Apulilo Valingiwa Lavakuakutanga
Elivulu lia Nehemiya 8:10, NW, li vetiya va Yudea okulia “ulela.” Pole, Ocihandeleko ci sangiwa kelivulu Liovisila 3:17, ci popela hati: ‘Ko ka li ovina vi kuete ulela.’ Ovinimbu viaco vi kuete ndati elitokeko?
Vupopi watete, elivulu lia Nehemiya 8:10, lia pongolola ondaka “ulela,” ci lekisa okuti, ondaka yaco ya litepa, levi vi sangiwa kelivulu Liovisila 3:17, via pongoluiwa hati ‘ko ka li ovina vi kuete ulela.’ Kelimi lio Heveru ondaka che’lev ya pongoluiwa hati “ulela,” ndomo ya tukuiwa kelivulu Liovisila 3:17, yi lomboloka ulela wovinyama ale womanu. (Ovis. 3:3; Olong. 3:22) Ocinimbu 17 ci lekisa okuti, va Isareli va sukilile oku yuvula okulia ulela u sangiwa kovãla, koviongo, kuenda oku yuvula okulia olongẽla viovinyama via enda oku eciwa ndovilumba. Momo, “ulela waco wosi wa Yehova.” (Ovis. 3:14-16) Omanu va sukilile oku yuvula okulia ulela wovinyama via enda oku eciwa ndovilumba ku Yehova.
Ondaka ya pongoluiwa hati, ‘ovina vi kuete ulela,’ yi sangiwa kelivulu lia Nehemiya 8:10, yi lomboloka okuti, mash·man·nim.’ Ondaka eyi, yi tukuiwa lika onjanja yimosi Vovisonehua vio Heveru. Oyo yopiwa kondaka yi popia hati, sha·men,’ yi lomboloka “oku amamako loku lẽla.” Olondaka evi, vi lomboloka oku kuata ekalo liwa. (Sokisa lelivulu lia Isaya 25:6.) Olondaka viaco vi lombolokavo hati, she’men, via siata oku pongoluiwa hati: ‘Ulela woliveira.’ (Esin. 8:8; Ovis. 24:2) Ndomo elivulu lia Nehemiya 8:10 li tukula ondaka yaco hati, mash·man·nim,’ yi lomboloka okulia kua telekiwa lulela walua, kuenda ositu yi kuete osepo yalua. Pole, va Isareli va sukilile oku yuvula okulia ulela wovinyama via lẽla.
Ndaño va Isareli va sukilile oku yuvula okulia ulela wovinyama via lẽla, pole, va enda okulia ovina vipepa. Ovikulia vimue ndeci, ekende liosema yepungu ka va endele oku kapamo ulela wovinyama via lẽla. Pole, va enda oku kapamo ‘ulela woliveira.’ (Ovis. 2:7) Elivulu Estudo Perspicaz das Escrituras, li lekisa okuti, ‘ovina vi kuete ulela,’ vi lomboloka ovikulia vipepa via pongiyiwa lulela womana.
Akristão va sukila oku ivaluka okuti, onumbi yoku yuvula okulia ulela, yatiamẽlele Kocihandeleko Suku a ecele ku Mose. Pole cilo, ka tu sukila vali oku pokola Kocihandeleko caco coku eca ovinyama ndovilumba.—Va Rom. 3:20; 7:4, 6; 10:4; Va Kol. 2:16, 17.