UKANDA PAULU A SONEHELA VA HEVERU

1 Suku kosimbu vonduko yovaprofeto wa enda oku vangula la vakukululu yetu olonjanja vialua kuenda volonjila via litepa. 2 Koloneke vilo via sulako, o vangula letu vonduko Yomõlaye, una eye a nõla kapiñala kovina viosi, haeye una okuti vonduko yaye wa panga oluali.* 3 Eye esetahãlo liulamba wa Suku, haeye ocindekaise ca suapo cekalo Liaye kuenda o tata ovina viosi londaka yunene waye. Kuenje noke yoku yelisa akandu etu, wa tumãla kondio ya Suku kilu. 4 Kuenje eye wa velapo ovangelo kuenda onduko a piñala ya velapo, okuti olonduko viavo vi sule.

5 Ndeci, helie pokati kovangelo Suku a sapuila hati: “Ove vumõlange; etaili nda linga isiove”? Kuenda vali hati: “Ame muẽle ndinga isiaye kuenda eye o linga omõlange”? 6 Puãi eci a nena vali voluali Nuñulu yaye, eye wa popia hati: “Ovangelo vosi va Suku vo kekamẽle.”

7 Handi vali, wa tukula eci catiamẽla kovangelo hati: “Eye wa lulika ovangelo vaye ndoviluvo viespiritu kuenda olondingupange viaye* ndulienge wondalu.” 8 Oku tukula eci catiamẽla Komõla eye wa popia hati: “Suku eye ocalo cove oloneke vi enda ño-o hũ ka vi pui kuenda epangati Liusoma wove, epangati liesunga. 9 Ove o sole esunga, haive wa suvuka evĩho. Oco Suku, okuti Suku yove a ku wavekela lulela wesanju lialua okuti, vakuene ci sule.” 10 Kuenda vali hati: “A Ñala, tunde kefetikilo wa seveta oluali kuenda ilu ovopange ovaka ove. 11 Ovio vi nyõleha, ove puãi o kala otembo yosi; kuenda viosi vi kuka ndeci uwalo, 12 kuenje o vi muña ndocikutu, ale nduwalo kuenda ovio vi ka pongoluiwa. Pole, ove ku pongoloka, anyamo ove ka a pui.”

13 Helie pokati kovangelo eye a sapuila hati: “Tumãla kondio yange, toke eci ñapa ovanyãli vove ndociliatelo colomãhi viove”? 14 Havosiko hẽ oviluvo viespiritu koku linga upange u kola,* haivo va tumiwa oku kuatisa vana va piñala eyovo?

2 Ca tu sesamẽla oku yevelela lutate kovina tu yeva, okuti lalimue eteke tu yapuisiwa. 2 Momo nda ondaka ya sapuiwa lovangelo ya linga ocili kuenje wosi wa sina loku linga ekandu o tambula eyambulo lia lisoka lesunga, 3 etu hẽ tu puluka ndati nda tu nyehula eyovo lia piãla? Momo olio lia sapuiwa tete vocakati ca Ñala yetu kuenda ava vo yeva va tu li imbila uvangi, 4 osimbu okuti Suku wa li imbilavo uvangi lolondimbukiso, lovikomo,* lovilinga viñi viñi vinene kuenda espiritu sandu lia eciwa ndomo eye a panga.

5 Momo oluali lu laika oku iya, luna tu kasi oku vangula, eye ka lu vialisile kovangelo. 6 Ulume umue onjanja yimue wa imba uvangi wokuti: “Omunu hẽ nye okuti u wivaluka, pamue omõla omunu okuti u tata? 7 Ove wo kambisa naito lovangelo; wo futisa lulamba, lesumbilo kuenda wo vialeka kovopange ovaka ove. 8 Ovina viosi ove wa vi pokuisila vemehi liolomãhi viaye.” Poku pokuisa ovina viosi vokuaye, Suku ka sile cimue okuti ka ci vialekele vokuaye. Cilo ka tu lete handi okuti ovina viosi via vialekiwa ale vokuaye. 9 Puãi tu lete okuti Yesu, una wa kambisiwile naito lovangelo, cilo wa futisua lulamba lesumbilo, haeye wa talisiwa ohali yoku fa, okuti omo liohenda ya piãla ya Suku o mahẽla omanu vosi oku fa.

10 Momo ca sunguluka okuti Suku una okuti ovina viosi vi kasiko mekonda liaye, oco a muise ulamba omãla valua, wa ecelela okuti Usongui wa Velapo weyovo liavo o talisiwa ohali. 11 Ci kale una o kolisa la vana va kolisiwa vosi yavo va tunda ku isia umuamue, oco Yesu ka kuatelele osõi yoku va tukula hati vamanjaye, 12 ndeci eye a popia hati: “Ndi sapula onduko yove ku vamanjange; pokati kekongelo hu sivaya lovisungo.” 13 Kuenda vali hati: “Ndi kolela kokuaye.” Kuenda vali hati: “Tala! ame ulo, kumue lomãla vana Yehova a nyiha.”

14 Omo okuti “omãla” va kuete osonde letimba, eye layevo wa linga ukuasonde kuenda ukuetimba, okuti omo liolofa viaye o nyõla una o kasi lunene woku koka olofa okuti, Eliapu, 15 kuenje eye o pondola oku yovola vosi va kala apika omuenyo wavo wosi omo liusumba wokufa. 16 Momo eye ka kasi oku kuatisa ovangelo, puãi o kasi oku kuatisa ocitumbulukila* ca Avirahama. 17 Kuenje wa lisetahãla la “vamanjaye” kovina viosi, okuti o linga ocitunda cinene cohenda, haico ca koleliwa kovina viatiamẽla ku Suku, oco a ece ocilumba coku tuvika akandu omanu. 18 Omo okuti eye wa talisiwa ohali eci a nyikiwa, o pondola oku kuatisavo vana va kasi oku nyikiwa.

3 A vamanji va kola, haene watiamẽli kekovongo lio kilu,* sokololi upostolo haeye ocitunda cinene una tua limbuka okuti*—Yesu. 2 Eye wa koleliwile la Una wo nõla, ndeci Mose a koleliwile vonjo yosi ya Suku. 3 Eye* wa tendiwile okuti o sesamẽla ulamba walua okuti Mose ci sule, momo una wa tunga onjo wa sumbiwa calua okuti onjo yaco ci sule. 4 Ocili okuti onjo yosi ya tungiwa la umue, pole, u wa tunga ovina viosi Suku. 5 Kuenje Mose wa vumba ndukuenje wa koleliwa vonjo yosi ya Suku oco a linge ombangi yovina via laikele oku sapuiwa noke, 6 pole, Kristu wa vumba Ndomõla wa koleliwa vonjo ya Suku. Etu tunjo ya Suku nda tu kakatela kutõi wetu woku vangula kuenda kelavoko lietu lina tu sanjukila toke kesulilo.

