ESITULUILO KU YOANO

1 Esituluilo* lia eciwa la Suku ku Yesu Kristu, oco a lekise kakuenje vaye ovina via laikele oku pita ndopo. Kuenje wa tuma ungelo waye kuenda wa vi situluila volondimbukiso vonduko yaye kukuenje waye Yoano, 2 una wa imba uvangi wondaka ya eciwa la Suku kuenda uvangi wa eciwa la Yesu Kristu okuti, wovina viosi eye a mola. 3 Una o tanga lolukandi kuenda vana va yeva olondaka viocitumasuku eci, la vana va pokola kovina via sonehiwamo, va sumũlũha, momo otembo ya sokiyiwa yi kasi ocipepi.

4 Yoano o sonehela akongelo epanduvali a kasi volupale luo Asia okuti:

Ohenda ya piãla lombembua yi tunda ku “Una o kasi, haeye wa kala ale kuenda iya,” haiyo yi tunda kolongusu epanduvali vi kasi kovaso yocalo caye, 5 kuenda yi tunda ku Yesu Kristu okuti, “Ombangi Yocili,” haeye “uveli kuava va fa” kuenda “Ombiali yolosoma vio kilu lieve, yi kale love.”

Ku una o tu sole, haeye wa tu yovola kakandu etu losonde yaye,— 6 kuenje wa tu lingisa olosoma lovitunda via Suku yaye haeye Isia—kokuaye ku kale ulamba kuenda unene otembo ka yi pui. Amene.

7 Tala! Eye iyilila valende kuenje ovaso osi a ko mola, ndaño vava vo toma; kuenda apata osi o kilu lieve a ka lila loku litetela lesumuo mekonda liaye. Ocili eci ci ka tẽlisiwa muẽle, Amene.

8 “Ame Tete haime Kuasula,”* oco Yehova Suku a popia, “Una o kasi, haeye wa kala ale kuenda iya, haeye Ukuonene Wosi.”

9 Ame ndi Yoano manjene, haime ndi talela ohali kumue lene, haetu tua tiamẽla kusoma umuamue kuenda kepandi li tunda koku kala oñame ya Yesu, nda kala kocifuka ci tukuiwa Patmo omo lioku vangula catiamẽla ku Suku, loku imbila Yesu uvangi. 10 Omo liunene wespiritu, ndeya oku kala keteke lia Ñala kuenje nda yeva ondaka yinene konyima yange ya soka lolumbeta, 11 yiti: “Ovina o lete vi soneha vociña kuenje vi tuma kakongelo epanduvali okuti: ko Efeso, ko Smurna, ko Pergamo, ko Tuatera, ko Sardesi, ko Filadefia, lo ko Laodikea.”

12 Noke nda ñualapo oco ndi tale u wa kala oku vangula lame kuenje eci nda ñualapo, nda mola oviyekelo epanduvali violondiyelo viulu, 13 kuenda umue wa setahãla omõla omunu wa kala pokati koviyekelo violondiyelo okuti wa wala uwalo wa lepa toke kovolu kuenda wa itika uvia ulu vonulo. 14 Esinga liutue waye li yela ndovonya omeme, ndocikokoto kuenda ovaso aye a soka ndulienge wondalu, 15 olomãhi viaye via soka ndosipi yi nina eci yi kapiwa vofolono kuenda ondaka yaye ya soka ndonjuela yovava alua. 16 Peka liaye liondio pa kala olombungululu epanduvali kuenje vomela waye mua tunda osipata ya tua olonele vivali kuenda ocipala caye ca soka ndoku nina kuekumbi pongunji. 17 Eci ndo mola nda kupukila kolomãhi viaye ndomunu wa fa.

Kuenje wa ndi lamba leka liaye liondio, loku popia hati: “Ku ka kuate usumba. Ame nda Fetikako haime nda Sulako, 18 haime ñasi lomuenyo, nda file, pole, tala! ñasi lomuenyo oloneke vienda ño hũ ka vi pui kuenda ñuete olosapi vioku fa levi Vieyambo.* 19 Soneha ovina wa mola, ovina vi kasi, levi vi laika oku pita noke yovina evi. 20 Elomboluilo lielumbu li kola liolombungululu epanduvali wa mola peka liange liondio kuenda oviyekelo epanduvali violondiyelo viulu lieli: Olombungululu epanduvali vi lomboloka ovangelo vakongelo epanduvali kuenda oviyekelo epanduvali violondiyelo, vi lomboloka akongelo epanduvali.

2 “Sonehela ungelo wekongelo lio ko Efeso huti: Evi ovio ovina via popiwa la una o kuete peka liaye liondio olombungululu epanduvali, haeye endela pokati koviyekelo epanduvali violondiyelo viulu, hati: 2 ‘Nda kũlĩha ovilinga viove, upange wove, lepandi liove kuenda kua siatele oku kuata ukamba lolondingaĩvi, puãi wa nyika vana va litukula vati ovapostolo, osimbu havapostoloko kuenje wa limbuka okuti ovo olohembi. 3 Ove wa lekisavo epandi, haive wa pandikisa omo lionduko yange kuenda kua lekisile ekavo. 4 Pole, ñuete love ondaka yokuti ocisola wa kuatele tete wa ci yanduluka.

5 “‘Kuenje ivaluka ndomo wa konyoha, likekembela kuenda kuama ovilinga viove viatete. Nda kua ci lingile okuti ku likekembela, njiya kokuove kuenje njupa ociyekelo condiyelo yove pocitumãlo cayo. 6 Haimo lumue, eci o kuete ceci okuti: wa suvuka ovilinga vialongiso via va Nikolau, vina okuti ame nda vi suvukavo. 7 U o kuete ovatũi a yevelele eci espiritu sandu li popia kakongelo: Ku una o yula ndu wecelela oku lia kuti womuenyo u kasi vocumbo celau ca Suku.’

8 “Kuenda sonehela ungelo wekongelo lio ko Smurna huti: Evi ovio ovina eye a popia, ‘Una wa Fetikako haeye wa Sulako,’ okuti wa file kuenje o kasi vali lomuenyo, hati: 9 ‘Nda kũlĩha ohali yove, luhukũi wove—pole, wuhuasi—nda kũlĩhavo ava va litukula okuti va Yudea, osimbu okuti hava Yudeako kuenje vo popi atonãi, puãi ovo vakuasunangonga ya Satana. 10 Ku ka kuatele usumba ohali o laika oku talisiwa. Tala! Eliapu li ka amamako oku imba vamue pokati kene vokayike oco o setekiwe ca piãla kuenje o talisiwa ohali oloneke ekũi. Lekisa ekolelo toke koku fa kuenje ndu ku ĩha ekolowa liomuenyo. 11 U o kuete ovatũi a yevelele eci espiritu sandu li popia kakongelo okuti: Una o yula, okufa kuavali ka ku u nyõli.’

12 “Sonehela ungelo wekongelo lio ko Pergamo huti: Evi ovio ovina via popiwa la una o kuete osipata ya lepa haiyo ya tua olonele vivali hati: 13 ‘Nda kũlĩha oku wa tunga, okuti oko ku kasi ocalo ca Satana; puãi handi wa kakatela konduko yange kuenda kua likalele ekolelo o ñuetele, ndaño muẽle koloneke via Antipasi, ombangi yange yocili, una wa pondiwa pokati kene, kuna kua tunga Satana.

14 “‘Pole, ñuete love olondaka vimue viokuti, o kasi lava va kakatela kelongiso lia Baliame, una wa longisa Balaka okuti o kapela ocilondokua omãla va Isareli, oco va lie ovina via lumbiwa koviteka loku linga evĩho liukahonga.* 15 Handi vali, o kasivo lava va kakatela kelongiso lia va Nikolau. 16 Likekembela. Nda kua ci lingile, njiya lonjanga kokuove kuenje ndi yaka lavo losipata ya lepa yomela wange.

17 “‘U o kuete ovatũi a yevelele eci espiritu sandu li popia kakongelo okuti: Una o yula, ndu wĩha omana ya solekiwa kuenda ndu wĩhavo ewe li yela, loku soneha kewe liaco onduko yokaliye okuti lomue wa yi kũlĩha, te lika una o yi tambula.’

18 “Sonehela ungelo wekongelo lio ko Tuatera huti: Evi ovio ovina Omõla a Suku a popia, una okuti ovaso aye a soka ndulienge wondalu, haeye una okuti olomãhi viaye via soka losipi yi nina hati: 19 ‘Nda kũlĩha ovilinga viove, ocisola cove, ekolelo liove, upange wove, lepandi liove kuenda ovilinga viove via sulako via velapo okuti viatete vi sule.

20 “‘Pole, ñuete love ondaka yimue yokuti, o kasi oku ecelela ukãi waco wa soka la Isevele, una o litukula okuti uprofeto, haeye o longisa loku yapuisa akuenje vange oco va linge evĩho liukahonga* kuenda oku lia ovina via lumbiwa koviteka. 21 Ndo wĩha evelo oco a likekembele, puãi eye ka yongola oku likekembela kevĩho liukahonga* waye. 22 Tala! ndu kokela oku vela kuenda vana va linga laye ukahokolo ndi va kokela ohali ya piãla, te nda va likekembela kovilinga viavo. 23 Ndi ponda omãla vaye lefengi li ponda, kuenje akongelo osi a limbuka okuti ame una o kũlĩhĩsa ovisimĩlo via longa* kuenda ovitima kuenje ngeca komunu lomunu eci ca sesamẽla ovilinga viene.

24 “‘Handi vali, ndu sapuili ene wa supipo ko Tuatera, vosi ka va kuamele elongiso eli, la vana ka va kũlĩhĩle eci ca tukuiwa okuti “ovina via longa via Satana,” siti: Si kasi oku vu tuiki ocilemo cimue cikuavo. 25 Ndu sapuili vali siti, kakateli kovina vu kuete toke njiya. 26 Kuenje una o yula haeye o kuama ovilinga viange toke kesulilo, ndu wĩha unene woku viala olofeka, 27 kuenda o viala olofeka viosi loku vi lava lepangati liutale okuti vi sasũiwa ndolombia viotuma, ndeci nda tambula omoko yaco ku Isia. 28 Kuenje ndu wĩha olumbungululu luomẽle. 29 U o kuete ovatũi a yevelele eci espiritu sandu li popia kakongelo.’

