeci ci kasi ohenda ya piãla ya Suku yetu kuenda ya Ñala Yesu Kristu.

2 A vamanji, catiamẽla ketukuluko lia Ñala yetu Yesu Kristu kuenda oku ongoluiwa kuetu oco tu kale kumue laye, tu vu pingi tuti, 2 ovitima viene ka vi ka tatamisue lonjanga ale oku yokokisua lesapulo li molẽha ndu okuti lia tunda ku Suku,* pamue esapulo lia vanguiwa, ale ukanda u molẽha ndu wa tunda kokuetu okuti eteke lia Yehova li kasi palo.

3 Ko ka eceleli okuti umue u yapuisi,* momo eteke liaco ka liya te ku molẽha tete unanguluke kuenda oku situluiwa kuomunu ukuevĩho okuti omõla wenyõleho. 4 Eye o patãla kuenda o livelisapo ku wosi o li tukula hati suku ale ocikuata cefendelo* kuenje o tumãla konembele ya Suku loku litukula eye muẽle okuti suku. 5 Ka wivaluki okuti eci nda kala lene ndo sapowaili ale ovina evi?

6 Ene wa kũlĩhi eci ci kasi oku tateka, okuti eye o situluiwa votembo yaye muẽle. 7 Ocili, elumbu liomunu waco ukuevĩho li kasi ale oku talavaya, toke eci una o kasi oku li tateka ka kalako vali. 8 Kuenje omunu ukuevĩho o situluiwa, una Ñala Yesu a ka ponda lespiritu liomela waye kuenda u wimula loku molẽha kuetukuluko liaye. 9 Pole, oku molẽha kuomunu ukuevĩho kuiya omo liovilinga via Satana kumue lovopange osi a komõhisa, lolondimbukiso viesanda, lovikomo,* 10 kuenda elimbi liosi lievĩho ku vana va nyõleha, ndefetuluinyo omo ka va tava oku sola ocili cina ci pondola oku va popela. 11 Eli olio esunga lieci Suku a ecelelela elimbi oco va kembiwe okuti va tava kuhembi waco, 12 kuenda vosi yavo va pisiwa omo ka va tava kocili, pole, va sanjukila ño evĩho.

13 Olonjanja viosi tu vetiyiwa oku pandula Suku omo liene, a vamanji wa soliwi la Yehova, momo Suku wo nõleli oku popeliwa tunde kefetikilo poku vu kolisi lespiritu liaye kuenda ekolelo liene kocili. 14 Eye wo kovongeli omo liolondaka viwa tua kunda, oco vu kuati ulamba wa Ñala yetu Yesu Kristu. 15 Omo liaco, a vamanji, talami ngõ, amamiko oku kakatela kovina wa longisiwi, ci kale nda esapulo liaco lia vanguiwa, ale ukanda wa tunda kokuetu. 16 Kuenje Ñala yetu Yesu Kristu kuenda Suku Isietu, una wa tu sola, okuti wa eca elembeleko ka li pui lelavoko liwa omo liohenda ya piãla, 17 a lembeleke ovitima viene loku vu pamisi* lovilinga kuenda ondaka yiwa.

3 Oku sulako a vamanji, amamiko oku tu likutililako, okuti ondaka ya Yehova yi lisandula lonjanga loku sivayiwa ndeci ci kasi oku pita lene, 2 okuti tu popeliwa komanu vãvi haivo va vĩha, momo havosiko va kuete ekolelo. 3 Pole, Ñala wa kolelua kuenda eye o ko pamisi loku vu teyuila kondingaĩvi. 4 Kuenje tu kuete ekolelo ku Ñala okuti catiamẽla kueci vu kasi oku linga, vu amamako oku kapako olonumbi tuo wĩhi. 5 Ñala a songuile ovitima viene vocisola ca Suku, okuti vu kuata epandi li sukiliwa oco wamamiko oku kuama Kristu.

6 Kaliye a vamanji, tu vu handeleki vonduko ya Ñala yetu Yesu Kristu, okuti vu litepa la manji wosi wa sina, haeye ka pokola kelongiso* ene* wa tambuli kokuetu. 7 Ene muẽle wa kũlĩhi ndomo vu tu setukula, momo ka tua lekisile esino eci tua kala pokati kene, 8 pamue oku pinga oku lia ocali.* Pole, tua likolisilako oku talavaya uteke lutanya oco ka tu ka kokele ocilemo komunu umue pokati kene. 9 Ka ci lekisa okuti ka tu kuete omoko yoku vu tambuli cimue, puãi tua ci lingila oco vu setukuli ongangu yetu. 10 Momo eci tua kala lene tua enda oku wĩhi onumbi eyi tuti: “Nda umue ka yongola oku talavaya, ka ka lie.” 11 Momo tua yeva okuti vamue pokati kene va sina kuenda ka va yongola oku talavaya, haivo va litenga vovitangi viamãle. 12 Catiamẽla komanu vaco tuo handeleki, loku vu lunguli vu Ñala Yesu Kristu okuti te va talavaya loku omboka oco va lie okulia kuesalamiho liavo muẽle.

13 Ene a vamanji, ko ka liwekipo oku linga eci ciwa. 14 Pole, nda umue ka pokola kondaka yetu yukanda ulo, lavululi omunu waco kuenda ko ka kuati ukamba laye, oco a kutisue osõi. 15 Ka u ko tendi ndunyali, pole, amamiko oku u lungula nda manji.

16 Cilo Ñala yombembua, eye muẽle o wĩhi ombembua olonjanja vialua kolonepa viosi. Ñala a kale la vosi yene.

17 Ame ndi Paulu ndi tuma ovilamo nda soneha leka liange muẽle, okuti ovio ondimbukiso kovikanda viosi; ndomo ndi soneha.

18 Ohenda ya piãla ya Ñala yetu Yesu Kristu yi kale la vosi yene.