UKANDA WAVALI PAULU A SONEHELA TIMOTEO

1 Ame ndi Paulu, upostolo wa Kristu Yesu omo liocipango ca Suku kuenda liohuminyo yomuenyo yi kasi vu Kristu Yesu, 2 ndi sonehela Timoteo omõla wa soliwa:

Ohenda ya piãla, ocali, lombembua yi tunda ku Suku Isia kuenda ku Kristu Yesu Ñala yetu yi kale love.

3 Ndi pandula Suku, una ñasi oku lingila upange u kola lutima wa yela, ndeci vakukululu yange va linga, okuti sia la liwekapo oku ku kongela vapingilo ange uteke lutanya. 4 Eci ndi ivaluka asuelẽla ove, ñuata ongeva yoku ku mola, oco ndi kuate esanju lialua. 5 Momo ndi ivaluka ekolelo liove okuti haliombambeko, ekolelo lina nyokulu yove Loisi kuenda ina yove Eunike va kuata kuenje nda kolela okuti halio o kuetevo.

6 Omo liaco, ndu ku vetiya oco amameko oku kuata ombili poku talavaya longavelo ya Suku, yina wa tambula eci nda ku kapa ovaka. 7 Ongusu ya pama ya Suku ka ya tu ĩhile utima wusumba, pole, ya tu ĩha utima wunene, wocisola kuenda wolondunge. 8 Ku ka kuate osõi yoku imbila uvangi Ñala yetu kuenda ame ndimandekua mekonda liaye, pole, tala ohali omo liolondaka viwa poku kolela kunene wa Suku. 9 Eye wa tu popela, loku tu kovonga oco tu linge olosandu, hamekondako liovilinga vietu, te omo liocipango caye kuenda ohenda ya piãla. Eci ca tu ĩhiwa tunde osimbu vu Kristu Yesu, 10 cilo puãi ca molẽha ciwa mekonda lietukuluko Liupopeli wetu, okuti Kristu Yesu una wa imula oku fa kuenje wa nena kutanya omuenyo kuenda eci ka ci fi omo liolondaka viwa, 11 vina nda nõliwila oku kala ukundi, upostolo kuenda ulongisi.

12 Omo liovina evi, oco ndi talisiwila ohali, pole, si kuete osõi. Momo ame nda kũlĩha Una nda kolela kuenda nda kolela okuti eye o tẽla oku teyuila ovina viosi ndo kundika toke keteke lia sokiyiwa. 13 Kakatela kolondaka* viocili* vina wa yeva kokuange lekolelo kuenda ocisola ci tunda voku kala vomunga kumue la Kristu Yesu. 14 Lava eci ca ku kundikiwa omo liespiritu sandu, lina li kasi vokuetu.

15 Ove wa kũlĩha okuti, alume vosi vofeka yo Asia va ndi yanduluka, oku kongelamo Fungelo, la Hermogene. 16 Ñala a lekise ohenda ku vakuanjo ya Onesiforo, momo wa ndi lembeleka kuenda ka kuatele osõi omo ndi kasi vokayike. 17 Puãi eci eye a kala ko Roma, wa ndi sandiliya calua toke eci a ndi sanga. 18 Ñala a ecelele okuti eye o sanga ohenda ku Yehova keteke lia sokiyiwa. Kuenje ove wa kũlĩha ciwa upange wosi eye a linga ko Efeso.

2 Omo liaco, amõlange, amamako oku kuata ongusu vohenda ya piãla yi tunda vu Kristu Yesu; 2 kuenda kovina wa yeva kokuange okuti valua va ci imbila uvangi kuenje ovina viaco vi kundika kalume va koleliwa, vana okuti noke va tẽla oku vi longisa ku vakuavo. 3 Pandikisa kohali ndesualali liwa lia Kristu Yesu. 4 Lalimue esualali li sakalala* lomĩlu* yoku sanga onganyu, oco li sanjuise u wo sonehisa kusualali. 5 Ndaño kolomapalo vioku yoloka, omunu o tambula lika ekolowa nda wa yoloka loku kuama onumbi yaco. 6 Ongunja yi talavaya calua oyo yi sesamẽla oku lia tete kapako. 7 Sokolola lutate kueci ñasi oku popia; kuenje Ñala o ka ku ĩha elomboloko* kovina viosi.