7 Kuenje ndeci espiritu sandu lia popia hati, “Etaili nda ene wa pokoli kondaka yaye, 8 ko ka tĩlisi ovitima viene ndeci onyeño ya wenguiwa, pamue ndeci keteke lieyonjo vekalasoko, 9 eci vakukululu yene va ndi yonjele loku ndi seteka, ndaño okuti va mola ovilinga viange vokuenda kueci ci soka 40 kanyamo. 10 Eli olio esunga lieci nda temẽlele ocitumbulukila caco kuenda nda popia hati: ‘Otembo yosi va lueya ño lovitima viavo kuenda ka va kũlĩhĩle olonjila viange.’ 11 Ndeci nda lisingile lonyeño yange siti: ‘Ka va ka iñila vepuyuko liange.’”

12 A vamanji lunguki okuti lomue pokati kene omo liusumba o kuata utima wa vĩha haiwo ka u kuete ekolelo, poku tinduka ku Suku o kasi lomuenyo; 13 pole, amamiko oku lipamisa pokati eteke leteke osimbu citava oku tukula hoti “Etaili,” sanga umue pokati kene o tĩlisa utima waye poku yapuisiwa lunene wekandu. 14 Momo cilo tu kuata lika onepa* ku Kristu nda toke kesulilo tua kakatela kekolelo tua kuata kefetikilo. 15 Ndeci ca popiwa citi, “Etaili nda ene wa pokoli kondaka yaye, ko ka tĩlisi ovitima viene ndeci onyeño ya wenguiwa.”

16 Velie va yeva kuenje handi va wengula onyeño ya Suku? Havosiko hẽ vana va tundile Kegito okuti va songuiwa la Mose? 17 Velie Suku a temẽlele vokuenda kueci ci soka 40 kanyamo? Havanako hẽ va linga ekandu, okuti ovivimbi viavo via kupukila vekalasoko? 18 Kuenda vali havanako hẽ eye a lisingile okuti ka va iñila vepuyuko liaye? Havanako hẽ va lekisa esino? 19 Kuenje tua limbuka okuti ovo ka va iñilile omo liekambo liekolelo.

4 Omo okuti kua kamba ohuminyo yoku iñila vepuyuko liaye, tu lunguki* sanga omo liusumba umue pokati kene o tendiwa okuti ka sesamẽla epuyuko liaco. 2 Momo letuvo tua yeva olondaka viwa ndeci ovo; pole, ondaka va yeva ka ya va kuatisile, omo ka va kuatele ekolelo ndeli liava va pokola. 3 Etu tu kuete ekolelo lioku iñila vepuyuko, ndeci eye a popia hati: “Nda lisinga lonyeño yange siti, ‘Ka va ka iñila vepuyuko liange,’” ndaño okuti wa malusula ovopange aye tunde koku sevetiwa kuoluali. 4 Momo Vocisonehua cimue mu tukula eteke liepanduvali hati: “Suku wa puyuka kupange waye wosi keteke liepanduvali,” 5 kuenda mua sonehiwa vali hati: “Ka va ka iñila vepuyuko liange.”

6 Omo okuti kua kamba vamue oco va iñile vepuyuko kuenda vana va yeva tete olondaka viwa ka va iñilile omo liesino, 7 eye wa sokiya vali eteke limue poku vangula vosamo ya Daviti eci pa pita osimbu yalua yiti, “Etaili”; ndeci ca popiwa ale hati, “Etaili nda wa pokoli kondaka yaye, ko ka tĩlisi ovitima viene.” 8 Momo nda Yehosua wa va songuilile kepuyuko, Suku nda ka popele noke eteke likuavo. 9 Kuenje handi kua kamba esambata liepuyuko komanu va Suku. 10 Momo ulume wa iñila vepuyuko lia Suku, wa puyukavo kupange waye, ndeci Suku a puyuka kupange waye.

11 Tu likolisiliko oku iñila vepuyuko liaco, okuti lomue o kuama ongangu yaco yesino. 12 Momo ondaka ya Suku yi kasi lomuenyo kuenda yi kuete unene, oyo ya tua calua okuti osipata ya tua olonele vivali yi sule, yi tepisa eci omunu a tuwa kilu leci a tuwa vokati kuenda asokoluilo lupuma, haiyo yi tẽla oku limbuka ovisimĩlo lolonjongole viutima. 13 Ka kuli ociluvo okuti ca salamisua kovaso a Suku, puãi ovina viosi kokuaye via situluiwa kuenda vi letiwe laye, una okuti o ka tu sombisa.

14 Omo okuti tu kuete ocitunda cinene ca velapo haico ca iñila kilu okuti, Yesu Omõla a Suku, tu amamiko oku kakatela ku una tua kolela. 15 Momo tu kuete ocitunda cinene okuti ca kapako oku hongua kuetu, haico ca setekiwa kovina viosi ndetu, pole, ka ci kuete ekandu. 16 Tu amẽli kocalo cohenda ya piãla lutõi woku vangula, oco tu tambule ocali kuenda oku sanga ohenda ya piãla eci tu sukila ekuatiso.

5 Momo ocitunda cinene cosi ci tunda pokati komanu, ca nõliwila oku va lingila upange wa Suku, okuti ceca ovilumba vioku lumbila akandu. 2 Eye o tẽla oku kuatela ocikembe* vakuanumbi kuenda vakuakulueya,* momo eye muẽle wa liyakavo lehonguo, 3 omo liaco, eye o sesamẽlavo oku eca ovilumba vioku lumbila akandu aye muẽle ndeci a lumbila akandu omanu.

4 Lomue o likapa esumbilo liaco eye muẽle, pole, o li tambula lika eci a nõliwa la Suku, ndeci Arone a nõliwilevo. 5 Kristu layevo ka lisivayele eye muẽle omo lioku kala ocitunda cinene, puãi wa sivayiwa la Una wa popia eci catiamẽla kokuaye hati: “Ove vumõlange; etaili nda linga Isiove.” 6 Ndeci eye a popiavo konepa yikuavo hati, “Ove vucitunda otembo ka yi pui ndeci Melikisedeke.”

7 Eci Kristu a kala palo posi* wa linga alombelo lapingilo ku Una o tẽla oku u popela kolofa, loku lila kuenda asuelẽla kuenje olohutililo viaye via yeviwa omo wa sumbila Suku. 8 Ndaño wa kala omõla, wa lilongisa epokolo omo liohali a talisiwa. 9 Kuenje noke yoku kanguiwa, wa linga usongui weyovo ka li pui lia vosi va pokola kokuaye, 10 momo eye wa nõliwa la Suku oco a linge ocitunda cinene ndeci Melikisedeke.