3 “Sonehela ungelo wekongelo lio ko Sardesi huti: Evi ovio ovina via popiwa la una o kuete aspiritu epanduvali a Suku kuenda olombungululu epanduvali hati: ‘Nda kũlĩha ovilinga viove, haive o kuete onduko* okuti o kasi lomuenyo, puãi wa fa. 2 Lavulula kuenda pamisa ovina vi laika oku fa, momo kua malusuile* upange Suku yange a yongola okuti o u linga. 3 Amamako oku sokolola* eci wa tambula, leci wa yeva, loku ci lava kuenda likekembela. Te nda wa pasuka, ame njiya ndocimunu kuenje ku kũlĩha owola ndiya kokuove.

4 “‘O kuete omanu vamue* ko Sardesi okuti ka va vĩhisile uwalo wavo kuenda va enda lame luwalo u yela, momo ca va sesamẽla. 5 Una o yula, o wala uwalo u yela kuenda lalimue eteke njupa* onduko yaye velivulu liomuenyo, pole, ndi ivaluka onduko yaye kovaso a Isiange, lo kovaso ovangelo vaye. 6 U o kuete ovatũi a yevelele eci espiritu sandu li popia kakongelo.’

7 “Sonehela ungelo wekongelo lio ko Filadefia huti: Evi ovio ovina via popiwa la una o kola, haeye ukuacili, o kuete osapi ya Daviti, una o yikula okuti lomue o yika, o yika kuenda lomue o yikula, hati: 8 ‘Nda kũlĩha ovilinga viove—tala! nda kapa kovaso ove epito lia yikuka okuti lomue o tẽla oku li yika. Nda kũlĩha okuti o kuete okangusu kamue, haive wa kapako ondaka yange kuenda kua likalele onduko yange. 9 Tala! vana va tiamẽla kosunangonga ya Satana haivo va litukula okuti va Yudea, osimbu okuti hava Yudeako puãi olohembi, ndi va vilikiya oco veye okuti va kekamẽla kolomãhi viove kuenda ndi va limbukisa okuti ame nda ku sola. 10 Omo wa kapako ondaka yatiamẽla kepandi liange,* lamevo ndu ku ivaluka kowola yoseteko, yina yi laika oku iya koluali luosi, loku nyika vana va tunga voluali. 11 Ndiya lonjanga. Amamako oku kakatela kueci o kuete, okuti lomue upa ekolowa liove.

12 “‘Una o yula—ndu u lingisa ongunji vonembele ya Suku yange kuenda lalimue eteke a ka tundamo, ndi soneha kokuaye onduko ya Suku yange, londuko yolupale ya Suku yange, okuti o Yerusalãi Yokaliye yi tunda kilu ku Suku yange, londuko yange yokaliye. 13 U o kuete ovatũi a yevelele eci espiritu sandu li popia kakongelo.’

14 “Sonehela ungelo wekongelo lio ko Laodikea huti: Evi ovio ovina via popiwa la Amene,* ombangi yocili haiyo ya koleliwa kuenda uveli woviluvo viosi via Suku hati: 15 ‘Nda kũlĩha ovilinga viove okuti kua talalele ndaño oku tokota. Pole, nda yonguile okuti o talala ale o tokota. 16 Puãi omo wukuakalendewuya, okuti kua talalele ndaño oku tokota kua tokotele, hu siya vomela wange. 17 Omo wa popia hati, “Ndi huasi haime ndi kuete ukuasi kuenda si sukila cimue,” puãi kua kũlĩhile okuti wukuahali, wuhukũi, wumeke, haive o kasi epõlola, 18 hu lungula oco o lande kokuange ulu wa yenguluiwa londalu okuti o linga ohuasi, luwalo u yela oco o wale okuti osõi yepõlola liove ka yi molẽha kuenda oku landa ovihemba okuti o sieketa vovaso ove oco o vanje.

19 “‘Vosi vana ndi sole, ndi va lungula loku va pindisa. Omo liaco, kala ukuambili kuenda likekembela. 20 Tala! Nda talama puvelo loku totola. Nda umue o yeva ondaka yange kuenje o yulula epito, ndi iñila vonjo yaye, ndi lia laye ondalelo kuenda eye o lia lame. 21 Una o yula, ndu wecelela oku tumãla kumue lame kocalo cange, ndeci ame nda yula kuenje nda tumãla kumue la Isiange kocalo caye. 22 U o kuete ovatũi a yevelele eci espiritu sandu li popia kakongelo.’”

4 Noke yovina evi, nda mola epito lia yikuka kilu kuenda ondaka yatete nda yeva okuti ya vangula lame, ya soka lolumbeta, yu ya popia yiti: “Enju kulo, oco hu lekise ovina vi laika oku pita.” 2 Kuenje vonjanja yaco ndeya oku kala vunene wespiritu sandu kuenje tala! ocalo cimue ca tumbikiwa pocitumãlo cayo kilu kuenda umue wa tumãla kocalo caco. 3 U wa tumãlako wa setahãla ewe lio jaspe lewe lio sardio* kuenda ocalo ca ñualiwa lolukongolo lua setahãla ewe lio emeralda.

4 Ocalo ca ñualiwa lovialo 24 kuenje nda mola 24 kakulu va tumãla kovialo viaco okuti va wala uwalo u yela kuenda kovitue viavo kua kala akolowa ulu. 5 Kocalo kua tunda oviliakulo, olondaka kuenda ovilemĩlo; kua kalavo olondiyelo epanduvali via taimila kovaso yocalo, okuti vi lomboloka aspiritu epanduvali a Suku. 6 Kovaso yocalo kua kala cimue ci kasi ndociva covava ca setahãla ovitulu.

Vokati kocalo kuenda konele yayo kua kala oviendalomuenyo vikuãla vieyuka ovaso konyima lo kovaso. 7 Ocendalomuenyo catete ca setahãla ohosi, ocendalomuenyo cavali ca setahãla ongombe, ocendalomuenyo catatu ci kuete ocipala comunu, ocendalomuenyo cakuãla ca setahãla ongonga. 8 Oviendalomuenyo viaco vikuãla, ocendalomuenyo locendalomuenyo ci kuete avava epandu; ovio vieyuka ovaso kolonele viavava lo vemehi. Kuenje utanya luteke va popia vati: “O kola, o kola, o kola Yehova Suku, Ukuonene Wosi, una wa kala, o kasi kuenda iya.”

9 Olonjanja viosi eci oviendalomuenyo viaco vi eca ulamba lesivayo kuenda olopandu ku Una wa tumãla kocalo, okuti Una o kasi lomuenyo oloneke vi enda ño-o hũ ka vi pui, 10 akulu 24 va kekamẽla Una wa tumãla kocalo loku fendela Una o kasi lomuenyo oloneke vi enda ño-o hũ ka vi pui kuenda va imba akolowa avo kovaso yocalo loku popia vati: 11 “A Yehova Suku yetu, ove o sesamẽla oku tambula ulamba, lesivayo kuenda unene, momo ove wa lulika ovina viosi, ovio vi kasilili kuenda via lulikiwa omo liocipango cove.”

5 Kuenje nda mola peka liondio lia Una wa tumãla kocalo ociña cimue ca sonehiwa kolonele vivali* okuti ca yikiwa lasitikilo epanduvali. 2 Nda mola ungelo umue wa pama wa kaluka lolukandi hati: “Helie o sesamẽla oku iñulula ociña loku upa asitikilo aco?” 3 Pole, ka kuli omunu umue kilu, ale posi, pamue vemehi lio posi o tẽla oku iñulula ociña, ale oku vanjamo. 4 Nda kala oku lila calua momo lomue wa sangiwa okuti o sesamẽla oku iñulula ociña ale oku vanjamo. 5 Umue pokati kakulu wa ndi sapuila hati: “Ku ka lile. Tala! Ohosi yocikoti ca Yuda, yo kepata lia Daviti, wa yula oco a iñulule ociña loku upa asitikilo aco epanduvali.”

6 Pokati kocalo, lo pokati koviendalomuenyo vikuãla kuenda pokati kakulu nda mola okameme ka molẽha ndu okuti ka pondiwa, haiko ka kuete olombinga epanduvali, lovaso epanduvali, okuti ovaso aco a lomboloka aspiritu epanduvali a Suku, ana a tumiwa kuosi kilu lieve. 7 Vonjanja yaco Kameme weya kuenje wa tambula ociña peka liondio lia Una wa tumãla kocalo. 8 Eci eye a tambula ociña, oviendalomuenyo vikuãla kuenda 24 kakulu va kekamẽla Okameme kuenje ukulu lukulu o kuete ohalupa, latiyela ulu eyuka insensu. (Insensu vi lomboloka olohutililo violosandu.) 9 Kuenje ovo va imba ocisungo cimue cokaliye vati: “Ove o sesamẽla oku tambula ociña loku upa asitikilo aco, momo wa pondiwa kuenje losonde yove wa landela Suku omanu va tunda kapata osi, kalimi osi, komanu vosi, lo kolofeka viosi, 10 kuenje wa va lingisa olosoma lovitunda via Suku yetu kuenda va ka viala ndolosoma koluali luosi.”

11 Kuenje nda mola, kuenda nda yeva ondaka yovangelo valua, loviendalomuenyo, lakulu va ñuala ocalo okuti etendelo liavo ohuluwa yolohuluwa,* lohulukãi yolohulukãi, 12 kuenje va kaluka lolukandi vati: “Okameme kana ka pondiwa ka sesamẽla oku tambula unene, ukuasi, olondunge, ongusu, esivayo, ulamba kuenda esumũlũho.”

13 Oco, nda yeva oviendalomuenyo vio kilu, levi vio posi kuenda vio vemẽhi lio posi, vio vokalunga, lovina vi kasimo, viti: “Ku una wa tumãla kocalo kuenda ku Kameme ku kale esumũlũho, esivayo, ulamba, lunene oloneke vi enda ño-o hũ ka vi pui.” 14 Oviendalomuenyo vikuãla via popia viti: “Amene!” kuenda akulu va kekama loku fendela.

6 Nda mola eci Okameme ka yikula yimue pokati kolondimbukiso epanduvali kuenje nda yeva umue pokati koviendalomuenyo vikuãla wa kaluka londaka ya soka locilemĩlo hati: “Enju!” 2 Kuenje nda mola okavalu ka yela kuenda u wa tumãlako o kuete ohonji; kuenje vo wĩha ekolowa limue, yu wa tundila oku yula loku tẽlisa oku yula kuaye.

3 Eci eye a yikula esitikilo liavali, nda yeva ocendalomuenyo cavali ca popia citi: “Enju!” 4 Kua tunda okavalu kakuavo ka kuete evala li kusuka kuenda u wa tumãlako vo wĩha omoko yoku imula ombembua kilu lieve, okuti ovo va liponda pokati kuenda vo wĩha osipata yinene.

