Apulilo Valingiwa Lavakuakutanga

Nda omunu umue wa liponda eye muẽle, ca sunguluka hẽ okuti Ukristão o linga ohundo yonambi yaye?

Ukristão o sukila oku lisokolola eye muẽle nda utima waye u wecelela oku linga ohundo yomunu umue okuti pamue eye muẽle wa liponda. Oco omunu a nõlepo eci a pondola oku linga, o sukila oku konomuisa apulilo ndeci ava: Ndamupi Yehova a tenda oku liponda? Ocili hẽ okuti eye muẽle wa liponda? Anga hẽ wa liponda omo liocitangi cimue cosumuisa calua? Ndamupi posongo yetu va tenda eci catiamẽla koku liponda?

Etu Tuakristão te tu kuata onjongole yoku kũlĩha ndomo Yehova a tenda eci catiamẽla koku liponda. Momo, ku Yehova omuenyo womunu u kuete esilivilo kuenda u kola. (Efetikilo 9:5; Osamo 36:⁠9) Omunu o liponda eye muẽle wa sokisiwa ndomondi, kuenda eci ci sumuisa Suku. (Etundilo 20:13; 1 Yoano 3:15) Eci hẽ ci tateka oku lingila ohundo ponambi yomunu una wa li ponda eye muẽle?

Konomuisa eci ca pita la Soma Saulu ko Isareli. Eci eye a limbuka okuti kaka pondola oku puluka kuyaki waye wa sulako la va Filisiti, oco ovanyali vaye ka voko lalule, “Saulu wa kuata osipata yaye muẽle, kuenje wa litoma.” Eci va Filisiti va sanga ocivimbi caye, ovo va ci valela kocimbaka colupale luo Betesiane. Kuenje, eci omanu vo kimbo lio Yavesi Gileada va yeva eci va Filisiti va linga, va kopile ocivimbi caco kuenje va ci yoka. Noke va nõlapo akepa aye kuenje va a kenda. Ovo va likandangiya oku lia oloneke epanduvali momo oco ca kala ociholo ca va Isareli. (1 Samuele 31:​4, 8-13; Efetikilo 50:10) Eci Daviti ombuavekua ya Yehova a limbuka eci va Yavesi Gileada va linga, eye wa popia hati: ‘Yehova a vu sumũlũise omo wa lekisi ocisola ndoco ku cime cene Saulu kuenje wo kendi. Oco Yehova o lekisi ene ocisola caye ka ci pongoloka locili caye ka ci pui.’ (2 Samuele 2:​5, 6) Embimbiliya ka li lekisa okuti omanu vokimbo lio Yavesi Gileada va lueya omo lioku kuama ociholo poku kenda Soma Saulu. Sokisa ulandu owu wa soma Saulu leci ca pita lomanu vana ka va kendiwile omo liovilinga viavo vĩvi. (Yeremiya 25:​32, 33) Ukristão o sukila oku konomuisa ulandu owu wa Saulu nda ci tava ale ka ci tava oku linga ohundo yomunu wa liponda.

Ukristão o sukilavo oku kũlĩha esunga lieci a lingila ohundo yaco yonambi. Ca litepa lomanu va tava kondotilina yocilelembia ka ci fi ceci okuti, Olombangi via Yehova ka vi lingi onambi locisimĩlo cokuti omunu wa fa enda kocitumãlo cikuavo. Ohundo yonambi ka yi lingiwila oco yi kuatise omunu wa fa, pole yi lingiwila oku lembeleka ava va fisa kuenda oku eca uvangi komanu va kasi ponambi oco va kuate elomboloko liekalo liava va fa. (Ukundi 9:​5, 10; 2 Va Korindo 1:​3-5) Esunga limue likuavo lia velapo lioku linga ohundo ponambi, oku kuatisa olonjeveleli viosi oco vi sokolola okuti omuenyo u pita ombamba. (Ukundi 7:⁠2) Anga hẽ ulandu wa tukuiwa ndeti wuka ku vetiya oku lingila ohundo omunu umue wa liponda eye muẽle?

Ocili okuti, vamue pamue va sima okuti omunu waco wa liponda eye muẽle kocipango, wa kũlĩhĩle okuti oku linga eci ekandu ku Yehova. Anga hẽ oco muẽle ca siata oku kalako? Ocisimĩlo caco hẽ ceya ño vonjanja yimosi okuti ka kuatele vali otembo yoku sokolola? Omanu valua va siata oku kuata onjongole yoku liponda noke va litiukamo, kuenje ka va lakuata vali ocisimĩlo caco. Ocili okuti, omunu ka pondola oku litiukamo noke yoku liponda kuaye.

Esunga likuavo lia velapo lieli okuti, omanu valua va siata oku lipondela omo liovitangi vi va kokela esumuo lialua. Kuenje, eci ci sokisiwavo ndomunu wa pondiwa. Asapulo a siata oku lekisa okuti, etendelo liomanu valua va liponda ovo muẽle, vo vana va siata oku kuata ovitangi vialua vomuenyo wavo. Anga hẽ Yehova oka tetela omanu va liponda ovo muẽle omo liovitangi vialua va kuata? Etu ka tu kasi pomangu yoku sombisa omunu wa liponda eye muẽle, loku sima okuti eye wa linga ekandu limue ka li kuete ongecelo ku Yehova. Ukristão o kuete oku kũlĩha eci ca kongela voku liponda kuomunu waco leci esapulo liolondotolo li lekisa catiamẽla komunu waco wa liponda eye muẽle oco a limbuke nda ci tava oku u lingila ohundo ale sio.

Kuli vali handi esunga likuavo lioku kũlĩhĩsa, ndeci: Ndamupi omanu vo posongo va tenda oku liponda kuenda olofa viomunu umue? Akulu vekongelo ovo va kuete vali ocikele caco coku teyuila ekalo liwa liekongelo Liolombangi via Yehova posongo yavo. Omo liaco, ovo va kuete oku kũlĩhĩsa ocisimĩlo comanu posongo yaco kuenda eci ca kongela koku liponda kuomunu waco. Ci tava okuti, akulu vekongelo pamue va nõlapo oku eca ekuatiso limue okuti ka ci sukila oku li ecela powiñi, kuenda ka va lingila ohundo yomunu wa liponda eye muẽle Vonjango Yusoma.

Omo liaco, nda Ukristão wa pingiwa oco a linge ohundo yomunu wa liponda, kaka ci linge ndomunu wa tumiwa lekongelo, pole, a ci linge lonjongole yaye muẽle. Nda okuti eye wa nõlapo oku linga ohundo yaco, o kuete oku lunguka kolondaka viaye oco kaka popie eci catiamẽla komanu vaka pinduiwa, kuenda ava ka vaka pinduiwa. Esunga liaco lieli liokuti, cosi catiamẽla kelavoko liomunu wa fa ci kasi povaka a Yehova, momo lomue o kuete omoko yoku popia hati, omunu waco wa fa oka pinduiwa ale kaka pinduiwa. Ukristão o kuete oku lombolola ocili Cembimbiliya catiamẽla kolofa kuenda oku eca elembeleko komanu va fisa.