UKANDA WATETE WA SONEHA YOANO

1 Tunde kefetikilo tu kasi oku vu soneheli catiamẽla kondaka yomuenyo tua yeva, tua mola lovaso etu, tua limbuka kuenda tua lamba lovaka etu, 2 (okuti omuenyo ko pui wa tu situluiwa, tua ci mola kuenda tu ci imbila uvangi loku ku ci sapuili. Omuenyo waco ko pui wa tunda ku Isia kuenje ca tu situluiwa), 3 puãi eci tua mola, leci tua yeva tu ku ci sapuili, okuti vu likuata omunga kumue letu ndeci etu tu likuetele omunga kumue la Isia kuenda Omõlaye Yesu Kristu. 4 Omo liaco, tu vu soneheli ovina evi oco esanju lietu li suepo.

5 Eli olio esapulo tua yeva kokuaye kuenje li kasi oku sapuiwa kokuene okuti: Suku ocinyi kuenda vokuaye* ka muli owelema. 6 Nda tua popia tuti, “Tu likuete omunga kumue laye,” pole, handi tu endela vowelema, tulohembi kuenda ka tu kasi oku kuama ocili. 7 Puãi nda tu endela vocinyi ndeci eye a kasi vocinyi, tu likuata omunga kuenda osonde ya Yesu Omõlaye yi yelisa akandu etu osi.

8 Nda tu popia tuti, “Ka tu kuete ekandu,” tu likemba etu muẽle kuenda ocili ka ci kasi vokuetu. 9 Puãi nda tua litavela akandu etu, omo okuti eye wa kolelua haeye ukuesunga, ecela akandu etu kuenje o tu yelisa kevĩho liosi. 10 Nda tu popia tuti, “Ka tu kuete ekandu,” tuo lingisa ohembi kuenda ondaka yaye ka yi kasi vokuetu.

2 Atumãla tuange, ñasi oku vu soneheli ovina evi okuti ka vu lingi ekandu. Pole, nda umue wa linga ekandu, tu kuete oñuatisi* yimue yi kasi kumue la Isia okuti, Yesu Kristu ukuesunga. 2 Eye ocilumba coku tuvika akandu* etu, pole, hakandu etuko lika, la-a oluali luosi. 3 Kuenje tu limbuka okuti tuo kũlĩha, nda tu amamako oku pokola kovihandeleko viaye. 4 Una o popia hati, “Ndo kũlĩha,” puãi ka pokola kovihandeleko viaye, ohembi kuenda ocili ka ci kasi vomunu waco. 5 Pole, una o pokola kondaka ya Kristu, o limbukiwa okuti o kuetele ocisola Suku. Oku oko tu limbukila okuti tu kasi vomunga kumue laye. 6 Una o popia okuti o kasi vomunga kumue laye, o sesamẽla oku endaenda ndeci eye a endaenda.

7 A vamanji wa soliwi, si kasi oku vu soneheli ocihandeleko cokaliye, te ocihandeleko cosimbu, cina vu kasi laco tunde kefetikilo. Ocihandeleko caco cosimbu, ondaka wa yevi. 8 Handi vali, ndu sonehelivo ocihandeleko cokaliye, haico cocili vokuaye kuenda vokuene, momo owelema u kasi oku pita kuenje ocinyi cocili ci kasi oku nina.

9 Una o popia okuti o kasi vocinyi pole, wa suvuka manjaye, handi o kasi vowelema. 10 Una o sole manjaye amamako oku kala vocinyi kuenda kokuaye ka kuli lacimue ci koka ocilondokua. 11 Puãi, una o suvuka manjaye, o kasi vowelema haeye endaela vowelema kuenda ka kũlĩhĩle oku a enda, momo owelema wa tekãvisa ovaso aye.

12 Atumãla, ñasi oku vu soneheli, omo akandu ene a ecelua mekonda lionduko yaye. 13 Alonjali vialume, ñasi oku vu soneheli omo ene wo kũlĩhi ciwa tunde kefetikilo. Ene akuenje, ñasi oku vu soneheli omo wa yuli ondingaĩvi. Ene amãla, ñasi oku vu soneheli omo wa kũlĩhi Isia. 14 Alonjali vialume, ñasi oku vu soneheli omo ene wo kũlĩhi ciwa tunde kefetikilo. Ene akuenje ñasi oku vu soneheli omo wa pami kuenda ondaka ya Suku yi kasi oku amamako vokuene, haene wa yuli ondingaĩvi.