5 Eci eye a yikula esitikilo liatatu, nda yeva ocendalomuenyo catatu ca popia citi: “Enju!” Kuenje nda mola okavalu katekãva kuenda u wa tumãlako o kuete ombalãsa peka. 6 Nda yeva ondaka ya tunda pokati koviendalomuenyo vikuãla ya popia yiti: “Okilu yimosi yotiliku yi landiwa lodenariu yimosi* kuenda olokilu vitatu viosevata vi landiwavo lodenariu yimosi; kuenje ulela lovinyu ku ka vi nyõle.”

7 Eci eye a yikula esitikilo liakuãla, nda yeva ondaka yocendalomuenyo cakuãla ca popia citi: “Enju!” 8 Noke nda mola okavalu ka yeluluka kuenda u wa tumãlako o kuete onduko okuti Kufa. Kuenje Eyambo* lio kuama. Va va ĩha omoko kombandu yakuãla yo kilu lieve, okuti va ponda losipata, lonjala, lefengi li ponda kuenda ovinyama via tema vio kilu lieve.

9 Eci eye a yikula esitikilo liatãlo, nda mola vemehi liutala osonde ya vana va pondiwa omo liondaka ya Suku kuenda uvangi ovo va eca. 10 Va kaluka lolukandi vati: “Toke pi, a Ñala Tõlo o kola haive ukuacili, o likala oku pisa loku fetuluinya osonde yetu ku vana va tunga kilu lieve?” 11 Omunu lomunu pokati kavo wa tambula uwalo u yela wa lepa, va va sapuila oco va puyukepo kamue toke eci etendelo liapika vakuavo li suapo kuenda etendelo lia vamanjavo vana va laikele oku pondiwa ndeci ovo va pondiwa.

12 Eci eye a yikula esitikilo liepandu, kua pita ocilemawe cinene; kuenje ekumbi lia tekãva ndonjeke yocikelẽyi* kuenda osãi ya kusuka ndosonde, 13 kuenje olombungululu vio kilu via loluka posi ndeci uti ukuyu okuti eci u tuñunyiwa lofela yalua, akuyu ka a pile a loluka. 14 Ilu lia muñiwa ndociña kuenje lia taka, olomunda viosi lovifuka viosi via sondoluiwa povitumãlo vialio. 15 Kuenje olosoma vio kilu lieve, la vana va kemãla, la va kesongo kolohoka, olohuasi, lava va pama, lapika vosi, la vana va yovuiwa, va salama valeva kuenda kovawe olomunda. 16 Ovo va sapuila olomunda kuenda ovawe vati: “Tu leñuhili kuenda tu vindikiyi kocipala ca Una wa tumãla kocalo kuenda konyeño ya Kameme, 17 momo eteke linene lionyeño yavo lia pitĩla kuenda helie o tẽla oku puluka?”

7 Noke yovina evi nda mola ovangelo vakuãla va talama kavindi akuãla o kilu lieve, va tutuiya olofela vikuãla vio kilu lieve okuti layimue ofela yi sika kilu lieve ale vokalunga, pamue kuti umue. 2 Kuenje nda mola ungelo ukuavo wa tunda kutundilo, haeye o kuete ondimbukiso ya Suku o kasi lomuenyo; yu wa kalukila lolukandi kovangelo vakuãla vana va kundikiwa oku imula ilu lieve kuenda okalunga, 3 hati: “Ku ka imuli ilu lieve ale okalunga, pamue oviti, toke eci tu kapa olondimbukiso kovipolo viakuenje va Suku yetu.”

4 Kuenje nda yeva etendelo lia vana va kapiwa olondimbukiso okuti 144.000, vopiwa kapata osi omãla va Isareli:

9 Noke nda mola owiñi wakahandangala, okuti lomue wa tẽla oku u tenda, wa tunda kolofeka viosi, kapata osi, komanu vosi kuenda kalimi osi, va tãi kovaso yocalo lo kovaso ya Kameme, va wala uwalo u yela wa lepa; povaka avo vambata ovianja vieva. 10 Kuenje va vilikiya lolukandi vati: “Epopelo li tunda ku Suku yetu, una wa tumãla kocalo kuenda ku Kameme.”

11 Ovangelo vosi lakulu kuenda oviendalomuenyo vikuãla va ñuala kocalo kuenje va kekama kovaso yocalo oku fendela Suku, 12 loku popia vati: “Amene! Esivayo, ulamba, olondunge, olopandu, esumbilo, unene kuenda ongusu, vi kale la Suku yetu oloneke vi enda ño-o hũ ka vi pui. Amene.”

13 Umue pokati kakulu wa ndi pulisa hati: “Ava va wala ndeti uwalo u yela haiwo wa lepa, velie kuenda va tunda pi?” 14 Kuenje ndo tambulula hati: “A Ñala yange, ove wa ci kũlĩha.” Yu wa ndi sapuila hati: “Ava vana va tunda kohali ya piãla, okuti va sukula ovowalo avo kuenda va a yelisa vosonde ya Kameme. 15 Eli olio esunga lieci va kasilili kovaso yocalo ca Suku kuenda vo lingila upange u kola utanya luteke vonembele yaye; kuenje Una wa tumãla kocalo o ka pongiya ombalaka oco a va teyuile. 16 Ovo ka va yevi vali onjala ndaño enyona, ekumbi ka li va kakula vali, pamue owuya, 17 momo Kameme una o kasi vokati kocalo, o linga ungombo wavo loku va songuila kolono viovava omuenyo. Kuenje Suku o ka puenya asuelẽla osi kovaso avo.”

8 Eci eye a yikula esitikilo liepanduvali, kilu kueya oku ũha ci soka akũi atatu kakukutu. 2 Kuenje nda mola ovangelo epanduvali va tãi kovaso a Suku kuenda va va ĩha epanduvali kalumbeta.

3 Ungelo ukuavo wa kuata ocikuata cinsensu culu,* weya yu wa talama kutala kuenje vo wĩha onepa yalua yinsensu oco a yi lumbe kumue lolohutililo violosandu kutala ulu wa kala kovaso yocalo. 4 Owisi winsensu peka liungelo kumue lolohutililo violosandu, via londa ku Suku. 5 Vonjanja yaco ungelo wa tikula ocikuata cinsensu, wa ci yukisa londalu yutala kuenda wa ci pesila kilu lieve. Kuenje kua kala ovilemĩlo, olondaka, oviliakulo kuenda ocilemawe. 6 Kuenje ovangelo epanduvali kumue lalumbeta epanduvali va liangiliyila oku sika.

7 Ungelo watete wa sika olumbeta luaye. Kuenje kua kala ociwe, londalu ya litenga losonde kuenda via pesiwa kilu lieve; kuenje onepa yatatu yo kilu lieve ya pia, onepa yatatu yoviti ya piavo, lowangu wosi u talala wa pia.

8 Ungelo wavali wa sika olumbeta luaye. Kuenje cimue ca setahãla omunda yinene ya taima londalu, ca imbiwa vokalunga. Onepa yatatu yokalunga ya pongoloka osonde; 9 kuenje onepa yatatu yoviendalomuenyo vio vokalunga via fa, lonepa yatatu yolonaviyu ya nyõleha.

10 Ungelo watatu wa sika olumbeta luaye. Kuenje kilu kua loka olumbungululu lunene lua taima ndondiyelo, yu lua lokila konepa yatatu yolondui kuenda kolono viovava. 11 Onduko yolumbungululu luaco, Ndulu. Kuenje onepa yatatu yovava ya linga ndondulu kuenda omanu valua va fa omo liovava, momo ovava aco a lula.

12 Ungelo wakuãla wa sika olumbeta luaye. Kuenje onepa yatatu yekumbi, lonepa yatatu yosãi kuenda onepa yatatu yolombungululu via vetiwa, okuti onepa yatatu yavio vi vuvala kuenda onepa yatatu yutanya ka yi kuete ocinyi, luteke haicovo.

13 Oco nda mola kuenje nda yeva ongonga yi palãla vokati kilu ya kaluka lolukandi yiti: “Avoyo we, avoyo we, ngongo yava va tunga kilu lieve, omo lioku sikiwa kualumbeta akuavo ovangelo vatatu okuti ndopo va sika alumbeta avo!”

9 Ungelo watãlo wa sika olumbeta luaye. Kuenje nda mola olumbungululu lua tunda kilu yu lua kupukila posi kuenda vo wĩha osapi yekungu.* 2 Eye wa yikula ekungu* kuenje owisi wa tunda vekungu* wa soka ndowisi u tunda vofolono yinene kuenda ekumbi lofela via vuvala omo liowisi wa tunda vekungu.* 3 Kuenje vokati kowisi mua tunda olohuma okuti via kupukila kilu lieve, kuenda via tambula omoko ndeyi yi kuete anyenya o kilu lieve. 4 Via handelekiwa oco ka vi ka nyõle ovikũla vio kilu lieve, ale owangu u talala, pamue oviti, te lika omanu vana ka va kuete ondimbukiso ya Suku kovipolo viavo.

5 Olohuma ka via tambuile omoko yoku ponda omanu vaco, te oku va yambula olosãi vitãlo, eyambulo liaco lia soka levalo omunu a yeva eci a lumaniwa lenyenya. 6 Koloneke viaco omanu va ka sandiliya oku fa, pole, ka va ka ku sanga kuenje va ka livela oku fa, puãi oku fa ku va tila.

7 Olohuma viaco via setahãla otuvalu tua malehela uyaki; kovitue viavo kua kala cimue ca setahãla akolowa ulu, ovipala viavo via setahãla ovipala viomanu, 8 esinga liovitue viavo lia setahãla esinga liakãi. Ovayo avo a soka lovayo olohosi, 9 va kuata ociteyuilo covonete ca soka lociteyuilo cutale. Onjuela yavava avo ya soka lonjuela yakãlu a nãliwa lotuvalu tu lupukila kuyaki. 10 Via kala lovicĩla vi kasi lolosongo via setahãla anyenya kuenda kovicĩla viaco oko ku kasi unene woku lemeha omanu olosãi vitãlo. 11 Ovo va kuete soma yavo okuti, ungelo wekungu. Kelimi lio Heveru onduko yaco Abadone,* pole, kelimi lio Helasi eye o kuete onduko ya Apoliyono.*

12 Ohali yatete ya pita. Tala! Noke yovina evi ku iya vali olohali vivali.

13 Ungelo wepandu wa sika olumbeta luaye. Kuenje nda yeva ondaka yimue ya tunda kolombinga viutala ulu u kasi kovaso a Suku, 14 ya popia lungelo wepandu o kuete olumbeta hati: “Kutulula ovangelo vakuãla va kutiwa polui lunene Ferati.” 15 Kuenje ovangelo vakuãla va pongiyiwila owola, eteke, osãi kuenda unyamo oco va ponde onepa yatatu yomanu.

