Upange Umue u Kuete Esilivilo Lia Velapo
1. Nye ci vokiya ombili yetu kupange woku kunda?
1 Momo lie tua siatela oku vetiyiwa oku pesila otembo yetu, ongusu, kuenda ovina tu kuete kupange woku kunda? Momo upange waco, u kuete esilivilo lia velapo! Poku sokolola ndomo upange waco u kasi oku amamako, ci vokiya ombili yetu yoku linga upange waco, momo ka u ka pituluiwa vali.—Ovil. 20:24.
2. Upange woku kunda u kuatisa ndati oku sumbila onduko yavelapo ya Yehova?
2 Oku Sumbila Onduko ya Yehova: Upange woku kunda u lekisa okuti, Usoma wa Yehova una u kasi peka lia Yesu Kristu, u ka piñainya ovosoma osi, kuenda u ka tetulula ovitangi viosi viomanu. (Mat. 6:9, 10) Yehova eye lika o pondola oku tu yovola koku vela, kuenda kolofa. (Isa. 25:8; 33:24) Omo okuti tuambata onduko yaye, vana va siata oku mola ovituwa vietu viwa kuenda ombili yetu, va pondola oku eca esivayo kokuaye. (1 Pet. 2:12) Hesanjukuolio tu kuete, omo lioku sapula onduko ya Yehova okuti, eye Suku Tõlo voluali luosi!—Osa. 83:18.
3. Vana va tava kesapulo Liusoma, va tambula asumũlũho api?
3 Oku Popela Ovimuenyo: Yehova “ka yongola okuti umue o nyõleha, puãi o yongola okuti vosi va likekembela akandu avo.” (2 Pet. 3:9) Nda ka kuli laumue o longisa, omanu va kũlĩha ndati ovina Yehova a tenda okuti, via sunguluka, ale ka via sungulukile? (Yona 4:11; Va Rom. 10:13-15) Nda omanu va tava kolondaka viwa, va pongolola ekalo liomuenyo wavo, kuenda va siapo ovituwa vĩvi. (Mika 4:1-4) Handi vali, va kuata esanju omo lielavoko liomuenyo ko pui. Ombili yetu kupange woku kunda loku longisa, yi tu popela etu muẽle, kuenda vana va tu yevelela. (1 Tim. 4:16) Tu kuete ocikele cimue cinene kupange owu wa velapo!
4. Momo lie tu sukilila oku likolisilako kupange woku kunda Usoma loku longisa omanu oco va linge olondonge?
4 Ndopo ohali ya lua yi keya ocipikipiki, kuenje yi ka nena esulilo lioluali lulo lua vĩha. Vana va fendela Yehova va ka popeliwa. Upange woku kunda loku longisa omanu oco va linge olondonge, una u kasi oku lingiwa koloneke vilo, u kuete esilivilo lia velapo, kuenda u sukila oku lingiwa lonjanga. Omo liaco, tu pitisi kovaso upange waco komuenyo wetu!—Mat. 6:33.