Longisa Omãla Vove
Timoteo—Wa Lipongiyile Kuenda wa Kala Lombili Yoku Vumba
“OVE wa li pongiya ale?” Eteke limue va ku lingile ale epulilo ndeli?— Pamue omunu o yongola oku kũlĩha nda wa liangiliya ale. Kuenje oku pula ndoco: ‘Wa pongiya ale alivulu ove? Wa pongiya ale ovipama vio kosikola?’ Ndomo tuka ci konomuisa vocipama cilo, Timoteo wa lipongiyile.
Timoteo wa kala ukuambili. Wa kũlĩha eci ci lomboloka oku kala ukuambili?— Eci Timoteo a lalekiwa oku vumba, wa lekisa ocituwa cufendeli ukuavo wa Suku, una wa popia hati: “Ame ulo, va nume ño.” (Isaya 6:8) Omo Timoteo wa kala ukuambili, wa kuatele omuenyo umue wesanju. Anga hẽ o yongola oku kũlĩha vali ovina viatiamẽla kokuaye?—
Timoteo wa citiwila kimbo lio Lustra lia kala ocipãla lo Yerusalãi. Inakulu yaye Loisi la inaye Eunike, va kuatele ocituwa coku lilongisa Ovisonehua. Ovo va fetika oku longisa Timoteo Ondaka ya Suku tunde vutila.—2 Timoteo 1:5; 3:15.
Eci handi Timoteo a kala umalẽhe, Paulu la Barnaba va nyula o Lustra kungende wavo watete woku kunda. Votembo yaco, oco ina ya Timoteo kuenda inakulu yaye va linga Akristão. O yongola hẽ oku kũlĩha ovitangi Paulu la Barnaba va pita lavio?— Omo omanu va suvukile Akristão, va sosola Paulu lovawe, kuenda vo kokela kosamua yimbo. Ovo va simĩle okuti wa fa.
Vana va tavele kueci Paulu a longisa vo ñuala kuenje eye wa katuka. Keteke likuavo, upostolo Paulu la Barnaba va enda kumue kuiñi, noke yokatembo kamue va tiukila ko Lustra. Kuenje Paulu wa sapuila vamanji hati: “Ka tu iñila vusoma wa Suku te lohali ya lua.” (Ovilinga 14:8-22) Wa kũlĩha eci Paulu a yonguile oku popia?— Eye wa lekisa okuti vana va vumba Suku va pondola oku liyaka lalambalalo. Noke Paulu wa sonehela Timoteo hati: ‘Vosi va panga oku kala lomuenyo wesunga lia Suku vaka lambalaliwa.’—2 Timoteo 3:12; Yoano 15:20.
Eci Paulu la Barnaba va tunda ko Lustra, va tiukila konjo. Noke liolosãi vimue, Paulu wa ambata Siluano oku pasuisa olondonge vina va longisile kungende watete. Timoteo wa sanjukile calua eci Paulu a pitila ko Lustra! Esanju lia Timoteo lia li vokiya vali eci a lalekiwa oku talavaya kumue la Paulu kuenda Siluano. Eye wa tava kelaleko liaco, kuenje wa lekisa onjongole kuenda ombili yoku vumba.—Ovilinga 15:40–16:5.
Katatu kavo va linga ovongende alua lonaviyu. Noke va endela posi oku tunda ko Tesalonike toke ko Helasi. Ovo va kuatisa omanu valua oku linga Akristão. Pole vakuavo va temele calua kuenje vongolola owiñi oku linga onjuela. Paulu, la Siluano kuenda Timoteo, va tilila ko Berea momo omuenyo wavo wa kala kohele.—Ovilinga 17:1-10.
Paulu wa sakalalele la vana va tava ndopo ko Tesalonike, kuenje wa tuma Timoteo oku tiukilako. Wa kũlĩha esunga liaco?— Noke Paulu wa lomboluila Akristão ko Tesalonike hati: ‘Tuo tuma okuti o vu kolisi, loku vu lungula, oco ko ka konyõhi.’ Wa kũlĩha esunga lieci Paulu a tumila Timoteo oku linga ungende waco?— Timoteo ka kũlĩhĩwile lovanyali, kuenda wa kala lombili yoku tiukilako. Ca sukilile utõi walua! Ungende waco wa enda ndati? Eci Timoteo a tiuka, wa sapuila Paulu okuti ekolelo lia va Tesalonike lia li vokiyile calua. Omo liaco, Paulu wa va sonehela hati: “Omo ekolelo liene li tãi, oco tuo lembelekiwili.”—1 Va Tesalonike 3:2-7.
Noke Timoteo weya oku talavaya la Paulu vokuenda kuekũi lianyamo. Oku sulako Paulu wa kapiwa vokayike ko Roma, kuenda Timoteo, una okuti ndopo a tundile vokayike, wa enda kokuaye. Paulu osimbu a kala vokayike wa tuma Timoteo oku u sonehelako ovikanda ha vi tumisa ku va Filipoi. Paulu wa popia hati: ‘Ndavoka oku u tumisi ndopo Timoteo, momo si kuete ukuavo wa lisoka laye.’—Va Filipoi 2:19-22; Va Heveru 13:23.
Hesanjukuolio Timoteo a kuata omo liolondaka evi! Paulu wa solele calua Timoteo omo liombili yaye. Onjongole yetu yeyi okuti ove o kalavo ukuambili.
Apulilo:
○ Timoteo wa citiwila pi, kuenda nye ca pita laye eci Paulu a nyula onjanja yatete imbo liaco?
○ Nye Timoteo a linga eci a lalekiwa oku talavayela kumue la Paulu kuenda Siluano?
○ Timoteo wa lekisa ndati utõi, kuenda momo lie Paulu o solelele calua?
[Elitalatu kemẽla 18]
Nye ceya oku pita?