Apulilo Vatambuluiwa
◼ Ocikele cipi omunu lomunu a kuete oco vosi vope esilivilo kolohongele? (Esin. 31:12)
Omo lioku lekisa esumbilo ku Yehova kuenda kaliangiliyo aye, omanu vosi va vetiyiwa oku pitĩla selo kolohongele, kuenda oku lekisa onjongole yoku longisiwa laye. Omo liaco, tu sukila oku tumala kovaso, oco olonjali vi kuete omãla vatito kuenda vana va cilua, va tumale kolomangu vio konyima. Osimbu ohongele ka ya fetikile, tu sukila oku yika olotelefone ale oku tepulula ocileñi oco ka vika lingile onjuela vakuetu. Nda omanu vosi vonjango yusoma va lekisa ovituwa viesumbilo, lomue o tatekiwa oku upa esilivilo kolohongele.—Uku. 5:1; Va Fil. 2:4.
Eci omunu umue a fetika oku endaenda kolohongele, manji una wo kũlĩha ciwa, ci tava okuti o tumala pamosi laye. Oku ci linga, ci kuete esilivilo, ca piãla enene nda omunu waco o kuete omãla vatito va sukila oku tatiwa. Citava okuti oku endaenda kolohongele, ocina cimue cokaliye vepata. Omo liaco, ovo va sanjuka calua nda va tumala kolomangu vio konyima okuti, nda va yongola oku tunda posamua lomõla, ka va lingila ombuanja vakuavo. (Olosap. 22:6, 15) Apata va kuete omãla vatito va sukila oku tumãla pamosi oco omãla vavo ka va ka kuate epuluvi lioku linga onjuela. Nda onjali yi yongola oku longa omõlaye, ale oku eca ekuatiso limue kokuaye, o sukila oku tunda laye Vonjango Yusoma, kuenda oku tiuka laye noke.
Vamanji vakuakutumãlisa, va kuete ocikele coku talavaya oco ovina vi endisiwe ciwa vonjo yefendelo. Ovo va sukila oku pitila selo oco va kuatise apata kuenda vana va siata oku cilua okuti va sanga olomangu vioku tumãla. Vamanji vakuakutumãlisa poku kuatisa omanu oco va sange olomangu, va ci linga lutate kuenda esumbilo oco ka va ka lingile ombuanja vakuavo. Eci ku moleha ocitangi cimue, va ci tetulula lutate. Nda omõla umue o linga ombuanja, ovo vo kuatisa locisola.
Omanu vosi veya kohongele, va sukila oku lekisa ovituwa via sunguluka, oco tu longisiwe ciwa ovina viatiamẽla ku Yehova locipango caye coku tumbika oluali luokaliye palo posi muna mu ka kala ombembua lesunga.—Va Hev. 10:24, 25.