16 Etendelo liolohoka viotuvalu tua soka olohuluwa vivali violohuluwa;* nda yeva etendelo liavo. 17 Otuvalu lava va tumãlako nda mola vocinjonde, va kasi ndomo: Ovo va kuata oviteyuilo viovonete vi kusuka ndondalu kuenda evala li tekãvelua, ovitue viotuvalu tua setahãla ovitue violohosi, kovimẽla viatuo kua tunda ulienge wondalu kuenda owisi. 18 Onepa yatatu yomanu ya pondiwa lafengi aco atatu, londalu, lulienge kuenda owisi wa tunda kovimẽla viatuo. 19 Unene wotuvalu, u kasi kovimẽla lo kovicĩla viatuo, momo ovicĩla viatuo via setahãla olonyõha kuenda vi kuete ovitue kuenje lovicĩla viaco vi nyõla lavio omanu.

20 Pole, omanu vakuavo okuti ka va pondiwile lafengi aco, ka va likekembelele ovilinga viovaka avo; ka va liwekelepo oku fendela olondele, oviñumañuma viulu, viopalata, viosipi, levi viovawe kuenda vioviti, vina okuti ka vi vanji, ndaño oku yeva, pamue oku enda. 21 Ka va likekembelele koku ponda kuavo, ale kumbanda wavo, pamue kevĩho liukahonga wavo,* ndaño koku nyana kuavo.

10 Nda mola ungelo ukuavo wa pama wa tunda kilu okuti, wa wala* elende kuenje kutue waye kua kala olukongolo kuenda ocipala caye ca setahãla ekumbi, ovimuine* viaye via soka lolongunji viondalu, 2 peka liaye wa kuata okaciña ka nyanyumuha. Wa liata lomãhi yaye yondio vokalunga kuenda lomãhi yepĩli wa liatela kongongo, 3 eye wa kaluka lolukandi ndohosi eci yi kasi oku koma. Kuenje eci a kaluka, ovilemĩlo epanduvali via popia.

4 Eci ovilemĩlo epanduvali via popia, nda yonguile oku soneha, pole, nda yeva ondaka ya tunda kilu yiti: “Ku ka seleke olondaka via popiwa lovilemĩlo epanduvali kuenda ku ka vi sonehe.” 5 Ungelo nda mola okuti wa talama vokalunga lo kongongo, wa tulika eka liaye liondio kilu, 6 kuenje wa lisila la Una o kasi lomuenyo oloneke vi enda ño-o hũ ka vi pui, haeye wa lulika ilu lovina vi kasimo, longongo lovina vi kasimo, lokalunga lovina vi kasimo, hati: “Ka ku kala vali oku amisapo. 7 Puãi kotembo eci ungelo wepanduvali a laikele oku sika olumbeta luaye, elumbu li kola Suku a sapula ndolondaka viwa kakuenje vaye okuti ovaprofeto, li tẽlisiwa.”

8 Kuenje nda yeva ondaka ya tunda kilu ya popia vali lame hati: “Kuende, ka tambule ociña ca nyanyumuiwa ci kasi peka liungelo wa talama vokalunga lo kongongo.” 9 Yu nda enda kungelo kuenje ndo sapuila oco a nyĩhe okaciña. Eye wa ndi sapuila hati: “Ka tambula kuenje ka lia, oko ka lulisa vimo liove, puãi vomela ka sõsa ndowiki.” 10 Nda tambula okaciña peka liungelo kuenje nda ka lia, puãi vomela wange ka sõsa ndowiki, pole, eci nda ka ina, vimo liange mua lula. 11 Kuenje ovo va ndi sapuila vati: “O sukila oku imba vali owanji komanu, lo kolofeka, lo kalimi kuenda kolosoma vialua.”

11 Kuenje va nyĩha oluneva lua soka lombueti* eci eye a popia hati: “Votoka, upa oseteko yocitumãlo ci kola conembele ya Suku kuenda kutala, kumue lomanu va fendelamo. 2 Pole, catiamẽla kocitali ci kasi kosamua yocitumãlo ci kola conembele, ci kale ño ku ka cupe oseteko, momo ca eciwa kovingendeleyi kuenda va ka liatela olupale lu kola lolomãhi viavo vokuenda kuolosãi 42. 3 Olombangi viange vivali ndi vi lingisa okuti vi imba owanji ci soka 1.260 koloneke loku wala ovikelẽyi.” 4 Ovio vi lomboloka oviti vivali violiveira, loviyekelo vivali violondiyelo kuenda va tãi kovaso a Ñala ukuailu lieve.

5 Nda umue o yongola oku va linga lãvi, kovimẽla viavo ku tunda ondalu kuenje yi lia ovanyali vavo. Nda umue o yongola oku va linga lãvi, o pondiwa lonjila eyi. 6 Ovo va kuete omoko yoku yika ilu okuti ombela ka yi loki vokuenda kuoloneke ovo va imba owanji, va kuetevo omoko lovava okuti a pongoloka osonde kuenda olonjanja viosi eci va panga, va vetisa ilu lieve lafengi osi.

7 Eci va mala oku imba uvangi, ocinyama ca tema ci tunda vekungu ci linga uyaki lavo kuenje ci va yula loku va ponda. 8 Ovivimbi viavo vi kala vonjila yolupale lunene, okuti konepa yespiritu lu tukuiwa Sodoma kuenda Egito, muna Ñala yavo a pondiwilavo kuti. 9 Vokuenda kuoloneke vitatu lomeyu, omanu, lapata, lalimi kuenda olofeka va ka vanja kovivimbi viavo kuenje ka va ka ecelela okuti ovivimbi viavo vi langekiwa veyambo. 10 Ava va tunga kilu lieve va sanjukila oku fa kuavo, loku litumisa olombanjaile omunu lukuavo, momo ovaprofeto vaco vavali va enda oku sakalaisa vana va tunga kilu lieve.

11 Noke yoloneke vitatu lomeyu, Suku wa va pindula kavali kavo* kuenje va talama kuenda vana va va mola va kala lusumba walua. 12 Kuenje va yeva ondaka ya tunda kilu ya popia lavo lolukandi yiti: “Londeli kulo.” Yu va londa kilu valende kuenda ovanyali vavo va va mola.* 13 Kepuluvi liaco, kua pita ocilemawe cinene kuenje onepa yekũi yolupale ya kupuka; kuenda ci soka 7.000 komanu va pondiwa locilemawe, puãi vakuavo va kala lusumba kuenda va eca esivayo ku Suku yo kilu.

14 Ohali yavali ya pita. Tala! Ohali yatatu yi kasi oku iya lonjanga.

15 Ungelo wepanduvali wa sika olumbeta luaye. Kuenje kua yevala ondaka ya tunda kilu ya popia yiti: “Usoma woluali wa linga Usoma wa Ñala yetu kuenda wa Kristu waye kuenje eye o ka viala ndosoma oloneke vi enda ño-o hũ ka vi pui.”

16 Kuenje 24 kakulu vana va tumãla kovaso a Suku kovialo viavo, va petamisa ovipala viavo loku fendela Suku, 17 vati: “Tu ku pandula a Yehova Suku, Ukuonene Wosi, una o kasi, haive wa kala ale, omo wa kuata unene wove walua kuenje wa fetika oku viala ndosoma. 18 Pole, olofeka via tema, onyeño yove yeya kuenda ya pitĩlapo otembo yoku sombisa vana va fa, loku eca onima kakuenje vove ovaprofeto, lolosandu, la vana va sumbila onduko yove, ava vatito lava vanene kuenda oku kundula vana va vĩhisa* ilu lieve.”

19 Noke ocitumãlo ci kola conembele ya Suku kilu ca yikuka kuenje ocikasia cocisila caye ca muiwa kocitumãlo caye ci kola conembele. Kua kala oviliakulo lovilemĩlo, lolondaka, lovikẽlu, locilemawe kuenda ociwe calua.

12 Kuenje kua molẽha ondimbukiso yinene kilu: Ukãi umue wa wala ekumbi kuenda osãi ya kala kolomãhi viaye kuenje kutue waye kua kala ekolowa li kuete 12 kolombungululu, 2 eye wa kala omisi. Kuenje wa kala oku lila omo lievalo kuenda olongembia viaye vioku cita.

3 Nda mola ondimbukiso yikuavo kilu, okuti ocinyoha cinene ci kusuka ci kuete ovitue epanduvali, lolombinga ekũi kuenda kovitue viayo kua kala epanduvali kakolowa;* 4 kuenda ucĩla waco wa komba onepa yatatu yolombungululu vio kilu kuenje wa vi imba kilu lieve. Ocinyoha caco ca talama kovaso yukãi wa laikele oku cita, okuti eci ukãi a cita, ci lia omõlaye.

5 Ukãi wa cita omõla ulume, una wa laikele oku songuila olofeka viosi lombueti yutale. Kuenje omõlaye wambatiwa* ku Suku kuenda kocalo caye. 6 Ukãi wa tilila vekalasoko, muna mua kala ocitumãlo ca pongiyiwa la Suku, haiko a tekuiwila ci soka 1.260 koloneke.

7 Kuenje kilu kueya uyaki: Mingeli* lovangelo vaye va liyaka locinyoha kuenda ocinyoha lovangelo vaye va yakavo, 8 pole, ka va tamãlalele* kuenda kilu ka kua kaile vali ocitumãlo cavo. 9 Puãi ocinyoha cinene ca imbiwa posi, okuti onyoha yosiahũlu yi tukuiwa Eliapu haeye Satana, una o kasi oku yapuisa oluali luosi; eye wa imbiwa kilu lieve kuenda ovangelo vaye va imbiwa kumue laye posi. 10 Nda yeva ondaka yimue ya kaluka kilu yiti:

“Cilo kua situluiwa eyovo, lunene kuenda Usoma wa Suku yetu, lomoko ya Kristu waye, momo omindiki ya vamanjetu ya imbiwa posi, una o va lundaila utanya luteke kovaso a Suku yetu! 11 Kuenje ovo vo yula omo liosonde ya Kameme kuenda omo liondaka yuvangi wavo, haivo ka va solele omuenyo wavo ndaño koku fa. 12 Omo liaco, yoleli ene ailu lene wa tungimo! Ove ailu lieve, lokalunga ngongo yene, momo Eliapu lia lokila kokuene lonyeño yalua, omo lia kũlĩha okuti li kuete otembo yitito.”