11 Tu kuete ovina vialua vioku vangula catiamẽla kokuaye, pole, ca tĩla oku vi lombolola omo wa lingi ovisitatũi koku yeva kuene. 12 Ndaño okuti cilo wa lingi alongisi, pole, vu sukila okuti umue u longisi vali ovina viefetikilo violondaka vi kola via Suku kuenda handi vu sukila asenjele, hakuliako kua kõla. 13 Momo wosi o li tekula lasenjele ka kũlĩhĩle ondaka yesunga, omo eye omõla. 14 Okulia kua kõla kuakulu, okuti omo lioku pindisa olondunge* viavo va tẽla oku tepisa pokati keci ciwa leci cĩvi.

6 Omo okuti tua siapo alongiso atete atiamẽla ku Kristu, tu likolisiliko oku kala akulu vendamba, hakusevetako vali ociseveto ndeci coku likekembela kovilinga viaño, koku kolela Suku, 2 kuenda elongiso liatiamẽla kapapatiso, koku kapa ovaka, kepinduko liava va fa kuenda ekanga ka li pui. 3 Eci oco tu linga nda Suku wa panga.

4 Momo catiamẽla ku vana va tava ocinyi ca Suku, haivo va seteka ale ocali ci tunda kilu kuenda va tambula espiritu sandu, 5 haivo va seteka ondaka yiwa ya Suku, lovonene oluali lu laika oku iya,* 6 va yapuka kuenje ka ci tẽliwa vali ovo oku likekembela, momo va valela vali Omõla a Suku kuti kuenda vo pembuila kovaso omanu. 7 Osi yi tambula asumũlũho a tunda ku Suku eci yi nyua ovava ombela a loka loka kuenje ima ovikũla vi ­kuatisa vana va vi lima. 8 Pole, nda ima ocambanda lolosongo, yi linga ocipembe kuenje yi siñaliwa kuenda esulilo liayo oku pia londalu.

9 Puãi kokuene, a vamanji wa soliwi, ndaño tu popia ndomo, tua kolela kovina via velapo, okuti vina viatiamẽla keyovo. 10 Momo Suku hokuanyako okuti ivalako upange wene, locisola wa lekisili onduko yaye koku vumba olosandu, loku amamako oku va vumba. 11 Puãi etu tu yongola okuti omunu lomunu pokati kene o lekisa ombili yimuamue, okuti vu kolela kelavoko toke kesulilo, 12 okuti ka vu lingi vakuawesi, pole, vu kala olosetukuli via vana okuti omo liekolelo kuenda epandi va piñala olohuminyo.

13 Momo eci Suku a linga ohuminyo yaye ku Avirahama, omo okuti ka kua kaile umue wa velapo a lisingila, poku lisinga, wa litukula eye muẽle, 14 poku popia hati: “Ndi ka ku sumũlũisa muẽle kuenda hu luisa muẽle.” 15 Avirahama noke yoku lekisa epandi, wa tambula ohuminyo yaco. 16 Momo omanu va lisinga, va lisingila umue wa velapo kuenje kolonamalãla viavo viosi, oku lisinga oko kueca uvangi wokuti eci va kasi oku vangula ocili. 17 Cimuamue haico okuti, eci Suku a sokiya oku lekisa ku vakapiñala vaye okuti ocipango* caye ka ci pongoloka, wa ci likuminya* loku lisinga, 18 omo liovina vivali ka vi pongoloka vina okuti ka citava okuti Suku o kemba, etu tua tilila vocitililo tu pamisiwa lelembeleko oco tu kakatele kelavoko lia tu kapiwila kovaso. 19 Tu kuete elavoko eli ndonjundo ya pama vomuenyo wetu kuenda tua kolela okuti tu iñila vokati kongumbo, 20 muna Yesu a tu pitila kovaso ndusongui, haeye wa linga ocitunda cinene otembo ka yi pui ndeci Melikisedeke.

7 Melikisedeke soma yo Salemi, ocitunda ca Suku Tõlo, wa lisanga la Avirahama eci a tiuka koku kundula olosoma, yu wo sumũlũisa, 2 kuenje Avirahama wo wĩha* onepa yekũi yovina viosi. Tete onduko yaye ya lombolokele okuti “Soma Yesunga” kuenda soma yo Salemi, okuti “Soma Yombembua.” 3 Ka kuatele isia ndaño ina, ale ocikoti cepata, ka kuatele efetikilo lioloneke pamue esulilo liomuenyo, puãi wa kala Ndomõla a Suku, haeye wa kala ocitunda otembo yosi.*

4 Limbuki unene ulume waco a kuata, una Avirahama, utue wepata,* a ĩha onepa yekũi viovina via velapo a pundile. 5 Ocili okuti ndomo ca lekisiwa Vocihandeleko, omãla va Lewi vana va tambula ocikele cupange wutunda, va handelekiwile oku kongola onepa yekũi komanu, okuti ku vamanjavo, ndaño va kala ovitumbulukila* via Avirahama. 6 Pole, ulume waco okuti ka tundile kocikoti cepata liavo, wa tambula ku Avirahama onepa yekũi kuenda wa sumũlũisa una wa kuatele olohuminyo. 7 Cilo ka ci patãliwa okuti una o sule o sumũlũisiwa lu wa velapo. 8 Konepa yimue, alume va fa fa ovo va tambula onepa yekũi, pole, konepa yikuavo, una o tambula imbiwa uvangi wokuti o kasi lomuenyo. 9 Citava oku popiwa okuti ndaño Lewi, una wa tambula onepa yekũi, wa feta onepa yekũi vonduko ya Avirahama, 10 momo eye handi wa kala ocitumbulukila* ca laikele oku iya ca kukululu yaye eci Melikisedeke a lisanga laye.

11 Nda oku lipua ku iya lutunda wa Lewi (omo ca kala Ocihandeleko omanu va tambula), momo lie ku sukiliwila vali oku iya ocitunda cikuavo oco ci linge nda Melikisedeke okuti ndeci Arone hacoko? 12 Momo nda ku lingiwa epongoloko liutunda, ci sukilavo oku pongolola Ocihandeleko. 13 Ovina evi via popiwila omunu una wa tunda kepata likuavo, lina okuti lomue wa la vumba kowatale. 14 Momo ca sunguluka okuti Ñala yetu wa tunda kepata lia Yuda, okuti Mose ka la tukuila epata liaco upange wutunda.

