Osungu Yolombangi Via Yehova

Avakuetu vu Sole Yehova:

Yesu wa popia hati: “Vu kũlĩha ocili, kuenda ocili cu yovola.” (Yoano 8:32) Olondaka evi vi tu lembeleka calua! Ndaño tu kasi “koloneke via sulako,” tu pondola oku kũlĩha ocili voluali lulo mueyuka uhembi. (2 Timoteo 3:1) Ivaluka hẽ otembo wa kũlĩha ocili poku konomuisa Ondaka ya Suku? Ocili okuti wa kuata esanju lialua!

Ndeci oku kuata ukũlĩhĩso wocili loku sapuilako vakuetu ukũlĩhĩso waco ci kuete esilivilo, oku kuata ovituwa vi li tava leci tua siata oku longisa ci kuetevo esilivilo lialua. Oco tu tẽlise ocikele caco, tu sukila oku kala vocisola ca Suku. Oco hẽ, nye ca kongeliwa voku ci linga? Yesu wa eca etambululo liaco vuteke a kuatiwa oco a pondiwe. Eye wa sapuila ovapostolo vaye vakuekolelo hati: “Nda vu pokola kovihandeleko viange, vu kala vocisola cange, ndeci ame nda pokola kovihandeleko via Tate, kuenje ñasi vocisola caye.”​—Yoano 15:10.

Limbuka okuti Yesu wamamako oku kala vocisola ca Suku omo lioku pokola kovihandeleko via Isiaye. Omo liaco, tu kuami ongangu yaye koloneke vilo. Oco tu kale vocisola ca Suku, tu sukila oku kapako olonumbi Viovisonehua eteke leteke. Vuteke waco, Yesu wa popiavo hati: “Nda wa kũlĩhi ovina evi, vu sumũlũha nda vu vi linga.”​—Yoano 13:17.

Tua kolela okuti elivulu lilo li ko kuatisi oku amamako oku pokola kolonumbi Viembimbiliya kuenda oku kala “vocisola ca Suku . . . [cu] neneli omuenyo ko pui.”​—Yuda 21.