Oku Sanda Ombembua Yovutima

ULUME umue o tukuiwa hati Albert, wa sanjukile calua lolohuela viaye. Eye wa kuata omãla vavali. Pole, wa limbukile okuti, wa kambelele cimue komuenyo waye. Vokuenda kuotembo yimue, eci a kala oku sanda upange, wa fetika oku litenga vovina viopulitika. Noke weya oku tiamẽla kocitundo cina ci kuete ocihandeleko cokuti, ombiali oyo yi tumĩla ovina viosi vi lingiwa vofeka. Momo ocihandeleko caco cecelela omanu oku kuata ovina vimuamue.

Eci papita otembo yimue, Albert weya oku sumua locitundo caco. Noke wa siapo upange wopulitika kuenje wa fetika oku kuatisa lika epata liaye. Pole, ka kuatele ombembua yovutima yina a kala oku sanda.

Ocili okuti, Albert hayeko lika wa pita lovitangi ndevi. Omanu vamue poku sanda ombembua yovutima, va siata oku lilongisa ovilongua viesanda kuenda oku tungayala vatavo. Okupisa kunyamo wo 1960 toke wo 1970, kolofeka vio kutundilo kua kala ocitundo cimue ca lavisile ovihandeleko viekalo liomanu kuenda viapata. Kotembo yaco, amalẽhe omo lioku sakalala loku sanda ombembua yovutima, va fetika oku sipa eliamba, loku nyua ovihemba vikuavo vi nyõla olondunge. Ovo, va enda oku sandiliya olonumbi violonoño kuenda ovitunda viatavo atiamẽlele kocitundo caco. Anga hẽ, ocitundo caco ca kuatisa omanu oku sanga ombembua yovutima? Sio, ka ca kuatisile. Vokuenda kuotembo yaco, omanu veya oku tiamisila lika ovitima viavo koku sanda eliamba kuenda ovihemba vikuavo vi nyõla olondunge. Ukahonga pokati kamalẽhe kuenda evĩho, vieya oku livokiya calua vofeka.

Tunde osimbu omanu va siata oku sanda esanju kovokuasi, kekemãlo kuenda koku lilongisa calua. Pole, ovina viaco via siata oku va nenela esumuo. Yesu wa popia hati: ‘omunu, ndaño ohuasi, omuenyo waye ka u tundi kovina a kuete.’ (Luka 12:​15) Ovokuasi, ka a nena esanju komunu. Embimbiliya li popia hati: “Ava va yongola oku linga olohuasi va kupukila vayonjo, va fa vonjanjo kuenje va kuatiwa lalivelo uveke, hao a nyõla, kuenje a kokela omanu oku vombisua loku nyõleha. Momo ocisola coku sola olombongo oco olumbombo luavĩho osi. Vamue oku pindamua laco va yapuka vekolelo, kuenje va litoma lohali ya lua.”​—⁠1 Timoteo 6:​9, 10.

Oco hẽ omunu o pondola ndati oku sanga ombembua yovutima lesanju komuenyo? Omanu valua va siata oku sima okuti, ka kuli olonumbi vi kuatisa oku sanga ombembua yaco. Pole, ovisimĩlo viaco viuhembi. Ocipama cikuãimo, cika lombolola eci omanu va sukila oku linga oco va kuate esanju komuenyo.

[Elitalatu kemẽla 3]

Anga hẽ ovokuasi, lekemãlo kuenda oku lilongisa calua kosikola ci ku kuatisa oku sanga ombembua yovutima?