15 Kuenje ca sunguluka okuti ku iya ocitunda cikuavo ca tuwa nda Melikisedeke, 16 okuti ka ca lingile ocitunda omo liocihandeleko, pamue ovina via palo posi, te lunene womuenyo umue ka u nyõleha. 17 Momo co wimbiwila uvangi wokuti: “Ove vucitunda otembo ka yi pui ndeci Melikisedeke.”

18 Ocihandeleko cosimbu ca kapiwa ponele omo ca hongua kuenda ka ci kuete esilivilo. 19 Momo Ocihandeleko ka ca lingile lacimue ca lipua, puãi ca nena elavoko lia velapo, lina okuti li tu ecelela oku amela ku Suku. 20 Elavoko liaco ka lieyile olio muẽle, te loku lisinga kuenda oku likuminya, 21 (momo kuli alume okuti va linga ovitunda pole, ka kua kale oku likuminya loku lisinga, puãi kuli oku lisinga kumue okuti kua Una wa popia catiamẽla kokuaye hati: “Yehova wa lisinga kuenda eye ka litiukamo,* ‘Ove vucitunda otembo ka yi pui’”), 22 Yesu wa linga ohuminyo* yocisila ca velapo. 23 Valua nda va linga ovitunda omo lioku piñala, pole, mekonda liokufa ca va tateka oku amamako, 24 puãi omo okuti eye o kasi lomuenyo otembo ka yi pui, utunda waye ka u kuete kapiñala. 25 Kuenje eye o tẽla oku popela vana va likutilila ku Suku vonduko yaye, momo otembo yosi o va pingilako.

26 Omo liaco, ca tu sungulukila oku kuata ocitunda caco cinene okuti ukuesunga, wa pua eko, wa pua etondelo, wa litepa la vakuakandu kuenda wa kemalisua kilu liovailu. 27 Eye wa litepa lovitunda viaco vinene, omo ka sukila oku eca ovilumba eteke leteke, okuti tete o lumbila akandu aye muẽle, noke omanu, momo wa ci linga poku lilumba onjanja yimosi eci a lieca eye muẽle olumue. 28 Momo ndomo ca lekisiwa Vocihandeleko, alume va nõliwile ndovitunda vinene va honguele, pole, ondaka yohuminyo loku lisinga okuti yeya noke Yocihandeleko, ya nõla omõla, una wa kanguka otembo ka yi pui.

8 Cilo ondaka ya velapo tu kasi oku popia yeyi okuti: Tu kuete ocitunda ­cinene ca lisoka leci kuenda eye wa tumãla kondio yocalo ca Suku kilu, 2 okuti ukuakuvumba* kocitumãlo ci kola kuenda kombalaka yocili, yina Yehova a tunga, okuti omunu hayeko. 3 Momo ocitunda cinene cosi ci nõliwila oku eca olombanjaile lovilumba; kuenje ca sesamẽlele okuti omunu waco o kuatavo cimue coku lumba. 4 Nda eye wa kaile kilu lieve, nda ka lingile ocitunda, momo kuli ale ovitunda vi lumba lumba ndomo ca tukuiwa Vocihandeleko. 5 Omanu vaco va lingainga upange u kola woku lumba lumba ndocindekaise kuenda ulembo wovina vio kilu; ndeci Mose a linga eci a laikele oku tunga ombalaka, okuti wa tambula onumbi ya Suku yiti: Momo Eye wa popia hati: “Kũlĩhĩsa okuti o linga ovina viosi loloseteko vialio ndomo va ku vi lekisa vomunda.” 6 Pole, cilo Yesu wa sanga onjila ya velapo yoku linga upange,* momo wa linga mitakati yocisila ca velapo, cina ca sevetiwa kolohuminyo via velapo.

7 Nda ocisila catete ca puile eko, ocisila cavali nda ka ca sukiliwile. 8 Momo eye wa sanga eko komanu eci a popia hati: “‘Tala! Ku iya oloneke,’ oco Yehova a popia, ‘okuti ndi linga ocisila cokaliye lonjo ya Isareli kuenda onjo ya Yuda. 9 Ocisila caco ka ci lisoki leci nda lisilile la vakukululu yavo, eci nda va kuata peka loku va songuila oco va tunde vofeka Yegito, momo ka va kapeleko ocisila cange kuenje nda liwekapo oku va tata,’ oco Yehova a popia.

10 “‘Eci oco ocisila ndi linga lonjo ya Isareli noke yoloneke viaco, oco Yehova a popia. ‘Ndi kapa ocihandeleko cange volonulo viavo, loku ci soneha vovitima viavo. Kuenje ndi linga Suku yavo kuenda ovo va linga omanu vange.

11 “‘Kuenje lomue o longisa vali onungi lukuavo, pamue oku longisa manjaye hati: “Kũlĩha Yehova!” Momo vosi va ka ñulĩha, oku upisa kuava vatito toke kuava vanene pokati kavo. 12 Momo ngecela ovilinga viavo vĩvi kuenda akandu avo si a ivaluka vali.’”

13 Eci eye a popia okuti “ocisila cokaliye,” wa lekisa okuti, ocisila catete ca pita. Kaliye eci ci kasi oku pita loku kuka, pa kamba naito oco ci takate.

9 Puãi ocisila catete ca kala lovihandeleko vioku linga upange u kola kuenda ocitumãlo caco ci kola kilu lieve. 2 Momo vohondo yombalaka yatete mua tungiwa ohondo mua kala ociyekelo condiyelo, omesa, olombolo via tumbikiwa;* kuenda ohondo yaco ya tukuiwile okuti Ocitumãlo ci Kola. 3 Konyima yongumbo yavali kua kala ohondo yombalaka yi tukuiwa hati, Ohondo yi Kola Koku Kola. 4 Vocitumãlo caco mua kala ociyukilo culu, ocikasia covisila ca lañiwa lulu kolonele viosi okuti vokati kaco mua kala ombia yulu mua kapiwa omana, kumue lombueti ya Arone ya yova kuenda ovawe ovisila; 5 kuenje kilu liaco kua kala va keruvi vulamba va vindikiya omangu yohenda.* Yilo hayoko otembo yoku lombolola ovina evi.

