Yesu Kristu Esapulo Liaye li Vetiya Omanu

Usonehi umue wa popia hati: “Ovilinga viulume umue ukualondunge wo ko Kafarinau, toke cilo vi kasi oku vetiya ovitima viomanu valua.”a—GREGG EASTERBROOK.

OLONDAKA, vi kuete unene. Olondaka via noliwa lolondunge, vi vetiya ovitima, vi eca elavoko, kuenda vi pongolola omuenyo womanu. Voluali ka muli omunu wa popia olondaka vi kuete unene ndevi via Yesu Kristu. Ulume umue wa yeva olondaka via Yesu vina via kũlĩhĩwa okuti Ohundo yo Komunda, wa soneha hati: “Eci Yesu a mala olondaka evi, oco owiñi womanu wa komoha okulongisa kuaye.”—Mateo 7:28.

Olondaka Yesu a popia keteke liaco, via kũlĩhĩwa lomanu valua voluali. Kũlĩhĩsa vimue pokati kolondaka viaco.

“Ko tẽla oku vumba Suku kuenda ukuasi.”—Mateo 6:24.

“Ovina viosi vu yongola okuti omanu vo linga haivio vu va linga.”—Mateo 7:12.

“Evi via Kaisare vi eci ku Kaisare, levi via Suku vi eci ku Suku.”—Mateo 22:21.

“Esumũlũho li tunda koku eca olio lia lua, eli li tunda koku tambula li sule.”—Ovilinga 20:35.

Yesu ka popele lika olondaka via posoka. Esapulo a kunda, lia kuata unene momo wa longisa omanu ocili catiamẽla ku Suku, ndomo va kuata esanju liocili, kuenda wa lekisa ndomo Usoma wa Suku u ka tetulula ovitangi viosi viomanu. Poku kũlĩhĩsa esapulo liaco, tu limbuka esunga lieci Yesu a kasilili oku amamako oku vetiya “ovitima viomanu valua.”

[Atosi pombuelo yamẽla]