UKANDA WAVALI WA SONEHA PETULU

1 Ame ndi Simono Petulu, ndukuenje haime ndupostolo wa Yesu Kristu, ndi sonehela vana va kuete ekolelo ndeli lietu omo liesunga lia Suku yetu kuenda Liupopeli Yesu Kristu:

2 Ohenda ya piãla kuenda ombembua yu vokiyiwi omo liukũlĩhĩso wa suapo wa Suku kuenda wa Yesu Ñala yetu, 3 momo unene wa Suku wa tu ĩha* ovina viosi viatimẽla komuenyo, loku sumbila Suku lukũlĩhĩso wa suapo wa Una wa tu kovonga omo liulamba waye kuenda ovituwa viwa. 4 Omo liovina evi wa tu ĩha* olohuminyo via velapo haivio vinene, okuti vu kuata ovituwa ndevi via Suku, loku puluka kevĩho lioluali li tunda kolonjongole vĩvi.*

5 Omo liaco, likolisiliko okuti kekolelo liene vu vokiyako esunga, kesunga liene, ukũlĩhĩso, 6 kukũlĩhĩso wene oku likandangiya, koku likandangiya kuene epandi, kepandi liene oku sumbila Suku, 7 koku sumbila kuene Suku, oku sola vamanji, koku sola kuene vamanji, ocisola. 8 Nda ovina evi vi kala vokuene kuenda vi supoka, ovio viu teyuili okuti ka vu hongua kuenda ka vu kala nduti ka wimi epako liatiamẽla kukũlĩhĩso wa suapo wa Ñala yetu Yesu Kristu.

9 Wosi wa kambela ovina evi, omeke, o likala oku mola ocinyi* kuenda ka ivaluka vali oku liyelisa kakandu aye osimbu. 10 Kuenje a vamanji, likolisiliko oco vu koleli koku kovongiwa loku nõliwa kuene, momo nda wamamiko oku linga ovina evi, lalimue eteke vu kupuka. 11 Kuenje vu kuata epuluvi lioku ĩnila Vusoma ka u pui wa Ñala yetu haeye Upopeli Yesu Kristu.

12 Omo liaco, ndi yongola oku wivaluisi ovina evi olonjanja viosi, ndaño wa vi kũlĩhi ale kuenda via sevetiwa vocili ci kasi vokuene. 13 Pole, ame ndi sima okuti ca sunguluka okuti ndu wivaluisi vali ovina evi osimbu ñasi vetimba eli,* 14 loku kũlĩha okuti etimba eli* ndopo li njupiwa ndeci Ñala yetu Yesu Kristu a ndekisa. 15 Ndi likolisilako olonjanja viosi okuti noke yoku tunda kuange, ene muẽle vu tẽla oku ivaluka* ovina evi.

16 Ka tua kuamele alusapo esanda oco tu vu sapuili unene kuenda etukuluko lia Ñala yetu Yesu Kristu, pole, tu imbila uvangi wokuti eye wa velapo. 17 Momo eye wa tambula ku Suku Isia, ekemainyo kuenda ulamba eci olondaka evi via tiamisiwila kokuaye lulamba wa piãla okuti: “U Omõlange wa soliwa, ndo sanjukila.” 18 Ocili, olondaka evi tua vi yevela tunde kilu osimbu tua kala laye komunda yi kola.

19 Tu kuete ondaka yovaprofeto ya kolisua vali kokuetu kuenda vu linga ciwa poku yevelela lutate kokuayo ndondiyelo yi taimila vowelema (toke eci ku ca kuenje nanda* o tuila) vovitima viene. 20 Tete kũlĩhi okuti lacimue ocitumasuku Cocisonehua ca tunda kovisimĩlo viomanu. 21 Momo ocitumasuku ka ceyile locipango comanu, puãi omanu va popia ondaka ya tunda ku Suku, ndomo va vetiyiwa lespiritu sandu.