13 Eci ocinyõha ca limbuka okuti ca imbiwa kilu lieve, ca fetika oku lambalala ukãi, una wa cita omõla ulume. 14 Ukãi puãi wa ĩhiwa avava avali ongonga yinene, okuti o palãlela vekalasoko kocitumãlo caye, ocipãla lonyoha, kuna eye a tekuiwila otembo, lolotembo, lomeyu yotembo.

15 Onyoha lomẽla wayo ya pamba ovava ndolui vonyima yukãi, okuti yu kunyuila volui. 16 Puãi osi ya kuatisa ukãi, yu ya asama omela kuenje ya nyua olui lua pamba ocinyoha vomela waco. 17 Ocinyoha ca tema lukãi kuenje ca linga uyaki locitumbulukila* caye ca supapo, vana va pokola kocihandeleko ca Suku, haivo va kuete upange woku imbila Yesu uvangi.

13 Kuenje ocinyoha, ca talama keseke liokalunga.

Noke nda mola ocinyama ca tema ca tunda vokalunga, ci kuete ekũi liolombinga, lovitue epanduvali kuenda kolombinga kua kala ekũi kakolowa, pole, kovitue viaco kua sonehiwa olonduko vioku tondala Suku. 2 Ocinyama ca tema nda mola, ca setahãla ongue, pole, olomãhi viaco via setahãla olomãhi vio ursu, omẽla waco wa setahãla omẽla wohosi. Ocinyõha ca eca unene kocinyama ca tema kuenda ca ecavo ocalo caco lomoko yalua.

3 Nda mola okuti umue pokati kovitue viaco wa lemehiwa calua, puãi epute liaco lia kaya kuenje vosi kilu lieve va kuama ocinyama ca tema loku komõha. 4 Kuenje va fendela ocinyoha, momo ca eca omoko kocinyama ca tema kuenda va fendela ocinyama ca tema lolondaka viti: “Helie wa lisoka locinyama ca tema kuenda helie o tẽla oku yaka laco?” 5 Ocinyoha ca eca kocinyama ca tema omela woku vangula ovina vioku lipanda loku popia lãvi ovina vi kola kuenda ca ĩhiwa omoko ci soka 42 kolosãi. 6 Oco, ca yikula omela kuenje ca fetika oku tondala Suku loku popia atonãi onduko yaye, locitumãlo caye kumue la vana va tunga kilu. 7 Ca ĩhiwa omoko yoku linga uyaki lolosandu loku vi yula, ca ĩhiwavo omoko yoku viala apata osi, lomanu, lalimi kuenda olofeka. 8 Kuenje vosi va tunga kilu lieve va ci fendela. Tunde koku sevetiwa kuoluali, olonduko viavo ka via sonehiwile velivulu liomuenyo lia Kameme, una wa pondiwa.

9 Nda umue o kuete ovatũi, a yevelele. 10 Nda umue wa tukuiwila umandekua, enda kumandekua. Nda umue wa ponda losipata,* o pondiwavo losipata. Ovina evi ovio vi lomboloka epandi kolosandu kuenda ekolelo.

11 Noke nda mola ocinyama cikuavo ca tema ca tunda kilu lieve, ca kala lolombinga vivali via setahãla olombinga viomeme kuenje ca fetika oku vangula ndocinyoha. 12 Oco ci kuete omoko yosi yocinyama catete ca tema kovaso aco. Ci kokisa ilu lieve, lomanu vosi va tungamo oku fendela ocinyama catete ca tema, cina ca kaile lepute lia kaya. 13 Kuenje ci lingainga olondimbukiso vinene, loku lingisa ondalu kilu kuenda oku yi lokisila posi kovaso omanu.

14 Ocinyõha ci yapuisa vana va tunga kilu lieve, omo liolondimbukiso via ĩhiwa oku linga kovaso yocinyama catete ca tema, osimbu oco ca kala oku sapuila vana va tunga kilu lieve oco va linge ociñumañuma cocinyama ca tema, cina ca lemehĩwa losipata, pole, haimo ca kala lomuenyo. 15 Kuenje ca ĩhiwavo omoko yoku eca efuimo kociñumañuma cocinyama ca tema, okuti ociñumañuma cocinyama ca tema ci vangula kuenda ci pondisa vana va likala oku fendela ociñumañuma cocinyama ca tema.

16 Oco, ci kisika omanu vosi—ava vanene lava vatito, olohuasi lolohukũi, ava va yovoka, lapika—okuti va kapiwa ondimbukiso peka liondio pamue kovipolo viavo, 17 kuenje lomue o pondola oku landa, ale oku landisa te una o kuete ondimbukiso, londuko yocinyama ca tema, pamue etendelo lionduko yaco. 18 Eci oco ci lomboloka olondunge: Una o kuete olondunge a kũlĩhĩse etendelo liocinyama ca tema, momo etendelo liaco, liomunu kuenje etendelo liaco lieli, 666.

14 Noke nda mola Kameme o tãi Komunda Siono kumue 144.000, vana okuti kovipolo viavo kua sonehiwa onduko yaye londuko ya Isiaye. 2 Nda yeva ondaka ya tunda kilu ya setahãla ocileñi covava alua, pamue ondaka yocilemĩlo calua; kuenda ondaka nda yeva ya soka lolonjimbi vi kasi oku imba lolohalupa viavo. 3 Ovo va kasi loku imba ocisungo cimue ci molẽha ndu okuti ocisungo cokaliye kovaso yocalo lo kovaso yoviendalomuenyo vikuãla, lo kovaso yakulu kuenda lomue wa tẽla oku lilongisa ocisungo caco, te lika 144.000, vana Suku a landa kilu lieve. 4 Ovo, ovo vana ka va livĩhisile lakãi; momo va kasi ndakuenje lafeko vosombo. Ovo va kasi oku kuama Kameme kuosi a enda. Va landiwa pokati komanu ndapako atete ku Suku kuenda ku Kameme, 5 kovimẽla viavo ka kua sangiwile uhembi; kuenda va pua eko.

6 Kuenje nda mola ungelo ukuavo o palãla vokati kilu, wambata olondaka viwa viotembo ka yi pui kuava va tunga kilu lieve okuti, kolofeka viosi, kapata osi, kalimi osi kuenda komanu vosi. 7 Wa kaluka lolukandi hati: “Sumbili Suku, u wĩhi ulamba, momo owola yoku sombisa kuaye ya pitĩla kuenje fendeli Una wa lulika ilu, osi, lokalunga kuenda olono viovava.”

8 Ungelo ukuavo wavali wo kuama, wa popia hati: “O Bavulono Yinene ya kupuka! Oyo ya kupuka, yina ya siata oku kokisa olofeka viosi oku nyua ovinyu violoñeyi* vievĩho liukahonga waye!”*

9 Ungelo ukuavo watatu wa va kuama, wa popia lolukandi hati: “Nda umue o fendela ocinyama ca tema lociñumañuma caco kuenje o kapiwa ondimbukiso pupolo, pamue peka liaye, 10 eye o ka nyuavo kovinyu ka ya savele yonyeño ya Suku, okuti ya pesiwa vokopo yonyeño Yaye kuenda o yambuiwa lulienge wondalu kovaso yovangelo va kola lo kovaso a Kameme. 11 Owisi woku yambuiwa kuavo ku londa oloneke vi enda ño-o hũ ka vi pui kuenda ovo ka va ka kuata epuyuko utanya luteke, vana okuti va fendela ocinyama ca tema lociñumañuma caco haivo va kapiwa ondimbukiso londuko yaco. 12 Eci oco ci lomboloka epandi kolosandu okuti, vana va siata oku lava ovihandeleko via Suku, haivo va kakatela kekolelo lia Yesu.”

13 Kuenje nda yeva ondaka ya tunda kilu yiti, “Soneha: Va sumũlũha vana va fila vomunga kumue la Ñala oku upisa cilo toke kovaso. Espiritu lia Suku lia popia liti, va puyuke kovopange avo, momo ovina va linga vi va kuama.”*

14 Noke nda mola elende li yela kuenje kelende kua tumãla umue wa setahãla omõla omunu okuti, wa wala ekolowa liulu kutue waye kuenda peka liaye wa kuata omila ya tua.

15 Ungelo ukuavo wa tunda kocitumãlo ci kola conembele kuenje wa vilikiya lolukandi una wa tumãla kelende hati: “Imba omila yove kilu lieve kuenda ka kelule, momo owola yoku kelula yeya, olomema vio kilu lieve via yela.” 16 Una wa tumãla kelende wa imba omila kilu lieve kuenje ilu lieve lionguiwa.

17 Ungelo ukuavo wa tunda kocitumãlo ci kola conembele yi kasi kilu kuenje wa kalavo lomila ya tua.

18 Handi ungelo ukuavo wa tundavo kutala kuenda wa kala lomoko yondalu. Kuenje wa vilikiya lolukandi una wa kala lomĩla ya tua hati: “Imba omĩla yove ya tua kuenje ongolola ovisiakata viayuva o kilu lieve, momo ayuva aco a pia.” 19 Ungelo wa imba omila yaye kilu lieve kuenje wa teta ayuva o kilu lieve, yu wa a kapa vocikoselo cinene conyeño ya Suku. 20 Ocikoselo caco ca kosiwa kosamua yolupale kuenda vocikoselo mua tunda osonde ya pitĩla toke kololelia viotuvalu vocinãla ci soka 1.600 kovila violomapalo.*

15 Kuenje nda mola ondimbukiso yikuavo kilu, okuti yinene haiyo yi komõhisa, lovangelo epanduvali lafengi epanduvali. Afengi aco o-o a sulako, momo mekonda liao onyeño ya Suku yi tẽlisiwa.

2 Nda mola cimue ca setahãla ociva covitulu ca tengiwa londalu, la vana va yula ocinyama ca tema lociñumañuma caco, letendelo yonduko yaco, ovo va talama kociva covitulu kuenda va kuete olohalupa via Suku. 3 Ovo va kala oku imba ocisungo ca Mose ukuenje wa Suku, locisungo ca Kameme vati:

“A Yehova, Suku Ukuonene Wosi, ovilinga viove vinene haivio vi komõhisa. Olonjila viove viesunga haivio viocili, a Soma yonahũlũlua. 4 A Yehova, u o likala oku ku sumbila loku sivaya onduko yove, helie, omo ove lika ukuacili? Momo olofeka viosi viya oku ku fendela, omo oku tetulula kuove kuesunga kua situluiwa.”