6 Noke yoku tunga ndoco ovina viaco, ovitunda vi iñila vohondo yombalaka yatete va lingaila upange u kola; 7 pole, ocitunda cinene ci iñila lika liaye vohondo yombalaka yavali onjanja yimosi vunyamo, puãi wa sukilile oku ambata osonde yoku lumbila akandu aye muẽle kuenda akandu omanu va lingila vonumbi. 8 Kuenje espiritu sandu li lekisa ciwa okuti onjila yi tuala kocitumãlo ci kola handi ka ya situluiwile osimbu ombalaka yatete yi tãi. 9 Ombalaka yaco ocindekaise coloneke vilo kuenda ca sokiyiwa okuti ku eciwa olombanjaile ale ovilumba. Pole, ovina evi havioko vi ecelela utima womunu oku linga ciwa upange u kola. 10 Ovio te vi lingiwa lika lokulia, lovinyua, lolonjila viñi viñi vioku yelisa omanu kuenda ovina.* Ovio via kuata ovihandeleko viatiamẽla ketimba kuenda via kisikiwile toke kotembo ya sokiyiwa oco ovina vi kale ciwa.

11 Eci Kristu eya ndocitunda cinene covina viwa vi laika oku iya, wa pita vombalaka yinene haiyo ya velapo okuti ka ya tungiwile lovaka, te loviluvo vio kilu. 12 Eye ka iñilile vocitumãlo ci kola losonde yolohombo kuenda yolonale, te losonde yaye muẽle onjanja yimosi, oco a tu sangeleko eyovo ka li pui. 13 Nda okuti osonde yolohombo, yolongombe kuenda etiko liolonema* lia enda oku nyiliwa komanu va vĩhisua ya va kuatisa okuti va yelisua katimba, 14 osonde ya Kristu hẽ siti ya piãla vali enene, omo eye a kuama espiritu sandu ka li pui loku lieca ku Suku okuti wa pua eko, loku yelisa ovitima vietu kovilinga viaño oco tu linge upange u kola ku Suku o kasi lomuenyo?

15 Eli olio esunga lieci eye a lingila mitakati yocisila cokaliye, okuti omo kueya okufa ku nena eyovo liavo omo liocisembi cakandu atiamẽla kocisila catete, vana va kovongiwa va tambula ohuminyo yocipiñalo ka ci pui. 16 Omo okuti kuli ocisila la Suku, omunu wa linga ocisila caco te wa fa, 17 momo ocisila ci kuata lika esilivilo omo lioku fa, pole, osimbu omunu wa linga ocisila caco a kasi lomuenyo, ocisila caco ka ci kuata esilivilo. 18 Ocisila catete ca kuata lika esilivilo* omo liosonde. 19 Eci Mose a sapuila omanu vosi olonumbi Viocihandeleko, wa kuata osonde yolonale kuenda yolohombo, ovava, lovonya a kusuka, lovisapa kuenje wa nyila velivulu* lo komanu vosi, 20 yu wa popia hati: “Eyi osonde yocisila Suku o handeleki oku tẽlisa.” 21 Eye wa nyilavo osonde kombalaka kuenda kovikuata viosi viupange u kola.* 22 Ocili, ndomo ca lekisiwa Vocihandeleko ovina viosi vi yelisiwa losonde, pole, nda osonde ka yi pesiwa ka kuli ongecelo.

23 Kuenje ca sukilile ocindekaise cokuti ovina vio kilu vi yelisiwa lonjila eyi, puãi ovina vio kilu via sukilile oku yelisiwa lovilumba via velapo okuti evi vi sule. 24 Momo Kristu ka iñilile vocitumãlo ci kola ca tungiwa lovaka, haico ca setahãla eci cocili, pole, wa iñila kilu okuti cilo o tu molẽhela kovaso a Suku. 25 Eci ka ca lingiwile okuti o lilumba olonjanja vialua, ndeci ocitunda cinene ca enda oku iñila vocitumãlo ci kola unyamo lunyamo losonde okuti hayayeko. 26 Nda oco, nda wa tala ohali olonjanja vialua tunde koku sevetiwa kuoluali. Pole, cilo kesulilo lioluali* wa li molẽhisa onjanja yimosi oco a imule akandu poku lilumba eye muẽle. 27 Ndeci omanu vosi va fa onjanja yimosi kuenje noke ku iya esombiso, 28 Kristu wa liecavo onjanja yimosi oku ambata akandu omanu valua; kuenje o molẽha vali onjanja yavali halokuimulako ekandu, puãi oku popela vana va lavoka kokuaye.

10 Ocihandeleko, ulembo wovina viwa vi laika oku iya, pole, ovina viaco haviociliko, momo oco* ka ci tẽla oku kanguisa vana va ecaeca ovilumba vimuamue unyamo lunyamo. 2 Handi vali, vana va linga upange u kola nda va yelisiwile ale okuti ka va kuata vali ekandu, siti nda ka ca sukililile oku eca vali ovilumba? 3 Puãi ovilumba viaco via kala onjivaluko yakandu unyamo lunyamo, 4 momo osonde yolongombe kuenda yolohombo ka imula akandu.

5 Kuenje eci Yesu eya voluali, wa popia hati: “‘Kua yonguile ovilumba lolombanjaile, pole, wa ndi pongiyila etimba. 6 Kua tavele olombanjaile vioku pia elisi kuenda viekandu.’ 7 Noke nda popia siti: ‘Tala! ndeya (vociña* mua sonehiwa eci catiamẽla kokuange) oku linga ocipango cove, A Suku.”’ 8 Tete wa popia hati: “Kua yonguile ndaño oku tava ovilumba vioku eca, levi vioku yoka, levi vioku pia elisi, levi viekandu”—okuti ovilumba vi eciwa omo Liocihandeleko— 9 noke wa popia hati: “Tala! ndeya oku linga ocipango cove.” Eye wa imula eci catete oco a tumbike eci cavali. 10 Omo “liocipango” caco tua kolisiwa mekonda liocilumba cetimba lia Yesu Kristu ca eciwa onjanja yimosi.

11 Handi vali, ovitunda viosi via enda oku linga upange u kola* eteke leteke kuenda oku eca ovilumba vimuamue, vina okuti ka vi tẽla oku imula akandu. 12 Pole, eye wa eca ocilumba cakandu otembo ka yi pui kuenda wa tumãla kondio ya Suku, 13 tunde opo o kasi oku talamẽla toke eci ovanyali vaye va kapiwa ndociliatelo colomahi viaye. 14 Omo liocilumba cimosi, eye wa linga okuti vana va kolisiwa va li pua otembo ka yi pui. 15 Kuenje espiritu sandu li tu imbilavo uvangi, momo noke lia popia liti: 16 “‘Eci oco ocisila ndi linga lavo noke yoloneke viaco,’ oco Yehova a popia. ‘Ndi kapa ovihandeleko viange vovitima viavo kuenda ndi vi soneha volonulo viavo.”’ 17 Lia popia vali liti: “Akandu avo si a ivaluka vali ndaño ovilinga viavo vĩvi.” 18 Omo liaco, apa pali ongecelo yaco, ka ci sukila vali oku eca ocilumba cekandu.

