UKANDA PAULU A SONEHELA TITO

1 Ame ndi Paulu, ndukuenje wa Suku, haime ndupostolo wa Yesu Kristu. Ekolelo lupange wange wupostolo, watiamẽla kekolelo lia vana va nõliwa la Suku, lina li likuata lukũlĩhĩso wa suapo wocili u tunda koku sumbila Suku. 2 Ovina viaco via sevetiwa kelavoko liomuenyo ko pui. Suku una okuti lalimue eteke a kemba wa ci likuminya tunde osimbu; 3 pole, votembo yaye ya sokiyiwa o situlula ondaka yaye okuti yi kũlĩhĩwa omo liupange woku kunda wa ñundikiwa ndomo nda tumiwa Lupopeli wetu Suku; 4 ndi sonehela Tito omõla wocili omo liekolelo tu kuete:

Ohenda ya piãla lombembua yi tunda ku Suku Isia kuenda ku Kristu Yesu Upopeli wetu, yi kale love.

5 Nda ku sia ko Kurete oco o pengulule ovina via penga,* loku nõla akulu vekongelo volupale lolupale ndomo nda ku handeleka: 6 nda okuti ulume umue wa pua eko, ulume wukãi umosi, nda o kuete omãla vakuetavo, haivo ka va vanguiwa okuti va linga ovina viumbondo,* ale va sina. 7 Momo ca sesamẽla okuti kalei ka Suku o kala mitavaso ya pua eko, ka kala ukuakulituna, ukuakutema lonjanga, ukuakukolua, ongangala,* okuti ka liveli onganyu yevĩho, 8 ukuakuyekisa akombe, ukuakusola eci ciwa, ukualondunge,* ukuesunga, ukuacili, ukuakulikandangiya, 9 haeye o kakatela kondaka yocili* luloño woku longisa, loku vetiya* poku longisa eci ca sunguluka kuenda o lemẽla vana va patãla elongiso liocili.*

10 Momo kuli alume valua va sina, vakuakumamõha, haivo olondimbiki, ca piãla enene vakuakuvetiya evamba. 11 Ci sesamẽla oku yika ovimela viavo, momo omanu vaco va kasi oku nyõla apata osi lalongiso avo omo lionganyu yevĩho. 12 Umue pokati kavo, okuti uprofeto wavo muẽle, wa popia hati: “Va Kurete olohembi lika, ovinyama via tema, haivo ovisiãi via sapa.”

13 Uvangi owu wocili. Omo liaco, amamako oku va lemẽla, okuti va kolapo* kekolelo, 14 ku ka yevelele kalusapo esanda a va Yudea kuenda kovilongua viomanu vana va yanduluka vocili. 15 Kuava va yela ovina viosi vi yela; pole, komanu vana va vĩha lava ka va kuete ekolelo lacimue ci yela, momo ovitima viavo lolondunge viavo viosi via vĩha. 16 Va popia vati va kũlĩha Suku, pole, lovilinga viavo va lekisa okuti ka vo sumbile, momo ovo vãvi, va sina kuenda kovilinga viavo viwa ka va taviwa ndaño naito.

2 Ove puãi amamako oku vangula ovina viatiamẽla kelongiso liocili.* 2 Alume akulu vendamba va likandangiye kovituwa, va linge vakuacili, vakualondunge, loku kolapo kekolelo, haivo vakuacisola kuenda vakuepandi. 3 Akãi akulu vendamba va kale lovituwa vi sivaya Suku, ka va ka linge vakualundi, pamue apika vovinyu, puãi va linge alongisi vawa, 4 okuti va lungula* akãi amalẽhe oku sola alume vavo, loku sola omãla vavo, 5 oku kala vakualondunge, oku pua eko, oku linga upange wovonjo,* oku kala vakuavituwa viwa, vakuakupokola kalume vavo, okuti ondaka ya Suku ka yi sepuiwa.

