Ove hẽ wa Siata Oku Liyaka Lovisimĩlo Vĩvi?
MANJI umue ufeko o tukuiwa hati, Lena wa liyaka lovisimĩlo vĩvi vokuenda kuanyamo alua. Eye wa popia hati: ‘Omuenyo wange wa fetika oku nyõleha tunde vutila. Momo eci nda kala omõla akuenje va enda oku lipekela lame. Eci ndi sokolola elaviso liaco, ndi litenda ndomunu umue ka kuete vali esilivilo.’ Manji ukuavo ufeko o tukuiwa hati, Simone, wa popiavo hati: ‘Eci ndi sokolola omuenyo wange wo vutila, ndi kuata ovisimĩlo viokuti, si kuete vali esilivilo.’ Koloneke vilo, esumuo li tunda kovisimĩlo vĩvi, lia livokiya calua. Kofeka yo Australia kuli ovingungu vimue viasapulo via siata oku eca olonumbi kamalẽhe. Ovingungu viaco via popia hati: ‘Tua siata oku tambula asapulo amalẽhe valua va telefonala kokuetu. Valua pokati kavo, va lombolola okuti va kasi oku liyaka lovisimĩlo vĩvi.’
Olonoño vimue via lombolola hati, omanu va siata oku sima okuti, ka va kuete esilivilo omo lioku tatiwa lãvi la vakuavo. Ovo va siata oku kuata ovisimĩlo viaco eci va sepuiwa, loku va lundila kuenda oku va linga ovina vikuavo vĩvi. Ovina viaco vi nyõla ekalo liomunu kuenda vi tepulula esanju liaye. Esapulo limue liolondotolo lia lombolola okuti, omanu vana va kasi oku liyaka lovisimĩlo vĩvi, ka va kuete ekolelo la vakuavo. Momo eci va kala pokati ka vakuavo va litenda ndomanu ka va kuete esilivilo. Omo liaco, ka va tẽla oku kuata ukamba la vakuavo. Esapulo liaco liamisako hati: ‘Omanu vaco va sanda lika oku likokela ovitangi.’
Omanu vana va kasi oku liyaka lovitangi viaco, Embimbiliya li va tukula hati, ‘vakuatatahãi o vutima.’ (Osamo 94:19) Ovo va sima okuti, ka va kuete esilivilo. Eci va liyaka locitangi cimue, va fetika oku li kapa ovo muẽle ekandu. Ndaño okuti va pandiyiwa la vakuavo omo liovilinga viavo viwa pole, ka va kolela kepandiyo liaco. Momo va sima okuti va kasi oku pandiyiwa lombambe. Omanu vaco omo lioku sima okuti ka va sesamẽla oku kuata esanju komuenyo, va siata oku nyõla ekalo liavo. Kuenje eci va liyaka lovitangi ka va tẽla oku tamãlala oco va yule ovitangi viaco. Manji Lena wa tukuiwa kefetikilo liocipama cilo, wa pita lovitangi vialua omo lioku sima okuti ka sesamẽla oku sumbiwa la vakuavo. Eye wa popia hati: ‘Si kuete elavoko lioku pongolola omuenyo wange.’
Anga hẽ omanu vana va kasi oku liyaka ‘latatahãi ovutima,’ vakamamako lovitangi viaco? Kuli hẽ cimue va sukila oku linga oco va yule ovisimĩlo viaco? Embimbiliya li kuete olonumbi via siata oku kuatisa omanu valua oku yula ovisimĩlo ka via sungulukile. Vipi olonumbi viaco? Kuenda ndamupi via siata oku kuatisa omanu va sumua? Ocipama cikuãimo, cika tambulula apulilo a votuiwa ndeti.