Ovina Yesu a Longisa Viatiamẽla Kusoma wa Suku

“[Yesu] wa pita kovaimbo anene lo kovaimbo atito oku kunda, ... ondaka yiwa yusoma wa Suku.”—LUKA 8:1.

ETU, tu sole calua oku vangula ovina vi kuete esilivilo kokuetu, levi vi kasi vutima wetu. Eli olio esunga lieci Yesu a popela hati, “eci ca siata vutima oco omẽla u popia.” (Mateo 12:34) Poku konomuisa ovina Yesu a popia vokuenda kupange waye woku kunda, tu limbuka okuti eye wa velisilepo calua Usoma wa Suku.

Usoma wa Suku u lomboloka nye? Usoma u lomboloka uviali u songuiwa losoma yimue. Omo liaco, Usoma wa Suku, uviali umue wa tumbikiwa la Suku. Yesu wa vangula calua catiamẽla Kusoma wa Suku, okuti owo wa kala ondaka ya velapo kesapulo liaye. Vavanjeliu ondaka Usoma, yi sangiwamo eci ci pitahãla 110 kolonjanja. Pole Yesu ka longisile lika lolondaka. Ovilinga viaye via longisavo ovina vialua viatiamẽla Kusoma wa Suku kuenda eci owo u ka linga.

Helie Soma yaco? Osoma Yusoma wa Suku, ka ya nõliwile lomanu kocela, pole, ya nõliwa la Suku. Ovina Yesu a longisa via lekisa okuti, eye wa nõliwa la Suku oco a linge Osoma yaco.

Yesu wa kũlĩhĩle ciwa ovitumasuku Viembimbiliya via popele okuti Mesiya, o ka viala Vusoma waco otembo ka yi pui. (2 Samuele 7:12-14; Daniele 7:13, 14; Mateo 26:63, 64) Ivaluka okuti, Yesu wa lisituluile okuti eye muẽle Mesiya wa likuminyiwile. Yesu wa kũlĩhĩle okuti eye Osoma ya nõliwa la Suku. (Yoano 4:25, 26) Omo liaco, olonjanja vialua, wa enda oku popia hati, “usoma wange.”—Yoano 18:36.

Yesu wa longisavo okuti, ku ka kala omanu vakuavo va ka viala kumue laye Vusoma waco. (Luka 22:28-30) Eye wa va tukula hati, ‘okacunda’ momo etendelo liavo litito. Wa va sapuila hati: “Isiene wa panga oku wihi usoma.” (Luka 12:32) Elivulu lia sulako Vembimbiliya li lekisa okuti, kuli etendelo li soka 144.000 komanu va kuete esumũlũho lioku viala kumue la Kristu.—Esituluilo 5:9, 10; 14:1.

Usoma wa Suku u kasi pi? Yesu wa sapuila Pondiu Pilatu soma yo ko Roma hati, ‘Usoma wange hawokilulieveko.’ (Yoano 18:36) Usoma wa Suku, una u ka songuiwa la Kristu, ka u ka kuata oseketa yimue palo posi. Olonjanja vialua Yesu wa tukula Usoma wa Suku okuti, “usoma wokilu.”a (Mateo 4:17; 5:3, 10, 19, 20) Omo liaco, Usoma wa Suku u lomboloka uviali wo kilu.

Yesu otembo a kala oku linga upange waye palo posi, wa lavokaile oku tiukila kilu. Kuenje poku lekisa okuti kuli omanu vamue va ka viala kumue laye kilu wa popia hati, “ngenda oku va angiliyila ocitumãlo.”—Yoano 14:2, 3.

Usoma wa Suku u ka tẽlisa nye? Yesu wa longisa olonjeveleli viaye oku likutilila ku Suku hati: “Usoma wove wiye. Ocipango cove ci lingiwe posi ndeci ci lingiwa kilu.” (Mateo 6:9, 10) Usoma wa Suku wa fetika ale oku viala kilu. Usoma waco, owo ocimãleho Suku a ka tẽlisa laco ocipango caye palo posi. Owo u ka linga apongoloko a komõhisa kilu lieve oco ocipango ca Suku ci tẽlisiwe.

Usoma wa Suku u ka linga nye palo posi? Yesu wa longisa okuti Usoma wa Suku u ka mãlako evĩho liosi, poku kundula olondingaĩvi. (Mateo 25:31-34, 46) Eci ci lekisa okuti ka ku ka kala vali evĩho ndaño olondingaĩvi. Ndomo Yesu a ci popia, voluali mu ka tunga lika omanu vana “vomboka,” vakuesunga, vakuahenda, “va yela vutima,” haivo vakuambembua.—Mateo 5:5-9.

