Yesu wa likuminya hẽ kondingaĩvi hati o ka kala kilu?

Omanu va linga epulilo eli omo liohuminyo Yesu a linga kondingaĩvi ya kala ponele yaye yokuti, o ka kala laye Vofeka Yelau. Yesu wa popia hati: ‘Etaili hu sapuila okuti, o ka kala kumue lame Vofeka yelau.’ (Luka 23:43) Ocili okuti, Yesu ko sapuilile oku Ofeka yelau yi ka kala. Olondaka via Yesu vi lekisa hẽ okuti ondingaĩvi yaco yi ka kala laye kilu?

Catete, tu kũlĩhĩsi eci ondingaĩvi yaco ya sukilile oku linga oco yi kuate omuenyo ko pui kilu. Omanu vana va kuete elavoko lioku enda kilu, va sukila oku papatisiwa vovava, lespiritu sandu okuti va linga olondonge via Yesu, oco va taviwe ndomãla va Suku. (Yoano 3:3, 5) Va sukilavo oku pokola kolonumbi via Suku, kuenda oku lekisa ovituwa viwa ndeci, oku kala vakuacili, oku lekisa epandi kuenda ohenda. (1 Va Korindo 6:9-11) Handi vali, va sukilavo oku lekisa ekolelo liavo ku Suku kuenda ku Kristu toke kesulilo liomuenyo wavo palo posi. (Luka 22:28-30; 2 Timoteo 2:12) Nda va kapako olonumbi viaco, va lekisa okuti va sesamẽla epinduko kuenda oku tambula ovikele va lavoka oku kuata kilu ndeci: Oku kala ovitunda kuenda olosoma la Kristu oco va viale omanu vokuenda kuohulukãi yanyamo.—Esituluilo 20:6.

Ondingaĩvi ya kala ponele ya Yesu, ka ya tẽlisile ovina via tukuiwa ndeti, momo ya fa lundingaĩvi waye. (Luka 23:32, 39-41) Ocili okuti, eye wa lekisa esumbilo poku sapuila Yesu hati: “Eci wiñila vusoma wove, njivaluke.” (Luka 23:42) Pole, eye ka papatisiwile, loku wavekiwa lespiritu sandu oco a linge ondonge ya Yesu, ka lekisile okuti ukuesunga, kuenda ka pandikisile lekolelo vokuenda kuomuenyo waye. Ca sunguluka hẽ okuti Yesu o likuminya komunu umue oku ka viala laye kilu ndaño ka lekisile ekolelo kuenda epandi?—Va Roma 2:6, 7.

Kũlĩhĩsa ndoco: Nda omunu umue oku pinga ongecelo omo liolombongo a ku nyana, citava okuti ku kisika omunu waco oku ku tiuwila olombongo viove. O tava hẽ oku wĩha vali ocikele coku songuila olomĩlu viove ale oku tata epata liove? O pondola lika oku eca ocikele caco komunu una wa kolela. Cimuamue haico ci pita la vana va kuete elavoko lioku ka kala kilu. Ovo va sukila oku lekisa okuti va koleliwa kuenda va ka pokola kolonumbi via Suku viesunga, eci va ka viala omanu. (Esituluilo 2:10) Ndaño ondingaĩvi yaco ya lekisa esunguluko kesulilo, pole ka ya lekisile ekolelo kovina via tukuiwa ndeti.

Yesu ka sapuilile hẽ ondingaĩvi hati, o ka kala laye kilu keteke o linga ohuminyo yaco? Sio, hacoko, momo Yesu ka endele kilu keteke liaco. Eye wa ‘kala veyambo oloneke vitatu.’ (Mateo 12:40; Marko 10:34) Noke yepinduko, wa kala palo posi ci soka 40 koloneke, osimbu ka endele kilu. (Ovilinga 1:3, 9) Omo liaco, ondingaĩvi ka ya kuatele epuluvi lioku enda la Yesu kilu keteke liaco.

Vofeka yi pi yelau ondingaĩvi yi ka kala? Noke yepinduko, eye o ka kala Vofeka yelau palo posi, vemẽhi liuviali wa Yesu. (Ovilinga 24:15; Esituluilo 21:3, 4) Oco o lilongise ovina vikuavo viatiamẽla kofeka yelau kuenda eci Suku a yongola, sapela Lombangi yimue ya Yehova.