15 Ko ka soli oluali ndaño ovina vi kasi voluali. Nda umue o sole oluali, ocisola ca Isia ka ci kasi vokuaye; 16 momo ovina viosi vi kasi voluali—oloñeyi vietimba, oloñeyi viovaso, oku litunila ovina viomuenyo*—ka vi tundi ku Isia, puãi vi tunda koluali. 17 Oluali lu kasi oku pita loloñeyi vialuo, pole, una o linga ocipango ca Suku o kala otembo ka yi pui.

18 Amãla, yilo oyo owola ya sulako, ndeci wa yevi okuti ku iya antikristu,* ndaño cilo kua molẽha ale va antikristu* valua, ci lekisa okuti tua limbuka okuti yilo oyo owola ya sulako. 19 Ovo va tunda pokati ketu, pole, havetuko;* nda va kaile vetu, nda va amamako oku kala pokati ketu. Puãi va tunda oco ci lekise okuti havosiko vetu. 20 Ene wa wavekiwi la una o kola kuenje vosi yene wa ci kũlĩhi. 21 Ndu soneheli, si ci lingila omo okuti ka wa kũlĩhĩli ocili, pole, wa ci kũlĩhi kuenda kuhembi ka ku tundi ocili.

22 Ohembi elie, ha unako o likala okuti Yesu hayeko Kristu? Omunu waco antikristu, una o likala Isia kuenda Omõla. 23 Wosi o likala Omõla ka kuetevo Isia. Pole, wosi wa kũlĩha Omõla o kuetevo Isia. 24 Ene puãi, eci wa yevi tunde kefetikilo ci kale vokuene. Nda eci wa yevi ca kala vokuene, vu kalavo vomunga kumue Lomõla kuenda vomunga la Isia. 25 Eci a tu likuminya ceci—omuenyo ko pui.

26 Ñasi oku vu soneheli ovina evi viatiamẽla kuava va yongola oku vu yapuisi. 27 Oku wavekua eye o waveki lakuo ku kala vokuene kuenje ka vu sukila vali okuti umue o vu longisa; pole, oku wavekua eye o waveki lakuo ku vu longisa ovina viosi kuenda kuocili, hakuhembiko. Ndeci co longisiwi, kali vomunga kumue laye. 28 Atumãla, kali vomunga kumue laye, okuti eci eye a situluiwa tu kuata utõi woku vangula kuenje ka tu u yanduluka losõi ketukuluko liaye. 29 Nda wa kũlĩhi okuti eye ukuesunga, wa kũlĩhĩvo okuti wosi o lingainga esunga wa citiwa laye.

3 Limbuki ocisola Isia a siata oku tu ĩha, okuti tu tukuiwa omãla va Suku! Ocili, tumãla vaye muẽle. Eli olio esunga lieci oluali ka lua tu kũlĩhĩlile, momo oluo ka luo kũlĩhĩle. 2 A vamanji wa soliwi, cilo tumãla va Suku, ka tua kũlĩhĩle handi ndomo tu ka kala. Ka tua kũlĩhĩlevo okuti eci eye a situluiwa tu ka kala ndeye, momo tu ko mola ndomo eye a kasi. 3 Wosi o kuete elavoko liaco vokuaye, o liyelisa ndeci eye muẽle a yela.

4 Wosi o lingainga ekandu o tomba ovihandeleko kuenda ekandu li lomboloka oku tomba ovihandeleko. 5 Ene wa kũlĩhivo okuti eye wa situluiwa oco ambate akandu etu kuenda vokuaye ka muli ekandu. 6 Omunu wosi amamako oku kala vomunga laye ka lingainga ekandu; wosi o lingainga ekandu ko moli, ale pamue oku u kũlĩha. 7 Atumãla, ko ka eceleli okuti umue o vu yapuisa; una o lingainga esunga, ukuesunga, ndeci eye ukuesunga. 8 Una o lingainga ekandu wa tunda Keliapu, momo Eliapu li lingainga ekandu tunde kefetikilo.* Eli olio esunga lieci Omõla a Suku a situluiwila, oco a nyõle* ovilinga Vieliapu.

9 Wosi wa citiwa la Suku, ka lingainga ekandu, momo ombuto* Yaye yamamako vokuaye kuenda eye ka lingainga ekandu momo wa citiwa la Suku. 10 Omãla va Suku, lomãla Veliapu va limbukiwa ndoco: Wosi ka lingainga esunga ka tundi ku Suku, ndaño una ka sole manjaye. 11 Eli olio esapulo wa yevi tunde kefetikilo, liokuti tu sukila oku lisola pokati; 12 handeciko Kaini, una wa tunda kondingaĩvi kuenje wa ponda manjaye. Momo lie o pondela? Momo ovilinga viaye ka via sungulukile, pole, via manjaye via sungulukile.