5 Noke yovina evi, nda mola okuti kilu kua yikuiwa ocitumãlo ci kola combalaka yocisila, 6 kuenje ovangelo epanduvali lafengi epanduvali va tunda vocitumãlo ci kola conembele, va wala uwalo u yela haiwo u nina wovalatanya kuenda va litika volonulo viavo luvia ulu. 7 Umue pokati koviendalomuenyo vikuãla wa eca kovangelo epanduvali atiyela epanduvali ulu eyuka onyeño ya Suku, una o kasi lomuenyo oloneke vi enda ño-o hũ ka vi pui. 8 Kuenje ocitumãlo ci kola ceyuka owisi omo liulamba wa Suku kuenda omo liunene waye, lomue wa tẽlele oku iñila vocitumãlo ci kola, toke eci afengi epanduvali ovangelo epanduvali a pita.

16 Kuenje nda yeva ondaka yolukandi ya tunda kocitumãlo ci kola ya sapuila ovangelo epanduvali yiti: “Kuendi, ka peseli atiyela epanduvali onyeño ya Suku kilu lieve.”

2 Watete wa enda kuenje wa pesila etiyela liaye kilu lieve. Noke kueya apute ãvi ãvi komanu va kuatele ondimbukiso yocinyama ca tema, haivo va fendela ociñumañuma caco.

3 Wavali wa pesila etiyela liaye vokalunga. Kuenje okalunga ka pongoloka osonde ndeyi yomanu va fa kuenda oviendalomuenyo viosi via fa, lovina vio vokalunga.

4 Watatu wa pesila etiyela liaye volondui lo volono viovava. Kuenje via pongoloka osonde. 5 Nda yeva ungelo kilu liovava wa popia hati: “Ove Una o kasi, haive wa kala ale, wa Kolelua kuenda ukuesunga, omo wa sokiya esombiso eli, 6 momo ovo va pesela osonde yolosandu, leyi yovaprofeto kuenda wa va ĩha osonde oco va nyue; ca va sesamẽla.” 7 Nda yeva utala wa popia hati: “A Yehova Suku, Ukuonene Wosi, esombiso liove liocili kuenda liesunga.”

8 Wakuãla wa pesila etiyela liaye vekumbi kuenje ekumbi lia ĩhiwa omoko yoku kakula omanu londalu. 9 Kuenje omanu va kakuiwa lowuya walua, pole, ovo va tondala onduko ya Suku, una o kuete omoko yafengi aco kuenda ka va likekembelele loku wĩha ulamba.

10 Watãlo wa pesila etiyela liaye kocalo cocinyama ca tema. Kuenje kueya owelema kuviali waco kuenda omanu va fetika oku litakĩla alimi omo liolongembia viavo, 11 pole, ovo va tondala Suku yo kilu omo liolongembia kuenda apute avo kuenje ka va likekembelele kovilinga viavo.

12 Ungelo wepandu wa pesila etiyela liaye volui lunene Ferati kuenje ovava aluo a takata okuti ku pongiyiwila onjila yolosoma vi tunda kutundilo wekumbi.

13 Kuenje nda mola asapulo atatu a vĩha* a setahãla inonga okuti a tunda komẽla yocinyoha, lo komẽla yocinyama ca tema kuenda komẽla yuprofeto wesanda. 14 Asapulo aco a tunda kolondele kuenje a lingainga olondimbukiso kuenda a yeviwa kolosoma violuali luosi, oco vongoluiwile uyaki weteke linene lia Suku Ukuonene Wosi.

15 “Tala! Njiya ndocimunu. Wa sumũlũha una o lavulula kuenda o lava uwalo waye, okuti ka endi epolõla kuenje omanu va vanja epolõla liaye.”

16 Kuenje olosoma viongoluiwila pocitumãlo okuti kelimi lio Heveru ci tukuiwa Harmagedo.*

17 Wepanduvali wa pesila etiyela liaye vofela. Kuenje kua yevala ondaka yolukandi ya tunda kocitumãlo ci kola tunde kocalo yiti: “Ca tẽlisiwa!” 18 Kua kala oviliakulo lovilemĩlo, lolondaka, lovikẽlu kuenda ocilemawe ka ca la muiwa tunde eci omanu va lulikiwa palo posi, ocilemawe caco ca kala cinene. 19 Olupale lunene lua tepiwa volonepa vitatu kuenda alupale olofeka a kupuka; kuenje o Bavulono Yinene ya ivalukiwa kovaso a Suku, oco vo wĩhe okopo yovinyu yonyeño yaye. 20 Ovifuka viosi via tila, lolomunda ka via molẽhele vali. 21 Kilu kua tunda ociwe calua ca kupukila komanu kuenje ociwe lociwe oku lema kuaco kua soka lotalendo yimosi* kuenda omanu va popia Suku atonãi omo liefengi liociwe, momo efengi liaco linene calua.

17 Umue pokati kovangelo epanduvali okuti wa kala latiyela epanduvali, wa ndi sapuila hati: “Enju, oco hu lekise esombiso liocipuepue cinene cina ca tumãla kovava alua, 2 cina olosoma vio kilu lieve via linga laco evĩho liukahonga* kuenda olonungi vio kilu lieve via kolua lovinyu yevĩho liukahonga* waye.”

3 Noke eye wa ngambata lunene wespiritu sandu vekalasoko. Kuenje nda mola ukãi wa tumãla kocinyama ca tema ci kusuka nge okuti ceyuka olonduko vioku tomba Suku kuenda ca kuata ovitue epanduvali, lolombinga ekũi. 4 Ukãi wa wala uwalo wohusu lowu u kusuka, wa liposuisa lulu, lovawe a tĩla, lomota yondongo kuenda peka liaye wa kuata okopo yulu mueyuka ovina vi linga onyanya lovina via liña levĩho liukahonga* waye. 5 Kupolo waye kua sonehiwa onduko yelumbu yokuti: “Bavulono Yinene, ina yovipuepue, lovina vi lingisa onyanya kilu lieve.” 6 Kuenje nda mola okuti ukãi wa kolua losonde yolosandu kuenda osonde yolombangi via Yesu.

Oco, eci ndo mola nda komõha calua. 7 Ungelo wa ndi sapuila hati: “Momo lie wa komõhela? Hu sapuila elumbu liukãi kuenda ocinyama ca tema kuna ukãi a tumãla okuti, ci kuete ovitue epanduvali lolombinga ekũi: 8 Ocinyama ca tema wa mola okuti, ca kaile, cilo puãi ka ci kasiko vali, haico ci laika oku tunda vekungu, cenda kenyõleho. Kuenje olonungi vio kilu lieve—vana okuti tunde koku sevetiwa kuoluali olonduko viavo ka via sonehiwile velivulu liomuenyo—va ka komõha eci va mola ndomo ocinyama ca tema ca kala puãi cilo ka ci kasiko vali kuenda handi haiko ci kala.

9 “Eci ci sukila oku kuata ukũlĩhĩso kumue lolondunge: Ovitue epanduvali vi lomboloka olomunda epanduvali, kuna ukãi a tumãla kilu liayo. 10 Kuli olosoma epanduvali: Vitãlo via kupuka, yimosi yi kasi, yikuavo handi ka yeyile; pole eci yiya, yi kala ño okatembo kamue. 11 Ocinyama ca tema okuti ca kala puãi ka ci kasiko vali, ci lombolokavo osoma yecelãla, pole yi tunda pokati kolosoma epanduvali kuenda yi loña kenyõleho.

12 “Olombinga ekũi wa mola vi lomboloka olosoma ekũi okuti, ka via tambuile handi uviali, pole, via tambula omoko yoku viala ndolosoma vowola yimosi kumue locinyama ca tema. 13 Ovio vi kuete ocisimĩlo cimuamue kuenje via eca unene lomoko yavo kocinyama ca tema. 14 Ovio vi ka linga uyaki la Kameme, puãi omo okuti eye Ñala yoloñala haeye Soma yolosoma, Kameme o ka va yula. Pole, vana va kovongiwa kuenda va nõliwa, haivo vakuekolelo, va ka yulavo kumue laye.”

15 Eye wa ndi sapuila hati: “Ovava wa mola, kuna ocipuepue ca tumãla, a lomboloka omanu lowiñi, lolofeka kuenda alimi. 16 Olombinga ekũi wa mola locinyama ca tema, ci ka suvuka ocipuepue viu lingisa ekundu loku wendisa epõlõla kuenda vi lia ositu yaye loku ci yoka vondalu. 17 Momo Suku wa kapa vovitima viavo oku tẽlisa ocisimĩlo caye, okuti oku tẽlisa ocisimĩlo cavo poku eca uviali wavo kocinyama ca tema, toke eci olondaka via Suku vi tẽlisiwa. 18 Kuenje ukãi una wa mola, o lomboloka olupale lunene lu kuete usoma u viala olosoma vio kilu lieve.”

18 Noke yovina evi, nda mola ungelo ukuavo wa tunda kilu lunene walua kuenda omo liulamba waye ocinyi ca tuila kilu lieve. 2 Kuenje wa kaluka lolukandi hati: “O Bavulono Yinene ya kupuka! Oyo ya kupuka, ya linga ocitumãlo colondele locitumãlo caspiritu osi ãvi,* lovina viosi via vĩha kuenda alungi olonjila viosi via vĩha haivio via suvukiwa! 3 Momo omo liovinyu violoñeyi* vievĩho liukahonga waye,* olofeka viosi via yapuisiwa kuenje via kupuka, lolosoma vio kilu lieve via linga laye evĩho liukahonga kuenda vakualomĩlu* vo kilu lieve va linga olohuasi omo liunene welau walio.”

4 Kuenje nda yeva ondaka yikuavo ya tunda kilu yiti: “Amanu vange, tundimo, nda ka vu yongola oku litenga vakandu aye kuenda nda ka vu yongola oku tambula amue pokati kafengi aye. 5 Momo akandu aye a lilundika toke kilu kuenda Suku wa ivaluka ovilinga viaye vĩvi.* 6 U fetuluinyi ndeci a linga la vakuavo, u tiuwili luvali ovina a lingainga; vokopo a yukisa, u yukisimo luvali. 7 Ndeci a lipandiya loku lia elau, a yambuiwe loku litetela. Momo eye o popia lutima waye hati: ‘Nda tumãla nda nasoma, si cimbumbako kuenda lalimue eteke ndi litetela.’ 8 Eli olio esunga lieci afengi aye eyilila veteke limosi, okufa, loku litetela kuenda onjala kuenje eye o yokiwa londalu, momo Yehova Suku, una u sombisa wa pama.

