Tua Kala Ndovimbungu Puãi, Cilo Tua linga Ndolomeme!

Sakina kuenda ame eci tua kala afeko vatito, tua kala omanu va lisungue. Sakina wa kala unene haeye wa pama, osimbu okuti ame nda lepele kuenda nda kala letimba litito. Tua kala locituwa coku lihoya olonjanja vialua, kuenje eteke lioci eli, lalimue eteke tua livanguisile vali ndaño muẽle oku li lama. Oku sulako, tua litepa kuenda omunu lomunu pokati ketu lomue wa kuatela vali onjongole ukuavo.

Kunyamo wo 1994, nda fetika oku lilongisa Embimbiliya Lolombangi via Yehova, kuenje kamue kamue nda fetika oku pongoloka kovituwa. Poku pita anyamo akuãla eci tua kuata eteke liohongele yilikasi ko Bujumbura, vofeka yo Burundi, nda komõha calua poku lisanga la Sakina. Nda kuata esanju poku u mõla, pole ovilamo vietu via kala ño viowesi. Noke, veteke liaco muẽle nda komõha lovaso ange eci ndamõla okuti eye o kasi pokati kava va papatisiwa! Eye wa pongolokavo calua kovituwa. Eye ka kalele vali onjaki yinia nda liyaka yaka layo olonjanja vialua. Hesanjukuolio nda kuata poku u vanja eci a lekisa kowiñi wosi elitumbiko liaye ku Suku omo lioku papatisiwa vovava!

Eci eye a tunda vovava, nda lupukila kokuaye oku u yolela lesanju lialua kuenje ndo loñuila vetui liaye okuti: “Ivaluka ndomo tua liyaka yaka?” Eye wa kumbulula hati, “ndi ci ivaluka, pole eci ca pita. Cilo ame ndimunu umue wokaliye.”

Kavali ketu tua kuata esanju omo lioku sanga ocili Cembimbiliya cina ci tokekisa omanu. Ovituwa vietu viakala ndevi viocimbungu pole, omo lioku pongoloka tua linga ndolomeme Viungombo Wavelapo Yehova Suku. Ocili muẽle, ocili Cembimbiliya ci pongolola ovituwa viomanu.