19 A vamanji, omo okuti tu kuete utõi* woku iñila vonjila yocitumãlo ci kola omo liosonde ya Yesu, 20 yina eye a tu ikuilako* okuti onjila yokaliye, haiyo yomuenyo omo liongumbo okuti etimba liaye, 21 kuenda tu kuete ocitunda cinene vonjo ya Suku, 22 omo liaco, tu ameli lutima wa sunguluka haiwo wekolelo, okuti ovitima vietu vi yelisiwa kovisimĩlo vĩvi kuenda etimba lietu li sukuiwa lovava a yela. 23 Tu kakateli kuvangi uwa welavoko lietu okuti ka tu konyoha, momo u wa likuminya wa kolelua. 24 Tu likapiko* pokati ndomo tu livetiya locisola kuenda ovilinga viwa, 25 ka tu ka liwekipo oku liongolola kolohongele vietu ndeci vamue va lingainga, pole, tu lipamisi pokati, ca piãla enene eci tu limbuka okuti eteke li kasi ocipepi.

26 Momo nda tu lingainga ekandu ocipango noke yoku tambula ukũlĩhĩso wa suapo wocili, ka ku kala vali ocilumba ci imula akandu, 27 pole, ku kala lika elavoko li koka usumba woku sombisiwa kuenda onyeño iya ndondalu oku nyõla ovanyali. 28 Wosi wa tomba Ocihandeleko ca eciwa ku Mose, o fa okuti ka ku lekisiwa ohenda ndaño luvangi wolombangi vivali ale vitatu. 29 Eyambulo lipi vu sima okuti olio omunu a sesamẽla omo lioku liatela Omõla a Suku, loku pembula osonde yocisila yina a kolisiwa layo, kuenda wa fũkĩlisa espiritu liohenda ya piãla loku li sepula? 30 Momo tua kũlĩha Una wa popia hati: “Efetuluinyo liange; ame fetuluinya.” Kuenda vali hati: “Yehova o ka sombisa omanu vaye.” 31 Oku kupukila peka lia Suku o kasi lomuenyo ci koka usumba.

32 Kuenje ivaloki oloneke vio kosimbu ndomo wa pandikisi kohali yalua, eci ocinyi co tuili. 33 Olonjanja vialua wa fũkĩlisui loku talisiwa ohali kovaso owiñi* kuenje olonjanja vimue wa kuatisi* vana va pitavo lovitangi viaco. 34 Wa lekisi ohenda ku vana va kala vokayike, wa sanjukili ndaño ovina viene via pundiwa, loku kũlĩha okuti vu kuete eci ca velapo, haico ka ci pui.

35 Handi vali, ko ka inasi utõi wene,* haiwo u nena onima yalua. 36 Momo vu sukila oku kuata epandi oco okuti noke yoku linga ocipango ca Suku, vu mola oku tẽlisiwa kuohuminyo. 37 Kuenje “okasimbu kaño” kuenda “una o laika oku iya, iya muẽle ka cilua.” 38 “Puãi ukuesunga wange o muila omuenyo kekolelo” kuenje “nda o tokoka siu* sanjukila.” 39 Etu hatuakuakutokokako loku nyõleha, puãi tu kuete ekolelo okuti li popela omuenyo wetu.

11 Ekolelo ociseveto covina vi lavokaiwa, halio uvangi* wovina ka vi molaiha. 2 Omo liekolelo liaco, omanu vo kosimbu* va tambula uvangi wokuti Suku wa va tava.

3 Omo liekolelo, tua limbuka okuti oluali* lua lulikiwa londaka ya Suku, oco okuti eci ka ci letiwe ci muiwa kovina vi letiwe.

4 Omo liekolelo, Abele wa eca ku Suku ocilumba ca velapo okuti ca Kaini ci sule kuenje mekonda liekolelo liaco wa tambula uvangi wokuti ukuesunga, momo Suku wa tava* ombanjaile yaye, okuti ndaño wa fa, lopo o kasi oku vangula omo liekolelo liaye.

5 Omo liekolelo, Enoke wa sondoluiwa okuti ka moli oku fa kuenje ka sangiwile vali omo Suku wo sondolola; momo osimbu ka sondoluiwile wa tambula uvangi wokuti wa sanjuisa Suku. 6 Oku sanjuisa Suku ka ku tẽliwa te lekolelo, momo wosi amela ku Suku loku u fendela o sukila oku kolela okuti eye o kasi lomuenyo kuenda eca onima kuava vo sanda lutima wosi.

7 Omo liekolelo, Noha noke yoku tambula elungulo lia Suku liovina ka vi muiwa, wa lekisa esumbilo ku Suku kuenda wa tunga ocimbaluku oco a popele vakuanjo yaye; omo liekolelo liaco eye wa pisa oluali kuenje wa linga kapiñala kesunga li tunda kekolelo.

8 Omo liekolelo, Avirahama eci a kovongiwa wa pokola poku enda kocitumãlo a laikele oku tambula ndocipiñalo; eye wa enda ndaño ka kũlĩhĩle oku a kala oku enda. 9 Omo liekolelo, eye wa kala ndocingendeleyi vofeka yohuminyo okuti vofeka yamãle, wa kala volosinge la Isake kuenda Yakoba, vakapiñala kumue laye kohuminyo yimuamue. 10 Eye wa kala oku lavoka olupale lu kuete ociseveto cocili, okuti usovoli* walio kuenda utungi walio, Suku.

11 Omo liekolelo Sara wa tambula ongusu yoku mina omõla* ndaño wa pitahãla anyamo, momo eye wa tendele okuti Suku una wa linga ohuminyo yaco wa kolelua. 12 Omo liaco, kulume umosi wa tendiwile okuti ka citi,* kua tunda omãla valua ndolombungululu vio kilu kuenda ndeseke kohulo yokalunga okuti ka li tendiwa.

13 Vosi yavo va fa lekolelo, ndaño ka va muile oku tẽlisiwa kuolohuminyo; pole, va vi muila ocipãla, loku vi yolela, haivo va litendele kowiñi okuti va kala akombe kuenda ovingendeleyi vofeka. 14 Momo vana va vangula ndoco va lekisa okuti va kasi oku likolisilako oku sanda ocitumãlo oco ci linge onjo yavo. 15 Nda ovo va ivalukile kuna va tunda, nda va sanda evelo lioku tiukila. 16 Cilo puãi va sanda ocitumãlo ca velapo okuti ci kasi kilu. Oco Suku ka kuetele osõi yoku tukuiwa Suku yavo, momo wa va pongiyila olupale.

