Elongiso Lia Yesu Lia Kũlĩhĩwa Lomanu Vosi
ULUME umue o tukuiwa hati, Edgar Goodspeed okuti wa pongoluisa Embimbiliya valimi amue, wa popia hati: ‘Avanjeliu a lombolola ovina vialua Yesu a longisa pokolika kuenda powiñi. Pole, Yesu poku longisa ovina viaco, wa enda loku pesela lika olowola vivali.’ Noke wamisako hati: ‘Elongiso lia Yesu lia vetiya ovitima viomanu voluali, ndaño okuti wa enda oku pesela lika otembo yitito poku vangula ovina viaco. Kuenda ka kuli omunu ukuavo o sokisiwa laye.’
Yesu wa tẽlisa upange waye woku kunda palo posi kunyamo wo 33. Noke etendelo liolondonge viaye lieya oku kala eci ci soka 120 komanu. (Ovilinga 1:15) Koloneke vilo, etendelo liomanu vana va litukula hati, Akristão lia livokiya calua. Omanu valua va siata oku popia hati, Yesu wa kala uprofeto. Ocili okuti, elongiso liaye lia siata oku vetiya omanu valua.
Elongiso lia Yesu lia kũlĩhĩwavo lasongui vamue voluali okuti Hakristãoko. Ulume umue u Yudea o tukuiwa hati, Hyman Enelow wa popia hati: ‘Yesu wa kũlĩhĩwa calua voluali. Kuenda omanu va siata oku lilongisa ovina vialua viatiamẽla kokuaye. Atavo, a siata oku vangula calua catiamẽla komuenyo waye.’ Noke wamisako hati: ‘Lomue o patãla okuti, elongiso lia Yesu lia vetiya calua omuenyo womanu. Eye wa lekisa ocisola komanu vosi. Wa eca elembeleko kokuavo. Ovilinga viaye viohenda via eca elavoko komanu lioku kuata esanju. Voluali omanu va siata oku linga ovina vialua viwa. Pole, lomue omunu wa lekisa ovituwa ndevi viaye. Yesu wa kũlĩhĩwa calua voluali omo liovilinga viaye viwa.’ Ocitunda cimue cetavo lio Hindu, o tukuiwa hati Mohandas K. Gandhi, wa popiavo hati: ‘Nda kũlĩha okuti, Yesu eye lika wa lingila omanu ovina vialua viwa.’ Noke wamisako hati: ‘Oku kuama onjila ya Kristu hacitangiko. Pole, ocitangi ci kasi lika kokuove umunu waco. Nda oyongola oku kala Ukristão, ku ka kuame olonumbi viove muẽle.’
Akristão vesanda va kuete ulandu umue u lekisa okuti, ka va siatele oku kuama elongiso lia Yesu. Onoño yimue o tukuiwa hati, Cecil John Cadoux, wa popia hati: ‘Asongui vatavo ka va kapeleko ovituwa viwa. Ekalo liaco lĩvi lia fetika kunyamo wo 140 kotembo ya Kristu.’ Noke wamisako hati: ‘Vokuenda kuotembo, ovituwa viavo vĩvi, via fetika oku nyõla ovituwa viomanu valua.’
Ekalo liaco lĩvi lieya oku livokiya calua kocita cakuãla, eci Ombiali yimue Constantino a lingavo ukuetavo. Onoño yimue o tukuiwa hati, Cadoux wa popia hati: ‘Ovituwa vĩvi via livokiya calua voluali, omo liukamba u sangiwa pokati katavo lolombiali.’ Akristão vesanda tunde osimbu va siata oku linga ovina vialua vĩvi vi lekisa etombo konduko ya Kristu.
Kaliye ku votuiwa epulilo liokuti: Nye Yesu a longisa? Ekuatiso lie tu pondola okupa kelongiso lia Yesu?
[Elitalatu kemẽla 3]
Mohandas K. Gandhi wa popia hati: ‘Nda kũlĩha okuti, Yesu eye lika wa lingila omanu ovina vialua viwa’
[Elitalatu kemẽla 3]
Edgar Goodspeed wa popia hati: ‘Elongiso lia Yesu lia vetiya calua ovitima viomanu voluali’
[Ono Yelitalatu]
Culver Pictures