13 A vamanji, ko ka komõhi omo oluali luo suvuki. 14 Tua kũlĩha okuti tua kala ndu tua fa, pole, cilo tu kasi lomuenyo, momo tu sole vamanjetu. Una ka sole amamako vokufa. 15 Wosi o suvuka manjaye, omondi kuenda wa kũlĩhi okuti layimue omondi yi kuata omuenyo ko pui. 16 Tua kũlĩha ocisola, momo Yesu Kristu wa eca omuenyo waye mekonda lietu kuenda tu sesamẽlavo oku eca ovimuenyo vietu omo lia vamanjetu. 17 Puãi wosi o kuete ukuasi woluali lulo kuenje o mola okuti manjaye wa kambela cimue, pole, ka lekisa ohenda kokuaye, ocisola ca Suku ci amamako ndati vokuaye? 18 Atumãla, ka tu ka soli londaka pamue lelimi, te lovilinga kuenda locili.

19 Omo liaco, tua kũlĩha okuti tua tunda kocili kuenda tu vetiyila ovitima vietu kokuaye, 20 catiamẽla kovina viosi ovitima vietu vi tu pisa, momo Suku wa velapo, ovitima vietu vi sule kuenda eye wa kũlĩha ovina viosi. 21 A vamanji wa soliwi, nda ovitima vietu ka vi tu pisa, tu kuete utõi woku vangula kovaso a Suku; 22 kuenda cosi tu pinga, tu ci tambula kokuaye, momo tu pokola kovihandeleko viaye kuenda tu linga eci cu sanjuisa. 23 Ocihandeleko caye ceci okuti: tu kolela onduko Yomõlaye Yesu Kristu kuenda tu lisola pokati ndeci eye a tu handeleka. 24 Una o pokola ovihandeleko viaye amamako oku kala vomunga kumue laye kuenda eye o kala vomunga kumue lomunu waco. Kuenje omo liespiritu a tu ĩha, tua kũlĩha okuti eye o kala vomunga kumue letu.

4 A vamanji wa soliwi, ko ka tavi kesapulo* liosi li molẽha ndu okuti lia tunda ku Suku, puãi seteki asapulo* aco nda a tunda muẽle kokuaye, momo ovaprofeto valua vesanda va li sanduila voluali.

2 Wa kũlĩhi esapulo liosi lia tunda ku Suku okuti: Esapulo liosi li limbuka okuti Yesu Kristu weyile vetimba, lia tunda ku Suku. 3 Pole, esapulo liosi ka li limbuka Yesu, ka lia tundile ku Suku. Momo eli esapulo lia antikristu,* lina wa yevi okuti liya kuenje cilo li kasi ale voluali.

4 Atumãla, ene wa tundi ku Suku kuenje wa yuli ovaprofeto vesanda, momo una o kasi vomunga kumue lene wa velapo okuti una o kasi vomunga kumue loluali o sule. 5 Ovo va tunda voluali; eli olio esunga lieci ovo va popela ovina vi tunda voluali kuenda oluali lu va yeva. 6 Etu tua tunda ku Suku. Wosi wa kũlĩha Suku, o tu yeva; wosi ka tundi ku Suku, ka tu yevi. Eci ci tu kuatisa oku limbuka esapulo liocili lesapulo liesanda.

7 A vamanji wa soliwi, tu amamiko oku li sola pokati, momo ocisola ci tunda ku Suku kuenda wosi o sole wa citiwa la Suku, haeye wa kũlĩha Suku. 8 Wosi ka sole ka kũlĩhĩle Suku, momo Suku eye ocisola. 9 Ocisola ca Suku ca situluiwa ndoco kokuetu okuti, Suku wa tuma Omõlaye wongunga voluali okuti tu kuata omuenyo mekonda liaye. 10 Ocisola ka ci lomboloka okuti, etu tua sola Suku, puãi Suku eye wa tu sola kuenda wa tuma Omõlaye ndocilumba coku tuvika akandu* etu.

11 A vamanji wa soliwi, nda Suku o tu sole ndoco, tu sesamẽlavo oku li sola pokati. 12 Lomue wa la mola Suku. Nda tu amamako oku li sola pokati, Suku o kala vokuetu kuenda ocisola caye vokuetu ci suapo. 13 Omo liondaka eyi, tua kũlĩha okuti tu kasi vomunga kumue laye kuenda eye o kasi vomunga kumue letu, momo eye o tu ĩha espiritu liaye. 14 Handi vali, etu muẽle tua ci mola kuenda tu imba uvangi wokuti Isia wa tuma Omõlaye Ndupopeli woluali. 15 Wosi o limbuka okuti Yesu Omõla a Suku, Suku amamako oku kala vomunga kumue laye kuenda omunu waco o kala vomunga kumue la Suku. 16 Tua kũlĩha kuenda tua kolela kocisola Suku a tu kuetele.