9 “Olosoma viokilu lieve vina via linga laye evĩho liukahonga* haivio via lia laye elau, vi ko lilila loku litetela omo liesumuo eci vi mola owisi woku pia kualio. 10 Ovio vi ka talama ocipãla omo liusumba weyambulo liaye loku popia viti: ‘A mãi we, a mãi we, olupale lunene we, a Bavulono olupale lua pama, momo esombiso liove lia pitĩla vowola yimosi!’

11 “Vakualomĩlu vio kilu lieve, vo lililavo loku litetela, momo ka kuli vali u o landa ovina viavo, 12 ovina viulu, viopalata, ovawe a tĩla, olomota viondongo, olonanga viovalatanya, uwalo wohusu, woseda, uwalo u kusuka; lovina viosi via pangiwa luti; lovikuata via pangiwa lombinga yonjamba, levi via pangiwa luti wa tĩla, losipi, lutale kuenda lewe li sielena; 13 lokanela, olosimbolua, insensu, ulela welemba liwa, onguendu, lovinyu, lulela woliveira, losema ya fina, lotiliku, lolongombe, lolomeme, otuvalu, akãlu, apika kuenda ovimuenyo viomanu. 14 Ovina viwa wa livela, wa vi pumba kuenda ovilia viosi vi pepa levi via posoka, via takata kuenje lalimue eteke o vi mola vali.

15 “Vakuamĩlu vana va landisa ovina evi, haivo va linga olohuasi mekonda liaye, va ka talama ocipãla omo liusumba weyambulo liaye kuenda vo ko lilila loku litetela, 16 vati: ‘A mãi we, a mãi we, olupale lunene we, wa walele onanga yovalatanya, yohusu, leyi yi kusuka kuenda wa limianguluile lulu, lovawe a tĩla, lolomota viondongo, 17 momo ukuasi waco wa nyõleha vowola yimosi!’

“Kuenje vakesongo vosi vo vonaviyu, lava va endela vonaviyu, lakuenje vonaviyu kuenda vosi vakuanganyu yovokalunga, va talama ocipãla, 18 kuenda va kaluka lolukandi osimbu va luluvala kowisi u tunda koku pia kuayo, vati: ‘Olupale lupi lua soka lolupale lunene?’ 19 Ovo va imba oneketela kovitue viavo loku kaluka, loku lila, loku litetela, vati: ‘A mãi we, a mãi we, olupale lunene we, muna omanu vosi va kuatele onaviyu vokalunga va linga olohuasi omo liukuasi waluo, momo eyambulo yalio lieya vowola yimosi!’

20 “Ove ailu, lene alosandu, lene avapostolo, lene avaprofeto, sanjuki, momo mekonda liene Suku wo sombisa!”

21 Kuenje ungelo umue wa pama wa tikula ewe lia soka lewe liombambo kuenje wa li imba vokalunga, yu wa popia hati: “Haico o Bavulono Yinene yi ka imbiwa posi longusu yalua kuenje lalimue eteke yi kalako vali. 22 Ondaka ya vakuakusika olohalupa viavo, lolonjimbi, la vakuakusika olombendo kuenda olumbeta, lalimue eteke yi yeviwa vali vokuove. Ka mu sangiwa vali olomesele viumesele ndaño oku yeva ocileñi cewe liombambo vokuove. 23 Layimue ondiyelo yi mihiwa vali vokuove, ndaño ondaka ya sandombua ale ya ndombua ka yi yeviwa vali vokuove; momo vakualomĩlu vove va kala omanu va kemãla kilu lieve kuenda vakualofeka viosi va yapuisiwa omo liumbanda wove. 24 Vokuaye mua sangiwa osonde yovaprofeto, yolosandu kuenda yomanu vosi va pondiwa kilu lieve.”

19 Noke yovina evi, nda yeva cimue ca soka londaka yowiñi walua kilu. Va popia vati: “Aleluya!* Epopelo, lulamba kuenda unene, vi tunda ku Suku yetu, 2 momo esombiso liaye liocili kuenda liesunga. Suku wa sombisa ocipuepue cinene cina ca yapuisa ilu lieve levĩho liukahonga* waye kuenda wa fetuluinya osonde yakuenje vaye va pondiwa laye. 3 Onjanja yavali ovo va popia vati: “Aleluya!* Kuenje owisi wo Bavulono u kasi oku londa oloneke vi enda ño-o hũ ka vi pui.”

4 Kuenje 24 kakulu kumue loviendalomuenyo vikuãla, va kekama loku fendela Suku, una wa tumãla kocalo loku popia vati: “Amene! Aleluya!”*

5 Kocalo kua tundavo ondaka yiti: “Sivayi Suku yetu, ene vosi wakuenje vaye wo sumbili, ava vatito lava vanene.”

6 Kuenje nda yeva onjuela ya setahãla ondaka yowiñi walua kuenda onjuela ya setahãla ovava alua, lonjuela ya setahãla ocileñi covikẽlu vialua. Ovo va popia vati: “Aleluya,* momo Yehova Suku yetu Ukuonene Wosi, wa fetika oku viala ndosoma! 7 Tu yoleli lonjolela, loku u wĩha ulamba, momo uvala wa Kameme wa pitĩla kuenda ukãi waye wa li pongiya ale. 8 Ukãi vo wecelela oku wala uwalo u nina, u yela, onanga yovalatanya—momo onanga yovalatanya yi lomboloka ovilinga viesunga violosandu.”

9 Kuenje eye wa ndi sapuila hati, “Soneha: Va sumũlũha vana va lalekiwa kondalelo yuvala wa Kameme.” Wa ndi sapuilavo hati: “Olondaka evi via Suku, viocili.” 10 Vepuluvi liaco nda kekamẽla kolomãhi viaye oku u fendela. Pole, eye wa ndi sapuila hati: “Kuata utate! Ku ka ci linge! Ame ndukuenje wove kuenda wa vamanjove vana va kuete ocikele coku eca uvangi watiamẽla ku Yesu. Fendela Suku! Momo ovitumasuku vi kuete ocimãho coku imba uvangi watiamẽla ku Yesu.”

11 Nda mola ilu lia yuluka kuenje tala okavalu ka yela! Una wa tumãlako o tukuiwa Kolelua kuenda Ukuacili kuenje o sombisa loku linga uyaki wesunga. 12 Ovaso aye ulienge wondalu, kutue waye kuli akolowa alua.* O kuete onduko ya sonehiwa okuti lomue wa yi kũlĩha, te lika eye, 13 wa wala uwalo wa wavekiwa* losonde kuenda eye o tukuiwa londuko hati Ondaka ya Suku. 14 Olohoka vio kilu vio kuama lotuvalu tu yela, haivo va wala uwalo u yela, wa yelisua kuenda uwalo wovalatanya. 15 Vomela waye mua tunda osipata ya tua haiyo ya lepa okuti, o nyõla layo olofeka kuenda o vi songuila lombueti yutale. Kuenje eye o kosa ocikoselo conyeño ya Suku Ukuonene Wosi. 16 Kuwalo waye okuti kocikalo, kuli onduko ya sonehiwa okuti, Soma yolosoma kuenda Ñala yoloñala.

17 Nda molavo ungelo umue wa talama vekumbi, wa kaluka lolukandi kuenda wa sapuila olonjila viosi vi palãla kilu hati: “Enjui, liongoluili kondalelo yinene ya Suku, 18 oco vu li ositu yolosoma, ya vakesongo kolohoka, yalume va pama, ositu yotuvalu lava va endelako, lositu ya vosi, yomanu va yovoka, yapika, yava vatito lava vanene.”

19 Kuenje nda mola ocinyama ca tema, lolosoma viokilu lieve kumue lolohoka viavo, via liongoluila oku linga uyaki la una wa tumãla kokavalu kuenda olohoka viaye. 20 Ocinyama ca tema, ca kuatiwa kumue luprofeto wesanda, una wa lingaile olondimbukiso kovaso yaco, cina ca enda oku yapuisa vana va tambula ondimbukiso yocinyama ca tema kuenda vana va fendela ociñumañuma caco. Kavali kavo va imbiwa lomuenyo vociva ci taima londalu. 21 Pole, vakuavo va ipaiwa losipata ya lepa ya tunda vomela wa una wa tumãla kokavalu. Olonjila viosi vie kuta ositu yavo.

20 Kuenje nda mola ungelo umue wa tunda kilu losapi yekungu kuenda elienge linene peka. 2 Eye wa kuata ocinyoha, okuti onyoha yosiahũlu, oyo Eliapu haiyo Satana kuenje wo kuta eci ci soka 1.000 kanyamo. 3 Wa ci imba vekungu loku ci yikilamo kuenda wa kapamo esitikilo, okuti ka ci yapuisa vali olofeka toke eci ci tẽla 1.000 yanyamo. Noke eye o kutuluiwa okatembo kamue.

4 Nda mola ovialo kuenda vana va tumãlako va tambula omoko yoku sombisa. Nda molavo vana va pondiwa* omo lioku imba uvangi watiamẽla ku Yesu, loku lombolola ovina viatiamẽla ku Suku, la vana ka va fendelele ocinyama ca tema pamue ociñumañuma caco, haivo ka va tambuile ondimbukiso pupolo ale povaka avo. Kuenje va kuata vali omuenyo kuenda va viala ndolosoma kumue la Kristu ci soka 1.000 kanyamo. 5 (Vakuavo va fa, ka va kaile komuenyo toke eci ca tẽla 1.000 yanyamo.) Eli olio epinduko liatete. 6 Vana va kuete onepa kepinduko liatete va sumũlũha haivo va kola; momo okufa kuavali ka ku kuete omoko kokuavo, pole, va linga ovitunda via Suku kuenda via Kristu kuenje va viala ndolosoma kumue laye vokuenda kueci ci soka 1.000 kanyamo.