17 Omo liekolelo, Avirahama eci a nyikiwa, wa lumba Isake—kuenje ulume una wa tambula lesanju olohuminyo wa tava oku lumba omõlaye wongunga— 18 ndaño co popiwila citi: “Eci ci tukuiwa ocitumbulukila* cove, ci tunda ku Isake.” 19 Puãi eye wa kolelele okuti Suku o tẽla oku u pindula kuava va fa kuenje wo tambula ndocindekaise.

20 Omo liekolelo, Isake wa sumũlũisa Yakoba kuenda Esau, omo liovina via laikele oku iya.

21 Omo liekolelo, Yakoba eci a panda koku fa wa sumũlũisa omãla va Yosefe, omõla lomõla kuenje wa kekamẽla kombueti yaye osimbu a kala oku fendela.

22 Omo liekolelo, Yosefe eci a laikele oku fa, wa tukula oku tunda kuomãla va Isareli Kegito kuenda wa eca onumbi* yatiamẽla kakepa* aye.

23 Omo liekolelo, Mose noke yoku citiwa, wa selekiwa lolonjali viaye olosãi vitatu, momo va mola okuti okamõla ka finile calua kuenda ka va kuatelele usumba ocihandeleko ca soma. 24 Omo liekolelo, Mose eci a kula, wa likala oku tukuiwa omõla womõla ukãi wa Fareo, 25 wa nõlapo oku talisiwa ohali kumue lomanu va Suku okuti oku sanjukila asanju ekandu ana a pua pua hacoko, 26 omo wa tendele esepu lia Kristu ndukuasi wa velapo okuti ovokuasi o Kegito a sule, momo wa luluvalele koku tambula onima. 27 Omo liekolelo, eye wa tunda Kegito, pole, ka kuatelele usumba onyeño ya soma, momo wamamako oku pandikisa ndu okuti o lete Una ka muiwa lovaso ositu. 28 Omo liekolelo, eye wa sovola o Paskoa kuenje wa nyila osonde, okuti unyõli ka lemeha* olonuñulu viavo.

29 Omo liekolelo, ovo va yoka Okalunga Kakusuka ndokongongo ya kukuta, pole, eci va Egito va setekavo oku ci linga va kunduiwa lovava.

30 Omo liekolelo, ovimbaka vio Yeriko via leñuiwa noke yomanu oku vi ñuala oloneke epanduvali. 31 Omo liekolelo, Rahava ocipuepue ka nyõlehele kumue la vakuesino, momo wa tambula olondavululi lombembua.

32 Mopia vali nye? Momo si moli otembo yoku lombolola eci catiamẽla ku Gideone, la Baraka, la Samisone, Yefita, Daviti, Samuele kuenda ovaprofeto vakuavo. 33 Vana okuti omo liekolelo va yula olosoma, va nena esunga, va tambula olohuminyo, va munihisa ovimela violohosi, 34 va imula ongusu yondalu, va puluka kosipata, ndaño va honguele lopo va kuata ongusu, va linga olonõi kuyaki, va lundula olohoka viovanyali. 35 Akãi va tambula vangandiavo va pinduka, pole, alume vakuavo va tipuiwa calua omo ka va tavele oku yovuiwa locisembi cimue, oco va kuate epinduko lia velapo. 36 Ocili, vakuavo va talisiwa ohali lesepu, loku tipuiwa kuenda vali va kutiwa lalienge loku kapiwa volokayike. 37 Va asiwa ovawe, va setekiwa, va tetiwa luvali,* va pondiwa losipata, va ñuala ñuala loku wala ovipa violomeme lovipa violohombo, va pita lekambo, va talisiwa ohali, va tatiwa lãvi; 38 kuenda oluali ka lua sesamẽlele oku kuata omanu vaco. Va tungayala vakalasoko, volomunda, valeva kuenda valungi o kilu lieve.

39 Kuenje vosi ava ndaño va imbiwila uvangi uwa omo liekolelo liavo, pole, ka va muile oku tẽlisiwa kuohuminyo, 40 momo Suku wa tu pongiyila cimue ca velapo okuti ovo ka va kanguisiwa lika liavo, te kumue letu.

12 Omo tua ñualiwa lelende linene liolombangi, tu liupi ocilemo cosi lekandu li tu tanga tanga kuenda tu lupuki lepandi oku litunda kua tu kapiwila, 2 osimbu tu luluvalela Kusongui wa Velapo haeye Ukuakukanguisa ekolelo lietu, okuti Yesu. Omo liesanju lio kapiwila, wa pandikisa kuti wekangiso,* wa pembula osõi kuenje wa tumãla kondio yocalo ca Suku. 3 Sokololi una wa pandikisa lombangulo yaco yesepu ya vakuakandu yina yi va pisa ovo muẽle, okuti ka vu kavi ndaño oku konyoha.*

4 Kuyaki wene woku liyaka lekandu, ka wa la tamalali toke eci osonde yene yi peseka. 5 Ene wa ivaliko elungulo lio wĩhiwi ndomãla liokuti: “Amõlange, ku ka pembule epindiso lia Yehova, ndaño oku konyoha eci o lunguiwa laye; 6 momo Yehova o pindisa una a sole, eye o tipula* wosi a tenda ndomõla.”

7 Ohali yosi vu pandikisa layo, yi tendi ndepindiso. Suku o vu tata ndomãla. Omõla upi ka pindisiwa la isiaye? 8 Nda ka vu pindisiwa ndeci vosi va pindisiwa, vumãla voku lumbula, havumãla vociliko. 9 Va isietu palo posi* va enda oku tu pindisa kuenje tua va sumbila. Isietu kespiritu hẽ, siti tu sukila oku u sumbila vali enene? 10 Momo va isietu palo posi va tu pindisa vokatembo kamue ndomo ca va sungulukilile, pole, Suku wa ci lingila oku tu kuatisa okuti tu kuata onepa koku kola kuaye. 11 Ocili okuti epindiso tete ka li sanjuisa, pole, li koka evalo,* puãi vana va pindisiwa lalio, noke li va nenela ombembua yi tunda kesunga.