8 Ivaluka okuti Yesu Kristu wa pinduiwa kuava va fa, kuenda eye wa kala ocitumbulukila ca Daviti,* ndolondaka viwa nda kunda, 9 momo oco ñasilili oku talela ohali loku kapiwa vokayike ndondingaĩvi. Puãi ondaka ya Suku ka ya kutiwile. 10 Omo liaco, ñasi oku pandikisa kovina evi viosi mekonda liava va nõliwa, okuti ovo va kuatavo eyovo, lina liyilila vu Kristu Yesu kumue lulamba ka u pui. 11 Ondaka eyi ya koleliwa: Nda tu fila kumuamue, tu muilavo kumue omuenyo; 12 nda tu pandikisa, tu ka vialavo kumosi ndolosoma; nda tu u likala, eye o tu likalavo; 13 ndaño tua siapo oku kala vakuacili, eye amamako oku kala ukuacili, momo ka citava okuti eye o li likala eye muẽle.

14 Amamako oku va ivaluisa ovina evi, loku va lungula* kovaso a Suku, okuti ka va liyaki omo liolondaka, ale omo liocina cimue ka ci kuete esilivilo, momo ci kapa kohele* vana va yevelela. 15 Likolisilako oku lilekisa okuti wa taviwa la Suku, ndondingupange ka yi kuete lacimue cu kutisa osõi, loku talavaya ciwa londaka yocili. 16 Puãi yuvula olombangulo viesepu okuti vi tomba ovina vi kola, momo ovo va tomba Suku, 17 kuenje olondaka viavo vi li sandula ndepute liosembuembue.* Humeneo, la Filetu vamue pokati kavo. 18 Alume vaco va yapuisiwa vocili, loku popia okuti epinduko lia lingiwa ale kuenda va kasi oku nyõla ekolelo lia vamue. 19 Handi vali, ociseveto ca pama ca Suku ci tãi kuenda ci kuete ondimbukiso yiti, “Yehova wa kũlĩha ava va tiamẽla kokuaye” kuenda yiti, “Wosi o kolela konduko ya Yehova a siepo ovina ka via sungulukile.”

20 Vonjo yimue yinene ka muli lika ovikuata* viulu, levi viopalata, pole, mulivo viuti kuenda viotuma, vimue via sumbiwa vikuavo ka via sumbiwile. 21 Kuenje nda umue o litepa levi via sulako, o linga ocikuata* ca sumbiwa, ci kola, ci kuete esilivilo ku muẽleaco, haico ca pongiyiwila upange uwa. 22 Tila oloñeyi viovomalẽhe, sanda esunga, ekolelo, ocisola kuenda ombembua la vana va vilikiya Ñala lutima wa yela.

23 Yuvula olondaka viuveke levi vioku lipatãla, omo wa kũlĩha okuti vi koka uyaki. 24 Momo ukuenje wa Ñala ka sukila oku yaka, pole, o sukila oku omboka* la vosi, oku loñolõha koku longisa kuenda oku likandangiya eci a popiwa lãvi, 25 loku longisa lumbombe vana va patãla leci ci popiwa. Citava okuti Suku pamue o va ĩha utima woku likekembela,* una u tuala kukũlĩhĩso wa suapo wocili, 26 okuti olondunge viavo viyamo kuenje va puluka konjanjo Yeliapu, omo okuti va kuatiwile laye oco va linge ocipango caye.

3 Limbuka okuti, koloneke via sulako kuiya ohali yalua. 2 Omanu va linga vakuakulisola ovo muẽle, vakuakusola olombongo, vakuakulipanda, vakuakulivelisapo, vakuakupembula, vakuakusinila olonjali, vakualutukãi, havakuaciliko, 3 ka va kuete ocisola la vangadiavo, vakuamanya, vakualundi, ka va tẽla oku likandangiya, olongangala, ka va sole eci ciwa, 4 olomakuli, vakualonamalala, vakuepela, vakuakusola ayele okuti Suku ci sule, 5 va lilekisa ndu okuti va sumbila Suku, pole, va likala unene waye vomuenyo wavo; kuenje litepa lavo. 6 Momo pokati kavo pa tunda alume va yapuisa omanu volonjo loku liyombaika kuenje va kuata akãi va hongua haivo va lemelelua* lakandu a tuala koloñeyi vialua, 7 ndaño va lilongisa otembo yosi, lopo ka va tẽla oku sanga ukũlĩhĩso wa suapo wocili.

