Oku Lilongisa ka ku Kuete Utunga
KSENIYA wa citiwa kunyamo wo 1897. Eye o kuete omõla umosi ulume, omãla vatatu vakãi, olonekulu ekũi la vitãlo kuenda oloneka akũi avali la vitãlo. Komuenyo waye wosi, wa linga eci olonjali viaye vio longisa. Eye o kasi kofeka yo Moskovu omo a tila uyaki wakahandangala wa kala kofeka yo Abkhazia, yi sangiwa pokati kocitumãlo ci tukuiwa hati, Káukasu kuenda Okalunga ka tu kuiwa hati Mar Negro. Pole, eye wa kala lesanju lialua komuenyo waye omo lietavo a piñala kolonjali viaye.
Kunyamo wo 1993 omõla ukãi wa Kseniya o tukuiwa hati, Meri wa lingavo Ombangi ya Yehova. Kuenje, Meri wa fetika oku vangula la Kseniya eci catiamẽla ku Yehova Suku kuenda Kembimbiliya pole, eye ka tavele. Kseniya wa enda oku sapuila omõlaye hati: “Ame nda kuka calua kuenje, si tẽla vali oku lilongisa ocina cimue cokaliye.”
Handi, Meri omõlaye ukãi; ukãi wonekulu yaye o tukuiwa hati, Londa; oloneka viaye viakãi vi tukuiwa hati Nana kuenda Zaza okuti vosi yavo Olombangi ale via Yehova, vamamako oku vangula laye eci catiamẽla Kembimbiliya. Eteke limue kekumbi kunyamo wo 1999 va tanga la Kseniya cimue ocisonehua Cembimbiliya kuenje ca veta calua utima waye. Ocisonehua caco colondaka vi komohĩsa Yesu a sapuila ovapostolo vana va kala vakuekolelo eci eye a tumbika Ondalelo ya Ñala. (Luka 22:19, 20) Eteke Kseniya a tẽlisa ci soka 102 kanyamo wa tava oku lilongisa Embimbiliya kekumbi lieteke liaco.
Kseniya wa lombolola hati: “Noke yoku kala komuenyo eci ci soka 102 kanyamo, ndeya oku kuata ukũlĩhĩso weci ci lomboloka omuenyo. Cilo nda tava okuti ka kuli eci ca velapo vali okuti oku vumba Yehova Suku uwa calua haeye ukuacisola ci sule. Ame, handi nda lunguka kuenda ñuete uhayele. Ndi pondola oku tanga okuti si sukila ovinokolo vovaso kuenda ndi pondola oku linga ovina viosi kumue lepata liange.”
Kseniya wa papatisiwa keteke 5 kosãi ya Kuvala yunyamo wo 2000. Eye wa lombolola hati: “Cilo nda eca omuenyo wange ku Yehova oco ndu u vumbe locisola. Nda siata oku eca komanu olorevista kuenda olotratado osimbu nda tumãla pocitumãlo coku kevelela o kalela ocipepi lonjo yange. Epata liange olonjanja vialua lia siata oku ndi nyula kuenda ndi sole calua oku vangula lavo ocili catiamẽla ku Yehova.”
Kseniya o kasi loku talamẽla otembo yi keya kovaso eci ‘etimba liaye lika tumbuluka vali, eci lika kuata vali ongusu ndeyi yovutila okuti olohõlo viaye vi lisoka vali levi a kala lavio eci a kala umalẽhe.’ (Yovi 33:25) Kseniya o kuete eci ci pitahãla ocita canyamo pole ka liyevite ndomunu wa kuka calua, okuti ka tẽla vali oku lilongisa eci ci lomboloka omuenyo wendisiwa lolonumbi Viembimbiliya. Oco hẽ, ndamupi ove o liyevite?