12 Omo liaco, pamisi ovaka a leñela kuenda olongolo via hongua, 13 loku suñamisa olonjila violomãhi viene, oco okuti oku lemãla ka ku livokiya, puãi ku sakuiwa. 14 Kali lombembua lomanu vosi kuenda oku kola, momo omunu nda ka koli ka moli Ñala. 15 Lunguki oco lomue ka ka pumbe ohenda ya piãla ya Suku, okuti laumue olumbombo lu lula lu yova pokati kene loku vu kokeli ovitangi, okuti valua va vĩhisua laluo; 16 kuenda lavululi okuti lomue pokati kene o kala ukuevĩho liukahonga,* ale umue ka sole ovina vi kola nda Esau wa landisa unuñulu waye lelonga limosi liokulia. 17 Momo wa kũlĩhĩ okuti eci eye a yonguile oku piñala esumũlũho, ka taviwile; kuenje eci a seteka oku pongoloka,* ndaño lasuelẽla ka ca tavele.*

18 Ene ka wa pitĩlili komunda okuti yi tava oku lambiwa, haiyo yi kuete ondalu yi taima, lelende li tekãva, pamue owelema, ale ehunguhungu, 19 kuenda ocileñi columbeta, londaka ya popiwa, yina okuti omanu poku yi yeva va pinga okuti lacimue ci popiwa vali kokuavo. 20 Ovo ka va tẽlele oku linga eci ca handelekiwa okuti: “Ndaño ocinyama ca tema nda ci lamba komunda, ci sosuiwa lovawe.” 21 Ondaka yaco ya koka usumba kuenje Mose wa popia hati: “Ñasi lusumba walua loku luluma.” 22 Pole, ene wa ameli Komunda Siono olupale lua Suku o kasi lomuenyo, okuti o Yerusalãi yo kilu kuenda kovangelo ka va tendiwa,* 23 haene wa likongeli kohongele yolonuñulu via lisonehisa kilu kuenda ku Suku Onganji ya vosi, koviluvo viespiritu okuti vakuesunga haivo va lipua, 24 kuenda ku Yesu mitakati yocisila cokaliye, losonde eye a nyila yi vangula lonjila yimue ya velapo okuti osonde ya Abele yi sule.

25 Lunguki oco ka vu ka yuvuli oku yeva* una o kasi oku vangula. Momo nda vana va yuvula oku yeva una eca alungulo a Suku palo posi ka va puluka, ca piãla enene etu, ka tu puluka nda tua yanduluka una o vangula tunde kilu! 26 Vepuluvi liaco, ondaka yaye ya lulumisa ongongo, pole, cilo eye wa likuminya hati: “Lalimue eteke ndi lulumisa vali ongongo ndaño ilu.” 27 Ondaka “lalimue eteke,” yi lekisa okuti Suku o ka imula ovina vi lulumisua, vina okuti ka via lulikiwile la Suku, puãi ovina ka vi lulumisua vi amamako. 28 Omo okuti tu tambula Usoma ka u lulumisua, tu amamiko oku tambula ohenda ya piãla yina yi tu kuatisa oku linga upange u kola okuti u taviwa la Suku, loku sumbila Suku kuenda oku liketisa. 29 Momo Suku yetu eye ondalu yi nyõla elisi.

13 A vamanji, amamiko oku lisola pokati. 2 Ko ka liwekipo oku yekisa akombe,* momo vamue poku ci linga va yekisa ovangelo ndaño ka va ci kũlĩhĩle. 3 Ko ka ivaliko vana va kasi vokayike,* ndu okuti wa kalivo vokayike kumue lavo kuenda la vana va tatiwa lãvi, momo vu kasi kumue lavo vetimba limuamue.* 4 Olohuela vi sumbiwe la vosi kuenda olohuela ka vi ka vĩhisue, momo Suku o ka sombisa vakuevĩho liukahonga* la vakahokolo. 5 Yuvuli ocisola coku sola olombongo, osimbu vu sanjukila ovina vu kuete cilo. Momo eye wa popia hati: “Ame lalimue eteke hu sia, ale oku ku yanduluka.” 6 Oco tu kuetele utõi walua woku popia hati: “Yehova oñuatisi yange; si kuata usumba. Omunu hẽ o ndinga nye?”

7 Ivaluki vana va songola pokati kene, haivo vo sapuili ondaka ya Suku kuenda sokololi ovituwa viavo loku setukula ekolelo liavo.

8 Yesu Kristu umuamue, ndeci a kala hẽla haico a kala etali kuenda haico a kala oloneke ka vi pui.

9 Ko ka yapuisiwi lalongiso aiñi aiñi hao a tunda kuiñi kuiñi, momo ca sunguluka nda utima u pamisiwa lohenda ya piãla okuti ovilia vi sule,* vina okuti ka vi kuatisa vana va vilia.

10 Tu kuete utala umue okuti vana va linga upange u kola kombalaka, ka va kuete omoko yoku liako. 11 Momo atimba ovinyama vina okuti osonde yaco yambatiwa kocitumãlo ci kola ndocilumba cakandu okuti yeciwa locitunda cinene, a timihiwila posamua yocilombo. 12 Yesu wa talisiwilavo ohali posamua yombundi yolupale oco a kolise omanu losonde yaye. 13 Tu endi kokuaye posamua yocilombo oco tu sepuiwe ndeci eye a sepuiwa, 14 momo ka tu kuete imbo li tumãla otembo yalua, pole, tu kasi oku lavoka una o laika oku iya. 15 Mekonda liaye tu eci ocilumba cesivayo ku Suku olonjanja viosi, haico epako liovimela vietu okuti vi sapula onduko yaye ku vakuetu. 16 Ku ka ivaliko oku linga eci ciwa loku kuatisa vakuene lovina vu kuete, momo Suku o sanjukila ovilumba viaco.

17 Pokoli ku vana va songola pokati kene loku tava kokuavo, momo va kasi oku vu lavi* ndava va ka lombolola noke ndomo vo lavi, okuti va ci linga lesanju halokulisiõsiõlako, momo eci nda ka cu kuatisi.

18 Amamiko oku tu likutililako, omo tua kolela okuti tu kuete utima wa yela,* osimbu tu likolisilako oku kala vakuacili kovina viosi. 19 Puãi ndu vetiyi okuti vu likutilila oco ndiye lonjanga kokuene.

20 Kaliye Suku yombembua una wa pindula kuava va fa ungombo wa velapo wolomeme, okuti Ñala yetu Yesu, losonde yocisila ka ci pui, 21 a vu malehisi lovina viosi viwa oco vu lingi ocipango caye, okuti mekonda lia Yesu Kristu eye o tu vetiya oku linga eci cu sanjuisa, kokuaye ku kale ulamba oloneke vi enda ño-o hũ ka vi pui. Amene.

22 A vamanji, ndu pingi oco vu pokoli kolondaka evi vielembeleko, momo ndo soneheli okokanda kamue. 23 Ndi yongola oco vu kũlĩhi okuti manjetu Timoteo wa yovuiwa. Nda iya ndopo, tu iyilila kumosi oco tu vu moli.

24 Lamipo vosi va kasi oku songola pokati kene kuenda olosandu viosi. Vana va kasi ko Italia vo tumisi ovilamo.

25 Ohenda ya piãla yi kale lene vosi.