2 Ndeci pokati komanu pa kala ovaprofeto vesanda, pokati kene pa ka kalavo alongisi vesanda. Ovo va ka nena alongiso esanda a nyõla ekolelo liene kuenda va ka likala una wa a nena kuenje va li kokela lonjanga enyõleho liavo muẽle. 2 Valua va ka kuama umbondo* wavo kuenje mekonda liavo onjila yocili yi sepuiwa. 3 Va ko kembisi lolondaka viesanda. Pole, esombiso liavo okuti lia sokiyiwa ale tunde osimbu, ka li cilua kuenda enyõleho liavo liya muẽle.

4 Suku wa kangisa ovangelo va linga ekandu kuenje wa va kapa vekalo li tukuiwa hati, Tartaru,* noke wa va imba vocitunu cowelema walua oco va talamele enyõleho. 5 Suku wa nyõla oluali luosimbu, pole, wa popela Noha, una wa kunda esunga kuenje eye wa popeliwa kumue lomanu epanduvali, eci Suku a nena etande voluali luomanu vakuakutomba Suku. 6 Poku lingisa etiko olupale luo Sodoma lo Gomora, wa a pisa, loku lekisa olumapu luovina vi laika oku iya komanu va tomba Suku. 7 Kuenje wa popela ukuesunga Lote, una wa sakalaisua lumbondo* womanu va tomba ovihandeleko— 8 ulume waco ukuesunga, eteke leteke omuenyo waye wa sakalaisua omo liovilinga vĩvi a enda oku mola kuenda oku yeva osimbu a tungile pokati kavo. 9 Yehova wa kũlĩha ndomo a popela kohali omanu vo sumbila, pole, vana okuti havakuesungako o va selekela enyõleho* keteke liesombiso, 10 ca piãla enene vana va sandiliya oku vĩhisa etimba lia vakuavo, haivo va sepula vana va kuete unene pokati kavo.

Ovo vakuasiata, vakuacipango, haivo ka va kuete usumba woku popia lãvi vana va sumbiwa la Suku, 11 osimbu okuti ovangelo ndaño va piãla kongusu kuenda kunene, pole, ka va lundila alongisi vesanda lolondaka vĩvi kovaso a Yehova. 12 Pole, omanu vaco va kasi ndovinyama ka vi kuete olondunge, haivio via citiwila oku kuatiwa loku nyõliwa kuenda va popia lãvi ovina ka va kũlĩhĩle. Kuenje omo liovina vĩvi va linga, va ka nyõliwa la Suku, 13 kuenda va ka tala ohali loku tambula onima yovina vĩvi va linga.

Kokuavo, oku ambata omuenyo wayele utanya, esanju. Va kasi ndatota kuenda atime, haivo va sanjukila* alongiso avo esanda osimbu va lingila kumue lene ovipito. 14 Ovaso avo eyuka ukahokolo, haivo ka va tẽla oku siapo oku linga ekandu kuenda va yonja vana ka va pamele. Ovitima viavo vieyuka ocipululu. Kuenje va ka kunduiwa la Suku. 15 Ovo va siapo onjila ya suñama kuenda va yapuisiwa. Va kuama onjila ya Baliame omõla a Beore, una wa solele onima yi tunda kelinga lĩvi, 16 pole, wa lemeliwa omo lioku lueya eci ca sunguluka. Ocinyama coku ambata ovilemo okuti ka ci popi, ca vangula londaka yomunu kuenda ca nyõla ungende wuprofeto.

17 Ovo va sokisiwa lonjombo ka yi kuete ovava, lalende ka a loki ombela okuti ambatiwa lehunguhungu linene liofela kuenda kua va sokiyiwila owelema walua. 18 Va popia olondaka vi molẽha ndu okuti vi komõhisa, pole, ka vi kuete esilivilo. Loloñeyi vĩvi vietimba kuenda umbondo,* va yonja vana va puluka komanu va linga eci cĩvi. 19 Osimbu ovo va likuminya elianjo, ovo muẽle va linga apika veci cĩvi; momo nda omunu umue o yuliwa lomunu ukuavo, eye o linga upika womunu waco.* 20 Kuenje noke yoku puluka kevĩho lioluali omo liukũlĩhĩso wa suapo wa Ñala, haeye Upopeli Yesu Kristu, ovo va litumbika vali kovina vimuamue kuenda va yuliwa kuenje esulilo liavo li vĩha calua okuti, eli lia kala tete li sule. 21 Hĩse nda ka va kũlĩhĩle onjila yesunga, okuti noke yoku kũlĩha ocihandeleko ci kola va tambula, va konyõha. 22 Kokuavo kua tẽlisiwa olusapo luokuti: “Ombua yi tiukila vali kosanjo yayo kuenda ongulu ya sukuiwa yi tiukila vali vonata.”