7 Eci 1.000 yanyamo yi pita, Satana o kopiwa vokayike, 8 kuenje eye o tunda oco a yapuise olofeka vina vi kasi kavindi akuãla o kilu lieve, Goge la Magoge okuti o vongoluila uyaki. Etendelo liaco lia soka leseke lio vokalunga. 9 Ovo va lisanduila koluali luosi kuenda va ñuala ocilombo colosandu lolupale lu soliwe. Pole, kilu kua tunda ondalu kuenje ya va lia. 10 Eliapu lina lia kala oku va yapuisa lia imbiwa vociva culienge wondalu, muna mu kasi ale ocinyama ca tema luprofeto wesanda; kuenda va ka yambuiwa* utanya luteke oloneke vi enda ño-o hũ ka vi pui.

11 Kuenje nda mola ocalo cinene ci yela kuenda Una wa tumãlako. Osi kuenda ilu via tila kovaso aye, lapa vi kala ka pa molẽhele. 12 Nda mola ava va fa, ava vanene lava vatito va tumãla kovaso yocalo kuenje kua yikuiwa oviña. Pole, ociña cikuavo ca yikuiwa; okuti ociña comuenyo. Ava va fa va sombisiwa lovina via sonehiwa voviña ndomo ci likuata lovilinga viavo. 13 Kuenje okalunga ka eca ava va fa va kalamo, kufa Leyambo* va eca ava va fa va kalamo kuenda omunu lomunu wa sombisiwa ndomo ci likuata lovilinga viaye. 14 Kufa kuenda Eyambo* va imbiwa vociva condalu. Ociva condalu ci lomboloka okufa kuavali. 15 Omo liaco, wosi okuti onduko yaye ka ya sonehiwile velivulu liomuenyo, wa imbiwa vociva condalu.

21 Nda mola ilu liokaliye longongo yokaliye; ilu liatete longongo yatete via pita kuenda okalunga ka keko vali. 2 Nda molavo olupale lu kola, okuti o Yerusalãi Yokaliye ya tunda kilu ku Suku, ya lipongiya ndo ndombua ya liposuisila ulume waye. 3 Noke nda yeva ondaka yolukandi ya tunda kocalo yiti: “Tala! Ombalaka ya Suku yi kasi lomanu kuenje eye o tunga lavo kuenda ovo va linga omanu vaye. Kuenje Suku o kala lavo. 4 Eye o puenya asuelẽla osi vovaso avo, oku fa ka ku kalako vali, ndaño oku lila loku liyula lupongo ka vi ka kalako vali. Ovina viatete via pita.”

5 Una wa tumãla kocalo wa popia hati: “Tala! Ovina viosi ndi vi lingisa viokaliye.” Wa popiavo hati: “Soneha, momo olondaka evi via koleliwa kuenda viocili.” 6 Kuenje wa ndi sapuila hati: “Ca tẽlisiwa! “Ame Tete haime Kuasula,* ndifetikilo, haime ndisulilo. Wosi o kuete enyona ndu wĩha ocali* ovava omuenyo a tunda pono. 7 Wosi o yula o piñala ovina evi kuenje ndinga Suku yaye kuenda eye o linga omõlange. 8 Puãi vakuosumba la vana ka va kuete ekolelo, la vana va vĩha keliño liavo, lolomondi, la vakuevĩho liukahonga,* vakuombanda, vakuakufendela oviteka, lolohembi viosi, onima yavo vociva ci taima lulienge. Eci ci lomboloka oku fa kuavali.”

9 Umue pokati kovangelo epanduvali wa kuatele atiyela epanduvali eyukile lafengi a sulako weya, yu wa ndi sapuila hati: “Enju, hu lekisa ndombua okuti, ukãi wa Kameme.” 10 Eye wa ngambata lunene wespiritu sandu komunda yisõvi haiyo yinene kuenje wa ndekisa olupale lu kola okuti, o Yerusalãi ya tunda kilu ku Suku, 11 kuenda ya kuatele ulamba wa Suku. Oku nina kuayo kua soka ndewe lia tĩla, ndeci ewe lio jaspe li nina ndovitulu. 12 Olupale luaco lunene kuenda lua kuata ocimbaka cisõvi haico ca kuata 12 kolombundi, 12 kovangelo va kala polombundi kuenda kolombundi kua sonehiwa olonduko viapata 12 viomãla va Isareli. 13 Kutundilo kua kala olombundi vitatu, konano olombundi vitatu, kombuelo olombundi vitatu kuenda kutakelo olombundi vitatu. 14 Ocimbaka colupale ca kuatelevo 12 koviseveto viovawe kuenda kua sonehiwa 12 kolonduko viovapostolo 12 va Kameme.

15 U wa kala oku vangula lame, wa kuatele oluneva lulu luoku seteka oco ope oloseteko kolupale, kolombundi vialio lo kovimbaka vialio. 16 Olupale luaco, lua kuata oloseteko vimuamue kavindi akuãla kuenda oku lepa lusõvi walio lunene. Kuenje wopa oseteko kolupale loluneva, okuti ci soka 12.000 kovila violomapalo;* oku lepa lusõvi kuenda upati walio via lisoka. 17 Eye wopavo oseteko yovimbaka vialio okuti via soka 144 kovikeya,* ndeci ci seteka omunu haico ungelo a seteka. 18 Ocimbaka ca tungiwa lewe lio jaspe kuenda olupale lua tungiwa lulu lua soka lovitulu yi yela. 19 Olongunji viocimbaka colupale ca posuisiwa lovawe osi a tĩla: ongunji yatete jaspe, yavali safira, yatatu ewe li ñañala, yakũala lio emeralda, 20 yatãlo sardonika, yepandu sardiu, yepanduvali ewe lievala liulu, yecelãla ewe lieyavailo, yecea topasiu, yekũi ewe lieñala, yekũi lamosi ewe li vumbula, yekũi lavali ewe liohusu. 21 Kolombundi vi soka 12 kua kala olomota viondongo via soka 12; ombundi lombundi ya pangiwa lomota yimosi. Vokololo yolupale mua kala ulu wa soka lovitulu.

22 Sia muilemo onembele, momo Yehova Suku Ukuonene Wosi kumue la Kameme ovo onembele yaluo. 23 Kuenje olupale ka lu sukila ekumbi pamue osãi oco vi ninilemo, momo ulamba wa Suku wa tuilamo kuenda Kameme eye ondiyelo yaluo. 24 Olofeka vi ka enda omo liocinyi cayo kuenda olosoma vio kilu lieve vi ka nena ulamba wavo kokuayo. 25 Olombundi vialuo lalimue eteke vi yikiwa kutanya, momo ka ku ka kala vali uteke. 26 Ulamba lesivayo violofeka vi ka neniwa kokualio. 27 Pole, cosi ca vĩha kuenda wosi o linga eci ka ca sungulukile, luhembi, ka ka iñilamo; vana okuti olonduko viavo via sonehiwa vociña comuenyo ca Kameme, ovo lika va ka iñilamo.

22 Eye wa ndekisa olui luovava omuenyo, lua yela ndovitulu, lua tunda kocalo ca Suku kuenda ca Kameme, 2 kuenje lua pita vokololo yaluo. Kolonele violui kuli oviti viomuenyo vima apako 12 unyamo lunyamo. Amẽla oviti viaco o ku sakula olofeka.

3 Kuenje ka ku ka kala esiñalo lalimue. Pole, ocalo ca Suku kuenda ca Kameme, ci ka kala volupale, puãi akuenje vaye va ko lingila upange u kola; 4 ovo va ka mola ocipala caye kuenda onduko yaye yi kala povipolo viavo. 5 Ka ku ka kala vali uteke kuenda ovo ka va ka sukila vali ocinyi condiyelo pamue ocinyi cekumbi, momo Yehova Suku o ka va ĩha ocinyi kuenje ovo va ka viala ndolosoma oloneke vi enda ño-o hũ ka vi pui.

6 Eye wa ndi sapuila hati: “Olondaka evi via koleliwa kuenda viocili; momo Yehova, Suku una wa vetiya ovaprofeto, wa tuma ungelo waye oku lekisa kakuenje vaye ovina via laikele oku pita ndopo. 7 Tala! Njiya lonjanga. Wa sumũlũha una o pokola kolondaka viocitumasuku celivulu eli.”

8 Ame ndi Yoano, ame una nda yeva ovina evi haime nda vi mola. Eci nda vi yeva loku vi mola, nda kekamela kolomãhi viungelo wa ndi lekisa ovina viaco loku u fendela. 9 Pole, eye wa ndi sapuila hati: “Kuata utate! Ku ka ci linge! Ame ndukuenje wove kuenda wa vamanjove ovaprofeto, la vana va pokola kolondaka viociña eci. Fendela Suku.”

10 Wa ndi sapuilavo hati: “Ku ka seleke olondaka viocitumasuku viociña eci, momo otembo ya sokiyiwa yi kasi ocipepi. 11 Ondingaĩvi yamameko oku linga cĩvi, ukuavituwa via liña amameko oku linga ovina via liña; puãi ukuesunga amameko lesunga liaye, u o kola amameko loku kola kuaye.

12 “‘Tala! Njiya lonjanga kuenda onima ngeca yi kasi lame, okuti ndi feta omunu lomunu lovilinga viaye. 13 Ame Tete haime Kuasula,* ndifetikilo, haime ndisulilo. 14 Va sumũlũha vana va yelisa uwalo wavo wa lepa okuti, va kuete omoko yoku lia koviti viomuenyo, loku iñila volupale poku pita polombundi vialuo. 15 Olombua* vi kasi kosamua, kumue la vakuombanda, la vakuevĩho liukahonga,* lolomondi, la vakuakufendela oviteka, la vosi va sole uhembi loku kemba.’

16 “‘Ame ndi Yesu, nda tuma ungelo wange oku wimbili uvangi wovina evi vakongelo. Ame ndilumbombo, haime ndimbuto ya Daviti kuenda ndilumbungululu lua tua luomẽle.”’

17 Kuenje espiritu sandu la ndombua va kasi oku popia vati, “Enju!” una o yeva a popie hati, “Enju!” u o kuete enyona eye; wosi o yongola a tambule ocali ovava omuenyo.

18 “Ndi sapuila ku vosi va yeva olondaka viocitumasuku viociña eci okuti: Nda umue o vokiya kovina evi, Suku o ko vokiya afengi a sonehiwa velivulu eli; 19 nda umue o tepulula cimue kolondaka vielivulu liocitumasuku eci, Suku ka ko wecelela oku lia kapako oviti viomuenyo ndaño oku iñila volupale lu kola, okuti ovina via sonehiwa vociña eci.

20 “Una wa imba uvangi wovina evi wa popia hati, ‘Ocili, njiya lonjanga.’”

“Amene! Enju a Ñala Yesu.”

21 Ohenda ya piãla ya Ñala Yesu yi kale lolosandu.