Suku ocisola kuenda wosi amamako vocisola, o kala vomunga kumue la Suku kuenje Suku o kala vomunga kumue laye. 17 Omo liaco ocisola ci suapo vokuetu, okuti tu kuata utõi koku vangula* keteke liesombiso, momo ndeci eye a kasi, haico tu kasivo voluali lulo. 18 Kocisola ka kuli usumba, pole, ocisola ci imula* usumba, momo usumba u tu tateka. Wosi o kuete usumba, kocisola ka suilepo. 19 Etu tu sole, momo eye wa tu sola tete.

20 Nda umue o popia okuti, “ndi sole Suku,” pole, lopo o suvuka manjaye, ohembi. Momo una ka sole manjaye a lete, ka pondola oku sola Suku una ka lete. 21 Kuenje tu kuete ocihandeleko eci ca tunda kokuaye cokuti, wosi o sole Suku, o sukila oku solavo manjaye.

5 Wosi o tava okuti Yesu eye Kristu, omunu waco omõla a Suku kuenda wosi o sole Suku o solevo omãla va Suku. 2 Eci tu sola Suku loku kapako ovihandeleko viaye, tu limbuka okuti tu sole omãla va Suku. 3 Eci oco ci lomboloka ocisola ca Suku okuti, tu pokola kovihandeleko viaye; puãi ovihandeleko viaye ka vi lemi, 4 momo wosi* wa citiwa la Suku o yula oluali. Kuenje eyulo li yula oluali, ekolelo lietu.

5 Helie o tẽla oku yula oluali? Hayunako hẽ o kolela okuti Yesu Omõla a Suku? 6 U eye una weya omo liovava losonde okuti, Yesu Kristu, pole, keyile lika lovava, te lovava kuenda osonde. Kuenje espiritu limba uvangi, momo espiritu olio ocili. 7 Kuli ovina vitatu vimba uvangi: 8 espiritu, ovava kuenda osonde; kuenje uvangi wovina evi vitatu u litava.

9 Nda tu tava kuvangi womanu, uvangi wa Suku wa velapo. Momo owu owo uvangi Suku a eca okuti, uvangi a eca watiamẽla Komõlaye. 10 Omunu o kolela Mõla a Suku, o kuete uvangi vokuaye muẽle. Omunu ka kolela Suku, u lingisa ohembi, momo eye ka kolelele kuvangi wa eciwa la Suku watiamẽla Komõlaye. 11 Uvangi waco wowu okuti, Suku wa tu ĩha omuenyo ko pui kuenda omuenyo waco u kasi Vomõlaye. 12 Una o tava Omõla, o kuete omuenyo waco; una ka tava Omõla a Suku, ka kuete omuenyo waco.

13 Ñasi oku vu soneheli ovina evi oco vu kũlĩhi okuti, omo wa koleli onduko Yomõla a Suku, vu kuete omuenyo ko pui. 14 Eli olio ekolelo* tu kuete kokuaye okuti, nda tu pinga ovina viosi vi likuata locipango caye, eye o tu yeva. 15 Kuenje nda tua kũlĩha okuti eye o tu yeva kovina viosi tu pinga, tua kũlĩha okuti tu tambula ovina tuo pinga, momo tua vi pinga kokuaye.

16 Nda umue o lete manjaye o linga ekandu ka li tuala kolofa, o sukila oku u likutililako kuenje Suku u wĩha omuenyo. Eci ci tiamisiwila ku vana ka va lingi ekandu li tuala kolofa. Kuli ekandu li tuala kolofa. Catiamẽla kekandu liaco, siu pingi oco a likutilileko omunu waco. 17 Elinga liosi ka lia sungulukile, ekandu, puãi kuli ekandu okuti ka li tuala kolofa.

18 Tua kũlĩha okuti wosi wa citiwa la Suku, ka lingainga ekandu, puãi una wa citiwa la Suku* o laviwa laye kuenda ondingaĩvi ka yu lambi.* 19 Tu cĩ okuti tua tiamẽla ku Suku, puãi oluali luosi lu kasi povaka ondingaĩvi. 20 Tua kũlĩha okuti Omõla a Suku weya kuenda wa tu ĩha olondunge* oco tu kũlĩhe una okuti ukuacili. Kuenje tu kasi vomunga kumue la una okuti ukuacili vonduko Yomõlaye Yesu Kristu. U eye Suku yocili haeye omuenyo ko pui. 21 Atumãla, lilavi koviteka.