Va Tetulula Ocitangi Lolondunge

AKUENJE vamue vatatu vocifuka co Afrika, va yonguile oku enda kohongele yofeka vocikanjo cavo. Nye va sukilile oku linga oco va pitile kocitumãlo caco? Va sukilile oku linga ungende u kuete ocinãla ci pitahãla 90 kolokilometulu. Omo okuti ka va kuatele ocendelo, va nõlapo oku undila olosikaleta vitatu, okuti ka via kaile ciwa.

Ukulu umue wekongelo vocikanjo, wa limbuka ocitangi cavo, kuenje wa vondika osikaleta yaye yosimbu, oco va linge ungende wavo. Noke wa va lomboluila eci va sukilile oku linga poku sokiya ungende woku enda kohongele yofeka. Ukulu wekongelo wa va sapuila hati, katatu kavo va pondola oku endela kosikaleta yimosi. Ndaño ca lelukile oku tetulula ocitangi caco, pole, va sukilile oku linga eliangiliyo liwa. Omanu vatatu va tẽla ndati oku endela kosikaleta yimosi?

Oco va linge ciwa ungende wavo okuti ka va yevi utanya, kelivala liomẽle va kapa apunda vavo kosikaleta. Tete umue pokati kavo wa endisa osikaleta, osimbu vakuavo vavali vo kuama konyima. Noke yoku enda ci soka 500 kolometulu, wa talama kuenje, wa kundika osikaleta yapunda avo vuti umue okuti ca lelukile vakuavo oku yi mõla oco ka yika “nyaniwe.” Manji wa endisa tete osikaleta wamamako loku endela posi.

Vakuavo vavali eci va sanga osikaleta yaco, umue pokati kavo wa endisakovo ci soka 500 kolokilometulu osimbu vakuavo va endela posi. Omo lieliangiliyo liwa va sokiya, vosi yavo va tẽla oku linga ungende wavo woku endela posi ci soka 90 kolokilometulu okuti va u linga lika ci soka 60 kolokilometulu. Ocili okuti, va likolisilako oku linga ungende waco. Kuenje va li sanga lavamanji kohongele yofeka kuna va li tekula lokulia kuespiritu. (Esin. 31:​12) Ove hẽ, unyamo ulo wa linga eliangiliyo lioku enda kohongele yofeka vocikanjo cove?