Ceci Olohuminyo Viosi
Vika Tẽlisiwa
ASAPULO eyuka to olohuminyo vina ka via tẽlisiwile. Olonjanja vialua olofeka vina vi kasi vuyaki via siata oku linga olohongele kuenje va litava oku liwekapo oku linga uyaki. Pole, ovo ka va siatele oku tẽlisa olohuminyo vina va linga. Kuenje, eci ca siata oku nena ovoyaki alua. Onjanja yimue onoño yimue yi tukuiwa hati Napoleão, ya lombolola hati: “Olombiali via siata lika oku tẽlisa olohuminyo viavo nda ovo va kisikiwa oku ci linga, ale nda eci ci pondola oku tẽlisa ocipango cavo okuti vopako limue esilivilo.”
Nye hẽ ci popiwa kueci catiamẽla kolohuminyo vina vi lingiwa pokati komunu lomunu? Ocili okuti, ci sumuisa calua nda omunu umue wa linga ohuminyo kuenje ka yi tẽlisa! Eci ci sumuisa vali calua nda omunu waco o ci linga wa kũlĩha ciwa kuenda tuo kolela. Ci tava okuti pamue omanu vaco ka va kuete epondolo, ale ka va yongola oku tẽlisa ohuminyo yavo.
Kuli etepiso lialua kueci catiamẽla kolohuminyo viomanu kuenda olohuminyo via Suku! Olohuminyo via Suku via siata oku tẽlisiwa olonjanja viosi kuenda ci tava oku vi kolela lutima wosi. Olohuminyo viosi via lingiwa la Yehova Suku vi tẽlisiwa muẽle ocili. Kuenje ci tava oku vi kolela okuti vi tẽlisiwa muẽle. Embimbiliya poku lombolola eci catiamẽla kocili condaka ya Suku kelivulu lia Isaya 55:11 lia popia hati: “Haico ondaka yange yi tunda vomẽla wange; ka yi tiukila ño kokuange, puãi yi linga ndeci nda panga oku tẽlisa, leci nda yi tumĩla.”
Oco hẽ ndamupi tu pondola oku kolela kolohuminyo via Suku vi sangiwa Vembimbiliya? Ocili okuti etu tu pondola oku lekisa ekolelo liocili kokuavio. Upostolo Yoano wa soneha hati: “Tala, onjo ya Suku yi kasi pokati komanu. Eye o tunga lavo, va linga omanu vaye, kuenje Suku eye muẽle o kala lavo, o linga Suku yavo. Eye o puenya asuelela osi kovaso avo. Oku fa ka ku kalako vali, ndaño oku lila loku liyula lupongo laviovo ka vi kalako vali. Momo ovina viatete via pita.” (Esituluilo 21:3, 4) Ove o pondola oku kuata asumũlũho aco nda wa likolisilako oku kuama olondaka Yesu a popia hati: “Omuenyo ko pui wowu, oku ku kũlĩha, ove lika vu Suku yocili, loku kũlĩhavo Yesu Kristu, u wa tuma.”—Yoano 17:3.