Ocivaluka?

Ove hẽ wa sola oku tanga ovipama Viutala Wondavululi via sandekiwa volosãi via pita? Nda wa vi sola, seteka oku tambulula apulilo a kuãimo:

• Etu Tuakristão, momo lie ci kuetele esilivilo oku amamako lesunguluko lietu?

Oku amamako lesunguluko lietu, ku eca uvangi wokuti tu kasi oku pokola kuviali wa Yehova wocisola kuenda tu kasi oku lekisa okuti Satana ohembi. Handi vali, esunguluko lietu li lekisa ndomo Suku aka tu sombisa, kuenda li kuete esilivilo kelavoko lietu.—15/12, kemẽla 4-6.

• Olonduko vipi viekemãlo vi situlula ocikele ca Yesu vocipango ca Suku?

Omõla wongunga. Ndaka. Amene. Kapitiya kocisila cokaliye. Ocitunda Cinene. Ombuto ya Likuminyiwa.—15/12, kemẽla 15.

• Eci Eliya a kala oku likutilila oku pinga ombela, momo lie a sapuilila ukuenje waye hati, vanja kokalunga? (1 Olos. 18:43-45)

Eliya wa lekisa okuti wa kũlĩhĩle ciwa ndomo ombela yi pondola oku loka. Alende ana a katuka vokalunga, a ñuala ofeka yosi kuenje a loka ombela.—1/1, kemẽla 15-16 kelimi Lioputu.

• Tu pondola ndati oku vokiya esanju lietu kupange woku kunda?

Tu pondola oku pongiya utima wetu, loku u tiamisila koku kuatisa vakuetu. Tu sukila oku kunda locimãho coku fetika oku songola alilongiso Embimbiliya. Eci tu liyaka locitangi comanu vana ka va lekisa onjongole, tu pongolola olonjila vietu vioku kunda oco tu kuatise omanu va lekisa onjongole vocikanjo cetu.—15/1, kemẽla 8-10.

• Anga hẽ uveyi wovilundu via tukuiwa Vembimbiliya, haiwo umuamue wo koloneke vilo?

Ombuto yuveyi u tukuiwa hati ovilundu, wa kala ale kosimbu. (Ovis. 13:4, 5) Embimbiliya li tukulavo ovilundu vi molehẽla kuwalo kuenda volonjo. “Ovilundu” viaco citava okuti vi lomboloka epuka liuveyi waco. (Ovis. 13:47-52)—1/2, kemẽla 19 kelimi Lioputu.

• Elongiso Liembimbiliya li pongolola ndati ovisimĩlo Viakristão viatiamẽla kovituwa kuenda kovihilahila vi lingiwa polonambi?

Ndaño okuti Ukristão o sumua omo lioku pesela ngandiaye kolofa, eye wa kũlĩha okuti ava va fa lacimue va kũlĩha. Nda epata lina ka li lilongisa Embimbiliya li pisa ocituwa caye, eye o yuvula ovituwa viosi vieca uvangi woku kolela okuti ava va fa va pondola oku linga cimue kuava va kasi lomuenyo. Akristão vamue poku yuvula ovitangi, va soneha ovina viosi va yongola okuti ovio vi lingiwa ponambi.—15/2, kemẽla 29-31.

• Ndomo ca lekisiwa Kosamo 1:1, ovina vipi vitatu tu sukila oku yuvula oco tu kuate esumũlũho?

Ocinimbu caco ci tukula oku “endaenda lalungulo olondingaĩvi,” oku “talayama vonjila ya vakuakandu,” kuenda oku “tumayala komangu ya vakuakupembula.” Oco tu kuate esumũlũho, tu sukila oku yuvula omanu vakuakupembula ale vana va tomba ovihandeleko via Suku. Pole, tu sukila oku sanjukila ovihandeleko via Yehova.—3/1, kemẽla 17 kelimi Lioputu.

• Anga hẽ, alivulu a tukuiwa Vembimbiliya ndeci, “elivulu lia Yasiare” kuenda “elivulu Liovita via Yehova,” a nyelẽla? (Yeh. 10:13; Ate. 21:14)

Sio. Alivulu aco citava okuti a lomboloka alivulu amue o kosimbu okuti ka a sonehiwile lekuatiso liespiritu sandu, pole, asonehi Vembimbiliya va enda oku tukula alivulu aco.—15/3, kemẽla 32.

• Epongoloko lipi lia lingiwa koloneke vilo poku pongoluila Embimbiliya velimi lio Latin?

Kunyamo wo 1979, Papa João Paulo II wa tava oku sandekiwa Kuembimbiliya limue li tukuiwa hati, Nova Vulgata lia pongoluiwa velimi lio Latin. Vembimbiliya liatete, mua kala onduko ya Suku okuti kelimi liaco yi tukuiwa hati, Iahveh. (Etu. 3:15; 6:3) Pole, eci kua sandekiwa elivulu liavali kunyamo wo 1986, povinimbu vina va sonehele onduko ya Suku okuti kelimi liaco, Iahveh, va piñaiyamo onduko Dominus okuti [Ñala].—1/4, kemẽla 22 kelimi Lioputu.