3 A vamanji wa soliwi, owu ukanda wavali ndu soneheli, ndeci ndo soneheli tete, ñasi oku vetiya loku ivaluisa uloño wene woku sokolola 2 okuti, vu ivaluka olondaka via popiwa ale* lovaprofeto va kola, locihandeleko ca Ñala haeye Upopeli vonduko yovapostolo vene. 3 Tete limbuki okuti koloneke via sulako vakuakupembula va keya loku pembula kuavo, loku kuama oloñeyi viavo vĩvi, 4 kuenje va popia vati: “Ohuminyo yoku tukuluka kuaye yi kasi pi? Momo tunde keteke vakukululu yetu va fa, ovina viosi vi kasi oku amamako ndeci via kala tunde koku lulikiwa kuoluali.”

5 Momo ovo va ivalako ocipango okuti, tunde osimbu kua kala ale ilu kuenda ongongo ya ñualiwile lovava haiyo ya tunda vokati kovava londaka ya Suku; 6 kuenje oluali lua kaile koloneke viaco lua nyõliwa eci lueyukile lovava. 7 Pole, londaka yaco, ilu li kasiko ndeti kuenda ongongo, ya pongiyiwila ondalu kuenje ya amamako toke keteke liesombiso loku nyõliwa kuomanu va tomba Suku.

8 A vamanji wa soliwi, ko ka ivaliko okuti eteke limosi ku Yehova lia soka lohulukãi yanyamo kuenda ohulukãi yanyamo ya soka ndeteke limosi. 9 Yehova ka livala lohuminyo yaye ndeci omanu vamue va sima, pole, eye o pandikisa lene, momo ka yongola okuti umue o nyõliwa, puãi o yongola okuti vosi va likekembela. 10 Eteke lia Yehova liya ndocimunu, okuti ilu li nyõliwa lokuõla kualua* kuenje ovina vi kasi kilu, levi vi kasi vongongo vi yenguluka kuenda ongongo lovina vi kasimo vi pia.

11 Omo okuti ovina viosi vi yenguluka ndomo, kũlĩhĩsi ovituwa vu sukila oku lekisa okuti vu kola kekalo liene lo kovilinga vioku sumbila Suku, 12 osimbu vu lavoka loku yayuisa* oku iya kueteke lia Yehova, okuti ilu li ka nyõliwa londalu kuenda ovina vi kasi kilu levi vi kasi vongongo vi yenguluiwa lowuya walua! 13 Puãi kuli ilu liokaliye longongo yokaliye tu lavoka omo liohuminyo yaye, muna mu kala esunga.

14 Kuenje a vamanji wa soliwi, omo vu kasi oku lavoka ovina evi, likolisiliko okuti eci vu sangiwa laye ka vu kala latime, pamue amome, te lombembua. 15 Omo liaco, tendi epandi lia Ñala yetu ndeyovo, ndeci manjetu wa soliwa Paulu a vu soneheli catiamẽla kolondunge a tambula, 16 loku vangula ovina evi ndeci eye a linga vovikanda viaye viosi. Pole, ovina vimue vovikanda viaco via tĩla oku kuata elomboloko liavio, vina okuti vakuanumbi* haivo va hongua va kasi oku vi pengisa, ndeci va linga Lovisonehua vikuavo loku li kokela enyõleho liavo muẽle.

17 Ene a vamanji wa soliwi, omo vu kuete ale ukũlĩhĩso waco osimbu, lunguki okuti ka vu yapuisiwa lavo loku lueya kuomanu va tomba ovihandeleko kuenje vu lipumbisa epandi liene.* 18 Puãi amamiko oku kula kohenda ya piãla kuenda kukũlĩhĩso wa Ñala yetu haeye Upopeli Yesu Kristu. Kokuaye ku kale ulamba cilo kuenda oloneke ka vi pui. Amene.