“Ulume Wasanjuka Ukuokãi Umue Ukuavituwa Viwa”

OLONJANJA vimue, omanu vamue vasiata okulundila Olombangi via Yehova hati, vakuakutepa olohuela. Pole, olohuela vialua vikasi okuenda ciwa okuti umosi pokati kolohueli eye lika Olombangi ya Yehova vilekisa okuti eci haciliko. Okukapako alungulo asangiwa Vembimbiliya vepata cinena esanju volohuela, ndomo calekisiwa vukanda ukuãiko wasandekiwa lukanda umue wasapulo woko França.

“Vokuenda kuanyamo asoka 28 toke cilo, ame ndulume wasanjuka ukuokãi umue ukuavituwa viwa okuti O Olombangi ya Yehova. Eye otata omãla vange vosi vatãlo, lutate umuamue kuenda locisola calua, ndaño okuti vavali pokati kavo havayeko. Omo okuti ame cilo, ndusongui wupange umue ukuete 45 kolonalavayi, ndu uvangi kokuene okuti eye wasiata okundikuatisa calua oco upange wende ciwa. Omo liaco, eci ndamõla ocipama cimue vukanda wange wasapulo ndasiata okutambula olonjanja viosi walekisa Olombangi via Yehova ndomanu vamue va koka ohele kulo koluvumba luo Lot-et-Garonne, nda nõlapo oku ulekisi uvangi umue wavelapo.”

Ukanda waco wamisako vali hati: “Ovo kavasipi kuenda holoholuako. Eci cikoka hẽ ohele? Ovo Akristão vamue va sunguluka okuti kavasindiliya laumue okukuama ovihandeleko ovo vakuãi. Puãi ovo vasiata oku eca ongangu yiwa kovina vialua. . . . Ovo kavalitengi vakutisasõi vokunyana olombongo ale volomĩlu vimue kaviasungulukile ndeci okulandisa eliamba ale vimue vikuavo vĩvi. Ovo ka va likuminya olohuminyo yokulisila okuti kavaliki lavakuavo, ame ndivambila uvangi okuti, ovo vambata omuenyo umue wasunguluka.

“Ene pamue undipuli okuti: Oco hẽ momo lie ove muẽle kukasililivo yimue Ombangi ya Yehova? Momo okukala Ukristão cisukila ekolelo liocili kumue lovituwa viasunguluka calua kuenje viaco evi kavisangiwa ño enene lonjanga pokati komanu vaño.”