Anga hẽ omanu vaco vakuekolelo va ka kala vali voluali lua vĩhisua? Sio! Yesu wa likuminya okuti Usoma wa Suku u ka linga apongoloko a komõhisa kilu lieve. Ulume umue wa laikele oku pondiwa kumue la Yesu wa popia hati: “[A Yesu] eci wiñila vusoma wove, njivaluke.” Yesu wo kumbulula hati: ‘Etaili, hu sapuila ocili okuti, o ka kala kumue lame vofeka Yelau.’ (Luka 23:42, 43) Ocili okuti, Usoma wa Suku u ka pongolola ilu lieve oco lu linge ofeka yelau ndeci ca kala kefetikilo vocumbo Cedene.

Ovina vipi Usoma u ka lingila omanu? Yesu ka likuminyile lika eci Usoma wa Suku u ka linga. Pole, wa lekisavo ovina vi ka lingiwa. Eye wa sakula omanu valua locikomo, kuenje wa lekisa eci a ka linga kovaso yoloneke vokuenda Kuviali waye. Evanjeliu poku tukula ovina Yesu a linga, lia popia hati: “Wa ñuala ñuala vo Galilea yosi, wa longaisa volosunangonga viavo. Wa kunda kunda ondaka yiwa yusoma. Wa sakula ovovei osi lafengi osi o pokati komanu.”—Mateo 4:23.

Yesu wa sakula ovovei alua. Eye “wa letulula ovaso omunu wa citiwa omeke.” (Yoano 9:1-7, 32, 33) Lohenda yalua wa sakula ulume umue wa kuata ovilundu. (Marko 1:40-42) Eci vo nenela ulume umue “ocisitatui, haeye o popia ocilaka,” Yesu wa lekisa okuti o tẽla oku “yevisa ovisitatui, kuenda ovitende vi popia.”—Marko 7:31-37.

Ivaluka okuti ndaño muẽle olofa ka via tatekele Osoma ya nõliwa la Suku oku linga eci a panga. Olonjanja vitatu, Yesu wa pindula omanu va file. Wa pinduile omõla ongunga wocimbumba, kafeko umue wa kuata 12 kanyamo, kuenda ekamba liaye Lasaru.—Luka 7:11-15; 8:41-55; Yoano 11:38-44.

Vonduko yupostolo Yoano, Yesu wa lekisa ovina vi komõhisa vi lavoka vana va ka vialiwa Lusoma wa Suku. Eye wa popia hati: “Tala, onjo ya Suku yi kasi pokati komanu. Eye o tunga lavo, va linga omanu vaye, kuenje Suku eye muele, o kala lavo, o linga Suku yavo. Eye o puenya asuelela osi kovaso avo. Okufa ka ku kalako vali, ndaño oku lila loku liyula lupongo laviovo ka vi kalako vali. Momo ovina viatete via pita.” (Esituluilo 1:1; 21:3, 4) Sokolola ño oku kala voluali lumue okuti ka muli oku lila, esumuo, ohali, kuenda oku fa! Kotembo yaco, ocipango ca Suku ci ka lingiwa posi ndeci ci kasi oku lingiwa kilu.

Otembo yipi Usoma wa Suku wiya? Yesu wa longisa okuti usoma waye, u ka fetika oku viala kotembo yi likuata leyi a tukula hati, ‘yetukuluko’ liaye. Vocitumasuku caco, Yesu wa tukula ovina vialua oco a lekise otembo etukuluko liaye li ka fetika. Otembo yaco, yi limbukiwila kovitangi vialua ndeci, ovoyaki, onjala, ovilemawe, afengi, kuenda evokiyo lioku tomba ovihandeleko. (Mateo 24:3, 7-12; Luka 21:10, 11) Ovina vialua Yesu a tukula, via fetika oku muiwa oku upisa kunyamo wo 1914, eci kua pita Uyaki Watete Voluali. Cilo, Yesu o kasi oku viala Ndosoma. Ndopo Usoma waco wiya oku tẽlisa ocipango ca Suku palo posi.b

Oku iya Kusoma wa Suku, ku ka lomboloka nye kokuove? Ondaka eyi, ya tamba ño kokuove ndomo o kapako esapulo lia Yesu.

[Atosi pombuelo yamẽla]