Olohuminyo Viusoma Ovina Viosi vi Linga Viokaliye

SOKOLOLA ndeci okuti o yunga o maçã vuti. Osimbu kua yi kapele vekualu o yeva elemba liayo. Ove wa talavaya ale olowola vialua, pole kua kavele kuenda o yongola oku amamako lupange. Ina yove o kasi oku yunga olomaçã lesanju kuti ukuavo, osimbu a sapela lepata kuenda akamba va kasi oku u kuatisa oku ungula. Eye o kasi vali umalẽhe ndeci a kala kosimbu. Ka ci leluka kokuove oku tava okuti wa mola eci a kala oku kuka voluali luna okuti ka lukasiko vali. Wa mola eci a kala oku hongua omo lioku vela, wo kuata peka eci a kala oku fa, kuenda walila eci va kala oku u kenda. Pole, eye o kasi vali lomuenyo lomanu vakuavo va file, kuenda o kasi vali luhayele.

Tua kolela okuti oloneke viaco vi keya. Momo tua kũlĩha okuti olohuminyo via Suku via siata oku tẽlisiwa. Vonepa yilo tu ka kũlĩhĩsa ndomo olohuminyo Viusoma vi ka tẽlisiwa kovaso yoloneke, osimbu handi uyaki wo Harmagedo ka weyile. Tu ka kũlĩhĩsavo olohuminyo vimue Viusoma vi ka tẽlisiwa noke liuyaki waco. Tu ka kuata esanju lialua poku mõla otembo eci Usoma wa Suku u ka viala ongongo, kuenje ovina viosi vi ka linga viokaliye!