8 Ndeci Jane, la Jambre va tamalala la Mose, alume vaco va tamalãlavo locili. Ovo va vĩhisua vutima kuenje Suku wa va pisa, momo ka va kasi oku endela vekolelo. 9 Puãi ka va amiko kupãla, momo uveke* wavo u limbukiwa la vosi, ndeci uveke wa Jane, la Jambre. 10 Pole, ove o kasi oku kuama lutate alongiso ange, ovilinga viange, ovimãho viange, ekolelo liange, epandi liange, ocisola cange, oku pandikisa kuange, 11 oku lambalaliwa kuange, ohali ndeyi nda talisiwa ko Antiokea, ko Ikoniyu, lo ko Lustra. Nda pandikisa kalambalalo aco kuenje Ñala wa ndi yovola kovina viaco viosi. 12 Ocili, vosi va panga oku vumba Suku ndolondonge via Kristu Yesu, va lambalaliwavo. 13 Puãi omanu vãvi lolohembi va amamako oku linga eci cĩvi, oku yapuisa loku yapuisiwa.

14 Ove puãi amamako lovina wa lilongisa havio wa vetiyiwa oku tava, loku limbuka vana va ku vi longisa, 15 omo okuti tunde vutila wa kũlĩha ovisonehua vi kola, vina vi ka ku popela omo lioku kolela Kristu Yesu. 16 Ovina viosi via sonehiwa Vovisonehua vi Kola, vi tunda ku Suku kuenje ovio vi silivila koku tu longisa, koku tu pisa, koku suñamisa ovina* loku tu pindisila vesunga, 17 okuti omunu wa Suku o loñoloha loku liangiliyila upange wosi uwa.

4 Ndu ku handeleka kovaso a Suku kuenda kovaso a Kristu Yesu, una okuti onganji yava va kasi lomuenyo lava va fa, eci a molẽha kuenda eci eya Kusoma waye: 2 Kunda ondaka; ci linga lonjanga, ci kale votembo yiwa ale votembo yovitangi; lemẽla, pengulula, lungula lepandi kuenda uloño woku longisa. 3 Momo kuiya oloneke okuti omanu ka va ka tava kelongiso liocili,* puãi omo lioku kuama olonjongole viavo muẽle, va liongoluila alongisi oco va yeve eci ovatũi avo a sanjukila oku yevelela.* 4 Ovo va ka liwekapo oku yeva ocili, oco va yevelele alusapo esanda. 5 Lava uloño wove woku sokolola kovina viosi, pandikisa kohali, linga upange wukundi,* tẽlisa upange wove u kola.

6 Momo ñasi oku pesiwa ndocilumba coku nyua ndeci ocilumba ci pesiwa kutala kuenda otembo yange yoku yovuiwa yi kasi ocipepi. 7 Nda yaka uyaki uwa, oku yoloka nda mala, nda lava ekolelo. 8 Cilo Ñala una o sombisa lesunga, wa ndi selekela ekolowa ndonima keteke liaco, hameko lika, pole, ku vosi va lavoka oku molẽha kuaye.

9 Ku ka tumale oku iya kokuange. 10 Momo Dema wa njanduluka omo lioku sola oluali lulo* kuenje wa enda ko Tesalonike, Kreske wa enda ko Galatia, Tito ko Dalmatiya. 11 Luka eye lika o kasi lame. Enju la Marko, momo o ñuatisa kupange wange. 12 Pole, nda tuma Tukiko ko Efeso. 13 Eci iya, nenele osembele nda sia ko Torasi, ku Karpo kuenda oviña, ca piãla enene oviña viovipa.

14 Alexandro uteli wosipi wa ndinga calua cĩvi. Yehova u fetuluinya ndovilinga viaye. 15 Lovevo lunguka laye, momo wa patãla calua olondaka vietu.

16 Kekanga liange liatete lomue wa nundila olunda, ovo puãi va njanduluka, Suku ka ka va pisile ekandu liaco. 17 Puãi Ñala wa talama ocipepi lame, yu wa nyĩha ongusu oco ndi kunde ciwa olondaka viwa, okuti vakualofeka vosi va ci yeva; kuenje nda popeliwa vomela wohosi. 18 Ñala o ka ndi yovola kovilinga viosi vĩvi kuenda o ndi popela oco ndi iñile Vusoma waye wo kilu. Kokuaye ku kale ulamba oloneke vi enda ño-o hũ ka vi pui. Amene.

19 Lamisapo Priska, la Akuila kuenda vakuanjo ya Onesiforo.

20 Erasto wa siala ko Korindo, pole, Trofimo o kasi oku vela ko Miletu. 21 Yayulako okuti, iya osimbu ombambi ka ya fetikile.

Eubulo wa ku tumisa ovilamo kuenda Pudeni, la Linu, kumue la Klaudia va tumisavo ovilamo ku vamanji vosi.

22 Ñala a kale locituwa ove wa lekisa. Ohenda yaye ya piãla yi kale lene.