6 Vetiyavo alume amalẽhe oku kala vakualondunge, 7 lekisa kokuavo ongangu yovilinga viwa kovina viosi. Longisa ovina viocili* lesumbilo, 8 lupopi wa sunguluka,* okuti ka u pisiwa, oco vana va patãla va kutisiwe osõi kuenje ka va kuata esunga lioku tu popia lãvi.* 9 Apika va pokole ku vacime cavo kovina viosi, loku seteka oku va sanjuisa, okuti ka va va popi lãvi, 10 ka va ka nyane vacime cavo, puãi va lekise okuti va koleliwa, oco va posuise elongiso Liupopeli wetu, Suku.

11 Momo ohenda ya piãla ya Suku ya lekisiwa, loku tuala omanu vosi kepopelo. 12 Eci ci tu longisa oku likala ovina vi lipatãla locipango ca Suku kuenda oku likala oloñeyi violuali, loku kala lolondunge, vakuesunga kuenda oku sumbila Suku voluali lulo,* 13 osimbu tu talamẽla elavoko liesanju letukuluko liulamba wa velapo wa Suku tõlo kuenda Upopeli wetu Yesu Kristu, 14 una wa lieca olumue oco a tu yovole* kovilinga viosi vĩvi, loku yelisa omanu vana va tiamẽla kokuaye, haivo vakuambili kovilinga viwa.

15 Amamako oku vangula ovina evi, lungula* kuenda lemẽla lomoko va ku ĩha. Ku ka ecelele okuti umue o ku lavisa.

3 Amamako oku va ivaluisa okuti va sumbila loku pokola kolombiali kuenda kolonguluvulu, loku liangiliyila oku linga upange wosi uwa, 2 ka va ka popie umue lãvi, ka va ka kale vakuavama, pole va sunguluke, loku lekisa umbombe lomanu vosi. 3 Momo letuvo kosimbu tua kala aveke, vakuesino, tua enda oku yapuisiwa, tua kala apika voloñeyi vialua kuenda vayele, tua lingaile evĩho, loku kuata onya, tua suvukiwile loku lisuvuka pokati.

4 Pole, eci ohenda Yupopeli wetu Suku kuenda ocisola a kuetele omanu ca situluiwa, 5 (hamomoko liovilinga viesunga tua linga, puãi omo liohenda yaye), wa tu yovola omo lioku tu yelisa* kuna ku tu tuala komuenyo kuenda wa tu lingisa omanu vokaliye mekonda liespiritu sandu. 6 Eye wa tu ĩha ocali* espiritu liaco vonduko ya Yesu Kristu Upopeli wetu, 7 okuti noke yoku tendiwa ndavakuesunga omo liohenda yaye ya piãla, tu linga vakapiñala omo lielavoko liomuenyo ko pui.

8 Olondaka evi via koleliwa kuenda ndi yongola okuti o kũlĩhĩsa ciwa ovina evi, oco okuti vana va tava ku Suku va tiamisila utima wavo kovopange avo awa. Ovina evi viwa kuenda vi kuatisa omanu.

9 Pole, yuvula olombangulo viuveke, loku konomuisa ovikoti, oku lihoyisa kuenda oku liyakela Ocihandeleko, momo ovio ka vi kuatisa, havio ka vi kuete esilivilo. 10 Omunu wosi o sandula elongiso liesanda, noke yoku lunguiwa* onjanja yatete leyi yavali, litepa laye, 11 momo wa kũlĩha okuti omunu waco wa yapuka vonjila kuenda o kasi oku linga ekandu kuenje o lipisa eye muẽle.

12 Eci ndi tuma Artema, ale Tukiko kokuove, yayulako oku iya kokuange ko Nikopoli, momo oko nda sokiya oku kala otembo yombambi. 13 Likolisilako oku kuatisa Sena, una wa kũlĩha ciwa Ocihandeleko kuenda Apolosi okuti ka va kambela cimue kungende wavo. 14 Vamanjetu va lilongisevo oku linga upange uwa oco va kuatise eci ku kala esukila, okuti ka va kala ndava ka va imi apako.

15 Vosi va kasi lame va ku tumisa ovilamo. Lamisapo vosi va tu sole vekolelo.

Ohenda ya piãla yi kale lene vosi.